Read Yambeta LÓʼKAS 11 Bible Online

LÓʼKAS 11 - Yambeta bible

LÓʼKAS 11

¹Yə́sus ayɛ́ɛ wɔɔ́s wúmmú a pɛɔ́sɔ́gɔ́lɔ́n kɛnɔ. Ná ayɛ́ɛ aáʼkoman kɔɔ́sɔ́gɔlɔn, mɔɔ́n wəəŋ ogaaʼkan nyummú aáság kusəə ɔnɔ́ na nyɔ́lɛ́: «Sə́dúk, ɛ́bɛyáʼkánánɛ kɛɛlɛ pɛɔ́sɔ́gɔ́lɔ́n wɔnɔ́ ná Sɛ́aŋ Ɔsɔgɛn pɔɔd ayáʼkánánɛ paaʼkan pə́ə́ŋ.»

²Náa Yə́sus ɔnɔ́ na pɔ́lɛ́: «Poɔ́ndɔgɔɔ́sɔ́gɔlɔn, púsəə poɔʼkɔ́: “Paabá, ɛɛlɛ lɛ́ ungim álɛŋ ánɛ aa olɛɛ́, Nɛlaamɛʼ nɛáŋ níim,

³Ɛ́bɛyɛ́ʼkɛn ɛ́nɛ́ wɔɔ́s, moom mó konɛ mó moásɛʼtan na pəsi.

⁴Íbilísin a mabɛ́ mə́ə́s lɛ́ pəsibáamɔɛ́d tɛn tɛlɛɛ́ əgulisin ungim nyɔ́ alɛɛ́ agɛbɛyɛ́ɛlɛ pəsi kɔbɛ́. Udiyíbiidí lɛ́ tídə́əŋ a pɛásɔ́sɛ́n”.»

⁵Yə́sus əyíʼkíni kusəə ɔnɔ́ na pɔ́lɛ́: «Tísələə́n lɛ́: Nyummú a ondáŋ wááŋan alɛ na sɔ́sɔ́g wəəŋ, áság kɛɛn amoóboan na ɔʼtɛ́m wó udúg, ɔnɔ́ na nyɔ́lɛ́: “Sɔ́g waam, ɛ́fáŋɛ́ pɛlɛ́ɛd ɔmbɔ́ pɛ́dáád

⁶lɛ́ sɔ́g waam nyummú aáʼkɛndónɛn, alɛ agɛɛn ongɛn, ntigóodi yoom yɛ́ ndɛɛ́ ogomoyɛ́ʼkɛn lɛ́ ánɛ.”

⁷Sɔ́sɔ́g wəəŋ nyóon əməʼkiim ə́muyúúlisini kɔ́gɔ́ɔg a yoog kusuu a kaadɛ, ɔnɔ́: “Odɛyɛ́ndɛ́san, mbə́ʼkəə́buəg. Tɛáʼkɛ́mmɛŋɛn lɛ́ na mɛ pɔɔ́n na mɛɛ́nyɔ́amɔɛ́d. Ntɛɔ́gɔ ugiiʼkini kodɛ́ɛmɛn əgiim ogooyɛ́ʼkɛn pɛlɛ́ɛd.”

⁸A fɔ́lɔ́b, ndabodɛ́anɛ anɛ́ɛ́n lɛ́ ɔmbɔ́ adɛʼkɛ́ɛ anyɔ́ŋɛn kodɛ́ɛmɛn a oʼto wóonɛ lɛ́ sɔ́sɔ́g wəəŋ áa alɛɛ́nɔ lɛ́ yíim ámoyɛ́ʼkɛn nkə kɛ́ alɛɛ́ anyɔ́ŋɛn, aadɛ́ɛmɛn a oʼto wóonɛ lɛ́ sɔ́g wəəŋ nyóon ɔdɛɔ́gɔ agodɔm kogɔʼtɔn a táán.»

⁹«Ɛɛ́ɛ, ndabodɛ́anɛ nyɔʼkɔ́: Ɔɔŋɔ́nɔɔn, páaboyɛ́ʼkɛn. Uunə́ən, poɔgɔɔŋ. Kɔdɛ́daan a udíyoog, pə́əbuúbuən.

