Read Yambeta LÓʼKAS 9 Bible Online

LÓʼKAS 9 - Yambeta bible

LÓʼKAS 9

¹Yə́sus yɛɛ́gónyɛd paaʼkan pə́ə́ŋ pá pówád na pábaan, aáság koboyɛ́ʼkɛn nɛnom na toɛn tó koŋɛŋ məŋun má mabɛ́ miim, na tóonɛ lɛ́ mɔɔd alɛ abany páyɛmoyóómɛ.

²Ayɛ́boyɛ́ʼkɛn oʼtom lɛ́ pɛ́ɛn alɔɛgɛ Nɛlaamɛʼ nɛ́ Táán, páyoómanɛ pabámbany.

³Ayɛ́bodɛánɛ ɔnɔ́: «Poándagɛɛn, podɛnjábóŋɛ́náá moom. Pudisiə́d ɔmbɔ́ oʼtɔ́ŋ ó kodáŋana na wólɛ́, ɔmbɔ́ kɛbalɛ́ kɛ́ ongɛn. Pudisiə́d ɔmbɔ́ moom mó konɛ, ɔmbɔ́ mɔɔnɛ́. Mɔɔd adɛnjɛ́ɛ́n na pilə́ə́ pɛ́baan.

⁴Kɛnɔ kiim kɛ́ pumíig, noádɛʼ nó poɔ́sɔd a nólɛ́, púləndin kɔ agɛɛn əgiig a wɔɔ́s wó poádɛ́ɛmɛn agosan.

⁵Kɛnɔ kiim kɛ́ pə́dibuúsiədinií kɔŋɛʼ, lónáan a pálɛ́ɛg yɛ́ɛy pósan. Poándaasan, puə́gidə ummúndúŋ wó a ambaan yááŋan. Mbaŋ áa pomáboyáágánan náan.»

⁶Paaʼkan pááság kɛɛn. Páyɛ́ɛ əgiim pádáŋana a əʼkúu əngim, páalɔɛgɛ Tɔsɔm Tólaŋ, pə́əgiim póómanɛ pabámbany pɛnɔ piim.

⁷Ɛlóod nyɔ́ ayɛ́ɛ alaamɛ a Kalilə́ə ayóób nugəm nó Yə́sus na nkə kiim kɛ́ kɛ́yɛ́ɛ agaásan. Oʼto wə́ə́ŋ wɛ́ɛ́lɛáŋ lɛ́ ayóób pɔɔd pə́mmú pə́əsəə pɔ́nɔ́: «Sɛ́aŋ Ɔsɔgɛn pɔɔd aa əə́ʼkiiʼkini kiim yóndɛgɛɛ́.»

⁸Pə́mmú páyɛ́ɛ əgusəə pɔ́nɔ́: «Ɛlɛ́as aa əə́ʼkiiʼkini kiim álónɛ́ɛ́ a piíd.» Pə́mmú tɛn pɔ́nɔ́: «Ɔndɔɛgɛʼ pɛbán o Táán nyummú o kalaʼ aa əə́ʼkimií yóndɛg.»

⁹Náa Ɛlóod ɔnɔ́: «Mɛ, njɛ́ɛ́lɛ lɛ́ pásom Sɛ́aŋ oʼto. Náa, nyóonɛ anɛ́ɛ́n nyɔ́ ndɛɛ́ agoob pɔ́ɔsɔyɔ pɛbán piə́ŋ ə́ə, ánɛ aa alɛɛ́nɔ ə́?» Əə́bə́ə́ kuunə lɛ́ ná aádála Yə́sus.

¹⁰Ná pə́yímbuúlíni, pɔɔ́n pá maʼtom pə́ə́bə́ə́ kaáloaŋanan Yə́sus nkə kiim kɛ́ páyɛ́ɛ́lɛ. Əyə́suídíí na pɔ́lɛ́ a ɛbá, a noá nó a pálɛ́ɛg yimmú pɔ́ɔdɔ́ŋɔn lɛ́ Pɛdsáyída.

