Read Yambeta LÓʼKAS 23 Bible Online

LÓʼKAS 23 - Yambeta bible

LÓʼKAS 23

¹Pɔ́lɛ́ piim pááság kəə́wu agɛɛn na Yə́sus a nó Pɛláad.

²Kɔ́gɔ́ɔg, pə́ə́bə́ə́ komosɔ́mɛna, pɔ́nɔ́ na Pɛláad: «Tɛáboan mɔɔd nyóonɛ, alɛ abaya nigúu, ɔnɔ́ pə́diyíʼkíni koʼpɛ́ɛ́ mag na Sɛsáal. Alɛ əgəə́səə tɛn lɛ́ nyɔ́lɛ́ alɛ Məsíi, alɛ nkúm.»

³Náa Pɛláad əə́bə́ə́ komolóóya ɔnɔ́: «Olɛ nkúm ɛ Yúdɛn a, ngɔ́ɔ́?» Yə́sus əyímuyúlísíni ɔnɔ́: «Náan ó! Kɛ́lɛ wɔnɔ́ ná olɛɛ́ əgusəə.»

⁴Náa Pɛláad ɔnɔ́ na puʼkúm pó payaaganɛʼ pɛfɔny na kiʼtúú kɛ́ pɔɔd: «Mɛ ntɛɔ́ŋɛn ɛgom a nkó mɔɔd nyóonɛ yɛ́ ndɛɛ́ ogomoyɛ́ʼkɛn nsɔ́ɔ́ a yɛ́lɛ́.»

⁵Pɔ́lɛ́ pə́ə́bə́ə́ agá kiiʼkini kosɔyɔ na toɛn, pɔ́nɔ́: «Nkə kɛ́ alɛɛ́ agaaʼkananɛ kɛ́lɛ lɛ́ ná ábáy pɔɔd, pə́də́əmini oʼto. Əyə́ʼtúmíí əgín kɔ́gɔ́ɔg a Kalilə́ə, aáyaag a Siudə́ə, wɔnɔ́ ná əə́ʼkiim alónɛ́ɛ́ áanɛ.»

⁶Ná Pɛláad ayóób náan, yiíŋíən ɔnɔ́ əə: «Yə́sus nyóon alɛ mɔɔ́n ó Kalilə́ə əə́?»

⁷Ná yɛɛ́lɛ́ŋ náan lɛ́ alɛ əgiim a əʼkúu yá Ɛlóod ayɛ́ɛ alaamɛ yiísə́ə́ lɛ́ pɛ́ɛn na nyɔ́lɛ́ a udi wə́ə́ŋ, lɛ́ a kɛnɛŋ kɛ́go kɛ́ɛg, Ɛlóod ayɛ́ɛ kɔ áay tɛn a Yolósalɛm.

⁸Ɛlóod ayɛ́ɛ agoóbɛla pɔ́ɔsɔyɔ niiŋ niə́ŋ. Ná ayɛ́moodála, yɛɛ́nyɔ́ga kɛ́fɔlɛ́ lɛ́ ayɛ́ɛ əguunə komoodála əgín kɔ́gɔ́ɔg kalaʼ. Ayɛ́ɛ agomɛna pɛda lɛ́ aamoodála aágɛɛlɛ kiə́wúunəniʼ kɛ́ kɛálɛ́ʼkán.

⁹Yiíŋiə́nə ɛ́fɔlɛ́ ɛ́ pɛbán na Yə́sus. Náa, ɔmbɔ́ əgín pɛbɛɛ, Yə́sus idiʼkə́yəmuyúlisini.

¹⁰Na puʼkúm pó payaaganɛʼ pɛfɔny na palɛŋ pɛcɛm páyɛ́ɛ kɔ áay, páamosóman pɛbán a nkó na toɛn.

¹¹Na Ɛlóod, na pasɔ́njaa pə́ə́ŋ pə́ə́bə́ə́ anɛ́ɛ́n komoónyɛɛŋanɛ, páamoóŋɔnɔ. Pə́yímuníígi ntaa, kisig kɛmɔɛ́d. Náa Ɛlóod ɔnɔ́ púúlini na nyɔ́lɛ́ a nó Pɛláad.

