Read Yambeta Sɛ́aŋ 10 Bible Online

Sɛ́aŋ 10 - Yambeta bible

Sɛ́aŋ 10

¹Yə́sus yiísə́ə́ ɔnɔ́ na pɔ́lɛ́: «Ndabodɛ́anɛ a fɔ́lɔ́b lɛ́ nyɔ́ ɔsɔ́dɛnɛɛ́ yɛ́ a udíyoog agɛɛlɛ lɛ́ ɔ́sɔd a oʼkág, amáyɛɛn agá afɛ́ɛ́ wólɛ́ kofɛ́láán, nyóon alɛ ungiíbən, ococóo.

²Náa, nyɔ́ ɔɔ́sɔd yɛ́ a udíyoog, nyóon aa alɛɛ́ unnuŋ mudúg.

³Mɔɔd nyɔ́ alɛɛ́ ənuŋ udíyoog əəmuúbuənin wólɛ́, mudúg móagoob nɛŋo niə́ŋ. Ɔɔdɔ́ŋɔn ɛ́nɛ́ idúg a niiŋ áság kolon na mólɛ.

⁴Kɛnɛŋ kɛ́ aáʼkolónɛɛ́ muim a táán, əəsúid yuudi, mólɛ́ múəgiim múmuyə́ən a ngim lɛ́ moálɛŋ nɛŋo niə́ŋ.

⁵Múdíəyə́ən ungən ó mɔɔd, móamoodɛ́da agá laálá lɛ́ móndɛŋɛn nɛŋo niə́ŋ.»

⁶Táá nkaʼtɛ́n yɛ́ Yə́sus əyíbusiə́din aa yɛ́ɛy. Náa, pɔ́lɛ́ pádɛʼkáagoob nkə kɛ́ ayɛ́ɛ anyɔ́ŋɛn kobodɛ́anɛ.

⁷Yə́sus ayɛ́bodɛánɛ tɛn ɔnɔ́: «A fɔ́lɔ́b ndabodɛ́anɛ: Mɛ áa ndɛɛ́ udíyoog ó kosɔd a oʼkág ó mudúg.

⁸Ungim nyɔ́ yɛɛ́yáŋ əgiim na mɛ alɛ ungiíbən, ococóo[41] Náa, mudúg módɛʼkáagoob nɛŋo nɛɔ́bɔn.

⁹Mɛ áa ndɛɛ́ udíyoog. Nyɔ́ ɔɔ́sɔd ná ndɛɛ́, nyóon alɛ́ɛ́ kɔɔy. Alɛ́ɛ́ kɛɛn kɔ́gɔ́ɔg aábag, əə́suu. Alɛ́ɛ́ kɛɛn tɛn kɔ na nkə kɛ́ aágaámɛ́nɛ.

¹⁰Ungiíbən alɛ əgiim əgín lɛ́ ná yííbə, yóóna, áyósag. Mɛ mbíim lɛ́ ná pɔɔd pɛ́ɛn na ɔlaa, pɛ́ɛn na wólɛ́ ilubənən.

¹¹«Mɛ áa ndɛɛ́ unnuŋ mudúg olaŋ[42] Unnuŋ mudúg olaŋ agɛɛ́ʼkɛn ɔlaa wə́ə́ŋ a oʼto ó mudúg muə́ŋ.

¹²Mɔɔd nyɔ́ alɛɛ́ lɛ́ əəgud agá mɔɔnɛ́ mə́ə́ŋ, nyóon ɔdɛɔ́gɔ fɔ́lɔ́b unnuŋ mudúg. Mudúg móom tɛn módɛɔ́gɔ muə́ŋ. Amaʼkodála lɛ́ ŋəŋúug yəə́ndəgiim, əədi ámáyáyɛ́dɛ́ɛ́ mólɛ́ agodɛ́da, ná ɛ́gɔ́lɛgɛdɛ múmmú, ɛ́yoóna tɛn múmmú.

¹³Táá nkə kɛ́ kɛ́lɛ́ɛ́ kaásánɛ́ɛ́ a kɛ́ɛg lɛ́ mɔɔnɛ́ mə́ə́ŋ áa nyɔ́lɛ́ alɛɛ́ əgugud, oʼkóodi kɛnɛŋ na mudúg.

¹⁴Mɛ áa mɛ ndɛɛ́ unnuŋ mudúg olaŋ. Mbálɛŋ mudúg móam. Mólɛ́ tɛn mómɛ́ndɛŋ mɛ.

