Read Yambeta LÓʼKAS 3 Bible Online

LÓʼKAS 3 - Yambeta bible

LÓʼKAS 3

¹A kɛnɛŋ kɛ́go kɛ́ɛg, Tibɛ́ɛl aa ayɛ́ɛ nkúm yɛ́ nkóʼkóón. Ayɛ́ɛ aáʼkɛɛlɛ pɛag puuniʼ a nɛlaamɛʼ. Pɔ́nsɛ́ Pɛláad ayɛ́ɛ ngɔ́mɛnaʼ yɛ́ nkóʼkóón a Siudə́ə, Ɛlóod Antɛʼpáas aálaamɛ a Kalilə́ə, móŋŋí wəəŋ Filíib a Iʼtulə́ə na a Tɛlaʼkoníid, Lɛsánɛas a Abɛlɛ́ɛn.

²Pa Ánaʼ pɔ́lɛ́ na Kayíif páyɛ́ɛ payaaganɛʼ pɛfɔny pá pagóón. Náan aa Táán yɛɛ́sɔ́yɔ a kɛnɛŋ kɛ́go kɛ́ɛg na Sɛ́aŋ, mɔɔ́n ó Saʼkalɛ́as. Yɛɛ́sɔ́yɔ na nyɔ́lɛ́ a kɛnɔ kɛ́ kifələ́ə́n.

³Sɛ́aŋ ogo aáság kiim ádáŋana a əʼkúu yá a ɛbá ɛ́ noom nó Siuludɛ́ɛŋ əngim. Ayɛ́ɛ əgiim álɔɛgɛ ɔnɔ́: «Ə́súʼkíən óo! Liogíən ongoo a mabɛ́, púim, mpoósɔgɛn, ná Táán ə́buúlisin mabɛ́ mááŋan.»

⁴Kɛ́yásánɛ́ɛ́ əgín wɔnɔ́ ná Ɛsayíi, ɔndɔɛgɛʼ pɛbán o Táán yiídílə a kálaʼtaʼ yəəŋ. Yiídílə lɛ́: «Nɛŋo nɛ́ mɔɔd nɛ́lɛ asáŋa a kɛnɔ kɛ́ kifələ́ə́n, nɛɔ́nɔ́: “Sóbíníən pungə́ pó Sə́dúk óo! Tə́nígə́níən pɛáŋ piə́ŋ pɛ́dɛ́lɛm sáád.

⁵Púyə́əgəni pibod piim. Pósɛndanɛ nkon ngim, na moŋɛnɛ́ŋɛn muim. Pungə́ pó pólɛɛ́ pogɔ́dɛ́ʼkɔd, púdə́nigəni pólɛ́, pódɛ́lɛm tə́lə́lə́lə́. Pó pólɛɛ́ pobɛ́, póolɛŋ kuyə́əgəni.

⁶Ungim alɛ́ɛ́ kodála wɔnɔ́ ná Táán amáboyɔ́ɔ́yɛ[24]”.»

⁷Sɛ́aŋ ayɛ́ɛ agodɛ́ananɛ na pɔɔd pá páyɛ́ɛ əgiimən əsiədə ɔsɔgɛn ɔnɔ́: «Pəŋi musə́sə́d mó pɛlɔ́ngɛʼ móonɛ, ánɛ aa amábodɛánɛ lɛ́ ngə́ ɛgaágɛɛŋɛ ilúún ɛ́ Táán yɛ́ɛnɛ yɛ́ yə́ndəgimií ɛlɛ kɔ.

⁸Ooo yi, kɛbán kɛ́dɛɔ́gɔ! Ɛlɛ́an anɛ́ɛ́n pɛbán pɛ́ píoloodi lɛ́ puə́ʼkəə́suʼki, puóʼkuliogi ongoo a pɛbán pɛ́ pɛbɛ́. Podɛfɛ́g lɛ́ kɛ́lɛ əgín a niə́səə nɛ́ na unuʼ na unuʼ lɛ́ Ábɛlaam alɛ sɛʼkóón waaŋan, ndóo. Ndabodɛ́anɛ lɛ́ ɔmbɔ́ əgín aʼtáán yɛ́ɛnɛ yɛ́ poádɛ́ʼtɛg, Táán alɛ ogɛɛlɛ lɛ́ yáán ndɛg yɛ Ábɛlaam!

⁹Taa, yaá áa yɛ́ɛnɛ yándɛɛ́ a ombɔg lɛ́ pásóma piɛd a ngaŋ. Kiɛd kiim kɛ́ kídiə́guúmíí modámádám mólaŋ, pálɛ́ɛ́ kosom, páadagɛdɛ a yug.»

¹⁰Náa pɔɔd pə́əŋíən na Sɛ́aŋ pɔ́nɔ́ əə: «Ooo, tíɛlɛ anɛ́ɛ́n tuə́ ə́?»

