Read Yambeta LÓʼKAS 20 Bible Online

LÓʼKAS 20 - Yambeta bible

LÓʼKAS 20

¹Wɔɔ́s wúmmú, Yə́sus ayɛ́ɛ agaaʼkananɛ pɔɔd a Tɛ́mpɛl. Puʼkúm pó payaaganɛʼ pɛfɔny na palɛŋ pɛcɛm na ponnom pó nigúu pááság kiimən kɔ.

²Náa, pɔ́nɔ́ na nyɔ́lɛ́: «Mayɛ́bɛdɛánɛ áŋ! A toɛn tó ánɛ aa olɛɛ́ agɛɛlɛ nkə kɛ́ɛg kiim kɛ́ olɛɛ́ agɛɛlɛ ə́? Ánɛ aa agoyɛ́ʼkɛ́nɛ́nɛ́ɛ́ toɛn lɛ́ wɛ́ɛlɛ ə́?»

³Náa ɔnɔ́ na pɔ́lɛ́: «Mɛ tɛn ndɛ na kɛbán kɛ́ ndə́əbuŋíən. Ndaanyɔ́ŋɛn lɛ́ poɛ́ʼtɛ́anɛ:

⁴Ánɛ aa əyíím ádom Sɛ́aŋ lɛ́ yíim agɛɛlɛ ɔsɔgɛn? Táán óm, pɔɔd əə́? Ɛ́ʼtɛánɛ́an!»

⁵Pə́ə́bə́ə́ kɔɔ́cɔcɔb kɔ pɔ́lɛ́ na pɔ́lɛ́ pɔ́nɔ́: «Timəʼkumuyúlisini lɛ́ Táán áa ayɛ́moodóm, əəbiŋíən ɔnɔ́ əə: “A igə anɛ́ɛ́n áa tidiʼkə́yəmuyə́liʼtinií ə́?”

⁶Náa, timəʼkusəə tɛn tɛɔʼkɔ́: “Pɔɔd aa páyɛ́moodóm” nigúu niim nɛ́agoob kɔbɛ́ na pəsi, páabɛdóan na aʼtáán lɛ́ pábɛyóóna. Ungim aálɛŋ lɛ́ Sɛ́aŋ ayɛ́ɛ ɔndɔɛgɛʼ pɛbán o Táán.»

⁷Pə́yímuyúlísíni agá pɔ́nɔ́: «Pəsi tɛdɛálɛŋ ánɛ aa ayɛ́moodóm.»

⁸Náa nyɔ́lɛ́ tɛn ɔnɔ́ na pɔ́lɛ́: «Mɛ tɛn ntɛábodɛ́anɛ a toɛn tó ánɛ aa ndɛɛ́ agɛɛlɛ pɛbán pɛ́ɛb.»

⁹Yə́sus yiísiə́din pɔɔd nkaʼtɛ́n yɛ́ɛnɛ, ɔnɔ́: «Mɔɔd aa nyóon yɛɛ́dɛ́g pɔlɛ́m puə́ŋ[79], əə́siəd pɔɔd pá pigólí amáág kɔ a túʼpaaʼtɛ́, amɛ́ɛn ongɛn ó kubúlim kɔ mədúg miíŋ.

¹⁰Ná masómbóó mə́yíím əgiig, yiídə́ə́míni uʼkudin wəəŋ nyummú, amámoodóm lɛ́ yɛ́ɛn adɛ́anɛ na pɔsɔ́g pá páyɛ́ɛ əgud a pɔlɛ́m puə́ŋ lɛ́ píim pámodómɛn yəəŋ ngab. Náa, ná ayɛ́ɛ́n əgiig kɔ, pɔsɔ́g póob pə́yímugúmin, pámámobáám əgín náanɛ ɔʼtɛ́m úmmuʼ, pámámooŋɛ́ŋ, əmúúli na ɔmbɔg na ɔmbɔg.

¹¹Mɔɔd o pɔlɛ́m aáság kiiʼkiniʼ kiim ádom uʼkudin wəəŋ nyummú. Píígúmin tɛn nyóon, pámámobáám, pámámoodóga əgín náanɛ kɔŋɛʼ, pámámooŋɛ́ŋ, əmúúli na ɔmbɔg na ɔmbɔg.

¹²Aáság kiiʼkiniʼ kiim ádom wɛndɛ́ŋ a annam ádáád. Nyóon, pə́yímubuə́də, pámámooŋɛ́ŋ.

