Read Yambeta Sɛ́aŋ 14 Bible Online

Sɛ́aŋ 14 - Yambeta bible

Sɛ́aŋ 14

¹«Podɛyáságɛ́máá yoom na yoom. Póag oʼto na Táán, póag tɛn na mɛ.

²Pɛnɔ pɛ́ kolaa pɛ́lɛ a noádɛʼ nó Paabá tub. Kɛ́dɛʼkɛ́ɛ agɛɛn náan fɔ́lɔ́b ná ntɛbodɛ́anɛnɛ lɛ́ ndɛ agɛɛn əbusóbinini kɛnɔ kɛ́ poágɛɛn kɔ.

³Ná ndáaman kubusóbinini kɛnɔ kɛ́ poágɛɛn kɔ, ndəgimbuúlini əgiim əbuúsiəd agɛɛlɛ lɛ́ pəŋi tɛn póɛn kɔ ná ndɛɛ́.

⁴Poálɛŋ ngə́ yɛ́ yaágɛɛn kɛnɔ kɛ́ ndɛɛ́ agɛɛn.»

⁵Náa Tómas ɔnɔ́ na nyɔ́lɛ́: «Sə́dúk, pəsi tɛdɛɔ́gɔ agolɛŋ ɔmbɔ́ kɛnɔ kɛmɔɛ́d kɛ́ wɛ olɛɛ́ agɛɛn kɔ. Tuə́ áa tɛlɛɛ́ págolɛŋ anɛ́ɛ́n ngə́ yɛ́ yaágɛɛn kɔ ə́?»

⁶Yə́sus əyímuyúlísíni ɔnɔ́: «Mɛ áa ndɛɛ́ ngə́, mɛ áa ndɛɛ́ fɔ́lɔ́b, mɛ áa ndɛɛ́ ɔlaa. Mɔɔd ɔdɛɔ́gɔ ogɛɛn a nó Paabá ná asánɛn yɛ́ mɛ ndɛɛ́.

⁷Poyɛ́ndɛŋɛn mɛ ná poálɛŋ tɛn Sɛ waam. Áanɛ nɛ́gɔŋ, poáʼkomoólɛŋ, poáʼkomoodála tɛn.»

⁸Náa Filíib ɔnɔ́ na nyɔ́lɛ́: «Sə́dúk, íbilóódi Paabá, ná kɛ́sɛʼtan náan na pəsi.»

⁹Yə́sus əyímuyúlísíni ɔnɔ́: «Filíib, pɛ́go pɛ́ ndɛɛ́ na pəŋi, odɛ́yɛ́ndɛŋ a? Nyɔ́ amɛ́ʼtála mɛ, aádála Paabá. A igə aa wɔʼkɔ́ mɛ mpuúloodi Paabá ə́?

¹⁰Udiə́liʼtinini aa nyóon lɛ́ mɛ ndɛ a Paabá, Paabá tɛn alɛ a mɛ áa? Tɔgɛ́ɛ́ tuim tó ndɛɛ́ agobodɛ́anɛ, ntɛáyɛ́ɛ́ŋɛnɛn kosɔyɔ tólɛ́ a oʼto wáam ó mɛɛ́nyɔ́amɔɛ́d, ndóo. Paabá nyɔ́ alɛɛ́ a mɛ, nyɔ́lɛ́ ogo tɛn aa ɛlɛɛ́ agɛɛlɛ pɛbán pɛ́ pɛ́lɛɛ́ piə́ŋ.

¹¹Ə́líʼtíníən nkə kɛ́ɛnɛ kɛ́ ndɛɛ́ agobodɛ́anɛ nyɔʼkɔ́ mɛ ndɛ a Paabá, Paabá tɛn alɛ a mɛ. Ɔmbɔ́ pudiə́liʼtinini tɔgɛ́ɛ́ tóam, ə́líʼtíníən əgín ɔmbɔ́ a oʼto ó pɛbán pɛ́ɛb pɛ́ ndɛɛ́ agɛɛlɛ.

