Read Yambeta LÓʼKAS 18 Bible Online

LÓʼKAS 18 - Yambeta bible

LÓʼKAS 18

¹Yə́sus əyíbusiə́din nkaʼtɛ́n yɛ́ɛnɛ əgubuúloodi lɛ́ pógóódi kɔɔ́sɔ́gɔlɔn Táán pɛnɛŋ piim, pádɛág ɛsɛmbɛlɛdɛʼ.

²Yiísə́ə́ ɔnɔ́ na pɔ́lɛ́: «Onjɔm pɛyɔm nyummú aa nyóon ayɛ́ɛ a pálɛ́ɛg yimmú. Ayɛ́ɛ lɛ́ Táán, aʼtammána, adiɛn tɛn na kɛnɛŋ na mɔɔd.

³Kidí tɛn kɛ́ ɔʼkɛ́ɛd kímmú kɛ́yɛ́ɛ kɔ a pálɛ́ɛg yɛ́ɛy, kíəgiimin a nó onjɔm pɛyɔm nyóon lɛ́ ábaasɛ uʼtíiyiʼ wó ayɛ́ɛ a wólɛ́ na mɔɔd nyummú, ámoyɛ́ʼkɛn nyɔ́lɛ́ kilumiʼ.

⁴Pɛnɛŋ wɔnɔ́ pɛnɛŋ, onjɔm pɛyɔm nyóon adɛʼkɛ́ɛ anyɔ́ŋɛn lɛ́ ná aábaasɛ kɛbán kiə́ŋ. Náa onjɔm pɛyɔm əə́səə kɔ na nyɔ́lɛ́nyɔ́amɔɛ́d ɔnɔ́: “Ɛɛ́ɛ, ɔmbɔ́ wɔnɔ́ ná ntɛádammanaá Táán, ntiɛn na kɛnɛŋ na mɔɔd,

⁵ndóo, kidí kɛ́ ɔʼkɛ́ɛd kɛ́ɛnɛ kɛ́lɛ əginyə́gigi kɛ́fɔlɛ́. Ndamoyɛ́ʼkɛn nyɔ́lɛ́ kilumiʼ, ná adɛyɛ́njaáda kə́mmú oʼto.” »

⁶Sə́dúk əyíʼkíni kɛɛn na tɔgɛ́ɛ́, ɔnɔ́: «Lɛŋáan koob nkə kɛ́ ɔmbɛ́ wo onjɔm pɛyɔm nyóonɛ əə́səə!

⁷Táán anɛ́ɛ́n óoʼ, poafɛg lɛ́ alɛ ogolɔb adiɛ́ʼkɛn kilumiʼ na pɔɔd pá nyɔ́lɛ́nyɔ́amɔɛ́d əyííyid ə; pɔɔd pá pálɛɛ́ amoyálɛɛlɛn na udúg wɔnɔ́ na wɔɔ́s a? Alɛ ogoyɛ́ɛn ədiə́bísígíí kiim aboɛ́bɛ a?

⁸Ndóo, ndabodɛ́anɛ lɛ́, əəgəə́bisig koboyɛ́ʼkɛn kilumiʼ. Kɛbán kímuʼ, ná Mɔɔ́n o mɔɔd alɛ́ɛ́ kimbuúlini əə, alɛ́ɛ́ koboan pɔɔd a nsí pá pálɛɛ́ na kəə́liʼtiniʼ ə́?»

⁹Aáság kusiəd tɛn nkaʼtɛ́n yɛ́ɛnɛ a oʼto ó pɔɔd pá páyɛ́ɛ əgəə́səə lɛ́ pɔ́lɛ́ pálɛ sáád a əngis á Táán, páasɛ́ɛdanɛ pɔsɔ́g.

¹⁰Ɔnɔ́: «Pɔɔd pábaan a póob pɛ́ɛ́bág a Tɛ́mpɛl agɛɛn ɔgɔɔ́sɔ́gɔlɔn Táán. Úmmuʼ ayɛ́ɛ Falɛsɛyɛ́ɛŋ, nyummú ɔʼkɔ́mmanɛʼ mag.

