Read Yambeta Sɛ́aŋ 2 Bible Online

Sɛ́aŋ 2 - Yambeta bible

Sɛ́aŋ 2

¹Mədúg mábaan a ngim yɛ́ɛy, kodɔn kóyɛ́ɛ a Kána, a nigúu nɛ́ Kalilə́ə. Pɛ́ɛ́dɔ́ŋɔn ŋŋí ɛ Yə́sus kɔ a kodɔn kóog.

²Ɔmbɔ́ tɛn Yə́sus, páyɛ́modɔ́ŋɔn kɔ a kólɛ́ na paaʼkan pə́ə́ŋ.

³Əgiim əgiig áanɛ a kɛnɛŋ kímmú, maloʼ mááság koman. Náa ŋŋí ɔnɔ́ na nyɔ́lɛ́: «Pə́ndigi kə́mmú na maloʼ.»

⁴Əyúlísíni ŋŋí ɔnɔ́: «Íyowó! Kɛ́yaán na mɛ áŋ? Mɛ Kɛnɛŋ Kídínjíig.»

⁵Ŋŋí aáság kɛɛn adɛ́anɛ na pɔɔd pá páyɛ́ɛ əgud kɔ, ɔnɔ́: «Nkə kɛ́ aábodɛ́anɛ, póɛlɛ.»

⁶Ngwə́ŋ yɛ aʼtáán ɛyɛ́ɛ kɔ áay ɛ́ʼtáan na úmmuʼ. Yúdɛn ɛyɛ́ɛ yaágan məní kɔ a ngwə́ŋ yɛ́ɛy agaásɔgɛn na mɔ́lɛ́. Ungwə́ŋ úmmuʼ óyɛ́ɛ úgusiəd yoom ɛ́ lɛ́ʼtaʼ wɔnɔ́ əʼtin áʼtáan.

⁷Yə́sus aáság kodɛ́anɛ ɔnɔ́ na pəgudin: «Púyə́əgəni ngwə́ŋ yɛ́ɛy ngim na məní.» Pááság kuyə́əgəni məní kɔ síɛ́ɛ́d, mə́əsúsub.

⁸Náa Yə́sus ɔnɔ́ na pɔ́lɛ́: «Tuə́də́ən anɛ́ɛ́n nɛ́gɔŋ məní móom sɔɔŋ, póɛn agɛɛ́ʼkɛn na mɔɔd nyɔ́ alɛɛ́ a ɔngab yóʼtɛn.» Pááság kudúəd, pámɛ́ɛn amoyɛ́ʼkɛn.

⁹Mɔɔd aáság koóʼtɛn məní móom. Máyɛ́ɛ máʼkaán maloʼ. Nyɔ́lɛ́ adɛʼkɛ́ɛ agolɛŋ ə́lə́ə́ áa móom maloʼ máyɛ́ɛ əgiim málon. Əgín pəgudin aa pɛ́ɛ́lɛŋɛn lɛ́ pɔ́lɛ́ aa pííduə́də məní. Mɔɔd nyóon aáság kodɔ́ŋɔn mɔɔd nyɔ́ yɛɛ́lád kodɔn,

¹⁰náa ɔnɔ́ na nyɔ́lɛ́: «Mɔɔd ungim alɛ agɛɛlanɛ lɛ́, aayaŋ agɛɛ́ʼkɛnan maloʼ málaŋ. Kɛnɛŋ kɛ́ máʼkosɔ́dɛ́ɛ́ pəən, ná áboyɛ́ʼkɛnan anɛ́ɛ́n má mándaŋɛnɛɛ́ kɔdɛ́ɛ. Tuə́ áa kɛ́lɛɛ́ na wɛ áa omɛ́ngɛ́gan maloʼ málaŋ a yoog, wəə́ʼkudíinií ólónɛ a ngim ə́!»

¹¹Táá, niə́bə́ə nɛ́ Yə́sus əyə́bə́ə́líí kɛɛlanɛ piə́wúunəniʼ pɛ́ pɛálɛ́ʼkán áa nɛ́ɛn. Kɛ́yɛ́ɛ a Kána, a nigúu nɛ́ Kalilə́ə. Náan aa yiílóódi nugəm nuə́ŋ, paaʼkan pə́ə́ŋ pááság kaag oʼto na nyɔ́lɛ́.

¹²A ngim ɛ wɔɔ́n, yiísúú a Kaʼpɛlɛnáyum na ŋŋí na pomóŋŋí pə́ə́ŋ na paaʼkan pə́ə́ŋ. Píílə́ndin kɔ mayaa má mədúg əgín sɔɔŋ.

