Read Yambeta LÓʼKAS 22 Bible Online

LÓʼKAS 22 - Yambeta bible

LÓʼKAS 22

¹Wɔɔ́n ó Páska, wɔɔ́n wó Yúdɛn ɛyɛ́ɛ ɛnɛ́alɛla pɛlɛ́ɛd pɛ́ páánám pádɛág toan tó kunudi umbúb óyɛ́ɛ wándɛ ndúmiʼ[86]

²Puʼkúm pó payaaganɛʼ pɛfɔny na palɛŋ pɛcɛm páyɛ́ɛ əguunə tuə́ áa pɛ́ɛlɛɛ́ agoon Yə́sus. Náa, páyɛ́ɛ agodammana nigúu.

³Sáʼtan yɛɛ́sɔ́d a ɔʼtɛ́m ó Siudáa nyɔ́ pɔ́ɔdɔ́ŋɔn lɛ́ Ɛsɛʼkalɛyóod, ongaaʼkan o Yə́sus nyummú nyɔ́ a paaʼkan pə́ə́ŋ pá pówád na pábaan

⁴aáság kɛɛn aboan puʼkúm pó payaaganɛʼ pɛfɔny na puʼkúm pó pasɔ́njaa pá páyɛ́ɛ əgunuŋilə Tɛ́mpɛl, agaáganan na pɔ́lɛ́ wɔnɔ́ ná aágɛɛlɛ agoboólɛgɛn Yə́sus.

⁵Pɛ́ɛ́nyɔ́ga kɛ́fɔlɛ́, pááság kusəə lɛ́ páamoyɛ́ʼkɛn mɔɔnɛ́.

⁶Siudáa əyə́líʼtíníí, əə́bə́ə́ kuunə tuə́ áa aágɛɛlɛ agoboólɛgɛn Yə́sus pɔɔd pándɛŋ.

⁷Wɔɔ́s ó wɔɔ́n wó Yúdɛn ɛyɛ́ɛ ɛnɛ́alɛla pɛlɛ́ɛd pɛ́ páánám pádɛág toan tó kunudi umbúb wááság kiim əgiig. Wɔɔ́s tɛn ogo wóow aa páyɛ́ɛ pasɛga pɔɔ́n pá todóm a kɛfɔny kɛ́ páanɛ a wɔɔ́n ó Páska.

⁸Yə́sus yiídə́ə́míni pa Píɛ pɔ́lɛ́ na Sɛ́aŋ, amáboodóm, ɔnɔ́ na pɔ́lɛ́: «Pəŋi todáan, póɛn abɛnámɛn wɔɔ́n, tɛ́nɛ.»

⁹Pə́yímuŋíən pɔ́nɔ́ na nyɔ́lɛ́ əə: «Sə́dúk, ə́lə́ə́ áa tíɛn anámɛ́ɛ́ wólɛ́ ə́[87]?»

¹⁰Əyíbuyúlísíni ɔnɔ́ na pɔ́lɛ́: «Todáan áay a pálɛ́ɛg. A niɛn əgiig nɛáŋan, puəgəə́bun na mɔɔd onnyáŋɛ́náán ungwə́ŋ ó məní a oʼto, púmuyə́ən. Yoog yɛ́ ɔɔ́sɔd a yɛ́lɛ́, pəŋi tɛn pósɔd kɔ.

¹¹Pódɛ́anɛ na mɔɔd o noádɛʼ poɔʼkɔ́ Sə́dúk ɔnɔ́ əə: “Ə́lə́ə́ áa nɛsom nɛ́ yoog nɛ́ ndáanɛ wɔɔ́n ó Páska wóonɛ na paaʼkan páam nɛ́lɛɛ́ ə́?”

¹²Əəbuúloodi kɛnɔ, kɛdám kɛ́ kɛsom kɛ́ yoog kɔ a noádɛʼ nuə́ŋ a mɔɛn. Kɛmɔɛ́d kɛándɛ kisóbíniə́n. Kɔ aa poábɛnámɛn wɔɔ́n.»

¹³Páyɛ́ɛ́n, pááboan pɛbán piim əgín wɔnɔ́ ná ayɛ́bodɛánɛ, páánám wɔɔ́n ó Páska.

¹⁴Ná kɛnɛŋ kɛ́ konɛ́ɛnɛ kíyííg, Yə́sus əə́ləndin agonɛ́ɛnɛ na pɔɔ́n pə́ə́ŋ pá maʼtom.