¹²Pa Ɛlóod pɔ́lɛ́ ná Pɛláad páyáládɛ́ɛ́ a nɛsɔ́g wɔɔ́s wóow, pɔ́lɛ́ pá páyɛ́ɛ agobɛnanan kalaʼ.

¹³Pɛláad yɛɛ́dɔ́ŋɔn ɛgɔny lɛ́ na puʼkúm pó payaaganɛʼ pɛfɔny na palaamɛʼ pá nigúu, na pɔɔd pɛ́ndɛ́ŋ piíŋ,

¹⁴ɔnɔ́ na pɔ́lɛ́: «Pumínjiimin na mɔɔd nyóonɛ poɔʼkɔ́ alɛ əgudíʼkəni pɔɔd lɛ́ pə́də́əmini oʼto. Mɛ, mbáʼkomolóoya a udi wááŋan, a pɛsɔ́mɛn piim pɛ́ pomámosɔ́mɛ́na, ntɛmoyɔ́ɔ́ŋɛn ɛgom kɔ ɔmbɔ́ ímuʼ yɛ́ ndɛɛ́ ogomoyɛ́ʼkɛn nsɔ́ɔ́ a yɛ́lɛ́.

¹⁵Ɔmbɔ́ Ɛlóod tɛn ɔdɛɔ́ŋɛn ɛgom a nkó yəəŋ. Náan aa əmíim ə́muyúúlisi ngim. Mɔɔd nyóonɛ adiɛlɛnɛ anɛ́ɛ́n nkə kɛ́ kíəguunə lɛ́ pámoyóon.

¹⁶Ndagɛɛ́ʼkɛn agá toɛn lɛ́ pámobáam na nsuə́, pə́muúlis.» [

¹⁷[92]]

¹⁸Náa, pə́əgəə́bə́ə́ kosása pɔ́lɛ́ piim nɛŋo a mɔɛn, pɔ́nɔ́: «Tɛánɛ́ pámoyóon o! Íbilísin Palábas!»

¹⁹Palábas ogo nyóon ayɛ́ɛ a yoog yɛ njaan lɛ́ wɔɔ́s wúmmú a pálɛ́ɛg, na nyɔ́lɛ́ na pɔsɔ́g pə́mmú pídə́ə́míni oʼto na nɛlaamɛʼ, pámáyoon mɔɔd.

²⁰Wɔnɔ́ ná Pɛláad ayɛ́ɛ anyɔ́ŋɛn kulis əgín Yə́sus, əyíʼkíni kiim álon əgiim ɔsɔyɔ na pɔɔd.

²¹Náa, páyɛ́ɛ agá asása na toɛn, pɔ́nɔ́: «Ɛ́ʼkɛn toɛn óoʼ, pɛ́ɛn amoóbaŋan a ɔmbásá! Ɛ́ʼkɛn toɛn pámoóbaŋan a ɔmbásá!»

²²Pɛláad əyíʼkíni kusiəd tɔgɛ́ɛ́ a annam ádáád, ɔnɔ́ na pɔ́lɛ́: «Nkə anɛ́ɛ́n áa amɛ́ɛ́lɛ ə́? Mɛ, ntɛɔ́ŋɛn ɛgom a nkó yəəŋ yɛ́ yə́əguunə lɛ́ pámoyóon o! Ndəəsəə agá lɛ́ pámobáam na nsuə́ ná mmuúlis.»

²³Náa, pɔ́lɛ́ páyɛ́ɛ agá asása kə́mmú na toɛn, pɔ́nɔ́: «Ɛ́ʼkɛn toɛn pámoóbaŋan a ɔmbásá!» Pɛsásaʼ pɛɔ́bɔn pɛ́yɛ́moónyɔ́ŋ.

²⁴Pɛláad aáság kusəə ɔnɔ́: «Oo yi, ndagɛɛlɛ wɔnɔ́ ná poányɔ́ŋɛn.»