¹³Ná Páska, wɔɔ́n ó Yúdɛn óyɛ́ɛ wándɛ ndúmiʼ, Yə́sus aáság kodɛ́ɛmɛn agobag a Yolósalɛm[10]

¹⁴Ayɛ́ɛ́n a Tɛ́mpɛl, aáboan pɔɔd páádɛ́gɛ́dɛn undunə́ kɔ a kaadɛ. Páyɛ́ɛ alɛga lɛ́ na paʼkáwoʼ, na todóm, na piɛm. Aáság kodála tɛn pɔsɔ́g pə́mmú pá páyɛ́ɛ agóʼpanɛ mɔɔnɛ́ pálɛ kɔ pələndínə́ə́n a ɛbá ɛ́ paʼtɛ́bɛlɛʼ pɔ́ɔ́bɔn.

¹⁵Aáság konog usuə́ na tuwoo, aáfámɛ ungim a táán lɛ́ na paʼkáwoʼ pɔ́ɔ́bɔn, na todóm toɔ́bɔn. Yɛɛ́fálɛ́mɛ́nɛ mɔɔnɛ́ má pagóʼpanɛʼ mɔɔnɛ́, əə́díʼkə́ni paʼtɛ́bɛlɛʼ pɔ́ɔ́bɔn a nsí.

¹⁶Náa ɔnɔ́ na palɛgaʼ piɛm: «Pólónan na moom móom muim! Podɛyáánɛ yoog ɛ Sɛ waam, yoog yɛ undunə́!»

¹⁷Paaʼkan pə́ə́ŋ pááság kaáyɔ́ɔ́ŋɛ lɛ́ kíyə́dílə́ə́ pɔ́nɔ́: «Táán, nnyɔ́ŋánán a noádɛʼ noáŋ yɛ́ ɛlɛɛ́ a mɛ ɔʼtɛ́m ɛlɛ alola wɔnɔ́ yug[11]»

¹⁸Náa palaamɛʼ pá Yúdɛn pɔ́nɔ́ na nyɔ́lɛ́: «Ánɛ aa amágoyɛ́ʼkɛn toɛn lɛ́ wɛ́ɛlɛ nkə kɛ́ɛg kɛ́ olɛɛ́ agɛɛlɛ náan əə́? Nga Táán, ɛɛlɛ kiə́wúunəniʼ kɛ́ kɛálɛ́ʼkán kɛ́ kíəbiíloodi lɛ́ nyɔ́lɛ́.»

¹⁹Əyíbuyúlísíni ɔnɔ́: «Pugə́ən Tɛ́mpɛl yɛ́ɛnɛ, ndəgiiʼkini kowáag yɛ́lɛ́ a mədúg mádáád.»

²⁰Náa pɔ́nɔ́ na nyɔ́lɛ́: «Kíísiə́d pɛag əʼtin ábaan na pɛag pɛ́ʼtáan na úmmuʼ agɛɛlɛ lɛ́ páwáag yɛ́ɛnɛ. Yɛ́lɛ́ aa wɔʼkɔ́ olɛ ugiiʼkini kowáag a mɔɔ́s mádáád súg ə́?»

²¹Kɛbán kímuʼ, Tɛ́mpɛl yɛ́ nyɔ́lɛ́ ayɛ́ɛ əgusəə, ɛlɛ nkó yəəŋ ɛ nyɔ́lɛ́nyɔ́amɔɛ́d.

²²Kólɛ́ aa, ná əyíím yóndɛg a kəəniʼ, paaʼkan pə́ə́ŋ pááság kaáyɔ́ɔ́ŋɛ lɛ́ yiísə́ə́ náan. Pááság kəə́liʼtini na nkə kɛ́ kíyə́dílə́ə́, na tɔgɛ́ɛ́ tó Yə́sus ayɛ́bodɛánɛ.

²³Kɛnɛŋ kɛ́ɛg kɛ́ Yə́sus yɛɛ́sánɛ a Yolósalɛm a wɔɔ́n ó Páska, piíŋ páyáág oʼto na nyɔ́lɛ́ ná pɛ́ɛ́dála piə́wúunəniʼ pɛ́ pɛálɛ́ʼkán pɛ́ ayɛ́ɛ agɛɛlɛ.

²⁴Kɛbán kímuʼ, nyɔ́lɛ́ ədiʼkə́əgəə́di na pɔ́lɛ́ lɛ́ ayɛ́boólɛŋɛn pɔ́lɛ́ piim kɔŋɛʼ kɔŋɛʼ.

²⁵Kɛ́dɛʼkɛ́ɛ əguunə lɛ́ páyaŋ komodɛ́anɛ lɛ́ nyóonɛ aa mɔɔd alɛ náanɛ, ndóo. Nyɔ́lɛ́ yɛɛ́lɛŋɛn nkə kɛ́ kɛ́lɛɛ́ a ɔʼtɛ́m ó mɔɔd.