¹¹Pɔɔd pɛ́ɛ́lɛ́ŋ lɛ́ kɔ́gɔ́ɔg aa amɛ́ɛn, pááság kumuyə́ən kɔ, kiʼtúú kilúd. Yə́sus əyíbusiə́d kɔŋɛʼ, amáboyásɛ́nɛn nkə aa kɛ́lɛɛ́ Nɛlaamɛʼ nɛ́ Táán, amóómánɛ pabámbany pá páyɛ́ɛ əguunə koom.

¹²Wɔnɔ́ ná mbin ɛyɛ́ɛ yəə́ndədə́əŋ, paaʼkan pə́ə́ŋ pá pówád na pábaan páyáyɛ́ʼtɛ́nɛ́ɛ́ a ɛbá yə́ə́ŋ, pɔ́nɔ́ na nyɔ́lɛ́: «Tɛánɛ́ na pɔɔd póonɛ piim, pɛ́ɛnan. Pɛ́ɛn a moyaa mó əʼkúu mó mólɛɛ́ áanɛ ndúmiʼ, na pɛnɔ pɛ́ toádɛʼ tólɛɛ́, púunə kɛnɔ kɛ́ pálɛɛ́ pə́gubúlim, na nkə kɛ́ pálɛɛ́ págonɛ lɛ́ áanɛ tɛlɛ a kɛnɔ kɛ́ kifələ́ə́n.»

¹³Náa Yə́sus ɔnɔ́ na pɔ́lɛ́: «Íʼi, ɛ́boyɛ́ʼkɛ́naan moom mó konɛ pəŋibáamɔɛ́d, pánɛ!» Náa pɔ́nɔ́ na nyɔ́lɛ́: «Pəsi tigóódi pɛlɛ́ɛd pɛ́ʼtáan súg áanɛ, na pusú póbaan. Waanyɔ́ŋɛn lɛ́ pəsi aa tíɛnɛɛ́ awɛɛn moom mó konɛ agomɛ́nɛ ɛdám ɛ́ pɔɔd yɛ́ɛnɛ yiim ə?»

¹⁴Páyɛ́ɛ kɔ yoom wɔnɔ́ tɔ́ɔ́sɛn ɛ pɔɔd ɛ́ʼtáan. Náa Yə́sus ɔnɔ́ na paaʼkan pə́ə́ŋ: «Ɛ́bodɛánɛ́an pə́ləndin a pilí a pilí. Ɛ́nɛ́ kilí əʼtin a pɔɔd ábaan na pówád.»

¹⁵Pááság kɛɛlɛ wɔnɔ́ ná ayɛ́bodɛánɛ, pɔɔd pə́ə́ləndən.

¹⁶Yə́sus yiísiə́d pɛlɛ́ɛd pɛ́ɛb pɛ́ʼtáan na pusú póbaan, aábágɛ əngis a mɔɛn, amɛ́ʼkɛn pisoyidiʼ na Táán a moom móom, aábɛ́ŋa, amɛ́ʼkɛn na paaʼkan pə́ə́ŋ lɛ́ páaban ungim, ánɛ.

¹⁷Ungim yɛɛ́nɛ́, əə́yíid. Pɛbɛŋ pɛ́ pɛ́ɛ́lɔ́b, pɛ́ɛ́gómmánɛ, piə́yə́ə́g mɔsaŋɛʼ mówád na móbaan[46]

¹⁸Wɔɔ́s wúmmú, Yə́sus əyə́suídíí na paaʼkan pə́ə́ŋ a ɛbá ɔgɔɔ́sɔ́gɔlɔn Táán. Náa əə́buŋíən ɔnɔ́ əə: «Kɛnɛŋ kɛ́ pɔɔd pálɛ agosɔyɔ, pálɛ əgusəə lɛ́ ndɛ ánɛ ə́?»

¹⁹Pááság kumuyúlisini pɔ́nɔ́: «Pálɛ əgusəə lɛ́ olɛ Sɛ́aŋ Ɔsɔgɛn pɔɔd. Pɔsɔ́g pə́mmú pɔ́nɔ́, olɛ Ɛlɛ́as. Pə́mmú tɛn pɔ́nɔ́ ɔndɔɛgɛʼ pɛbán o Táán nyummú o kalaʼ aa əə́ʼkiiʼkini kiim yóndɛgɛɛ́ a piíd.»

