Read Yambeta LÓʼKAS 2 Bible Online

LÓʼKAS 2 - Yambeta bible

LÓʼKAS 2

¹A kɛnɛŋ kɛ́go kɛ́ɛg, Sɛsáal Ogúustə[16], nkúm yɛ́ nkóʼkóón yɛ́ a Ɔlɔ́ma yiísə́ə́ lɛ́ pábana pɔɔd pá a nsí ngim.

²Ɔmban ó na oʼto na oʼto wóow óyáyɛ́lɛ́ɛ́ a kɛnɛŋ kɛ́ Kiliníyus ayɛ́ɛ ngɔ́mɛnaʼ a Silíi.

³Ungim yiígóodi lɛ́ yɛ́ɛn əgəə́dilə. Na wɛ ogo, a pálɛ́ɛg yaaŋ ɛ wɛɛ́nyɔ́amɔɛ́d.

⁴Náan aa Yósɛb yɛɛ́dɛ́ɛ́mɛn tɛn a Násalɛd, pálɛ́ɛg yimmú yɛ́ a nigúu nɛ́ Kalilə́ə, aáság kɛɛn a Pɛ́ʼtɛlɛɛm, pálɛ́ɛg yɛ́ Tə́fid əyə́biə́níí a yɛ́lɛ́, a nigúu nɛ́ Siudə́ə, lɛ́ ayɛ́ɛ mɔɔd nyɔ́ a yoog ɛ pɔɔd ɛ Tə́fid.

⁵Páyɛ́ɛ́n kɔ əgəə́dilə na oʼkán Malɛ́a, ná kaadɛ kə́ə́ŋ kándɛ kúŋ.

⁶Pálɛ anɛ́ɛ́n kɔ a Pɛ́ʼtɛlɛɛm a, wɔɔ́s ó Malɛ́a kubíən wááság kiim əgiig.

⁷Əə́bíən mɔɔ́n wəəŋ o na oʼto na oʼto, mɔɔ́n ɔnɔ́mɛɛd, aágóda na pilə́ə́, əmə́muyíngígi a kɛlɛ́ʼtɛ́g kɛ́ ándɛ mudúg móanɛ́ɛnɛ a kɛ́lɛ́ lɛ́ pɛ́ɛ́ʼtáŋ oʼkɔɔ a yoog ɛ pəən.

⁸Kɔ a nigúu nɛ́go nɛ́ɛn, pənuŋ mudúg páyɛ́ɛ əgubúlimən kɔ́gɔ́ɔg a ɔdɛ, əgunuŋ mudúg moɔ́bɔn.

⁹Uŋun ó maʼtom ó Sə́dúk wááság kɛɛn aboolónɛn kɔ, kisəə kɛ́ Sə́dúk kɛ́máboyágóʼkɛ́nɛ́ɛ́. Wɛɛ́y úyíbugúmin.

¹⁰Náa uŋun ó maʼtom wɔnɔ́ na pɔ́lɛ́: «Podɛʼtámmána! Pódála, mbíim aboólɔɛgɛnɛ Tɔsɔm Tólaŋ tó tóagɛɛlɛ lɛ́ nigúu niim nɛ́nyɔ́ga.

¹¹Kɛ́lɛ lɛ́, udúg ó naánɛ́ yɛ́ɛnɛ, a pálɛ́ɛg ɛ Tə́fid, Ongɔɔyɛʼ əmə́biə́níí a oʼto wááŋan. Alɛ Sə́dúk, alɛ Məsíi.

¹²Táá nkə kɛ́ kɛ́agɛɛlɛ lɛ́ pómoólɛŋ a kɛ́ɛnɛ: Poaboan mɔɔ́n nyɔ́ uʼtom oʼkódágódá na pilə́ə́, ungiíngiə́n a kɛlɛ́ʼtɛ́g kɛ́ ándɛ mudúg móanɛ́ɛnɛ a kɛ́lɛ́.»

¹³Kiʼtúú kɛ́ məŋun má maʼtom foáy kɔ, kímə́búlídíí na wóow, pə́ə́bə́ə́ kudúmə nugəm nó Táán, pɔ́nɔ́:

¹⁴«Nugəm nóɛn na Táán nyɔ́ alɛɛ́ a mɔɛmɔɛ́n. Kiwiiyiʼ kíɛn a nsí a pɔɔd pá alɛɛ́ anyɔ́ŋɛn.»