¹¹Sɔ́g o Falɛsɛyɛ́ɛŋ yɛɛ́dɛ́lɛm kuə́ŋ kidə́níʼtən, əə́bə́ə́ kɔɔ́sɔ́gɔlɔn kɔ a ɔʼtɛ́m wə́ə́ŋ ɔnɔ́: “Oóó Táán, ndəguúsoyidəni wɔnɔ́ ná mɛ ntɛɔ́gɔ wɔnɔ́ pɔsɔ́g pɔɔd póonɛ pá pálɛɛ́ pabɛ́, na wiib, na pɛdaŋ. Ndɛ əguguúsoyidəni lɛ́ mɛ ntɛɔ́gɔ wɔnɔ́ ɔʼkɔ́mmanɛʼ mag nyóʼkága.

¹²Mɛ, ndɛ əgumin ə́simə́ mədúg málaŋ mábaan a sɔ́ndɛʼ mmuʼ, ndáagoyɛ́ʼkɛn kɛowád kɛ́ moom muim mó ndɛɛ́ ɔɔgɔɔŋ.”

¹³Ɔʼkɔ́mmanɛʼ mag nyɔ́lɛ́, yɛɛ́dɛ́lɛm kága laálá, angoɛ́sɛ kudə́əmini udi a mɔɛn. Ayɛ́ɛ agá agaábáam a igog, ɔnɔ́: “Oóó Táán, siəd maan na mɛ, ɔngɛɛlɛʼ kɔbɛ́.”

¹⁴Náa ndábodɛ́anɛ lɛ́ nyɔ́lɛ́ nyóon aa əyúúli a noádɛʼ nuə́ŋ ná Táán əə́ʼkumuúlisin mabɛ́ mə́ə́ŋ, adɛ́njaŋ sɔ́g nyóʼkáag lɛ́ ungim nyɔ́ alɛ́ɛ́ kaábágɛdɛɛ́, pálɛ́ɛ́ kumuúsuuli. Náa, nyɔ́ alɛ́ɛ́ kəə́sulií nkó a nsí, pálɛ́ɛ́ komobágɛdɛ.»

¹⁵Pɔɔd páyɛ́ɛ piimin Yə́sus na pɔɔ́n pá podom kɛ́ lɛ́ ná áboyábɛgɛn ombɔg a oʼto. Ná paaʼkan pɛ́ɛ́dála náan, páyɛ́bosásan lɛ́ púúlini ngim na pɔ́lɛ́.

¹⁶Náa, Yə́sus yiísə́ə́ lɛ́ píim na pɔ́lɛ́, ɔnɔ́: «Tíən poómbaa píim ná ndɛɛ́, pudiyíbuugíd lɛ́ Nɛlaamɛʼ nɛ́ Táán nɛ́agoob na pá pálɛɛ́ wɔnɔ́ pɔ́lɛ́.

¹⁷A fɔ́lɔ́b ndabodɛ́anɛ lɛ́ nyɔ́ əsiədinií Nɛlaamɛʼ nɛ́ Táán wɔnɔ́ ɛyaa ɛ́ moóngaa, nyóon adɛndɛ́ɛ́ kosɔd a nɛ́lɛ́.»

¹⁸Nkúm ɛ Yúdɛn yimmú yiíŋíən na Yə́sus yɔ́nɔ́: «Kisig kɛ́ kɛlág, mɛ óoʼ, nkə aa nyɛ́lɛɛ́ agɛɛlɛ lɛ́ nyɛ́ɛn na ɔlaa ó pɛnɛŋ piim əə́?»

¹⁹Náa Yə́sus ɔnɔ́ na nyɔ́lɛ́: «A igə aa waágɛʼtɔ́ŋɔn lɛ́ kisig əə́? Úmmuʼ nyɔ́ alɛɛ́ ɔŋŋɛʼ ɔdɛɔ́gɔ, ná kɛ́sánɛn əgín lɛ́ Táán nyɔ́lɛ́nyɔ́əsíŋ.