¹⁵Ɔnɔ́ na pɔ́lɛ́: «Ɔʼtɛ́m wáam óyɛ́ɛ əgín lɛ́ ná tɛánɛ́ wɔɔ́n ó Páska wóonɛ náanɛ ondáŋ na pəŋi agɛɛlɛ lɛ́ ntíin nnɛ ntɔ́b.

¹⁶Ndabodɛ́anɛ lɛ́, ntɛndɛ́ɛ́ konɛ wólɛ́ kə́mmú, súʼtə́ə́ əgín ná nkə kɛ́ wɔɔ́n wóow ólɛɛ́ əgusəə, kɛáʼkaáyɛ́ɛlɛ a Nɛlaamɛʼ nɛ́ Táán.»

¹⁷Aáság kudə́əmini kilən kɛ́ maloʼ, amɛ́ʼkɛn pisoyidiʼ na Táán, ɔnɔ́: «Ííí ə́ən, púsiəd kilən kɛ́ maloʼ kɛ́ɛnɛ pósásananɛ pəŋi piim, póŋo

¹⁸lɛ́, ndabodɛ́anɛ lɛ́ Əgəə́bə́ə nɛ́gɔŋ, ntiə́giiʼkini koŋo maloʼ kə́mmú agɛɛn əgiig əgín ná aláa Nɛlaamɛʼ nɛ́ Táán nɛándɛ kɔ.»

¹⁹Yiídə́ə́míni pɛlɛ́ɛd, amɛ́ʼkɛn pisoyidiʼ na Táán, aábɛ́ŋa, amáboyɛ́ʼkɛn, ɔnɔ́: «Taa, nkó yaam aa yɛ́ɛy mbáálɛ́gɛ́ɛ́ a kidíídí kɛáŋan. Púdíin poɛlanɛ náan agɛnjaáyɔ́ɔ́ŋanɛ.»

²⁰Ná pɛ́ɛ́mán konɛ́ɛnɛ, yiísiə́d tɛn kilən kɛ́ maloʼ, amɛ́ɛ́lɛ yoom ímuʼ na kɛ́lɛ́, ɔnɔ́: «Kɛ́ɛnɛ kɛ́lɛ kilən kɛ́ maŋɔ́ máam. Mɔ́lɛ́ aa málɛɛ́ kisuŋ kɛ́ kíoloodi nɛsɔ́g nɛ́ nɛwa nɛ́ Táán áálad na pɔɔd. Ndɛ́ɛ́ kusub mɔ́lɛ́ a kidíídí kɛáŋan[88]

²¹«Kɛbán kímuʼ, ogo nyɔ́ aágɛndɛg, tɛlɛ əgəə́nə́əyəni kɔ áanɛ kilən kímuʼ na nyɔ́lɛ́[89]!

²²Kɛ́lɛ fɔ́lɔ́b lɛ́ mɛ Mɔɔ́n o mɔɔd ndəəgu əgín wɔnɔ́ ná Táán yɛɛ́fɛ́g. Náa, maan kɛ́fɔlɛ́ na nyɔ́ kugu kóam kóamoógom!»

²³Paaʼkan pə́ə́bə́ə́ kəə́ŋíənə kɔ pɔ́lɛ́ na pɔ́lɛ́ pɔ́nɔ́ əə, ánɛ aa a ondáŋ wɔ́ɔ́bɔn aa alɛɛ́ ogɛɛlɛ náan əə́?

²⁴Paaʼkan páyɛ́ɛ asáŋa agolɛŋ ánɛ a ondáŋ wɔ́ɔ́bɔn aa pálɛɛ́ pə́gusiəd wɔnɔ́ nyɔ́ amáábɛ́gɛn pɔsɔ́g ombɔg a oʼto!

²⁵Náa Yə́sus ɔnɔ́ na pɔ́lɛ́: «Puʼkúm pó a mɔnɔŋ pólɛ əgíʼtən pɔɔd pá páalaamɛ, páanyóŋɛnɛla lɛ́ páboógany.

