Read Yambeta LÓʼKAS 8 Bible Online

LÓʼKAS 8 - Yambeta bible

LÓʼKAS 8

¹A kɛɛnanan, Yə́sus əyíím ádáŋana a pabálɛ́ɛg na a moyaa mó əʼkúu, əə́giim álɔɛgɛ Tɔsɔm Tólaŋ tó a Nɛlaamɛʼ nɛ́ Táán. Paaʼkan pə́ə́ŋ pá pówád na pábaan páyɛ́ɛ əgín ondáŋ na nyɔ́lɛ́,

²na pagɛ́ɛd tɛn pá Yə́sus yɛɛ́mánɛ mabámbany mɔ́ɔ́bɔn, aáŋɛ́ŋaŋ tɛn məŋun má mabɛ́ má máyɛ́ɛ na pɔ́lɛ́. Pagɛ́ɛd póob páyɛ́ɛ lɛ́, na Malɛ́a nyɔ́ páyɛ́ɛ agodɔ́ŋɔn tɛn lɛ́ Malɛ́a nyɔ́ a Magdala, nyɔ́lɛ́ nyɔ́ Yə́sus yɛɛ́ŋɛ́ŋ məŋun má mabɛ́ máʼtáan na mábaan a nkó yəəŋ,

³na Yowánaʼ oʼkán ó Siúsaʼ, mɔɔd nyɔ́ ayɛ́ɛ agodáŋananɛ pɛbán pɛ́ Ɛlóod, na Sosánaʼ, na pagɛ́ɛd tɛn pə́mmú piíŋ. Pagɛ́ɛd póob páyɛ́ɛ agɛɛ́banɛ Yə́sus na paaʼkan pə́ə́ŋ na nkə kɛ́ pígóodi.

⁴Pɔɔd páyɛ́ɛ náan miíi. Pə́yíím pádɛ́ɛman a pálɛ́ɛg ngim, kɛnɔ síɛ́ɛ́d a ɛbá ɛ́ Yə́sus. Aáság kubudə́əminini nkaʼtɛ́n yɛ́ɛnɛ, ɔnɔ́:

⁵«Mɔɔd nyummú aa nyóon ayɛ́ɛ́n əmisə masám a pɔlɛ́m puə́ŋ. Alɛ anɛ́ɛ́n kɔ əgumisə əə, masám mə́mmú mááság kɛɛn ədə́əŋ a ɛbá yɛ́ ngə́. Pɔɔd pə́ə́gíʼtən, pɛsag pɛánɛ́.

⁶Mə́mmú míídə́əŋ a kɛgon. Əgín ná mə́yúús, mɛ́ɛ́ság koyómbɛlɛd lɛ́ məní mádɛʼkɛ́ɛ a kɛnɔ kɛ́go kɛ́ɛg.

⁷Mə́mmú tɛn mídə́əŋ a kɛnɔ kɛ́ kɛ́yɛ́ɛ na nɛ́ngany. Ná mə́yúús, nɛ́ngany nɛ́ɛ́báʼkánan, niə́wííyi.

⁸Ngab yimmú anɛ́ɛ́n yiídə́əŋ a nsí ɛlaŋ. Mə́yúús, əʼtíŋ ə́múúm yəlíg yəlíg yəlíg, pɛcógód əʼtin áʼtáan, áʼtáan». Yə́sus yiíyíbə́ni ɔnɔ́: «Taa, wɛ nyɔ́ olɛɛ́ na ntóɛŋ ɛgoob, óyoob!»

⁹Paaʼkan pə́ə́ŋ pááság kumuŋíən lɛ́ áboyásɛnɛn nkaʼtɛ́n yɛ́ɛy.

¹⁰Náa ɔnɔ́ na pɔ́lɛ́: «Pəŋi, Táán amáboyɛ́ɛ́lɛ lɛ́ pólɛŋ pɛbán pɛ́ a Nɛlaamɛʼ niə́ŋ pɛ́ pɛ́lɛɛ́ a nuníb. Náa, a pɔsɔ́g pɛ́ndɛ́ŋ, páabodɛ́ananɛ pɛ́lɛ́ agá a poʼkaʼtɛ́n a mɔɛn agɛɛlɛ lɛ́ ɔmbɔ́ páásɛn əngis agodɛ́ʼtɛg, pádɛ́adála yoom. Ɔmbɔ́ pádám ntóɛŋ agoob, pádɛ́agoob yoom[44]»

¹¹«Táá yisí yɛ́ ɛlɛɛ́ a nkaʼtɛ́n yɛ́ɛy aa yɛ́ɛnɛ: Masám málɛ Tɔsɔm tó Táán.

