Read Yambeta Sɛ́aŋ 20 Bible Online

Sɛ́aŋ 20 - Yambeta bible

Sɛ́aŋ 20

¹Na pɛbáŋɛn pɛ́ koany kó a wɔɔ́s ó sɔ́ndɛʼ yɛ́ɛy, Malɛ́a nyɔ́ a Magdala ayɛ́ɛ́n a kəəniʼ. Yɛɛ́bóan lɛ́ nɛdáán nɛ́ píígúb unuʼ ó kəəniʼ na nɛ́lɛ́ níndigi.

²Əyúúlíni ngim na ɔʼtɛ́d agɛɛn aboan pa Simɔ́ɔŋ Píɛ pɔ́lɛ́ na ongaaʼkan nyummú, sɔ́g nyɔ́ Yə́sus yɛɛ́nyɔ́ŋɛnɛn. Náa ɔnɔ́ na pɔ́lɛ́: «Póóliogi kɛlóŋ kɛ́ Sə́dúk a kəəniʼ, tɛndɛŋɛn ə́lə́ə́ áa pámɛ́ɛn agaag.»

³Pa Píɛ pɔ́lɛ́ na ongaaʼkan nyóon pááság kodɛ́ɛmɛn agɛɛn a kəəniʼ.

⁴Páyɛ́ɛ́n na ɔʼtɛ́d pɔ́lɛ́ piim. Náa, wɔnɔ́ ná ongaaʼkan nyóʼkáag ayɛ́ɛ agodɛ́da agaáyɛn Píɛ, nyɔ́lɛ́ aáság koyaŋ agɛɛn əgiig.

⁵Kɛbán kímuʼ adɛʼkɔ́ɔsɔd kɔ. Yɛɛ́bódɛm agá agofɛ́bɛna a kaadɛ. Əgín mbɔ́m na mbɔ́m áa yɛɛ́dála kɔ.

⁶Ná Simɔ́ɔŋ Píɛ nyɔ́lɛ́ yiídíin yíim əgiig, yɛɛ́dám ɔ́sɔd. Əgín pɛsom pɛ́ mbɔ́m pɛ́lɛ́ na pɛ́lɛ́ aa pɛ́yɛ́ɛ kɔ piíngiə́n a nsí.

⁷Aáság kodála tɛn kɔ, kɛsom kɛ́ ombɔ́m kɛ́ píígúb oʼto wə́ə́ŋ na kɛ́lɛ́. Kɛ́lɛ́ kɛ́dɛʼkɛ́ɛ kibulídə́ə́n na pɛsom pɛ́ʼkáag, kɛ́yɛ́ɛ kimúsə́ə́n káanɛ ndɛ́ŋ a ɛbá.

⁸Áay anɛ́ɛ́n áa ongaaʼkan tɛn nyóʼkáag yɛɛ́sɔ́d a kəəniʼ. Nyɔ́lɛ́ nyɔ́ yɛɛ́yáŋ əgiig. Ná ayɛ́ɛ aáʼkodála, aáság kəə́liʼtini.

⁹Tɛ́lɛŋ lɛ́, paaʼkan páyɛ́ɛ pádɛ́njóób nkə kɛ́ kíyə́dílə́ə́ a Kálaʼtaʼ ɛ Táán lɛ́, Yə́sus yiígóodi lɛ́ yíim álon a kəəniʼ[67]

¹⁰Pa Simɔ́ɔŋ Píɛ na ongaaʼkan nyóon pááság kusiəd ngə́ əguúli.

¹¹Malɛ́a aáság kolɔb kɔ áay oʼtɛ́lɛ́máán a ɛbá ɛ́ kəəniʼ, ayɛ́ɛ agolɛɛ. Aáság kobodɛm agodɛ́ʼtɛg a kəəniʼ a kaadɛ.

¹²Alɛ anɛ́ɛ́n agofɛ́bɛna aa, aáság kodála məŋun má maʼtom mábaan málɛ kɔ mələndínə́ə́n, na pilə́ə́ pɛ́ pifúlúʼtú a kɛnɔ kɛ́ pə́yíngígi kɛlóŋ kɛ́ Yə́sus. Mííləndinin lɛ́, úmmuʼ a kɛnɔ kɛ́ oʼto ó kɛlóŋ óyɛ́ɛ, wúmmú a kɛnɔ kɛ́ ambaan.

