Read Yambeta LÓʼKAS 13 Bible Online

LÓʼKAS 13 - Yambeta bible

LÓʼKAS 13

¹Əgín a kɛnɛŋ kɛ́go kɛ́ɛg, pɔɔd pə́mmú pááság kiim adɛ́anɛ na Yə́sus wɔnɔ́ ná a kɛnɛŋ kɛ́ pibíəniʼ pɛ́ Kalilə́ə pɛ́yɛ́ɛ agɛɛ́ʼkɛn pɛfɔny pɛɔ́bɔn na Táán, Pɛláad aáság kɛɛlɛ lɛ́ páboyóóna.

²Yə́sus aáság kubuyúlisini ɔnɔ́ na pɔ́lɛ́: «Polɛ agofɛg lɛ́ páyóóna pibíəniʼ pɛ́ Kalilə́ə pɛ́ɛb lɛ́ pɔ́lɛ́ páyɛ́ɛ pɛɛlɛ mabɛ́ agaáyɛn pɔɔ́npásɛ pɔ́ɔ́bɔn pɛ́ndɛ́ŋ á?

³Ndabodɛ́anɛ lɛ́ ndóo. Náa, pəŋi poʼkasɛnɛ ɔlaa wááŋan, puəwu tɛn náan yoom ímuʼ wɔnɔ́ pɔ́lɛ́.

⁴Nto tɛn puuniʼ na ɛ́dáád yɛ́ noádɛʼ nó nogóón nó a Silowə́ə nuídə́ə́ŋə́nən, noáság koboyóóna, poafɛg lɛ́ páyɛ́ɛ na nsɔ́ɔ́ agaáyɛn pɔsɔ́g piim pá a Yolósalɛm a?

⁵Ndabodɛ́anɛ lɛ́ ndóo. Náa, pəŋi poʼkasɛnɛ ɔlaa wááŋan, puəwu tɛn náan yoom ímuʼ wɔnɔ́ pɔ́lɛ́.»

⁶Yə́sus aáság kubuúsiədin nkaʼtɛ́n yɛ́ɛnɛ, ɔnɔ́: «Mɔɔd anyóon ayɛ́ɛ na wɛɛn wə́ə́ŋ a pɔlɛ́m. Aáság kiim lɛ́ ágɛ́sa, amboan yoom.

⁷Náa ɔnɔ́ na mɔɔd nyɔ́ ayɛ́ɛ osóboni pɔlɛ́m puə́ŋ: “Táá, pɛag a pɛ́ɛnɛ pɛ́dáád wɔnɔ́ ná ndɛɛ́ əgiimən lɛ́ nkɛ́sa ambɛn, ntɛboan yoom. Sóm wólɛ́, ódɛyɛ́bɛníɛn kɛnɔ iyó.”

⁸Náa, uʼkudin nyóon aáság kumuyúlisini ɔnɔ́ na nyɔ́lɛ́: “Sə́dúk, ímuudí kə́mmú waag wóonɛ, ndəədímə nyə́gingilidi nidíŋ, ná nyáágan nsí ɛ kiliʼkii kɔ.

⁹Amaʼkɛɛlɛ wə́əguum a waag wó wə́əgiim. Údiúmin áay, úusəə lɛ́ pə́də́əŋi”.»

¹⁰A wɔɔ́s wúmmú ó kisúgiʼ kɛ́ Yúdɛn, Yə́sus ayɛ́ɛ agaaʼkananɛ pɔɔd a yoog ɛ pɛɔ́sɔ́gɔ́lɔ́n.

¹¹Ɔʼkɛ́ɛd nyummú ayɛ́ɛ kɔ nyɔ́ uŋun wó ɔmbɛ́ óyɛ́ɛ na nyɔ́lɛ́. Uŋun wóow óyɛ́moyɛ́ʼkɛn kɛnɛ́m kɛ́ kíyímuyúúd, adɛáʼkɛ kaábɛ́nɛn. Ayɛ́ɛ aáʼkɛɛlɛ na kobany kóog, pɛag puuniʼ na pɛ́dáád.

¹²Ná Yə́sus yɛɛ́dála ɔʼkɛ́ɛd nyóon, aáság komodɔ́ŋɔn, náa ɔnɔ́ na nyɔ́lɛ́: «Ɛ́ya, mbágodáálɛ aá, kɛnɛ́m kɛáŋ kɛáman.»

¹³Aáság komoyábɛgɛn ɔmbɔg, ɔʼkɛ́ɛd tə́ŋ, əə́bə́ə́ kɛɛ́ʼkɛn nugəm na Táán.