¹²Ɛbá yɛ́ ngə́ yɛ́ masám mídə́əŋ kɔ, ɛ́lɛ pá pálɛɛ́ lɛ́ ná páagoob tɔsɔm tó Táán, Omɔlɛɔ́g əməʼkiim əgiig, áság kuliogi tó tóyɛ́ɛ toáʼkosɔd a ntɛ́m yɔɔbɔn agɛɛlɛ lɛ́ pə́diyə́líʼtíníí tólɛ́, pálɛŋ kɔɔy.

¹³Má mídə́əŋ a kɛgon málɛ pɔɔd pá pálɛɛ́ lɛ́ ná páagoob tɔsɔm tó Táán, pə́əsiəd tólɛ́ na tɔnyɔ́g. Náa, tódɛágón ngaŋ. Pə́əgəə́liʼtini tólɛ́ əgín ɛyaa ɛ́ kɛnɛŋ. Ná ntɔ́b yaáboóboan, páság kuliogi ongoo.

¹⁴Má mídə́əŋ a nɛ́ngany málɛ pɔɔd pá pálɛɛ́ lɛ́ páagoob Tɔsɔm. Náa moom móonɛ lɛ́ ɛságág, tugúm, kaag ɔʼtɛ́m a isóbín yɛ́ ɔlaa múdíədi Tɔsɔm lɛ́ toágon. Móabáʼkanan tólɛ́, túdiúm modámádám mó moágón.

¹⁵Má mídə́əŋ a nsí ɛlaŋ málɛ pɔɔd pá pálɛɛ́ na ntɛ́m ɛlaŋ, ntɛ́m ɛ sáád. Páagoob Tɔsɔm, páyaáyɛ́ngɛg tólɛ a ɔʼtɛ́m, pə́yəə́yíísi, tóság kuum.»

¹⁶«Mɔɔd ədiə́guug ɛláam lɛ́ ə́súʼkin na kɛlongá, ɔmbɔ́ lɛ́ ná yáag a mɔdɛ́gɛ́n yisí, ndóo. Aagɛɛdɛg agá yɛ́lɛ́ a mɔɛn agɛɛlɛ lɛ́ pá pɔ́ɔsɔd a yoog pádɛ́ʼtɛganan.

¹⁷Yiim yɛ́ ɛ́yɛ́ɛ a pɛɔsɛ́g ɛ́lɛ́ɛ́ kolon táán. Yɛ́ ɛ́lɛɛ́ a nuníb, pálɛ́ɛ́ kolɛŋ, ɛ́lɛ́ɛ́ kolon a kɛmoámoáŋ tə́ləə.

¹⁸Lóʼkɔ́dɔɔn anɛ́ɛ́n na nɛób nɛáŋan nɛ́ kɛbán. Kɛ́lɛ́ɛ́ kɛɛn lɛ́, nyɔ́ ogódíí, pə́yiʼkini komosáayɛnɛ agɛɛlɛ lɛ́ yɛ́ɛn na mólɛ́ ilubənən. Nyɔ́ oʼkódií, pə́yiʼkini komogábɛn ɔmbɔ́ əgín yɛ́ alɛɛ́ afɛga lɛ́ ogóódi.»

¹⁹Na ŋŋí na pomóŋŋí pá Yə́sus foáy kɛnɔ kɛ́ ayɛ́ɛ. Náa, ngə́ yɛ́ɛnɛ lɛ́ píig a ɛbá yə́ə́ŋ ɛdɛʼkɛ́ɛ kɔ lɛ́ kɛnɔ kɛ́yɛ́ɛ kɛdádáán na pɔɔd.