¹⁵Məŋun má maʼtom má Táán mááság kuúlini a mɔɛn, mə́mə́buudí. Pənuŋ mudúg pə́ə́bə́ə́ kosɔyɔ kɔ pɔ́lɛ́ na pɔ́lɛ́, pɔ́nɔ́: «Tiɛ́naan a Pɛ́ʼtɛlɛɛm yi. Tíɛn adála nkə kɛ́ kɛ́máyɛ́lɛ́ɛ́ kɔ. Tíɛn adála nkə kɛ́ Sə́dúk amɛ́ɛ́lɛ lɛ́ tɛ́lɛŋ.»

¹⁶Pááság kəə́bisig kɛɛn kɔ, pááboan lɛ́ na Malɛ́a na Yósɛb na mɔɔ́n nyɔ́ uʼtom ungiíngiə́n a kɛlɛ́ʼtɛ́g kɛ́ moom mó konɛ mó mudúg.

¹⁷Ná páyɛ́moodála, pə́ə́bə́ə́ kosɔyɔ nkə kɛ́ uŋun ó maʼtom ó Táán óyɛ́bodɛánɛ a kɛbán kɛ́ mɔɔ́n nyóon.

¹⁸Ungim nyɔ́ ayɛ́ɛ agoob nkə kɛ́ pənuŋ mudúg páyɛ́ɛ əgusəə, ayɛ́ɛ əgəə́wúunəni.

¹⁹Malɛ́a nyɔ́lɛ́ ayɛ́ɛ agaáyɛ́ngɛgan pɛbán pɛ́ɛb piim a oʼto, aásónkɛ pɛ́lɛ́ a ɔʼtɛ́m wə́ə́ŋ kɔŋɛʼ, kɔŋɛʼ.

²⁰Pənuŋ mudúg pááság kusiəd ngə́ yɔɔbɔn əguúlini. Páyɛ́ɛ agɛɛn pə́əgiim pə́dúmə nugəm nó Táán, páamonyáadɛ a nkə kiim kɛ́ páyóób, na nkə kiim kɛ́ pɛ́ɛ́dála, lɛ́ pɛbán piim pɛ́yásánɛ́ɛ́ əgín wɔnɔ́ ná uŋun ó maʼtom ó Táán óyɛ́bodɛánɛ.

²¹A mədúg máʼtáan na mádáád má a ngim ɛ kəə́bíən kuə́ŋ, kɛnɛŋ kɛ́ komoyáanyɛ kɛáság kiim əgiig. Pááság komoólog niiŋ, pɔ́nɔ́: Yə́sus, əgín wɔnɔ́ ná uŋun ó maʼtom ó Táán oyɛ́modɔ́ŋɔn, ná ŋŋí ayɛ́ɛ adɛ́njɛ́ɛ na nium nɛ́ɛn[17]

²²Kɛnɛŋ kɛ́ɛnɛ lɛ́ pa Yósɛb pɔ́lɛ́ ná Malɛ́a pɛ́ɛn əgəə́fúŋi wɔnɔ́ ná kɛcɛm kɛ́ Moyíis kɛ́yɛ́ɛ əgusəə kɛáság kiim əgiig[18] Páyɛ́ɛ́n na mɔɔ́n wɔɔbɔn a Yolósalɛm lɛ́ pɛ́ɛn əmuúloodi na Sə́dúk.

²³Páyɛ́ɛ́lɛ náan lɛ́ kɛ́lɛ kidiídílə́ a pɛcɛm pɛ́ Sə́dúk lɛ́: «Mɔɔ́n ɔnɔ́mɛɛd o na oʼto na oʼto ungim, alɛ lɛ́ pə́də́nigi a oʼto ó Sə́dúk[19]»

²⁴Əgín tɛn wɔnɔ́ ná kɛ́lɛɛ́ a pɛcɛm pɛ́ Sə́dúk, pígóodi tɛn lɛ́ pɛ́ɛn agɛɛ́ʼkɛn munúg móbaan, oó lɛ́ piɛm pɛ́baan, onom na oʼkán, a kɛfɔny na Táán[20]

²⁵Əgín a kɛnɛŋ kɛ́go kɛ́ɛg, mɔɔd nyummú ayɛ́ɛ kɔ áay a Yolósalɛm niiŋ lɛ́ Sɛmɛyɔ́ɔŋ. Ayɛ́ɛ sáád ɛ mɔɔd, əə́yə́ən pɛbán pɛ́ Táán na toɛn. Ayɛ́ɛ agobóŋan kiim kó Ongɔɔyɛʼ nyɔ́ alɛ́ɛ́ kiim ɔgɔyɛɛ́ Ɛ́sɛlayɛl. Uŋun wó Ufúlúʼtú óyɛ́ɛ na nyɔ́lɛ́.

²⁶Óyɛ́modɛánɛ lɛ́, adɛndɛ́ɛ́ kugu ná adɛ́ʼtála Məsíi yɛ́ Sə́dúk əə́giim ádom.

