Read Yambeta Sɛ́aŋ 13 Bible Online

Sɛ́aŋ 13 - Yambeta bible

Sɛ́aŋ 13

¹Kɛ́yɛ́ɛ pɔ́nɔ́ Páska na koany. Yə́sus yɛɛ́lɛŋɛn lɛ́ kɛnɛŋ kiə́ŋ kɛ́ kodɛ́ɛmɛn a nsí yɛ́ɛnɛ əguúlini a nó Sɛ kiə́ʼkiig. Nyɔ́lɛ́ yɛɛ́nyɔ́ŋɛn pɔɔd pə́ə́ŋ pá pálɛɛ́ a nsí, amáabonyɔ́ŋɛn súʼtə́ə́ a nisug.

²Páyɛ́ɛ agonɛ́ɛnɛ na paaʼkan pə́ə́ŋ, Omɔlɛɔ́g ayɛ́ɛ aáʼkodóɛyɛ Siudáa, mɔɔ́n o Simɔ́ɔŋ Ɛsɛʼkalɛyóod a ɔʼtɛ́m lɛ́ aamoólɛg.

³Yə́sus yɛɛ́lɛŋɛn nyɔ́lɛ́nyɔ́amɔɛ́d lɛ́ əyíím ádɛ́ɛmɛn a nó Táán, náa əə́ndəguúlinií kɔ. Yɛɛ́lɛŋɛn tɛn lɛ́ Táán ayáág muim a ɔmbɔg yə́ə́ŋ.

⁴Yɛɛ́dɛ́ɛ́mɛn a oʼkɔɔ wó ayɛ́ɛ kɔ agonɛ́ɛnɛ, omóliógíí ntaa yəəŋ, əə́siəd kɛsom kɛ́ sanjaʼ, əmə́súŋíí a nɛdáá.

⁵Yiísiə́d məní, amáág a táasaʼ, əə́bə́ə́ kosog ambaan á paaʼkan pə́ə́ŋ, əə́ŋiənə na kɛsom kɛ́ sanjaʼ yɛ́ əyə́súŋin.

⁶Ná əyííg a udi ó Simɔ́ɔŋ Píɛ, Simɔ́ɔŋ ayɛ́modɛánɛ ɔnɔ́ na nyɔ́lɛ́: «Wɛ áa Sə́dúk! Wɛ kɛsog ambaan á?»

⁷Yə́sus yiísə́ə́ ɔnɔ́ na nyɔ́lɛ́: «Nkə kɛ́ ndɛɛ́ agɛɛlɛ nɛ́gɔŋ, odɛɔ́gɔ ogoob, náa olɛ́ɛ́ kudíin woób a ngim.»

⁸Náa Simɔ́ɔŋ Píɛ ɔnɔ́: «Wɛ Sə́dúk! Wɔʼkɔ́ wɛ́sog mɛ ambaan á! Iyó!» Yə́sus yiísə́ə́ ɔnɔ́ na nyɔ́lɛ́: «Ntɛgoósɔgɛn ambaan, odɛɔ́gɔɔŋ yoom na mɛ.»

⁹Náa Simɔ́ɔŋ Píɛ ɔnɔ́ na nyɔ́lɛ́: «Sə́dúk, kɛ́maʼkɛɛn anɛ́ɛ́n náan, adɛ́njaŋ ambaan əgín yɛ́lɛ́ na yɛ́lɛ́, ɛ́sog tɛn ɔmbɔg na oʼto!»

¹⁰Yə́sus ayɛ́modɛánɛ ɔnɔ́: «Mɔɔd nyɔ́ aáʼkoonaá, kídíəguunə kə́mmú lɛ́ pámoyóonanɛ, ná kɛ́sánɛn əgín lɛ́ yáásog ambaan lɛ́ nyɔ́lɛ́ ungim alɛ ommoáŋáán. Pəŋi polɛ pamoáŋáán, náa adɛ́njaŋ agá pəŋi piim.»

¹¹Kɛ́lɛ lɛ́ Yə́sus yɛɛ́lɛŋɛn ánɛ aa aámoólɛg, kólɛ́ aa yiísə́ə́ náan lɛ́: «Adɛ́njaŋ pəŋi piim aa polɛɛ́ pamoáŋáán.»

¹²Ná Yə́sus yɛɛ́mán koboósog ambaan, aáság kəə́yúlisi ntaa yəəŋ, amɛ́ɛn ələndin a oʼkɔɔ wə́ə́ŋ, náa ɔnɔ́: «Pomóób nkə kɛ́ɛnɛ kɛ́ mbɛ́ɛ́lɛ a?

¹³Polɛ agɛʼtɔ́ŋɔŋɔ poɔʼkɔ́ “Kɛlág”, poɔʼkɔ́ “Sə́dúk”, pugóódi kilumiʼ lɛ́ ndɛ fɔ́lɔ́b kɛlág, ndɛ Sə́dúk.