²⁵Aáság kubuúlisin nyɔ́ pííŋíən lɛ́ ə́lis, nyɔ́lɛ́ nyɔ́ páyáág a yoog yɛ́ njaan lɛ́, nyɔ́lɛ́ na pɔsɔ́g tɛn pə́mmú, pídə́ə́míni oʼto na nɛlaamɛʼ, pámáyoon mɔɔd. Pɛláad yiísiə́d Yə́sus, amáboyɛ́ʼkɛn lɛ́ pɛ́ɛn agɛɛlɛ na nyɔ́lɛ́ wɔnɔ́ ná páanyɔ́ŋɛn.

²⁶Wɔnɔ́ ná páyɛ́ɛ agɛɛn na Yə́sus, pə́yə́búníí na mɔɔd nyummú niiŋ lɛ́ Simɔ́ɔŋ, mɔɔd nyɔ́ a pálɛ́ɛg ɛ Silɛ́ɛn, əə́gəə́yímbuúlini a pɔlɛ́m. Pasɔ́njaa pááság kumuúgumin, pámámonyáŋɛ́nɛ́nɛ ɔmbásá ó Yə́sus, pɔ́nɔ́ ə́muyə́ən na wólɛ́.

²⁷Yə́sus ayɛ́ɛ agɛɛn, pɔɔd pə́əgiim pə́muyə́ən a ngim piíŋ, na pagɛ́ɛd kɔ piíŋ, ɔmbɔg a oʼto, páamoólɛɛ.

²⁸Yə́sus aáság kaágasɛ ná pagɛ́ɛd póob pálɛɛ́, náa ɔnɔ́ na pɔ́lɛ́: «Ɛ́ya, pudóón pó Yolósalɛm, podɛyɛ́ndɛɛ mɛ, poálɛɛ a pəŋibáamɔɛ́d, na a pɔɔ́n pááŋan

²⁹lɛ́, kɛnɛŋ kiə́ndəgiim kɛ́ pɔɔd pálɛ́ɛ́ kusəlií lɛ́: “Kɔŋɛʼ na pagɛ́ɛd pá pɛ́ɛ́lɔ́b pisúsún, pagɛ́ɛd pá pə́diʼkə́bíənií, na pá pádɛʼkáaŋɛ́ʼkɛɛ́ mɔɔ́n.”

³⁰Áay, pɔɔd pálɛ́ɛ́ kodɛ́anɛ na nkon lɛ́ íbudə́əŋənən, na moŋɛnɛ́ŋɛn lɛ́ múbuyə́súʼkənən[93]!

³¹Kɛ́maʼkɛɛn lɛ́ kiɛd kɛ́ kɛ́lɛɛ́ kióm, páagɛɛlɛ náan na kɛ́lɛ́, pɛnɛŋ pɛ́sɛ́g anɛ́ɛ́n na oʼkón wó wə́ʼkugúú ə́?»

³²Páyɛ́ɛ́n kɔ na pɔɔd tɛn pɛ́ndɛ́ŋ pábaan, pacocóo, agɛɛn aboyóon ondáŋ na Yə́sus.

³³Páyɛ́ɛ́n əgiig a kɛnɔ kɛ́ pɔ́ɔdɔ́ŋɔn lɛ́ «Kɛlɛ́ʼtɛ́g kɛ́ oʼto». Kɔ́gɔ́ɔg aa pɛ́ɛ́báŋan Yə́sus a ɔmbásá. Pɛ́ɛ́báŋan tɛn pɔɔd pə́mmú pábaan kɔ[94] Páyɛ́boyáágan lɛ́ ɛ́nɛ́ sɔ́g a ɔmbásá wə́ə́ŋ lɛ́ nyóonɛ a ombɔg ó Yə́sus ó nɛnom, nyummú a oó kɛmɛs. Pɔ́lɛ́ páyɛ́ɛ pɛbɛ́ pɛ́ pɔɔd pɛ́ pɛgóón, páagoóna pɔɔd.