¹²A fɔ́lɔ́b, ndabodɛ́anɛ lɛ́ nyɔ́ amáág oʼto na mɛ, nyóon alɛ́ɛ́ tɛn kɛɛlɛ pɛbán pɛ́ mɛ ndɛɛ́ agɛɛlɛ. Alɛ́ɛ́ kɛɛlɛ sɛ́ɛb pɛ́ pɛ́mááyɛn pɛ́ɛb lɛ́ mɛ ndɛ agɛɛn a nó Paabá.

¹³Nkə kiim kɛ́ polɛ́ɛ́ kuŋíənií a niiŋ nɛ́am, ndɛ́ɛ́ kɛɛlɛ kɛ́lɛ́ agɛɛlɛ lɛ́ mɛ nyɔ́ ndɛɛ́ Mɔɔ́n wəəŋ ndoodi na pɔɔd wɔnɔ́ ná Táán alɛɛ́ na nugəm.

¹⁴Yiim yɛ́ polɛ́ɛ́ kuŋíənií a niiŋ nɛ́am, ndɛ́ɛ́ kɛɛlɛ yɛ́lɛ́.

¹⁵«Pɔ́nɔ́ poyɛ́nnyɔ́ŋɛnɛn, ná polɛ agɛɛ́ngɛg mɛ pɛcɛm.

¹⁶Ndɔgɔɔ́sɔ́gɔlɔn Paabá lɛ́ yíim ábodómɛn mɔɔd wɛndɛ́ŋ nyɔ́ əə́giim aboyáamɛnɛn. Nyɔ́ alɛ́ɛ́ kɛɛnɛɛ́ na pəŋi pɛnɛŋ piim.

¹⁷Nyɔ́lɛ́ ogo aa nyóonɛ alɛɛ́ Uŋun ó pasáád. Pɔɔd pá a nsí yɛ́ɛnɛ pɔ́dɛɔ́gɔ págɛɛn na wólɛ́ lɛ́ pɔ́dɛɔ́gɔ págodála wólɛ́, pándɛŋ tɛn wólɛ́. Náa pəŋi, poálɛŋ wólɛ́ lɛ́ polɛ na wólɛ́. Ólɛ a ntɛ́m yaaŋan a kaadɛ.

¹⁸Ntiə́buudi wɔnɔ́ musíísí. Mbɛ́ɛn, ndəgimbuúlini ná polɛɛ́.

¹⁹Kɛnɛŋ sɔɔŋ pɔɔd pá a nsí yɛ́ɛnɛ pádɛ́agɛʼtála kə́mmú. Náa pəŋi, poagɛʼtála lɛ́ ndɛ a ɔlaa, pəŋi poagɛɛn tɛn a ɔlaa.

²⁰Ná wɔɔ́s wóow ólɛ́ɛ́ kiim əgiig, polɛ́ɛ́ kolɛŋ lɛ́ mɛ ndɛ a Sɛ waam, pəŋi polɛ a mɛ, mɛ tɛn ndɛ a pəŋi.

²¹Nyɔ́ alɛɛ́ agɛnyɔ́ŋɛn, alɛ nyɔ́ alɛɛ́ agoob pɛcɛm pɛ́am, aágɛɛ́ngɛg pɛ́lɛ́. Kɛ́lɛ lɛ́, nyɔ́ alɛɛ́ agɛnyɔ́ŋɛn mɛ, nyóon, Paabá alɛ́ɛ́ komonyɔ́ŋɛn tɛn nyɔ́lɛ́. Mɛ tɛn ndɛ́ɛ́ komonyɔ́ŋɛn, ndɛ́ɛ́ tɛn koóloodi na nyɔ́lɛ́.»

²²Náa Siudáa (adɛ́njaŋ Siudáa nyóʼkáanɛ wo Ɛsɛʼkalɛyóod) ɔnɔ́ na nyɔ́lɛ́: «Sə́dúk, tuə́ áa kɛ́lɛɛ́ lɛ́ woogoóloodi əgín na pəsi, fiɛ́d koóloodi na ungim a nsí ə́?»

