Read Yambeta Sɛ́aŋ 6 Bible Online

Sɛ́aŋ 6 - Yambeta bible

Sɛ́aŋ 6

¹A ngim yɛ́ɛy, Yə́sus yɛɛ́yáág nsɛ́ɛ́ ɛ noom nó Kalilə́ə (pɔ́ɔdɔ́ŋɔn tɛn lɛ́ noom nó Tɛbɛlɛyáad).

²Ɛ́fɔlɛ́ ɛ́ pɔɔd íyímuyə́ən kɔ́gɔ́ɔg lɛ́ pɛ́ɛ́dála piə́wúunəniʼ pɛ́ pɛálɛ́ʼkán pɛ́ ayɛ́ɛ agɛɛlanɛ wɔnɔ́ ná ayɛ́ɛ agoómanɛ pabámbany.

³Aáság kobag a oʼkon a mɔɛn na paaʼkan pə́ə́ŋ, pə́ə́ləndin a nsí.

⁴Wɔɔ́n ó Yúdɛn wó pɔ́ɔdɔ́ŋɔn lɛ́ Páska, óyɛ́ɛ wándɛ ndúmiʼ.

⁵Yə́sus yɛɛ́dɛ́ʼtɛg pasasaa piim, aádála kiʼtúú kɛ́ pɔɔd súuu, kíəgiim kɛnɔ kɛ́ alɛɛ́. Náa ɔnɔ́ na Filíib: «Ə́lə́ə́ áa tɛlɛɛ́ págooŋɛnɛ pɛlɛ́ɛd agɛɛ́ʼkɛn na pɔɔd póonɛ lɛ́ pánɛ ə́?»

⁶(Əyímuŋíən náan a kɛsɛ́n lɛ́ ná yóób nkə kɛ́ Filíib əə́muyúúlisini. Nyɔ́lɛ́ ayɛ́ɛ aáʼkolɛŋ nkə kɛ́ aágɛɛlɛ.)

⁷Filíib əyímuyúlísíni ɔnɔ́: «Ɔmbɔ́ tɛoŋɛnɛ pɛlɛ́ɛd pɛ́ ɔ́ndɛd ɛ pisúg pɛ́ mɔɔnɛ́ ɛ́baan, pɛ́dɛásɛʼtan a kóonɛ lɛ́ ɛ́nɛ́ mɔɔd yɔ́ɔŋ ɛyaa yɛ́ ɛbɛs.»

⁸Əndələ́ə, Ongaaʼkan nyummú, móŋŋí o Simɔ́ɔŋ Píɛ, aáság kusəə ɔnɔ́ na Yə́sus:

⁹«Onyommón nyummú ogóódi áanɛ pɛlɛ́ɛd pɛ́ pɛ́ʼtáan na musúúsú móbaan. Náa, nkə aa kɛ́ɛg moyaa mó moom wɔnɔ́ móom a kiʼtúú kɛ́ pɔɔd kɛ́ɛnɛ ə́[24]?»

¹⁰Náa Yə́sus ɔnɔ́: «Ɛ́bodɛánɛ́an pə́ləndin a nsí pɔ́lɛ́ piim.» Mbɛ́n ɛyɛ́ɛ kɔ a kɛnɔ kɛ́ɛg ngíŋ. Pááság konyɛŋ, pə́ə́ləndən kɔ. Páyɛ́ɛ kɔ yoom wɔnɔ́ tɔ́ɔ́sɛn ɛ pɔɔd ɛ́ʼtáan.

¹¹Yə́sus yiísiə́d pɛlɛ́ɛd pɛ́ɛb, amɛ́ʼkɛn pisoyidiʼ na Táán, ámáábán na ungim nyɔ́ ayɛ́ɛ kɔ. Ayɛ́ɛ́lɛ tɛn náan yoom ímuʼ na pusú. Ungim ɔyɔ́ɔ́ŋ wɔnɔ́ ná ayɛ́ɛ anyɔ́ŋɛn.

