Read Yambeta LÓʼKAS 21 Bible Online

LÓʼKAS 21 - Yambeta bible

LÓʼKAS 21

¹Yə́sus aáság kudə́əmini oʼto, əə́bə́ə́ kodɛ́ʼtɛg pɔɔd piim pá páyɛ́ɛ əgiim agaágan ngab a kɛsom kɛ́ kiɛd kɛ́ ngab kɛ́ kɛ́yɛ́ɛ a Tɛ́mpɛl. Páyɛ́ɛ pɔɔd pá tugúm.

²Aáság kodála tɛn ɛsɔ́gasɔ́gá ɛ́ kidí kɛ́ ɔʼkɛ́ɛd kɛ́agaag muyənjə́g muə́ŋ mó fɛláaŋ móbaan.

³Náa ɔnɔ́: «A fɔ́lɔ́b, ndabodɛ́anɛ lɛ́ nkə kɛ́ ɛsɔ́gasɔ́gá ɛ́ kidí kɛ́ ɔʼkɛ́ɛd yɛ́ɛy ɛ́máág a ngab kɛ́mááyɛn kiim kɛ́ pɔsɔ́g pámáágan

⁴lɛ́ ungim nyóon, nkə kiim kɛ́ əə́sugin a ngab kɛ́lɛ nkə kɛ́ kídiʼkúgódií pigólí. Kɔmɔɛ́d lɛ́ kidí kɛ́ɛnɛ, na osog wə́ə́ŋ ungim, amáyóláá; amɛ́ʼkɛn kiim kɛ́ ayɛ́ɛ lɛ́ álaa na kɛ́lɛ́.»

⁵Pɔɔd pə́mmú páyɛ́ɛ agosɔyɔ wɔnɔ́ ná Tɛ́mpɛl yaádɛ́ɛ́, na pisig pɛ́ aʼtáán yá pɛ́ɛ́wáág na yɛ́lɛ́! Na moom mó mólɛɛ́ kɔ mó pɛ́ɛ́fɔ́nyɛn Táán! Náa Yə́sus ɔnɔ́:

⁶«Nkə kɛ́ɛg kɛ́ polɛɛ́ amaʼkanɛ, mədúg málɛ́ɛ́ kiim má ɔmbɔ́ nɛdáán nímuʼ áay nɛ́dɛndɛ́ɛ́ kolɔb náan a nkó ɛ sɔ́g. Nkə kɛ́ɛg kiim kɛ́lɛ́ɛ́ koman kubumbug.»

⁷Pááság kumuŋíən pɔ́nɔ́ na nyɔ́lɛ́: «Kɛlág, naanɛ́g áa nkə kɛ́ɛg kɛ́ wəə́səə kɛ́lɛ́ɛ́ kaáyɛ́lɛɛ́ ə́? Kɛálɛ́ʼkán igə tɛn aa kɛ́lɛ́ɛ́ kibiílodií lɛ́ kɛnɛŋ kɛ́ pɛbán pɛ́ɛb kaáyɛ́ɛlɛ kiə́ʼkiig əə́?»

⁸Náa ɔnɔ́ na pɔ́lɛ́: «Lóʼkɔ́dɔɔn óo! Lóʼkɔ́dɔɔn agɛɛlɛ lɛ́ mɔɔd ədiyíbulígə o! Kɛ́lɛ lɛ́ ɛ́fɔlɛ́ ɛ́lɛ́ɛ́ kiim na niiŋ nɛ́am a unuʼ. Na nyóon ɔnɔ́ nyɔ́lɛ́ aa alɛɛ́ Məsíi. Pálɛ́ɛ́ kusəə tɛn pɔ́nɔ́: “Kɛnɛŋ aa kɛ́ɛnɛ kiə́ʼkiigií ó!” Ɔmbɔ́ pɔ́sɔyɔ náan, pudiíbuyə́ən.

⁹Náa, ná polɛ́ɛ́ koob pɔ́ɔsɔyɔ lɛ́ pɛdá pɛ́lɛ agaánɔɛyɛ, ná lɛ́ pɔɔd pə́də́əmini oʼto na nɛlaamɛʼ, podɛʼtámmána. Nkə kɛ́ɛg kiim kígóódi lɛ́ kɛáyɛ́ɛlɛ. Náa, kɛ́dɛndɛ́ɛ́ kɛɛn lɛ́ nɛman nɛ́ nsí aa nɛ́ɛn.»

¹⁰Náa ɔnɔ́ na pɔ́lɛ́: «Kɛ́lɛ́ɛ́ kɛɛn lɛ́ nigúu nɛ́ɛnɛ nɛ́lɛ agonɔɛyɛ nɛ́ʼkága pɛdá, kɛsom kɛ́ nɛlaamɛʼ kɛ́ɛnɛ kɛ́anɔɛyɛ na kɛ́ʼkága.

