Read Yambeta LÓʼKAS 24 Bible Online

LÓʼKAS 24 - Yambeta bible

LÓʼKAS 24

¹Na pɛbáŋɛn pɛ́ koany kó a wɔɔ́s ó na oʼto na oʼto ó sɔ́ndɛʼ, pagɛ́ɛd páyɛ́ɛ́n a kəəniʼ na pugúd pó píísóbóni.

²Pɛ́ɛ́bóan lɛ́ nɛdáán nɛ́ píígúb unuʼ ó kəəniʼ na nɛ́lɛ́, nɛándɛ nimíngílídiə́n a ɛbá.

³Pááság kosɔd kɔ a kəəniʼ. Pádɛʼkáaboan kɛlóŋ kɛ́ Sə́dúk Yə́sus kɔ.

⁴Nto yɔɔbɔn yaáság koyog. Pálɛ anɛ́ɛ́n kɔ náan a, pɔɔd pábaan pááság kobolónɛn, pilə́ə́ pɛɔ́bɔn pɛ́yɛ́ɛ əguwəŋə kuwəŋə́ə́n.

⁵Wɛɛ́y úyíbugúmin, pááság kudum nti yɔɔbɔn a nsí. Náa pɔɔd póob pɔ́nɔ́ na pɔ́lɛ́: «Tuə́ áa puə́giim əguunə káanɛ a ondáŋ ó pɛlóŋ mɔɔd nyɔ́ alɛɛ́ ongóm?

⁶Táá, əndigi áanɛ, amóndɛg. Áyɔ́ŋɛ́an nkə kɛ́ ayɛ́bodɛánɛ ná ayɛ́ɛ a Kalilə́ə.

⁷Yiísə́ə́ lɛ́: “Kɛ́anyɔ́ŋɛn lɛ́ pálɛg Mɔɔ́n o mɔɔd a ɔmbɔg á pɛɛlɛ mabɛ́, pámoóbaŋan a ɔmbásá, ə́gu, ná yíim yóndɛg a mɔɔ́s mádáád.” »

⁸Áay aa páyáyóŋɛ́ɛ́ anɛ́ɛ́n nkə kɛ́ Yə́sus ayɛ́bodɛánɛ.

⁹Pə́yíím pálon a kəəniʼ, pááság kuúli agɛɛn adɛ́anɛ na pɔɔ́n pá maʼtom pá pówád na úmmuʼ, na paaʼkan tɛn piim, nkə kɛ́ɛg kɛ́ pɛ́ɛ́dála.

¹⁰Páyɛ́ɛ lɛ́ na Malɛ́a ntóón ɛ Magdala, na Yowánaʼ, na Malɛ́a wo ŋŋí ɛ Sɛ́ag. Pagɛ́ɛd pə́mmú tɛn pá páyɛ́ɛ kɔ na pɔ́lɛ́, pɛ́dɛánɛ na pɔɔ́n pá maʼtom əgín yoom ɛgo ímuʼ.

¹¹Náa, pɔɔ́n pá maʼtom pə́diʼkə́əgəə́liʼtini nkə kɛ́ pagɛ́ɛd póob páyɛ́ɛ əgusəə. Pɔ́lɛ́ páyɛ́ɛ afɛga lɛ́ pálɛ agosɔyɔ tɔgɛ́ɛ́ tó pɔɔd pá nto yɔɔbɔn yaáʼkolɛáŋɛ́ɛ́.

¹²Ɔmbɔ́ náan, Píɛ aáság kodɛ́ɛmɛn, amɛ́ɛn a kəəniʼ na ɔʼtɛ́d. Ná ayɛ́ɛ́n əgiig kɔ, yɛɛ́bódɛm agá agofɛ́bɛna. Əgín mbɔ́m na mbɔ́m áa yɛɛ́dála kɔ. Əyúúli a noádɛʼ ɔmbɔg a oʼto, əə́gəə́wúunəni na nkə kɛ́ kɛ́yásánɛ́ɛ́.

¹³Náan aa wɔɔ́s ogo wóow, paaʼkan pábaan páyɛ́ɛ agɛɛn a ɛyaa ɛ́ nigúu yímmú pɔ́ɔdɔ́ŋɔn lɛ́ Ɛmayúus. Nigúu nɛ́go nɛ́ɛn nɛ́yɛ́ɛ laálá na Yolósalɛm, náanɛ wɔnɔ́ áwaʼ ɛ́baan yɛ ongɛn.