³⁴Yə́sus ɔyɔ́sɔ́gɔ́lɔ́nɛ́ɛ́ Táán, ɔnɔ́: «Paabá, íbulísin lɛ́ pándɛŋɛn nkə kɛ́ pálɛɛ́ agɛɛlɛ.» Agɛɛlɛ lɛ́ páabanan pilə́ə́ pɛ́ Yə́sus, pasɔ́njaa pɛ́ɛ́lá ntɔŋ[95]

³⁵Pɔɔd páyɛ́ɛ kɔ áay padɛ́lɛ́máán, páadɛ́ʼtɛg. Palaamɛʼ pá Yúdɛn páyɛ́ɛ agomoónyɛɛŋanɛ[96], pɔ́nɔ́: «Taa, ayɛ́ɛ ɔgɔɔyɔnɛ pɔsɔ́g, yɔ́yɔ́ɔyɛ anɛ́ɛ́n nɛ́gɔŋ nyɔ́lɛ́nyɔ́amɔɛ́d yi, nga alɛ Məsíi yɛ́ Táán əyííyid!»

³⁶Pasɔ́njaa tɛn páyɛ́ɛ agomoónyɛɛŋanɛ. Páyáyɛ́ʼtɛ́nɛ́ɛ́ a ɛbá yə́ə́ŋ, pámámoyɛ́ʼkɛn pɛŋwáŋwáŋá pɛ́ maloʼ lɛ́ áŋo[97], pɔ́nɔ́ na nyɔ́lɛ́:

³⁷«Nga fɔ́lɔ́b olɛ Nkúm ɛ Yúdɛn, ɔ́yɔ́yɛ́ɛ́ wɛɛ́nyɔ́amɔɛ́d áay yi!»

³⁸Kɔ a ɔmbásá, a oʼto ó Yə́sus a mɔɛn píídílid pɔ́nɔ́: «Táá, nyɔ́ aa nyóonɛ, nkúm ɛ Yúdɛn.»

³⁹A pacocóo pá pɛ́ɛ́báŋan tɛn a ɔmbásá, nyummú ayɛ́moyágásɛ́nɛ́ɛ́ tɛn agomoodóga, ɔnɔ́: «Adɛ́ wɔʼkɔ́ olɛ Məsíi ə? Ɔ́yɔ́yɛ́ɛ́ wɛɛ́nyɔ́amɔɛ́d yi, óbɛyɔ́ɔyɛ tɛn pəsi!»

⁴⁰Náa, sɔ́g nyummú aásásɛdɛn nyóon, ɔnɔ́ na nyɔ́lɛ́: «Wɛ, odɛádammana Táán á? Wɛ nyɔ́ olɛɛ́ a nuwoo nógo númuʼ ə!

⁴¹A kiə́s kɛ́lɛ sáád lɛ́ pigólí piə́s pɛ́ tɛyásóŋɛ́ɛ́, táá pɛsáábɔ́n piə́ŋ aa pɛ́ɛnɛ tigódíí. Kɔmɔɛ́d lɛ́ a nyɔ́lɛ́, adiɛlɛnɛ kɔbɛ́.»

⁴²Əguyibənən aáság kusəə ɔnɔ́: «Yə́sus, wɛnjaáyɔ́ɔ́ŋɛ ó, ná wəə́gimbuúlini na nɛlaamɛʼ nɛáŋ a ombɔg.»

⁴³Yə́sus əyímuyúlísíni ɔnɔ́ na nyɔ́lɛ́: «A fɔ́lɔ́b, ndagodɛ́anɛ lɛ́, naánɛ́ yɛ́ɛnɛ, olɛ na mɛ a Pələdíis[98]»

⁴⁴Ayɛ́ɛ aándɛ yoom wɔnɔ́ tóɛf. Kɛnɔ kɛáság kiíligən. Mbin yiídə́əŋ a nsí ngim pilíb, súʼtə́ə́ a mangɛn mádáád. Sanjaʼ yɛ́ pɛ́ɛ́sandɛgɛnɛ a Tɛ́mpɛl[99] yaáság kosaalɛg a kɛgaágadɛ paáám.

