Read Yambeta LÓʼKAS 4 Bible Online

LÓʼKAS 4 - Yambeta bible

LÓʼKAS 4

¹Yə́sus aáság kodɛ́ɛmɛn áay a Siuludɛ́ɛŋ agosan. Uŋun wó Ufúlúʼtú óyɛ́ɛ na nyɔ́lɛ́ síɛ́ɛ́d. Wááság komoyɛ́ɛlɛ lɛ́ yɛ́ɛn a kɛnɔ kɛ́ kifələ́ə́n.

²Ayɛ́ɛ́lɛ kɔ əʼtin á mədúg ábaan. Omɔlɛɔ́g ayɛ́ɛ amoásɔsɛna. A mədúg tɛn móom miim, adɛʼkɛ́ɛ anɛ́ɛnɛ, njaan yəə́bə́ə́ komoobany.

³Náa Omɔlɛɔ́g ɔnɔ́ na nyɔ́lɛ́: «Nga olɛ Mɔɔ́n o Táán, ɛɛlɛ lɛ́ aʼtáán yɛ́ɛy yáán moom mó konɛ, ónɛ yi.»

⁴Yə́sus əyímuyúlísíni ɔnɔ́ na nyɔ́lɛ́: «Kɛ́lɛ kidiídílə́ a Kálaʼtaʼ ɛ Táán lɛ́: “Ɔlaa ó mɔɔd ódɛɔ́gɔ əgín a moom mó konɛ[26]”.»

⁵Omɔlɛɔ́g aáság kɛɛn na nyɔ́lɛ́ a mɔɛn lóóŋ, əmə́mulóódi nsí ngim na əʼkúu əngim yá álɛɛ́ kɔ.

⁶Náa ɔnɔ́ na nyɔ́lɛ́: «Taa, Ndagoyɛ́ʼkɛn əʼkúu yɛ́ɛy əngim lɛ́ ólaamɛ, na tugúm tuim tó tólɛɛ́ kɔ. Nkə kɛ́ɛg kiim, páyɛ́nyɛɛ́ʼkɛn na mɛ. Ndɛ ogɛɛ́ʼkɛn tɛn na ungim nyɔ́ mbányɔ́ŋɛn.

⁷Wɛ, uməʼkiʼtúmin əndu agɛnyáadɛ, muim móagoob na wɛ.»

⁸Yə́sus aáság kumuyúlisini ɔnɔ́: «Kɛ́lɛ kidiídílə́ a Kálaʼtaʼ ɛ Táán lɛ́: “Əgín Sə́dúk Táán waaŋ nyɔ́lɛ́nyɔ́əsíŋ áa ónyádɛɛ́. Əgín nyɔ́lɛ́nyɔ́əsíŋ áa úmudúminií əndu agomonyáadɛ[27]” »

⁹Omɔlɛɔ́g aáság kɛɛn anɛ́ɛ́n na nyɔ́lɛ́ a Yolósalɛm. Ayɛ́ɛ́n əmudə́nigi a ɛnɔn ɛ́ Tɛ́mpɛl a mɔɛn, náa ɔnɔ́ na nyɔ́lɛ́: «Nga olɛ Mɔɔ́n o Táán, ə́lísíí a ɛnɔn yɛ́ɛnɛ, úcilib a nsí

¹⁰lɛ́, kɛ́lɛ tɛn kidiídílə́ a Kálaʼtaʼ ɛ Táán lɛ́: Táán alɛ́ɛ́ kodɛ́anɛ na məŋun mə́ə́ŋ má maʼtom lɛ́ mə́guúnuŋ.

¹¹Na tɛn lɛ́: Mágonyáŋɛn kogonyáŋɛ́náán a ɔmbɔg yɔ́ɔ́bɔn agɛɛlɛ lɛ́ udimbúʼtən ɔmbɔ́ kubúʼtən a nɛdáán[28]»

¹²Náa Yə́sus ɔnɔ́ na nyɔ́lɛ́: «Ɛɛ́ɛ, kɛ́lɛ náan! Náa áyóŋɛ́ɛ́ tɛn lɛ́ kɛ́lɛ kidiídílə́ kɔ lɛ́: “Odɛyásɔ́sɛ́nɛ́ɛ́ Sə́dúk Táán waaŋ[29]”.»