²⁶Náa, kíʼkóodi lɛ́ kíɛn náan yoom ímuʼ na pəŋi. Kíɛn a pəŋi lɛ́ nyɔ́ alɛɛ́ oʼkóʼkóón a ondáŋ wááŋan, ogóódi lɛ́ yə́siəd wɔnɔ́ ɛyaa ɛ́ moóngaa. Nyɔ́ alɛɛ́ ɔndaamɛʼ yɛ́ɛn inə́mbí ɛ́ pɔsɔ́g.

²⁷A pɔɔd póonɛ pá pálɛɛ́ pábaan lɛ́ na nyɔ́ alɛɛ́ undəndínə́ə́n a tɛ́bɛlɛʼ agonɛ́ɛnɛ, na sɔ́g nyɔ́ amámodɛ́gɛn tɛ́bɛlɛʼ əə, oyaán áa a pɔ́lɛ́ póob alɛɛ́ mɔɔd nyɔ́ oʼkóʼkóón agaáyɛn sɔ́g ə́? Adɛ́ nyɔ́ alɛɛ́ undəndínə́ə́n a tɛ́bɛlɛʼ a? Náa a mɛ, ndɛ a kɛgaágadɛ kɛáŋan wɔnɔ́ inə́mbí.»

²⁸«Pəŋi, poɛ́nóʼtan ondáŋ na mɛ, ntɔ́b yɛ njɔ́ɔ́ŋ.

²⁹Wɔnɔ́ na Mbáa yiísiə́d kɛsom kiə́ŋ kɛ́ Nɛlaamɛʼ agɛnyɛɛ́ʼkɛn na mɛ, mɛ tɛn mbáboyɛ́ʼkɛn pəŋi.

³⁰Polɛ́ɛ́ konɛ́ɛnɛ, póoŋo ondáŋ na mɛ a Nɛlaamɛʼ nɛ́am. Polɛ́ɛ́ kuləndən tɛn a mɔʼkɔɔ má puʼkúm agoyɔmɛ əʼkúu a Ɛ́sɛlayɛl yówád na ábaan.»

³¹Yə́sus aáság kusəə ɔnɔ́: «Simɔ́ɔŋ, Simɔ́ɔŋ wɛ! Taa, Sáʼtan əə́ŋíən toɛn na Táán lɛ́ nyɔ́lɛ́ áboófɛm wɔnɔ́ ná ándɛ páafɛm ngəŋ a maʼtɛ́ngɛ́lɛ́, agobalɛn pifuŋ ndɛ́ŋ na ngəŋ mmɔɛ́d.

³²Kɛbán kímuʼ mɛ, mbɔ́sɔ́gɔ́lɔ́nɛ́ɛ́ a kidíídí kɛáŋ lɛ́ ná udindiógi oʼto na mɛ. Ná wəə́gimbuúlini anɛ́ɛ́n ná ndɛɛ́, kónɛ pomóŋŋí pááŋ agɛɛlɛ lɛ́ pɔ́lɛ́ págon tɛn.»

³³Náa Píɛ ɔnɔ́ na nyɔ́lɛ́: «Sə́dúk, kɛ́yɛɛn kɛ́ kosɔd a yoog yɛ njaan, ɔmbɔ́ lɛ́ kɛ́ kugu, ndɛ ongaábɔ́ŋɛ́náán a pɛ́ɛb piim.»

³⁴Yə́sus əyímuyúlísíni ɔnɔ́ na nyɔ́lɛ́: «Ndagodɛ́anɛ na wɛ Píɛ lɛ́ əgín naánɛ́ yɛ́ɛnɛ, kɛbaŋ kɛ́ nsɛɛ kíədíin kɛdaŋ ná wəə́ʼkiʼtəm pɛnɛŋ pɛ́dáád lɛ́ odɛndɛŋɛn.»

³⁵Náa Yə́sus ɔnɔ́ na pɔ́lɛ́: «Kɛnɛŋ kɛ́ njɛ́boodóm, mbáyɛbodɛánɛ lɛ́ poándagɛɛn podɛnjábóŋɛ́náá lɛ́ na paʼpóósa pááŋan, na pɛbalɛ́, na pa palábá, poɛ́ʼtáŋ yoom na yoom kɔ́gɔ́ɔg ɔ?» Náa pɔ́nɔ́ na nyɔ́lɛ́: «Ndóo, tɛdɛʼkáaʼtaŋ yoom na yoom.»

