Read Yambeta Mə́líʼkus 8 Bible Online

Mə́líʼkus 8 - Yambeta bible

Mə́líʼkus 8

¹A mədúg mə́mmú, pɔɔd pə́yə́yiilən piíŋ kɔ áay kɛnɔ kɛ́ Yə́sus ayɛ́ɛ. Ná yɛɛ́dála lɛ́ pɔ́dɛɔ́gɔ na yoom ɛ́ konɛ, yɛɛ́dɔ́ŋɔn paaʼkan pə́ə́ŋ, ɔnɔ́ na pɔ́lɛ́:

²«Mbilígɔɔ́ʼkɔn yəə́ʼkisiəd kɛ́fɔlɛ́ na pɔɔd póonɛ lɛ́ mədúg mádáád áa móonɛ pálɛɛ́ əgiim pínjə́njən, pə́ndigi kə́mmú na yoom ɛ́ konɛ.

³Mbəʼkusəə áay nɛ́gɔŋ lɛ́ púúləni pagaadɛ iyó, pə́mmú pə́ədə́əŋ a ngə́ ná toɛn toáʼkoman a nkó. Piíŋ pálɛ kɔ pá pə́míim pádɛ́ɛman laálá.»

⁴Paaʼkan pə́ə́ŋ pə́yímuyúlísíni pɔ́nɔ́: «Pəsi aa póonɛ a kɛnɔ kɛ́ kifələ́ə́n. Ə́lə́ə́ áa tɛɔ́gɔɔŋ anɛ́ɛ́n moom mó tɛlɛɛ́ págaabɛn ungim nyóonɛ ánɛ, ə́yíid əə́?»

⁵Yə́sus əyíbuŋíən ɔnɔ́ na pɔ́lɛ́ əə: «Pugóódi pɛlɛ́ɛd pɛ́sɛ́g áay əə́?» Náa pɔ́nɔ́: «Tigóódi pɛlɛ́ɛd pɛ́ʼtáan na pɛ́baan áanɛ.»

⁶Náa ɔnɔ́ ungim ə́ləndin a nsí. Yiísiə́d pɛlɛ́ɛd pɛ́ɛb pɛ́ʼtáan na pɛ́baan, amɛ́ʼkɛn pisoyidiʼ na Táán, aábɛ́ŋa, amɛ́ʼkɛn na paaʼkan pə́ə́ŋ lɛ́ páaban ungim. Pááság kaaba.

⁷Pígóodi moyaa mó pusú tɛn kɔ áay. Yə́sus aáság kusiəd pusú póob, amɛ́ʼkɛn pisoyidiʼ na Táán, amɛ́ʼkɛn na paaʼkan pə́ə́ŋ lɛ́ páaba tɛn.

⁸Ungim nyɔ́ ayɛ́ɛ kɔ yɛɛ́nɛ́, əə́yíid. Paaʼkan pɛ́ɛ́gómmánɛ pɛbɛŋ pɛ́ pɛ́ɛ́lɔ́b, piə́yə́ə́g mɔsaŋɛʼ móʼtáan na móbaan.

⁹Kɔmɔɛ́d lɛ́ pɔɔd pá pɛ́ɛ́nɛ́ moom móom páyɛ́ɛ yoom wɔnɔ́ tɔ́ɔ́sɛn ɛ pɔɔd íniʼ. Ná páyɛ́ɛ páʼkoman konɛ́ɛnɛ, áay aa Yə́sus ayɛ́bodɛánɛ lɛ́ púúləni.

¹⁰Ná ungim ayɛ́ɛ aáʼkɛɛn, nyɔ́lɛ́ aáság kudíin abag a kɛʼkɔ́m na paaʼkan pə́ə́ŋ, pááyaag nsɛ́ɛ́ ɛ noom, pámɛ́ɛn a kɛsom kɛ́ nsí kɛ́ Talamanóʼta.

¹¹Pafalɛsɛyɛ́ɛŋ pə́yíímən kɔ áay kɛnɔ kɛ́ Yə́sus ayɛ́ɛ, pɔ́ɔsɔyɔ na nyɔ́lɛ́. Páyɛ́ɛ əguunə kumudə́əŋi a kisindiʼ. Píísə́ə́ pɔ́nɔ́ na nyɔ́lɛ́: «Ɛɛlɛ kɛálɛ́ʼkán kɛ́ kíəbiíloodi lɛ́ Táán áa əyíím ágoodom.»