¹⁰Kɛ́lɛ lɛ́, nyɔ́ ɔɔ́gɔɔŋɔn, páamoyɛ́ʼkɛn. Nyɔ́ əə́guunə, ɔɔgɔɔŋ. Nyɔ́ ɔɔ́gɔdɛd a udíyoog, pə́əmuúbuən.

¹¹[55] Wɛ sɛ a mɔɔ́n oyaán áa olɛɛ́ ogɛɛlɛ lɛ́ mɔɔ́n waaŋ amaʼkogoyɔ́ɔŋɔn ɛyɛ́g, óomoyɛ́ʼkɛn agá uʼkud ə́?

¹²Ɔmbɔ́ lɛ́ amaʼkomoyɔ́ɔŋɔn nɛbom, áamoyɛ́ʼkɛn agá ɛgɔ́sɔ́ɔ́?

¹³Kɛ́maʼkɛɛn náan lɛ́ pəŋi pá polɛɛ́ lɛ́ polɛ pɛbɛ́ pɛ́ pɔɔd podɛɔ́gɔ agaáʼkɛ kɛɛ́ʼkɛn yoom yɛ́ ɛ́lɛɛ́ ɛbɛ́ na pɔɔ́n pááŋan, pɛnɛŋ pɛ́sɛ́g anɛ́ɛ́n na Sɛ waaŋan nyɔ́ alɛɛ́ a mɔɛn ə́? Nyɔ́lɛ́ alɛ ogolɔb lɛ́ adɛágɛɛ́ʼkɛn Uŋun wó Ufúlúʼtú na pá páamoyɔ́ɔŋɔn ɔ?»

¹⁴Wɔɔ́s wúmmú, Yə́sus ayɛ́ɛ agoŋɛŋ uŋun wó ɔmbɛ́ wó óyáánɛ mɔɔd nyummú mummug. Ná uŋun wó ɔmbɛ́ wóow wɛ́ɛ́lón, mɔɔd əə́bə́ə́ kosɔyɔ. Pɔɔd píígə́g kugə́gə́ə́n.

¹⁵Náa, pɔsɔ́g pə́mmú pə́ə́bə́ə́ kosɔyɔ pɔ́nɔ́: «Pə́lə́səbul, nkúm ɛ məŋun má mabɛ́ aa ɛmoyɛ́ʼkɛ́nɛ́nɛ́ɛ́ toɛn tóod tó alɛɛ́ agoŋɛ́ŋŋaŋ məŋun má mabɛ́ na tólɛ́.»

¹⁶Pɔsɔ́g pə́mmú tɛn páyɛ́modámɛn umbiŋ. Náan aa pə́yímuŋíən pɔ́nɔ́ na nyɔ́lɛ́: «Ɛɛlɛ kɛálɛ́ʼkán kɛ́ kíəbiíloodi lɛ́ Táán áa əyíím ágoodom.»

¹⁷Náa, nyɔ́lɛ́ yɛɛ́lɛŋɛn mafɛgaʼ má páyɛ́ɛ na mɔ́lɛ́ a ɔʼtɛ́m. Náa ɔnɔ́ na pɔ́lɛ́: «Nigúu niim nɛ́ pɔɔd páagaánɔɛyɛ pɛdá pɔ́lɛ́ na pɔ́lɛ́, nɛ́lɛ nigúu nɛ́ níəwu, toádɛʼ toɔ́bɔn túəbumbug a pogó pó pɔsɔ́g, a pogó pó pɔsɔ́g.

¹⁸Wɔnɔ́ ná poɔʼkɔ́ a toɛn tó Pə́lə́səbul aa ndɛɛ́ agoŋɛ́ŋŋaŋ məŋun má mabɛ́ ə́, tuə́ áa nɛlaamɛʼ nɛ́ Sáʼtan nɛ́lɛɛ́ nɛ́gɛɛn yuudi ná Sáʼtan alɛ agaánɔɛyɛ pɛdá nyɔ́lɛ́nyɔ́amɔɛ́d ə́?