¹⁴Əgín pɛbán pɛ́ pɛ́yásánɛ́ɛ́ a mədúg móom aa páyɛ́ɛ əgiim pɔ́sɔyɔ na ngə́ na ngə́.

¹⁵Pálɛ anɛ́ɛ́n kɔ əgiim pɔ́ɔ́cɔcɔb náan a, Yə́sus nyɔ́lɛ́nyɔ́amɔɛ́d aáság kiim əbugóʼki lɛ́ pádáŋananɛ ondáŋ.

¹⁶Páyɛ́ɛ agomodɛ́ʼtɛg, náa yoom ɛgo yáaboyɛ́ɛlɛ lɛ́ pádɛndɛ́ŋ lɛ́ nyɔ́lɛ́ aa alɛɛ́nɔ.

¹⁷Aáság kubuŋíən ɔnɔ́ na pɔ́lɛ́ əə: «Kɛbán igə aa polɛɛ́ əgiim pósɔyɔ náan na ngə́ na ngə́ ə́?» Pááság kodɛ́lɛm, nti suúúm.

¹⁸Náa sɔ́g nyummú, niiŋ lɛ́ Kɛlɛyoʼpáas, əə́muyúúlisini ɔnɔ́: «A pɔɔd piim pá a Yolósalɛm, əgín wɛɛ́nyɔ́əsíŋ áa odɛálɛŋɛɛ́ nkə kɛ́ kɛ́yásánɛ́ɛ́ a mədúg móonɛ yi?»

¹⁹Náa ɔnɔ́ na pɔ́lɛ́: «Nkə aa kɛ́yásánɛ́ɛ́ ə́?» Pááság kumuyúlisini pɔ́nɔ́: «Nkə kɛ́ kɛ́yáyɛ́lɛ́ɛ́ na Yə́sus mɔɔ́n ó Násalɛd a! Ayɛ́ɛ ɔndɔɛgɛʼ pɛbán o Táán o toɛn. Yiílóódi nkə kɛ́ alɛɛ́ a əngis á Táán na a əngis á pɔɔd, a tɔgɛ́ɛ́ tó ayɛ́ɛ agosɔyɔ, na a pɛbán pɛ́ ayɛ́ɛ agɛɛlɛ.

²⁰Puʼkúm pó payaaganɛʼ pɛfɔny na palaamɛʼ pə́ə́s páyɛ́moólɛ́g lɛ́ ná pábaasɛ kɛbán kiə́ŋ lɛ́ páamoyóon, pámáamoóbaŋan a ɔmbásá.

²¹Pəsi tɛyɛ́ɛ tɛándaamɛna pɛda na nyɔ́lɛ́ lɛ́, nyɔ́lɛ́ aa alɛɛ́ mɔɔd nyɔ́ aágaáŋɛn Ɛ́sɛlayɛl. Náa mɔɔ́s mádáád áa móonɛ tɛándɛɛ́ a mɔ́lɛ́ wɔnɔ́ ná pɛbán pɛ́ɛb pɛ́yásánɛ́ɛ́.

²²A fɔ́lɔ́b, tɛmáwándáá na ngab ɛ pagɛ́ɛd yimmú a ondáŋ wə́ə́s. Pámɛ́ɛn a kəəniʼ na pɛbáŋɛn pɛ́ koany,

²³pámboanɛn kɛlóŋ, pááság kimbuúlini əgiim abɛdɛ́anɛ lɛ́ məŋun má maʼtom mámábolónɛn kɔ, mááság kobodɛ́anɛ lɛ́ alɛ ongóm.

²⁴Pɔsɔ́sɔ́g pə́ə́s tɛn pə́mmú pámɛ́ɛn kɔ a kəəniʼ, pááboan pɛbán piim əgín wɔnɔ́ ná pagɛ́ɛd póob páyɛ́bɛdɛánɛ, pámboanɛn kɛlóŋ kiə́ŋ.»

²⁵Yə́sus aáság kusəə ɔnɔ́ na pɔ́lɛ́: «Podɛɔ́gɔ na oʼto! Podɛɔ́gɔ əgəə́bisig kəə́liʼtini nkə kiim kɛ́ palɔɛgɛʼ pɛbán pá Táán Píísə́ə́!