³⁶Náa ɔnɔ́: «A nɛ́gɔŋ yɛ́ɛnɛ anɛ́ɛ́n, wɛ nyɔ́ olɛɛ́ na póósa, úsiəd. Nyɔ́ alɛɛ́ na kɛbalɛ́, ə́əsiəd. Wɛ nyɔ́ uʼkódií ɛyafág ɛ́ pɛdá, lɛg kilə́ə́ kɛáŋ kɛ́ niŋiʼ ówɛɛn yɛ́lɛ́

³⁷lɛ́ ndabodɛ́anɛ nyɔʼkɔ́, nkə kɛ́ɛnɛ kɛ́ kíyə́dílə́ə́ a Kálaʼtaʼ, kígóódi lɛ́ kɛáyɛ́ɛlɛ a nkó yaam. Kíyə́dílə́ə́ lɛ́: “Páyɛ́moyáág a ɔmban ó poónanan[90]” Nkə kɛ́ kɛ́agɛʼtɛ́ʼtɛg kígóódi lɛ́ kɛáyɛ́ɛlɛ.»

³⁸Náa paaʼkan pɔ́nɔ́ na nyɔ́lɛ́: «Táá mobag mó pɛdá aa móonɛ móbaan Sə́dúk.» Əyíbuyúlísíni ɔnɔ́ na pɔ́lɛ́: «Móom móbaan muə́dúú.»

³⁹Yə́sus yɛɛ́lón pálɛ́ɛg, aáság kobag a oʼkon ó malɛ́m má pa olifiyə́ə, əgín wɔnɔ́ ná ayɛ́ɛ yɛɛlanɛ. Paaʼkan pə́ə́ŋ pááság kumuyə́ən kɔ́gɔ́ɔg.

⁴⁰Ná páyɛ́ɛ́n əgiig kɔ a oʼkon a mɔɛn, ayɛ́bodɛánɛ ɔnɔ́ na pɔ́lɛ́: «Poɔ́sɔ́gɔlɔn Táán agɛɛlɛ lɛ́ pudiʼtə́əŋ a pɛásɔ́sɛ́n.»

⁴¹Nyɔ́lɛ́ aáság kəə́súid na pɔ́lɛ́ laálá sɔɔŋ əgiig náanɛ wɔnɔ́ ná mɔɔd alɛɛ́ ogodagɛdɛ nɛdáán níyiig. Yiídúm əndu a nsí, əə́bə́ə́ kɔɔ́sɔ́gɔlɔn Táán, ɔnɔ́:

⁴²«Əə́əy, Paabá, omaʼkɔnyɔ́ŋɛn, ɛɛlɛ lɛ́ ntɔ́b yɛ́ɛnɛ yɛ́nyaágɛɛŋɛ. Náa, adɛ́njaŋ a nɛnyɔ́ŋɛn nɛ́am, ndóo nɛáŋ áa nɛáyɛ́lɛɛ́.»

⁴³Uŋun ó maʼtom wúmmú a mɔɛn wááság komolónɛn anɛ́ɛ́n əgiim amoyɛ́ʼkɛn toɛn a nkó.

⁴⁴Wɛɛ́y óyɛ́ɛ wə́ʼkugumin Yə́sus na toɛn. Ayɛ́ɛ əgiiʼkini kɔɔ́sɔ́gɔlɔn Táán kə́mmú na toɛn. Kɛɔsɛn kɛ́ kɛ́yɛ́ɛ amoolon, kɛ́yɛ́ɛ wɔnɔ́ pinyə́ngə́ə́ pɛ́ maŋɔ́ aa píədə́bə a nsí.

⁴⁵Ná ayɛ́ɛ ɔɔ́ʼkɔɔ́sɔ́gɔlɔn náan, aáság kodɛ́ɛmɛn əguúlini ná paaʼkan pə́ə́ŋ pálɛɛ́. Ayɛ́bobóan pándɛ a ɛnɔ tɔ́g na ɔʼtɛ́m kogany wó páyɛ́ɛ na wólɛ́.

⁴⁶Aáság kubuyóndigi. Náa ɔnɔ́ na pɔ́lɛ́: «Tuə́ ə́ən áa polɛɛ́ əgunim ɛnɔ? Tɛ́mɛ́naan, poɔ́sɔ́gɔlɔn Táán agɛɛlɛ lɛ́ pudiʼtə́əŋ a pɛásɔ́sɛ́n!»