²⁰Náa ɔnɔ́ na pɔ́lɛ́: «Oo, a nɛáŋan nɛ́ pəŋibáamɔɛ́d anɛ́ɛ́n ə́ə, poɔʼkɔ́ ndɛ ánɛ ə́?» Píɛ əyímuyúlísíni ɔnɔ́: «Olɛ Məsíi nyɔ́ Táán əmíim ádom.»

²¹Ná Píɛ yiísə́ə́ náan, Yə́sus aáság koboyááganan mbaŋ na toɛn, ɔnɔ́ pádɛʼtɛánɛ náan na mɔɔd wɛndɛ́ŋ.

²²Ayɛ́ɛ́n na tɔgɛ́ɛ́ yuudi, ɔnɔ́ na pɔ́lɛ́: «Mɛ Mɔɔ́n o mɔɔd, nkóódi lɛ́ nnɛ ntɔ́b kɛ́fɔlɛ́. Pasaá pá nigúu na puʼkúm pó payaaganɛʼ pɛfɔny, na palɛŋ pɛcɛm pálɛ́ɛ́ kiʼtəm, páyɛnjoon. Náa, mɔɔ́s mádáád a ngim yɛ́ɛy yɛ́ páagɛnjoon, ndəgiiʼkini kiim ndon a kəəniʼ ongóm.»

²³Náa ɔnɔ́ na ungim nyɔ́ ayɛ́ɛ kɔ áay: «Mɔɔd əməʼkusəə lɛ́ əəginjə́ən, óliogi ɔʼtɛ́m na nyɔ́lɛ́nyɔ́amɔɛ́d, yə́lúú ɔmbásá wə́ə́ŋ mɔɔ́s miim ná yíim anɛ́ɛ́n yínjə́ən.

²⁴Kɛ́lɛ lɛ́, wɛ nyɔ́ wɔʼkɔ́ wamaʼkanɛ ɔlaa wááŋ, olɛ́ɛ́ koʼtaŋ wólɛ́. Kɔmɔɛ́d lɛ́ wɛ nyɔ́ olɛ́ɛ́ koʼtaŋɛɛ́ ɔlaa wááŋ a kidíídí kɛ́am, wɛ nyóon aa olɛ́ɛ́ kɔɔyɛɛ́.

²⁵Mɔɔd amaʼkɛɛn na tugúm tuim tó a nsí náa nyɔ́lɛ́nyɔ́amɔɛ́d alɛɛ́ undióŋóón, ɔmbɔ́ lɛ́ usulə́ə́n məní, ná amɛ́ɛ́lɛ nkə aa nyóon əə́?

²⁶Mɔɔd amaʼkɛɛn lɛ́ aagoob oʼto kono na mɛ, aágaáŋa na tɔgɛ́ɛ́ tóam, mɛ Mɔɔ́n o mɔɔd ndɛ́ɛ́ tɛn koob oʼto kono na nyɔ́lɛ́ ná ndɛ́ɛ́ kimbuúlinií a nugəm nóam, na a nó Paabá na nó pəfúfúŋ pá məŋun má maʼtom.

²⁷A fɔ́lɔ́b ndabodɛ́anɛ lɛ́, a pəŋi póonɛ pá polɛɛ́ póob, pə́mmú pálɛ kɔ pá pádɛndɛ́ɛ́ kugúú ná pádɛ́ʼtála Nɛlaamɛʼ nɛ́ Táán.»

²⁸Náan aa, yoom ɛ́ sɔ́ndɛʼ mmuʼ a ngim yɛ́ɛy yɛ́ yɛɛ́sɔ́yɔ náan, Yə́sus yiísiə́d lɛ́ na Píɛ, na Sɛ́aŋ, na Sɛ́ag, aábág na pɔ́lɛ́ a oʼkon a mɔɛn agɛɛn ɔgɔɔ́sɔ́gɔlɔn Táán.

²⁹Alɛ anɛ́ɛ́n kɔ a pɛɔ́sɔ́gɔ́lɔ́n ɔ, udi wə́ə́ŋ wááság kaágasɛ, pilə́ə́ piə́ŋ fúlúʼtúʼtúʼtú, píəmənyə, kumənyə́ə́n.

³⁰Nto ɛ pɔɔd ɛ́baan foáy kɔ lɛ́ na Moyíis, na Ɛlɛ́as, pálɛ agosɔyɔ na nyɔ́lɛ́.

