Read Yambeta Sɛ́aŋ 19 Bible Online

Sɛ́aŋ 19 - Yambeta bible

Sɛ́aŋ 19

¹Pɛláad aáság koboyɛ́ʼkɛn toɛn lɛ́ pə́siəd Yə́sus, pɛ́ɛn amobáam na nsuə́.

²Pasɔ́njaa píísiə́d nuwoo nó pɔsɛ́n, páánog, pámámosɔ́nɛg a oʼto wɔnɔ́ nodám nó nkúm. Pə́yímuníígi ntaa yɛ́ mbógógó,

³pə́əgiim adɛ́lɛman a udi wə́ə́ŋ əgumuúsoyidəni pɔ́nɔ́: «Nkúm ɛ Yúdɛn, calɛʼ calɛʼ calɛʼ!» Páamosában ambany a ombáŋ.

⁴Pɛláad aáság kiiʼkini kiim álon əgiim ɔsɔyɔ na nigúu, ɔnɔ́ na pɔ́lɛ́: «Mɛ kiim ndon na Yə́sus. Lɛŋáan lɛ́ ntɛɔ́ŋɛn ɛgom a nkó yəəŋ yɛ́ ndɛɛ́ ogomoyɛ́ʼkɛn nsɔ́ɔ́ a yɛ́lɛ́.»

⁵Yə́sus aáság kiim álon na ntaa yɛ́ mbógógó yɛ́ pə́yímuníígi, na nodám nó pɔsɛ́n a oʼto. Náa Pɛláad ɔnɔ́ na nigúu: «Táá, nyɔ́ aa nyóonɛ o.»

⁶Ná puʼkúm pó payaaganɛʼ pɛfɔny, na pənuŋ palaamɛʼ pɛ́ɛ́dála Yə́sus əə́ʼkiim álon, pə́ə́bə́ə́ kosása, pɔ́nɔ́: «Ɛ́ʼkɛn toɛn óo, pɛ́ɛn amoóbaŋan a ɔmbásá! Ɛ́ʼkɛn toɛn pɛ́ɛn amoóbaŋan a ɔmbásá ó!» Náa Pɛláad ɔnɔ́ na pɔ́lɛ́: «Ndóo óo! Púmuúsiəd pəŋibáamɔɛ́d, póɛn amoóbaŋan. A mɛ, mbábodɛánɛ lɛ́ ntɛɔ́ŋɛn ɛgom a nkó yəəŋ.»

⁷Náa Yúdɛn yɔ́nɔ́ na Pɛláad: «Pɛcɛm piə́s pɛ́lɛ kɔ. Pɛ́lɛ́ aa pə́mə́mugúmin pɛɔ́nɔ́ alɛ lɛ́ pámoyóon a igúg yɛ́ɛnɛ lɛ́ alɛ əgəə́səə ɔnɔ́ nyɔ́lɛ́ alɛ Mɔɔ́n o Táán.»

⁸Ná Pɛláad ayóób náan, nkó yəəŋ yaáság kobag.

⁹Aáság kiiʼkini kosɔd na Yə́sus a yoog, ɔnɔ́ na nyɔ́lɛ́: «Olɛ mɔɔ́n nyɔ́ a yoog ɛ pɔɔd yɛ ánɛ áŋ?» Náa, Yə́sus adɛʼkɛ́ɛ agomoóbaalɛ kə́mmú.

¹⁰Náa Pɛláad ɔnɔ́ na nyɔ́lɛ́: «Mɛ áa odɛágɛʼka á! Ondɛŋɛn lɛ́ ndɛ na toɛn tóonɛ lɛ́ mbəʼkusəə lɛ́ pə́guúlis, pə́yiguúlis ə? Mbəʼkusəə tɛn lɛ́ pɛ́ɛn agoóbaŋan a ɔmbásá, páagoóbaŋan a?»