¹²Yə́sus əyíísímid na toɛn, náa ɔnɔ́ na pɔ́lɛ́: «A igə aa ɔsɛg wóonɛ ó nɛ́gɔŋ ólɛɛ́ əgiŋíən lɛ́ nyɛ́ɛlɛ kɛálɛ́ʼkán páádála əgín na əngis yɔ́ɔ́bɔn ə́? A fɔ́lɔ́b ndabodɛ́anɛ na pəŋi ɔsɛg wóonɛ ó nɛ́gɔŋ lɛ́ pudiə́giim agɛɛn na kɛálɛ́ʼkán ɔmbɔ́ kímuʼ.»

¹³Ná yiísə́ə́ náan, aáság kodɛ́ɛmɛn, aábág a kɛʼkɔ́m na paaʼkan pə́ə́ŋ, əmúúlíni koyaag nsɛ́ɛ́ ɛ noom.

¹⁴Agɛɛn koɔ́bɔn, paaʼkan pə́yə́bə́líí kusiəd pɛlɛ́ɛd agɛɛn na pɛ́lɛ́. Pígóodi əgín kɛlɛ́ɛd kímuʼ súg na pɔ́lɛ́ a kɛʼkɔ́m.

¹⁵Yə́sus yiísiə́d tɔgɛ́ɛ́ agoboyááganan mbaŋ, ɔnɔ́: «Pólóʼkɔd na kinudiʼ umbúb kɛ́ Pafalɛsɛyɛ́ɛŋ na kɛ́ pɔɔd pá ɛgɔny yɛ́ Ɛlóod pógódíí!»

¹⁶Ná paaʼkan páyóób náan, pə́ə́bə́ə́ kəə́lúluu kɔ pɔ́lɛ́ na pɔ́lɛ́ pɔ́nɔ́: «Alɛ əgusəə náan lɛ́ wɔnɔ́ ná tidiiminií tísiəd pɛlɛ́ɛd pɛ́ tɛánɛ!»

¹⁷Yə́sus yɛɛ́lɛ́ŋ nkə kɛ́ɛg kɛ́ páyɛ́ɛ afɛga. Náa ɔnɔ́ na pɔ́lɛ́: «Polɛ əgəə́lúluu poɔʼkɔ́ mbə́səə náan a oʼto wóonɛ lɛ́ pudiimin púsiəd pɛlɛ́ɛd pɛ́ poánɛ a? Puligi podɛób əgín ə́! Puligi pondɛŋ á! Nsiŋ yaaŋan iligi idiə́buə́níí anyóon a!

¹⁸Polɛ əngis angás, náa podɛɔ́gɔ agodɛ́ʼtɛganan a! Ntóɛŋ yaaŋan ɛlɛ mbuənə́ə́n, náa podɛɔ́gɔ agoóbanan a[25]! Əgín kɔ áanɛ nɛ́gɔŋ, pundigi agaáyɔ́ɔ́ŋɛ

¹⁹pɛlɛ́ɛd pɛ́ʼtáan pɛ́ nyɛɛ́bɛ́ŋa, mbáábɛn tɔ́ɔ́sɛn ɛ pɔɔd ɛ́ʼtáan a? Adɛ́ ungim yɛɛ́nɛ́, piə́lub ə́? Pɛbɛŋ pɛ́ pɛ́ɛ́lɔ́bɔn, poɛ́báda, pííyə́ə́g a mɔsaŋɛʼ mósɛ́g mó poyɛ́ɛ́n na mólɛ́?» Náa paaʼkan pə́ə́ŋ pɔ́nɔ́ na nyɔ́lɛ́: «Mɔsaŋɛʼ mówád na móbaan.»

²⁰Yə́sus ayɛ́ɛ́n na tɔgɛ́ɛ́ yuudi ɔnɔ́: «Áyɔ́ŋɛ́an tɛn wɔnɔ́ ná nyɛɛ́bɛ́ŋa pɛlɛ́ɛd pɛ́ʼtáan na pɛ́baan agaabɛn tɔ́ɔ́sɛn ɛ pɔɔd íniʼ páánɛ́. Mɔsaŋɛʼ mósɛ́g áa muíyə́ə́g na pɛbɛŋ pɛ́ pɛ́ɛ́lɔ́b, pomáyɛɛn na pɛ́lɛ́?» Pə́yímuyúlísíni pɔ́nɔ́ na nyɔ́lɛ́: «Móʼtáan na móbaan.»