¹¹Náa ɔnɔ́ na pɔ́lɛ́: «Wɛ nyɔ́ olɛɛ́ na pilə́ə́ pɛ́baan, ɛ́ʼkɛn kímuʼ na sɔ́g nyɔ́ oʼkódií. Wɛ nyɔ́ olɛɛ́ na yoom ɛ́ konɛ, áyóŋɛ́ɛ́ sɔ́g nyɔ́ ɔdɛɔ́gɔ na yɛ́lɛ́.»

¹²Pagɔ́mmanɛʼ mag pááság kiimən tɛn kɔ áay lɛ́ Sɛ́aŋ áboósɔgɛn. Pə́yímuŋíən pɔ́nɔ́ na nyɔ́lɛ́ əə: «Kɛlág, nkə aa pəsi tigódíí lɛ́ tíɛlɛ ə́?»

¹³Náa Sɛ́aŋ ɔnɔ́ na pɔ́lɛ́: «Pəŋi, pudiŋíən na pɔɔd lɛ́ pálónɛ mag agaáyɛn nkə kɛ́ nɛlaamɛʼ nɛ́lɛɛ́ əguŋíən.»

¹⁴Pasɔ́njaa tɛn pááság kiim. Náa pɔ́nɔ́ na Sɛ́aŋ əə: «Pəsi oʼ?» Əyíbuyúlísíni ɔnɔ́: «Pəŋi, pudisiə́dín mɔɔd mɔɔnɛ́ a náan iyó, oó lɛ́ a toɛn. Ndóo. Pɔ́nyɔ́ga na nkə kɛ́ pálɛɛ́ agoboyɛ́ʼkɛn a pɛsáábɔ́n pɛáŋan.»

¹⁵Ungim ayɛ́ɛ agobóŋan fɔ́lɔ́b fɔ́lɔ́b lɛ́ Məsíi yəgiim. Náa, páyɛ́ɛ əgəə́ŋíənə kɔ a ntɛ́m yɔɔbɔn a kaadɛ pɔ́nɔ́ əə: «Sɛ́aŋ nyóon əə, adɛ́njaŋ nyɔ́lɛ́ aa alɛɛ́ Məsíi ə́?»

¹⁶Náa ɔnɔ́ na pɔ́lɛ́ piim: «Ndóo óo! Mɛ, əgín na məní má məní aa ndɛɛ́ agoboósɔgɛn. Mɔɔd alɛ kɔ nyɔ́ əə́ndəgimií a ngim yaam. Nyɔ́lɛ́ alɛ na toɛn amɛ́njaáyɛn. Mɛ ntiigin ɔmbɔ́ nyóonɛ lɛ́ mbodɛm a udi wə́ə́ŋ əgumuyóndin palábá a ambaan. Nyɔ́lɛ́ alɛ́ɛ́ koboósɔgɛn na a Uŋun wó Ufúlúʼtú na a yug.

¹⁷Ogóódi maʼtɛ́ngɛ́lɛ́ a ombɔg má kofɛm ngəŋ na mɔ́lɛ́. Alɛ́ɛ́ kɛɛlɛ lɛ́, ngəŋ yɛ́ ɛlɛɛ́ ɛlaŋ, ə́əsiəd agɛɛ́ngɛg a kɛságɛʼ kiə́ŋ. Ə́əsiəd pifum a kogɔ́lɔnɛ a yug yɛ́ ɛ́dɛndɛ́ɛ́ kuwúú.»

¹⁸Sɛ́aŋ ayɛ́ʼkɛ́nan pɔɔd ndə́b yimmú náan kɛ́fɔlɛ́, agoboólɔɛgɛnɛ Tɔsɔm Tólaŋ.

¹⁹Yɛɛ́dɛánɛ na Ɛlóod nyɔ́ ayɛ́ɛ alaamɛ a Kalilə́ə ɔnɔ́: «Ɛlóod, omɛ́ɛ́lɛ kɔbɛ́ əgusiəd Ɛlodɛ́ad, oʼkán ó móŋŋí waaŋ lɛ́ ógóan!»

²⁰Náa aa Ɛlóod ayɛ́ʼkɛn toɛn lɛ́ pə́gumin Sɛ́aŋ, pámoyáág a yoog yɛ njaan. Əyíʼkíni kosáʼtɛnɛn kɛ́ɛg a pɛbán pɛ́ pɛbɛ́ piim pɛ́ ayɛ́ɛ aáʼkɛɛlɛ.

²¹Ná ungim ayɛ́ɛ əə́ʼkusiəd ɔsɔgɛn, Yə́sus aáság kiim, Sɛ́aŋ amámosɔ́gɛn tɛn. Ná ayɛ́ɛ ɔgɔɔ́sɔ́gɔlɔn, mbálámɔɛn yaáság kəə́buən.