¹¹Nsí ɛlɛ́ɛ́ kəə́nyigən na toɛn. A pɛnɔ piíŋ, məyíi málɛ́ɛ́ kudə́əŋ, na mabámbany má mɔ́ɔdɔ́bɔ ɛ́fɔlɛ́ ɛ́ pɔɔd. Pɛbán pɛ́ ngililiʼ, na piə́wúunəniʼ pɛ́ pɛálɛ́ʼkán pɛ́lɛ́ɛ́ kiim písuu tɛn a mɔɛn.

¹²«Náa, a pɛbán pɛ́ɛb piim kudíin pɛáyɛ́ɛlɛ, pálɛ́ɛ́ kubuúgumən, páaboócɔʼkɔnɛ. Pálɛ́ɛ́ kɛɛn na pəŋi a puog pó pɛɔ́sɔ́gɔ́lɔ́n agoboóyɔmɛ, páyɛɛn na pəŋi a yoog yɛ njaan. Pálɛ́ɛ́ kubudə́nigi a pɛyɔm a udi ó pongɔ́mɛnaʼ na a oó puʼkúm a kidíídí kɛ́am.

¹³Áay, polɛ́ɛ́ kɔɔŋ ngə́ ɛgɛʼtɛ́lɛmɛn mbaasɔ́.

¹⁴Áyágɛ́an a oʼto lɛ́, puʼkóodi lɛ́ poáságɛma nkə kɛ́ puə́səə kɔ na tuə́ áa poágaánɔna

¹⁵lɛ́ mɛɛ́nyɔ́amɔɛ́d áa ndɛ́ɛ́ koboyɛ́ʼkɛnɛɛ́ tɔgɛ́ɛ́, na nsiŋ yɛ́ ɔmbɛnɛn waaŋan ɔmbɔ́ úmmuʼ adɛndɛ́ɛ́ kaáʼkɛ koboóbɛn a kɛbán ɔmbɔ́ kímuʼ, adɛáʼkɛ kogasanɛ nkə kɛ́ puə́səə.

¹⁶Əgín pasɛ pááŋan, pa ŋŋí pááŋan, pomóŋŋí pááŋan, yoog yaaŋan ɛ pɔɔd na pɔsɔ́sɔ́g pááŋan pamɔɛ́d áa pálɛ́ɛ́ koboólɛgɛɛ́. Pálɛ́ɛ́ kɛɛlɛ lɛ́ póóna ɛ́fɔlɛ́ a ondáŋ wááŋan.

¹⁷Ungim alɛ́ɛ́ koboóbɛnɛn a kidíídí kɛ́am.

¹⁸Náa, nuyə́ən ɔmbɔ́ númuʼ nó a oʼto wááŋan nódɛndɛ́ɛ́ koóliogi.

¹⁹Podɛʼtiɛ́ngɛ́lɛd, poagɛɛn na ɔlaa ó pɛnɛŋ piim.

²⁰«Ná polɛ́ɛ́ kodálaá lɛ́ ondáŋ ó pɛdá wáʼkaágoʼkɛnɛn pálɛ́ɛg ɛ Yolósalɛm, póság kolɛŋ lɛ́ kɛnɛŋ kiə́ŋ kɛ́ pə́ndəmuúbugəə́ kiə́ʼkiig.

²¹Áay, pá pálɛ́ɛ́ kɛɛnɛɛ́ a Siudə́ə pógóódi lɛ́ pádɛ́da agɛɛn ɔgɔɔsɛm a nkon. Pá pálɛ́ɛ́ kɛɛnɛɛ́ a pálɛ́ɛg ɛ Yolósalɛm a kaadɛ, pógóódi lɛ́ pálón pɛ́ɛn laálá. Pá pálɛ́ɛ́ kɛɛnɛɛ́ a malɛ́m pə́diyímbuúlíni a pálɛ́ɛg.

²²Mɔɔ́s móom málɛ́ɛ́ kɛɛn mɔɔ́s má kiə́gun, mɔɔ́s má nkə kɛ́ kíyə́dílə́ə́ a Kálaʼtaʼ, kígóódi lɛ́ kɛáyɛ́ɛlɛ[83]

²³Maan kɛ́fɔlɛ́ a mɔɔ́s móom na pagɛ́ɛd pá əngum, na pɔsɔ́g pá pálɛ́ɛ́ kɛɛnɛɛ́ na pɔɔ́n pá páaŋɛ́ʼkɛ! Maan na pɔ́lɛ́ lɛ́ ntɔ́b yɛ́ ɛlɛ́ɛ́ kɛɛnɛɛ́ a nigúu nɛ́ɛn, ɛlɛ́ɛ́ kɛɛn ngíŋ. Táán alɛ́ɛ́ kuloodi na pɔɔd póob lɛ́ alɛ undiŋə́ə́n.

²⁴Pálɛ́ɛ́ koóna pɔsɔ́g pə́mmú na moyafág mó pɛdá, pə́əgumən pə́mmú agɛɛn na pɔ́lɛ́ a mɔnɔŋ má laálá. Pɔɔd pá a mɔnɔŋ mɛ́ndɛŋ pálɛ́ɛ́ kugíʼtən Yolósalɛm súʼtə́ə́ kɛnɛŋ kɛ́ páyɛ́boyɛ́ʼkɛn kɛ́man.»