²⁶Kɛ́dɛʼkɛ́ɛ lɛ́ Məsíi áyaŋ anɛ nto ná ə́díin ɔsɔd a nugəm nuə́ŋ ə́?»

²⁷A ngim yɛ́ɛy anɛ́ɛ́n áa ayɛ́boyásɛ́nan nkə kiim kɛ́ kíyə́sə́líí a oʼto wə́ə́ŋ, a Kálaʼtaʼ ɛ Táán, kəə́bə́ə́ a nkə kɛ́ Moyíis yiídílə, kɛɛnanan a nkə kɛ́ palɔɛgɛʼ pɛbán pá Táán píísə́ə́.

²⁸Ná páyɛ́ɛ pándɛ ndúmiʼ na nigúu nɛ́go nɛ́ páyɛ́ɛ agɛɛn a nɛ́lɛ́, Yə́sus aáság kɛɛlɛ wɔnɔ́ nyɔ́lɛ́ alɛ agɛɛn kə́mmú yuudi na ongɛn.

²⁹Pááság komoyɛ́ɛlɛ lɛ́ adɛsán, pɔ́nɔ́ na nyɔ́lɛ́: «Niób nɛándɛ kɔ, kɛnɛŋ sɔɔŋ mbin ídə́əŋ, lɔb na pəsi.» Aáság kosɔd əguləndin na pɔ́lɛ́.

³⁰Ná páyɛ́ɛ pə́ʼkuləndin agonɛ́ɛnɛ, Yə́sus aáság kudə́əmini pɛlɛ́ɛd, amɛ́ʼkɛn pisoyidiʼ na Táán, aábɛ́ŋa, amáboyɛ́ʼkɛn.

³¹A kɛnɛŋ kɛ́ɛg aa əngis yɔ́ɔ́bɔn ə́yə́buə́níí, pááság komoólɛŋ. Náa, nyɔ́lɛ́ aáság kusə́ngilid a əngis yɔ́ɔ́bɔn.

³²Pə́ə́bə́ə́ kosɔyɔ kɔ pɔ́lɛ́ na pɔ́lɛ́, pɔ́nɔ́: «Adɛ́ a ntɛ́m yəəs a kaadɛ, tɛyɛ́ɛ wɔnɔ́ tígu tɔnyɔ́g kɛnɛŋ kɛ́ ayɛ́ɛ agosɔyɔ na pəsi a ngə́, aábɛyásɛnan nkə kɛ́ kɛ́lɛɛ́ a Kálaʼtaʼ ɛ Táán á?»

³³Pááság koság kodɛ́ɛmɛn əguúlini a Yolósalɛm. Pɛ́ɛ́bóan paaʼkan pá pówád na úmmuʼ, na pɔsɔ́sɔ́g pɔ́ɔ́bɔn kɛnɔ kɛ́ páyágɔnyɛdɛn,

³⁴pɔ́ɔsɔyɔ pɔ́nɔ́: «Sə́dúk alɛ ongoóndɛ́gáán fɔ́lɔ́b! Omólódíí na Simɔ́ɔŋ.»

³⁵Pɔ́lɛ́ tɛn pááság kobodɛ́ananɛ nkə kɛ́ kɛ́másánɛ́ɛ́ na pɔ́lɛ́ a ngə́, na wɔnɔ́ ná pə́míim agaálɛŋ lɛ́ nyɔ́lɛ́ aa alɛɛ́nɔ a kɛnɛŋ kɛ́ aábɛ́ŋa pɛlɛ́ɛd.

³⁶Pálɛ anɛ́ɛ́n agosɔyɔ kɔ ɔ, Yə́sus nyɔ́lɛ́nyɔ́amɔɛ́d foáy, aáʼkodɛ́lɛm a kɛgaágadɛ kɛɔ́bɔn, ɔnɔ́ na pɔ́lɛ́: «Kiwiiyiʼ kíɛn na pəŋi aá!»

³⁷Wɛɛ́y úyíbugúmin, pə́əliminə kwag kwag kwag, páyɛ́ɛ agofɛg lɛ́ kiíd áa kɛáʼkobolónɛnɛɛ́.