¹³Náa mɔɔd o pɔlɛ́m əə́bə́ə́ kəə́ŋíən ɔnɔ́: “Tuə́ áa mbándagɛɛlɛɛ́ nɛ́gɔŋ əə́? Ndaadom mɛ mɔɔ́n wo ɔʼtɛ́m. Amaʼkɛɛlɛ nyɔ́lɛ́, pádɛáwɛ́ɛsɛ komodɔ́bɔ.”

¹⁴Náa, ná pɔ́lɛ́ pɛ́ɛ́dála lɛ́ mɔɔ́n áa nyóon əə́ʼkiim ádómɛ́ɛ́, pə́ə́bə́ə́ kosɔyɔ agá pɔ́lɛ́ na pɔ́lɛ́ pɔ́nɔ́: “Táá, mɔɔd nyɔ́ alɛ́ɛ́ kolɔbɛɛ́ a tugúm tó sɛ aa nyóonɛ! Tímuúguminəən, tɛ́moyóon. Náan, pɔlɛ́m póonɛ póagoob na pəsi.”

¹⁵Pááság kolon pɔlɛ́m na nyɔ́lɛ́, pámɛ́ɛn amoyóon.» Náa Yə́sus ɔnɔ́: «Áay oóoʼ, tuə́ áa mɔɔd o pɔlɛ́m aágɛɛlɛ na pɔɔd póob əə́?

¹⁶Adɛ́ əəbuúgumən, áboyóóna ná ə́siəd pɔlɛ́m puə́ŋ agɛɛ́ʼkɛn na pɔɔd pá pigólí pɛ́ndɛ́ŋ á?» Ná pɔɔd páyóób náan, Píísə́ə́ pɔ́nɔ́: «A wóow ombod, ndóo óo!»

¹⁷Yə́sus aáság kobodɛ́ʼtɛg pɔ́lɛ́ piim a nti log log log, náa ɔnɔ́: «A igə anɛ́ɛ́n áa kɛ́lɛɛ́ kidiídílə́ a Kálaʼtaʼ ɛ Táán lɛ́: “Nɛdáán nɛ́ pawáagaʼ toádɛʼ pɛ́ɛ́dó, nɛ́lɛ́ nɛ́go aa nɛ́yáán nɛdáán nɛ́ nígumíníníí noádɛʼ.”

¹⁸Taa, Ungim nyɔ́ alɛ́ɛ́ kəə́búbigií a nɛdáán nɛ́ɛn, alɛ́ɛ́ kubúmbun. Nyɔ́ nɛ́lɛ́ɛ́ kumudə́əŋənənií, nɛ́lɛ́ɛ́ komoyɔ́ɔb.»

¹⁹Palɛŋ pɛcɛm, na puʼkúm pó payaaganɛʼ pɛfɔny páyálɛ́ŋɛ́ɛ́ lɛ́ kɛbán kɛɔ́bɔn aa Yə́sus ayɛ́ɛ əgusəə a nkaʼtɛ́n yɛ́ɛy náan. Pə́yúúnə lɛ́ páság kumuúgumin kɔ áay, pámoyóon. Náa pádɛʼkáawɛ́ɛsɛ komodɔ́bɛd.

²⁰Pə́ə́bə́ə́ anɛ́ɛ́n komoyágoʼkooŋanɛ. Náan aa páyɛ́modómɛn pɔɔd pə́mmú pá páyɛ́ɛ agɛɛlanɛ wɔnɔ́ pɔ́lɛ́ pálɛ sáád. Páyɛ́boyɛ́ʼkɛn oʼtom lɛ́ pɛ́ɛn əŋíənə Yə́sus pɛbán ná ə́də́əŋ a kisindiʼ kɛɔ́bɔn. Áay pɔ́ɔgɔɔŋ ɛgom ná pə́muúgumin, pɛ́ɛn na nyɔ́lɛ́ a nó ngɔ́mɛnaʼ yɛ́ nkóʼkóón, pámosɔ́mɛn na palaamɛʼ.

²¹Pə́yímuŋíən pɔ́nɔ́ əə: «Kɛlág, tɛálɛŋ lɛ́ wɛ olɛɛ́ əgusəə fɔ́lɔ́b, nkə kɛ́ olɛɛ́ agaaʼkananɛ kɛ́lɛ tɛn sáád. Udiə́gu niis na mɔɔd, olɛ agaaʼkananɛ sáád wɔnɔ́ ná mɔɔd ogódíí lɛ́ ádáŋana a ngə́ yɛ́ yəə́gə́mmi Táán.

²²Kólɛ́ aa timíim əguŋíən lɛ́ óbɛdɛ́anɛ, pɛcɛm piə́s pɛ́lɛ əgusəə lɛ́ tɛ́ʼpɛ́ɛ́ mag na Sɛsáal əə́?»