²¹Náa Yə́sus ɔnɔ́ na pɔ́lɛ́: «Puligi podɛób á? Puligi podɛób lɛ́ adɛ́njaŋ kɛbán kɛ́ pɛlɛ́ɛd aa ndɛɛ́ əgusəə?»

²²Yə́sus ayɛ́ɛ́n əgiig na paaʼkan pə́ə́ŋ a nigúu nímmú pɔ́ɔdɔ́ŋɔn lɛ́ Pɛdsáyída. Kɔ́gɔ́ɔg, pɔɔd pə́yíím pə́súidə mɔɔd o woog nyummú agɛɛn na nyɔ́lɛ́ kɛnɔ kɛ́ Yə́sus alɛɛ́. Pááság komoyɔ́sɔ́gɔlɔn lɛ́ ámodɔ́bɛd ná yóom.

²³Yə́sus aáság kugumin mɔɔd nyóon a ombɔg, aálón pálɛ́ɛg na nyɔ́lɛ́. Ná páyɛ́ɛ páʼkolon pálɛ́ɛg, Yə́sus aáság koliɛda pɛda a əngis á mɔɔd nyóon, amámoyábɛ́gɛn ombɔg a oʼto, náa ɔnɔ́ na nyɔ́lɛ́: «Mɔɔ́n wo mbáa, olɛ agodála yoom o?»

²⁴Ongwongwóg nyóon aáság kaásɛn əngis, náa ɔnɔ́: «Ɛɛ́ɛ, ndɛ agodála pɔɔd, pálɛ wɔnɔ́ piɛd, náa pálɛ agodáŋana.»

²⁵Yə́sus aáság kiiʼkiniʼ kodɔ́bɛd əngis á mɔɔd nyóon na ɔmbɔg yə́ə́ŋ. Ná mɔɔd ayáásɛn kə́mmú əngis, yándɛ moááŋ, oóʼkoom, aándadɛ́ʼtɛganan kɔŋɛʼ.

²⁶Náa Yə́sus ɔnɔ́ na nyɔ́lɛ́: «Úúli anɛ́ɛ́n a noádɛʼ noáŋ, udinjúlíni kosɔd a pálɛ́ɛg.»

²⁷Yə́sus ayɛ́ɛ́n na paaʼkan pə́ə́ŋ a əʼkúu yə́mmú, ndúmiʼ na Səsalə́ə ɛ Filíib. Pálɛ anɛ́ɛ́n kɔ a ngə́, aáság kuŋíən na paaʼkan pə́ə́ŋ ɔnɔ́ əə: «Kɛnɛŋ kɛ́ pɔɔd pálɛ agosɔyɔ əə, pálɛ əgusəə lɛ́ ndɛ ánɛ ə́?»

²⁸Pə́yímuyúlísíni pɔ́nɔ́ na nyɔ́lɛ́: «Pə́mmú pálɛ əgusəə pɔ́nɔ́ olɛ Sɛ́aŋ Ɔsɔgɛn pɔɔd. Pɔsɔ́g pə́mmú pɔ́nɔ́ olɛ Ɛlɛ́as. Pə́mmú tɛn pálɛ əgusəə pɔ́nɔ́ olɛ ɔndɔɛgɛʼ pɛbán o Táán nyummú wɔnɔ́ pɔsɔ́g pá kalaʼ.»

²⁹Náa Yə́sus ɔnɔ́ na pɔ́lɛ́: «Oo, a nɛáŋan nɛ́ pəŋibáamɔɛ́d anɛ́ɛ́n ə́ə, poɔʼkɔ́ ndɛ ánɛ ə́?» Píɛ əyímuyúlísíni ɔnɔ́: «Olɛ Məsíi.»

³⁰Yə́sus aáság koboyááganan mbaŋ na toɛn, ɔnɔ́: «Pádɛʼtɛánɛ náan na mɔɔd wɛndɛ́ŋ.»

