Read Yambeta Sɛ́aŋ 1 Bible Online

Sɛ́aŋ 1 - Yambeta bible

Sɛ́aŋ 1

¹Kɔ a niə́bə́ə ná Táán ayɛ́ɛ́lɛ moom muim, Nɔgɛ́ɛ́ nóyɛ́ɛ noándɛ kɔ kalaʼ. Nóyɛ́ɛ a ɛbá ɛ́ Táán. Nólɛ́ nɔmɔɛ́d nóyɛ́ɛ Táán.

²A niə́bə́ə, Nɔgɛ́ɛ́ aa nóyɛ́ɛ a ɛbá ɛ́ Táán[1]

³Yiim yɛ́ Táán ayɛ́ɛ́lɛ, a nólɛ́ aa ɛ́yáyɛ́lɛ́ɛ́. Ímuʼ na ímuʼ yɛ́ ɛ́yáyɛ́lɛ́ɛ́ fiɛ́d nólɛ́ kusəə, ɛ́dɛɔ́gɔ[2]

⁴A nólɛ́ aa yoom yiim ɛ́yɛ́ɛ na ɔlaa. Ɔlaa wóow aa úyíímín pɔɔd na kisəə.

⁵Kisəə kɛ́yɛ́ɛ agonom a mbin a kaadɛ, mbin ɛdɛáʼkɛ kuwíiyi.

⁶Táán əyíím ádom mɔɔd niiŋ lɛ́ Sɛ́aŋ.

⁷Sɛ́aŋ əyíím lɛ́ yáágɛn kisəə mbaasɔ́ agɛɛlɛ lɛ́ ungim yáag oʼto na Táán a oʼto wó mbaasɔ́ yəəŋ.

⁸Sɛ́aŋ adɛʼkɛ́ɛ nyɔ́lɛ́nyɔ́amɔɛ́d kisəə, ndóo. Əyíím agá lɛ́ yáágɛn kisəə mbaasɔ́.

⁹Nɔgɛ́ɛ́ áa nóyɛ́ɛ kisəə kɛ́ fɔ́lɔ́b. Kɛ́lɛ́ kíyíím a nsí yɛ́ɛnɛ lɛ́ ná kɛ́nomɛn pɔɔd piim.

¹⁰Nɔgɛ́ɛ́ nóyɛ́ɛ a nsí yɛ́ɛnɛ. Na nólɛ́ aa Táán ayɛ́ɛ́lɛ yiim. Kɛbán kímuʼ, pɔɔd pá a nsí pə́yímuúʼtə́m.

¹¹Nɔgɛ́ɛ́ núyíím ná ndɛg yəəŋ ɛlɛɛ́, pɔ́lɛ́ pə́mə́yiin kumuúsiəd.

¹²Kɛbán kímuʼ, pá pə́yímusíəd kɔŋɛʼ, pá páyáág oʼto a nyɔ́lɛ́, ayɛ́boyɛ́ʼkɛn toɛn lɛ́ páán pɔɔ́n pá Táán.

¹³Pə́diʼkə́əgəə́bíən wɔnɔ́ ná ándɛ pɔɔd pə́əgəə́bíənilə, áay lɛ́ a nɛ́ pumog, ndóo! Táán nyɔ́lɛ́nyɔ́amɔɛ́d áa amɛ́ɛ́lɛ lɛ́ páán pɔɔ́n pə́ə́ŋ.

¹⁴Nɔgɛ́ɛ́ nóyáán mɔɔd, nuə́ləndin a kɛgaágadɛ kiə́s. Nólɛ na ɔʼtɛ́m ólaŋ a kúfuʼ, na fɔ́lɔ́b. Tɛádála nugəm nuə́ŋ[3], nugəm nó Táán Sɛ amɛ́ʼkɛn na kɛmbóg kiə́ŋ kɛ́ Mɔɔ́n.

¹⁵Kɛbán kiə́ŋ áa Sɛ́aŋ ayɛ́ʼkɛn mbaasɔ́ yɛ́ɛnɛ, aálɔɛgɛ nɛŋo a mɔɛn ɔnɔ́: «Mɔɔd alɛ kɔ nyɔ́ alɛɛ́ əgiim a ngim yaam, amɛ́nyaábɛ́gɛn ombɔg a oʼto lɛ́ nyɔ́lɛ́ ayɛ́ɛ aándɛ kɔ ná ɔmbɔ́ kimbíən pə́díyímbíən.»

¹⁶A kɔdɛ́ɛ ɔʼtɛ́m kuə́ŋ, amábɛyɛ́ɛ́lɛ pəsi piim kɔŋɛʼ. Amábɛsáʼtánan kólɛ́ kɛbɛsáʼtánáán.