²³Wɔnɔ́ ná Yə́sus yɛɛ́lɛ́ŋ lɛ́ ambaan yə́ə́ŋ áa pálɛɛ́ əguunə náan, náa ɔnɔ́ na pɔ́lɛ́:

²⁴«Mayɛ́nyɛɛ́ʼkɛ́naan kisúg kɛ́ mɔɔnɛ́ áay aáŋ!» Pááság kolónɛ kisúg kɛ́ mɔɔnɛ́ kímuʼ, pámámoyɛ́ʼkɛn. Náa ɔnɔ́ na pɔ́lɛ́: «Udi wóonɛ oʼ, wó ánɛ aa ólɛɛ́nɔ ə́? Niiŋ tɛn oʼ, nɛ́ ánɛ aa nɛ́lɛɛ́ kɔ nidilídə́ə́n ə́?» Pááság kumuyúlisini pɔ́nɔ́ na nyɔ́lɛ́: «Udi wóow, ólɛ ó Sɛsáal, ɔmbɔ́ tɛn niiŋ nɛ́ɛn nɛ́ nɛ́lɛɛ́ kɔ nidilídə́ə́n, niə́ŋ áa nɛ́lɛɛ́nɔ.»

²⁵Náa Yə́sus ɔnɔ́ na pɔ́lɛ́: «Nkə aa anɛ́ɛ́n kímmú ə́? Yɛ́ ɛ́lɛɛ́ ɛ́ Sɛsáal, poɛ́ʼkɛn na Sɛsáal. Yɛ́ ɛ́lɛɛ́ ɛ́ Táán, póyɛɛ́ʼkɛn na Táán.»

²⁶Igúg yɛ́ ɛ́yɛ́ɛ ɛ́gɛɛlɛ lɛ́ pə́muúgumin ɛ́dɛʼkɛ́ɛ a nkə kɛ́ɛg kɛ́ yiísə́ə́. Pə́yə́wúnə́níí kɛ́fɔlɛ́ ná əyíbuyúlísíni náan.

²⁷Ngab ɛ Pasadosɛyɛ́ɛŋ yímmú, (pɔ́lɛ́ aa pádɛʼkɛ́lɛɛ́ əgəə́liʼtini lɛ́ pɛlóŋ pɛ́lɛ́ɛ́ koóndɛg) páyɛ́ɛ́n aboan Yə́sus, pááság kumuŋíən pɔ́nɔ́ əə:

²⁸«Kɛlág! Táá nkə kɛ́ Moyíis yiísə́ə́ áa kɛ́ɛnɛ ɔnɔ́: “Mɔɔd amaʼkogóan ɔʼkɛ́ɛd, náa əə́gú, əʼtí pɔɔ́n na oʼkán, móŋŋí ə́díin əsiəd kidí, pə́bíənə pɔɔ́n na kɛ́lɛ́ a niiŋ nɛ́ kɛlóŋ móŋŋí wəəŋ[80]”

²⁹Kɛbán áa anɛ́ɛ́n a kɛ́ɛnɛ kɛ́lɛɛ́ lɛ́: Pɔɔd aa póob páyɛ́ɛ a niŋŋí nɛɔ́bɔn nto ɛ́ʼtáan na ɛ́baan. Sɔ́g nyɔ́ osaá aágóan ɔʼkɛ́ɛd, əə́gú, əʼtí mɔɔ́n.

³⁰Móŋŋí nyɔ́ ayɛ́ɛ əgumuyə́ən aáság kudíin əsiəd kidí, əə́gú.

³¹Wo annam ádáád tɛn yoom ímuʼ. Kɛ́yɛ́nánán náan súʼtə́ə́ a sɔ́g wo annam áʼtáan na ábaan. Pííguə́ʼkən, pə́ʼtí mɔɔ́n.

³²A komananɛ, ɔʼkɛ́ɛd nyóon tɛn aáság kudíin əgu a ngim.

³³Áay oóoʼ! Wɔnɔ́ ná yɛɛ́dɔ́n na pɔ́lɛ́ póob piim əə, na pɛlóŋ pɛ́lɛ́ɛ́ koóndɛgan anɛ́ɛ́n óoʼ, oyaán áa alɛ́ɛ́ kɛɛnɛɛ́ onom wəəŋ ə́?»

³⁴Yə́sus əyíbuyúlísíni ɔnɔ́ na pɔ́lɛ́: «A nsí yɛ́ɛnɛ aa kɛ́lɛɛ́ lɛ́ panɔ́mɛɛd pə́əsiədə pagɛ́ɛd, pagɛ́ɛd páagɛɛnan pɛdɔ́ʼtɔn.

