Read Yambeta LÓʼKAS 10 Bible Online

LÓʼKAS 10 - Yambeta bible

LÓʼKAS 10

¹A ngim yɛ́ɛy, Sə́dúk əyííyid a ondáŋ ó paaʼkan pə́ə́ŋ, nto ɛ pɔɔd yimmú əʼtin ádáád na pówád [na pábaan][48], əmə́budə́nígə́ni pábaan pábaan lɛ́ páyaŋ agɛɛn a udi wə́ə́ŋ, a pálɛ́ɛg ngim, na a pɛnɔ piim pɛ́ nyɔ́lɛ́nyɔ́amɔɛ́d yiígóodi lɛ́ yíig kɔ.

²Ayɛ́bodɛánɛ ɔnɔ́: «Pigólí pɛ́ nibug pɛ́lɛ piíŋ a pɔlɛ́m, náa pəgud kɔ pɔ́dɛɔ́gɔ piíŋ. Poɔ́sɔ́gɔlɔn mɔɔd o moom lɛ́ yíim ádom pɔɔd a nibug niə́ŋ agaáyɛn náan.

³Todáan, mbáboodóm wɔnɔ́ pɔɔ́n pá todóm a kɛgaágadɛ kɛ́ pəŋəŋúug.

⁴Poándagɛɛn, podɛnjábóŋɛ́náá na pɛbalɛ́ pɛ́ ongɛn, ɔmbɔ́ mɔɔnɛ́, na pabalábá a ambaan. Podɛsánánɛ kɛnɛŋ əgiim púsoyidəni pɔɔd na ngə́ na ngə́.

⁵A yoog yɛ́ poɔ́sɔd a yɛ́lɛ́, yaŋáan osoyidi pɔɔd pá pálɛɛ́ kɔ poɔʼkɔ́: “Uŋóón wɛ́ɛn a yoog yɛ́ɛnɛ aá!”.

⁶Mɔɔd nyɔ́ alɛɛ́ na uŋóón amaʼkɛɛn a yoog yɛ́ɛy, uŋóón wááŋan wáagɛɛn na nyɔ́lɛ́. Náan fiɛ́d, póyɛɛn na pisoyidiʼ pɛáŋan pɛ́ uŋóón.

⁷Ləndínəən kɔ a noádɛʼ nóon. Nkə kiim kɛ́ páaboyɛ́ʼkɛn, pónɛ, póŋo lɛ́ ungim nyɔ́ alɛɛ́ agɛɛlɛ pigólí ogóódi lɛ́ yɔ́sɔ́sɛd ombɔg a pɛ́lɛ́. Pudiyíím púfíoŋ lɛ́ polɛ a yoog yɛ́ɛnɛ, polɛ a yɛ́ʼkága, ndóo.

⁸«A pálɛ́ɛg ngim yɛ́ poɔ́sɔd kɔ náa pə́mə́líʼtíníí lɛ́ púləndin, nɛ́an nkə kiim kɛ́ páaboyɛ́ʼkɛn.

⁹Pabámbany pá pálɛɛ́ kɔ, póboyóómanɛ. Pódɛ́anɛ na ungim poɔʼkɔ́: “Nɛlaamɛʼ nɛ́ Táán nɛándɛ a ɛbá yááŋan ó!”.

¹⁰Náa, puməʼkiig a pálɛ́ɛg yimmú, pə́dibusiə́d kɔ kɔŋɛʼ, todáan a pɛdom, pódɛ́anɛ na ungim poɔʼkɔ́:

¹¹“Taa, ummúndúŋ ó pálɛ́ɛg yaaŋan wó óyɛ́ɛ wáʼkaálába a ambaan yə́ə́s áa wóonɛ timə́gídə́ə́. Náa, kɛbán kímuʼ lɛŋáan poɔʼkɔ́: Nɛlaamɛʼ nɛ́ Táán niə́ʼkiig”.»

¹²«Ndabodɛ́anɛ lɛ́: A wɔɔ́s ó pɛyɔm, Táán adɛndɛ́ɛ́ kolaŋ konyɛ́nɛn pɔɔd pá a Sodóom[49] wɔnɔ́ ná alɛ́ɛ́ konyɛ́nɛnɛɛ́ pɔsɔ́g pá a pálɛ́ɛg yɛ́ɛy.