¹¹Náa Yə́sus ɔnɔ́ na nyɔ́lɛ́: «Táán fiɛ́d kooyɛ́ʼkɛn toɛn tóod, ná odɛɔ́gɔ na tólɛ́. Lɛŋ agá lɛ́, mɔɔd nyɔ́ əmíim agɛndɛg na pəŋi aa aányáŋɛn kɔbɛ́ kó koálaŋánan.»

¹²Áay aa Pɛláad əyə́ʼtúmíí kuunə pungə́ póonɛ lɛ́ nyɔ́lɛ́ ə́lis Yə́sus, Yúdɛn ɛdɛmoyáʼkɛ́nɛ. Pə́ə́bə́ə́ agá kosása, pɔ́nɔ́: «Ooo! Uməʼkumuúlis, ná umə́siə́díí anyóon wɔnɔ́ mɔɔd nyɔ́ ɔdɛɔ́gɔ a nɛsɔ́g na Sɛsáal lɛ́, kɛnɛŋ kɛ́ mɔɔd alɛ əgəə́səə lɛ́ nyɔ́lɛ́ alɛ nkúm, kióloodi lɛ́ alɛ agonɔɛyɛ Sɛsáal.»

¹³Ná Pɛláad ayóób tɔgɛ́ɛ́ tóod náan, aáság kiim álónɛ Yə́sus, əmə́mulígígi a oʼkɔɔ wó onjɔmɛʼ pɛyɔm. Páyɛ́ɛ agodɔ́ŋɔn kɛnɔ kɛ́go kɛ́ɛg a tɔgɛ́ɛ́ tó əbələ́ə lɛ́ Kabáʼta. Áay lɛ́ kɛnɔ kɛ́ píísóbíni na aʼtáán.

¹⁴Wɔɔ́s wóow óyɛ́ɛ pɔ́nɔ́ wɔɔ́n ó Páska na koany. Ayɛ́ɛ aándɛ tóɛf. Náa Pɛláad ɔnɔ́ na Yúdɛn: «Yúdɛn! Táá nkúm yaaŋan aa yɛ́ɛy o!»

¹⁵Náa, pɔ́lɛ́ pə́ə́bə́ə́ agá kosása na toɛn, pɔ́nɔ́: «Póon o! Pámoyóon! Ɛ́ʼkɛn toɛn pámoóbaŋan a ɔmbásá!» Náa Pɛláad ɔnɔ́ na pɔ́lɛ́: «Nkúm yaaŋan aa poɔʼkɔ́ pábaŋan a ɔmbásá ə́?» Náa puʼkúm pó payaaganɛʼ pɛfɔny poɔ́nɔ́ na nyɔ́lɛ́: «Tiʼkóodi nkúm yɛndɛ́ŋ yɛ́ ɛmááyɛn Sɛsáal o!»

¹⁶Pɛláad yiísiə́d Yə́sus, amáboyɛ́ʼkɛn lɛ́ pɛ́ɛn amoóbaŋan a ɔmbásá. Pááság kumuúsiəd, pámɛ́ɛn na nyɔ́lɛ́.

¹⁷Yə́sus əyə́lúlíí ɔmbásá wə́ə́ŋ nyɔ́lɛ́nyɔ́amɔɛ́d, aálón pálɛ́ɛg na wólɛ́. Páyɛ́ɛ́n na nyɔ́lɛ́ a kɛnɔ kímmú pɔ́ɔdɔ́ŋɔn a tɔgɛ́ɛ́ tó əbələ́ə lɛ́ Kologóʼta. Áay lɛ́ kɛlɛ́ʼtɛ́g kɛ́ oʼto.

¹⁸Kɔ́gɔ́ɔg aa páyɛ́mobáŋan a ɔmbásá. Wɔɔ́s ogo wóow tɛn, pɛ́ɛ́báŋan pɔɔd pə́mmú pábaan a ɔmbásá. Páyɛ́boyáágan lɛ́ ɛ́nɛ́ sɔ́g a ɔmbásá wə́ə́ŋ lɛ́ nyóonɛ a ombɔg ó Yə́sus ó nɛnom, nyummú a oó kɛmɛs, nyɔ́lɛ́ a kɛgaágadɛ.

