Read Yambeta Sɛ́aŋ 18 Bible Online

Sɛ́aŋ 18 - Yambeta bible

Sɛ́aŋ 18

¹Ná ayɛ́ɛ aáʼkosɔyɔ náan, aáság kodɛ́ɛmɛn na paaʼkan pə́ə́ŋ agosan. Pɛ́ɛ́yáág nsɛ́ɛ́ ɛ məní yɛ́ a Sɛdɛlɔ́ɔŋ. A nsɛ́ɛ́ ɛ məní ɛgo yɛ́ɛy, pɔlɛ́m púmmú póyɛ́ɛ kɔ. Yə́sus aáság kɛɛn kɔ́gɔ́ɔg na paaʼkan pə́ə́ŋ.

²Siudáa nyɔ́ yiígóodi lɛ́ ámoólɛg yɛɛ́lɛŋɛn pɔlɛ́m pógo póob lɛ́ paaʼkan piim páyɛ́ɛ pɛɛnan kɔ na Yə́sus.

³Náan aa əyíím ə́súidə kiʼtúú kɛ́ pasɔ́njaa, na pənuŋ Tɛ́mpɛl əgiim əgumin Yə́sus. Puʼkúm pó payaaganɛʼ pɛfɔny na Pafalɛsɛyɛ́ɛŋ aa pə́yíím pádom pɔɔd póob náan na Siudáa. Pə́yíím pááboŋɛna lɛ́ póonɛ na mobag mó pɛdá, pə́mmú na ɔngɔŋ a ɔmbɔg, na moláam, na tomony tóalola.

⁴Wɔnɔ́ ná Yə́sus nyɔ́lɛ́ ayálɛ́ŋɛ́ɛ́ lɛ́ pɛdá pɛ́lɛ əgumuyíimin, ayɛ́ɛ́n əgəə́bun na pɔ́lɛ́ a ngə́, náa ɔnɔ́: «Ánɛ aa puə́guunə náan əə́?»

⁵Náa pɔ́nɔ́ na nyɔ́lɛ́: «Tɛlɛ əguunə Yə́sus, Mɔɔ́n ó Násalɛd o!» Náa Yə́sus ɔnɔ́ na pɔ́lɛ́: «Mɛ ogo aa nyóonɛ o.» Siudáa nyɔ́ yiígóodi lɛ́ ámoólɛg ayɛ́ɛ kɔ a ondáŋ ó pɔɔd póob.

⁶Əgín tɛn ná Yə́sus yiísə́ə́ náan lɛ́: «Mɛ ogo aa nyóonɛ.» Ungim aáság kuúləni kingiíngím, páábɛlɛ́gɛd a nsí pɔ́lɛ́ piim pɛlɛgɛdɛgɛdɛ.

⁷Pááság kodɛ́ɛman. Yə́sus aáság kiiʼkini kubuŋíən ɔnɔ́: «Poɔʼkɔ́ ánɛ aa polɛɛ́ əguunə áŋ?» Náa pɔ́nɔ́ na nyɔ́lɛ́: «Tɛlɛ əguunə Yə́sus, Mɔɔ́n ó Násalɛd.»

⁸Yə́sus ayɛ́bodɛánɛ ɔnɔ́: «Mbábodɛánɛ lɛ́ mɛ ogo aa nyóonɛ. Wɔnɔ́ ná poɔʼkɔ́ mɛ áa puə́ginjuunə, tíən pɔsɔ́g póonɛ, pɛ́ɛn.»

⁹Náan aa nkə kɛ́ yiísə́ə́ kɛ́yáás. Lɛ́ yiísə́ə́ wɔɔ́s wúmmú na Táán ɔnɔ́: «Paabá taa, ungim nyɔ́ oyɛ́nyɛɛ́ʼkɛn anyóon. Ɔmbɔ́ úmmuʼ ntinímini.»

¹⁰Simɔ́ɔŋ Píɛ yiígóodi ɛbag yə́ə́ŋ ɛ́ pɛdá kɔ áay a kɛbágáá, oósooyin yɛ́lɛ́ soád, ɔnɔ́ na uʼkudin wo ɔnjaaganɛʼ pɛfɔny nyɔ́ oʼkóʼkóón ə́siəd a oʼtóɛŋ wó ombɔg ó nɛnom, foáb. Oʼtóɛŋ kwə́s. Uʼkudin ogo nyóon ayɛ́ɛ niiŋ lɛ́ Mə́lcus.

¹¹Yə́sus yɛɛ́sásɛ́dɛn Píɛ, ɔnɔ́: «Píɛ tuə́? Úúlísi ɛbag yááŋ a kɛbágáá. Waanyɔ́ŋɛn lɛ́ ntɛŋŋó kilən kɛ́ ntɔ́b kɛ́ɛnɛ kɛ́ Paabá ɔnɔ́ ŋŋo a?»

