Read Yambeta Sɛ́aŋ 12 Bible Online

Sɛ́aŋ 12 - Yambeta bible

Sɛ́aŋ 12

¹Kɛ́yɛ́ɛ kɛáʼkolɔb mədúg máʼtáan na úmmuʼ agɛɛlɛ lɛ́ wɔɔ́n ó Páska wáyɛ́ɛlɛ. Yə́sus ayɛ́ɛ́n a nigúu nɛ́ Pɛʼtaníi, kɛnɔ kɛ́ Lasáal nyɔ́ ayóndɛ́gɛ ayɛ́ɛ alaa.

²Kɔ́gɔ́ɔg pááság komonánnaman. Mááʼtaʼ aa ayɛ́ɛ a ɔngab. Lasáal ayɛ́ɛ a ondáŋ ó pɔɔd pá páyɛ́ɛ agonɛ́ɛnɛ kɔ na Yə́sus.

³Malɛ́a yiísiə́d igəd kilúd, igəd ɛ́ lamɛ́ndaʼ ɛ mɔɔnɛ́. Páyɛ́ɛ́lɛ yɛ́lɛ́ na kisənduŋ kímmú pɔ́ɔdɔ́ŋɔn lɛ́ náal, əə́bə́ə́ kusumənən Yə́sus yɛ́lɛ́ a ambaan, əə́ŋiənə na tuyə́ən tuə́ŋ. Yoog ngim yiíyə́ə́g na kiluu kɛ́ lamɛ́ndaʼ yɛ́ɛy.

⁴Náa Siudáa Ɛsɛʼkalɛyóod, ongaaʼkan o Yə́sus nyummú, sɔ́g nyɔ́ ayɛ́ɛ amoólɛg, ɔnɔ́:

⁵«A igə aa pádɛʼkɛ́ɛ págolɛgɛɛ́ yɛ́lɛ́ a əʼtin á pisúg pɛ́ mɔɔnɛ́ puuniʼ[47] páyɛɛ́ʼkɛn mɔɔnɛ́ móom na mɔsɔ́gasɔ́gá ə́?»

⁶Tɔgɛ́ɛ́ tóod tó Siudáa ayɛ́ɛ agosɔyɔ náan, kɛ́dɛʼkɛ́ɛ lɛ́ ayɛ́ɛ ɔʼtɛ́m na mɔsɔ́gasɔ́gá, ndóo. Kɛ́lɛ lɛ́ ayɛ́ɛ ungiíbən. Wɔnɔ́ ná nyɔ́lɛ́ aa ayɛ́ɛ agɛɛ́ngɛgan mɔɔnɛ́ mɔ́ɔ́bɔn, ná páagɛɛ́ʼkɛn, ə́yiib.

⁷Yə́sus yiísə́ə́ ɔnɔ́ na nyɔ́lɛ́: «Ímuudí nyɔ́lɛ́ yəə́b! Nkə kɛ́ amɛ́ɛ́lɛ kɛ́lɛ agoboŋɛn wɔɔ́s wáam uginni.

⁸Pugóódi pasɔ́gasɔ́gá a ɛbá yááŋan pɛnɛŋ piim[48] Náa, mɛ ntɛndɛ́ɛ́ kɛɛn na pəŋi pɛnɛŋ piim.»

⁹Yúdɛn ngíŋ ɛyóób lɛ́ Yə́sus aándɛ áay a Pɛʼtaníi, pááság kiimən kɔ, adɛ́njaŋ əgín lɛ́ pámoodála nyɔ́lɛ́, náa pə́yíímən tɛn agodála Lasáal nyɔ́ Yə́sus ayóndɛ́gɛ.

¹⁰Puʼkúm pó payaaganɛʼ pɛfɔny pááság kugumin lɛ́ páagoon tɛn Lasáal

¹¹lɛ́ a oʼto wə́ə́ŋ áa pɔɔ́n pá Yúdɛn piíŋ páyɛ́ɛ aboodɛ́da agaag oʼto na Yə́sus.

¹²A koany kaáyɛnɛ, pɔɔd pá pə́yíímən kɔ áay kiʼtúú kilúd a wɔɔ́n ó Páska páyóób lɛ́ Yə́sus əə́ndəgiim a Yolósalɛm.

¹³Pɛ́ɛ́sóma pɛlaa, pááság kiimən na pɛ́lɛ́ agɛɛn amooboŋ a ngə́. Páyɛ́ɛ əgiim páágan pɛʼkɛ́ʼkɛ́, pɔ́nɔ́: «Ɔɔ́ɔ óo! Osáána! Táán ágoyɛ́ɛlɛ kɔŋɛʼ, wɛ nyɔ́ olɛɛ́ əgiim a niiŋ nɛ́ Sə́dúk, wɛ nkúm yɛ Ɛ́sɛlayɛl[49]!»

