Read Yambeta Sɛ́aŋ 16 Bible Online

Sɛ́aŋ 16 - Yambeta bible

Sɛ́aŋ 16

¹«Mbábodɛánɛ nkə kɛ́ɛg kiim agɛɛlɛ lɛ́ pudindiógi oʼto wááŋan na mɛ.

²Pálɛ́ɛ́ kubusiə́gi puog pó pɛɔ́sɔ́gɔ́lɔ́n. Kɛnɛŋ kíəgiim əgiig kɛ́ pɔɔd pá pálɛ́ɛ́ koboyónaá pálɛ́ɛ́ kofɛgɛɛ́ lɛ́ a niɛlɛ nɛ́ɛn, Táán áa pálɛɛ́ əgugudin.

³Pálɛ́ɛ́ kɛɛlɛ náan lɛ́ pándɛŋɛn Paabá, pádɛndɛŋ tɛn ɔmbɔ́ mɛ.

⁴Náa, mbábodɛánɛ náan lɛ́ ná kɛnɛŋ kɛɔ́bɔn kɛ́lɛ́ɛ́ kiimií, poáyɔ́ɔ́ŋɛ lɛ́ njɛ́bodɛánɛ náan na pəŋi. «Ntɛʼkáyɛbodɛ́anɛ kɛ́lɛ́ a niə́bə́ə lɛ́ njɛ́ɛ nkə́ligi ondáŋ na pəŋi.

⁵Náa, nɛ́gɔŋ yɛ́ɛnɛ mbə́ndəguúlinií ná nyɔ́ əyíím yɛ́ʼtom alɛɛ́. Náan aa úmmuʼ na úmmuʼ ədiŋiə́nin tɛn lɛ́ əə “Ə́lə́ə́ áa olɛɛ́ agɛɛn əə́?”

⁶Kɛ́lɛ lɛ́, pəŋi piim polɛ ntɛ́m a kaadɛ suúúm a tɔgɛ́ɛ́ tóonɛ tó mbábodɛánɛ.

⁷Kɔmɔɛ́d lɛ́ fɔ́lɔ́b áa mbábodɛánɛ. Kɔŋɛʼ na pəŋi lɛ́ mɛ nyɛ́ɛn. Kɛ́lɛ lɛ́ mɛ ntiɛnɛn, nyɔ́ alɛɛ́ lɛ́ yíim aboyáamɛnɛn, ədiə́giim. Náa, mbaʼkɛɛn, ndəəgiim mpodómɛn nyɔ́lɛ́.

⁸Ná alɛ́ɛ́ kiimií, alɛ́ɛ́ kuloodi na pɔɔd pá a nsí lɛ́ pə́mə́lígə́ə́ a noá na kɔbɛ́, a noá na pɛbán pɛ́ sáád na tuə́ áa Táán alɛ́ɛ́ koboóyɔmɛɛ́.

⁹Kəə́lígə koɔ́bɔn a noá na kɔbɛ́ kólɛ lɛ́ pádɛágɛn oʼto na mɛ.

¹⁰A noá na pɛbán pɛ́ sáád pə́mə́lígə́ə́ lɛ́ mɛ mbɛ́ɛn a nó Paabá, podɛágɛʼtála kə́mmú.

¹¹A noá na pɛyɔm pɛ́ Táán ɔɔ́yɔmɛ pɔɔd, pə́mə́lígə́ə́, lɛ́ kɛbán kɛ́ nkúm yɛ́ a nsí yɛ́ɛnɛ kɛáʼkaásom.

¹²«Ndigi na ɛ́fɔlɛ́ ɛ́ pɛbán kə́mmú ɛ́gobodɛ́anɛ. Náa pɛáno, podɛɔ́gɔ págaáʼkɛ pɛ́lɛ́ nɛ́gɔŋ.

¹³Ná Uŋun ó pafɔ́lɔ́b ólɛ́ɛ́ kiimií, ólɛ́ɛ́ koboyɛ́ɛlɛ lɛ́ pólɛŋ fɔ́lɔ́b yɛ́ɛy ngim. Ódɛndɛ́ɛ́ kobodɛ́anɛ kɛbán a oʼto wə́ə́ŋ ó wólɛ́wóamɔɛ́d. Náa, ólɛ́ɛ́ kobodɛ́anɛ nkə kiim kɛ́ ólɛ́ɛ́ koóbɛ́ɛ́, nkə kiim kɛ́ kɛ́lɛ́ɛ́ kaáyɛ́lɛɛ́.

