Read Yambeta LÓʼKAS 19 Bible Online

LÓʼKAS 19 - Yambeta bible

LÓʼKAS 19

¹Ná Yə́sus yɛɛ́sɔ́d a Yəlíʼko, yɛɛ́sán a pálɛ́ɛg.

²Mɔɔd nyummú ayɛ́ɛ kɔ a pálɛ́ɛg yɛ́ɛy, niiŋ lɛ́ Sasə́ə. Ayɛ́ɛ nkúm ɛ Pagɔ́mmanɛʼ mag, na tugúm tuíŋ.

³Ayɛ́ɛ əguunə kolɛ́ŋɛn ánɛ aa alɛɛ́ Yə́sus. Náa, wɔnɔ́ ná ayɛ́ɛ ɛndɛ́g ɛ́ mɔɔd, adɛʼkɛ́ɛ na ngə́ ɛgomoodála lɛ́ pɔɔd páyɛ́ɛ kɔ piíŋ.

⁴Aáság kəə́bisig kɛɛn yuudi na ɔʼtɛ́d, aábág a kiɛd kímmú, a sɛʼkɔmɔ́ɔl, agɛɛlɛ lɛ́ álɛŋ kodála Yə́sus wɔnɔ́ ná əə́ndəgimií asan a ngə́ ɛgo yɛ́ɛy.

⁵Ná Yə́sus əyíím əgiig a nsí ɛ sɛʼkɔmɔ́ɔl ɛgo yɛ́ɛy, yɛɛ́bágɛ əngis a mɔɛn, ɔnɔ́ na nyɔ́lɛ́: «Sasə́ə, ə́bísígíí kiim úsuu lɛ́ naánɛ́ yɛ́ɛnɛ ndɛ a noádɛʼ noáŋ.»

⁶Sasə́ə aáság kəə́bisig kusuu na ɔʼtɛ́d, əə́siəd Yə́sus agɛɛn na nyɔ́lɛ́ a noádɛʼ nuə́ŋ na tɔnyɔ́g tuim.

⁷Ná pɔɔd pɛ́ɛ́dála náan, ungim əə́bə́ə́ kumuə́lúluu, ɔnɔ́: «Táá mɔɔd nyóonɛ aáʼkɛɛnɛɛ́ ələndin a nó ɔngɛɛlɛʼ kɔbɛ́!»

⁸Náa, Sasə́ə nyɔ́lɛ́ əyíím adɛ́lɛm a udi ó Sə́dúk, ɔnɔ́ na nyɔ́lɛ́: «Ooʼó, Sə́dúk! Tugúm tóam ndaasaa tólɛ́ a kɛgaágadɛ, pɛsaa pɛ́baan ná nyɛ́ʼkɛn kɛsaa kímuʼ na mɔsɔ́gasɔ́gá. Nga nyiísiə́din mɔɔd mɔɔnɛ́ agaáyɛn nkə kɛ́ ayɛ́ɛ lɛ́ yɛ́nyɛɛ́ʼkɛn, ndəmuyúlisini nkə kɛ́ njímusiə́din náan pɛnɛŋ píniʼ[74]»

⁹Yə́sus əə́bə́ə́ kosɔyɔ a kidíídí kɛ́ Sasə́ə, ɔnɔ́: «Naánɛ́ yɛ́ɛnɛ, Táán ɔmɔ́ɔ́yɛ pɔɔd pá a noádɛʼ nóonɛ lɛ́ nyóonɛ alɛ tɛn ndɛg yɛ Ábɛlaam.

¹⁰Kɛ́lɛ lɛ́, mɛ Mɔɔ́n o mɔɔd njíím a nsí yɛ́ɛnɛ lɛ́ nyíim əguunə pá pálɛɛ́ pənímə́ə́n, mpoyɔ́ɔyɛ.»

¹¹A pɔɔd pá páyɛ́ɛ agoob nkə kɛ́ɛg kɛ́ ayɛ́ɛ əgusəə, Yə́sus əyíʼkíni kubuúsiədin nkaʼtɛ́n yimmú yɛ́ɛnɛ, lɛ́ páyɛ́ɛ pándɛ ndúmiʼ na Yolósalɛm, na lɛ́ páyɛ́ɛ afɛga lɛ́ kɛnɛŋ sɔɔŋ Táán óloodi Nɛlaamɛʼ niə́ŋ.

¹²Táá nkə kɛ́ ayɛ́bodɛánɛ aa kɛ́ɛnɛ, ɔnɔ́: «Mɔɔd nyummú nyɔ́ a kibúúm kɛ́ ponnom pó pɔɔd anyóon ayɛ́ɛ́n a nigúu nɛ́ a laálá lɛ́ ná pɛ́ɛn amoobágɛ nkúm kɔ́gɔ́ɔg, ná ə́díin anɛ́ɛ́n yímbuúlini.