¹⁹Pɛláad yiísə́ə́ lɛ́ pə́siəd kɛsom kɛ́ kɛláaŋ, pə́dilid kɔ, pábaŋan a ɔmbásá ó Yə́sus a mɔɛn pɔ́nɔ́: «Yə́sus o Násalɛd, nkúm ɛ Yúdɛn.»

²⁰Píídílə kɛ́lɛ́ a əʼkíí ádáád lɛ́, na a əbələ́ə, na a laʼtɛ́ɛŋ, na a kɛlɛ́ɛg. Náan aa Yúdɛn ngíŋ yɛɛ́bána pɛlɛŋ pɛ́ɛb lɛ́ kɛnɔ kɛ́go kɛ́ɛg kɛ́ pɛ́ɛ́báŋan Yə́sus kɛ́dɛʼkɛ́ɛ tɛn laálá na pálɛ́ɛg.

²¹Puʼkúm pó payaaganɛʼ pɛfɔny poáság kɛɛn adɛ́anɛ na Pɛláad poɔ́nɔ́: «Odɛʼkɛ́ɛ lɛ́ údilə náan wɔʼkɔ́: Nkúm ɛ Yúdɛn. Pámɛ́ɛ ədilə agá pɔ́nɔ́: Mɔɔd nyóonɛ ayɛ́ɛ əgəə́səə ɔnɔ́ nyɔ́lɛ́ alɛ nkúm ɛ Yúdɛn.»

²²Náa Pɛláad ɔnɔ́ na pɔ́lɛ́: «Nkə kɛ́ mbə́dilə, kímə́dílə́ə́!»

²³Ná pasɔ́njaa páyɛ́ɛ páʼkoman kobaŋan Yə́sus a ɔmbásá, pááság kusiəd pilə́ə́ piə́ŋ, pámáába ngab íniʼ, a nto yɔɔbɔn tɛn íniʼ lɛ́, na mɔɔd na ngab yəəŋ. Kilə́ə́ kɛáság kolɔb a nsí kímuʼ, ntaa yəəŋ. Ntaa yɛ́ɛy pɛ́ɛ́lád yɛ́lɛ́ kimíímílí, ɔndad fiɛ́d.

²⁴Pasɔ́njaa pə́ə́bə́ə́ kɔɔ́cɔcɔb kɔ pɔ́lɛ́ na pɔ́lɛ́, pɔ́nɔ́: «Tɛdɛngwága ntaa yɛ́ɛy agaabanan. Tɛɔ́ndɔn agá ntɔŋ agodála sɔ́g nyɔ́ kíədə́əŋ lɛ́ nyɔ́lɛ́ aa ə́siədií[61]» Náan aa kíígóodi lɛ́ nkə kɛ́ kíyə́dílə́ə́ a Kálaʼtaʼ ɛ Táán kɛ́as. Kɛ́lɛ kɔ lɛ́: «Páyáábánan pilə́ə́ pɛ́am, pááság kɔɔ́ndɔn ntɔŋ a ntaa yaam.» Kɛ́lɛ́ kɛ́go aa kɛ́ɛg pasɔ́njaa páyɛ́ɛ́lɛ.

²⁵A ɛbá yɛ́ ɔmbásá ó Yə́sus, pagɛ́ɛd pə́mmú páyɛ́ɛ kɔ padɛ́lɛ́máán lɛ́ na ŋŋí, na ŋŋíngaa, na Malɛ́a nyɔ́ a Magdala, na Malɛ́a tɛn nyummú, oʼkán ó Koloʼpáas.

²⁶Yə́sus aáság kodála ŋŋí oʼtɛ́lɛ́máán a ɛbá yɛ́ ongaaʼkan wəəŋ nyɔ́ ayɛ́ɛ anyɔ́ŋɛn. Náa ɔnɔ́ na ŋŋí: «Mmə́! Táá wɔɔ́mɔ́ɔ́n áa nyóon.»