²⁷Uŋun óyɛ́ɛ́lɛ lɛ́ Sɛmɛyɔ́ɔŋ yɛ́ɛn a Tɛ́mpɛl a kɛnɛŋ kɛ́go kɛ́ɛg kɛ́ pa sɛ na ŋŋí ɛ Yə́sus pə́yíím na mɔɔ́n wɔɔbɔn, əgiim agɛɛlɛ na nyɔ́lɛ́ nkə kɛ́ kɛcɛm kɛ́yɛ́ɛ əgusəə.

²⁸Sɛmɛyɔ́ɔŋ aáság kodam ə́siəd mɔɔ́n a ɔmbɔg yə́ə́ŋ, amɛ́ʼkɛn pisoyidiʼ na Táán, ɔnɔ́:

²⁹«Sə́dúk, nɛ́gɔŋ yɛ́ɛnɛ waándɛ ugiʼti mɛ uʼkudin waaŋ lɛ́ nyɛ́ɛn a wiiy lɛ́, nkə kɛ́ oyɛ́ʼkagɛn kɛáʼkaáyɛ́ɛlɛ.

³⁰Mbádála Ongɔɔyɛʼ nyɔ́ uyííyid. Mbámoodála na əngis yáam.

³¹Nɛbɛyɔ́ɔyɛ nɛ́ wiísóbíni lɛ́ olɛ́ɛ́ kɔɔyɛ əʼkúu əngim.

³²Alɛ kisəə kɛ́ kɛ́agɛɛlɛ lɛ́ mɔnɔŋ má mádɛgoólɛŋɛnɛɛ́, mágoólɛŋ. Alɛ tɛn nugəm nó Ɛ́sɛlayɛl, nigúu nɛáŋ[21]»

³³Pa sɛ na ŋŋí ɛ Yə́sus páyɛ́ɛ əgəə́wúunəni na nkə kɛ́ páyɛ́ɛ əgusəə a mɔɔ́n wɔɔbɔn.

³⁴Sɛmɛyɔ́ɔŋ aáság kusoyidəni Táán a kidíídí kɛɔ́bɔn, náa ɔnɔ́ na Malɛ́a, ŋŋí a mɔɔ́n: «Ɛ́yaʼ, pɔɔd piíŋ a Ɛ́sɛlayɛl pálɛ́ɛ́ kudə́əŋ a oʼto ó mɔɔ́n waaŋ nyóon. Piíŋ tɛn pálɛ́ɛ́ kodɛ́ɛmɛn a oʼto wə́ə́ŋ. Alɛ́ɛ́ kɛɛn kɛálɛ́ʼkán kɛ́ Táán. Kɛálɛ́ʼkán kɛ́ pɔɔd pálɛ́ɛ́ kɔnɔɛyɛɛ́.

³⁵Alɛ́ɛ́ kosámbon a táán, mafɛgaʼ má pɔɔd piíŋ pálɛ́ɛ́ kɛɛnɛɛ́ na mɔ́lɛ́ a ntɛ́m yɔɔbɔn. A wɛ Malɛ́a, ntɔ́b yaaŋ ɛlɛ́ɛ́ kɛɛn wɔnɔ́ nɛɔŋ áa pə́mə́gudúm a ɔʼtɛ́m.»

³⁶Ɔʼkɛ́ɛd nyummú tɛn ayɛ́ɛ kɔ niiŋ lɛ́ Ánaʼ. Ayɛ́ɛ ɔndɔɛgɛʼ pɛbán o Táán, mɔɔ́n o Fanóɛl, a kibúúm kɛ́ Asɛ́ɛl. Ayɛ́ɛ aándɛ osaá wo ɔʼkɛ́ɛd. Yɛɛ́dɔ́n, páálaa na onom pɛag pɛ́ʼtáan na pɛ́baan, onom əə́gú,

³⁷aáság kolɔb kidí. Ayɛ́ɛ aándɛ na pɛag əʼtin ə́niʼ na píniʼ. Ayɛ́ɛ ondiogi kə́mmú ongoo a Tɛ́mpɛl, aányáadɛ Táán na udúg na wɔɔ́s, ɔɔ́gɔɔ́sɔ́gɔlɔn, əə́gəə́gili moom konɛ.

³⁸Ɔʼkɛ́ɛd nyóon aáság kiim əgiig tɛn kɔ áay a kɛnɛŋ kɛ́go kɛ́ɛg. Əə́bə́ə́ kɛɛ́ʼkɛn pisoyidiʼ na Táán, ɔɔ́sɔyɔ kɛbán kɛ́ moóngaa nyóon na ungim nyɔ́ ayɛ́ɛ agobóŋan lɛ́ Táán yááŋɛn Yolósalɛm.