¹³Ná Omɔlɛɔ́g ayɛ́ɛ aáʼkoman kaásɔsɛn Yə́sus a mbod ngim, aáság kudi ə́mə́muudí, súʼtə́ə́ agɛɛn əgiig a kɛnɛŋ kɛ́ alɛ́ɛ́ kiiʼkini kɔɔ́ŋɛ́ɛ́ ngə́.

¹⁴Yə́sus aáság kimbuúlini a Kalilə́ə. Uŋun wó Ufúlúʼtú óyɛ́ɛ na nyɔ́lɛ́ síɛ́ɛ́d. Niiŋ niə́ŋ náan lumuʼ, lumuʼ, a nigúu niim.

¹⁵Ayɛ́ɛ agaaʼkananɛ pɔɔd a puog poɔ́bɔn pó pɛɔ́sɔ́gɔ́lɔ́n. Ungim ayɛ́ɛ amoógany.

¹⁶Yə́sus yɛɛ́dɛ́ɛ́mɛn, amɛ́ɛn a Násalɛd, kɛnɔ kɛ́ yɛɛ́yám. Wɔɔ́s ó kisúgiʼ wúmmú, əgín wɔnɔ́ ondoŋá wə́ə́ŋ, ayɛ́ɛ́n ɔsɔd a yoog ɛ pɛɔ́sɔ́gɔ́lɔ́n kɔ. Yɛɛ́dɛ́ɛ́mɛn agobana Kálaʼtaʼ ɛ Táán.

¹⁷Páyɛ́moyɛ́ʼkɛn lɛ́ ábana a kálaʼtaʼ yɛ Ɛsayíi, Ɔndɔɛgɛʼ pɛbán o Táán. Ná yiíbúən, aáság kudə́əŋ a kɛnɔ kɛ́ píídílə pɔ́nɔ́:

¹⁸«Uŋun ó Sə́dúk ólɛ na mɛ lɛ́ əyínyiiyid ɔnɔ́ nyɛ́ɛn alɔɛgɛnɛ pasɔ́gasɔ́gá Tɔsɔm Tólaŋ. Ntɛ́anɛ na pá pálɛɛ́ pɛɔ́lɛ́ lɛ́ pááman a poɔ́lɛ́. Na powongwóg lɛ́ woog wɔ́ɔ́bɔn wááman. Ntɛ́anɛ na pɔsɔ́g pá pɔsɔ́g páboyánɛ́nɛ́ɛ́ pɛɔ́lɛ́ lɛ́ poɔ́lɛ́ poɔ́bɔn poáman.

¹⁹Ayɛ́ʼtóm tɛn lɛ́ nyíim alɔɛgɛ lɛ́ waag ó Sə́dúk kuloodi ɔʼtɛ́m wə́ə́ŋ ólaŋ wə́ndəgiig[30]»

²⁰Yə́sus aáság kubuəg kálaʼtaʼ, amɛ́ʼkɛn na uʼkudin nyɔ́ a yoog ɛ pɛɔ́sɔ́gɔ́lɔ́n yɛ́ɛy, aáság kɛɛn ələndin a nsí. Pɔɔd piim pá páyɛ́ɛ kɔ a yoog ɛ pɛɔ́sɔ́gɔ́lɔ́n yɛ́ɛy pááság komodámɛn əngis.

²¹Náa əə́də́əmini tɔgɛ́ɛ́, ɔnɔ́: «Nkə kɛ́ɛnɛ kɛ́ mbáʼkobanaá, pomóób, kɛ́máás naánɛ́.»

²²Ungim ayɛ́ɛ agogany Yə́sus, pə́əgəə́wúunəni na pisig pɛ́ tɔgɛ́ɛ́ pɛ́ɛb, pə́əgəə́ŋíənə pɔ́nɔ́ əə, adɛ́ mɔɔ́n ó Yósɛb aa alɛɛ́ náan əə́?

²³Náa Yə́sus ɔnɔ́ na pɔ́lɛ́: «Mbálɛŋ lɛ́ puəgisiədin nkaʼtɛ́n yɛ́ɛnɛ yɛ́ ɛlɛɛ́ lɛ́: “Uʼkóʼtonon ayóómɛ́ɛ́ wɛɛ́nyɔ́amɔɛ́d yi!” Poagɛʼtɛ́anɛ tɛn poɔʼkɔ́: “Nkə kiim kɛ́ tɛyóób lɛ́ oyɛ́ɛ agɛɛlanɛ a Kaʼpɛlɛnáyum, ɛɛlɛ tɛn áanɛ a pálɛ́ɛg yaaŋ ɛ wɛɛ́nyɔ́amɔɛ́d yi”.»