¹³Náa məŋun má maʼtom móom mɔ́nɔ́ na nyɔ́lɛ́: «Nkə aa waálɛɛ əə́?» Náa Malɛ́a ɔnɔ́ na mɔ́lɛ́: «Ndɛ agolɛɛ lɛ́ pə́míim oliogi kɛlóŋ kɛ́ Sə́dúk waam a kəəniʼ. Ntɛálɛŋ kɛnɔ kɛ́ pámɛ́ɛn na kɛ́lɛ́.»

¹⁴Əgín ná yiísə́ə́ náan, ɔnɔ́ nyɔ́lɛ́ yə́búʼkin, ádála agá Yə́sus alɛ oʼtɛ́lɛ́máán. Náa, Malɛ́a adɛʼkɛ́ɛ agolɛŋ lɛ́ nyɔ́lɛ́ aa alɛɛ́nɔ.

¹⁵Náa Yə́sus ɔnɔ́: «Ɛ́ya tuə́, nkə aa olɛɛ́ agolɛɛ? Ánɛ aa wəə́guunə?» Wɔnɔ́ ná Malɛ́a ayɛ́ɛ agofɛg lɛ́ mɔɔd o pɔlɛ́m áa alɛɛ́nɔ, əyímuyúlísíni ɔnɔ́ na nyɔ́lɛ́: «Paabá, nga wɛ áa umə́muliógi, ɛ́ʼtɛánɛ́ kɛnɔ kɛ́ omɛ́ɛn amoyáag, nyɛ́ɛn əsiəd.»

¹⁶Yə́sus aáság komoodɔ́ŋɔn a niiŋ, ɔnɔ́: «Malɛ́a!» Malɛ́a aáság kaágasɛ, amɛ́ɛ́da a tɔgɛ́ɛ́ tó əbələ́ə, ɔnɔ́: «Yəə́əy, Ɛlábuniʼ!» Áay lɛ́ «Yəə́əy, Kɛlág!»

¹⁷Náa Yə́sus ɔnɔ́ na nyɔ́lɛ́: «Ndóo, udiyínyəə́súŋíí lɛ́ ntɛ́mbag a mɔɛn a nó mbáa. Tod aboan agá pomóŋŋí páam, óbodɛ́anɛ wɔʼkɔ́, mbɛ́ɛn a nó Sɛ waam nyɔ́ alɛɛ́ Sɛ wɔɔbɔn. Mbɛ́ɛn a nó Táán waam nyɔ́ alɛɛ́ Táán wɔɔbɔn.»

¹⁸Malɛ́a ntóón ɛ Magdala aáság kɛɛn aboan paaʼkan agoboólɔɛgɛnɛ lɛ́ nyɔ́lɛ́ aádála Sə́dúk, táá nkə kɛ́ amámodɛánɛ aa kɛ́ɛnɛ.

¹⁹Na niób nɛ́ wɔɔ́s ó na oʼto na oʼto ó sɔ́ndɛʼ yɛ́ɛy, paaʼkan páyɛ́ɛ paágɔ́nyɛ́dáán a yoog, nfaáfányá kɔŋɛʼ kɔŋɛʼ lɛ́ páyɛ́ɛ agodammana Yúdɛn. Píídíin pádála agá, Yə́sus foáy, aáʼkodɛ́lɛm a kɛgaágadɛ kɛɔ́bɔn, ɔnɔ́ na pɔ́lɛ́: «Kiwiiyiʼ kíɛn na pəŋi aá!»

²⁰Ná əyíbusóyídi náan, aáság kubuúloodi pufə́ŋ pó óndoʼ a ɔmbɔg yə́ə́ŋ, na kɛnɔ kɛ́ pə́yímudúm nɛɔŋ a toɛn. Paaʼkan páyɛ́ɛ na tɔnyɔ́g a ɔʼtɛ́m síɛ́ɛ́d kɛnɛŋ kɛ́ pɛ́ɛ́dála Sə́dúk.

²¹Aáság kiiʼkini kobodɛ́anɛ ɔnɔ́ na pɔ́lɛ́: «Uŋóón wɛ́ɛn na pəŋi aá! Wɔnɔ́ ná mbáa əyíím yɛ́ʼtom mɛ, mɛ tɛn mbáboodóm pəŋi aá!»