²³Yə́sus əyímuyúlísíni ɔnɔ́: «Nyɔ́ alɛɛ́ agɛnyɔ́ŋɛn, nyóon agɛɛlɛ nkə kɛ́ mbə́səə. Sɛ waam aamonyɔ́ŋɛn nyɔ́lɛ́. Pəsi na Paabá tɛlɛ́ɛ́ kiim a nyɔ́lɛ́, tɛlɛ́ɛ́ kolaa kɛnɔ kɛ́ alɛɛ́.

²⁴Nyɔ́ ɔdɛɔ́gɔ agɛnyɔ́ŋɛnɛɛ́, adɛágɛɛlɛ nkə kɛ́ ndɛɛ́ əgusəə. Tɔgɛ́ɛ́ tó ndɛɛ́ agosɔyɔ tódɛɔ́gɔ tɔgɛ́ɛ́ tó túəgiim na mɛɛ́nyɔ́amɔɛ́d, ndóo. Tólɛ tɔgɛ́ɛ́ tó Sɛ waam nyɔ́ əyíím yɛ́ʼtom.

²⁵Nkə kɛ́ɛnɛ, mbábodɛánɛ kɛ́lɛ́ wɔnɔ́ ná nkə́ligíí na pəŋi.

²⁶Náa, nyɔ́ ogódíí lɛ́ yíim aboyáamɛnɛn, Uŋun wó Ufúlúʼtú wó Paabá alɛ́ɛ́ kiim ábodómɛnɛɛ́ a niiŋ nɛ́am, wólɛ́ ólɛ́ɛ́ koboyáʼkananɛ pɛbán piim. Ólɛ́ɛ́ koboyɛ́ɛlɛ lɛ́ poáyɔ́ɔ́ŋɛ nkə kiim kɛ́ njɛ́bodɛánɛ.

²⁷Uŋóón áa mbə́budíin! Uŋóón wáam aa mbáboyɛ́ʼkɛn o[55]! Ntɛɔ́gɔ agoboyɛ́ʼkɛn wólɛ́ wɔnɔ́ ná pɔɔd pá a nsí yɛ́ɛnɛ páagɛɛ́ʼkɛnanan. Podɛnjɛ́ɛ́n na ɛságág a ɔʼtɛ́m, podɛʼtámmána tɛn yoom na yoom.

²⁸Pomóób wɔnɔ́ ná mbábodɛánɛ nyɔʼkɔ́: Mɛ mbɛ́ɛn, náa ndəgimbuúlini. Pɔ́nɔ́ poyɛ́nnyɔ́ŋɛnɛn, ná polɛ agɔnyɔ́ga wɔnɔ́ ná ndɛɛ́ agɛɛn a nó Paabá lɛ́ Paabá alɛ oʼkóʼkóón amɛ́njaáyɛn.

²⁹Mɛ mbábodɛánánɛ pɛbán pɛ́ɛb nɛ́gɔŋ ná pɛ́dɛ́njáyɛ́ɛlɛ, agɛɛlɛ lɛ́ ná pɛ́lɛ́ɛ́ kaáyɛ́lɛɛ́, puə́liʼtini.

³⁰Əgəə́bə́ə nɛ́gɔŋ, ntɛndɛ́ɛ́ kiiʼkini kuʼtooli na pəŋi kə́mmú lɛ́ nkúm yɛ́ a nsí yɛ́ɛnɛ yəə́ndəgiim. A fɔ́lɔ́b, nyɔ́lɛ́ oʼkóodi toɛn na mɛ.

³¹Náa, pɔɔd pá a nsí pógóódi lɛ́ pálɛŋ lɛ́ ndɛ anyɔ́ŋɛn Paabá, ndɛ agɛɛlɛ tɛn əgín wɔnɔ́ ná amɛ́ʼtɛánɛ. Tɛ́mɛ́naan, tíɛn!»