Read Yambeta LÓʼKAS 5 Bible Online

LÓʼKAS 5 - Yambeta bible

LÓʼKAS 5

¹A wɔɔ́s wúmmú, Yə́sus yɛɛ́dɛ́lɛmɛn a ɛbá ɛ́ noom nó Kɛnɛsalɛ́ɛd. Pɔɔd páyɛ́ɛ kiʼtúú kilúd. Kɛnɔ síɛ́ɛ́d, əgiim agoob Tɔsɔm tó Táán. Páyɛ́ɛ agaányɛŋ a pogó.

²Yə́sus aáság kodála pɛʼkɔ́m pɛ́baan pɛ́ pɛ́yɛ́ɛ kɔ áay a ɛbá ɛ́ noom. Pɔɔd pá páyɛ́ɛ agɛɛlɛ nibuəd na pɛ́lɛ́ pádɛʼkɛ́ɛ kə́mmú kɔ a pɛ́lɛ́. Páyɛ́ɛ pándɛ a kɛdɛ́ɛ́, páasoga əmbúnjə́ yɔ́ɔ́bɔn.

³Aáság kobag a kɛʼkɔ́m kɔ kímuʼ. Kɛ́yɛ́ɛ kɛʼkɔ́m kɛ́ Simɔ́ɔŋ. Náa ɔnɔ́ na Simɔ́ɔŋ: «Mɛ́ɛn abag a kɛʼkɔ́m, tiə́súid sɔɔŋ na ɛbá.» Simɔ́ɔŋ aáság kiim abag, pə́mə́suídíí. Yə́sus aáság kuləndin kɔ agaaʼkananɛ Tɔsɔm tó Táán.

⁴Ná yɛɛ́mán kosɔyɔ, aáság kusəə ɔnɔ́ na Simɔ́ɔŋ: «Simɔ́ɔŋ, Tod na kɛʼkɔ́m a kɛnɔ kɛ́ kisum kɛ́lɛɛ́, pódagɛdɛ nibúnjə́ kɔ na pɔsɔ́sɔ́g pááŋ.»

⁵Náa Simɔ́ɔŋ ɔnɔ́ na nyɔ́lɛ́: «Kɛlág, tɛmánɛ́ɛ́ udúg ungim, ɔmbɔ́ isúúsú ímuʼ tiʼkuminin. Ooo! Ndaadagɛdɛ lɛ́ wɛ áa wɔʼkɔ́ ntagɛdɛ.»

⁶Pááság kɛɛn, páádagɛ́dɛ nibúnjə́. Ná pə́yəʼkəsúid, nɛ́lɛ sud na pusú, niə́bə́ə́ kogaʼkad.

⁷Pááság kodɔ́ŋɔn pɔsɔ́sɔ́g pɔ́ɔ́bɔn pá páyɛ́ɛ a kɛʼkɔ́m kímmú kɛ́ʼkáag, pɔ́nɔ́ na pɔ́lɛ́ píim əbugóomin kusúid nibúnjə́ nɛɔ́bɔn. Pááság kiim, pə́ə́yə́ə́gi pɛʼkɔ́m piim pɛ́baan na pusú síɛ́ɛ́d, wɔnɔ́ pínímin a məní.

⁸Ná Simɔ́ɔŋ yɛɛ́dála náan, aáság kɛɛn ədúm əndu a udi ó Yə́sus, ɔnɔ́ na nyɔ́lɛ́: «Sə́dúk, sɛ́gɔɔ ə́suídíí laálá na mɛ lɛ́ ndɛ ɔngɛɛlɛʼ kɔbɛ́!»

⁹Wɛɛ́y úyíbugúmin pɔ́lɛ́ piim pə́əliminə kwag kwag kwag, na Simɔ́ɔŋ kɛ́, na pɔsɔ́g pá páyɛ́ɛ na nyɔ́lɛ́, a ombod ó pusú wóow wó píígúmin.

¹⁰Ɔmbɔ́ tɛn pa Sɛ́ag pɔ́lɛ́ na móŋŋí Sɛ́aŋ, pɔɔ́n pá Səbədə́ə pá páyɛ́ɛ pɔsɔ́sɔ́g pá nibuəd pá Simɔ́ɔŋ, pɔ́yɔ́ɔ́ŋ tɛn wɛɛ́y. Náa Yə́sus ɔnɔ́ na Simɔ́ɔŋ: «Odɛʼtámmána! Əgəə́bə́ə naánɛ́ yɛ́ɛnɛ udiə́giiʼkini konɔ́bɛ moyɛ́g kə́mmú, wəəbə́ə́ agá kɛnnɔ́bɛnɛ pɔɔd.»