¹⁴Mɛ anɛ́ɛ́n nyɔ́ ndɛɛ́ Sə́dúk na kɛlág kɛáŋan, mbaʼkoboósog ambaan, pugóódi lɛ́ pósoganan tɛn ambaan pəŋi na pəŋi.

¹⁵Mbə́bulóódi wɔnɔ́ ná póɛlanɛɛ́. Ɛlɛ́an náan wɔnɔ́ ná mɛ mbɛ́ɛ́lɛ na pəŋi.

¹⁶A fɔ́lɔ́b ndabodɛ́anɛ lɛ́, uʼkudin ɔmbɔ́ úmmuʼ ɔdɛɔ́gɔ ogobáʼkanan sə́dúg wəəŋ. Mɔɔd wo oʼtom tɛn ɔmbɔ́ úmmuʼ ambáʼkánan nyɔ́ amámoodóm.

¹⁷Pəŋi pomaʼkolɛŋ náan poagɛɛn kɔŋɛʼ ná pomɛ́ɛ́lɛ kɛ́lɛ́.

¹⁸Ntɛɔ́gɔ əgusəə a pəŋi piim. Mbálɛŋ pá njííyid. Náa, nkə kɛ́ kíyə́dílə́ə́ a Kálaʼtaʼ ɛ Táán kígóódi lɛ́ kɛáyɛ́ɛlɛ. Kɛ́lɛ kɔ lɛ́: “Mɔɔd nyɔ́ tɛyɛ́ɛ agonɛ́ɛnɛ ondáŋ na nyɔ́lɛ́, nyɔ́lɛ́ aa ayɛ́nnɛ́ a ambaan yisí[54]”

¹⁹Mbáyaŋ abodɛ́anɛ nɛ́gɔŋ ná kɛbán kɛ́go kɛ́dɛ́njáyɛ́ɛlɛ, agɛɛlɛ lɛ́ ná kɛ́lɛ́ɛ́ kaáyɛ́lɛɛ́, puə́liʼtini lɛ́ “ndɛ nyɔ́ ndɛɛ́.”

²⁰A fɔ́lɔ́b, ndabodɛ́anɛ lɛ́, nyɔ́ aálɛŋ kusiəd nyɔ́ mbádóm, mɛ áa aálɛŋ kisiəd. Nyɔ́ aálɛŋ tɛn kisiəd mɛ, aalɛŋ tɛn kusiəd nyɔ́ əyíím yɛ́ʼtom.»

²¹Ná Yə́sus yɛɛ́sɔ́yɔ náan, ɔʼtɛ́m wə́ə́ŋ wɛ́ɛ́yɛ́b a kúfuʼ, aáság koʼkwaaŋɛ moááŋ, ɔnɔ́: «A fɔ́lɔ́b ndabodɛ́anɛ lɛ́ úmmuʼ áanɛ a ondáŋ wááŋan, aagɛndɛg.»

²²Paaʼkan pə́ə́bə́ə́ kodɛ́ʼtɛganan pɔ́lɛ́ piim. Náa, pádɛʼkɛ́ɛ agolɛŋ ánɛ aa Yə́sus alɛɛ́ əgusəə.

²³Ongaaʼkan nyummú a ondáŋ wɔ́ɔ́bɔn, sɔ́g nyɔ́ Yə́sus yɛɛ́nyɔ́ŋɛnɛn kɛ́fɔlɛ́, ayɛ́ɛ undəndínə́ə́n a ɛbá yə́ə́ŋ.

²⁴Simɔ́ɔŋ Píɛ aáság kumuə́díbid na əngis lɛ́ ə́ŋíən na Yə́sus əə, ánɛ aa ɔnɔ́ aamoólɛg əə́?

²⁵Ongaaʼkan nyóon yɛɛ́sɛ́lɛ́gɛ oʼto a oʼtóɛŋ ó Yə́sus, ɔnɔ́ na nyɔ́lɛ́ əə: «Sə́dúk, ánɛ aa aágoólɛg əə́?»

²⁶Yə́sus əyúúlísi ɔnɔ́ na nyɔ́lɛ́: «Nyɔ́ ndə́ənyum kɛsom kɛ́ kɛlɛ́ɛd a masɔɔ agomoyɛ́ʼkɛn, taa nyɔ́lɛ́ ogo aa nyóon.» Aáság kusiəd kɛsom kɛ́ kɛlɛ́ɛd, əə́nyum a masɔɔ, amɛ́ʼkɛn na Siudáa, mɔɔ́n ó Simɔ́ɔŋ Ɛsɛʼkalɛyóod.