²⁷Aáság kaágasɛ ná ongaaʼkan wəəŋ tɛn alɛɛ́, náa ɔnɔ́ na nyɔ́lɛ́: «Táá ŋŋí waaŋ aa nyóon.» Əgəə́bə́ə a wɔɔ́s wóow, ongaaʼkan nyóon aáság kusiəd Malɛ́a a noádɛʼ nuə́ŋ.

²⁸A ngim yɛ́ɛy, wɔnɔ́ ná Yə́sus yɛɛ́lɛŋɛn lɛ́ pɛbán piim pɛándɛ pɛmanáán, aáság kusəə ɔnɔ́: «Nɛŋɔ́ɛd nɛ́lɛ na mɛ[62]» Yiísə́ə́ náan agɛɛlɛ lɛ́ nkə kɛ́ kíyə́dílə́ə́ a Kálaʼtaʼ ɛ Táán, kɛ́as.

²⁹Ungwə́ŋ wúmmú óyɛ́ɛ kɔ áay na pɛŋwáŋwáŋá pɛ́ maloʼ a kaadɛ. Pasɔ́njaa pááság kusiəd ɛʼpɔ́ɔnsɛ, pááfanyɛg a oʼto wó ɔʼtab wó isóob, pə́ə́nyum a pɛŋwáŋwáŋá pɛ́ maloʼ pɛ́ɛb[63], pááság kiim agaag Yə́sus a unuʼ lɛ́ ɔ́sɔ́sɔ.

³⁰Ná ayɛ́ɛ aáʼkosɔ́sɔ, yiísə́ə́ ɔnɔ́: «Kiim kɛáʼkaáyɛ́ɛlɛ o!» Aáság kiisimid, aádó oʼto.

³¹Wɔɔ́s wóow óyɛ́ɛ pɔ́nɔ́ kisúgiʼ na koany. A mandoŋá má Yúdɛn, kɛ́dɛʼkɛ́ɛ lɛ́ kisúgiʼ kɛ́boan kɛlóŋ a táán, kɛbaŋáán a ɔmbásá. (Kisúgiʼ kɛ́go kɛ́ɛg kɛ́yɛ́ɛ kisúgiʼ kɛ́ kɛgóón lɛ́ Páska yiídə́əŋ wɔɔ́s ogo wóow.) Kólɛ́ aa palaamɛʼ páyɛ́ɛ́n əŋíən na Pɛláad lɛ́ yɛ́ʼkɛn toɛn pə́búnə ambaan á pɔɔd póob pádáád pá pɛ́ɛ́báŋan a ɔmbásá[64], ná pə́suuləni pɛlóŋ pɛɔ́bɔn.

³²Pɛláad aáság kɛɛ́ʼkɛn toɛn na pasɔ́njaa lɛ́ pɛ́ɛn əbúnə. Pááság kɛɛn əbúnə. Pə́yə́ʼtúmíí na sɔ́g o na oʼto na oʼto nyɔ́ ayɛ́ɛ a ɛbá ɛ́ Yə́sus, pə́mə́mubúnə ambaan, páásán a sɔ́g wo annam ábaan, pə́ə́búnə tɛn.

³³Ná pə́yííg a Yə́sus, pɛ́ɛ́bóan lɛ́ əə́ʼkugu. Pááság kumuudi nyɔ́lɛ́ pə́dimubúnə ambaan.

³⁴Sɔ́njaa yimmú yaáság kusiəd nɛɔŋ, yɔ́nɔ́ na Yə́sus ə́siəd a toɛn, tiíb. Maŋɔ́ mááság kiim málon sɛaad, na məní ondáŋ.