¹⁴Nkúm ɛ yoog ɛ pɛɔ́sɔ́gɔ́lɔ́n yɛ́ɛy ɛyóób ilúún na nkə kɛ́ɛg kɛ́ Yə́sus ayɛ́ɛ́lɛ wɔɔ́s ó kisúgiʼ, əə́bə́ə́ kosɔyɔ na kiʼtúú kɛ́ pɔɔd kɛ́ kɛ́yɛ́ɛ kɔ áay, ɔnɔ́: «Tɛlɛ na mədúg máʼtáan na úmmuʼ má tigódíí lɛ́ tígud a mɔ́lɛ́[63] A mɔɔ́s móom aa púimənií ná páboyóómanɛ a mabámbany mááŋan, adɛ́njaŋ a wɔɔ́s ó kisúgiʼ.»

¹⁵Sə́dúk əyímuyúlísíni ɔnɔ́: «Pəŋi, polɛ moɔ́ŋɛ́ná pusú! Wɔɔ́s ó kisúgiʼ, adɛ́ ándɛ puógondin káwoʼ yaaŋan, ɔmbɔ́ lɛ́ jáʼkáas yaaŋan agɛɛn na yɛ́lɛ́ a məní lɛ́ áŋo aa?

¹⁶Náa, ɔʼkɛ́ɛd nyóonɛ oʼ? Ntóón yɛ́ a yoog ɛ pɔɔd yɛ Ábɛlaam yɛ́ɛnɛ yɛ́ Sáʼtan yɛɛ́góda aándɛɛ́ pɛag puuniʼ na pɛ́dáád, kɛ́dɛɔ́gɔ kɔŋɛʼ lɛ́ pə́muyóndin a kɛáŋ kɛ́ɛg wɔɔ́s ó kisúgiʼ ə?»

¹⁷Niúlisi niə́ŋ nɛ́ɛn nɛ́yɛ́ʼkɛn pabɛnɛn pə́ə́ŋ piim oʼto kono. Náa, kiʼtúú kɛ́ pɔɔd kiim kɛ́ kɛ́yɛ́ɛ kɔ áay, kɛ́yɛ́ɛ agɔnyɔ́gɛla na ndam ɛ pɛbán yɛ́ɛy ngim yɛ́ ayɛ́ɛ agɛɛlanɛ.

¹⁸Náa Yə́sus ɔnɔ́: «Nɛlaamɛʼ nɛ́ Táán nɛáŋwáŋánan nkə áŋ? Na igə aa ndɛɛ́ ogofɛg nɛ́lɛ́ áŋ?

¹⁹Taa, nɛ́lɛ náanɛ wɔnɔ́ nsám ɛ moʼtáadɛ yɛ́ mɔɔd nyummú ayɛ́ɛ́n agon a pɔlɛ́m puə́ŋ. Yɛɛ́lóg, yaáyáma, ɛmáán kiɛd, pɛsag pímíim awáaga aŋŋany kɔ a ntab yəəŋ.»

²⁰Yə́sus ayɛ́ɛ́n na tɔgɛ́ɛ́ yuudi ɔnɔ́: «Na nkə tɛn kímmú kɛ́yaán aa nfɛgɛɛ́ Nɛlaamɛʼ nɛ́ Táán áŋ?

²¹Nɛ́lɛ náanɛ wɔnɔ́ mayaa má toan tó kunudi umbúb má ɔʼkɛ́ɛd alɛɛ́ agodɔb na ɛ́fɔlɛ́ yɛ́ umbúb óság kobágan.»

²²A niɛn nɛ́ Yə́sus ayɛ́ɛ agɛɛn a Yolósalɛm, yɛɛ́sánan a pabálɛ́ɛg na əʼkúu yá əndiʼti. Ayɛ́ɛ agɛɛn əə́giim yáaʼkananɛ pɔɔd.

²³Náa mɔɔd nyummú əə́muŋíən ɔnɔ́: «Sə́dúk ngɔ́ɔ́, əgín ngab ɛ pɔɔd sɔɔŋ súg áa ɛlɛ́ɛ́ kɔɔyɛɛ́ á?» Yə́sus əyúlísi ɔnɔ́:

²⁴«Ágɔ́nɛ́gɛ́an agɛɛlɛ lɛ́ pósɔd yɛ́ a udíyoog wó ólɛɛ́ ommɔ́ɔ́mɔ́sɛ lɛ́ fɔ́lɔ́b áa ndɛɛ́ əgusəə. Piíŋ pálɛ́ɛ́ kuunə kosɔd, pádɛáʼkɛ.

²⁵«Əlígi mɔɔd o noádɛʼ aáʼkodɛ́ɛmɛn, əə́ʼkubuəg yoog, aáʼkofany, ná pəŋi pá polɛ́ɛ́ kolɔbɛɛ́ a táán púbə́ə́ kogɔʼtɔn umbuús, poámodɔ́ŋɔnɔ, poɔʼkɔ́: “Sə́dúg, Sə́dúg wɛ! Íbibuə́n!” Alɛ́ɛ́ kubuyúlisini ɔnɔ́ na pəŋi: “Ntɛboólɛŋɛn ó! Pəŋi póob ntɛlɛŋɛn ə́lə́ə́ áa puə́giim.”