³¹Páyɛ́ɛ agodɛ́ʼtɛganan əgín nugəm na nugəm, pɔ́ɔsɔyɔ na Yə́sus wɔnɔ́ ná aándagɛɛnɛɛ́ əyibəni oʼtom wə́ə́ŋ a Yolósalɛm.

³²Na Píɛ, na pɔsɔ́sɔ́g pə́ə́ŋ páyɛ́ɛ páʼkosan ɛnɔ tɔ́g. Ná pə́yíím póndig, pááság kodála wɔnɔ́ ná Yə́sus alɛɛ́ a nugəm a kaadɛ, pɔɔd póob pábaan padɛ́lɛ́máán a ɛbá yə́ə́ŋ.

³³Ná pɔɔd póob páyɛ́ɛ pándagaádanan na Yə́sus, Píɛ yiísə́ə́ ɔnɔ́ na nyɔ́lɛ́: «Kɛlág, kɛ́lɛ kɔŋɛʼ lɛ́ tɛ́lɔb áanɛ. Tɛabowáagɛn piób pɛ́dáád lɛ́, wɛ kímuʼ, Moyíis kímuʼ, Ɛlɛ́as kímuʼ.» Píɛ adɛʼkɛ́ɛ agolɛŋ nkə kɛ́ɛg kɛ́ ayɛ́ɛ əgusəə.

³⁴Alɛ anɛ́ɛ́n kɔ na tɔgɛ́ɛ́ a unuʼ ə, kɛbɛd kɛáság kubuyə́súʼkinin, wɛɛ́y wə́ə́gumín paaʼkan.

³⁵Nɛŋo níyíím nɛ́lon kɔ a kɛbɛd kɛ́ɛg a kaadɛ, nɛɔ́nɔ́: «Taa, nyóonɛ alɛ mɛ Mɔɔ́n nyɔ́ mbííyid, pómoyóóbɛn aá[47]!»

³⁶Ná nɛŋo nɛ́ɛn nɛ́ɛ́mán kosɔyɔ, pɛ́ɛ́dála agá Yə́sus aándɛ nyɔ́lɛ́nyɔ́əsíŋ, fiɛ́d mɔɔd kə́mmú a ɛbá yə́ə́ŋ. A kɛnɛŋ kɛ́go kɛ́ɛg, paaʼkan pádɛʼkádɛ́anɛ kɛbán na kɛbán na mɔɔd. Nkə kiim kɛ́ pɛ́ɛ́dála páyáyɛ́ngɛ́gɛ́ɛ́ a ɔʼtɛ́m.

³⁷A koany kaáyɛnɛ, ná pə́yíím pə́suu oʼkon, kiʼtúú kɛ́ pɔɔd kíyíím əgəə́bun na Yə́sus.

³⁸Mɔɔd nyummú kɔ a kiʼtúú kɛ́ɛg ayáág nɛŋo, ɔnɔ́: «Kɛlág, mbágoyɔ́sɔ́gɔ́lɔ́nɛ́ɛ́: Táá mɛ mɔɔ́n, kɛmbóg kɛ́am!

³⁹Alɛ na ombod wó uŋun wó ólɛɛ́ lɛ́ úməʼkumuúgumin, əə́bə́ə́ kaányam, wáamoofóga, kɛngɔŋ kɛ́amoyóo. Alɛ údiə́bísígíí kumuúlis, súʼtə́ə́ əgín wáʼkoman komoóyɔgɛlɛdanɛ.

⁴⁰Mbɔ́sɔ́gɔ́lɔ́nɛ́ɛ́ paaʼkan pááŋ lɛ́ pɛ́ŋŋɛ́ŋɛn uŋun wóow, pámáfɛ́gɛ́ɛ́ pádɛáʼkɛ.»

⁴¹Yə́sus ayáfɛ́mɛ́ɛ́, ɔnɔ́ na pɔ́lɛ́: «Pəŋi ɔsɛg wóonɛ wó podɛágaágɛ́ɛ́ oʼto na Táán, polɛ pabɛ́ a las! Kíəguunə lɛ́ nyɛ́ɛn na pəŋi agɛɛn əgiig súʼtə́ə́ naanɛ́g? Nkóódi lɛ́ mpoonóʼtan kə́mmú súʼtə́ə́ naanɛ́g? Mɛ́ɛn áanɛ na mɔɔ́n waaŋ.»