¹²Ná ungim ayɛ́ɛ aáʼkonɛ, əə́ʼkuyíid, Yə́sus yɛɛ́dɛánɛ na paaʼkan pə́ə́ŋ lɛ́ págómmanɛ pɛbɛŋ pɛ́ pɛ́ɛ́lɔ́b, yoom ɛ́dɛndɛáŋ.

¹³Pááság kogómmanɛ. Pííyə́ə́g mɔsaŋɛʼ mówád na móbaan, kɔmɔɛ́d lɛ́ əgín pɛlɛ́ɛd pɛ́ʼtáan súg áa pɛ́yɛ́ɛ.

¹⁴Ná pɔɔd pɛ́ɛ́dála kiə́wúunəniʼ kɛ́ kɛálɛ́ʼkán kɛ́ɛg kɛ́ ayɛ́ɛ́lɛ, pə́ə́bə́ə́ kosɔyɔ pɔ́nɔ́: «Mɔɔd nyóonɛ alɛ fɔ́lɔ́b Ɔndɔɛgɛʼ pɛbán o Táán nyɔ́ ogóódi lɛ́ yíim a nsí yɛ́ɛnɛ.»

¹⁵Náa, Yə́sus ayálɛ́ŋɛ́ɛ́ lɛ́ pə́əgiim əmuúgumin nɛ́gɔŋ agomoogóda lɛ́ ábág nkúm, aáság kəə́súid kə́mmú nyɔ́lɛ́nyɔ́əsíŋ a oʼkon a mɔɛn.

¹⁶Ná mbin ɛyɛ́ɛ yəə́ndəgiim ədə́əŋ, paaʼkan pə́ə́ŋ písúú a ɛbá ɛ́ noom,

¹⁷páábág a kɛʼkɔ́m kímuʼ, pááyaag nsɛ́ɛ́ ɛ noom yɛ́ɛy káag, a Kaʼpɛlɛnáyum. Mbin yɛɛ́bód yəə́də́əŋ, Yə́sus ədiim aboóboan.

¹⁸Noom nóyɛ́ɛ nobɛ́ lɛ́ kigud kɛ́yɛ́ɛ əgufiŋ na toɛn.

¹⁹Páyɛ́ɛ pə́ʼkəə́súid na kɛʼkɔ́m a məní yoom wɔnɔ́ kɛ́lomɛ́ʼtaʼ ɛ́ʼtáan, oó lɛ́ ɛ́ʼtáan na úmmuʼ. Náa páadála Yə́sus əə́giim. Ayɛ́ɛ agodáŋana a məní na ambaan ənnímin. Wɛɛ́y úyíbugúmin, pə́ə́bə́ə́ kuliminə kwag, kwag, kwag.

²⁰Náa ɔnɔ́ na pɔ́lɛ́: «Podɛʼtámmána, mɛ áa ndɛɛ́nɔ!»

²¹Paaʼkan páyaʼkanyɔ́ŋɛn kumuúsiəd a kɛʼkɔ́m na pɔ́lɛ́, náa kɛ́yɛ́ɛ kɛáʼkaab a ɛbá, a kɛnɔ kɛ́ páyɛ́ɛ agɛɛn.

²²A koany kaáyɛnɛ, kiʼtúú kɛ́ pɔɔd kɛ́ kɛ́ɛ́lɔ́b nsɛ́ɛ́ ɛ noom yɛ́ʼkáag kɛáság kaálɛ́mbɛd lɛ́ kɛʼkɔ́m kɛ́yɛ́ɛ əgín kɔ áay kímuʼ a ɛbá ɛ́ noom yɛ́ɛy. Paaʼkan píísiə́d kɛ́lɛ́ pɔ́lɛ́bə́əsíŋ, pámɛ́ɛn Yə́sus fiɛ́d ondáŋ na pɔ́lɛ́.

²³Kɛbán kímuʼ, pɛʼkɔ́m pímmú píyíímən tɛn kɔ áay kɛnɔ kɛ́ pɛ́ɛ́nɛ́ pɛlɛ́ɛd pɛ́ Sə́dúk ayɛ́boyɛ́ʼkɛn ná aáʼkɛɛ́ʼkɛn pisoyidiʼ na Táán. Pɛ́ɛb pɛ́yɛ́ɛ əgiim a Tɛbɛlɛyáad.