²⁰Náa páagɛɛn adɛ́anɛ pɔ́nɔ́ na Yə́sus: «Táá ŋŋí yaaŋ na pomóŋŋí pááŋ áa póonɛ pálɛɛ́ a táán, pálɛ anyɔ́ŋɛn kogoodála.»

²¹Əyíbuyúlísíni ɔnɔ́ na pɔ́lɛ́: «Taa, ŋŋí waam aa nyóonɛ. Pomóŋŋí páam aa póonɛ pálɛɛ́ pá páagoob tɔgɛ́ɛ́ tó Táán, páagɛɛlɛ wɔnɔ́ ná tólɛɛ́ əgusəə.»

²²Wɔɔ́s wúmmú, Yə́sus yɛɛ́bág a kɛʼkɔ́m na paaʼkan pə́ə́ŋ, ɔnɔ́ na pɔ́lɛ́: «Tɛ́yaagaan nsɛ́ɛ́ ɛ noom yɛ́ɛy káag.» Pááság kɛɛn.

²³Pálɛ anɛ́ɛ́n kɔ agoyaag a, ɛnɔ yááság kumuúsiəd. Kigud kiə́bə́ə́ kufiŋ kɔ na toɛn, məní mə́əgəə́suginə a kɛʼkɔ́m, wɔnɔ́ kiə́súʼkin.

²⁴Paaʼkan páyáyɛ́ʼtɛ́nɛ́ɛ́ a ɛbá yə́ə́ŋ, pááság kumuyóndigi, pɔ́nɔ́ na nyɔ́lɛ́: «Kɛlág óoó! Kɛlág wɛ! Tiə́gú o!» Aáság kondig, aásásɛ́dɛn kigud, , aásásɛ́dɛn tɛn puní pó noom. Moom móom muim moáság kodɔɔ, kɛnɔ wiiy.

²⁵Yiíŋíən na paaʼkan pə́ə́ŋ ɔnɔ́ əə: «Kaag koáŋan kó oʼto na mɛ kólɛ anɛ́ɛ́n ə́lə́ə́ ə́?» Náa, páyɛ́ɛ na wɛɛ́y. Páyɛ́ɛ əgəə́wúunəni kɛ́fɔlɛ́, pə́əgəə́ŋíənə kɔ pɔ́lɛ́ na pɔ́lɛ́, pɔ́nɔ́ əə: «Mɔɔd igə aa nyóonɛ ə́? Alɛ amaʼkosásɛdɛn ɔmbɔ́ kigud, ɔmbɔ́ puní pó noom, muim móamoyóbɛn[45]»

²⁶Páyɛ́ɛ́n alon a ɛbá ɛ́ noom, a nigúu nɛ́ Kɛlása nɛ́ nɛ́lɛɛ́ nsɛ́ɛ́ yɛ́ʼkáag ɛ Kalilə́ə.

²⁷Ná Yə́sus ayɛ́ɛ aándagaag ongoo a nsí lɛ́ ə́suu a kɛʼkɔ́m, mɔɔd nyummú o pálɛ́ɛg aáság kiim amoóboan. Mɔɔd ogo nyóon, uŋun wó ɔmbɛ́ óyɛ́ɛ əgumuyə́bi. Ayɛ́ɛ əə́ʼkubúlim mədúg miíŋ, adɛáyáágɛ́ɛ́ kilə́ə́ a nkó, oʼkɔɔ wə́ə́ŋ ungim əgín a pɛnɛngɛlɔ́ɔŋ, əmbúlím a yoog.

²⁸Ná yɛɛ́dála Yə́sus, yɛɛ́sásɛd nɛŋo a mɔɛn, əmíim əmudə́əŋənən a ambaan, ɔnɔ́ na nyɔ́lɛ́: «Əə́əy Yə́sus! Mɔɔ́n o Táán nyɔ́ alɛɛ́ a mɔɛmɔɛ́n! Nkə aa mbágoyɛ́ɛ́lɛ́nɛ ə́? Sɛ́gɔɔ Mbágoyɔ́sɔ́gɔ́lɔ́nɛ́ɛ́, a niiŋ nɛ́ Táán, odɛyɛ́nyɛɛ́ʼkɛn njəʼkə́nə́ní.»