¹⁴Ná ayɛ́ɛ agɛɛn, yɛɛ́dála mɔɔ́n ó jáʼkáas, aáság kiim ábág a yɛ́lɛ́, əgín wɔnɔ́ ná kíyə́dílə́ə́ a kálaʼtaʼ ɛ Táán lɛ́:

¹⁵«Podɛʼtámmána, pəŋi pá a Siyɔ́ɔŋ! Taa nkúm yaaŋan aa yɛ́ɛy yəə́ndəgimií. Abágɛ́dɛn a mɔɔ́n ó jáʼkáas a mɔɛn[50]»

¹⁶Əgəə́bə́ə, paaʼkan pádɛʼkɛ́ɛ agoob pɛbán pɛ́ɛb. Náa, ná Táán yɛɛ́bágɛ́dɛ Yə́sus, amáamoyɛ́ʼkɛn kɛa kɛ́ nugəm, áay aa pə́yíím alɛŋ lɛ́ náan aa píídílə a kálaʼtaʼ ɛ Táán a niiŋ niə́ŋ. Pɔɔd páyɛ́moyɛ́ɛ́lɛ əgín wɔnɔ́ ná kíyə́dílə́ə́.

¹⁷Kɛnɛŋ kɛ́ Yə́sus ayóndɛ́gɛ Lasáal, ayɛ́modɔ́ŋɔn lɛ́ yíim álon a kəəniʼ, ɛ́fɔlɛ́ ɛ́ pɔɔd ɛ́yɛ́ɛ kɔ, páadɛ́ʼtɛg. Páyɛ́modɛ́lɛ́mɛn mbaasɔ́ a kɛbán kɛ́ɛg.

¹⁸A kiə́wúunəniʼ kɛ́ kɛbán kɛ́ɛg kɛ́ páyóób lɛ́ ayɛ́ɛ́lɛ aa, kiʼtúú kɛ́ pɔɔd kíyíímən kɛnɔ kɛ́ alɛɛ́.

¹⁹Pafalɛsɛyɛ́ɛŋ páyɛ́ɛ anɛ́ɛ́n agosɔyɔ kɔ pɔ́lɛ́ na pɔ́lɛ́ pɔ́nɔ́: «Poádála lɛ́ tɛdɛɔ́gɔ na ngə́ ɛgɛɛlɛ yoom na yoom. Ungim aándɛ a ngim yəəŋ!»

²⁰Pɔɔ́n pá Kɛlɛ́ɛg pə́mmú páyɛ́ɛ kɔ a ondáŋ wɔ́ɔ́bɔn. Pə́yíímən a Yolósalɛm əgiim agɛɛ́ʼkɛn nnyáádɛ́ na Táán a pɛɔ́sɔ́gɔ́lɔ́n a kɛnɛŋ kɛ́ wɔɔ́n.

²¹Páyɛ́ɛ́n aboan Filíib, mɔɔd nyummú nyɔ́ a Pɛdsáyída, a kɛsaa kɛ́ nsí kɛ́ Kalilə́ə, pɔ́nɔ́ na nyɔ́lɛ́: «Mɔɔ́n ó sɛ, tɛanyɔ́ŋɛn lɛ́ ná tɛádála Yə́sus.»

²²Filíib aáság kɛɛn adɛ́anɛ na Əndələ́ə náan. Pááság kɛɛn pɔ́lɛ́ póob piim pábaan agɛɛn adɛ́anɛ na Yə́sus.

²³Əyíbuyúlísíni ɔnɔ́: «Nɛ́gɔŋ, kɛnɛŋ kiə́ʼkiig kɛ́ɛnɛ lɛ́ Táán yɛ́ʼkɛn Mɔɔ́n o mɔɔd nugəm.

²⁴A fɔ́lɔ́b, ndabodɛ́anɛ lɛ́ niis nɛ́ ongafón nɛ́ɔlɔb nɛ́lɛ́nɛ́əsíŋ ná níʼtə́əŋin a nsí, ná níʼkúin tɛn. Náa, níməʼkugu, niə́bíən əngis yə́mmú əngíŋ.

²⁵Nyɔ́ alɛ́ɛ́ komaʼkanɛɛ́ ɔlaa wə́ə́ŋ, nyóon alɛ́ɛ́ koʼtaŋ wólɛ́. Kɔmɔɛ́d lɛ́ nyɔ́ alɛ́ɛ́ kuliogií ɔʼtɛ́m a ɔlaa wó a nsí, nyóon aa alɛ́ɛ́ kɛɛnɛɛ́ na ɔlaa ó pɛnɛŋ piim.