¹³Maan na wɛ Kɔlasɛ́ɛŋ! Maan na wɛ Pɛdsáyída lɛ́ mangán má máyáyɛ́lɛ́ɛ́ a pəŋi, máyáyɛ́ɛlɛnɛ náan a Tíil na a Sɛdɔ́ɔŋ, ná pɔɔd pá a pabálɛ́ɛg póob páyɛ́ɛ́lɛ ɔndɛɛ kɔ́gɔ́ɔg kalaʼ, pə́ə́ləndin kidí, pámáagasɛ ɔlaa wɔ́ɔ́bɔn!

¹⁴Ɛɛ́ɛ, a wɔɔ́s ó pɛyɔm, Táán adɛndɛ́ɛ́ kolaŋ konyɛ́nɛn pɔɔd pá a Tíil na Sɛdɔ́ɔŋ wɔnɔ́ ná alɛ́ɛ́ kobonyɛ́nɛnɛɛ́ pəŋi.

¹⁵A wɛ Kaʼpɛlɛnáyum, waafɛg lɛ́ pálɛ́ɛ́ kogobágɛdɛ súʼtə́ə́ a mɔɛn á? Ndóo, pálɛ́ɛ́ kuguúsuuli a piíd[50]»

¹⁶Náa Yə́sus ɔnɔ́ kə́mmú na paaʼkan pə́ə́ŋ: «Nyɔ́ amáboyóób pəŋi, amɛ́njoób mɛ. Nyɔ́ amáboodó pəŋi, amɛ́ɛʼtó tɛn mɛ. Náa kɛ́lɛɛ́ lɛ́ nyɔ́ amɛ́ɛʼtó mɛ, aádó tɛn nyɔ́ əyíím yɛ́ʼtom.»

¹⁷Paaʼkan póob əʼtin ádáád na pówád [na pábaan] pááság kɛɛn. Pə́yímbuúlíni na tɔnyɔ́g síɛ́ɛ́d a ɔʼtɛ́m, pɔ́nɔ́: «Paabá, ayɛ́ɛ tɛmaʼkoʼpɔ́mɛd a niiŋ nɛáŋ, ɔmbɔ́ məŋun má mabɛ́ máyɛbɛyóóbɛn.»

¹⁸Náa Yə́sus ɔnɔ́ na pɔ́lɛ́: «Ɛɛ́ɛ, njɛ́ɛ agodɛ́ʼtɛ́g wɔnɔ́ ná Sáʼtan ɛyɛ́ɛ yiim ɛ́gásɛg kɔ́gɔ́ɔg a mbálámɔɛn wɔnɔ́ ɛdáányɛ́, íyiim ədə́əŋ a nsí.

¹⁹Pólɛŋ lɛ́ njɛ́boyɛ́ʼkɛn toɛn tóonɛ lɛ́ pugíʼtən ɔmbɔ́ nkud oo, ɔmbɔ́ mogɔ́sɔ́ɔ́[51] óo, yoom ɛ́dɛboyɛ́ɛ́lɛ. Polɛ na toɛn tɛn tóonɛ lɛ́ pónyɔŋ ɔmbɔ́ məŋun má toɛn miim má máaboónɔɛyɛ pɛdá, yoom ɛ́goboyɛ́ɛlɛ kɔbɛ́ fiɛ́d.

²⁰Kɛbán kímuʼ, podɛnnyɔ́ga lɛ́ məŋun má mabɛ́ málɛ agoboyóbɛn, náa Pɔ́nyɔ́ga agá lɛ́ əngiŋ yááŋan yándɛ əʼtiídílə́ a mɔɛn.»

²¹Əgín a kɛnɛŋ kɛ́go kɛ́ɛg, Uŋun wó Ufúlúʼtú óyɛ́ɛ́lɛ lɛ́ tɔnyɔ́g túyə́əg Yə́sus a ɔʼtɛ́m síɛ́ɛ́d, əə́bə́ə́ kosɔyɔ nɛŋo a mɔɛn, ɔnɔ́: «Pisoyidiʼ na wɛ Paabá, Sə́dúk wo nsí na mɔɛn! Nkə kɛ́ oyɔ́sɛ́gɛn na pá pálɛɛ́ afɛga lɛ́ pɔ́lɛ́ pálɛ na nsiŋ, páálɛŋ agaáyɛn pɔsɔ́g, oyásɛ́nɛn na pá pə́əgəə́siəd wɔnɔ́ muyənjə́g. Ɛɛ́ɛ, Paabá, náan aa kíyígugə́mmi lɛ́ wɛ́ɛlɛ a kɔdɛ́ɛ ɔʼtɛ́m koáŋ.

