Read Yambeta Sɛ́aŋ 11 Bible Online

Sɛ́aŋ 11 - Yambeta bible

Sɛ́aŋ 11

¹A Pɛʼtaníi, mɔɔd nyummú niiŋ lɛ́ Lasáal yiídə́əŋ kobany. Ayɛ́ɛ alaa kɔ a nigúu nɛ́ɛn na pomóŋŋí pə́ə́ŋ pá pagɛ́ɛd lɛ́ na Malɛ́a, na Mááʼtaʼ.

²Malɛ́a ogo nyóon aa yiísúmə́nən Yə́sus lamɛ́ndaʼ a ambaan, əə́ŋiənə na tuyə́ən tuə́ŋ. Móŋŋí wəəŋ aa nyóon alɛɛ́ Lasáal nyɔ́ alɛɛ́ abany.

³Pa Malɛ́a pɔ́lɛ́ ná Mááʼtaʼ pááság kodom mɔɔd lɛ́ yɛ́ɛn adɛ́anɛ na Yə́sus lɛ́ sɔ́g wəəŋ wo ɔʼtɛ́m alɛ abany.

⁴Pááság kɛɛn, pámámodɛánɛ. Ná ayóób tɔsɔm tóod náan, yiísə́ə́ agá ɔnɔ́: «Lasáal ədiə́gu kobany kóog. Kólɛ agá lɛ́ ná kúloodi nugəm nó Táán nó nólɛɛ́ nugóón. A kólɛ́ aa pálɛ́ɛ́ kugə́midií Mɔɔ́n o Táán.»

⁵Yə́sus yɛɛ́nyɔ́ŋɛnɛn pa Malɛ́a pɔ́lɛ́ ná móŋŋí Mááʼtaʼ kɛ́fɔlɛ́, na móŋŋí wɔɔbɔn Lasáal kɛ́.

⁶Náa, ɔmbɔ́ ná ayóób náan lɛ́ Lasáal alɛ abany, əyíʼkíni kɛɛlɛ mədúg mábaan kɔ áay kɛnɔ kɛ́ ayɛ́ɛ.

⁷A ngim yɛ́ɛy anɛ́ɛ́n áa yɛɛ́dɛánɛ na paaʼkan pə́ə́ŋ ɔnɔ́: «Tɛ́mɛ́naan, tiúliniən a Siudə́ə.»

⁸Paaʼkan pə́yímuŋíən pɔ́nɔ́ na nyóon əə: «Kɛlág, kídímbúlim wɔnɔ́ ná a Siudə́ə, Yúdɛn ɛyɛ́ɛ yaándagodóan na aʼtáán lɛ́ págoyóon. Náa wɔʼkɔ́ tiúlini kɔ ɔ?»

⁹Ayɛ́bodɛánɛ ɔnɔ́ na pɔ́lɛ́: «Wɔɔ́s ólɛ áwaʼ yówád na ɛ́baan, ngɔ́ɔ́? Mɔɔd nyɔ́ alɛɛ́ adáŋana na wɔɔ́s a oʼto, ədiə́gəə́búʼtən a ngə́ lɛ́ alɛ adɛ́ʼtɛg kisəə kɛ́ kɛ́lɛɛ́ agonom a nsí yɛ́ɛnɛ.

¹⁰Náa, nyɔ́ alɛɛ́ adáŋana na udúg, əəgiim ə́búmbub kubúmbúbə́ə́n lɛ́ kɛmoámoáŋ kɛ́dɛɔ́gɔ na nyɔ́lɛ́.»

¹¹Ná ayɛ́ɛ aáʼkoman kosɔyɔ náan, aáság kiiʼkini kodɛ́anɛ na paaʼkan pə́ə́ŋ ɔnɔ́: «Sɔ́g wəəs Lasáal əə́ndəənim ɛnɔ. Náa mɛ kóam kɛɛn kɔ, mmuyóndigi.»