²⁶Mɔɔd amaʼkɔnyɔ́ŋɛn lɛ́ əgiʼkudin, yíim yínjə́ən. Náan, kɛnɔ kɛ́ mɛ ndɛɛ́, kɔ tɛn aa nyɔ́lɛ́ alɛ́ɛ́ kɛɛnɛɛ́. Sɛ waam alɛ agonyáadɛ nyɔ́ alɛɛ́ əgiʼkudin.»

²⁷Ayɛ́ɛ́n na tɔgɛ́ɛ́ yuudi, ɔnɔ́: «Áanɛ nɛ́gɔŋ, ɔʼtɛ́m wáam ólɛ ɔmbɛ́ a las. Nkə aa nsəəlií ə́? Nsəə nyɔʼkɔ́: Əə́əy Paabá, ɛ́njaáŋɛ́n a ntɔ́b yɛ́ɛnɛ óm? Náa, a oʼto wóow áa njíím a nsí yɛ́ɛnɛ kɔmɔɛ́d.

²⁸Ndəəsəə agá nyɔʼkɔ́: Paabá, kə́mídi niiŋ nɛáŋ!» Nɛŋo nɛáság kosɔyɛd kɔ́gɔ́ɔg a mbálámɔɛn, nɛɔ́nɔ́: «Mbə́ʼkugə́midi nɛ́lɛ́, ndəgiiʼkini kugə́midi tɛn kə́mmú.»

²⁹Kiʼtúú kɛ́ pɔɔd kɛ́ kɛ́yɛ́ɛ kɔ áay kɛ́yóób nɛŋo nɛ́ɛn, pɔsɔ́g pə́mmú pááság kusəə pɔ́nɔ́: «Mbálámɔɛn áa yəə́lumid!» Pɔsɔ́g pə́mmú tɛn pɔ́nɔ́: «Uŋun ó maʼtom aa wɔ́ɔ́sɔyɛd na nyɔ́lɛ́!»

³⁰Náa, Yə́sus ayɛ́bodɛánɛ ɔnɔ́ na pɔ́lɛ́: «Adɛ́njaŋ a mɛ áa nɛŋo nɛ́ɛn nɛɔ́sɔyɛd, a pəŋi.

³¹Kɛnɛŋ kɛ́ koyɔmɛ pɔɔd pá a nsí yɛ́ɛnɛ aa kɛ́ɛnɛ kiə́ʼkiigií. Kɛnɛŋ kɛ́ pándaŋɛ́ŋɛ́ɛ́ nkúm yɛ́ a nsí yɛ́ɛnɛ kiə́ʼkiig.

³²A mɛ, ná pálɛ́ɛ́ kɛʼpágɛɛ́ a mɔɛn, ndɛ́ɛ́ kəə́súidin pɔɔd piim.»

³³(A nisəə nɛ́ɛn, Yə́sus yiílóódi tuə́ áa pálɛ́ɛ́ kogoyónɛ́ɛ́.)

³⁴Kiʼtúú kɛ́ pɔɔd kɛ́ɛg kíyímuyúlísíni kɛɔ́nɔ́: «Pəsi tɛyáʼkan a kálaʼtaʼ ɛ pɛcɛm lɛ́ Məsíi alɛ́ɛ́ kɛɛn a ɔlaa a pɛnɛŋ piim[51] Tuə́ áa olɛɛ́ ugiiʼkini kusəə lɛ́ pálɛ́ɛ́ kodoŋ Mɔɔ́n o mɔɔd əə́? Mɔɔ́n o mɔɔd ogo nyóon alɛ ánɛ ə́?»

³⁵Yə́sus əyíbuyúlísíni ɔnɔ́: «Kisəə kígə́ligi a kɛgaágadɛ kɛáŋan. Náa, kɛnɛŋ sɔɔŋ kídiə́giʼkini kɛɛn kɔ kə́mmú. Táŋánáan a kɛnɛŋ kɛ́ kisəə kígə́ligíí na pəŋi, ná mbin idiíbugúmin lɛ́ mɔɔd nyɔ́ alɛɛ́ agodáŋana a mbin adɛálɛŋ ə́lə́ə́ áa alɛɛ́ agɛɛn

³⁶Ágáan oʼto na kisəə wɔnɔ́ ná kɛ́lɛ́ kígə́ligíí na pəŋi, ná póan pɔɔ́n pá a kɛmoámoáŋ.» Ná yɛɛ́mán kosɔyɔ náan aáság kolon, amɛ́ɛn laálá na pɔ́lɛ́.

³⁷Ɔmbɔ́ ná Yə́sus ayɛ́ɛ́lɛ mangán miíŋ a əngis yɔ́ɔ́bɔn, pádɛʼkáagaag oʼto na nyɔ́lɛ́.