¹³A kóonɛ lɛ́ ə́díin yɛɛn, yɛɛ́dɔ́ŋɔn nto yówád a pəgudin pə́ə́ŋ, amáboyáában mɔɔnɛ́, kisúg kɛ́ kóol kímuʼ, kímuʼ, ɔnɔ́ na pɔ́lɛ́: “Púdíin pódáŋananɛ mɔɔnɛ́ máam móonɛ súʼtə́ə́ a nimbuúliniʼ nɛ́am.”

¹⁴Náa, pɔɔd pá nigúu niə́ŋ páyɛ́ɛ agomoóbɛnɛn. Ná nyɔ́lɛ́ ayɛ́ɛ aáʼkɛɛn, pááság kodom pɔɔd kɔ a nigúu nɛ́ɛn lɛ́ pɛ́ɛn adɛ́anɛ, pádɛyɛ́moobágɛ nkúm, lɛ́ pɔ́lɛ́ pánnyɔ́ŋɛnɛn lɛ́ yɛ́ɛn nkúm yɔɔbɔn.

¹⁵Páyɛ́mobágɛ nkúm, əmímbuúli a nigúu niə́ŋ. Yɛɛ́dɔ́ŋɔ́nɔ pəgudin pə́ə́ŋ pá yiídí ámáábán mɔɔnɛ́, ɔnɔ́ na pɔ́lɛ́ píim anɛ́ɛ́n amodɛ́anɛ tuə́ áa pə́ə́díin pádáŋananɛ mɔ́lɛ́.

¹⁶Sɔ́g o na oʼto na oʼto aáság kiim adɛ́lɛm, náa ɔnɔ́: “Paabá, njásásánánɛ́ɛ́ na mɔ́lɛ́, táá ngim ɛ nion yɛ́ mbɔ́ɔ́ŋ kɔ aa yɛ́ɛnɛ. Ɛlɛ pisúg pɛówád.”

¹⁷Náa nkúm yɔ́nɔ́ na nyɔ́lɛ́: “Waálɛŋ kɛɛlɛ. Olɛ uʼkudin olaŋ. Wɔnɔ́ ná woóloodi lɛ́ ndɛ ogaag oʼto na wɛ a iyənjə́g ɛ́ yoom, mbə́gudə́nígi ngɔ́mɛnaʼ yɛ́ nkóʼkóón yɛ́ a pálɛ́ɛg yówád.”

¹⁸Sɔ́g tɛn wo annam ábaan aáság kiim adɛ́lɛm. Náa ɔnɔ́ na nkúm. “Paabá, njágásánɛ́ɛ́ na kɛ́am kɛ́ oyɛ́nyɛɛ́ʼkɛn. Táá ngim ɛ nion yɛ́ mbɔ́ɔ́ŋ kɔ aa yɛ́ɛnɛ. Ɛlɛ pisúg pɛ́ʼtáan.”

¹⁹Náa nkúm yɔ́nɔ́ na nyɔ́lɛ́: “Wɛ, mbə́gudə́nígi ngɔ́mɛnaʼ yɛ́ nkóʼkóón yɛ́ a pálɛ́ɛg ɛ́ʼtáan.”

²⁰Sɔ́g nyummú aáság kiim adɛ́lɛm tɛn anɛ́ɛ́n kuə́ŋ, náa ɔnɔ́ na nkúm: “Paabá, táá kisúg kɛáŋ kɛ́ oyɛ́nyɛɛ́ʼkɛn aa kɛ́ɛnɛ. Nyɛɛ́góda na kɛsom kɛ́ kilə́ə́, mbáság kɔɔsɛg.

²¹Wɔnɔ́ ná nyɛɛ́lɛŋɛn lɛ́ olɛanɛ na ɔʼtɛ́m wó ɔnnasáŋ, nyɛɛ́dámmána. Wɛ olɛ lɛ́, odiɛ́ngɛg, úusiəd! Oʼkóna, úubug!”

²²Náa nkúm yɔ́nɔ́ na nyɔ́lɛ́: “Kɛbɛ́ kɛ́ uʼkudin wɔnɔ́ wɛ! Unuʼ wááŋ wóow aa wáagoyóon lɛ́ wɛ ondɛŋáán anɛ́ɛ́n náan lɛ́ ndɛ ɔnnasáŋ, ndɛanɛ lɛ́: Ntiɛ́ngɛg, nnyəə́siədin, ntigud, nnyəə́bugin,

²³a igə anɛ́ɛ́n aa odɛʼkáagɛɛn agaágɛ́ɛ́ mɔɔnɛ́ máam a páaŋ lɛ́ mbəʼkimbuúli, ntam nsiəd kɔ na ngim ɛ nion ə́?”