¹²Kiʼtúú kɛ́ pasɔ́njaa, na nkúm yɔɔbɔn, na pənuŋ palaamɛʼ pá Yúdɛn pá pə́yíímən kɔ áay píígúmin Yə́sus, pámámoogóda na tuwoo, pámɛ́ɛn na nyɔ́lɛ́.

¹³Pɛ́ɛ́yáŋ agɛɛn na nyɔ́lɛ́ a nó Ánaʼ, sə́ən ɛ Kayíif nyɔ́ ayɛ́ɛ Ɔnjaaganɛʼ pɛfɔny nyɔ́ oʼkóʼkóón waag ogo wóow.

¹⁴Kayíif ogo nyóon aa yiísə́ə́ na palaamɛʼ pá Yúdɛn ɔnɔ́: «Kɛ́lɛ a kɔŋɛʼ kuə́s lɛ́ mɔɔd úmmuʼ ə́gu a kidíídí kɛ́ nigúu kilúd.»

¹⁵Ayɛ́ɛ páagɛɛn náan na Yə́sus, pa Píɛ pɔ́lɛ́ ná ongaaʼkan nyummú, pə́əgiim pə́muyə́ən a ngim. Wɔnɔ́ ná ongaaʼkan nyóon yɛɛ́lɛŋanan na Ɔnjaaganɛʼ pɛfɔny nyɔ́ oʼkóʼkóón, yɛɛ́sɔ́d kɔ a yáa yɛ́ Ɔnjaaganɛʼ pɛfɔny nyɔ́ oʼkóʼkóón nyóon, kɛnɔ kɛ́ páyɛ́ɛ́n na Yə́sus.

¹⁶Píɛ nyɔ́lɛ́ aáság kodam ɔ́lɔb káanɛ a táán, a udíyoog wó oʼkág. Ongaaʼkan nyóʼkáag nyɔ́ yɛɛ́lɛŋanan na Ɔnjaaganɛʼ pɛfɔny nyɔ́ oʼkóʼkóón aáság kiiʼkini kiim álon, ɔɔ́sɔyɔ na ombódóm nyɔ́ píídə́nígi a udíyoog, pááság kosɔ́dɛ Píɛ.

¹⁷Náa ombódóm nyóon nyɔ́ ayɛ́ɛ ənuŋ udíyoog əə́ŋíən ɔnɔ́ na Píɛ: «Wɛ mɔɔd nyóonɛ, olɛ tɛn a ondáŋ ó paaʼkan pá mɔɔd nyóon, ngɔ́ɔ́?» Náa Píɛ ɔnɔ́ na nyɔ́lɛ́: «Ndóo óo, ntɛɔ́gɔ ongaaʼkan wəəŋ!»

¹⁸Pəgudin pá Ɔnjaaganɛʼ pɛfɔny nyɔ́ oʼkóʼkóón na pənuŋ palaamɛʼ pɛ́ɛ́góny yug a oʼtómódáán lɛ́ niŋiʼ nɛ́yɛ́ɛ kɔ. Páyágɔnyɛdɛn agoósa. Píɛ aáság kiim əgəə́bulid tɛn kɔ na pɔ́lɛ́ agoósa.

¹⁹Ɔnjaaganɛʼ pɛfɔny nyɔ́ oʼkóʼkóón aáság kəə́bə́ə́ kolóóya Yə́sus a kɛbán kɛ́ paaʼkan pə́ə́ŋ na a nkə kɛ́ ayɛ́ɛ əgiim yáaʼkananɛ na pɔɔd.

²⁰Náa Yə́sus ɔnɔ́ na nyɔ́lɛ́: «Paabá! Njɛ́ɛ agosɔyɛla əgín náanɛ moááŋ a udi ó mɔɔd ungim. Njɛ́ɛ agaaʼkananɛ pɛnɛŋ piim a puog pó pɛɔ́sɔ́gɔ́lɔ́n na a Tɛ́mpɛl. Njɛ́ɛ agaaʼkananɛ a pɛnɔ pɛ́ Yúdɛn ɛlɛɛ́ agaágɔnyɛla. Njɛ́ɛ ntɛsɔyɔ a ɛdɔɔgɛ.

²¹Náa ntɛálɛŋɛɛ́ anɛ́ɛ́n a igə aa olɛɛ́ agá əgiim əgiŋíən na mɛ. Ŋíən na pɔɔd pá páyɛ́ɛ əgiimən agoob tɔgɛ́ɛ́ tóam, págodɛ́anɛ. Pɔ́lɛ́ páalɛŋ kɔŋɛʼ nkə kɛ́ njɛ́ɛ agosɔyɔ.»