²⁴Ayɛ́ɛ́n na tɔgɛ́ɛ́ yuudi, ɔnɔ́: «Ɛɛ́ɛ, a fɔ́lɔ́b ndabodɛ́anɛ lɛ́ pɔ́dɛɔ́gɔɔ́sɔ́dɛ ɔndɔɛgɛʼ pɛbán o Táán ɔmbɔ́ úmmuʼ a nigúu niə́ŋ nɛ́ əmə́biə́níí a nɛ́lɛ́.

²⁵A fɔ́lɔ́b tɛn, kɛ́lɛ lɛ́, pidí pɛ́ pagɛ́ɛd pɛ́yɛ́ɛ kɔ piíŋ a Ɛ́sɛlayɛl a kɛnɛŋ kɛ́ Ɛlɛ́as, ɔndɔɛgɛʼ pɛbán o Táán. Ayɛ́ɛ́lɛ kɛloo a kɛnɛŋ kɛ́go kɛ́ɛg, pɛag pɛ́dáád na kɛsom, məyíi mááság kudə́əŋ a nigúu kilúd[31]

²⁶Táán adɛʼkáadom Ɛlɛ́as a nó pidí pɛ́ɛb ɔmbɔ́ kímuʼ, ayɛ́moodóm agá a nó kidí kɛ́ ɔʼkɛ́ɛd kɛ́ kɛ́yɛ́ɛ a pálɛ́ɛg ɛ Sɛlɛ́bta, a nigúu nɛ́ Sɛdɔ́ɔŋ[32]

²⁷Pɔɔd tɛn pá páyɛ́ɛ abany nkún páyɛ́ɛ kɔ piíŋ a Ɛ́sɛlayɛl a kɛnɛŋ kɛ́ Əlisə́ə, ɔndɔɛgɛʼ pɛbán o Táán. Adɛʼkáagoómɛ ɔmbɔ́ úmmu kɔ. Əgín Naamáaŋ kibíəniʼ kɛ́ a Silíi aa Táán ayɛ́ɛ́lɛ lɛ́ Əlisə́ə yóómɛ[33]»

²⁸Ungim nyɔ́ ayɛ́ɛ kɔ áay a yoog ɛ pɛɔ́sɔ́gɔ́lɔ́n, ayóób ilúún kɛ́fɔlɛ́ na tɔgɛ́ɛ́ tóod.

²⁹Pɔ́lɛ́ piim pááság kəə́wu, pə́ə́gumin Yə́sus agolon pálɛ́ɛg na nyɔ́lɛ́. Páyɛ́ɛ́n na nyɔ́lɛ́ a oʼkon a mɔɛn. Oʼkon wó pɛ́wáagɛn pálɛ́ɛg yɛ́ɛy kɔ. Páyɛ́ɛ anyɔ́ŋɛn lɛ́ ná pámɛ́ɛn əmudíʼkini kɔ́gɔ́ɔg, yɛ́ɛn ədə́əŋən.

³⁰Ná páyɛ́ɛ́n əgiig kɔ́gɔ́ɔg a oʼkon a mɔɛn, Yə́sus aáság kosan a kɛgaágadɛ kɛɔ́bɔn agɛɛn páamodɛ́ʼtɛg agá.

³¹Yə́sus yiísúú a Kaʼpɛlɛnáyum, pálɛ́ɛg yimmú yɛ́ a Kalilə́ə. Ayɛ́ɛ agaaʼkananɛ pɔɔd wɔɔ́s ó kisúgiʼ.

³²Páyɛ́ɛ əgəə́wúunəni na nɛaʼkananɛʼ niə́ŋ lɛ́ ayɛ́ɛ agosɔyɔ əgín a nɛ́ mɔɔd nyɔ́ alɛɛ́ na nɛlaamɛʼ a ombɔg.

³³Mɔɔd nyummú nyɔ́ uŋun wó ɔmbɛ́ óyɛ́ɛ əguyə́bi, ayɛ́ɛ kɔ a yoog ɛ pɛɔ́sɔ́gɔ́lɔ́n. Yiídóʼtin kiʼkíŋ, ɔnɔ́:

³⁴«Wóóʼkó! Yə́sus, mɔɔ́n ó Násalɛd, kɛ́lɛ tuə́ ə́? Nkə aa wəə́guunə na pəsi ə́? Umíim lɛ́ úbiwíiyi ə? Mbálɛŋ ánɛ aa olɛɛ́. Olɛ Ufúlúʼtú nyɔ́ Táán əmíim ádom!»