⁴²Əgín pɔ́nɔ́ píim əgiig na moóngaa a udi ó Yə́sus, uŋun wááság komonyáŋɛn, ómámodɔɛ́d nwág a nsí, ómámofógɛd na toɛn. Yə́sus yɛɛ́sásɛ́dɛn uŋun wó ɔmbɛ́ wóow, amóómɛ moóngaa, əmə́musiə́d əgumuyúúlisi na sɛ.

⁴³Ungim ayáyáágɛ́ɛ́ ɔmbɔg a oʼto, pə́əgəə́wúunəni wɔnɔ́ ná Táán alɛɛ́ na toɛn. Wɔnɔ́ ná ungim ayɛ́ɛ əgəə́wúunəni na nkə kɛ́ ayɛ́ɛ agɛɛlɛ, aáság kusəə ɔnɔ́ na paaʼkan pə́ə́ŋ:

⁴⁴«Lɛŋáan koob nkə kɛ́ɛnɛ kɛ́ mbándabodɛ́anɛɛ́ nɛ́gɔŋ. Kɛ́lɛ lɛ́: Pálɛ́ɛ́ kiʼkumin, mɛ Mɔɔ́n o mɔɔd, páyɛndɛg.»

⁴⁵Kɛbán kímuʼ paaʼkan pádɛʼkɛ́ɛ agoob yisí yɛ́ ɛyɛ́ɛ a tɔgɛ́ɛ́ tóod. Táán ayɛ́boyɔ́sɛ́gɛn yɛ́lɛ́ agɛɛlɛ lɛ́ pádɛnjóób yoom. Pɛ́ɛ́dámmána kuŋíən Yə́sus kɛbán na kɛbán.

⁴⁶Paaʼkan páyɛ́ɛ asáŋa agolɛŋ ánɛ a ondáŋ wɔ́ɔ́bɔn aa amáábɛ́gɛn pɔsɔ́g ombɔg a oʼto!

⁴⁷Yə́sus yɛɛ́lɛ́ŋ nkə kɛ́ páyɛ́ɛ əgəə́ŋíənə kɔ a ntɛ́m yɔɔbɔn a kaadɛ. Yiísiə́d ɛyaa ɛ́ moóngaa, əmə́mudə́nígi a ɛbá yə́ə́ŋ,

⁴⁸náa ɔnɔ́ na pɔ́lɛ́: «Nyɔ́ əə́siəd moóngaa wɔnɔ́ nyóonɛ kɔŋɛʼ a niiŋ nɛ́am, mɛɛ́nyɔ́amɔɛ́d áa əmísiə́d náan kɔŋɛʼ. Nyɔ́ əmísiə́d mɛ kɔŋɛʼ, əə́siəd tɛn kɔŋɛʼ nyɔ́ əyíím yɛ́ʼtom. Kɛ́lɛ lɛ́, nyɔ́ alɛɛ́ iyənjə́g ɛ́ las a kɛgaágadɛ kɛáŋan, nyóon aa amáábɛ́gɛn pɔsɔ́g ombɔg a oʼto.»

⁴⁹Náa Sɛ́aŋ əə́siəd tɔgɛ́ɛ́, ɔnɔ́ na nyɔ́lɛ́: «Paabá, tɛádála mɔɔd nyummú kága aáŋɛ́ŋan məŋun má mabɛ́ a niiŋ nɛáŋ. Tɛmaʼkayɛ́mosáŋɛ́nɛ́nɛ lɛ́ tɛɔʼkɔ́ ɔdɛɔ́gɔ mɔɔd nyɔ́ alɛɛ́ a ondáŋ wə́ə́s.»

⁵⁰Yə́sus əyímuyúlísíni ɔnɔ́ na nyɔ́lɛ́: «Ndóo, podɛyɛ́mosáŋɛ́nɛ́nɛ lɛ́, nyɔ́ adɛáboónɔɛyɛɛ́, nyóon alɛ a ngim yaaŋan.»