¹⁴Ólɛ́ɛ́ kiʼkə́midi lɛ́ nkə kiim kɛ́ ólɛ́ɛ́ kobodɛ́anɛɛ́, na mɛ áa kɛ́lɛ́ɛ́ kiimií.

¹⁵Yiim yɛ́ Paabá alɛɛ́ na yɛ́lɛ́, ɛ́lɛ tɛn yáam. Kólɛ́ aa mbábodɛánɛ lɛ́ nkə kiim kɛ́ Uŋun ólɛ́ɛ́ kobodɛ́anɛɛ́, na mɛ áa ólɛ́ɛ́ koóbɛ́ɛ́ kɛ́lɛ́.

¹⁶«Kɛnɛŋ sɔɔŋ pudiə́giʼkini kɛʼtála kə́mmú, ná ɛyaa ɛ́ kɛnɛŋ tɛn kə́mmú sɔɔŋ póɛʼtála kə́mmú.»

¹⁷Ngab ɛ paaʼkan pə́ə́ŋ pə́mmú pə́ə́bə́ə́ kosɔyɔ kɔ pɔ́lɛ́ na pɔ́lɛ́ pɔ́nɔ́ əə: «Nkə kɛ́ɛg kɛ́ ɔnɔ́ “Kɛnɛŋ sɔɔŋ pudiə́giʼkini kɛʼtála kə́mmú, ná ɛyaa ɛ́ kɛnɛŋ tɛn kə́mmú sɔɔŋ póɛʼtála kə́mmú.” Na tɛn lɛ́ “Kɛ́lɛ lɛ́ mbɛ́ɛn a nó Paabá ə”, kɛ́lɛ anyóon lɛ́ nkə ə́?

¹⁸“Kɛnɛŋ sɔɔŋ” áa yɛ́ɛy lɛ́ nkə ə́? Tɛdɛɔ́gɔ agoob nkə kɛ́ alɛɛ́ anyɔ́ŋɛn kusəə!»

¹⁹Yə́sus yɛɛ́lɛ́ŋ lɛ́ pálɛ na kɛbán kɛ́ páanyɔ́ŋɛn kumuŋíən. Náa ɔnɔ́ na pɔ́lɛ́: «Nkə kɛ́ɛnɛ kɛ́ mbábodɛánɛ lɛ́ “Kɛnɛŋ sɔɔŋ pudiə́giʼkini kɛʼtála kə́mmú, ná ɛyaa ɛ́ kɛnɛŋ tɛn kə́mmú sɔɔŋ póɛʼtála kə́mmú”, kɛ́lɛ́ kɛ́go aa polɛɛ́ əgəə́ŋíənə náan pəŋi na pəŋi lɛ́ puób ə́?

²⁰A fɔ́lɔ́b, ndabodɛ́anɛ lɛ́ polɛ́ɛ́ kaálɛɛ, poágaányam. Kɔmɔɛ́d lɛ́ pɔɔd pá a nsí yɛ́ɛnɛ pɔ́lɛ́ pálɛ́ɛ́ kɔnyɔ́ga agá. Polɛ́ɛ́ kɛɛn na ɔʼtɛ́m kogany, náa ɔʼtɛ́m kogany wááŋan ólɛ́ɛ́ kaágasɛ a tɔnyɔ́g.

²¹Kɛnɛŋ kɛ́ ɔʼkɛ́ɛd əə́ndəbíənií, alɛ ɔʼtɛ́m a kaadɛ suúúm lɛ́ kɛnɛŋ kɛ́ ntɔ́b kiə́ʼkiig. Náa, əə́bíən, əmə́bə́líí kogany, alɛ a tɔnyɔ́g tó kúfuʼ lɛ́ əə́bíən.

²²Kɛ́lɛ tɛn náan yoom ímuʼ na pəŋi. Polɛ nɛ́gɔŋ yɛ́ɛnɛ ntɛ́m a kaadɛ suúúm. Náa, mɛ ndɛ́ɛ́ kiiʼkini koboodála. Áay aa pəŋi polɛ́ɛ́ kɛɛnɛɛ́ na ɛ́fɔlɛ́ ɛ́ tɔnyɔ́g tó mɔɔd adɛndɛ́ɛ́ kobogábɛnɛɛ́.