²²Ná ayɛ́ɛ aáʼkoman kosɔyɔ náan, aáság kɔfɛmɛd a nkó yɔɔbɔn, ɔnɔ́: «Íílə́ən, púsiəd Uŋun wó Ufúlúʼtú!

²³Na ungim nyɔ́ polɛ́ɛ́ kulisinií mabɛ́, Táán tɛn alɛɛ́ kumuúlisin. Nyɔ́ podɛndɛ́ɛ́ kulisinií mɔ́lɛ́, Táán adɛndɛ́ɛ́ kumuúlisin tɛn.»

²⁴Wɔɔ́s wóow, Tómas, mɔɔ́n wəəŋ o maʼtom nyummú nyɔ́ a paaʼkan pə́ə́ŋ pá pówád na pábaan, pɛnyɛʼtɛ́nɛ́n piə́ŋ lɛ́ mɔɔ́n o nɛas, adɛʼkɛ́ɛ kɔ.

²⁵Ná əyímbuúli, pɔsɔ́g paaʼkan páyɛ́modɛánɛ pɔ́nɔ́: «Tɛádála Sə́dúk na əngis yə́ə́s, əə́díin abɛlónɛn.» Tómas ayɛ́boyáág isuŋ, ɔnɔ́: «Iyó, mɛ ntɛdálan pilín pɛ́ óndoʼ yɛ́ páyɛ́mobáŋan a ɔmbɔg, ntɛág ɛnoónó yáam kɔ, ntɛdɔ́ɔ́g tɛn ombɔg a kiwoo kɛ́ nɛɔŋ nɛ́ pə́yímudúm a toɛn, ntiə́gəə́liʼtini lɛ́ nyɔ́lɛ́ aa alɛɛ́nɔ fɔ́lɔ́b.»

²⁶Mədúg máʼtáan na mádáád a ngim yɛ́ɛy, paaʼkan páyɛ́ɛ əgín paágɔ́nyɛ́dáán a yoog, nfaáfányá. Tómas ayɛ́ɛ kɔ wɔɔ́s wóow. Yə́sus aáság kiiʼkini kiim alon. Píídíin pádála agá aándɛ a kɛgaágadɛ kɛɔ́bɔn. Aáság kubuúsoyidi ɔnɔ́: «Uŋóón wɛ́ɛn na pəŋi aá!»

²⁷Aáság kaágasɛ anɛ́ɛ́n ná Tómas alɛɛ́, náa ɔnɔ́ na nyɔ́lɛ́: «Tómas, mɛ́ɛn áanɛ. Táá mɛ ɔmbɔg ə́! Mɛ́ɛn na ɛnoónó yááŋ, ódɔ́bɔ pilín pɛ́ óndoʼ. Tɔ́ɔg ombɔg wááŋ tɛn áanɛ a mɛ toɛn, kɛnɔ kɛ́ pə́yíʼtúm nɛɔŋ. Tómas, tí musuŋ! Áág oʼto na mɛ.»

²⁸Ná Tómas ayɛ́moodála náan, aáság kusəə ɔnɔ́ na nyɔ́lɛ́: «Sə́dúk waam, na Táán yaam!»

²⁹Náa Yə́sus ɔnɔ́ na nyɔ́lɛ́: «Wəə́ʼkəə́liʼtini nɛ́gɔŋ yɛ́ɛnɛ lɛ́ omɛ́ʼtála na əngis yááŋ. Lɛŋ lɛ́, mawɔʼ na nyɔ́ alɛ́ɛ́ kəə́liʼtinií fiɛ́d kodála na əngis.»

³⁰Yə́sus ayɛ́ɛ́lɛ pɛálɛ́ʼkán pímmú piíŋ a əngis á paaʼkan pə́ə́ŋ. Pɛálɛ́ʼkán pɛ́ɛb piim pɛ́dɛɔ́gɔ pidiídílə́ áanɛ.

³¹Pɛ́ɛnɛ pɛ́ píyə́dílə́ə́, pɛ́lɛ lɛ́ ná puə́liʼtini lɛ́ Yə́sus alɛ Kilíʼtus, alɛ Mɔɔ́n o Táán. Pomaʼkaag oʼto náan na nyɔ́lɛ́, poagɛɛn na ɔlaa ó pɛnɛŋ piim.