¹⁹Kɛ́maʼkɛɛn anɛ́ɛ́n náan lɛ́ a toɛn tó Pə́lə́səbul aa ndɛɛ́ agoŋɛ́ŋŋaŋ məŋun má mabɛ́, pááŋan pɔɔd oóoʼ, a tó ánɛ aa pɔ́lɛ́ pálɛɛ́ agoŋɛ́ŋŋaŋ mɔ́lɛ́ ə́? A niɛlɛ nɛɔ́bɔn nɛ́ɛn, póóloodi pɔ́lɛ́báamɔɛ́d anyóon lɛ́ polɛ na nsɔ́ɔ́.

²⁰A fɔ́lɔ́b, a toɛn tó Táán áa mɛ ndɛɛ́ agoŋɛ́ŋŋaŋ məŋun má mabɛ́. Pólɛŋ anyóon lɛ́ Nɛlaamɛʼ nɛ́ Táán niə́ʼkiim əgiig ná polɛɛ́.

²¹Kɛnɛŋ kɛ́ mɔɔd o toɛn alɛɛ́ na muduə́m muə́ŋ, náa əə́ləndin əgunuŋ noádɛʼ nuə́ŋ, yoom yə́ə́ŋ ɔmbɔ́ ímuʼ ɛ́dɛ́afabɛlɛd.

²²Kɛbán kímuʼ, sɔ́g nyɔ́ alɛɛ́ na toɛn a komoyááyɛn əməʼkiim alon áság komoónyɔŋ, aamoóbɔgɔ muduə́m muə́ŋ muim mó ayáágɛn oʼto a mólɛ́, áság koman kaaba yiim yɛ́ ɛ́yɛ́ɛ agoob na nyɔ́lɛ́.

²³Nyɔ́ ɔdɛɔ́gɔ na mɛ, alɛ nyɔ́ alɛɛ́ agɛnnɔɛyɛ. Nyɔ́ ɔdɛɔ́gɔ əgiʼkóminií kodáaŋɛ, alɛ agofámɛ kofámɛán.

²⁴«Kɛnɛŋ kɛ́ uŋun wó ɔmbɛ́ wáálón a nkó ɛ mɔɔd, wə́bə́ə́ kiim úyə́yəə a pɛnɔ pɛ́ pifələ́ə́n, wə́əguunə kɛnɔ kɛ́ wáagɛɛn ələndin. Ódɛɔ́ŋɛn ná úsəə kɔ na wólɛ́wóamɔɛ́d wɔnɔ́: “Ndəguúlini a yoog yaam, kɛnɔ kɛ́ njɛ́ɛ.”

²⁵Ná wə́əgimbuúlini, wóaboan yoog ɛlɛ iyó, pámóóla, páálɛŋ kusóboni.

²⁶Ná wɛ́ɛn anɛ́ɛ́n anyama məŋun mɛ́ndɛ́ŋ máʼtáan na mábaan má mə́míʼkíni kɔyɛb a komoyááyɛn nyɔ́lɛ́, píimənən, pɔ́dɔsɛm a oʼkɔɔ wɔ́ɔ́bɔn. A komananɛ, oʼtɛ́lɛm ó mɔɔd nyóon wə́əgiiʼkini kɔyɛb agaáyɛn wɔnɔ́ ná ayɛ́ɛ kalaʼ.»

²⁷Yə́sus aaman kosɔyɔ náan a, ɔʼkɛ́ɛd nyummú kɔ áay a kiʼtúú aáság kudə́əmini tɔgɛ́ɛ́ ɔnɔ́ na nyɔ́lɛ́: «Kɔŋɛʼ igə na ɔʼkɛ́ɛd nyɔ́ ayɛ́gonyáŋɛn a kaadɛ kə́ə́ŋ, amáyɛgoŋɛ́ʼkɛ.»

²⁸Náa, nyɔ́lɛ́ əyímuyúlísíni ɔnɔ́: «Kɔŋɛʼ agá na pá pálɛɛ́ agoob tɔgɛ́ɛ́ tó Táán, páagɛɛlɛ nkə kɛ́ kɛ́lɛɛ́ kɔ!»

