Read Yambeta LÓʼKAS 17 Bible Online

LÓʼKAS 17 - Yambeta bible

LÓʼKAS 17

¹Yə́sus yɛɛ́dɛánɛ na paaʼkan pə́ə́ŋ ɔnɔ́: «Ngə́ yɛ́ɛnɛ lɛ́ pɛbán pɛ́ pɛ́agɛɛlɛ lɛ́ mɔɔd ə́də́əŋ a kɔbɛ́ pɛ́dɛyáyɛ́lɛ́ɛ́, ɛdɛɔ́gɔ. Náa, maan na nyɔ́ kɛ́lɛ́ɛ́ kɛɛnɛɛ́ lɛ́ nyɔ́lɛ́ aa alɛɛ́ nɛdáán nɛ́ mbúʼtə́n.

²Kɔŋɛʼ na nyóon lɛ́ pámoodoŋ kɛdám kɛ́ nɛdáán a kɛnág, pámoódagɛdɛ a noom, agolaŋ lɛ́ ə́də́əŋi ɛyaa ɛ́ moóngaa wɔnɔ́ yɛ́ɛnɛ ímuʼ a kɔbɛ́.

³Lɛŋáan kodɛ́lɛman o! «Móŋŋí waaŋ amaʼkogoyɛ́ɛlɛ kɔbɛ́, ómoósɔyɔn kɔŋɛʼ kɔŋɛʼ. Əməʼkəə́liʼtini nsɔ́ɔ́ yəəŋ, úumuúlisin.

⁴A wɔɔ́s úmmuʼ, woómóŋŋí amaʼkogoyɛ́ɛlɛ kɔbɛ́ pɛnɛŋ pɛ́ʼtáan na pɛ́baan, ə́yiim tɛn pɛnɛŋ pɛ́ʼtáan na pɛ́baan a udi wááŋ əgiim əgəə́suʼki mɔ́lɛ́, ímulísin.»

⁵Náa pɔɔ́n pá maʼtom pɔ́nɔ́ na Sə́dúk: «Ɛ́bɛyɛ́ɛ́lɛ lɛ́ kəə́liʼtiniʼ kuə́s kóyam.»

⁶Sə́dúk əyíbuyúlísíni ɔnɔ́: «Poyáágɛn oʼto na Táán ɔmbɔ́ əgín náanɛ sɔɔŋ wɔnɔ́ niis nɛ́ ɛnás ná polɛ págodɛ́anɛ na sɛʼkɔmɔ́ɔl yɛ́ɛnɛ lɛ́ yə́lúgin, yɛ́ɛn agaádagɛdɛ a noom, ɛ́yɛboyóbɛn.»

⁷«Ánɛ úmmuʼ a ondáŋ wááŋan aa alɛɛ́ ogɛɛlɛ lɛ́, alɛ na uʼkudin nyɔ́ amɛ́ɛn amoósoman pɔlɛ́m puə́ŋ, ɔmbɔ́ lɛ́ amɛ́ɛn a kinuŋ kɛ́ mudúg muə́ŋ, ná əə́gimbuúli pigólí, áamodɛ́anɛ ɔnɔ́: “Ə́bísígíí kiim ələndin, ónɛ́ɛnɛ ə́?”

⁸Adɛ́ aamodɛ́anɛ agá ɔnɔ́ na nyɔ́lɛ́: “Ɛ́nnámɛ́n moom mó konɛ móam, óliógíí paʼkolobá wíim agɛnjaabɛn, mɛ nnɛ, ndáaŋo. A ngim yɛ́ɛy ná wɛ údíin úləndin anɛ́ɛ́n agonɛ, waáŋo.”

⁹Ɔdɛɔ́gɔ oʼkódágódá lɛ́ yɛ́ʼkɛn uʼkudin wəəŋ pisoyidiʼ a oʼto wóonɛ lɛ́ amɛ́ɛ́lɛ nkə kɛ́ amámodɛánɛ, ngɔ́ɔ́?

¹⁰Náan tɛn yoom ímuʼ aa kígódíí lɛ́ kíɛn na pəŋi. Kɛnɛŋ kɛ́ pomɛ́ɛ́lɛ oʼtom wó puígóodi lɛ́ póɛlɛ, sələ́ən poɔʼkɔ́: “Tɛlɛ əgín agá muyənjə́g mó pəgudin. Tɛmɛ́ɛ́lɛ oʼtom wó tiígóodi lɛ́ tíɛlɛ.” »

¹¹Wɔnɔ́ na Yə́sus ayɛ́ɛ a ngə́ agɛɛn a Yolósalɛm, yɛɛ́sán yɛ́ a Səməlíi na a Kalilə́ə.