¹²Pə́yímuyúlísíni pɔ́nɔ́ na nyɔ́lɛ́: «Sə́dúk, kɛ́maʼkɛɛn lɛ́ alɛ a ɛnɔ, áay lɛ́ ɔgɔɔy.»

¹³Pɔ́lɛ́ páyɛ́ɛ agofɛg lɛ́ ɛnɔ yɛ́ ɛnɔ aa Yə́sus ayɛ́ɛ əgusəə. Kɔmɔɛ́d lɛ́ kugu aa nyɔ́lɛ́ ayɛ́ɛ agobodɛ́anɛ lɛ́ Lasáal əə́ʼkugu.

¹⁴Aáság kolɛŋ anɛ́ɛ́n kobomoáŋɛnɛ, ɔnɔ́: «Ndɛ agobodɛ́anɛ lɛ́ Lasáal əə́ʼkugu.

¹⁵Ndɛ na tɔnyɔ́g a kidíídí kɛáŋan náan wɔnɔ́ ná ntɛʼkɛ́lɛɛ́ kɔ. Kɛ́agɛɛlɛ lɛ́ póag oʼto na mɛ. Tɛ́mɛ́naan anɛ́ɛ́n, tíɛn.»

¹⁶Náa Tómas nyɔ́ páyɛ́ɛ agodɔ́ŋɔn lɛ́ «mɔɔ́n ó nɛas» ɔnɔ́ na pɔsɔ́g paaʼkan: «Tiɛ́naan kɔ, tíɛn əgu ondáŋ na Kɛlág kiə́s!»

¹⁷A kɛɛn əgiig a Pɛʼtaníi, Yə́sus yɛɛ́bóan lɛ́ pə́ʼkuni Lasáal, aándɛ a kəəniʼ mədúg mə́niʼ.

¹⁸Wɔnɔ́ ná Pɛʼtaníi ɛdɛʼkɛ́lɛɛ́ laálá na Yolósalɛm, ɛyɛ́ɛ yoom wɔnɔ́ kɛ́lomɛ́ʼtaʼ ɛ́dáád,

¹⁹Yúdɛn iyíímən kɔ ngíŋ. Pə́yíímən əgiim osoyidi pa Malɛ́a pɔ́lɛ́ na Mááʼtaʼ kugu kó móŋŋí wɔɔbɔn.

²⁰Ná Mááʼtaʼ ayóób lɛ́ Yə́sus aándɛ áay, ayɛ́ɛ́n əgəə́bun na nyɔ́lɛ́ a ngə́, Malɛ́a nyɔ́lɛ́ ɔmɔ́ɔlɔb a noádɛʼ.

²¹Mááʼtaʼ əə́bə́ə́ kosɔyɔ na Yə́sus, ɔnɔ́: «Sə́dúk, wɛ áanɛ, móŋŋí waam adɛʼkɛ́ɛ əgu.

²²Náa, ɔmbɔ́ kɔ náan, kɛbán kɛ́dɛɔ́gɔ. Mbálɛŋ lɛ́ áay ná olɛɛ́, ɔmbɔ́ nkə aa wəə́ŋíən na Táán, aagoyɛ́ʼkɛn.»

²³Yə́sus yiísə́ə́ ɔnɔ́ na Mááʼtaʼ: «Mááʼtaʼ! Woómóŋŋí aagoóndɛg.»

²⁴Náa Mááʼtaʼ ɔnɔ́ na nyɔ́lɛ́: «Ɛɛ́ɛ, mbálɛŋ náan. Mbálɛŋ lɛ́ alɛ́ɛ́ koóndɛg a nɛman nɛ́ nsí ná pɛlóŋ pɛ́lɛ́ɛ́ koóndɛgan[44]»

²⁵Yə́sus yiísə́ə́ ɔnɔ́ na nyɔ́lɛ́: «Mɛ áa ndɛɛ́ kolon a kəəniʼ kó pɛlóŋ, mɛ áa ndɛɛ́ ɔlaa. Nyɔ́ amáág oʼto na mɛ, ɔmbɔ́ əə́gú, agɛɛn na ɔlaa.