³⁵Mɔɔd nyɔ́ yiídílə pɛbán pɛ́ɛnɛ, alɛ mɔɔd nyɔ́ yɛɛ́dála pɛ́lɛ́ na əngis yə́ə́ŋ. Mbaasɔ́ yəəŋ ɛlɛ ɛ fɔ́lɔ́b. Nyɔ́lɛ́nyɔ́amɔɛ́d aálɛŋ lɛ́ nkə kɛ́ alɛɛ́ əgusəə kɛ́lɛ fɔ́lɔ́b. Alɛ əgudəənə pɛ́lɛ́ agɛɛlɛ lɛ́ póag oʼto na Táán.

³⁶Nkə kɛ́ɛnɛ kiim kɛ́ɛ́dáŋána náan agɛɛlɛ lɛ́ nkə kɛ́ kíyə́dílə́ə́ a Kálaʼtaʼ ɛ Táán kɛ́as, lɛ́ kíyə́dílə́ə́ kɔ lɛ́: «Ɔmbɔ́ əgín kigú kiə́ŋ kímuʼ pádɛndɛ́ɛ́ kubun[65]»

³⁷Kíyə́dílə́ə́ tɛn a kɛnɔ kímmú kɔ a Kálaʼtaʼ ɛ Táán lɛ́: «Pálɛ́ɛ́ kaágasɛ agodɛ́ʼtɛg nyɔ́ píínə́ə́n toɛn na nɛɔŋ[66]»

³⁸A ngim yɛ́ pɛbán pɛ́ɛb pɛ́yɛ́ɛ pɛáʼkaásan, mɔɔd nyummú niiŋ lɛ́ Yósɛb, kibíəniʼ kɛ́ a pálɛ́ɛg yɛ Əliməʼtə́ə ayɛ́ɛ́n əŋíən na Pɛláad lɛ́ ámoyɛ́ʼkɛn kɛlóŋ kɛ́ Yə́sus nyɔ́lɛ́ yɛ́ɛn əni. Yósɛb ogo nyóon ayɛ́ɛ aándɛ a ondáŋ ó paaʼkan pá Yə́sus. Náa, adɛʼkɛ́ɛ ogoóloodi lɛ́ ayɛ́ɛ agodammana Yúdɛn. Pɛláad aáság komoyɛ́ʼkɛn toɛn. Náan aa yiísiə́d kɛlóŋ kɛ́ Yə́sus, amɛ́ɛn əni.

³⁹Mɔɔd tɛn nyummú niiŋ lɛ́ Nɛʼkodɛ́ɛm aáság kiim aboan Yósɛb agɛɛlɛ lɛ́ pə́ni Yə́sus. Nɛʼkodɛ́ɛm əyíím na kíloʼ niʼtin na yówád ɛ lamɛ́ndaʼ ɛlaŋ. Páyɛ́ɛ́lɛ yɛ́lɛ́ na míil, na alówɛs. Nɛʼkodɛ́ɛm ogo nyóon aa ayɛ́ɛ́n aboan Yə́sus wɔɔ́s wúmmú na udúg agosɔyɔ na nyɔ́lɛ́.

⁴⁰Náan aa píísiə́d kɛlóŋ kɛ́ Yə́sus, páágóda na pɛsom pɛ́ mbɔ́m, pə́ə́sumə́nən lamɛ́ndaʼ wɔnɔ́ ná ándɛ Yúdɛn yáagɛɛlanɛ na pɛlóŋ pɛɔ́bɔn agɛɛlɛ lɛ́ pə́díin pə́ni.

⁴¹Pɔlɛ́m púmmú póyɛ́ɛ kɔ áay ndúmiʼ na kɛnɔ kɛ́ pɛ́ɛ́báŋan Yə́sus. A pɔlɛ́m pógo póob, kəəniʼ káyɛ́ɛ kɔ, kííligi kawa. Páyɛ́ɛ pádɛ́njag kuni mɔɔd kɔ.

⁴²Wɔnɔ́ ná wɔɔ́s wóow óyɛ́ɛ pɔ́nɔ́ kisúgiʼ na koany, kɔ aa pííní Yə́sus lɛ́ kádɛʼkɛ́ɛ laálá.