³⁸Ayɛ́bodɛánɛ ɔnɔ́ na pɔ́lɛ́: «Tuə́ áa polɛɛ́ náan, poágaáwánda? Polɛ na musuŋ a ntɛ́m yaaŋan a?

³⁹Táláan ɔmbɔg yáam, na ambaan yáam. Mɛ áa ndɛɛ́nɔ! Ɛ́ʼtɔ́bɔ́ɔn ná pódála lɛ́ kiíd kíʼkóodi pumog, kɛ́diɛn na pigú wɔnɔ́ ná mɛ nkódíí.»

⁴⁰Ná yiísə́ə́ náan, aáság kubuúloodi pufə́ŋ pó óndoʼ a ɔmbɔg na a ambaan yə́ə́ŋ.

⁴¹Wɔnɔ́ ná páyɛ́ɛ ntɛ́m na tɔnyɔ́g síɛ́ɛ́d, pə́əgəə́wúunəni, páyɛ́ɛ pádɛ́mman kəə́liʼtini. Náa ɔnɔ́ na pɔ́lɛ́: «Puʼkóodi yoom ɛ́ konɛ áay a?»

⁴²Pááság komoyɛ́ʼkɛn kɛsom kɛ́ nsú kɛ́ kɛmoaŋɛ́náán.

⁴³Aáság kusiəd, aánɛ́ a əngis yɔ́ɔ́bɔn.

⁴⁴Náa ɔnɔ́ na pɔ́lɛ́: «Táá nkə kɛ́ njɛ́bodɛánɛ aa kɛ́ɛnɛ ná njɛ́ɛ nkə́ligi na pəŋi, nyɔʼkɔ́: Nkə kiim kɛ́ kíyə́dílə́ə́ a pɛcɛm pɛ́ Moyíis, na a pagálaʼtaʼ pá palɔɛgɛʼ pɛbán pá Táán, na a kálaʼtaʼ ɛ pɛʼkwáá a kidíídí kɛ́am, kígóódi lɛ́ kɛ́as.»

⁴⁵Áay aa əyíbubúən nsiŋ agɛɛlɛ lɛ́ póob pɛbán pɛ́ pɛ́lɛɛ́ a Kálaʼtaʼ ɛ Táán.

⁴⁶Aáság kusəə ɔnɔ́ na pɔ́lɛ́: «Táá nkə kɛ́ kɛ́lɛɛ́ kidiídílə́ aa kɛ́ɛnɛ lɛ́: Məsíi ogóódi lɛ́ ánɛ ntɔ́b, ə́gu ná a mɔɔ́s mádáád, yíiʼkini kiim álon a kəəniʼ ongóm[103]

⁴⁷A niiŋ niə́ŋ, a nsí ngim, kəə́bə́ə́ a Yolósalɛm, pálɛ́ɛ́ kolɔɛgɛ lɛ́ pɔɔd págasɛ ɔlaa wɔ́ɔ́bɔn ná Táán ə́buúlisin mabɛ́ mɔ́ɔ́bɔn.

⁴⁸Pəŋi aa polɛɛ́ wɛ́sɛnɛg a nkə kɛ́ɛg kiim.

⁴⁹Mɛ, ndəəgiim mpodómɛn nkə kɛ́ Mbáa ayɛ́bogágɛn. Kɛbán kímuʼ, pudinyúúd pólon agosan, pólɔb áanɛ a pálɛ́ɛg yɛ́ɛnɛ, súʼtə́ə́ ná toɛn tó tólɛ́ɛ́ kubuyíminií a mɔɛn túəgiim.»

⁵⁰Yə́sus aáság kolon pálɛ́ɛg na pɔ́lɛ́ agɛɛn ndúmiʼ na Pɛʼtaníi. Yiídə́ə́míni ɔmbɔg a mɔɛn, aáság kobosɛ́a.

⁵¹Alɛ anɛ́ɛ́n agobosɛ́a a, kaádanan koɔ́bɔn a kóog, əə́bə́ə́ kobag a mɔɛn.

⁵²Náa a pɔ́lɛ́, ná páyɛ́ɛ pə́ʼkumudúmin əndu a udi, pááság kuúlini a Yolósalɛm na tɔnyɔ́g tuim.

⁵³Páyɛ́ɛ pɛnɛŋ piim a Tɛ́mpɛl, páanyáadɛ Táán.