²⁶Nyɔ́ alɛɛ́ tɛn a ɔlaa, amaʼkaag oʼto na mɛ adɛndɛ́ɛ́ kugu. Umə́líʼtíníí náan a, Mááʼtaʼ?»

²⁷Náa Mááʼtaʼ ɔnɔ́: «Ɛɛ́ɛ óo, Sə́dúk! Mbə́líʼtíníí. Mbə́líʼtíníí lɛ́ olɛ Məsíi, olɛ Mɔɔ́n o Táán, olɛ nyɔ́ ogódíí lɛ́ yíim a nsí.»

²⁸Ná Mááʼtaʼ yiísə́ə́ náan, aáság kɛɛn ɔ́dɔ́ŋɔn móŋŋí agosɔyɔ na nyɔ́lɛ́ a ɛdɔɔgɛ, ɔnɔ́: «Kɛlág aándɛ kɔ. Alɛ agoodɔ́ŋɔn.»

²⁹Əgín tɛn ná Malɛ́a ayóób náan, aáság koság kodɛ́ɛmɛn agɛɛn kɛnɔ kɛ́ alɛɛ́.

³⁰Yə́sus ayɛ́ɛ adɛ́sɔd kɔmɔɛ́d kɔ a nigúu, yiíligi əgín kɔ́gɔ́ɔg kɛnɔ kɛ́ Mááʼtaʼ əyíím əgəə́bun na nyɔ́lɛ́.

³¹Ná Yúdɛn yɛ́ ɛyɛ́ɛ kɔ a yoog na Malɛ́a, pə́əmuúwiiyəni ɔʼtɛ́m páyɛ́moodála aádɛ́ɛmɛn agolon na ɔʼtɛ́d, pɛ́ɛ́fɛ́g lɛ́ alɛ agɛɛn agá a kəəniʼ lɛ́ yɛ́ɛn alɛɛ. Pə́yə́wúú pɔ́lɛ́ piim əgumuyə́ən.

³²Ná Malɛ́a ayɛ́ɛ́n əgiig kɛnɔ kɛ́ Yə́sus ayɛ́ɛ, əgín tɛn ná ayɛ́moodála aáság kɛɛn əmudə́əŋənən a ambaan, ɔnɔ́ na nyɔ́lɛ́: «Sə́dúk! Wɛ kɔ, móŋŋí waam adɛʼkɛ́ɛ əgu.»

³³Ná Yə́sus yɛɛ́dála Malɛ́a aálɛɛ, na Yúdɛn tɛn yɛ́ iyíím ímuyə́ən, ayóób ɔʼtɛ́m kogany wó óyɛ́mosán oʼto. Nsiŋ yəəŋ yɛɛ́cágɛ́lɛd.

³⁴Náa ɔnɔ́ na pɔ́lɛ́: «Ə́lə́ə́ áa puyímuúní ə́?» Pááság kusəə pɔ́nɔ́ na nyɔ́lɛ́: «Mɛ́ɛn óo Sə́dúk! Mɛ́ɛn adála.»

³⁵Yə́sus aáság kudə́əŋ na ɔndɛɛ.

³⁶Yúdɛn yəə́bə́ə́ kosɔyɔ yɔ́nɔ́: «Táláan wɔnɔ́ ná ayɛ́monyɔ́ŋɛnɛn!»

³⁷Pə́mmú páyɛ́ɛ əgusəə pɔ́nɔ́: «Ayɛ́ɛ́lɛ áanɛ lɛ́ mɔɔd o woog yíiʼkini kodɛ́ʼtɛganan. Tuə́ áa adɛʼkɛ́ɛ ogɛɛlɛɛ́ lɛ́ Lasáal ədiʼkú ə́?»