¹²A nɛsɔd nɛ́ ayɛ́ɛ agosɔd a ɛyaa ɛ́ nigúu yímmú, nto ɛ pɔɔd yówád yaáság kiim əgəə́bun na nyɔ́lɛ́. Páyɛ́ɛ abany nkún. Pɛ́ɛ́dɛ́lɛm laálá na nyɔ́lɛ́[67],

¹³pə́ə́bə́ə́ kosɔyɔ nɛŋo a mɔɛn, pɔ́nɔ́: «Yə́sus wɛ! Sə́dúk! Siəd maan na pəsi!»

¹⁴Ná ayɛ́boodála, aáság kusəə ɔnɔ́: «Todáan, póɛn ogoóloodi na payaaganɛʼ pɛfɔny[68]» Pááság kusiəd ngə́ pámɛ́ɛn. Pálɛ anɛ́ɛ́n kɔ agɛɛn a, pándɛ siə́siə́.

¹⁵Ná sɔ́g nyummú a ondáŋ wɔ́ɔ́bɔn yɛɛ́dála lɛ́ nyɔ́lɛ́ oóʼkoom, aáság kuúlini ngim, əə́giim ányáadɛ Táán, nɛŋo a mɔɛn.

¹⁶Ayɛ́ɛ́n ədə́əŋənən Yə́sus a ambaan, udi a nsí, əə́muúsoyidəni. Mɔɔd nyóon nyɔ́ əyímbuúlíni ngim, ayɛ́ɛ mɔɔ́n ó Səməlíi.

¹⁷Náa Yə́sus ɔnɔ́: «Adɛ́ pɔɔd póob piim pówád póyóóm ó, ngɔ́ɔ́? Ə́lə́ə́ áa pɔsɔ́g pə́mmú póʼkáag pá nto ɛ́ʼtáan na íniʼ pálɛɛ́?

¹⁸Ɔmbɔ́ úmmuʼ adɛáyɔ́ɔ́ŋɛnɛ kimbuúlini əgiim agɛɛ́ʼkɛn pisoyidiʼ na Táán, əgín kɛnɔɔŋɛʼ kɛ́ɛnɛ aa kímímbuúlíni ə́?»

¹⁹Náa ɔnɔ́ na mɔɔd nyóon: «Tɛ́ɛ́mɛn, tod. Kəə́liʼtiniʼ koáŋ kómágoyɔ́ɔ́yɛ.»

²⁰Pafalɛsɛyɛ́ɛŋ pááság kumuŋíən pɔ́nɔ́ na nyɔ́lɛ́ əə: «Naanɛ́g anɛ́ɛ́n áa Nɛlaamɛʼ nɛ́ Táán nɛ́lɛ́ɛ́ kiimií ə́?» Yiísə́ə́ ɔnɔ́ na pɔ́lɛ́: «Nɛlaamɛʼ nɛ́ Táán nídíəgiim náanɛ poádɛ́tɛg. Ndóo.

²¹Pádɛndɛ́ɛ́ kusəə pɔ́nɔ́: “Táá, nɛ́ aa nɛ́ɛnɛ o!” Ɔmbɔ́ lɛ́: “Táá, nɛ́ aa nɛ́ʼkága o!” Ndóo. Nɛmɔɛ́d aa nɛ́ɛnɛ nɛándɛɛ́ kɔ a kɛgaágadɛ kɛáŋan.»

²²Náa Yə́sus ɔnɔ́ na paaʼkan pə́ə́ŋ: «Mɔɔ́s málɛ́ɛ́ kiim má polɛ́ɛ́ kɔnyɔ́ŋɛnɛɛ́ lɛ́ pódála Mɔɔ́n o mɔɔd əgín ɔmbɔ́ a wɔɔ́s úmmuʼ súg, náa, podɛndɛ́ɛ́ komoodála.

²³«Pálɛ́ɛ́ kusəə pɔ́nɔ́ na pəŋi: “Táláan taa, alɛ áanɛ!” Ɔmbɔ́ lɛ́: “Taa, alɛ kága!” Podɛnjɛ́ɛ́n kɔ, podɛmbɔ́gɔ́nɔn kɛɛn.

²⁴Kɛ́lɛ lɛ́, wɔnɔ́ ná ándɛ ɛdáányɛ́ yáasaa mbálámɔɛn, kodɛ́ɛmɛn a ɛbá yɛ́ɛnɛ agɛɛn alon a yɛ́ʼkága, náan tɛn aa nimbuúlini nɛ́am nɛ́ mɛ Mɔɔ́n o mɔɔd nɛ́lɛ́ɛ́ kɛɛnɛɛ́ a wɔɔ́s wóow.