²⁷Əgín tɛn ná Siudáa yiísiə́d kɛlɛ́ɛd, Sáʼtan yaáság komoosɔd. Yə́sus yiísə́ə́ ɔnɔ́ na nyɔ́lɛ́: «Ə́bísígíí kɛɛlɛ nkə kɛ́ ugódíí lɛ́ wɛ́ɛlɛ.»

²⁸A pɔɔd piim pá páyɛ́ɛ kɔ áay agonɛ́ɛnɛ, ɔmbɔ́ úmmuʼ adɛʼkáagoob a igə aa ayɛ́modɛánɛ náan.

²⁹Wɔnɔ́ ná Siudáa aa ayɛ́ɛ na igóó yɔ́ɔ́bɔn ɛ́ mɔɔnɛ́, pɔsɔ́g pə́mmú pááság kofɛg lɛ́ Yə́sus alɛ amodɛ́anɛ lɛ́ yɛ́ɛn agooŋɛnɛ nkə kɛ́ kíəgəə́yúunə a wɔɔ́n, oó lɛ́ álónɛ yoom, yɛ́ɛn agɛɛ́ʼkɛn na mɔsɔ́gasɔ́gá.

³⁰Siudáa nyɔ́lɛ́ yiísiə́d kɛsom kɛ́ kɛlɛ́ɛd kɛ́ɛg, aáság koság kolon. Udúg óyɛ́ɛ wándɛ kɔ.

³¹Əgín ná Siudáa yɛɛ́lón, Yə́sus aáság kusəə ɔnɔ́: «Nɛ́gɔŋ yɛ́ɛnɛ nugəm nó Mɔɔ́n o mɔɔd nuóʼkoóloodi. Nyɔ́lɛ́ alɛ əguloodi tɛn tuə́ áa Táán alɛɛ́ na nugəm.

³²Táán nyɔ́lɛ́nyɔ́amɔɛ́d alɛ́ɛ́ kuloodi wɔnɔ́ ná Mɔɔ́n alɛɛ́ na nugəm; kɛnɛŋ sɔɔŋ tɛn aa əə́ndəmugə́midií.

³³Pɔɔ́n páam, kɛnɛŋ sɔɔŋ ntiə́giiʼkini kɛɛn na pəŋi kə́mmú. Polɛ́ɛ́ kinjuunə, náa, əgín wɔnɔ́ ná nyɛɛ́dɛánɛ na pɔɔ́n pá Yúdɛn, ndabodɛ́anɛ tɛn nɛ́gɔŋ na pəŋi lɛ́: Kɛnɔ kɛ́ ndɛɛ́ agɛɛn, pəŋi podɛɔ́gɔ págɛɛn kɔ.

³⁴Táá kɛcɛm kɛ́ kɛwa aa kɛ́ɛnɛ: Pɔ́nyɔ́ŋanan pəŋi na pəŋi. Wɔnɔ́ ná mɛ njɛ́bonyɔ́ŋɛn, náan tɛn aa pəŋi pugódíí lɛ́ pɔ́nyɔ́ŋanan pəŋi na pəŋi.

³⁵A nnyɔ́ŋánán yɛ́ poágɛɛn na yɛ́lɛ́ pəŋi na pəŋi aa pɔɔd pálɛ́ɛ́ kolɛŋɛɛ́ lɛ́ polɛ paaʼkan páam.»

³⁶Náa Simɔ́ɔŋ Píɛ ɔnɔ́ na nyɔ́lɛ́: «Sə́dúk, ə́lə́ə́ áa olɛɛ́ agɛɛn ə́?» Yə́sus əyímuyúlísíni ɔnɔ́: «Kɛnɔ kɛ́ ndɛɛ́ agɛɛn, wɛ odɛɔ́gɔ uginjə́ən kɔ nɛ́gɔŋ, náa, olɛ́ɛ́ kudíin wiim a ngim.»

³⁷Píɛ yiísə́ə́ ɔnɔ́ na nyɔ́lɛ́: «Sə́dúk, a igə aa mɛ ntɛɔ́gɔ uguguyə́nií nɛ́gɔŋ əə́? Áanɛ ná ndɛɛ́, ndɛ ongaábɔ́ŋɛ́náán nyóonɛ lɛ́ nyɛ́ʼkɛn ɔlaa wáam a kidíídí kɛáŋ!»

³⁸Yə́sus əyímuyúlísíni ɔnɔ́ na nyɔ́lɛ́: «Píɛ, wɔʼkɔ́ olɛ ongaábɔ́ŋɛ́náán lɛ́ wɛ́ʼkɛn ɔlaa wááŋ a kidíídí kɛ́am a! A fɔ́lɔ́b ndagodɛ́anɛ lɛ́ kɛbaŋ kɛ́ nsɛɛ kíədíin kɛdaŋ naánɛ́ yɛ́ɛnɛ ná wəə́ʼkiʼtəm pɛnɛŋ pɛ́dáád wɔʼkɔ́ odɛndɛŋɛn.»