³⁸Ɔʼtɛ́m ó Yə́sus úyíʼkíni kogany kə́mmú kɛ́fɔlɛ́, aáság kɛɛn kɛnɔ kɛ́ kəəniʼ káyɛ́ɛ. Kəəniʼ kágo kóog káyɛ́ɛ kɛbaŋ a nɛdáán. Píígúb unuʼ na kɛa kɛ́ kɛdám kɛ́ nɛdáán[45]

³⁹Yə́sus aáság kusəə lɛ́ pə́muúliogini nɛdáán nɛ́ɛn. Náa Mááʼtaʼ, móŋŋí o kɛlóŋ Lasáal ɔnɔ́ na nyɔ́lɛ́: «Sə́dúk, mədúg mə́niʼ a móonɛ wɔnɔ́ ná aándɛɛ́ a kəəniʼ, nɛ́gɔŋ əə́ndəənug.»

⁴⁰Yə́sus ayɛ́modɛánɛ ɔnɔ́ na nyɔ́lɛ́: «Ntɛgodɛ́anɛnɛ lɛ́ omaʼkaag oʼto na Táán, olɛ́ɛ́ kodála nɛgóón niə́ŋ ə́?»

⁴¹Pááság kuliogi nɛdáán. Yə́sus yɛɛ́bágɛ əngis a mɔɛn ɔgɔɔ́sɔ́gɔlɔn, ɔnɔ́: «Paabá, mbə́gusóyídi wɔnɔ́ ná omóób pɛɔ́sɔ́gɔ́lɔ́n pɛ́am.

⁴²Mɛ mbálɛŋ lɛ́ olɛ agoóbɛla pɛɔ́sɔ́gɔ́lɔ́n pɛ́am pɛnɛŋ piim. Náa, ndɛ agosɔyɔ náan a oʼto ó pɔɔd póonɛ pá pɛ́njaágóʼkɛ́nɛ́nɛ́ɛ́ agɛɛlɛ lɛ́ pə́ə́liʼtini lɛ́ wɛ áa uyíím wɛ́ʼtom.»

⁴³Ná yɛɛ́mán kosɔyɔ náan, aáság kosásɛd, nɛŋo a mɔɛn, ɔnɔ́: «Lasáal, mɛ́ɛn ólon!»

⁴⁴Kɛlóŋ kɛáság kiim kɛ́lon, ɔmbɔg na ambaan aʼkódágódá na pɛsom pɛ́ pilə́ə́, udi usúʼkínə́ə́n na kɛsom kɛ́ ombɔ́m. Náa Yə́sus ɔnɔ́: «Ímuyóndínəən, púmuudi yɛ́ɛn!»

⁴⁵Ná ɛ́fɔlɛ́ ɛ́ Yúdɛn yɛ́ íyíím osoyidəni Malɛ́a kugu yɛ́ɛ́dála nkə kɛ́ Yə́sus ayɛ́ɛ́lɛ, páyáág oʼto na nyɔ́lɛ́.

⁴⁶Náa, ngab yimmú a ondáŋ wɔ́ɔ́bɔn ɛyɛ́ɛ́n aboan Pafalɛsɛyɛ́ɛŋ agobodɛ́ananɛ nkə kiim kɛ́ Yə́sus ayɛ́ɛ́lɛ.

⁴⁷Puʼkúm pó payaaganɛʼ pɛfɔny na Pafalɛsɛyɛ́ɛŋ pááság kaágɔnyɛd anɛ́ɛ́n a ɛgɔny yɔ́ɔ́bɔn yɛ́ ɛgóón, pɔ́nɔ́: «Tuə́ áa tɛándagɛɛlɛɛ́ ə́? Mɔɔd nyóonɛ alɛ agɛɛlɛ mangán miíŋ.

⁴⁸Timəʼkumuudi lɛ́ yɛ́ɛnanan əgín náan, ungim agaag oʼto na nyɔ́lɛ́, pɔɔ́n pá Ɔlɔ́ma pá pálɛɛ́ agɛbɛɛ́laamɛ pə́əsiəd kɛbán kɛ́ɛg a ɔmbɔg yɔ́ɔ́bɔn, pə́əgiim əbugə Tɛ́mpɛl yəəs, páaman kuwíiyi tɛn nigúu niə́s!»