²⁹Wɔnɔ́ ná piʼtúú pɛ́ pɔɔd pɛ́yɛ́ɛ əgiim əgəə́yiilə, Yə́sus əə́bə́ə́ kosɔyɔ na pɔ́lɛ́, ɔnɔ́: «Pəŋi ɔsɛg wóonɛ ó nɛ́gɔŋ wó poyɛ́bɛ́nɛ́ɛ́, puəgiŋíən lɛ́ nyɛ́ɛlɛ kɛálɛ́ʼkán. Ndóo, pudiə́giim agɛɛn na kɛálɛ́ʼkán kɛ́ndɛ́ŋ ná kɛ́sánɛn əgín kɛ́ɛg kɛ́ kɛ́yáyɛ́lɛ́ɛ́ na Sɛonáas.

³⁰Kɛ́lɛ lɛ́, yoom ímuʼ wɔnɔ́ nkə kɛ́ kɛ́yásánɛ́ɛ́ na Sɛonáas kɛ́yɛ́ɛ kɛálɛ́ʼkán a pɔɔd pá a Niníif, náan aa nkə kɛ́ kɛ́lɛ́ɛ́ kaásan na mɛ Mɔɔ́n o mɔɔd, kɛ́lɛ́ɛ́ kɛɛn tɛn kɛálɛ́ʼkán a ɔsɛg wóonɛ ó nɛ́gɔŋ.

³¹A wɔɔ́s ó pɛyɔm, ɔʼkɛ́ɛd nyummú, nkúm yɛ́ a nigúu nɛ́ kusuu ɛlɛ́ɛ́ kodɛ́lɛm a udi wó ɔsɛg wóonɛ ó nɛ́gɔŋ. Ɛlɛ́ɛ́ koboyɛ́ʼkɛn nsɔ́ɔ́ lɛ́ yɛ́lɛ́ iyíím ɛ́dɛ́ɛmɛn laálá kɔ́gɔ́ɔg a əʼkúu yɛ́ a nɛsom nɛ́ nsí nímmú əgiim agoob tɔgɛ́ɛ́ tó nsiŋ tó Salomɔ́ɔŋ[56] Lɛŋáan lɛ́ nyɔ́ amááyɛn Salomɔ́ɔŋ alɛ áanɛ!

³²A wɔɔ́s ó pɛyɔm, pɔɔd pá a Niníif pálɛ́ɛ́ kodɛ́lɛm a udi wó ɔsɛg wóonɛ ó nɛ́gɔŋ, páyɛ́boyɛ́ʼkɛn nsɔ́ɔ́ lɛ́ ná pɔ́lɛ́ páyóób nkə kɛ́ Sɛonáas ayɛ́bolɔɛ́gɛ́nɛ, pɛ́ɛ́gásɛ ɔlaa wɔ́ɔ́bɔn[57] Lɛŋáan lɛ́ nyɔ́ amááyɛn Sɛonáas alɛ áanɛ!»

³³«Mɔɔd ədiə́guug ɛláam lɛ́ ə́súʼkin na kɛlongá, ndóo. Aagɛɛdɛg agá yɛ́lɛ́ a mɔɛn lɛ́ ungim nyɔ́ ɔɔ́sɔd a yoog, ádɛ́ʼtɛganan.

³⁴Niis nɛ́lɛ ɛláam a nkó yaaŋ. Náa, kɛnɛŋ kɛ́ əngis yááŋ álɛɛ́ aŋŋɛʼ, nkó yaaŋ tɛn ngim ɛlɛ a kɛmoámoáŋ. Náa, kɛnɛŋ kɛ́ əngis yááŋ yándabányɛ́ɛ́, nkó yaaŋ tɛn ngim ɛlɛ a mbin.

³⁵Ásóngɛ́ɛ́ anɛ́ɛ́n a ɔʼtɛ́m wááŋ a kaadɛ agodála nga kisəə kɛ́ kɛ́lɛɛ́ na wɛ kɛ́dɛɔ́gɔ mbin.