⁵¹Ná kɛnɛŋ kɛ́ Yə́sus kodɛ́ɛmɛn a nsí yɛ́ɛnɛ agobag a mɔɛn kɛ́yɛ́ɛ kɛándagaáyɛʼtanɛ, yɛɛ́nóm ɔʼtɛ́m, əə́siəd ngə́ agobag a Yolósalɛm.

⁵²Yɛɛ́yáŋ ədə́əmini pɔɔd agodom yuudi. Pɔɔd póob páyɛ́ɛ́n, pámɛ́ɛn alon a nigúu nímmú nɛ́ a Səməlíi lɛ́ ná pósóboni wɔnɔ́ ná nyɔ́lɛ́ əə́ndədíin yimií.

⁵³Náa, pɔɔd pá a nigúu nɛ́ɛn pááság kosáŋɛnɛ kusiəd Yə́sus kɔŋɛʼ, lɛ́ wɔnɔ́ ná alɛɛ́ lɛ́ agɛɛn a Yolósalɛm, ásan mbámbáŋ, adɛʼtɛ́lɛm a pɔ́lɛ́.

⁵⁴Ná paaʼkan pə́ə́ŋ, pa Sɛ́ag pɔ́lɛ́ na Sɛ́aŋ páyóób náan, páyɛ́modɛánɛ pɔ́nɔ́: «Sə́dúk, waányɔ́ŋɛn lɛ́ tíɛlɛ yug ɛ́gásɛg a mbálámɔɛn, ɛ́man kubusíŋini ə?»

⁵⁵Náa, nyɔ́lɛ́ aáság koboyágasɛnɛ, əə́bə́ə́ kobosásan.

⁵⁶Pááság kuyə́ən ngə́ yɔɔbɔn, pámɛ́ɛn a nigúu nɛ́ndɛ́ŋ.

⁵⁷Ná páyɛ́ɛ pándɛ a ngə́, mɔɔd nyummú yɛɛ́dɛánɛ ɔnɔ́ na Yə́sus: «Sə́dúk, kɛnɔ kiim kɛ́ waágɛɛn, mɛ ndəguyə́ən kɔ.»

⁵⁸Náa Yə́sus ɔnɔ́ na nyɔ́lɛ́: «Pɛyɛɛ́njɛ́m pígóódi pɛbaŋ pɛ́ pɛ́agɛɛ́mɛŋan kɔ, pɛsag na aŋŋany. Kɔmɔɛ́d lɛ́ mɛ Mɔɔ́n o mɔɔd ntigóodi əgín ɔmbɔ́ kɛnɔ kɛ́ nyíngigií oʼto agɛɛlɛ lɛ́ nyóoyig.»

⁵⁹Aáság kaágasɛ ná sɔ́g wɛndɛ́ŋ alɛɛ́, ɔnɔ́ na nyɔ́lɛ́: «Wɛ, mɛ́ɛn wínjə́ən.» Nyóon əyímuyúlísíni ɔnɔ́ na nyɔ́lɛ́: «Sə́dúk sɛ́gɔɔ, yaŋ kiʼti nyɛ́ɛn əni sɛ waam.»

⁶⁰Náa Yə́sus ɔnɔ́ na nyɔ́lɛ́: «Ndóo, wɛ tí pɛlóŋ píniəŋən pɛlóŋ pɛɔ́bɔn. Náa, wɛ tod alɔɛgɛ Nɛlaamɛʼ nɛ́ Táán.»

⁶¹Sɔ́g nyummú tɛn aáság kusiəd tɔgɛ́ɛ́, ɔnɔ́ na Yə́sus: «Sə́dúk, mɛ ndəguyə́ən. Náa kɛbán kímuʼ, yaŋ kiʼti nyɛ́ɛn agaábɛ́g yoog yaam ɛ pɔɔd.»

⁶²Náa Yə́sus ɔnɔ́ na nyɔ́lɛ́: «Lɛŋ lɛ́, mɔɔd nyɔ́ əə́ʼkuguminií ɛsóó Əgəə́bə́ə pigólí, náa alɛɛ́ əgiiʼkini kəə́búʼkən ngim, nyóon ɔdɛɔ́gɔ nyóonɛ lɛ́ yɛ́ɛlɛ pigólí pɛ́ a Nɛlaamɛʼ nɛ́ Táán.»