²⁴Ná pɔɔd pɛ́ɛ́dála lɛ́ ɔmbɔ́ Yə́sus, ɔmbɔ́ paaʼkan pə́ə́ŋ pə́ndigi áay, pááság kobágan a pɛʼkɔ́m pímmú pɛ́ɛb agɛɛn əmuyúunə a Kaʼpɛlɛnáyum.

²⁵Ná pɛ́yɛ́ɛ́n əgiig nsɛ́ɛ́ ɛ noom ɛgo, pɛ́ɛ́bóan Yə́sus, náa pɔ́nɔ́ na nyɔ́lɛ́: «Kɛlág, naanɛ́g áa wɛ umíim alon káanɛ ə́?»

²⁶Əyíbuyúlísíni ɔnɔ́: «A fɔ́lɔ́b fɔ́lɔ́b ndabodɛ́anɛ lɛ́, áay kó polɛɛ́ əginjuunə, podɛɔ́gɔ əginjuunə lɛ́ pomóób yisí ɛ piə́wúunəniʼ pɛ́ pɛálɛ́ʼkán pɛ́ mbɛ́ɛ́lɛ, ndóo. Pólɛ əginjuunə a oʼto wóonɛ lɛ́ poɛ́nɛ́ pɛlɛ́ɛd, puə́yíid.

²⁷Pudiíʼkúd moom mó konɛ mó mólɛɛ́ lɛ́ móalɛ́aŋ na koany. Kudə́ən agá mó módɛndɛ́ɛ́ kolɛáŋɛ́ɛ́, moom mó móaboyɛ́ʼkɛn ɔlaa ó pɛnɛŋ piim. Moom móom, Mɔɔ́n o mɔɔd alɛ́ɛ́ koboyɛ́ʼkɛn mólɛ lɛ́ nyɔ́lɛ́ aa Táán Sɛ ayɛ́moyáág kɛbɛɛ kɛ́ toɛn tuə́ŋ.»

²⁸Pááság kusəə pɔ́nɔ́ na nyɔ́lɛ́: «Nkə aa tíɛlɛɛ́ a kóonɛ lɛ́ tíɛlɛ pɛbán pɛ́ piə́gə́mmí Táán ə́?»

²⁹Yə́sus əyíbuyúlísíni ɔnɔ́: «Nkə kɛ́ Táán alɛɛ́ anyɔ́ŋɛn na pəŋi kɛ́lɛ lɛ́, póag oʼto na nyɔ́ əyíím ádom.»

³⁰Náa pɔ́nɔ́ na nyɔ́lɛ́: «Wɛ, kiə́wúunəniʼ kɛ́ kɛálɛ́ʼkán igə aa olɛɛ́ ugibiíloodi agɛɛlɛ lɛ́ tɛ́ag oʼto na wɛ ə́? Ɛɛ́, nkə aa olɛɛ́ ogɛɛlɛ ə́?

³¹Pɛmbáa pə́ə́s pɛ́ɛ́nɛ́ máan a kɛnɔ kɛ́ kifələ́ə́n, wɔnɔ́ ná kɛ́lɛɛ́ kidiídílə́ a kálaʼtaʼ lɛ́ “Ayɛ́boyɛ́ʼkɛn moom mó konɛ mó múyíím músuu a mɔɛn lɛ́ pánɛ[25]”.»

³²Yə́sus əyíbuyúlísíni ɔnɔ́: «A fɔ́lɔ́b fɔ́lɔ́b ndabodɛ́anɛ lɛ́, adɛ́njaŋ Moyíis aa ayɛ́boyɛ́ʼkɛn moom mó múyíím músuu a mɔɛn lɛ́ pónɛ. Sɛ waam aa alɛɛ́ agoboyɛ́ʼkɛn moom mó konɛ mɔmɔɛ́d mó fɔ́lɔ́b mó múəgiim a mɔɛn.