⁴⁵

⁴⁶Yə́sus aáság kudóʼtin kiʼkíŋ na toɛn, ɔnɔ́: «Paabá, táá uŋun wáam aa wóow mbúúlísi a ɔmbɔg yááŋ[100]» Əgín na yiísə́ə́ náan, aáság kiisimid, aádó oʼto.

⁴⁷Ná nkúm ɛ pasɔ́njaa yɛɛ́dála nkə kɛ́ kɛ́yásánɛ́ɛ́, ɛyɛ́ʼkɛn nugəm na Táán, yɔ́nɔ́: «A fɔ́lɔ́b, mɔɔd nyóonɛ ayɛ́ɛ sáád ɛ mɔɔd.»

⁴⁸Pɔɔd piim pá pə́yíím əgəə́yiilə kɔ áay agodɛ́ʼtɛg nkə kɛ́ kɛ́yɛ́ɛ agaásan, pə́yúúlə́ni suúúm, páagaábááma a igog.

⁴⁹Pɔsɔ́sɔ́g pá Yə́sus piim, na pagɛ́ɛd pá páyɛ́ɛ əgiim pə́muyə́njən əgiim pádɛ́ɛmɛn əgín kɔ́gɔ́ɔg a Kalilə́ə, pɛ́ɛ́dɛ́lɛ́man laálá[101], pə́ədíin pánadɛna pɛnág agodɛ́ʼtɛg kiim kɛ́ kɛ́yɛ́ɛ agaásan.

⁵⁰Mɔɔd nyummú niiŋ lɛ́ Yósɛb, kibíəniʼ kɛ́ a pálɛ́ɛg yɛ Əliməʼtə́ə, a nigúu nɛ́ Siudə́ə, aáság kiim alon. Ayɛ́ɛ sáád ɛ mɔɔd na ɔʼtɛ́m ólaŋ. Nyɔ́lɛ́ ayɛ́ɛ aándaamɛna pɛda lɛ́ Táán alɛ́ɛ́ kolaamɛ. Ayɛ́ɛ tɛn mɔɔd nyɔ́ a ɛgɔny yɔ́ɔ́bɔn yɛ́ ɛgóón ɛ́ pɛyɔm. Náa adɛʼkɛ́ɛ unuʼ úmmuʼ na pɔsɔ́g a nkə kɛ́ páyɛ́ɛ agɛɛlɛ, wɔnɔ́ ná píígúmin Yə́sus.

⁵¹

⁵²Ayɛ́ɛ́n əŋíən na Pɛláad lɛ́ ámoyɛ́ʼkɛn kɛlóŋ kɛ́ Yə́sus nyɔ́lɛ́ yɛ́ɛn əni.

⁵³Aáság kɛɛn, əə́suuli kɛlóŋ a ɔmbásá, aágóda na ombɔ́m, amɛ́ɛn əni a kəəniʼ ká káyɛ́ɛ kɔ áay kədímə́ə́n wɔnɔ́ kɛbaŋ a kɛgon. Páyɛ́ɛ pádɛ́njag kuni mɔɔd kɔ.

⁵⁴Kisúgiʼ kɛ́ Yúdɛn kɛ́yɛ́ɛ kɛándɛ ndúmiʼ. Wɔɔ́s wóow óyɛ́ɛ wɔɔ́s wó Yúdɛn ɛyɛ́ɛ yaáboŋɛn kisúgiʼ.

⁵⁵Pagɛ́ɛd pá pə́yíím pə́yə́ən Yə́sus əgiim pádɛ́ɛmɛn əgín kɔ́gɔ́ɔg a Kalilə́ə, pííyə́ən Yósɛb, páádála kəəniʼ, páádála tɛn tuə́ áa pə́yíngígi kɛlóŋ kɛ́ Yə́sus.

⁵⁶A ngim yɛ́ɛy aa píísiə́d ngə́ əguúlini a pálɛ́ɛg. Páyɛ́ɛ́n osóboni pugúd na palamɛ́ndaʼ əgiim əwu kɛlóŋ. A wɔɔ́s ó kisúgiʼ, póyóóyig əgín wɔnɔ́ ná kɛcɛm kɛ́yɛ́ɛ əgusəə[102]