²⁶«Ná pəŋi pómodɛ́anɛ poɔʼkɔ́ na nyɔ́lɛ́: “Adɛ́ tɛɛ́nɛ́ɛ́nɛ, tɛáŋó poloʼ na wɛ a! Adɛ́ Oyáʼkánánɛ pɔɔd a pɛdom piə́s ə́!”

²⁷Ná nyɔ́lɛ́ yíiʼkini kobodɛ́anɛ ɔnɔ́ na pəŋi: “Ntɛlɛŋɛn páyaán áa polɛɛ́ ó! Ə́suídíən káag laálá na mɛ, pəŋi pá poágɛɛlanɛ kɔbɛ́.”

²⁸«Ná poádála Ábɛlaam, na Ɛ́sag, na Yáʼkɔb, na palɔɛgɛʼ pɛbán pá Táán piim a Nɛlaamɛʼ nɛ́ Táán, pəŋi padoán a táán, polɛ́ɛ́ kɛɛn kɔ́gɔ́ɔg əgín mandɛɛ na mandɛɛ, əgín pɛgɛg kaágáma.

²⁹Pɔɔd pálɛ́ɛ́ kiim pádɛ́ɛman lɛ́ na pɔsɔ́g pá a noá nó ándɛ wɔɔ́s wə́əgiim ódɛ́ɛmɛn, na pá a noá nó ándɛ wáagɛɛn agɛɛ́mɛŋan, na pɔsɔ́g tɛn pá kobag na pá kusuu, əgiimən a kɛsɛɛn kɛ́ a Nɛlaamɛʼ nɛ́ Táán.

³⁰«Náan, pə́mmú pá pálɛɛ́ nɛ́gɔŋ ngim, pálɛ́ɛ́ kosan yuudi, pə́mmú tɛn pá pálɛɛ́ nɛ́gɔŋ yuudi pálɛ́ɛ́ kuúlini ngim.»

³¹A kɛnɛŋ kɛ́go kɛ́ɛg, Pafalɛsɛyɛ́ɛŋ pə́mmú pááság kiim pááyɛʼtɛnɛ, náa pɔ́nɔ́ na Yə́sus: «Tɛ́ɛ́mɛn, wɛ́ɛn kɛnɔ kɛ́ndɛ́ŋ, Ɛlóod alɛ anyɔ́ŋɛn kogoyóon.»

³²Aáság kubuyúlisini ɔnɔ́ na pɔ́lɛ́: «Todáan adɛ́anɛ na kɛyɛɛ́njɛ́m kɛ́ɛg poɔʼkɔ́: Taa, na naánɛ́, na na koany, ndɛ agoŋɛ́ŋŋaŋ məŋun má mabɛ́, ndáagoómanɛ mabámbany, ná a mədúg mádáád, nyóon anɛ́ɛ́n oʼto a pigólí pɛ́am.

³³Kɛbán kímuʼ, nkóódi lɛ́ nyɛ́ɛn yuudi na mɛ ngə́ naánɛ́, na na koany na a wɔɔ́s wó wə́əyə́ən lɛ́ kídíəguunə lɛ́ póon ɔndɔɛgɛʼ pɛbán o Táán kɛnɔ kɛ́ndɛ́ŋ ná kɛ́sánɛn əgín lɛ́ a Yolósalɛm.

³⁴«Əə́əy Yolósalɛm! Yolósalɛm, əə́əy na wɛ nyɔ́ olɛɛ́ agoóna palɔɛgɛʼ pɛbán pá Táán, pɔɔd pá Táán alɛɛ́ agodóman, waábodóan na aʼtáán lɛ́ pə́guə́ʼkən. Njúúnə lɛ́ nyágɔnyɛdɛn pɔɔ́n pááŋ a ɛbá yáam pɛnɛŋ wɔnɔ́ pɛnɛŋ, wɔnɔ́ ná ándɛ nsɛɛ yə́əgəə́gúlig pɔɔ́n a nfaáan yəəŋ. Náa pəŋi podɛʼkáagɛnyaáʼkɛnɛ!

³⁵Táán alɛ́ɛ́ kobodóɛn uʼkóó wááŋan. Náa ndábodɛ́anɛ lɛ́ Əgəə́bə́ə nɛ́gɔŋ, podɛágɛʼtála kə́mmú, súʼtə́ə́ ná polɛ́ɛ́ kusəlií poɔʼkɔ́: Táán ágoyɛ́ɛlɛ kɔŋɛʼ, wɛ nyɔ́ alɛɛ́ əgiim a niiŋ nɛ́ Sə́dúk[64]!»