³⁹Ná pa sɛ na ŋŋí ɛ Yə́sus páyɛ́ɛ páʼkoman kuyə́əgi kɛcɛm kɛ́ Sə́dúk, pááság kusiəd ngə́ əguúlini a Násalɛd, pálɛ́ɛg yɔɔbɔn, a nigúu nɛ́ Kalilə́ə.

⁴⁰A Yə́sus, nyɔ́lɛ́ ayɛ́ɛ əgín aman koyam, aágon, nsiŋ yəəŋ yəə́yə́əg a oʼto. Táán ayɛ́ɛ na nyɔ́lɛ́.

⁴¹Pa sɛ na ŋŋí ɛ Yə́sus páyɛ́ɛ pɛɛnan maag miim a Yolósalɛm, agɛɛn asánɛ wɔɔ́n ó Páska.

⁴²Ná Yə́sus ayɛ́ɛ aándɛ na pɛag pɛówád na pɛ́baan, pa sɛ na ŋŋí pááság kɛɛn na nyɔ́lɛ́ wɔnɔ́ ná kɛ́lɛanɛɛ́ a mandoŋá mɔ́ɔ́bɔn[22]

⁴³Ná wɔɔ́n óyɛ́ɛ wáʼkoman, pááság kusiəd ngə́ əguúli. Náa, Yə́sus nyɔ́lɛ́ aáság kolɔb a Yolósalɛm, pa sɛ na ŋŋí pádɛálɛ́ŋɛ́ɛ́.

⁴⁴Páyɛ́ɛ agofɛg lɛ́ alɛ na pɔsɔ́g pɔ́ɔ́bɔn pá ngə́. Pɛ́ɛ́dáŋána wɔɔ́s kilúd, pádɛmoodála. Pə́ə́bə́ə́ kumuyúunə a ondáŋ ó pɔsɔ́sɔ́g pɔ́ɔ́bɔn, na pɔɔ́npásɛ pɔ́ɔ́bɔn,

⁴⁵pádɛmoyɔ́ɔ́ŋ. Pááság kudii ngim, əguúlini a Yolósalɛm, pə́əgiim pə́muyúunə.

⁴⁶A ngim ɛ mədúg mádáád aa páyɛ́ɛ́n amoóboan, alɛ a Tɛ́mpɛl. Alɛ kɔ undəndínə́ə́n a kɛgaágadɛ kɛ́ palɛŋ pɛcɛm, aágoob nkə kɛ́ pálɛɛ́ əgusəə, əə́buŋíənə tɛn pɛbán.

⁴⁷Ungim nyɔ́ ayɛ́ɛ agoob nkə kɛ́ ayɛ́ɛ agosɔyɔ, ayɛ́ɛ agaáfɛ́ma wɔnɔ́ ná ayɛ́ɛ əguúlisəni pɛbán na nsiŋ.

⁴⁸Ná pa sɛ na ŋŋí páyɛ́moodála, nkó yɔɔbɔn yɛɛ́bág. Náa ŋŋí ɔnɔ́ na nyɔ́lɛ́: «Mɛ mɔɔ́n! Tuə́ aa omábɛyɛ́ɛ́lɛ náan ə́? Pəsi na sɛ waaŋ tɛáʼkoság kuguyúunə, omábɛyáág ɛságág a ɔʼtɛ́m kɛ́fɔlɛ́.»

⁴⁹Yə́sus aáság kubuyúlisini ɔnɔ́ na pɔ́lɛ́: «Puəginjuunə lɛ́ nkə? Pondɛŋɛn lɛ́ nkóódi lɛ́ nyɛ́ɛlɛ pɛbán pɛ́ Sɛ waam a?»

⁵⁰Kɛbán kímuʼ, pɔ́lɛ́ pádɛʼkáagoob nkə kɛ́ ayɛ́ɛ anyɔ́ŋɛn kobodɛ́anɛ a tɔgɛ́ɛ́ tóod.

⁵¹Yə́sus aáság kodɛ́ɛmɛn əguúli na pɔ́lɛ́ a Násalɛd. Ayɛ́ɛ agoboyóbɛn. Pɛbán piim pɛ́ pɛ́yɛ́ɛ agaásan, ŋŋí ayɛ́ɛ agaáyɛ́ngɛgan a oʼto.

⁵²Yə́sus nyɔ́lɛ́ ayɛ́ɛ əgín aman koyam, nsiŋ yəəŋ yaágon a oʼto, aágɛɛlɛ nkə kɛ́ kiə́gə́mmi Táán, na pɔɔd[23]