³⁶Nkó yaaŋ ngim ɛmaʼkɛɛn lɛ́ ɛlɛ a kɛmoámoáŋ, ɛdiɛn na mbin a ɛyaa ɛ́ kɛnɔ yímmú, yaagɛɛn a kɛmoámoáŋ yɛ́lɛ́ ngim wɔnɔ́ a kɛnɛŋ kɛ́ ɛláam ɛ́lɛɛ́ agolɛŋ konom.»

³⁷Ná Yə́sus ayɛ́ɛ aáʼkoman kosɔyɔ, mɔɔ́n ó Falɛsɛyɛ́ɛŋ nyummú aáság komoodɔ́ŋɔn lɛ́ pɛ́ɛn anɛ́ɛnɛ a noádɛʼ nuə́ŋ. Pááság kɛɛn, əə́ləndin agonɛ́ɛnɛ.

³⁸Mɔɔ́n ó Falɛsɛyɛ́ɛŋ nyóon əyə́wúnə́níí kɛ́fɔlɛ́ ná yɛɛ́dála lɛ́ Yə́sus əə́də́ə́ŋə́nən moom konɛ adɛásɔ́gáá agaásɔgɛn wɔnɔ́ ná pisiə́g pɛɔ́bɔn pɛ́lɛɛ́ əgusəə.

³⁹Náa Sə́dúk ɔnɔ́ na nyɔ́lɛ́: «Pəŋi Pafalɛsɛyɛ́ɛŋ, táláan wɔnɔ́ ná polɛɛ́ taa: Polɛ agosoga pilən pɛáŋan na pəʼkúmbəʼ pááŋan. Pálɛ káanɛ a táán púyúŋ púyúŋ, kɔmɔɛ́d lɛ́ ntɛ́m yaaŋan a kaadɛ ɛlɛ na mafɛgaʼ má wiib síɛ́ɛ́d, na pɛbán pɛ́ pɛbɛ́ síɛ́ɛ́d.

⁴⁰Piyəg wɔnɔ́ pəŋi! Adɛ́ Táán nyɔ́ ayɛ́ɛ́lɛ nkə kɛ́ kɛ́lɛɛ́ a táán áa ayɛ́ɛ́lɛ tɛn nkə kɛ́ kɛ́lɛɛ́ a kaadɛ a?

⁴¹Ɛ́ʼkɛ́naan agá nkə kɛ́ kɛ́lɛɛ́ a pilən pɛáŋan na pəʼkúmbəʼ pááŋan a kaadɛ na mɔsɔ́gasɔ́gá, áay moom moáŋan muim móagɛɛn mufúŋiə́n.

⁴²«Maan na pəŋi Pafalɛsɛyɛ́ɛŋ! Polɛ agɛɛ́ʼkɛn Táán kɛowád kɛ́ a muyənjə́g mó moom wɔnɔ́ pisənduŋ, pondóŋ ndíg na pɛnyaá piim pɛ́ pɛ́lɛɛ́ agolog a malɛ́m mááŋan[58] Puʼkóodi kɛnɛŋ na pɛbán pɛ́ pɛ́lɛɛ́ sáád, podiɛn na nnyɔ́ŋánán na Táán. Kɔmɔɛ́d lɛ́ nkə kɛ́ puígóodi lɛ́ póɛlɛ aa kɛ́ɛg, poágɛɛlɛ tɛn pɛ́ʼkáanɛ.

⁴³«Maan na pəŋi Pafalɛsɛyɛ́ɛŋ! Puəguunə kuləndən əgín a mɔʼkɔɔ má yuudi a puog pó pɛɔ́sɔ́gɔ́lɔ́n, poányóŋɛnɛla lɛ́ pə́buúsoyidəni na nnyáádɛ́ ngim a pɛdom.

⁴⁴Maan na pəŋi! Polɛ wɔnɔ́ pəgəəniʼ pá pádɛálɛʼkananɛɛ́, náa pálɛɛ́ agodáŋana kɔ a mɔɛn pádɛálɛ́ŋɛ́ɛ́!»