²²Ná Yə́sus əyúlísíni náan na Ɔnjaaganɛʼ pɛfɔny nyɔ́ oʼkóʼkóón, unnuŋ nyummú nyɔ́ ayɛ́ɛ kɔ áay aáság koob ilúún, náa ɔnɔ́ Yə́sus ə́siəd a ombáŋ, paláŋánáŋáná. Yɛɛ́sásɛ́dɛn Yə́sus ɔnɔ́: «Áay! Tuə́ áa wɔɔ́sɔyɔ náan na Ɔnjaaganɛʼ pɛfɔny nyɔ́ oʼkóʼkóón?»

²³Náa Yə́sus ɔnɔ́ na nyɔ́lɛ́: «Ooʼó! Nga mbáyɛ́b kosɔyɔ, ɛ́ʼtɛánɛ́ nkə kɛ́ kɛbɛ́ kɛ́ mbə́səə yi! Nga lɛ́ nkə kɛ́ mbə́səə kɛ́lɛ sáád, ɛ́ʼtɛánɛ́ a igə aa omɛ́sábɛn anɛ́ɛ́n nɛbany a ombáŋ?»

²⁴Ánaʼ aáság kusəə lɛ́ pɛ́ɛn na Yə́sus náan oʼkódágódá a nó Kayíif, Ɔnjaaganɛʼ pɛfɔny nyɔ́ oʼkóʼkóón.

²⁵Simɔ́ɔŋ Píɛ nyɔ́lɛ́ yiíligi əgín agoósa yug. Pɔɔd pá páyɛ́ɛ agoósa yug na nyɔ́lɛ́ pə́ə́bə́ə́ kosɔyɔ pɔ́nɔ́: «Wɛ tɛn olɛ ongaaʼkan o Mɔɔd nyóon, ngɔ́ɔ́?» Píɛ əə́bə́ə́ kiiʼkini kaácɛma, ɔnɔ́: «Ndóo óo! Ntɛɔ́gɔ ongaaʼkan wəəŋ.»

²⁶Uʼkudin nyummú wo Ɔnjaaganɛʼ pɛfɔny nyɔ́ oʼkóʼkóón, moóngaa nyɔ́ a yoog ɛ pɔɔd ɛ sɔ́g nyɔ́ Píɛ yɛɛ́sóm oʼtóɛŋ aáság kusəə ɔnɔ́ na nyɔ́lɛ́: «Adɛ́ mbágoodála na nyɔ́lɛ́ kága a pɔlɛ́m ná timíim əmuúgumin ə?»

²⁷Píɛ aáság kiiʼkini kosáŋɛnɛ. Əgín tɛn a kɛnɛŋ kɛ́go kɛ́ɛg kɛbaŋ kɛ́ nsɛɛ kɔʼkɔ́lɛ́ɔʼkɔɔ.

²⁸Na pɛbáŋɛn pɛ́ a koany kaáyɛnɛ, pɛ́dɛ́ɛ́mɛn na Yə́sus a nó Kayíif, pámɛ́ɛn na nyɔ́lɛ́ a nó Pɛláad nyɔ́ ayɛ́ɛ ngɔ́mɛnaʼ yɛ́ nkóʼkóón yɛ́ a Ɔlɔ́ma. Wɔnɔ́ ná wɔɔ́n ó Páska óyɛ́ɛ wándɛ ndúmiʼ, pɔɔd pá páyɛ́ɛ́n kɔ́gɔ́ɔg na Yə́sus, pə́yə́núŋíí. Pádɛʼkɔ́ɔsɔd kɔ agɛɛlɛ lɛ́ pɛ́ɛn filí agonɛ wɔɔ́n.

²⁹Pɛláad aa yɛɛ́lón əgiim agosɔyɔ na pɔ́lɛ́. Əyíbuŋíən ɔnɔ́: «Mɔɔd nyóonɛ nkə aa amɛ́ɛ́lɛ kɛ́ kɛbɛ́ aa pumə́mugumin ə́?»

³⁰Náa pɔ́nɔ́ na nyɔ́lɛ́: «Ngɔ́mɛnaʼ, adɛʼkɛ́ɛ agɛɛn lɛ́ alɛ ɔmbɛ́ o mɔɔd ná tidimuúguminin əgiim na nyɔ́lɛ́ a udi wááŋ.»