¹¹Pááság kimbuúlini a ombáán na pɛʼkɔ́m, páálón a kɛdɛ́ɛ́, pə́ə́dí pə́mə́dí nkə kiim kɛ́ pígóodi əguyə́ən Yə́sus.

¹²Náan aa wɔnɔ́ ná Yə́sus ayɛ́ɛ wɔɔ́s wúmmú a pálɛ́ɛg yimmú. Mɔɔd nyummú nyɔ́ ayɛ́ɛ abany nkún aáság kiim alon. Ná yɛɛ́dála Yə́sus, əyímudə́ə́ŋə́nən a ambaan, udi wə́ə́ŋ a nsí, ɔnɔ́ na nyɔ́lɛ́: «Sə́dúk! Omaʼkɔnyɔ́ŋɛn, olɛ ogɛnjoómɛ, nkún yaam yɛ́ɛman.»

¹³Yə́sus aáság kudə́əmini ombɔg, amámodɔ́bɛd, náa ɔnɔ́ na nyɔ́lɛ́: «Ɛɛ́ɛ, mbányɔ́ŋɛn, nkún ɛ́man na wɛ áaá!» Əgín tɛn kɔ áay a kɛnɛŋ kɛ́ɛg, nkún yəəŋ yaáság koman.

¹⁴Náa Yə́sus ɔnɔ́ na nyɔ́lɛ́: «Odɛʼtɛánɛ na mɔɔd nkə kɛ́ kɛ́másánɛ́ɛ́. Tod agá ogoóloodi na payaaganɛʼ pɛfɔny, wɛ́ɛlɛ kɛfɔny kɛ́ Moyíis yiísə́ə́, əguloodi na ungim lɛ́ kobany koáŋ koáʼkoman[34]»

¹⁵Niiŋ nɛ́ Yə́sus nɛáság kaálam kɛnɔ kiim, lumuʼ, lumuʼ, lumuʼ, nɛ́agɛɛnanan. Pɔɔd piíŋ páyɛ́ɛ əgiimən agaágonya a piʼtúú, a piʼtúú, əgiim agoob tɔgɛ́ɛ́ tuə́ŋ, na agɛɛlɛ lɛ́ áboyóómɛ a mabámbany mɔ́ɔ́bɔn.

¹⁶Náa, Yə́sus nyɔ́lɛ́ ayɛ́ɛ agɛɛnan ələndən a pɛnɔ pɛ́ pifələ́ə́n, ɔɔ́gɔɔ́sɔ́gɔlɔn Táán kɔ.

¹⁷Wɔɔ́s wúmmú wó Yə́sus ayɛ́ɛ agaaʼkananɛ pɔɔd, Pafalɛsɛyɛ́ɛŋ, na palɛŋ pɛcɛm páyɛ́ɛ kɔ. Pə́yíím pádɛ́ɛman a əʼkúu əngim yɛ́ a Kalilə́ə na a Siudə́ə, na a pálɛ́ɛg ɛ Yolósalɛm kɛ́. Toɛn tó Táán Sə́dúk túyólódíí na nyɔ́lɛ́, aágoómanɛ pabámbany.

¹⁸Pɔɔd pááság kiim pásɛŋ kɛgɔd a pɛʼkwág əgiim na kɛ́lɛ́. Páyɛ́ɛ əguunə ngə́ ɛgomosɔ́dɛ a yoog agɛɛlɛ lɛ́ pɛ́ɛn na nyɔ́lɛ́ a udi ó Yə́sus.

¹⁹Wɔnɔ́ ná kɛnɔ kɛ́yɛ́ɛ kɛgágáán na pɔɔd, pándɛŋ ə́lə́ə́ áa pásánɛ́ɛ́, pɛ́ɛ́bág a kɛbon kɛ́ noádɛʼ, páágadɛd kɛnɔ, pə́ə́suuli kɛgɔd kɛ́ɛg na pɛʼkwág piə́ŋ kɔ a kɛgaágadɛ kɛ́ pɔɔd a udi ó Yə́sus.

