Read Yambeta Sɛ́aŋ 5 Bible Online

Sɛ́aŋ 5 - Yambeta bible

Sɛ́aŋ 5

¹A ngim yɛ́ɛy, Yúdɛn ɛyɛ́ɛ agɛɛlɛ wɔɔ́n wɔ́ɔ́bɔn wúmmú a Yolósalɛm. Yə́sus ayɛ́ɛ́n kɔ.

²Kisum kímmú kɛ́yɛ́ɛlanɛ kɔ a Yolósalɛm pɔ́ɔdɔ́ŋɔn a tɔgɛ́ɛ́ tó əbələ́ə lɛ́ kisum kɛ́ Pɛdsáʼta[18] Kɛ́yɛ́ɛ ndúmiʼ na udíyoog wúmmú, pɔ́ɔdɔ́ŋɔn lɛ́ udíyoog ó todóm. Pɛ́ɛ́wáag piób pɛ́ʼtáan kɔ a ɛbá ɛ́ kisum kɛ́ɛg.

³A piób pɛ́go pɛ́ɛb, pabámbany piíŋ áa pə́yíngəni kɔ. Páyɛ́ɛ lɛ́ na powongwóg, na pɔɔd pá pɛnɛ́m, na pɛgɔd pɛ́ kúfuʼ. [[19]

⁴]

⁵Náan aa mɔɔd nyummú ayɛ́ɛ kɔ. Ayɛ́ɛ aáʼkɛɛlɛ pɛag niʼtin na puuniʼ na pɛ́dáád wɔnɔ́ ná yiídə́əŋ kɛgɔd.

⁶Yə́sus aáság komoodála wɔnɔ́ na yiíngíí. Ná yɛɛ́lɛ́ŋ lɛ́ mɔɔd nyóon əə́ʼkuʼtə́ə kɛ́fɔlɛ́ a kobany kóog, əyímuŋíən ɔnɔ́: «Olɛ anyɔ́ŋɛn lɛ́ wóóm a?»

⁷Náa kɛgɔd kɛ́ɛg kɛɔ́nɔ́ na nyɔ́lɛ́: «Paabá, ntɛɔ́gɔ na mɔɔd nyɔ́ aágɛnyáŋɛn agɛnyɔgɛd a məní kɛnɛŋ kɛ́ mándadoganɛɛ́. Alɛ nyɔʼkɔ́ mɛ ntíin nyə́dulə əgusuu a kisum, wɛndɛ́ŋ aáʼkɛnjaŋɛnɛ.»

⁸Náa Yə́sus ɔnɔ́ na nyɔ́lɛ́: «Tɛ́ɛ́mɛn, siəd pɛʼkwág pɛáŋ wɛ́ɛn aá!»

⁹Əgín tɛn kɔ áay kum a nsí, mɔɔd aándɛ cacalaʼ. Aáság konyáŋɛn pɛʼkwág piə́ŋ, əə́bə́ə́ kodáŋana. Wɔɔ́s ogo wóow oyɛ́ɛ wɔɔ́s ó kisúgiʼ kɛ́ Yúdɛn.

¹⁰Ná palaamɛʼ pá Yúdɛn pɛ́ɛ́dála mɔɔd nyóon nyɔ́ Yə́sus ayóómɛ aándagɛɛn, pááság kusəə pɔ́nɔ́ na nyɔ́lɛ́: «Náanɛ yɛ́ɛnɛ alɛ wɔɔ́s wə́ə́s ó kisúgiʼ. A pɛcɛm piə́s uʼkóodi lɛ́ ónyáŋɛn pɛʼkwág pɛáŋ[20]»

¹¹Aáság kubuyúlisini ɔnɔ́ na pɔ́lɛ́: «Mɔɔd nyɔ́ amɛ́njoómɛ, nyɔ́lɛ́ ogo aa amɛ́ʼtɛánɛ lɛ́ nsiəd pɛʼkwág pɛ́am, nyɛ́ɛn.»

¹²Náa pɔ́nɔ́ na nyɔ́lɛ́: «Mɔɔd ogo nyɔ́ amágodɛánɛ lɛ́ úsiəd pɛʼkwág pɛáŋ wɛ́ɛn əə, nyɔ́lɛ́ aa nyóon ánɛ ə?»

¹³Náa, mɔɔd ogo nyóon adɛ́ʼkóolɛŋɛn Yə́sus lɛ́ ayɛ́ɛ əə́ʼkubunímin kɔ áay a kiʼtúú kɛ́ pɔɔd kɛ́ kɛ́yɛ́ɛ kɔ.