²⁹Ayɛ́ɛ agosɔyɔ náan lɛ́ Yə́sus ayɛ́ɛ agosásan uŋun wó ɔmbɛ́ lɛ́ ólon a nkó yəəŋ. Uŋun wóow óyɛ́ɛ wósánɛ kɛnɛŋ údimunyígid. Óyɛ́ɛ lɛ́ ná wə́əmuúgumin, páyɛmoogóda ɔmbɔg na ambaan na pasɛŋ agɛɛlɛ lɛ́ adɛsán. Náa, ayɛ́ɛ aman kaágása pasɛŋ, uŋun wó ɔmbɛ́ wóow óság komoyɛ́ɛlɛ lɛ́ yɛ́ɛn a pɛnɔ pɛ́ pifələ́ə́n.

³⁰Yə́sus əyímuŋíən ɔnɔ́ əə: «Niiŋ nɛáŋ áa nɛ́ɛn ánɛ ə́?» Náa mɔɔd ɔnɔ́ na nyɔ́lɛ́: «Niiŋ nɛ́am aa nɛ́ɛn “Kiʼtúú” ». Kɛ́lɛ lɛ́ ayɛ́ɛ na kiʼtúú kilúd kɛ́ məŋun má mabɛ́.

³¹Məŋun má mabɛ́ móom mə́ə́bə́ə́ kɔɔ́sɔ́gɔlɔn Yə́sus lɛ́ adɛɛ́booŋɛ́ŋ laálá lɛ́ pɛ́ɛn a niɛ́ nɛ́ nɛ́lɛɛ́ miɛ́ɛ́ŋ a nsí.

³²Kɛyaa kɛ́ ubid ó pɔŋɔnɛá kɛ́yɛ́ɛ aníɛn kɔ áay a oʼkon a mɔɛn. Məŋun má mabɛ́ móom mə́ə́bə́ə́ kɔɔ́sɔ́gɔlɔn Yə́sus lɛ́ áboodom, pɔ́sɔd a pɔŋɔnɛá póob. Aáság kəə́liʼtini.

³³Náan aa məŋun móom mɛ́ɛ́lón a nkó ɛ mɔɔd, mámɛ́ɛn ɔsɔd a pɔŋɔnɛá. Ubid ó pɔŋɔnɛá ungim úyíím wə́ə́lis kɔ́gɔ́ɔg a oʼkon a mɔɛn, ómádágɛ́dɛ́ɛ́ a noom cuuum, puim puə́wú.

³⁴Ná pɔɔd pá páyɛ́ɛ a kinuŋ kɛ́ pɔŋɔnɛá póob pɛ́ɛ́dála nkə kɛ́ kɛ́yásánɛ́ɛ́, pɛ́ɛ́gádɛ́d na ɔʼtɛ́d agɛɛn a pálɛ́ɛg na a malɛ́m lɛ́ pɛ́ɛn adɛ́anɛ nkə kɛ́ɛg kiim kɛ́ kɛ́yásánɛ́ɛ́.

³⁵Pɔɔd pə́yíím pə́bugig əgiim adála nkə kɛ́ kɛ́yásánɛ́ɛ́. Ná pə́yíím əgiig kɛnɔ kɛ́ Yə́sus ayɛ́ɛ, pɛ́ɛ́bóan mɔɔd ogo nyóon nyɔ́ məŋun má mabɛ́ mɛ́ɛ́lón a nkó yəəŋ, alɛ kɔŋɛʼ, undəndínə́ə́n a ɛbá ɛ́ Yə́sus, na pilə́ə́ a nkó. Mədig mə́yíbusúú pɔ́lɛ́ piim a ambaan.

³⁶Pɔsɔ́g pá pɛ́ɛ́dála nkə kɛ́ kɛ́yásánɛ́ɛ́ wɔnɔ́ ná Yə́sus ayóómɛ mɔɔd nyóon nyɔ́ məŋun má mabɛ́ máyɛ́ɛ na nyɔ́lɛ́, pə́ə́bə́ə́ kubuúdəənən.