²⁴Náa nkúm yɔ́nɔ́ na pɔɔd pá páyɛ́ɛ kɔ áay: “Ɛ́mobɔ́gɔ́ɔn kisúg kɛ́ kóol kɛ́ɛg, poɛ́ʼkɛn na nyɔ́ alɛɛ́ na pɛ́lɛ́ pɛówád.”

²⁵Náa pɔ́nɔ́ na nyɔ́lɛ́: “Paabá, adɛ́ aándɛ na pɛ́lɛ́ pɛówád á!”

²⁶Náa nkúm yɔ́nɔ́ na pɔ́lɛ́: “Ndabodɛ́anɛ lɛ́: Nyɔ́ ogódíí, pálɛ́ɛ́ komosáayɛnɛ múmmú. Náa, nyɔ́ oʼkódií, pálɛ́ɛ́ komogábɛn ɔmbɔ́ əgín ngab yɛ́ ɔnɔ́ nyɔ́lɛ́ ogóódi.

²⁷A noá na pabɛnɛn páam, pɔ́lɛ́ pá pádɛʼkɛ́ɛ agɔnyɔ́ŋɛnɛɛ́ lɛ́ mpag nkúm yɔɔbɔn, púinjiimin na pɔ́lɛ́ áanɛ, póboosóma nto a əngis yáam”.»

²⁸Ná Yə́sus ayɛ́ɛ aáʼkoman kosɔyɔ náan, pááság kusiəd ngə́ agobag a Yolósalɛm. Páyɛ́ɛ kiʼtúú kilúd, Yə́sus aa yiísúidin udi.

²⁹Ná páyɛ́ɛ pándɛ a Pɛdfasə́ə na Pɛʼtaníi, ndúmiʼ na oʼkon ó malɛ́m má pa Olifiyə́ə, Yə́sus yɛɛ́dɛ́lɛm, aáság kudə́əmini paaʼkan pə́ə́ŋ pábaan, amáboodóm yuudi,

³⁰ɔnɔ́ na pɔ́lɛ́: «Todáan a ɛyaa ɛ́ nigúu yɛ́ɛy yuudi. Ná puə́giig kɔ, poaboan mɔɔ́n o jáʼkáas uʼtilígə́ə́n, mɔɔd adɛ́njaŋ kobag a yɛ́lɛ́, púdíŋin, púinjiimin na yɛ́lɛ́.

³¹Mɔɔd əməʼkubuŋíən lɛ́ əə: “A igə aa polɛɛ́ əgudíŋin yɛ́lɛ́ ə́?” Púmuyúúlisini poɔʼkɔ́: “Sə́dúk alɛ njaan na yɛ́lɛ́.” »

³²Pááság kɛɛn. Pɛ́ɛ́bóan pɛbán piim əgín wɔnɔ́ ná Yə́sus ayɛ́bodɛánɛ. Pə́ə́bə́ə́ kudíŋin jáʼkáas.

³³Pálɛ anɛ́ɛ́n əgudíŋin ə, pɔɔd pá jáʼkáas pááság kiim, náa pɔ́nɔ́ na pɔ́lɛ́: «A igə aa polɛɛ́ əgudíŋin mɔɔ́n ó jáʼkáas nyóon əə́?»

³⁴Pə́yíbuyúlísíni pɔ́nɔ́: «Sə́dúk alɛ njaan na yɛ́lɛ́ o.»

³⁵Pááság kudíŋin jáʼkáas, pámɛ́ɛn na yɛ́lɛ́ ná Yə́sus alɛɛ́. Póyóliógóníí pilə́ə́ pɛɔ́bɔn pɛ́ niŋiʼ, páádɛ́ga a jáʼkáas a mɔɛn, páábágɛ Yə́sus a yɛ́lɛ́[75]

³⁶Ayɛ́ɛ Yə́sus əə́giim náan, pɔɔd póogoóliogoni pilə́ə́ pɛɔ́bɔn əgiim adɛ́ga a ngə́[76]

³⁷Ná páyɛ́ɛ pándɛ ndúmiʼ na kiig a Yolósalɛm, a nisuu nɛ́ oʼkon ó malɛ́m má pa Olifiyə́ə, kiʼtúú kɛ́ paaʼkan kɛ́ɛg, na tɔnyɔ́g tóod tuim tó páyɛ́ɛ na tólɛ́ a ɔʼtɛ́m síɛ́ɛ́d, pə́ə́bə́ə́ konyáadɛ Táán nɛŋo a mɔɛn, a mangán miim má pɛ́ɛ́dála.