⁴⁷Yə́sus alɛ kɔ na tɔgɛ́ɛ́ a unuʼ ə, kiʼtúú kɛ́ pɔɔd foáy. Siudáa, ongaaʼkan wəəŋ nyummú nyɔ́ a ondáŋ ó pá pówád na pábaan áa əyíím ə́busúidə. Ná əyíím əgiig, ayɛ́ɛ́n a ɛbá ɛ́ Yə́sus əgumuyə́súʼkənən.

⁴⁸Yə́sus ayɛ́modɛánɛ ɔnɔ́ na nyɔ́lɛ́: «Siudáa, a ninjəə́súʼkənən nɛ́ɛn náan aa olɛɛ́ agɛndɛg mɛ Mɔɔ́n o mɔɔd ɔ?»

⁴⁹Ná pɔsɔ́g pá páyɛ́ɛ ondáŋ na Yə́sus pɛ́ɛ́dála nkə kɛ́ɛg kɛ́ kɛ́yɛ́ɛ kɛándagaásan, pááság kumuŋíən pɔ́nɔ́ na nyɔ́lɛ́ əə: «Sə́dúk, tɛ́lónanɛ moyafág muə́s mó pɛdá agonɔɛyɛ a?»

⁵⁰Sɔ́g nyummú a ondáŋ wɔ́ɔ́bɔn aáság kusooyin ɛbag yə́ə́ŋ ɛ́ pɛdá a kɛbágáá soád, ɔnɔ́ na uʼkudin wo ɔnjaaganɛʼ pɛfɔny nyɔ́ oʼkóʼkóón ə́siəd a oʼtóɛŋ wó ombɔg ó nɛnom, foáb. Oʼtóɛŋ kwə́s.

⁵¹Náa, Yə́sus yiísə́ə́ ɔnɔ́: «Ndóo, íbudíən pɛ́ɛlɛ tɛn ɔmbɔ́ kɛ́ɛnɛ.» Aáság kodɔ́bɛd oʼtóɛŋ ó mɔɔd nyóon, wándɛ kə́mmú ɔŋŋɛʼ.

⁵²Náa ɔnɔ́ na puʼkúm pó payaaganɛʼ pɛfɔny na puʼkúm pó pasɔ́njaa pá a Tɛ́mpɛl, na ponnom pó a nigúu pá pə́yíím əmuúgumin: «Puígóodi lɛ́ púim poáboŋɛn lɛ́ na mobag mó pɛdá, na mufun əgiim əgiʼkumin wɔnɔ́ ndɛ agá ungiíbən ə?

⁵³Adɛ́ mɔɔ́s miim njɛ́ɛ na pəŋi a Tɛ́mpɛl a? A igə aa pudiʼkə́əgunəə́ kiʼkumin áay? Náa, nɛ́gɔŋ yɛ́ɛnɛ, kɛnɛŋ kɛáŋan aa kiə́ʼkiigií, kɛnɛŋ kɛ́ toɛn tó a mbin.»

⁵⁴Pasɔ́njaa píígúmin Yə́sus, pámɛ́ɛn na nyɔ́lɛ́ a nó Ɔnjaaganɛʼ pɛfɔny nyɔ́ oʼkóʼkóón. Píɛ ayɛ́ɛ əgiim ə́buyə́njən laálá a ngim.

⁵⁵Pɔɔd pɛ́ɛ́góny kɛa kɛ́ yug a oʼtómódáán, pááság kəə́yii kɔ. Píɛ ayɛ́ɛ́n əgəə́bulid kɔ na pɔ́lɛ́.

⁵⁶Moóngaa ɔʼkɛ́ɛd nyummú, uʼkudin, aáság komoodála undəndínə́ə́n kɔ a ɛbá ɛ́ yug, aálɛŋ kumuúsəsəŋəni, náa ɔnɔ́: «Mɔɔd nyóonɛ ayɛ́ɛ tɛn a ondáŋ wə́ə́ŋ.»

⁵⁷Píɛ ayácɛ́mɛ́ɛ́, ɔnɔ́: «Ndóo, ntɛmoólɛŋɛn ó!»

⁵⁸Ɛyaa ɛ́ kɛnɛŋ a ngim yɛ́ɛy, mɔɔd tɛn nyummú ayɛ́modɛ́ʼtɛg, náa ɔnɔ́: «Wɛ tɛn, olɛ a ondáŋ wɔ́ɔ́bɔn.» Náa, Píɛ əyímuyúlísíni ɔnɔ́: «Ndóo óo, ntɛɔ́gɔ a ondáŋ wóow.»