³¹A ngim yɛ́ɛy, Yə́sus əə́bə́ə́ kaaʼkananɛ paaʼkan pə́ə́ŋ, ɔnɔ́: «Mɛ Mɔɔ́n o mɔɔd nkóódi lɛ́ nnɛ ntɔ́b kɛ́fɔlɛ́. Pasaá pá nigúu na puʼkúm pó payaaganɛʼ pɛfɔny na palɛŋ pɛcɛm pálɛ́ɛ́ kiʼtəm, páyɛnjoon. Náa, mɔɔ́s mádáád a ngim yɛ́ɛy, ndɛ́ɛ́ kiiʼkini kiim nyóndɛg.»

³²Náan aa yɛɛ́sɔ́yɔ na paaʼkan pə́ə́ŋ moááŋ. Píɛ aáság kumuə́súidin a ɛbá agosɔyɔ na nyɔ́lɛ́. Ayɛ́moóbɛ́n a nkə kɛ́ɛg kɛ́ yɛɛ́sɔ́yɔ, ɔnɔ́ na nyɔ́lɛ́: «Tuə́ áa olɛɛ́ ogosɔyɔ náan, Sə́dúk! Tɔgɛ́ɛ́ toáŋ tóod tólɛ tobɛ́!»

³³Ná Píɛ yiísə́ə́ náan, Yə́sus əyímuyə́dúgídíí, əə́bisin paaʼkan pə́ə́ŋ əngis, əə́bə́ə́ kosásan Píɛ, ɔnɔ́: «Sáʼtan wɔnɔ́ wɛ! Liog a mɛ udi, ə́suídíí laálá. Mafɛgaʼ mááŋ móom má olɛɛ́ na mɔ́lɛ́ mɔ́dɛɔ́gɔ mafɛgaʼ má Táán, málɛ má pɔɔd.»

³⁴Ná ayɛ́ɛ aáʼkosásan Píɛ náan, yɛɛ́dɔ́ŋɔn ungim nyɔ́ ayɛ́ɛ kɔ áay, na paaʼkan pə́ə́ŋ kɛ́, ɔnɔ́ na pɔ́lɛ́: «Mɔɔd əməʼkusəə lɛ́ əəginjə́ən, óliogi ɔʼtɛ́m na nyɔ́lɛ́nyɔ́amɔɛ́d, yə́lúú ɔmbásá wə́ə́ŋ, ná yíim anɛ́ɛ́n yínjə́ən.

³⁵Kɛ́lɛ lɛ́, wɛ nyɔ́ wɔʼkɔ́ wamaʼkanɛ ɔlaa wááŋ, wɛ nyóon olɛ́ɛ́ koʼtaŋ wólɛ́. Kɔmɔɛ́d lɛ́ nyɔ́ alɛ́ɛ́ koʼtaŋɛɛ́ ɔlaa wə́ə́ŋ a kidíídí kɛ́am, na a kɛ́ Tɔsɔm Tólaŋ, wɛ nyóon aa olɛ́ɛ́ kɔɔyɛɛ́.

³⁶Mɔɔd amaʼkɛɛn na tugúm tuim tó a nsí, náa ɔlaa wə́ə́ŋ olɛɛ́ undióŋóón, amɛ́ɛ́lɛ nkə aa nyóon?

³⁷Ímuʼ na ímuʼ yɛ́ mɔɔd alɛɛ́ ogɛɛ́ʼkɛn agɛɛlɛ lɛ́ áwɛɛna ɔlaa wə́ə́ŋ, ɛ́dɛɔ́gɔ.

³⁸Mɔɔd amaʼkɛɛn lɛ́ aagoob oʼto kono na mɛ a udi ó pɔɔd póonɛ pá nɛ́gɔŋ pá pádɛ́agoóbɛnɛɛ́ Táán, páagɛɛlanɛ kɔbɛ́, aágaáŋa na tɔgɛ́ɛ́ tóam, mɛ Mɔɔ́n o mɔɔd ndɛ́ɛ́ tɛn koob oʼto kono na nyɔ́lɛ́ ná ndɛ́ɛ́ kimbuúlini a nugəm nó Táán Sɛ waam, ondáŋ na pəfúfúŋ pá məŋun má maʼtom.»