²⁰Waálɛŋ pɛcɛm, ngɔ́ɔ́? Pɛ́ aa pɛ́ɛnɛ lɛ́: “Udiʼtə́əŋ a kɛdaŋ, odɛnjóón mɔɔd, udinjííbə, odɛʼtɛ́lɛ́mɛn mɔɔd mbaasɔ́ ɛ pɛfaa, nyáádɛ sɛ waaŋ na ŋŋí waaŋ[73]” »

²¹Náa mɔɔd ɔnɔ́ na nyɔ́lɛ́: «Ndɛ əgəə́nuŋ a pɛcɛm pɛ́ɛb piim əgín kɔ a niə́bə́ə, a nɛnyɔmmɔ́n nɛ́am.»

²²Ná Yə́sus ayóób náan, yiísə́ə́ ɔnɔ́ na nyɔ́lɛ́: «Yoom yáʼkogoólɔbɛn kə́mmú ímuʼ súg. Tod, ólɛga nkə kiim kɛ́ ugódíí. Mɔɔnɛ́ móom wáaban mɔsɔ́gasɔ́gá ná wíim anɛ́ɛ́n wínjə́ən, wagɛɛn na tugúm a mɔɛn.»

²³Náa, əgín ná mɔɔd nyóon ayóób náan, ayɛ́ɛ aándɛ udi suúúm lɛ́ ayɛ́ɛ na tugúm tuíŋ.

²⁴Ná Yə́sus yɛɛ́dála [mɔɔd suúúm], yiísə́ə́ ɔnɔ́: «Kɛágány na pɔɔd pá tugúm lɛ́ pɔ́sɔd a Nɛlaamɛʼ nɛ́ Táán ə́y!

²⁵Ɛɛ́ɛ, kɛ́lɛ kɛgányáán agɛɛlɛ lɛ́ kiʼtóg kɛ́ nnyam yɛ́ pɔ́ɔdɔ́ŋɔn lɛ́ sɛamóo ɛ́sɔd a kiwoo kɛ́ níloʼ nɛ́ kolada pilə́ə́. Náa a mɔɔd o tugúm, kímíʼkíni kogany kə́mmú agaáyɛn náan agɛɛlɛ lɛ́ ɔ́sɔd a Nɛlaamɛʼ nɛ́ Táán.»

²⁶Pɔɔd pá páyɛ́ɛ agoob tɔgɛ́ɛ́ tuə́ŋ tóod pə́yímuŋíən pɔ́nɔ́ əə: «Áay oóoʼ, ánɛ aa aágaáʼkɛ anɛ́ɛ́n kɔɔy əə́?»

²⁷Náa Yə́sus ɔnɔ́: «Nkə kɛ́ pɔɔd pɔ́dɛɔ́gɔ na ngə́ ɛgɛɛlɛ, Táán alɛ ogɛɛlɛ.»

²⁸Náa Píɛ ɔnɔ́: «Pəsi pá tiídí tímə́dí yiim yɛ́ tiígóodi, əguguyə́ən oóoʼ.»

²⁹Yə́sus əyíbuyúlísíni ɔnɔ́ na pɔ́lɛ́: «A fɔ́lɔ́b, ndabodɛ́anɛ lɛ́ ungim nyɔ́ alɛ́ɛ́ kudi ə́mə́dí toádɛʼ, ɔmbɔ́ lɛ́ oʼkán, pɔɔ́n, pomóŋŋí, sɛ, ŋŋí a oʼto ó Nɛlaamɛʼ nɛ́ Táán,

³⁰alɛ́ɛ́ kɔɔ́ŋɔnɔn agaáyɛn náan a ɔlaa wóonɛ ó nɛ́gɔŋ, áyɛɛn tɛn na ɔlaa ó pɛnɛŋ piim a mədúg má yuudi.»