³⁸Náan aa nkə kɛ́ Ɛsayíi, ɔndɔɛgɛʼ pɛbán o Táán yiísə́ə́ kɛ́yáás. Yiísə́ə́ lɛ́: «Sə́dúk, ánɛ aa əyə́líʼtíníí nkə kɛ́ tɛyɛ́ɛ əgusəə əə́? Na ánɛ aa wiílóódi toɛn toáŋ ə́[52]?»

³⁹Əgín tɛn Ɛsayíi ogo aa yiísə́ə́ a igə aa pɔ́dɛɔ́gɔ págaágɛ́ɛ́ oʼto na Yə́sus. Yiísə́ə́ ɔnɔ́:

⁴⁰«Táán ayɛ́ɛ́lɛ lɛ́ əngis yɔ́ɔ́bɔn yɛ́ɛn na woog ná pádɛʼtɛ́ʼtɛ́gánan, ntɛ́m yɔɔbɔn yɛ́ɛn nnasáŋ agɛɛlɛ lɛ́ pádɛnjóóbánan, pádɛʼkásɛ ɔlaa wɔ́ɔ́bɔn lɛ́ ndɛŋ koboyɔ́ɔyɛ[53]»

⁴¹Ɛsayíi yiísə́ə́ náan lɛ́ yɛɛ́dála nugəm nó Yə́sus, kɛbán tɛn kiə́ŋ áa ayɛ́ɛ əgusəə náan.

⁴²Ɔmbɔ́ náan pɔɔd piíŋ a ondáŋ ó palaamɛʼ pá Yúdɛn páyáág oʼto na Yə́sus Náa, pádɛʼkɛ́ɛ agowɛ́ɛsɛ kusəə a udi ó pɔɔd. Páyɛ́ɛ agodammana Pafalɛsɛyɛ́ɛŋ lɛ́ páabosáŋɛnɛnɛ lɛ́ pə́diyíʼkíni kosɔd a yoog ɛ pɛɔ́sɔ́gɔ́lɔ́n.

⁴³Kɛɔ́bɔn kɛ́yɛ́ɛ lɛ́ pɔɔd aa páboóganyɛɛ́, agaáyɛn lɛ́ Táán áboógany.

⁴⁴Yə́sus yɛɛ́sásɛd ɔnɔ́: «Nyɔ́ amáág oʼto na mɛ, adɛ́njaŋ əgín na mɛ áa amáág oʼto, ndóo, amáág tɛn oʼto na nyɔ́ əyíím yɛ́ʼtom.

⁴⁵Nyɔ́ amɛ́ʼtála tɛn, aádála nyɔ́ əyíím yɛ́ʼtom.

⁴⁶Mɛ, ndɛ kisəə a nsí agɛɛlɛ lɛ́ nyɔ́ amáág oʼto na mɛ, ədinjíʼkíni kɛɛn kə́mmú a mbin.

⁴⁷Nyɔ́ amóób tɔgɛ́ɛ́ tóam, adiɛlɛ nkə kɛ́ mbə́səə, adɛ́njaŋ mɛ áa ndámoyɛ́ʼkɛn nsɔ́ɔ́ lɛ́ ntiimin a nsí yɛ́ɛnɛ lɛ́ njɔmɛ pɔɔd, ndóo. Mbíim lɛ́ ná nyɔ́ɔyɛ pɔɔd pá a nsí.

⁴⁸Mɔɔd əməʼkiʼtəm, áasáŋɛnɛ tɛn koob mɛ tɔgɛ́ɛ́, alɛ́ɛ́ kɛɛn na nsɔ́ɔ́. Tɔgɛ́ɛ́ tó nyɛɛ́sɔ́yɔ aa tólɛ́ɛ́ komoóyɔmɛɛ́ a las ɛ wɔɔ́s.

⁴⁹Kɛ́lɛ lɛ́ kɛbán na kɛbán kɛ́ njáyɛ́ɛ́ŋɛ́nɛ́ɛ́ mɛɛ́nyɔ́amɔɛ́d kusəə a oʼto wáam kɛ́dɛɔ́gɔ. Náa Paabá Nyɔ́ əyíím yɛ́ʼtom, ayɛ́ʼtɛánɛ nkə nyiígóodi lɛ́ nsɔ́yɔ.

⁵⁰Mbálɛŋ lɛ́ nɔgɛ́ɛ́ nuə́ŋ áa nóagɛɛ́ʼkən mɔɔd ɔlaa ó pɛnɛŋ piim. Nkə anɛ́ɛ́n kɛ́ ndɛɛ́ əgusəə, ndɛ əgusəə kɛ́lɛ́ wɔnɔ́ ná Paabá amɛ́ʼtɛánɛ.»