²⁵Náa, kíəguunə lɛ́ áyaŋ anɛ ntɔ́b kuíŋ, ɔsɛg wóonɛ ó nɛ́gɔŋ úmuúʼtəm.

²⁶«Nkə kɛ́ kɛ́yásánɛ́ɛ́ a kɛnɛŋ kɛ́ Nówə kɛ́lɛ́ɛ́ kaásan tɛn náan yoom ímuʼ a mədúg má mɛ Mɔɔ́n o mɔɔd ndɛ́ɛ́ kimbuúlinií.

²⁷A kɛnɛŋ kɛ́go kɛ́ɛg, pɔɔd páyɛ́ɛ əgín moom mó konɛ kɔɔ́nyɔg, poloʼ koŋo, poban kusiədə na pɛdɔ́ʼtɔn kɛɛnan súʼtə́ə́ əgiig a wɔɔ́s wó Nówə yɛɛ́sɔ́d a siʼtíməʼ, a ngim yɛ́ɛy noó nó nogóón nuídə́əŋ, ungim əə́wú[69]

²⁸Kɛ́lɛ́ɛ́ kaásan tɛn wɔnɔ́ a kɛnɛŋ kɛ́ Lóod: A kɛnɛŋ kɛ́go kɛ́ɛg, pɔɔd páyɛ́ɛ lɛ́ páanɛ moom, páaŋo poloʼ, páawɛɛna moom, páalɛga múmmú, pə́əgud a malɛ́m, páawáaga toádɛʼ.

²⁹Kɛbán kímuʼ, wɔɔ́s wó Lóod yɛɛ́dɛ́ɛ́mɛn a Sodóom agosan, Táán yiídə́ə́ŋi noó na yug na nó ndus kɛ́, noáman kuwíiyi ungim kɔ a Sodóom[70]

³⁰Náan yoom ímuʼ tɛn aa kɛ́lɛ́ɛ́ kaásánɛ́ɛ́ a wɔɔ́s wó mɛ Mɔɔ́n o mɔɔd ndɛ́ɛ́ kiim nnomɛɛ́.

³¹«Wɔɔ́s wóow, nyɔ́ alɛ́ɛ́ kɛɛnɛɛ́ a palándaʼ pə́ə́ŋ, náa alɛɛ́ na moom a yoog a kaadɛ, ədinjúúnə kiiʼkini kosɔd a yoog agɛɛn əsiəd moom muə́ŋ. Yoom ímuʼ na nyɔ́ alɛ́ɛ́ kɛɛnɛɛ́ a pɔlɛ́m. Ədinjúlíni a noádɛʼ.

³²Áyɔ́ŋɛ́an nkə kɛ́ kɛ́yásánɛ́ɛ́ na oʼkán ó Lóod[71]!

³³Nyɔ́ alɛ́ɛ́ kuunə lɛ́ yə́gəʼkəəŋəni ɔlaa wə́ə́ŋ, alɛ́ɛ́ koʼtaŋ wólɛ́. Kɔmɔɛ́d lɛ́ nyɔ́ alɛ́ɛ́ koʼtaŋɛɛ́ ɔlaa, nyɔ́lɛ́ aa alɛ́ɛ́ kɛɛnɛɛ́ na wólɛ́.

³⁴Ndabodɛ́anɛ lɛ́ a udúg ogo wóow, kɛ́lɛ́ɛ́ kɛɛn lɛ́ pɔɔd pábaan pálɛ pɛɛ́mmɛ́ŋɛ́náán a mɔdɛ́gɛ́n, pə́əsiəd úmmuʼ, pə́ədi nyummú.

³⁵Pagɛ́ɛd pábaan pálɛ́ɛ́ kɔɔb moom ondáŋ a nɛdáán, pə́əsiəd úmmuʼ, pə́ədi nyummú. [

³⁶Nto ɛ́baan ɛlɛ a pɔlɛ́m, pə́əsiəd úmmuʼ, nyummú ɔ́ɔlɔb.»]

³⁷Paaʼkan pááság kusiəd tɔgɛ́ɛ́, pɔ́nɔ́ na nyɔ́lɛ́: «Sə́dúk, ə́lə́ə́ áa kɛ́lɛ́ɛ́ kaásánɛ́ɛ́ náan əə́?» Əyíbuyúlísíni ɔnɔ́: «Kɛnɔ kɛ́ anjɛŋ yɛ́ɛ́lɔ́b, kɔ tɛn aa kogad kúyúúli[72]»