²²Mbáa ayɛ́nyɛɛ́ʼkɛn muim a ɔmbɔg yáam. Mɔɔd ɔdɛɔ́gɔ kɔ nyɔ́ aálɛŋ ánɛ aa alɛɛ́ Mɔɔ́n ná kɛ́sánɛn əgín lɛ́ Mbáa nyɔ́lɛ́nyɔ́əsíŋ. Mɔɔd ɔdɛɔ́gɔ tɛn kɔ nyɔ́ aálɛŋ ánɛ aa alɛɛ́ Mbáa ná kɛ́sánɛn əgín lɛ́ Mɔɔ́n nyɔ́lɛ́nyɔ́əsíŋ na pá aányɔ́ŋɛn lɛ́ ə́buúloodi ánɛ aa alɛɛ́ Sɛ.»

²³Yə́sus aáság kaágasɛ agosɔyɔ na paaʼkan pə́ə́ŋ ɔnɔ́ a pɔ́lɛ́: «Kɔŋɛʼ igə na pəŋi lɛ́ əngis yááŋan álɛ agodɛ́ʼtɛg nkə kɛ́ polɛɛ́ agodála!

²⁴A fɔ́lɔ́b, ndabodɛ́anɛ lɛ́ palɔɛgɛʼ pɛbán pá Táán piíŋ na puʼkúm puíŋ poɛ́nyɔ́ŋɛn lɛ́ ná páádála nkə kɛ́ pəŋi polɛɛ́ agodála nɛ́gɔŋ, pádɛʼkáadála. Pɛ́ɛ́nyɔ́ŋɛn lɛ́ ná pámóób nkə kɛ́ pəŋi polɛɛ́ agoob nɛ́gɔŋ, pádɛʼkáagoob.»

²⁵Náa ɔndɛŋ pɛcɛm nyummú əə́də́əmini tɔgɛ́ɛ́. A ɛdɔ́lɛg aa yiíŋíən na Yə́sus ɔnɔ́ əə: «Kɛlág, nkə aa nyɛ́lɛɛ́ agɛɛlɛ lɛ́ nyɛ́ɛn na ɔlaa ó pɛnɛŋ piim əə́?»

²⁶Náa Yə́sus ɔnɔ́ na nyɔ́lɛ́: «Kɛ́lɛ kidiídílə́ a kálaʼtaʼ ɛ pɛcɛm lɛ́ nkə? Wɛɛ́nyɔ́amɔɛ́d ə́ə, olɛ agobana kɔ lɛ́ nkə ə́?»

²⁷Náa mɔɔd ɔnɔ́ na nyɔ́lɛ́: «Kɛ́lɛ kidiídílə́ kɔ lɛ́: “Nyɔ́ŋɛn Sə́dúk Táán waaŋ na ɔʼtɛ́m wááŋ ungim, na ɛdáányɛ́ yááŋ yiim, na toɛn toáŋ tuim, na mafɛgaʼ mááŋ miim. Nyɔ́ŋɛn tɛn sɔ́g mɔɔd wɔnɔ́ wɛɛ́nyɔ́amɔɛ́d[52]”.»

²⁸Yə́sus əyímuyúlísíni ɔnɔ́ na nyɔ́lɛ́: «Ɛɛ́ɛ, waálɛŋ kinyuúlisini. Ɛɛlɛ náan, wagɛɛn na ɔlaa ó pɛnɛŋ piim[53]»

²⁹Wɔnɔ́ ná ɔndɛŋ pɛcɛm nyóon ayɛ́ɛ anyɔ́ŋɛn kaánɔna, yiíŋíən kə́mmú ɔnɔ́ əə: «Ánɛ aa alɛɛ́ sɔ́g mɔɔd waam əə́?»

³⁰Náa Yə́sus əə́muúsiədin nkaʼtɛ́n yɛ́ɛnɛ, ɔnɔ́: «Mɔɔd a nyóon əyíím ádɛ́ɛmɛn a Yolósalɛm əgusuu a Yəlíʼko. A ngə́, piíbən pááság kodam pə́muúgumin, pámámoóbɔ́g nkə kiim kɛ́ yiígóodi, pámámobáám əgín náanɛ ɔʼtɛ́m úmmuʼ, pááság kudi pə́mə́muudí ongam na kugu.

³¹«A ngim yɔɔbɔn, ɔnjaaganɛʼ pɛfɔny nyummú aáság kudíin yiim asan a ngə́ ɛgo yɛ́ɛy. Ná yɛɛ́dála mɔɔd nyóon, aáság kaágɛɛŋɛ laálá, aásán.