²²Uŋun wó Ufúlúʼtú wááság kiim úsuu fɛɛ́ɛɛ wɔnɔ́ kiɛm, ómámoláʼtɛ́mɛn a nkó. Nɛŋo nɛáság kiim nísuu tɛn kɔ́gɔ́ɔg a mɔɛn, nɛɔ́nɔ́ na nyɔ́lɛ́: «Wɛ, olɛ mɛ mɔɔ́n wo ɔʼtɛ́m, tɔnyɔ́g tóam tuim tólɛ na wɛ[25]»

²³Yə́sus ayɛ́ɛ aándɛ na pɛag wɔnɔ́ niʼtin na pɛówád ná əyə́ʼtúmíí pigólí. A mafɛgaʼ má pɔɔd kɛ́yɛ́ɛ lɛ́, alɛ mɔɔ́n ó Yósɛb. Yósɛb yɛ Əlíi,

²⁴Əlíi ɛ Maʼtáad, Maʼtáad ɛ Lə́fi, Lə́fi ɛ Mə́líʼki, Mə́líʼki ɛ Yanáay, Yanáay ɛ Yósɛb,

²⁵Yósɛb ɛ Maʼtaʼtɛ́as, Maʼtaʼtɛ́as yɛ Ámos, Ámos ɛ Nayúum, Nayúum yɛ́ Ɛ́sɛli, Ɛ́sɛli ɛ Nagáay,

²⁶Nagáay ɛ Máad, Máad ɛ Maʼtaʼtɛ́as, Maʼtaʼtɛ́as ɛ Səməyíin, Səməyíin ɛ Yosɛ́ɛg, Yosɛ́ɛg ɛ Yóda,

²⁷Yóda yɛ Iyowánan, Iyowánan ɛ Lɛ́sa, Lɛ́sa ɛ Solobabɛ́ɛl, Solobabɛ́ɛl ɛ Salaʼtíɛl, Salaʼtíɛl ɛ Nə́li,

²⁸Nə́li ɛ Mə́líʼki, Mə́líʼki yɛ Ə́di, Ə́di ɛ Kósam, Kósam yɛ Ɛlɛmádam, Ɛlɛmádam ɛ Ɛ́ɛl,

²⁹Ɛ́ɛl ɛ Yə́sus, Yə́sus yɛ Ɛliɛsɛ́ɛ, Ɛliɛsɛ́ɛ ɛ Yolíim, Yolíim ɛ Maʼtáad, Maʼtáad ɛ Lə́fi,

³⁰Lə́fi ɛ Sɛmɛyɔ́ɔŋ, Sɛmɛyɔ́ɔŋ ɛ Siudáa, Siudáa ɛ Yósɛb, Yósɛb ɛ Yónam, Yónam yɛ Ɛlɛáʼkim,

³¹Ɛlɛáʼkim ɛ Mɛ́lɛa, Mɛ́lɛa ɛ Mɛ́na, Mɛ́na ɛ Maʼtáʼta, Maʼtáʼta ɛ Náʼtam, Náʼtam ɛ Tə́fid,

³²Tə́fid ɛ Yəsə́ə, Yəsə́ə yɛ Obɛ́ɛd, Obɛ́ɛd ɛ Póos, Póos ɛ Sala, Sala ɛ Naásɔn,

³³Naásɔn yɛ Amɛnadáab, Amɛnadáab yɛ Ədimíin, Ədimíin yɛ Əliníi, Əliníi yɛ Ɛ́sɛlɔm, Ɛ́sɛlɔm ɛ Fálɛs, Fálɛs ɛ Siudáa,

³⁴Siudáa ɛ Yáʼkɔb, Yáʼkɔb yɛ Ɛ́sag, Ɛ́sag yɛ Ábɛlaam, Ábɛlaam ɛ Tɛ́la, Tɛ́la ɛ Naʼkɔ́ɔl,

³⁵Naʼkɔ́ɔl ɛ Səlúug, Səlúug yɛ Ɛlagóo, Ɛlagóo ɛ Falɛ́ɛg, Falɛ́ɛg yɛ Ɛbɛ́ɛ, Ɛbɛ́ɛ ɛ Sɛ́la,

³⁶Sɛ́la ɛ Káyɛnam, Káyɛnam yɛ Alɛfasáad, Alɛfasáad ɛ Sɛm, Sɛm ɛ Nówə, Nówə ɛ Lámɛg,

³⁷Lámɛg ɛ Məʼtusalɛ́ɛm, Məʼtusalɛ́ɛm yɛ Ɛ́nɔ́g, Ɛ́nɔ́g ɛ Yɛlɛ́ɛd, Yɛlɛ́ɛd ɛ Malɛlɛyɛ́ɛl, Malɛlɛyɛ́ɛl ɛ Káyɛnam,

³⁸Káyɛnam yɛ Ɛnóos, Ɛnóos ɛ Sɛ́ɛd, Sɛ́ɛd yɛ Ádam, Ádam mɔɔ́n ó Táán.