³³Kɛ́lɛ lɛ́, moom mó konɛ mó Táán aa móonɛ mólɛɛ́ nyɔ́ alɛɛ́ əgiim ə́suu a mɔɛn, nyɔ́ aágɛɛ́ʼkɛn pɔɔd pá a nsí ɔlaa.»

³⁴Náa pə́əsəə anɛ́ɛ́n pɔ́nɔ́ na nyɔ́lɛ́: «Mɔɔ́n wo mbáa, óbɛyɛ́ʼkɛnan moom mó konɛ mógo móom pɛnɛŋ piim.»

³⁵Yə́sus yiísə́ə́ ɔnɔ́ na pɔ́lɛ́: «Mɛ áa ndɛɛ́ moom mó konɛ mó móagɛɛ́ʼkɛn pɔɔd ɔlaa. Nyɔ́ əə́giim ná ndɛɛ́, adɛndɛ́ɛ́ kiiʼkini koob njaan kə́mmú. Nyɔ́ amáág oʼto tɛn na mɛ, adɛndɛ́ɛ́ kiiʼkini koob nɛŋɔ́ɛd.

³⁶Náa, mbábodɛánɛ lɛ́: Pomɛ́ʼtála, kɔmɔɛ́d lɛ́ podɛɔ́gɔ əgəə́liʼtini.

³⁷Piim pá Paabá amɛ́nyɛɛ́ʼkɛn, pálɛ́ɛ́ kiim ná ndɛɛ́. Nyɔ́ əmíim ná ndɛɛ́, ntɛndɛ́ɛ́ komoodo

³⁸lɛ́, ntiʼkə́əgiim nsuu a mɔɛn lɛ́ nyíim agɛɛlɛ nɛnyɔ́ŋɛn nɛ́am nɛ́ mɛɛ́nyɔ́amɔɛ́d, ndóo. Njíím lɛ́ nyíim agɛɛlɛ nɛnyɔ́ŋɛn nɛ́ nyɔ́ əyíím yɛ́ʼtom.

³⁹Nɛnyɔ́ŋɛn nɛ́ nyɔ́ əyíím yɛ́ʼtom aa nɛ́ɛnɛ nɛ́lɛɛ́ lɛ́ ntinními ɔmbɔ́ úmmuʼ na úmmuʼ a pá ayɛ́nyɛɛ́ʼkɛn, mpoyóndɛgɛ agá a las ɛ wɔɔ́s.

⁴⁰Táá nkə Paabá alɛɛ́ anyɔ́ŋɛn a kɛ́ɛg ɔnɔ́: Ungim nyɔ́ aádála Mɔɔ́n, áyaág oʼto na nyɔ́lɛ́, yɛ́ɛn na ɔlaa ó pɛnɛŋ piim, mmoyóndɛgɛ a las ɛ wɔɔ́s.»

⁴¹Əgəə́bə́ə a kɛnɛŋ kɛ́ɛg, Yúdɛn yəə́bə́ə́ komoyɔ́gɔ́dɔ a oʼto wóonɛ lɛ́ yiísə́ə́ lɛ́ nyɔ́lɛ́ alɛ moom mó konɛ mó múmíim músuu a mɔɛn.

⁴²Páyɛ́ɛ agosɔyɔ pɔ́nɔ́: «Adɛ́ Yə́sus, mɔɔ́n ó Yósɛb aa alɛɛ́ náan əə́? Adɛ́ tɛálɛŋ pa sɛ na ŋŋí ə́? Tuə́ anɛ́ɛ́n áa alɛɛ́ ugusəə nɛ́gɔŋ lɛ́ nyɔ́lɛ́ alɛ əgiim ə́suu a mɔɛn ə́?»

⁴³Yə́sus əyíʼkíni kusiəd tɔgɛ́ɛ́, ɔnɔ́ na pɔ́lɛ́: «Púdi kɛnyɔɔ́gɔ́dɔ.

⁴⁴Mɔɔd ɔdɛɔ́gɔ ugiim ná ndɛɛ́, ná Paabá nyɔ́ amɛ́ʼtóm ədimuyə́súidin. Mɛ ndɛ́ɛ́ komoyóndɛgɛ a las ɛ wɔɔ́s.