³⁸Páyɛ́ɛ əgiim páágan pɛʼkɛ́ʼkɛ́ pɔ́nɔ́: «Táán ágoyɛ́ɛlɛ kɔŋɛʼ, wɛ nkúm! Wɛ nyɔ́ olɛɛ́ əgiim a niiŋ nɛ́ Sə́dúk! Kiwiiyiʼ kíɛn a mɔɛn ó! Nugəm nóyɛɛn na Táán[77]»

³⁹Ngab ɛ Pafalɛsɛyɛ́ɛŋ yɛ́ ɛyɛ́ɛ kɔ a kiʼtúú kɛ́ɛg, yəə́bə́ə́ kosɔyɔ na Yə́sus, pɔ́nɔ́: «Kɛlág, kídígi paaʼkan pááŋ óo, pɔ́lɔg nnuʼ.»

⁴⁰Əyíbuyúúlísíni ɔnɔ́ na pɔ́lɛ́: «Ndabodɛ́anɛ lɛ́, ɔmbɔ́ pɔ́lɛ́ pɔ́lɔg nnuʼ, aʼtáán áa yə́əgəə́bə́ə́ kosása!»

⁴¹Ná ayɛ́ɛ aándɛ ndúmiʼ na pálɛ́ɛg ɛ Yolósalɛm, aáság kodála wɔnɔ́ ná ɛlɛɛ́, pɛlɛɛ piə́bə́ə́ kumuúsuu.

⁴²Náa ɔnɔ́: «Ə́ə́ə́, pɔ́nɔ́ wɛ tɛn wɛɛ́lɛŋɛn aáŋ! Pɔ́nɔ́ wɛɛ́lɛŋɛn a wɔɔ́s ó naánɛ́, tuə́ áa olɛɛ́ ogɛɛlɛ lɛ́ wɔ́ɔŋ kiwiiyiʼ! Náa, a nɛ́gɔŋ əə́əy, odɛɔ́gɔ ogodála, kígə́ligi kɛɔsɛ́gáán a əngis yááŋ

⁴³lɛ́ a mədúg má mə́ndəgimií, pabɛnɛn pááŋ pálɛ́ɛ́ kogoógaŋ na oʼkág ó toɛn. Pálɛ́ɛ́ kiim əgəə́sugin a nkó yaaŋ, páagoobánaʼ a toá tuim.

⁴⁴Pálɛ́ɛ́ koman kuguúbugə lɛ́ na wɛ na pɔɔ́n pááŋ. Pádɛndɛ́ɛ́ kudi nɛdáán ɔmbɔ́ nímuʼ a nkó ɛ sɔ́g lɛ́ odɛʼkáalɛŋ kɛnɛŋ kɛ́ Táán əyíím lɛ́ ágoyɔ́ɔyɛ!»

⁴⁵A ngim yɛ́ɛy, Yə́sus ayɛ́ɛ́n ɔsɔd a Tɛ́mpɛl. Yɛɛ́bóan pɔɔd páádɛ́gɛ́dɛn undunə́ kɔ a kaadɛ, amábooŋɛ́ŋ.

⁴⁶Ayɛ́bodɛánɛ ɔnɔ́ na pɔ́lɛ́: «Kɛ́lɛ kidiídílə́ a Kálaʼtaʼ ɛ Táán lɛ́, Táán ɔnɔ́: “Noádɛʼ nóam nólɛ́ɛ́ kɛɛn noádɛʼ nó mɔnɔŋ miim málɛ́ɛ́ kɛnyɔɔ́sɔ́gɔlɔnɛɛ́ a nólɛ́.” Náa, pəŋi o! Poáʼkaánɛ agá nólɛ́ nɛɔsɛm nɛ́ piíbən[78]!»

⁴⁷Yə́sus ayɛ́ɛlanɛ a Tɛ́mpɛl pɛnɛŋ piim agaaʼkananɛ pɔɔd. Puʼkúm pó payaaganɛʼ pɛfɔny, na palɛŋ pɛcɛm, na ponnom pó nigúu páyɛ́ɛ əguunə pungə́ pó komoyóon.

⁴⁸Náa, pádɛʼkɛ́ɛ agolɛŋ tuə́ áa pɛ́ɛlɛɛ́ lɛ́ ungim ayɛ́ɛ anyɔ́ŋɛn koob tɔgɛ́ɛ́ tuə́ŋ.