¹⁵Wɔnɔ́ ná Paabá amɛ́ndɛŋ mɛ, mɛ mbámoólɛ́ŋ tɛn nyɔ́lɛ́. Mɛ mbɛ́ʼkɛn ɔlaa wáam a oʼto ó mudúg móam.

¹⁶Ndɛ na mudúg múmmú mó módɛ́njɛ́ɛlɛɛ́ a oʼkág wóow. Kíəginjuunə lɛ́ nyɛ́ɛlɛ mólɛ́ tɛn mósɔd. Mólɛ́ɛ́ koob nɛŋo nɛ́am. Ubid wáagɛɛn əgín úmmuʼ súg, unnuŋ tɛn úmmuʼ.

¹⁷Paabá alɛ agɛnnyɔ́ŋɛn lɛ́ ndɛ agɛɛ́ʼkɛn ɔlaa wáam ná nyíiʼkini kɛɛn kə́mmú na wólɛ́.

¹⁸Mɔɔd ədisiədin ɔlaa wáam, mɛɛ́nyɔ́amɔɛ́d áa mbáyɛ́ɛ́ŋɛ́nɛ́ɛ́ kɛɛ́ʼkɛn wólɛ́. Ndɛ na toɛn tó kɛɛ́ʼkɛn ɔlaa wáam. Nkóódi tɛn tóonɛ lɛ́ nyíiʼkini kɛɛn na wólɛ́. Taa, nkə kɛ́ Paabá ayɛ́ʼtɛánɛ lɛ́ nyíim agɛɛlɛ a kɛ́ɛg aá.»

¹⁹Tɔgɛ́ɛ́ tóod tóyɛ́ɛ́lɛ lɛ́ Yúdɛn yíiʼkini kaásaala kə́mmú.

²⁰Piíŋ a ondáŋ wɔ́ɔ́bɔn páyɛ́ɛ əgusəə pɔ́nɔ́: «Uŋun wó ɔmbɛ́ úmugóódi! Oʼto wə́ə́ŋ ólɛ ondɛáŋáán! Mɔɔd adɛnjóób nkə kɛ́ alɛɛ́ əgusəə!»

²¹Pɔsɔ́g pə́mmú páyɛ́ɛ əgusəə pɔ́nɔ́: «Mɔɔd nyɔ́ alɛɛ́ na uŋun wó ɔmbɛ́ ɔdɛɔ́gɔ ogosɔyɔ náan. Uŋun wó ɔmbɛ́ óyaán áa ólɛɛ́ ógɛɛlɛ lɛ́ mɔɔd o woog yíiʼkini kodɛ́ʼtɛganan əə́?»

²²Páyɛ́ɛ pɛɛlanɛ wɔɔ́n ó nibuən nɛ́ pə́yíʼkíni kubuən[43] Tɛ́mpɛl. Wɔɔ́n wóow óyɛ́ɛ waáyɛ́ɛlanɛ a Yolósalɛm a kɛnɛŋ kɛ́ umbuməʼ.

²³Kɔ a Tɛ́mpɛl, Yə́sus ayɛ́ɛ lɛ́ aábag, əə́suu a palándaʼ pá páyɛ́ɛ agodɔ́ŋɔn lɛ́ palándaʼ pá Salomɔ́ɔŋ.

²⁴Yúdɛn yaáság kɛɛn amoyágoʼkɛnɛn kɔ. Náa pɔ́nɔ́ na nyɔ́lɛ́: «Súʼtə́ə́ naanɛ́g áa wəə́biidi tɛndɛŋ yoom ə́? Kɛ́maʼkɛɛn lɛ́ wɛ áa olɛɛ́ Məsíi, ɛ́bɛmoáŋɛ́nɛ yi!»

²⁵Yə́sus əyíbuyúlísíni ɔnɔ́ na pɔ́lɛ́: «Mbáʼkobodɛ́anɛ náan. Náa podɛɔ́gɔ əgəə́liʼtini. Pɛbán pɛ́ ndɛɛ́ agɛɛlɛ a niiŋ nɛ́ Sɛ waam pɛ́lɛ agɛnyaágɛn mbaasɔ́ náan.

²⁶Náa, alɛ pudiə́líʼtíníí lɛ́ podɛɔ́gɔ todóm tóam.

²⁷Todóm tóam tólɛ agoob nɛŋo nɛ́am. Mɛ mbálɛŋ tólɛ́, tólɛ tɛn tuə́ginjə́ən a ngim.

²⁸Mɛ ndɛ agoboyɛ́ʼkɛn ɔlaa ó pɛnɛŋ piim. Tódɛndɛ́ɛ́ kuwu. Mɔɔd tɛn adɛndɛ́ɛ́ kɛʼkábɛn tólɛ́.