⁴⁵Kɛ́lɛ kidiídílə́ a pagálaʼtaʼ pá palɔɛgɛʼ pɛbán pá Táán lɛ́: “Táán alɛ́ɛ́ koboyáʼkananɛ pɔ́lɛ́ piim[26]” Mɔɔd ungim nyɔ́ amóób Táán, áyɛɛ́ngɛg nkə kɛ́ amámoyáʼkánánɛ, alɛ əgiim ná ndɛɛ́.

⁴⁶Kɛ́lɛ lɛ́, mɔɔd na mɔɔd adɛ́ʼtála Paabá na əngis, əgín wɔʼkɔ́ sɔ́g nyɔ́ alɛɛ́ əgiim kɔ́gɔ́ɔg a nó Táán. Nyɔ́lɛ́ aa aáʼkodálaá Paabá.

⁴⁷A fɔ́lɔ́b fɔ́lɔ́b ndabodɛ́anɛ lɛ́ nyɔ́ amáág oʼto na mɛ alɛ na ɔlaa ó pɛnɛŋ piim.

⁴⁸Mɛ áa ndɛɛ́ moom mó konɛ mó ɔlaa.

⁴⁹Pɛmbáa pááŋan pɛ́ɛ́nɛ́ máan a nigúu nɛ́ nifələ́ə́n, ɛdɛʼkáagɛɛlɛ lɛ́ pə́diʼkú.

⁵⁰Náa, moom mó konɛ mó múmíim músuu a mɔɛn, mólɛ́ mólɛ lɛ́ wɛ nyɔ́ olɛ́ɛ́ konɛ́ɛ́, odɛndɛ́ɛ́ kugu.

⁵¹«Mɛ áa ndɛɛ́ moom mó konɛ mó ɔlaa mó múmíim músuu a mɔɛn. Nyɔ́ alɛ́ɛ́ konɛ́ɛ́ mólɛ́ alɛ́ɛ́ kɛɛn na ɔlaa a pɛnɛŋ piim. Moom mó konɛ mó ndɛ́ɛ́ kɛɛ́ʼkɛnɛɛ́ mólɛ nkó yaam. Ndɛ́ɛ́ kɛɛ́ʼkɛn yɛ́lɛ́ agɛɛlɛ lɛ́ pɔɔd pɛ́ɛn na ɔlaa.»

⁵²Ná Yúdɛn yɛ́ ɛyɛ́ɛ kɔ áay ɛyóób náan, pə́ə́bə́ə́ kosɔyɔ na toɛn pɔ́nɔ́: «Tuə́ áa alɛɛ́ agɛbɛyɛ́ʼkɛn nkó yəəŋ lɛ́ tɛ́nɛ ə́?»

⁵³70 Náa Yə́sus ɔnɔ́ na pɔ́lɛ́: «A fɔ́lɔ́b fɔ́lɔ́b ndabodɛ́anɛ lɛ́: Wɛ nyɔ́ onníɛnɛɛ́ nkó yaam ɛ mɛ Mɔɔ́n o mɔɔd, oŋŋó maŋɔ́ máam, wɛ nyóon udiə́giim agɛɛn na ɔlaa.

⁵⁴Wɛ nyɔ́ waánɛ nkó yaam, óoŋo maŋɔ́ máam, wagɛɛn na ɔlaa ó pɛnɛŋ piim, mɛ ndɛ nkoyóndɛgɛ a nɛman.

⁵⁵Kɛ́lɛ lɛ́ nkó yaam ɛlɛ moom mó konɛ mó fɔ́lɔ́b, maŋɔ́ máam, má koŋo fɔ́lɔ́b.

⁵⁶Wɛ nyɔ́ waánɛ nkó yaam, óoŋo maŋɔ́ máam, olɛ na mɛ, mɛ tɛn na wɛ.

⁵⁷Mbáa Nyɔ́ əyíím yɛ́ʼtom alɛ a ɔlaa. Amɛ́nyɛɛlɛ lɛ́ mɛ nyɛ́ɛn na ɔlaa. Náan aa mɛ ndáagɛɛlɛ tɛn lɛ́ ungim nyɔ́ alɛ́ɛ́ konɛ́ɛ́ nkó yaam, yɛ́ɛn na ɔlaa.