²⁵Pɛálɛ́ʼkán pɛ́lɛ́ɛ́ kolon a niis nɛ́ wɔɔ́s, na a wəə́, na a muə́dədəʼ[84] A nsí, noom nó ɛbá fiɛ́d nólɛ́ɛ́ kofófog, pɛmɔ́s pɛ́ məní píəgiiŋ na toɛn wɔnɔ́ mbambany. Náan aa ungim alɛ́ɛ́ kɔɔ́ŋɛ́ɛ́ ngililiʼ.

²⁶Əgín a nɛfɛgaʼ nɛ́ pɔɔd pálɛ́ɛ́ kofɛgaá nkə kɛ́ kɛ́lɛ́ɛ́ kaásánɛ́ɛ́ a nsí, piíŋ pálɛ́ɛ́ kugu wɛɛ́y. Kɛ́lɛ lɛ́, toɛn tó túgumíníníí moom móom muim a mɔɛn tólɛ́ɛ́ kəə́nyigid.

²⁷Áay aa pálɛ́ɛ́ kɛʼtálaá mɛ Mɔɔ́n o mɔɔd ndə́əgiim nsuu a kɛbɛd a mɔɛn. Ndɛ́ɛ́ kiim na toɛn tuim na nugəm nuim[85]

²⁸Kɛnɛŋ kɛ́ pɛbán pɛ́ɛb píəgəə́bə́ə́ kaásan, ábɛ́nɛ́nɛ́an, tə́ə́míníən oʼto lɛ́ kɛnɛŋ sɔɔŋ Táán áboyɔ́ɔyɛ.

²⁹Yə́sus əyíbusiə́din nkaʼtɛ́n yɛ́ɛnɛ, ɔnɔ́: «Táláan nkə kɛ́ kɛ́lɛɛ́ agaáyɛ́ɛlɛ na figiyə́ə, ɔmbɔ́ lɛ́ na piɛd tɛn pɛ́ndɛ́ŋ.

³⁰Ná poádála lɛ́ toáŋánán toɔ́bɔn tuə́ndəgiim tódɔs, pólɛŋ lɛ́ kɛloo kɛándɛ ndúmiʼ.

³¹Yoom tɛn náan ímuʼ ná polɛ́ɛ́ kodálaá lɛ́ pɛbán pɛ́ɛb pɛándagaáyɛ́ɛlɛ. Póság kolɛŋ lɛ́ Nɛlaamɛʼ nɛ́ Táán nɛándɛ ndúmiʼ.

³²A fɔ́lɔ́b ndabodɛ́anɛ lɛ́ ɔsɛg wóonɛ ó nɛ́gɔŋ ódɛndɛ́ɛ́ kuwu ungim ná nkə kɛ́ɛnɛ kiim kɛ́dɛ́njáásan.

³³Mbálámɔɛn ɛlɛ́ɛ́ kosan, nsí tɛn yɛ́ɛnɛ yɛ́ɛsan, náa tɔgɛ́ɛ́ tóam tólɛ a pəliə́g.

³⁴«Álɛ́ŋɛ́an anɛ́ɛ́n óoʼ! Podɛnjáág ɔʼtɛ́m a pɛbán pɛ́ pɛsɛɛn, na a nɛŋɔ́aŋan nɛ́ poloʼ máság koboŋwáŋɛ. Podɛnjáág ɔʼtɛ́m a pɛbán pɛ́ ɔlaa wóonɛ. Pondóʼkɔdɔn, wɔɔ́s ogo wóow ólɛ́ɛ́ kububúbi kububúbiə́n,

³⁵wɔnɔ́ ná ándɛ nibúnjə́ níəbúbi pusú. Kɛ́lɛ lɛ́, wɔɔ́s ogo wóow ólɛ́ɛ́ kudə́əŋənən pɔɔd piim pá pálɛɛ́ a nsí ngim.

³⁶Pudinním ɛnɔ, poɔ́sɔ́gɔlɔn Táán pɛnɛŋ piim, ná poáʼkɛ koʼpɛm pɛbán pɛ́ɛb pɛ́ pɛ́lɛ́ɛ́ kiimií, póyɛɛn na toɛn tó kɛɛn adɛ́lɛm a udi ó Mɔɔ́n o mɔɔd.»

³⁷Yə́sus ayɛ́ɛ lɛ́ aasánɛ wɔɔ́s kilúd agaaʼkananɛ pɔɔd a Tɛ́mpɛl. Niób niə́ʼkiim əgiig, áság kobag a oʼkon ó pa Olifiyə́ə agɛɛn agɛ́mmɛŋɛn.

³⁸Ungim ayɛ́ɛ yiimən a Tɛ́mpɛl na koany pɛ́ʼpɛ́b əgiim agoob nkə kɛ́ ayɛ́ɛ agaaʼkananɛ.