⁴⁹Náa mɔɔd nyummú a ondáŋ wɔ́ɔ́bɔn, niiŋ lɛ́ Kayíif, Ɔnjaaganɛʼ pɛfɔny nyɔ́ Oʼkóʼkóón nyɔ́ a waag wóow əə́səə ɔnɔ́: «Podɛɔ́gɔ agoob yoom na yoom!

⁵⁰Podɛɔ́gɔ agoob lɛ́ kɛ́lɛ a kɔŋɛʼ kuə́s lɛ́ mɔɔd úmmuʼ ə́gu a kidíídí kɛ́ ungim, agɛɛlɛ lɛ́ nigúu kilúd nídingwú ə́?»

⁵¹Tɔgɛ́ɛ́ tóod tó Kayíif yɛɛ́sɔ́yɔ náan tódɛʼkɛ́ɛ tɔgɛ́ɛ́ tó nyɔ́lɛ́nyɔ́amɔɛ́d ayáyɛ́ɛ́ŋɛ́nɛ́ɛ́, ndóo. Wɔnɔ́ ná nyɔ́lɛ́ aa ayɛ́ɛ Ɔnjaaganɛʼ pɛfɔny nyɔ́ oʼkóʼkóón a waag wóow, Táán aa ayɛ́moyɛ́ɛ́lɛ lɛ́ áyaŋ alɔɛgɛ náan lɛ́ Yə́sus alɛ́ɛ́ kugu a kɔŋɛʼ kó Yúdɛn.

⁵²Náa, kugu kó Yə́sus kódɛʼkɛ́ɛ əgín a kɔŋɛʼ kó Yúdɛn yɛ́lɛ́yɛ́əsíŋ, ndóo. Kóyɛ́ɛ lɛ́ ná ágómmɛ a kɛfɔg kímuʼ, pɔɔ́n pá Táán piim pá páfálɛ́mɛ́nɛ́ɛ́ a nsí yɛ́ɛnɛ.

⁵³Əgəə́bə́ə a wɔɔ́s wóow aa palaamɛʼ pá Yúdɛn píígúmin lɛ́ páagoon Yə́sus.

⁵⁴Kólɛ́ aa Yə́sus əyə́gílíí kiim ófíoŋ a nigúu, Yúdɛn yaámodɛ́ʼtɛg. Əyə́suídíí a Ɛfɛlayíim[46], pálɛ́ɛg yímmú, ndúmiʼ na kɛnɔ kɛ́ kifələ́ə́n. Ayɛ́ɛ́n ələndin kɔ́gɔ́ɔg na paaʼkan pə́ə́ŋ.

⁵⁵Wɔɔ́n ó Páska ɛ Yúdɛn óyɛ́ɛ wándɛ ndúmiʼ. Ná wɔɔ́n óyɛ́ɛ wándɛ lɛ́ ólɛ na koany, ɛ́fɔlɛ́ ɛ́ pɔɔd íyíím ɛ́dɛ́ɛman a pɛnɔ pɛ́ a mobá agɛɛnan a Yolósalɛm agɛɛlɛ lɛ́ ná wɔɔ́n wóow údíin wiim əgiig, pə́ʼkəə́fúŋi.

⁵⁶Páyɛ́ɛ əguunə ə́lə́ə́ áa Yə́sus alɛɛ́. Páyɛ́ɛ əgəə́ŋíənə kɔ pɔ́lɛ́ na pɔ́lɛ́ ná páyɛ́ɛ a Tɛ́mpɛl pɔ́nɔ́ ə: «A nɛáŋan əə, əəgiim a wɔɔ́n wóonɛ óm, ədiə́giim əə́?»

⁵⁷Puʼkúm pó payaaganɛʼ pɛfɔny na Pafalɛsɛyɛ́ɛŋ pááság kusəə lɛ́, mɔɔd nyɔ́ aálɛŋ kɛnɔ kɛ́ alɛɛ́, yíim abodɛ́anɛ, ná pɛ́ɛn əmuúgumin.