³¹Náa Pɛláad ɔnɔ́ na pɔ́lɛ́: «Púmuúsiəd, póɛn amoóyɔmɛ pəŋibáamɔɛ́d wɔnɔ́ ná pɛcɛm pɛáŋan pɛ́lɛɛ́ əgusəə.» Pə́yímuyúlísíni pɔ́nɔ́: «Ndóo! Pəsi tiʼkóodi toɛn tóonɛ lɛ́ tɛ́som kɛbán wɔnɔ́ kɛ́ɛg tɛ́ɛbaasɛ lɛ́ pámoyóon.»

³²Náan aa nkə kɛ́ Yə́sus yiísə́ə́ əguloodi ombod ó kugu wó alɛ́ɛ́ kugu, kɛ́yáás.

³³Pɛláad aáság kuúlini kosɔd a yoog, ɔɔ́dɔ́ŋɔn Yə́sus, náa ɔnɔ́ na nyɔ́lɛ́: «Olɛ nkúm ɛ Yúdɛn a, ngɔ́ɔ́?»

³⁴Yə́sus əyímuŋíən ɔnɔ́ əə: «Wɛɛ́nyɔ́amɔɛ́d áa omáyɛ́ɛ́ŋɛ́nɛ́ɛ́ kiŋŋíən náan oóm, omóób na pɔɔd pɛ́ndɛ́ŋ ə́?»

³⁵Náa Pɛláad ɔnɔ́ na nyɔ́lɛ́: «Ndɛ Yúdɛn a? Ndɛ əguguŋíən lɛ́ kɛbán igə aa wəə́də́ə́ŋ náan aa pɔɔd pá nigúu nɛáŋ na puʼkúm pó payaaganɛʼ pɛfɔny pə́mə́gugúmin əgiim na wɛ ná ndɛɛ́ ə́?»

³⁶Náa Yə́sus ɔnɔ́ na Pɛláad: «Nɛlaamɛʼ nɛ́am nɛ́dɛɔ́gɔ Nɛlaamɛʼ nɛ́ a nsí yɛ́ɛnɛ. Pɔ́nɔ́ nɛ́yɛ́ɛnɛn Nɛlaamɛʼ nɛ́ a nsí ná pɔɔd páam páánɔɛyɛ pɛdá agɛɛlɛ lɛ́ palaamɛʼ pá Yúdɛn pə́diyíʼkumin. Náa, a nɛ́gɔŋ, nɛlaamɛʼ nɛ́am nɛ́dɛɔ́gɔ nɛ́ɛnɛ áanɛ.»

³⁷Ná Pɛláad ayóób náan, əyímuŋíən ɔnɔ́ əə: «Wɔʼkɔ́ olɛ aa nyóon nkúm yi?» Náa Yə́sus ɔnɔ́ na nyɔ́lɛ́: «Ɛɛ́ɛ, ndɛ nkúm náan wɔnɔ́ ná wəə́ʼkusəlií. Lɛŋ lɛ́, mbə́biə́níí, mbə́yiim a nsí yɛ́ɛnɛ lɛ́ ná ndónɛ mbaasɔ́ ɛ pasáád. Ungim nyɔ́ alɛɛ́ o sáád, agoob nkə kɛ́ ndə́əsəə.»

³⁸Pɛláad aáság kumuŋíən ɔnɔ́ əə: «Nkə aa kɛ́lɛɛ́ pasáád ə́?» Ná Pɛláad ayɛ́ɛ əə́ʼkumuŋíənə náan, aáság kiiʼkini kolon əgiim agosɔyɔ na nigúu. Ayɛ́bodɛánɛ ɔnɔ́: «Mɛ, ntɛɔ́ŋɛn ɛgom a nkó ɛ mɔɔd nyóonɛ ɔmbɔ́ ímuʼ yɛ́ yáagɛɛlɛ lɛ́ mmoyɛ́ʼkɛn nsɔ́ɔ́.

³⁹Ooo, wɔnɔ́ ná kɛ́lɛanɛɛ́ a ondoŋá wááŋan lɛ́ maag miim, a kɛnɛŋ kɛ́ wɔɔ́n ó Páska, ndəbuúlisin mɔɔd o yoog yɛ njaan úmmuʼ nyɔ́ poányɔ́ŋɛn əə, ndis anɛ́ɛ́n ánɛ ə́, nkúm ɛ Yúdɛn əə́?»

⁴⁰Pə́ə́bə́ə́ agá kosása nɛŋo a mɔɛn, pɔ́nɔ́: «Ndóo óo! Tɛmámosáŋɛ́nɛ nyɔ́lɛ́. Íbilísin agá Palábas o!» Palábas ɔmmɔɛ́d nyóon nyɔ́ páyɛ́ɛ əgusəə lɛ́ ə́lis, ayɛ́ɛ ungiíbən nyɔ́ oʼkóón, aágoóna pɔɔd.