³⁷Náa pɔɔd piim pá a nigúu nɛ́ɛn pɔ́nɔ́ ná Yə́sus ásan, adɛndɔ́b kə́mmú áay a pɔ́lɛ́. Píísə́ə́ náan lɛ́ páyɛ́ɛ na wɛɛ́y kɛ́fɔlɛ́. Yə́sus aáság kobag a kɛʼkɔ́m agɛɛn.

³⁸Náa, mɔɔd nyóon nyɔ́ ayɛ́ɛ na məŋun má mabɛ́, ɔyɔ́sɔ́gɔ́lɔ́nɛ́ɛ́ Yə́sus lɛ́ ə́muudi nyɔ́lɛ́, ɔ́lɔb na nyóon. Yə́sus aáság kosáŋɛnɛ, ɔnɔ́ na nyɔ́lɛ́:

³⁹«Ndóo, úúli a noádɛʼ noáŋ, wɛ́ɛn agaáloaŋanan na pɔɔd nkə kiim kɛ́ Táán amɛ́ɛ́lɛ na wɛ aá.» Mɔɔd aáság kusiəd ngə́ əguúli. Ayɛ́ɛ agɛɛn əə́giim álɔɛgɛ a pálɛ́ɛg ngim, nkə kiim kɛ́ Yə́sus ayɛ́ɛ́lɛ na nyɔ́lɛ́.

⁴⁰Ná Yə́sus əyúúlíni nsɛ́ɛ́ ɛ noom yɛ́ɛy káag, pə́yímusíəd kɔ kɔŋɛʼ, na ɔmbɔg əngim lɛ́ ungim ayɛ́ɛ agomooboŋ.

⁴¹Mɔɔd nyummú niiŋ lɛ́ Siəyilúus aáság kiim alon. Ayɛ́ɛ nkúm ɛ yoog ɛ pɛɔ́sɔ́gɔ́lɔ́n yɛ́ a kɛnɔ kɛ́ɛg. Yiídə́ə́ŋə́nən Yə́sus a ambaan, əə́bə́ə́ komoyɔ́sɔ́gɔlɔn lɛ́ pɔ́lɛ́ pɛ́ɛn a noádɛʼ nuə́ŋ

⁴²lɛ́ ayɛ́ɛ na kɛmbóg kiə́ŋ kɛ́ mɔɔ́n nyɔ́ ɔʼkɛ́ɛd nyɔ́ ayɛ́ɛ abany, ayɛ́ɛ ɔɔ́ndɔɔʼkɔŋ kugu. Mɔɔ́n ogo ayɛ́ɛ ombódóm o pɛag pɛówád na pɛ́baan. Ná Yə́sus ayɛ́ɛ agɛɛn, ngə́ ngim yɛɛ́ʼtád na pɔɔd, páagaányɛŋ kaányɛ́ŋáán a nkó yəəŋ.

⁴³Ɔʼkɛ́ɛd nyummú ayɛ́ɛ kɔ. Ayɛ́ɛ aáʼkɛɛlɛ pɛag pɛówád na pɛ́baan na kɛbon aábany ɛdɛŋɛnɛʼ, maŋɔ́ másɔ́mɛg kuyúlə. Ayɛ́ɛ aáʼkɛɛlɛ pɛag pɛówád na pɛ́baan náan, aáyósag mɔɔnɛ́ miim má yiígóodi a mɔndɔʼ na ɛ́fɔlɛ́ ɛ́ pogóʼtonon, ɔdɛɔ́ŋ kɔŋɛʼ ɔmbɔ́ sɔɔŋ.

⁴⁴Ɔʼkɛ́ɛd nyóon ayáyɛ́ʼtɛ́nɛ́ɛ́ a ɛbá ɛ́ Yə́sus, a ngim yəəŋ, amágógɛ́lɛ́dɛ́ɛ́ a ɔmbɛb ó kilə́ə́ kiə́ŋ. Əgín tɛn ná ayágógɛ́lɛ́dɛ́ɛ́ a kilə́ə́ kɛ́ Yə́sus, koom aa kóog, maŋɔ́ mə́ndigi əguyúlə kə́mmú.