²³Ná wɔɔ́s wóow ólɛ́ɛ́ kiigií, podɛndɛ́ɛ́ kiŋŋíən kə́mmú kɛbán na kɛbán. A fɔ́lɔ́b, ndabodɛ́anɛ lɛ́ nkə kiim kɛ́ polɛ́ɛ́ kuŋíənií na Sɛ waam a niiŋ nɛ́am, alɛ́ɛ́ koboyɛ́ʼkɛn.

²⁴Əgiim əgiig nɛ́gɔŋ, podɛ́njaŋ kɔɔŋɔn yoom na yoom a niiŋ nɛ́am. Ɔɔŋɔ́nɔɔn, páaboyɛ́ʼkɛn. Áay, poagɛn na tɔnyɔ́g tó kúfuʼ.

²⁵[59] «Nkə kiim kɛ́ mbábodɛánɛ, mbə́səə kɛ́lɛ́ a poʼkaʼtɛ́n a mɔɛn. Náa, kɛnɛŋ kiə́ndəgiim kɛ́ ntiə́giʼkinií kə́mmú kosɔyɔ na pəŋi a poʼkaʼtɛ́n. Ndɛ́ɛ́ kobomoáŋɛnɛ əgín moááŋ nkə kɛ́ kɛ́adɛ́ʼtɛg Paabá.

²⁶Wɔɔ́s wóow, polɛ́ɛ́ kumuŋíənə moom a niiŋ nɛ́am. Ntɛɔ́gɔ əgusəə lɛ́ ndaamoyɔ́sɔ́gɔlɔn a kidíídí kɛáŋan

²⁷lɛ́, Paabá nyɔ́lɛ́nyɔ́amɔɛ́d alɛ agobonyɔ́ŋɛn. Alɛ agobonyɔ́ŋɛn lɛ́ polɛ agɛnnyɔ́ŋɛn mɛ, pumə́yəə́liʼtini lɛ́ kɔ na nyɔ́lɛ́ aa mbíim ndon.

²⁸Ndɛ əgiim ndon a nó Sɛ waam, mbə́yiim a nsí yɛ́ɛnɛ. Nɛ́gɔŋ yɛ́ɛnɛ, mbándadɛ́ɛmɛn a nsí yɛ́ɛnɛ əguúlini a nó Paabá.»

²⁹Paaʼkan pə́ə́ŋ Píísə́ə́ pɔ́nɔ́ na nyɔ́lɛ́: «Táá wɔɔ́ndɔsɔyɔɔ́ nɛ́gɔŋ moááŋ ə́, fiɛ́d a poʼkaʼtɛ́n.

³⁰Nɛ́gɔŋ yɛ́ɛnɛ timə́líʼtíníí lɛ́ wɛ waálɛŋ yiim, odɛɔ́gɔ agoboŋ lɛ́ páyaŋ kuguŋíən kɛbán. Kólɛ́ aa timə́líʼtíníí lɛ́ olɛ əgiim ólon a nó Táán.»

³¹Náa Yə́sus ɔnɔ́ na pɔ́lɛ́: «Pumə́líʼtíníí nɛ́gɔŋ əə́?

³²Táá kɛnɛŋ aa kɛ́ɛnɛ kiə́ndəgimií. Kɛ́ aa kɛ́ɛnɛ kɛándɛɛ́ kɔ nɛ́gɔŋ. Kɛ́lɛ kɛnɛŋ kɛ́ pálɛ́ɛ́ kobofámɛɛ́, ɛ́nɛ́ mɔɔd əə́siəd yəəŋ ngə́. Polɛ́ɛ́ kiʼti púmíʼtí mɛnyɔ́əsíŋ. Náa, ntɛɔ́gɔ mɛnyɔ́əsíŋ lɛ́ Paabá alɛ na mɛ.

³³Mbábodɛánɛ náan agɛɛlɛ lɛ́ póɛn ntɛ́m a kaadɛ wiiy lɛ́ polɛ paladáán na mɛ. Polɛ́ɛ́ konɛ ntɔ́b a nsí, náa pisə́ən ongoo óo! Mɛ, mbɔ́nyɔŋ nsí!»