³²«Yoom tɛn náan ímuʼ a ngim yəəŋ, mɔɔd nyɔ́ a palaa Lə́fi aáság kiim əgiig tɛn kɔ áay. Ná nyɔ́lɛ́ tɛn yɛɛ́dála mɔɔd nyóon, aáság kaágɛɛŋɛ, aásán.

³³Náa mɔɔ́n ó Səməlíi nyummú əə́díin yiim əgiig, aágaáyɛ́ɛnɛn wə́ə́ŋ ongɛn. Ná əyíím əgiig kɔ áay, yɛɛ́dála wɔnɔ́ ná mɔɔd nyóon alɛɛ́, maan mááság kumuúsiəd na nyɔ́lɛ́.

³⁴Aáság kusuu a nnyambɛlɛʼ yəəŋ, amáyɛ́ʼtɛ́nɛ́ɛ́ a ɛbá yə́ə́ŋ, əə́sumə́nə́n məgúd na maloʼ[54] a pufə́ŋ puə́ŋ, aágóda na pabándáas. Aáság komonyáŋɛn, amámoyáág a nnyambɛlɛʼ yəəŋ, amɛ́ɛn na nyɔ́lɛ́ a yoog ɛ pəən. Kɔ́gɔ́ɔg aáság kolɛŋ kɛɛn əmuugóʼton.

³⁵«A koany kaáyɛnɛ, aáság kolónɛ pisúg pɛ́ mɔɔnɛ́ pɛ́baan, amɛ́ʼkɛn na mɔɔd o noádɛʼ nó pəən nóon, ɔnɔ́ na nyɔ́lɛ́: “Ííí, tíin ólɛŋ kodɛ́ʼtɛg mɔɔd nyóonɛ. Nkə kiim kɛ́ wəə́díin oyósag kə́mmú a mɔɛn a ngim yaam a nkó yəəŋ, ndəguyúlisini əgimbuúlini kóam.” »

³⁶«Əguyibənən, Yə́sus yiíŋíən na ɔndɛŋ pɛcɛm nyóon ɔnɔ́ əə: “A pɔɔd póob pádáád, oyaán áa yiílóódi lɛ́, sɔ́g mɔɔd anyóon piíbən pɛ́báám ə́?” »

³⁷Náa ɔndɛŋ pɛcɛm nyóon ɔnɔ́: «Sɔ́g nyɔ́ yiísiə́d maan na nyɔ́lɛ́ aa yiílóódi náan.» Yə́sus aáság kusəə ɔnɔ́ na nyɔ́lɛ́: «Tod, wɛ tɛn wɛ́ɛlɛ náan aá.»

³⁸Yə́sus alɛ anɛ́ɛ́n a ngə́ agɛɛn na paaʼkan pə́ə́ŋ, pááság kɛɛn alon a nigúu nímmú. Yə́sus nyɔ́lɛ́ aáság kɛɛn a nó ɔʼkɛ́ɛd nyummú kɔ niiŋ lɛ́ Mááʼtaʼ. Mááʼtaʼ aáság kumuúsiəd kɔŋɛʼ.

³⁹Ɔʼkɛ́ɛd nyóon yiígóodi tɛn móŋŋí wəəŋ nyɔ́ ɔʼkɛ́ɛd niiŋ lɛ́ Malɛ́a. Móŋŋí wəəŋ nyóon aáság kɛɛn ələndin a ɛbá ɛ́ Yə́sus, agoob ndə́b yəəŋ.

⁴⁰Mááʼtaʼ nyɔ́lɛ́ ayɛ́ɛ agaábáam káanɛ a maʼtom má yoog kɛɛlɛ. Aáság kiim ná Yə́sus alɛɛ́, náa ɔnɔ́ na nyɔ́lɛ́: «Sə́dúk, kɛ́mágodɛ́ɛ́ wɛ náan wɔnɔ́ ná móŋŋí waam yiʼtííníí maʼtom miim mɛnyɔ́əsíŋ ə́? Ɛ́modɛánɛ, yíim əgiʼkóomin.»

⁴¹Náa Sə́dúk ɔnɔ́ na nyɔ́lɛ́: «Mááʼtaʼ, Mááʼtaʼ wɛ! Olɛ agaábáam, waásósog a pɛbán piíŋ.

⁴²Kɛbán kɛmɔɛ́d kɛ́laŋ kɛ́lɛ kímuʼ. Kɛ́ aa kɛ́ɛnɛ Malɛ́a amásóŋɛ́ɛ́, kɛ́lɛ yoom yɛ́ yádɛ́ɛ́ agaáyɛn náan. Ɛ́dɛɔ́gɔ ɛ́ mɔɔd komogábɛn tɛn.»