²⁰Ná Yə́sus yɛɛ́dála kəə́liʼtiniʼ kó pɔɔd póob, aáság kusəə ɔnɔ́ na ombámbany nyóon: «Mbə́gulísin mabɛ́ mááŋ áaá.»

²¹Palɛŋ pɛcɛm na Pafalɛsɛyɛ́ɛŋ pə́ə́bə́ə́ kəə́ŋíənə, pɔ́nɔ́: «Mɔɔd igə aa nyóonɛ alɛɛ́ agofánan Táán ə́? Ánɛ wɛndɛ́ŋ áa alɛɛ́ ugulisin mɔɔd mabɛ́ ná kɛ́sánɛn əgín lɛ́ Táán nyɔ́lɛ́nyɔ́əsíŋ ə́?[35]»

²²Wɔnɔ́ ná Yə́sus yɛɛ́lɛ́ŋ mafɛgaʼ mɔ́ɔ́bɔn má páyɛ́ɛ na mɔ́lɛ́, aáság kubuŋíən ɔnɔ́: «A igə aa polɛɛ́ na mafɛgaʼ móom náan a ntɛ́m yaaŋan ə́?

²³Na kodɛ́anɛ na mɔɔd lɛ́ “mbə́gulísin mabɛ́ mááŋ” na komodɛ́anɛ lɛ́ “tɛ́ɛ́mɛn, táŋána” kɛ́yaán áa kɛ́lɛɛ́ kɛfɛ́fɛ́n lɛ́ mɔɔd ə́səə əə́?

²⁴Náa, ndanyɔ́ŋɛn nyɔʼkɔ́ pólɛŋ lɛ́ mɛ, Mɔɔ́n o mɔɔd, ndɛ na toɛn tóonɛ lɛ́ ndísin mɔɔd mabɛ́ a nsí yɛ́ɛnɛ.» Náa ɔnɔ́ na kɛgɔd kɛ́ɛg: «Mbágodɛánɛ! Tɛ́ɛ́mɛn aá, úsiəd pɛʼkwág pɛáŋ, wúúli a noádɛʼ noáŋ áaá!»

²⁵Əgín kɔ áay a əngis á pɔɔd, kɛgɔd ŋwaád, kɛányáŋɛn pɛʼkwág pɛ́ ayɛ́mmɛŋɛnɛn a pɛ́lɛ́, kiə́siəd ngə́ yəəŋ əguúli a noádɛʼ nuə́ŋ. Ayɛ́ɛ agɛɛn, əə́giim ə́gə́midi Táán.

²⁶Ungim ayɛ́ɛ əgəə́wúnəni kɛ́fɔlɛ́, páagɛɛ́ʼkɛn nugəm na Táán. Na wɛɛ́y ungim, pɔ́ɔsɔyɔ pɔ́nɔ́: «Tɛádála ndam ɛ pɛbán naánɛ́.»

²⁷A ngim yɛ́ɛy, Yə́sus aáság kolon. Alɛ anɛ́ɛ́n agosan a, aáság kodála ɔʼkɔ́mmanɛʼ mag nyummú, niiŋ lɛ́ Lə́fi. Yiíləndinin a oʼkɔɔ wə́ə́ŋ ó pigólí. Náa ɔnɔ́ na nyɔ́lɛ́: «Wɛ, mɛ́ɛn wínjə́ən.»

²⁸Mɔɔd aáság koság kodɛ́ɛmɛn tɛn, əə́dí ə́mə́dí nkə kɛ́ ayɛ́ɛ agɛɛlɛ, əə́yə́ən Yə́sus.

²⁹Ayɛ́ɛ́n na Yə́sus a noádɛʼ nuə́ŋ, aáság komoyáabɛn moom. Ayɛ́ɛ́lɛ kɛa kɛ́ wɔɔ́n, ɛ́fɔlɛ́ ɛ́ Pagɔ́mmanɛʼ mag na pɔɔd tɛn pə́mmú pɛ́ndɛ́ŋ páyɛ́ɛ agonɛ́ɛnɛ kɔ ondáŋ na pɔ́lɛ́.