³⁵Náa, pá Táán yɛɛ́dála lɛ́ pálɛ págoóndɛg a pɛlóŋ, páyɛɛn na ɔlaa a Nigúu niə́ŋ, póob pádɛágɛɛn na pɛgoánágoána na pɛdɔ́ʼtɔn.

³⁶Kɛ́lɛ lɛ́ pɔ́lɛ́ pə́diə́giʼkini kugu kə́mmú, pándɛ yoom ímuʼ wɔnɔ́ məŋun má maʼtom. Pándɛ pɔɔ́n pá Táán lɛ́ píígú, náa pə́ʼkiiʼkini koóndɛgɛɛ́.

³⁷A kɛbán kɛ́ idúʼtún yɛ́ yɛ́ɛ́gá yug, Moyíis yiílóódi nyɔ́lɛ́nyɔ́amɔɛ́d lɛ́ pɛlóŋ pɛ́lɛ́ɛ́ koóndɛg lɛ́ alɛ agodɔ́ŋɔn Sə́dúk Táán ɔnɔ́: “Táán yɛ Ábɛlaam, Táán yɛ Ɛ́sag, na Táán ɛ Yáʼkɔb[81]”

³⁸Táán ɔdɛɔ́gɔ Táán ɛ pɔɔd pá pálɛɛ́ pɛlóŋ, alɛ Táán ɛ pá pálɛɛ́ a ɔlaa lɛ́ a niə́ŋ pɔ́lɛ́ póob piim pálɛ a ɔlaa.»

³⁹Palɛŋ pɛcɛm pə́mmú pááság kusiəd tɔgɛ́ɛ́, náa pɔ́nɔ́: «Ɛɛ́ɛ, Kɛlág! Waálɛŋ kosɔyɔ.»

⁴⁰Píísə́ə́ náan lɛ́ pádɛʼkɛ́ɛ agowɛ́ɛsɛ kumuŋíən kə́mmú kɛbán.

⁴¹Yə́sus aáság kusəə ɔnɔ́ na pɔ́lɛ́: «Tuə́ áa pálɛɛ́ pə́gusəə lɛ́ Məsíi alɛ mɔɔ́n o Tə́fid əə́?

⁴²Kɔmɔɛ́d lɛ́ Tə́fid nyɔ́lɛ́nyɔ́amɔɛ́d yiídúmə a kálaʼtaʼ ɛ pɛʼkwáá ɔnɔ́: “Sə́dúk Táán aádɛánɛ na Sə́dúk waam ɔnɔ́: Wɛ, ləndin áanɛ a ombɔg wáam ó nɛnom

⁴³agɛɛn əgiig əgín wɔnɔ́ ná ndɛ́ɛ́ kɛɛlɛɛ́ lɛ́ úgíʼtən pabɛnɛn pááŋ na ambaan[82]”

⁴⁴Tuə́ áa Məsíi alɛɛ́ ugiiʼkini kɛɛn lɛ́ alɛ mɔɔ́n o Tə́fid, Tə́fid nyɔ́lɛ́nyɔ́amɔɛ́d aámodɔ́ŋɔn lɛ́ Sə́dúk wəəŋ ə́?»

⁴⁵Yə́sus aáság kodɛ́anɛ na paaʼkan pə́ə́ŋ a udi ó pɔɔd pá páyɛ́ɛ agoob wɔnɔ́ na ayɛ́ɛ agosɔyɔ, ɔnɔ́:

⁴⁶«Lóʼkɔ́dɔɔn na palɛŋ pɛcɛm ó! Pányɔ́ŋɛ́nɛn kiim páánadɛna na pɛlanda pɛ́ poʼtaa agaábágɛdɛ, páanyóŋɛnɛla lɛ́ kɛnɔ kɛ́ pálɛɛ́ agosan, pə́buúsoyidəni na nnyáádɛ́ ngim. A puog pó pɛɔ́sɔ́gɔ́lɔ́n na a pɛsɛɛn pɛ́ pɛgóón, pə́əguunə kuləndən əgín a mɔʼkɔɔ má yuudi, mɔʼkɔɔ má niiŋ.

⁴⁷Pálɛ əgiiʼkini kobɔgɔ pidí pɛ́ pagɛ́ɛd nkə kɛ́ pógódíí, pɛɔ́sɔ́gɔ́lɔ́n tɛn pɛɔ́bɔn pɔ́mbɔ́d kosom lɛ́ ná páboodála. Pɔ́lɛ́ póob pálɛ́ɛ́ kɔɔŋ ntɔ́b yɛ́ ɛmábosán oʼto.»