⁵⁹Yoom wɔnɔ́ áwaʼ mmuʼ a ngim yɛ́ɛy, mɔɔd tɛn nyummú aáság kubis ɔnɔ́: «A fɔ́lɔ́b, mɔɔd nyóonɛ ayɛ́ɛ a ondáŋ wə́ə́ŋ. Ɔmmɔɛ́d alɛ mɔɔd o Kalilə́ə.»

⁶⁰Náa Píɛ ɔnɔ́: «Mɛ, ntɛálɛŋ nkə kɛ́ɛg kɛ́ olɛɛ́ anyɔ́ŋɛn kusəə.» Alɛ kɔ na tɔgɛ́ɛ́ náan a unuʼ ə, kɛbaŋ kɛ́ nsɛɛ kɔʼkɔ́lɛ́ɔʼkɔɔ.

⁶¹Sə́dúk aáság komoyágasɛnɛ, əmə́mubísin əngis. Píɛ aáság kaáyɔ́ɔ́ŋɛ tɔgɛ́ɛ́ tó Sə́dúk ayɛ́modɛánɛ, ɔnɔ́: «Naánɛ́ yɛ́ɛnɛ, kɛbaŋ kɛ́ nsɛɛ kíədíin kɛdaŋ, ná wɛ wəə́ʼkusəə pɛnɛŋ pɛ́laŋ pɛ́dáád lɛ́ odɛndɛŋɛn.»

⁶²Aáság kolon. Yɛɛ́lɛ́ɛ́ kɔŋɛʼ kɔŋɛʼ.

⁶³Pɔɔd pá páyɛ́ɛ ənuŋ Yə́sus páyɛ́ɛ agomoónyɛɛŋanɛ, páamobáam.

⁶⁴Pə́yímuugúb udi na kilə́ə́. Ayɛ́ɛ pámaʼkomoogo, pɔ́nɔ́ na nyóon, «Aanɛn ánɛ aa amágoogó!»

⁶⁵Páyɛ́ɛ əgumuúsugənən pɛdog tɛn pímmú kɛ́fɔlɛ́ a nkó.

⁶⁶Ná koany kóyááyɛ́nɛ, ponnom pó nigúu nɛ́ Yúdɛn, na puʼkúm pó payaaganɛʼ pɛfɔny, na palɛŋ pɛcɛm páyágɔ́nyɛ́dɛ́ɛ́, pááság kusəə lɛ́ pə́buyíimin na Yə́sus a ɛgɔny yɔ́ɔ́bɔn yɛ́ ɛgóón.

⁶⁷Kɔ́gɔ́ɔg, pə́ə́bə́ə́ kumuŋíənə pɛbán, pɔ́nɔ́: «Ɛ́bɛdɛánɛ áŋ, olɛ Məsíi ə?» Əyíbuyúlísíni ɔnɔ́: «Ɔmbɔ́ mpodɛ́anɛ lɛ́ ndɛ Məsíi, pudiə́gəə́liʼtini.

⁶⁸Mbəʼkubuŋíən tɛn kɛ́sɔn, pudiə́ginyəə́yúlisini.

⁶⁹Náa, Əgəə́bə́ə nɛ́gɔŋ, mɛ Mɔɔ́n o mɔɔd ndɛ́ɛ́ kuləndin a ombɔg ó nɛnom ó Táán o toɛn tuim[91]»

⁷⁰Pɔ́lɛ́ piim pááság kaag nɛŋo, pɔ́nɔ́: «Ɛɛ́ɛ, olɛ anyóon Mɔɔ́n o Táán yi!» Náa ɔnɔ́ na pɔ́lɛ́: «Ɛɛ́ɛ, kɛ́lɛ náan. Kɛ́ aa kɛ́ɛg pəŋibáamɔɛ́d puə́səə.»

⁷¹Náa pə́əgəə́bə́ə́ kosɔyɔ kɔ na pɔ́lɛ́báamɔɛ́d, pɔ́nɔ́: «Pɔɔd pá mbaasɔ́ pá igə pə́mmú aa tiə́guunə? Pəsibáamɔɛ́d tɛáʼkoob wɔnɔ́ ná əə́ʼkibiyúlisinií!»