¹⁷Na Moyíis aa Táán ayɛ́bɛyɛ́ʼkɛn pɛcɛm piə́ŋ. Náa na Yə́sus Kilíʼtus aa mawɔʼ na fɔ́lɔ́b imə́biyíímin.

¹⁸Mɔɔd ɔmbɔ́ úmmuʼ na úmmuʼ adɛ́ʼtála Táán na əngis[4] Kɛbán kímuʼ, Kɛmbóg kiə́ŋ kɛ́ Mɔɔ́n kɛ́ kɛ́lɛɛ́ kɔ a ɛbá ɛ́ Sɛ, kɛ́lɛ́ kɛmɔɛ́d tɛn Táán, kɛ́lɛ́ aa kɛ́mɛ́ɛ́lɛ lɛ́ pəsi tɛ́lɛŋ Sɛ.

¹⁹Ná pasaá pá Yúdɛn pɛ́ɛ́dóm payaaganɛʼ pɛfɔny pə́mmú a Yolósalɛm, na pɔɔd tɛn pá a palaa Lə́fi lɛ́ pɛ́ɛn əŋíən na Sɛ́aŋ əə, alɛ ánɛ ə́? Mbaasɔ́ yɛ́ yiídə́ə́míni aa yɛ́ɛnɛ.

²⁰Adɛʼkáaboyɔ́ɔsɛgɛn kɛbán na kɛbán. Ayɛ́bodɛánɛ sáád, ɔnɔ́: «Mɛ, ntɛɔ́gɔ Məsíi.»

²¹Pááság kumuŋíən pɔ́nɔ́ na nyɔ́lɛ́: «Olɛ anɛ́ɛ́n ánɛ ə́? Ɛlɛ́as oóm?» Náa ɔnɔ́ na pɔ́lɛ́: «Ndóo óo, ntɛɔ́gɔ Ɛlɛ́as.» Pááság kiiʼkini kumuŋíən pɔ́nɔ́: «Ooo, olɛ anɛ́ɛ́n ɔndɔɛgɛʼ pɛbán o Táán nyɔ́ tɛlɛɛ́ agobóŋan əə́?» Náa ɔnɔ́ na pɔ́lɛ́: «Ndóo.»

²²Náa pə́əmuŋíən pɔ́nɔ́ əə: «Ooʼó, olɛ anɛ́ɛ́n ánɛ ə́? Ɛ́bɛdɛánɛ wɛɛ́nyɔ́amɔɛ́d ánɛ aa olɛɛ́, ná tíɛn adɛ́anɛ na pá pámábɛɛdóm.»

²³Əyíbuyúlísíni ɔnɔ́: «Mɛ ndɛ nɛŋo nɛ́ nɛ́lɛɛ́ asáŋa a nigúu nɛ́ nifələ́ə́n, nɛɔ́nɔ́: “Sóbíníən pungə́ pó Sə́dúk óo! Nkə kɛ́go kɛ́ Ɛsayíi, ɔndɔɛgɛʼ pɛbán o Táán yiídílə aa kɛ́ɛg.” »

²⁴Pɔɔd póob pá pə́yíím pádom páyɛ́ɛ Pafalɛsɛyɛ́ɛŋ.

²⁵Pə́yíʼkíni kuŋíən na Sɛ́aŋ pɔ́nɔ́ əə: «Wɛ, odiɛn anɛ́ɛ́n ɔmbɔ́ Məsíi, odiɛn Əlíi, odiɛn tɛn ɔmbɔ́ ɔndɔɛgɛʼ pɛbán o Táán; a igə aa olɛɛ́ agosɔgɛna anɛ́ɛ́n pɔɔd əə́?»

²⁶Sɛ́aŋ əyíbuyúlísíni ɔnɔ́ na pɔ́lɛ́: «Mɛ, əgín na məní má məní aa ndɛɛ́ agosɔgɛna pɔɔd. Kɔmɔɛ́d lɛ́ pugóódi mɔɔd a kɛgaágadɛ kɛáŋan nyɔ́ pondɛŋɛnɛɛ́.

²⁷Alɛ əgiim a ngim yaam. Ntiigin ɔmbɔ́ nyóonɛ lɛ́ mbodɛm əgumuyóndin palábá a ambaan.»

²⁸Nkə kɛ́ɛg kiim kɛ́yɛ́ɛ agaásan a Pɛʼtaníi, nsɛ́ɛ́ yɛ́ɛy káag ɛ noom nó Siuludɛ́ɛŋ. Noom nó Sɛ́aŋ ayɛ́ɛ agosɔgɛna pɔɔd kɔ.