⁴⁵Náa ɔndɛŋ pɛcɛm úmmuʼ a pá páyɛ́ɛ kɔ ɔnɔ́ na Yə́sus əə: «Kɛlág, a nisəə nɛáŋ nɛ́ɛn, pəsi aa woábɛɛdóga tɛn náan oóm!»

⁴⁶Yə́sus əyímuyúlísíni ɔnɔ́ na nyɔ́lɛ́: «Maan na pəŋi tɛn palɛŋ pɛcɛm! Polɛ agobonan agá pɔsɔ́g pɛnó pɛ́ pɛnasáŋ lɛ́ pányáŋɛn, pəŋibáamɔɛ́d pudiə́gəə́liʼtini kodɔ́bɛd konyáŋɛn pɛ́lɛ́ ɔmbɔ́ sɔɔŋ na ɛnoónó.

⁴⁷Maan na pəŋi! Polɛ amaaŋan pisig pɛ́ pəgəəniʼ pá palɔɛgɛʼ pɛbán pá Táán, kɔmɔɛ́d lɛ́ pasɛʼkóón pááŋan aa páyɛ́boyóóna.

⁴⁸Polɛ əguloodi aa nyóon lɛ́ polɛ unuʼ úmmuʼ na pɔ́lɛ́ a nkə kɛ́ páyɛ́ɛ́lɛ lɛ́ pɔ́lɛ́ páagoóna palɔɛgɛʼ pɛbán pá Táán, pəŋi poámaaŋan pəgəəniʼ pɔ́ɔ́bɔn!

⁴⁹Kólɛ́ aa Táán yiísə́ə́ a nsiŋ yəəŋ, ɔnɔ́: “Ndɛ́ɛ́ kiim mpodómɛn lɛ́ na palɔɛgɛʼ pɛbán, na pɔɔ́n pá maʼtom. Pálɛ́ɛ́ koóna ngab yimmú, pə́əyəʼkəni pə́mmú.”

⁵⁰Kólɛ́ aa maŋɔ́ má palɔɛgɛʼ pɛbán pá Táán pá páyóóna málɛ́ɛ́ kəə́ŋíənií na ɔsɛg wóonɛ ó nɛ́gɔŋ, Əgəə́bə́ə a pɔsɔ́g pá páyóóna əgín kɔ a nɛsaŋ nɛ́ nsí.

⁵¹Ɛɛ́ɛ, ndabodɛ́anɛ lɛ́, Əgəə́bə́ə a maŋɔ́ má Ábɛl, agɛɛn əgiig a maŋɔ́ má Saʼkalɛ́as nyɔ́ páyóón a kɛgaágadɛ kɛ́ɛg lɛ́ kibóŋ kɛ́ pɛfɔny áanɛ, uʼkóó ó Táán kága[59], pálɛ́ɛ́ kuŋíən mɔ́lɛ́ na ɔsɛg wóonɛ ó nɛ́gɔŋ.

⁵²Maan na pəŋi palɛŋ pɛcɛm! Puísiə́d ilibəʼ yɛ́ yə́əbuən ngə́ ɛ kolɛŋ, pəŋibáamɔɛ́d posɔ́d kɔ, podɛáʼkɛ́nɛ tɛn lɛ́ pá pálɛɛ́ anyɔ́ŋɛn kosɔd kɔ, pɔ́sɔd.»

⁵³Ná Yə́sus ayɛ́ɛ aáʼkolon a noádɛʼ nóon, palɛŋ pɛcɛm na Pafalɛsɛyɛ́ɛŋ pə́ə́bə́ə́ koob ilúún na nyɔ́lɛ́ na toɛn, pə́əmuŋíənə paʼkɛ́sɔn piíŋ a ɛ́fɔlɛ́ ɛ́ pɛbán ngim.

⁵⁴Páyɛ́ɛ agomodáman mbiŋ lɛ́ ná álónɛ nɔgɛ́ɛ́ nó nobɛ́ a unuʼ wə́ə́ŋ.