¹⁴Ɛyaa ɛ́ kɛnɛŋ a ngim yɛ́ɛy, Yə́sus aáság kiiʼkini kodála mɔɔd ogo nyóon a Tɛ́mpɛl. Náa ɔnɔ́ na nyɔ́lɛ́: «Táá, wɛ aa nyóon waándɛɛ́ kə́lə́ŋ kə́lə́ŋ. Udiyíʼkíni anɛ́ɛ́n kɛɛlɛ kɔbɛ́ nga odɛányɔ́ŋɛn lɛ́ nkə kɛ́ kɛ́mááyɛn kɛ́ɛg kíiʼkini kogoóboan.»

¹⁵Mɔɔd nyóon aáság kuúlini agɛɛn adɛ́anɛ na palaamɛʼ pá Yúdɛn lɛ́ Yə́sus aa amámoyóómɛ.

¹⁶Palaamɛʼ pá Yúdɛn pə́ə́bə́ə́ anɛ́ɛ́n kɔnɔɛyɛ Yə́sus lɛ́ ayɛ́ɛ́lɛ nkə kɛ́ɛg wɔɔ́s ó kisúgiʼ kɛɔ́bɔn.

¹⁷Náa, Yə́sus aáság kobodɛ́anɛ ɔnɔ́ na pɔ́lɛ́: «Sɛ waam əligi əgín a pigólí kɛɛlɛ. Ɔmbɔ́ mɛ tɛn ndɛ əgín a pigólí.»

¹⁸Palaamɛʼ pá Yúdɛn pííbís əgín na toɛn lɛ́ pə́muúgumin, pámoyóon. Pádɛʼkɛ́ɛ əguunə komoyóon əgín lɛ́ wɔnɔ́ ná adɛʼkɛ́lɛɛ́ agonyáadɛ kisúgiʼ wɔnɔ́ pɔ́lɛ́, ndóo. Kɛ́yɛ́ɛ lɛ́ alɛ əgusəə tɛn lɛ́ Táán alɛ fɔ́lɔ́b Sɛ wəəŋ. A nisəə niə́ŋ nɛ́ɛn kɛ́lɛ anyóon lɛ́ na nyɔ́lɛ́ na Táán pálɛ yoom ímuʼ.

¹⁹Yə́sus aáság kiiʼkini kusiəd tɔgɛ́ɛ́, náa ɔnɔ́ na pɔ́lɛ́: «A fɔ́lɔ́b, ndabodɛ́anɛ lɛ́, Mɔɔ́n ɔdɛɔ́gɔ ogɛɛlɛ yoom na yoom a nyɔ́lɛ́nyɔ́amɔɛ́d. Alɛ agɛɛlɛ əgín nkə kɛ́ aádála na Sɛ. Nkə kiim kɛ́ Sɛ alɛɛ́ agɛɛlɛ, əgín tɛn kɛ́lɛ́ aa Mɔɔ́n aágɛɛlɛ.

²⁰Kɛ́lɛ lɛ́, Sɛ aanyɔ́ŋɛn Mɔɔ́n, əəmuúloodi nkə kiim kɛ́ nyɔ́lɛ́nyɔ́amɔɛ́d alɛɛ́ agɛɛlɛ. Alɛ́ɛ́ kumuúloodi tɛn múmmú mógɛɛlɛ mó mómááyɛn móom, a ombod wóonɛ lɛ́ pəŋi piim polɛ́ɛ́ kəə́wúunəni.

²¹Wɔnɔ́ ná Sɛ alɛɛ́ agɛɛlɛ lɛ́ pɛlóŋ pɛóndɛg, əə́giiʼkini koboyɛ́ʼkɛn ɔlaa, náan tɛn aa Mɔɔ́n alɛɛ́ agɛɛ́ʼkɛn ɔlaa na nyɔ́ aányɔ́ŋɛn kɛɛ́ʼkɛn.

²²Sɛ ɔdɛɔ́yɔmɛ mɔɔd na mɔɔd, amɛ́ʼkɛn toɛn tóod na Mɔɔ́n lɛ́ nyɔ́lɛ́ aa ɔ́yɔmɛɛ́ pɔɔd,

²³agɛɛlɛ lɛ́ ungim ányáadɛ Mɔɔ́n wɔnɔ́ ná aányáadɛ Sɛ. Nyɔ́ annyáadɛnɛɛ́ Mɔɔ́n, annyáadɛnɛ tɛn anyóon Sɛ nyɔ́ əyíím ámoodom.