³⁰Palɛŋ pɛcɛm na Pafalɛsɛyɛ́ɛŋ pə́ə́bə́ə́ kəə́lúluu. Pííŋíən na paaʼkan pə́ə́ŋ pɔ́nɔ́ əə: «A igə aa polɛɛ́ agonɛ́ɛnɛ, poáŋo poloʼ ondáŋ na Pagɔ́mmanɛʼ mag, na pɔɔd tɛn pá ɔlaa wɔ́ɔ́bɔn ódɛɔ́gɔ ɔŋŋɛʼ a əngis á pɔɔd əə́?»

³¹Náa Yə́sus ɔnɔ́ na pɔ́lɛ́: «Pɔɔd pá pálɛɛ́ panasáŋ, fiɛ́d na mɔdɔdɔɔ, póʼkóodi njaan na uʼkóʼtonon. Pá páabany aa pálɛɛ́ na njaan na nyɔ́lɛ́.

³²Mɛ, ntiimin a oʼto ó pá pálɛɛ́ afɛga lɛ́ pɔ́lɛ́ pálɛ sáád, ndóo. Mbíim a oʼto ó pá pámálɛ́ŋɛ́ɛ́ lɛ́ pɔ́lɛ́ pálɛ pɛɛlɛʼ mabɛ́ lɛ́ ná págasɛ ɔlaa wɔ́ɔ́bɔn.»

³³Náa Pafalɛsɛyɛ́ɛŋ pɔ́nɔ́ na Yə́sus: «A igə aa kɛ́lɛɛ́ lɛ́ paaʼkan pá Sɛ́aŋ Ɔsɔgɛn pɔɔd na pə́ə́s kɛ́ pə́əgumən ə́simə́, pɔ́ɔgɔɔ́sɔ́gɔlɔn Táán, pááŋ pə́ʼkumin yɛ́lɛ́, əgín konɛ na koŋo ə́?»

³⁴Yə́sus əyíbuyúlísíni ɔnɔ́ na pɔ́lɛ́: «Poafɛg lɛ́ polɛ págɛɛlɛ lɛ́ pɔɔd pá pɔ́ɔ́dɔ́ŋɔn a wɔɔ́n ó kodɔn pə́ləndin ombɔg a nɛdam, pánnɛ́, páŋŋó, sɔ́g wɔɔbɔn nyɔ́ aálad kodɔn kɔ áay na pɔ́lɛ́ á? Ndóo.

³⁵Kɛbán kímuʼ, mədúg málɛ́ɛ́ kiim má sɔ́g wɔɔbɔn nyɔ́ aálad kodɔn adɛndɛ́ɛ́ kɛɛnɛɛ́ kə́mmú kɔ na pɔ́lɛ́. Áay anɛ́ɛ́n áa pɔ́lɛ́ tɛn pálɛ́ɛ́ kuguminií ə́simə́.»

³⁶Yə́sus əyíbusiə́din nkaʼtɛ́n yimmú yɛ́ɛnɛ, ɔnɔ́: «Mɔɔd ɔdɛɔ́gɔ ogosom kilə́ə́ kɛ́ kɛwa agolɔ́g kiwoo kɛ́ kiʼtug na kɛ́lɛ́. Amaʼkɛɛlɛ náan, aáyósag kɛ́ɛg káag kɛ́ kɛwa, kɛ́dɛálɛŋ kodɛ́ʼtɛganan na kɛ́ kiʼtug.

³⁷Pádɛ́agɛɛga maloʼ má mawa a piʼtug pɛ́ pɛsɔɛ́ŋ, ná pɛ́aman kaáʼtad, maloʼ miim mə́ə́sugin a nsí, pɛsɔɛ́ŋ pɛlɔ́sɔ́ɔ́n.

³⁸Ndóo, aádɛ́ɛ́ kɛɛga maloʼ má mawa a pɛsɔɛ́ŋ tɛn pɛ́ pɛwa!

³⁹Mɔɔd nyɔ́ aáʼkoŋóó maloʼ má máʼkogónɛ́ɛ́, adɛányɔ́ŋɛn kə́mmú lɛ́ ná aáŋó má modom lɛ́ pálɛ əgusəə pɔ́nɔ́: “Yoom yɛ́ yə́ʼkəə́yísíí ɛ́lɛ ɛŋɛʼ agaáyɛn yɛ́ íligíí idom.” »