²⁹A koany kaáyɛnɛ, Sɛ́aŋ aáság kodála Yə́sus əə́giim ná nyɔ́lɛ́ alɛɛ́. Náa ɔnɔ́: «Taa, ogo aa nyóon oo, Mɔɔ́n o nodóm o Táán. Nyɔ́lɛ́ aa oóliogi mabɛ́ má pɔɔd piim pá a nsí[5]

³⁰Kɛbán kiə́ŋ áa njɛ́ɛ əgusəə nyɔʼkɔ́: “Mɔɔd alɛ kɔ nyɔ́ alɛɛ́ əgiim a ngim yaam, amɛ́nyaábɛ́gɛn ombɔg a oʼto lɛ́ nyɔ́lɛ́ ayɛ́ɛ aándɛ kɔ ná ɔmbɔ́ kimbíən pə́díyímbíən.”

³¹Ɔmbɔ́ mɛɛ́nyɔ́amɔɛ́d ntɛ́ʼkóolɛŋɛn lɛ́ nyɔ́lɛ́. Náa, ɔsɔgɛn wóonɛ wó ndɛɛ́ agɛɛlɛ a məní, a oʼto wə́ə́ŋ áa njíím lɛ́ nyɛ́ɛlɛ wólɛ́, ná pɔɔ́n pá Ɛ́sɛlayɛl pámoólɛŋ kɔŋɛʼ.»

³²Sɛ́aŋ əyíʼkíni kɛɛ́ʼkɛn mbaasɔ́ yɛ́ɛnɛ, ɔnɔ́: «Nyɛɛ́dála Uŋun wó Ufúlúʼtú wə́əgiim úsuu a mɔɛn wɔnɔ́ kiɛm, wááság komoláʼtɛmɛn a nkó[6]

³³Náa mɛ, ntɛ́ʼkóolɛŋɛn lɛ́ nyɔ́lɛ́. Náa, nyɔ́ ayɛ́ʼtóm lɛ́ nyíim asɔgɛna pɔɔd na məní, nyɔ́lɛ́ aa ayɛ́ʼtɛánɛ lɛ́ mɔɔd nyɔ́ ndɛ́ɛ́ kodála Uŋun wó Ufúlúʼtú wə́əgiim úsuu, óság komoláʼtɛmɛn a nkó, ndɛŋ lɛ́ nyɔ́lɛ́ ogo nyɔ́ alɛ́ɛ́ kosɔgɛnɛɛ́ pɔɔd na Uŋun wó Ufúlúʼtú aa nyóon.

³⁴Mɛ mbádála na mɛ əngis, mbáág anɛ́ɛ́n mbaasɔ́ lɛ́ alɛ Mɔɔ́n o Táán óo.»

³⁵A koany kaáyɛnɛ, Sɛ́aŋ yiíligi kɔ áay na paaʼkan pə́ə́ŋ pə́mmú pábaan.

³⁶Ná yɛɛ́dála Yə́sus aásan, əə́bə́ə́ kosɔyɔ, ɔnɔ́: «Taa, ogo aa nyóon oo, Mɔɔ́n o nodóm o Táán!»

³⁷Əgín tɛn ná paaʼkan pə́ə́ŋ póob pábaan páyóób nkə kɛ́ yiísə́ə́, pááság kodɛ́ɛmɛn əguyə́ən Yə́sus.

³⁸Ná Yə́sus əyə́búʼkíníí, aáság kodála lɛ́ pálɛ əgumuyə́ən, əyíbuŋíən ɔnɔ́: «Nkə aa poányɔ́ŋɛn əə́?» Náa pɔ́nɔ́ na nyɔ́lɛ́: «Ɛlábiʼ, tiəguunə kolɛŋ kɛnɔ kɛ́ olɛɛ́.» (Ɛlábiʼ ɛlɛ lɛ́: «Kɛlág.»)

³⁹Náa Yə́sus ɔnɔ́ na pɔ́lɛ́: «Mɛ́naan, poadála.» Pááság kɛɛn na nyɔ́lɛ́, páádála kɛnɔ kɛ́ ayɛ́ɛ. Ayɛ́ɛ aándɛ yoom wɔnɔ́ mangɛn mə́niʼ má wɔɔ́s. Pííyíbə́nən wɔɔ́s wóow na nyɔ́lɛ́.

⁴⁰A paaʼkan póob pábaan pá páyóób nkə kɛ́ Sɛ́aŋ yiísə́ə́, pááság kuyə́ən Yə́sus, nyummú ayɛ́ɛ niiŋ lɛ́ Əndələ́ə, móŋŋí o Simɔ́ɔŋ Píɛ.

⁴¹Náan aa Əndələ́ə yɛɛ́yáŋ əguunə əgín kɛnɔ kɛ́ móŋŋí alɛɛ́, ɔnɔ́ na nyɔ́lɛ́: «Tɛmɔ́ɔ́ŋ Məsíi.» (Niiŋ nɛ́ɛn nɛ́ Məsíi nɛ́lɛ lɛ́ «Kilíʼtus, áay lɛ́ Nyɔ́ Táán ayásóŋɛ́ɛ́ lɛ́ álaamɛ a pɛnɛŋ piim.»)