⁴⁵Yə́sus yiíŋíən ɔnɔ́ ə: «Ánɛ aa amɛ́ʼtɔ́bɛd?» Wɔnɔ́ ná ungim ayɛ́ɛ agaásáŋɛnanɛ lɛ́ adɛmodɔ́bɛdɛn, Píɛ əyímuŋíən ɔnɔ́ na nyɔ́lɛ́ ə: «Kɛlág, odɛɔ́gɔ agodála pɔɔd póonɛ pá pálɛɛ́ agaányɛŋ a nkó yaaŋ á?»

⁴⁶Náa, nyɔ́lɛ́ yiísə́ə́ ɔnɔ́: «Iyó, mɔɔd amɛ́ʼtɔ́bɛd. Mbááyóbɛ́ɛ́ wɔnɔ́ ná toɛn tóam toálón a nkó yaam.»

⁴⁷Ná ɔʼkɛ́ɛd yɛɛ́dála náan lɛ́ Yə́sus aáʼkomobándon, ayɛ́ɛ́n əmudə́əŋənən a ambaan, əə́liminə na wɛɛ́y kwag, kwag, kwag. Ayáloáŋánánɛ́ɛ́ kiim a udi ó mɔɔd ungim, a oʼto ó kɛbán igə aa nyɔ́lɛ́ ɔɔ́dɔ́bɛd Yə́sus, na wɔnɔ́ ná nyɔ́lɛ́ aáság koom kɔ áay kum a nsí.

⁴⁸Náa Yə́sus ɔnɔ́ na nyɔ́lɛ́: «Íyowó, tod kɔŋɛʼ á! Omɔ́ɔy lɛ́ omáág oʼto na mɛ.»

⁴⁹Yə́sus alɛ agosɔyɔ kɔ náan a, mɔɔd nyummú nyɔ́ a nó nkúm ɛ yoog ɛ pɛɔ́sɔ́gɔ́lɔ́n aáság kiim alon. Əyíím lɛ́ yíim amodɛ́anɛ lɛ́ mɔɔ́n əə́ʼkugu, ədiyíʼkíni kuyə́bi kɛlág kə́mmú.

⁵⁰Náa, ná Yə́sus ayóób tɔgɛ́ɛ́ tóod, yɛɛ́dɛánɛ agá na Siəyilúus ɔnɔ́: «Odɛʼtámmána aá, áág agá oʼto na Táán, mɔɔ́n waaŋ ogoom.»

⁵¹Ná ayɛ́ɛ́n əgiig a noádɛʼ, yiísiə́d əgín lɛ́ na Píɛ na Sɛ́aŋ na Sɛ́ag na sɛ a mɔɔ́n na ŋŋí a mɔɔ́n, pɔ́ɔ́sɔ́d a yoog. Ədiʼkə́əgəə́liʼtini lɛ́ mɔɔd na mɔɔd ɔ́sɔd kɔ na pɔ́lɛ́.

⁵²Ungim ayɛ́ɛ agolɛɛ, páagaányam a kidíídí kɛ́ moóngaa nyóon. Yə́sus aáság kusəə ɔnɔ́ na pɔ́lɛ́: «Podɛndɛ́ɛ́, moóngaa nyóonɛ ɔdɛɔ́gɔ uʼkuə́n, alɛ agá a ɛnɔ.»

⁵³Ná pɔɔd páyóób náan, pə́ə́bə́ə́ agá komoóŋɔnɔ lɛ́ pɛ́ɛ́lɛŋɛn lɛ́ alɛ uʼkuə́n.

⁵⁴Yə́sus aáság kugumin moóngaa a ombɔg, amámoodɔ́ŋɔn, ɔnɔ́: «Mɔɔ́n, tɛ́ɛ́mɛn aá!»

⁵⁵Moóngaa aáság kondig, aádɛ́ɛ́mɛn ŋwaád. Yiísə́ə́ lɛ́ púunə yoom ɛ́ konɛ, pámoyɛ́ʼkɛn, ánɛ.

⁵⁶Pa sɛ na ŋŋí a mɔɔ́n pɛ́ɛ́lɔ́b unuʼ ongás. Yə́sus ayɛ́boyáágánan mbaŋ ɔnɔ́ pádɛʼtɛánɛ na mɔɔd nkə kɛ́ɛnɛ kɛ́ kɛ́másánɛ́ɛ́.