²⁴A fɔ́lɔ́b fɔ́lɔ́b ndabodɛ́anɛ lɛ́, nyɔ́ amóób tɔgɛ́ɛ́ tóam, áyaág oʼto na Nyɔ́ əyíím yɛ́ʼtom, nyóon alɛ na ɔlaa ó pɛnɛŋ piim. Adɛádɛ́lɛm a pɛyɔm kə́mmú, aálón a kugu, aáʼkosɔd a ɔlaa.

²⁵Ɛɛ́ɛ, a fɔ́lɔ́b ndabodɛ́anɛ lɛ́, kɛnɛŋ kɛ́lɛ́ɛ́ kiim, (kɛmɔɛ́d kɛ́go aa kɛ́ɛnɛ kɛándɛɛ́ kɔ). Kɛ́lɛ kɛnɛŋ kɛ́ pɛlóŋ pɛ́lɛ́ɛ́ koóbɛ́ɛ́ nɛŋo nɛ́ Mɔɔ́n o Táán. Pá pálɛ́ɛ́ koob nɛŋo nɛ́ɛn tɛn, pálɛ́ɛ́ kɛɛn na ɔlaa.

²⁶Kɛ́lɛ lɛ́, əgín wɔnɔ́ ná Sɛ alɛɛ́ na isim yɛ́ ɔlaa, náan tɛn aa amɛ́ʼkɛn na Mɔɔ́n lɛ́ yɛ́ɛn tɛn na isim yɛ́ ɔlaa.

²⁷Amámoyɛ́ʼkɛn toɛn lɛ́ ásom pɛyɔm pɛ́ pɔɔd lɛ́ nyɔ́lɛ́ aa alɛɛ́ mɔɔ́n o mɔɔd.

²⁸Pɛbán pɛ́ɛnɛ piim pɛ́dɛyɛ́boyɛ́ɛ́lɛ puə́wúunəni lɛ́ kɛnɛŋ kiə́ndəgiim kɛ́ pɛlóŋ piim pɛ́ píngíí a pəgəəniʼ pɛ́lɛ́ɛ́ koóbɛ́ɛ́ nɛŋo nɛ́ Mɔɔ́n o mɔɔd

²⁹ná píim pɛ́lónan a pəgəəniʼ pɔ́ɔ́bɔn. Pɔsɔ́g pá páyɛ́ɛ́lánɛ kɔŋɛʼ, pálɛ́ɛ́ kiim póndɛgan agosɔd a ɔlaa. Pá páyɛ́ɛ́lánɛ kɔbɛ́, páyoóndɛgan əgiim adɛ́lɛm a pɛyɔm[21]»

³⁰Yə́sus aáság kiiʼkini kusəə ɔnɔ́: «Mɛ, ntɛɔ́gɔ ogɛɛlɛ yoom na yoom a toɛn tóam tó mɛɛ́nyɔ́amɔɛ́d. Ndɛ agoyɔm əgín wɔnɔ́ ná Táán amɛ́ʼtɛánɛ lɛ́ njɔm. Náan aa pɛyɔm pɛ́am pɛ́lɛɛ́ a sáád lɛ́ ntɛɔ́gɔ əguunə kɛɛlɛ nkə kɛ́ kímíʼkə́mmi, ndóo. Ndɛ agɛɛlɛ nkə kɛ́ kiə́gə́mmi Nyɔ́ əyíím yɛ́ʼtom.»

³¹«Kɛ́mɛ́ɛ agɛɛn lɛ́ mɛ ndɛ agaáyɛ́ʼkɛn mbaasɔ́ mɛɛ́nyɔ́amɔɛ́d, ná mbaasɔ́ yaam ɛlɛ iyó.

³²Ndóo, mɔɔd wɛndɛ́ŋ áa alɛɛ́ agɛnyaágɛn mbaasɔ́. Mbaasɔ́ yəəŋ mbálɛŋ, ɛlɛ fɔ́lɔ́b.

³³Poɛ́dóm pɔɔd lɛ́ pɛ́ɛn a nó Sɛ́aŋ. Yɛɛ́dɛ́lɛm mbaasɔ́ a nyɔ́ alɛɛ́ na fɔ́lɔ́b.

³⁴A mɛ, ntiə́guunə lɛ́ mɔɔd yɛ́ʼtɛ́lɛmɛn mbaasɔ́. Ndɛ agosɔyɔ náan lɛ́ ná pəŋi póɔy.