⁴²Aáság kumuúsiəd agɛɛn na nyɔ́lɛ́ kɛnɔ kɛ́ Yə́sus alɛɛ́. Ná pə́yííg kɔ, Yə́sus aáság kubisin Simɔ́ɔŋ əngis, náa ɔnɔ́ na nyɔ́lɛ́: «Olɛ Simɔ́ɔŋ, mɔɔ́n ó Sɛ́aŋ. Nɛ́gɔŋ yɛ́ɛnɛ, páagodɔ́ŋɔn lɛ́ Sɛ́fas.» (Sɛ́fas ɛlɛ lɛ́ «Nɛdáán.»)

⁴³A koany kaáyɛnɛ, Yə́sus aáság kusəə lɛ́ nyɔ́lɛ́ kuə́ŋ kɛɛn a Kalilə́ə. A ngə́ ɛgɛɛn, aáság kəə́bun na Filíib, náa ɔnɔ́ na nyɔ́lɛ́: «Wɛ, ínjə́ən!»

⁴⁴Filíib ayɛ́ɛ kibíəniʼ kɛ́ a pálɛ́ɛg ɛ Pɛdsáyída, yoom ímuʼ na pa Əndələ́ə pɔ́lɛ́ na Píɛ.

⁴⁵Filíib tɛn aáság kɛɛn aboan Naʼtanayɛ́ɛl, ɔnɔ́ na nyɔ́lɛ́: «Tɛmɔ́ɔ́ŋ mɔɔd nyɔ́ Moyíis yiísə́ə́ a kálaʼtaʼ yəəŋ ɛ pɛcɛm, ɔmbɔ́ tɛn palɔɛgɛʼ pɛbán pá Táán pɔ́ɔ́sɔyɔ kɛbán kiə́ŋ[7] Alɛ Yə́sus nyɔ́ a Násalɛd, mɔɔ́n o Yósɛb.»

⁴⁶Naʼtanayɛ́ɛl əyímuŋíən ɔnɔ́ əə: «A Násalɛd, nkə kɛ́laŋ aa kɛ́lɛɛ́ kɛ́golon kɔ ə́?» Náa Filíib ɔnɔ́ na nyɔ́lɛ́: «Wɛ mɛ́ɛn, waadála.»

⁴⁷Ná Yə́sus yɛɛ́dála Naʼtanayɛ́ɛl əə́giim ná nyɔ́lɛ́ alɛɛ́, əə́bə́ə́ kosɔyɔ kɛbán kiə́ŋ, ɔnɔ́: «Táá fɔ́lɔ́b fɔ́lɔ́b ɛ kibíəniʼ kɛ́ mɔɔ́n wo Ɛ́sɛlayɛl aa kɛ́ɛnɛ. Ímuʼ na ímuʼ yɛ́ ɛ́lɛɛ́ pɛnyaʼ a nyɔ́lɛ́, ɛ́dɛɔ́gɔ.»

⁴⁸Naʼtanayɛ́ɛl aáság kuŋíən ɔnɔ́ na Yə́sus: «Tuə́ áa omɛ́ndɛŋ náan əə́?» Náa Yə́sus ɔnɔ́ na nyɔ́lɛ́: «A Filíib kudíin agoodɔ́ŋɔn, mɛ njɛ́ɛ mbáʼkogoodála, wɛ a figiyə́ə yisí.»

⁴⁹Naʼtanayɛ́ɛl aáság kiiʼkini kusiəd tɔgɛ́ɛ́, náa ɔnɔ́ na Yə́sus: «Kɛlág, olɛ Mɔɔ́n o Táán, olɛ nkúm yɛ́ Ɛ́sɛlayɛl[8]»

⁵⁰Náa Yə́sus ɔnɔ́ na nyɔ́lɛ́: «Wɔnɔ́ ná mbágodɛánɛ lɛ́ mbágoodála a figiyə́ə yisí aa wəə́ʼkəə́liʼtinií ngɔ́ɔ́? Olɛ́ɛ́ kodála anɛ́ɛ́n pɛbán pɛ́ pɛ́mááyɛn pɛ́ɛb.»

⁵¹Yə́sus yiísə́ə́ kə́mmú ɔnɔ́ na nyɔ́lɛ́: «A fɔ́lɔ́b fɔ́lɔ́b ndabodɛ́anɛ lɛ́, polɛ́ɛ́ kodála mbálámɔɛn yəə́ʼkəə́buən, məŋun má maʼtom má Táán máabag kɔ, mə́əsuu, a oʼto wáam a mɔɛn, ó mɛ Mɔɔ́n o mɔɔd[9]»