³¹Yə́sus əyə́suídíí na paaʼkan pə́ə́ŋ pá pówád na pábaan agosɔyɔ na pɔ́lɛ́, ɔnɔ́: «Taa, pəsi aa póonɛ tɛándabágɛ́ɛ́ a Yolósalɛm, kɛnɔ kɛ́ nkə kiim kɛ́ palɔɛgɛʼ pɛbán pá Táán píídílə a kidíídí kɛ́am kɛ́ mɛ Mɔɔ́n o mɔɔd kígódíí lɛ́ kɛáyɛ́ɛlɛ.

³²Kɔ́gɔ́ɔg aa páagɛndɛg a ɔmbɔg á pandɛŋ Táán lɛ́ pɛ́nyɛɛŋanɛ, pɛ́ʼtóga, pə́əgiʼtúəŋənən pɛda.

³³Páamobáam na nsuə́, páyɛmoyóon. A ngim ɛ mɔɔ́s mádáád, yíiʼkini kiim álon a kəəniʼ.»

³⁴Náa, paaʼkan pɔ́lɛ́ pádɛʼkáagoob tɔgɛ́ɛ́ tóod ɔmbɔ́ sɔɔŋ. Táán ayɛ́boyɔ́sɛ́gɛn yisí yɛ́ ɛyɛ́ɛ kɔ. Pádɛʼkáagoob nkə kɛ́ Yə́sus ayɛ́ɛ anyɔ́ŋɛn kobodɛ́anɛ.

³⁵Yə́sus ayɛ́ɛ aándɛ ndúmiʼ na kiig a pálɛ́ɛg ɛ Yəlíʼko. Náan aa ongwongwóg nyummú ayɛ́ɛ undəndínə́ə́n kɔ a ɛbá yɛ́ ngə́, aálɛ́ba moom na pasan a ngə́.

³⁶Ayóób kiʼtúú kɛ́ pɔɔd kɛ́asan. Náa ɔnɔ́ na pɔ́lɛ́: «Nkə aa kɛ́lɛɛ́ náan əə́?»

³⁷Pááság komodɛ́anɛ lɛ́ Yə́sus mɔɔ́n ó Násalɛd aa alɛɛ́ agosan.

³⁸Əə́bə́ə́ kaágan nɛŋo, ɔnɔ́: «Yə́sus, Mɔɔ́n o Tə́fid, siəd maan na mɛ o!»

³⁹Pɔɔd pá písúidin yuudi, pə́ə́bə́ə́ komosásan, pɔ́nɔ́ na nyɔ́lɛ́ ɔ́lɔ́g unuʼ. Náa, nyɔ́lɛ́ ayɛ́ɛ agá əgiiʼkini kosása na toɛn, ɔnɔ́: «Mɔɔ́n o Tə́fid, siəd maan na mɛ o!»

⁴⁰Yə́sus aáság kodɛ́lɛm, náa ɔnɔ́ pə́muyíimin na nyɔ́lɛ́. Ná mɔɔd ayɛ́ɛ aándɛ a ɛbá yə́ə́ŋ, Yə́sus əyímuŋíən ɔnɔ́ əə:

⁴¹«Wanyɔ́ŋɛn lɛ́ nyɛ́ɛlɛ tuə́ na wɛ ə́?» Náa mɔɔd ɔnɔ́ na nyɔ́lɛ́: «Sə́dúk, ndaanyɔ́ŋɛn lɛ́ wɛ́nyɛɛlɛ nyíiʼkini kodɛ́ʼtɛganan.»

⁴²Náa Yə́sus ɔnɔ́ na nyɔ́lɛ́: «Tɛ́ʼtɛ́gánan. Omɔ́ɔy lɛ́ omáág oʼto na Táán.»

⁴³Əgín kɔ áay kum a nsí, əə́bə́ə́ kodɛ́ʼtɛganan. Ayɛ́ɛ əgiim ə́yə́njən Yə́sus kɛnɔ kiim, aágɛɛ́ʼkɛn nugəm na Táán. Kiʼtúú kɛ́ pɔɔd kɛ́ɛg kiim kíyə́bə́ə́líí konyáadɛ Táán ná pɛ́ɛ́dála náan.