³⁵Sɛ́aŋ ayɛ́ɛ wɔnɔ́ ɛláam yɛ́ pə́múúg lɛ́ ná ɛ́nom. Pəŋi poɛ́nyɔ́ŋɛn lɛ́ ɛ́boónomɛn ɛyaa ɛ́ kɛnɛŋ ná pɔ́nyɔ́ga a kisəə kiə́ŋ.

³⁶Kɔmɔɛ́d lɛ́ pɛbán pímmú pɛ́lɛ kɔ pɛ́ pɛ́mɛ́ʼtɛ́lɛ́mɛn mbaasɔ́ yɛ́ ɛmááyɛn ɛ Sɛ́aŋ. Pɛ́lɛ́ pigólí pɛ́ Mbáa ayɛ́nyɛɛ́ʼkɛn lɛ́ nyɛ́ɛlɛ. Pɛ́lɛ́ pɛ́go pɛ́ ndɛɛ́ agɛɛlɛ aa, pɛ́lɛɛ́ agɛnyaágɛn mbaasɔ́ lɛ́ Mbáa aa ayɛ́ʼtóm.

³⁷Mbáa ogo Nyɔ́ əyíím yɛ́ʼtom, alɛ agɛnyaágɛn tɛn nyɔ́lɛ́nyɔ́amɔɛ́d mbaasɔ́. Kɛ́lɛ agá lɛ́ ɔmbɔ́ nɛŋo niə́ŋ podɛ́njóob, ɔmbɔ́ tɛn udi wə́ə́ŋ podɛ́ʼtála.

³⁸Tɔgɛ́ɛ́ tuə́ŋ tɛn, alɛ podɛɛ́ngɛg tólɛ́ a ntɛ́m yaaŋan lɛ́, podɛágɛn oʼto na nyɔ́ əyíím ádom.

³⁹Polɛ agolɛŋ kudíʼtiibəni Kálaʼtaʼ ɛ Táán lɛ́ poafɛg poɔʼkɔ́ a yɛ́lɛ́ aa poɔ́gɔɔŋ ɔlaa ó pɛnɛŋ piim. Yɛ́lɛ́ aa ɛlɛɛ́ agɛnyaágɛn mbaasɔ́.

⁴⁰Kɛbán kímuʼ, podɛɔ́gɔ anyɔ́ŋɛn kiim ná ndɛɛ́ agɛɛlɛ lɛ́ póɔŋ ɔlaa ó pɛnɛŋ piim.

⁴¹Ntiə́guunə lɛ́ pɔɔd aa pɛ́nyádɛɛ́, ndóo.

⁴²Náa, mbáboólɛ́ŋ. Mbálɛŋ lɛ́ podɛɔ́gɔ anyɔ́ŋɛn Táán.

⁴³Mɛ, mbíim a niiŋ nɛ́ Mbáa, poásáŋɛ́nɛ kisiəd kɔŋɛʼ. Ná wɛndɛ́ŋ yíim a niiŋ niə́ŋ nɛ́ nyɔ́lɛ́nyɔ́amɔɛ́d, póság kumuúsiəd kɔŋɛʼ.

⁴⁴Tuə́ áa pəŋi polɛɛ́ pə́ginjəə́liʼtini? Polɛ anyɔ́ŋɛn lɛ́ pɔsɔ́g pábonyáadanɛ, podɛɔ́gɔ əguunə nnyáádɛ́ yɛ́ yəə́giim əgín na Táán nyɔ́lɛ́nyɔ́əsíŋ.

⁴⁵Kɛbán kímuʼ, podɛfɛ́g lɛ́ mɛ áa ndɛ́ɛ́ koboyɛ́ʼkɛnɛɛ́ nsɔ́ɔ́ a udi wó Mbáa, ndóo. Moyíis aa alɛ́ɛ́ koboyɛ́ʼkɛnɛɛ́[22], nyɔ́lɛ́ nyɔ́ polɛɛ́ agomɛna pɛda a nyɔ́lɛ́.

⁴⁶Kɛ́lɛ lɛ́, puyə́liʼtinini fɔ́lɔ́b tɔgɛ́ɛ́ tó Moyíis, ná pumə́líʼtíníí tɛn tóam lɛ́ kɛbán kɛ́am aa yiísə́ə́ a pagálaʼtaʼ pə́ə́ŋ pá yiídílə[23]

⁴⁷Náa kɛ́lɛɛ́ lɛ́, wɔnɔ́ ná pudiə́liʼtininií nkə kɛ́ nyɔ́lɛ́ yiídílə, podɛɔ́gɔ tɛn pə́gəə́liʼtini nkə kɛ́ mɛ ndə́əsəə.»