³⁵Yə́sus yɛɛ́sásɛ́dɛn uŋun wó ɔmbɛ́ wóow na nɛnyɛ́n, ɔnɔ́: «Pab yəə́b! Tí mɔɔd nyóon, wɛ́ɛn!» Wááság konyáŋɛn mɔɔd, ómámodɔɛ́d a nsí a udi ó pɔɔd piim, wáálón, ódɛmoyɛ́ɛ́lɛ kɔbɛ́.

³⁶Ungim ayɛ́ɛ na wɛɛ́y. Páyɛ́ɛ əgəə́ŋíənə kɔ pɔ́lɛ́ na pɔ́lɛ́ pɔ́nɔ́: «Wóonɛ ombod oʼ! Nɛ́ɛnɛ nɛsɔyɔʼ óoʼ! Táá mɔɔd ɔɔ́sɔyɔ na toɛn tuim tó nɛlaamɛʼ taa! Amaʼkosásɛd, məŋun má mabɛ́ máamoyóbɛn, máság kolon!»

³⁷Nugəm nó Yə́sus noáság kaálam a nigúu nɛ́ Kalilə́ə niim.

³⁸Ná Yə́sus yɛɛ́dɛ́ɛ́mɛn a yoog ɛ pɛɔ́sɔ́gɔ́lɔ́n, ayɛ́ɛ́n a nó Simɔ́ɔŋ. Ŋŋíin ɛ Simɔ́ɔŋ ayɛ́ɛ agoyáa na toɛn. Pááság komoyɔ́sɔ́gɔlɔn lɛ́ yɛ́ɛlɛ yoom.

³⁹Aáság kɛɛn, aádam ónyoŋim a ɛbá yə́ə́ŋ, aásásɛd na toɛn lɛ́ nkó koyáa yɛ́ɛy ɛ́man. Ɔʼkɛ́ɛd cacalaʼ, əndigi ayáa kə́mmú, aáság koság kodɛ́ɛmɛn əgiim aboyáabɛn.

⁴⁰Áanɛ a wɔɔ́s kosɛlɛm, piim pá páyɛ́ɛ na pabámbany pá páyɛ́ɛ na mbod ɛ mabámbany ngim, pə́yíímən na pɔ́lɛ́ kɛnɔ kɛ́ Yə́sus ayɛ́ɛ. Ayɛ́boyábɛ́gan pɔ́lɛ́ piim ombɔg, pómóóm.

⁴¹Məŋun má mabɛ́ máyɛ́ɛ agolónan tɛn a nkó ɛ pabámbany piíŋ, máagaányam, mɔ́nɔ́: «Wɛ, olɛ Mɔɔ́n o Táán!» Kɛbán kímuʼ, Yə́sus ayɛ́ɛ abosásan lɛ́ mábab yəə́b lɛ́ mɔ́lɛ́ mɛ́ɛ́lɛŋɛn lɛ́ nyɔ́lɛ́ alɛ Məsíi.

⁴²Ná koany kóyááyɛ́nɛ, Yə́sus yɛɛ́lón pálɛ́ɛg agɛɛn a kɛnɔ kɛ́ kifələ́ə́n. Kiʼtúú kɛ́ pɔɔd kiə́bə́ə́ kiim kímuyúunə. Ná páyɛ́ɛ́n amoóboan, pádɛʼkɛ́ɛ anyɔ́ŋɛn lɛ́ ásan, pɔ́nɔ́ ɔ́lɔb na pɔ́lɛ́.

⁴³Náa, ayɛ́bodɛánɛ ɔnɔ́ na pɔ́lɛ́: «Kíəguunə lɛ́ nyɛ́ɛn alɔɛgɛ Tɔsɔm Tólaŋ tó Nɛlaamɛʼ nɛ́ Táán a pabálɛ́ɛg pɛ́ndɛ́ŋ lɛ́ nkə kɛ́ Táán ayɛ́ʼtóm lɛ́ nyíim agɛɛlɛ aa kɛ́ɛg.»

⁴⁴Aáság kəə́bə́ə́ kiim álɔɛgɛ Tɔsɔm a puog pó pɛɔ́sɔ́gɔ́lɔ́n pó a Siudə́ə.