²⁹Sɛ waam nyɔ́ amɛ́nyɛɛ́ʼkɛn tólɛ́ alɛ oʼkóón agaáyɛn yiim; Mɔɔd na mɔɔd ɔdɛɔ́gɔ ogomogábɛn yoom na yoom.

³⁰Na mɛ na Paabá, tɛlɛ úmmuʼ.»

³¹Yúdɛn yaáság kiiʼkini kobáda aʼtáán agomodóan lɛ́ ə́gu.

³²Náa Yə́sus aábodɛ́anɛ anɛ́ɛ́n ɔnɔ́ na pɔ́lɛ́: «A toɛn tó Paabá, njɛ́ɛ́lánɛ ɛ́fɔlɛ́ ɛ́ pɛbán a əngis yááŋan. A kɛ́yaán anɛ́ɛ́n áay kímuʼ aa poɔʼkɔ́ póɛnjoon na aʼtáán áŋ?»

³³Yúdɛn iyímuyúlísíni yɔ́nɔ́: «Ndóo, adɛ́njaŋ a oʼto ó pɛbán pɛ́laŋ aa tɛɔʼkɔ́ tɛ́godóan na aʼtáán. Kɛ́lɛ lɛ́, olɛɛ́ agofánan Táán lɛ́ wɛ mɔɔd na tuyə́ən a oʼto waágaáfɛg na Táán á!»

³⁴Yə́sus əyíbuyúlísíni ɔnɔ́: «Adɛ́ kɛ́lɛ kidiídílə́ a kálaʼtaʼ ɛ pɛcɛm lɛ́ Táán ɔnɔ́ “Pəŋi tɛn polɛ padáán,” ngɔ́ɔ́?

³⁵A Kálaʼtaʼ ɛ pɛcɛm, pálɛ agodɔ́ŋɔn pá páagoob tɔgɛ́ɛ́ tó Táán pɔ́nɔ́ “padáán.” Mɔɔd oʼkóodi lɛ́ ásáŋɛnɛ nkə kɛ́ kɛ́lɛɛ́ kidiídílə́ a Kálaʼtaʼ ɛ Táán.

³⁶Táán áa əyínyiiyid mɛ kɔmɔɛ́d, əmə́yiim yɛ́ʼtom a nsí. Pəŋi oʼ, poɔʼkɔ́ ndɛ agomofánan lɛ́ mbə́səə nyɔʼkɔ́ ndɛ Mɔɔ́n o Táán, ngɔ́ɔ́?

³⁷Nga kɛ́lɛ lɛ́ mɛ ntɛɔ́gɔ agɛɛlɛ pigólí pɛ́ Sɛ waam, pəŋi podɛnjáág oʼto na mɛ.

³⁸Kɛ́maʼkɛɛn lɛ́ pɛ́lɛ́ aa ndɛɛ́ agɛɛlɛ, ɔmbɔ́ pádɛágɛn oʼto na mɛ, ə́líʼtíníən pɛbán pɛ́ɛb pɛ́ ndɛɛ́ agɛɛlɛ ná pólɛŋ kolɛŋ lɛ́ Paabá alɛ na mɛ, mɛ ndɛ tɛn na Nyɔ́lɛ́.»

³⁹Pə́ə́bə́ə́ kiiʼkini kuunə lɛ́ pə́muúgumin. Náa, nyɔ́lɛ́ aáság koboyɔ́bɔg, aásán.

⁴⁰Yə́sus yɛɛ́yáág kə́mmú nsɛ́ɛ́ ɛ noom nó siuludɛ́ɛŋ yɛ́ɛy káag, kɛnɔ kɛ́ Sɛ́aŋ əyə́bə́ə́líí ɔsɔgɛn. Yə́sus ayɛ́ɛ́n ələndin kɔ́gɔ́ɔg.

⁴¹Ɛ́fɔlɛ́ ɛ́ pɔɔd íyíímən kɔ kɛnɔ kɛ́ ayɛ́ɛ. Páyɛ́ɛ ɔsɔyɔ pɔ́nɔ́: «Sɛ́aŋ adɛʼkáagɛɛlɛ kiə́wúunəniʼ kɛ́ kɛbán ɔmbɔ́ kímuʼ, náa nkə kiim kɛ́ yiísə́ə́ a kidíídí kɛ́ mɔɔd nyóonɛ, kɛ́lɛ fɔ́lɔ́b.»

⁴²Piíŋ páyáág oʼto na Yə́sus kɔ áay.