⁵⁸Taa, moom mó konɛ mó múmíim músuu a mɔɛn, náan aa mólɛɛ́. Módɛɔ́gɔ wɔnɔ́ mó pɛmbáa pááŋan pɛ́ɛ́nɛ́. Pɔ́lɛ́ píígú, náa nyɔ́ alɛ́ɛ́ konɛ́ɛ́ móonɛ, agɛɛn na ɔlaa ó pɛnɛŋ piim.»

⁵⁹Táá nkə kɛ́ Yə́sus ayáʼkánánɛ pɔɔd a kɛ́ɛg a yoog ɛ pɛɔ́sɔ́gɔ́lɔ́n yɛ́ a Kaʼpɛlɛnáyum.

⁶⁰Ná paaʼkan pə́ə́ŋ páyóób tɔgɛ́ɛ́ tóod, pə́ə́bə́ə́ kosɔyɔ pɔ́nɔ́: «Ndóo, áay aáyaagɛ kio a ɛdɔʼ! Ánɛ aa alɛɛ́ ugəə́liʼtini tɔgɛ́ɛ́ wɔnɔ́ tóod əə́?»

⁶¹Náa, wɔnɔ́ ná yɛɛ́lɛ́ŋ lɛ́ paaʼkan pə́ə́ŋ pálɛ əgəə́lúluu a tɔgɛ́ɛ́ tóod, aáság kusəə ɔnɔ́ na pɔ́lɛ́: «Nkə kɛ́ɛg kɛ́ mbə́səə kímə́buyə́bi ə?

⁶²Ná polɛ́ɛ́ kodála anɛ́ɛ́n Mɔɔ́n o mɔɔd əə́guúlini kobag kɛnɔ kɛ́ ayɛ́ɛ oó, puəsəə poɔʼkɔ́ nkə?

⁶³Uŋun wó Ufúlúʼtú wáagɛɛ́ʼkɛn ɔlaa, mɔɔd na mɔɔd nyɔ́lɛ́nyɔ́əsíŋ ɔdɛɔ́gɔ yoom. Tɔgɛ́ɛ́ tóonɛ tó mbábodɛánɛ aa tólɛɛ́ Uŋun, tólɛ́ aa tólɛɛ́ tɛn ɔlaa.

⁶⁴Kɛbán kímuʼ, pə́mmú pálɛ a ondáŋ wááŋan pá pɔ́dɛɔ́gɔ əgəə́liʼtinií.» Kɛ́lɛ lɛ́, əgín kɔ a niə́bə́ə, Yə́sus yɛɛ́lɛŋɛn pa ánɛ aa pádɛʼkɛ́ɛ əgəə́liʼtinií, na ánɛ aa ayɛ́ɛ lɛ́ aamoólɛg.

⁶⁵Ayáábɛg kə́mmú tɔgɛ́ɛ́, ɔnɔ́: «Taa, a kólɛ́ aa njɛ́bodɛánɛ lɛ́ mɔɔd ɔdɛɔ́gɔ ugiim ná ndɛɛ́, ná Paabá adɛmoyɛ́ʼkɛnɛn toɛn.»

⁶⁶Əgəə́bə́ə a wɔɔ́s wóow, paaʼkan pə́ə́ŋ piíŋ pááság komoodɛ́da, pə́diiʼkíni kiim pə́muyə́njən kə́mmú.

⁶⁷Náa Yə́sus əə́ŋíən anɛ́ɛ́n na paaʼkan pə́ə́ŋ pá pówád na pábaan, ɔnɔ́ ə: «Pəŋi oʼ, podɛágɛɛn tɛn a?»

⁶⁸Simɔ́ɔŋ Píɛ əyímuyúlísíni ɔnɔ́: «Sə́dúk, pəsi o, tɛagɛɛn a nó ánɛ? Wɛ áa olɛɛ́ na tɔgɛ́ɛ́ tó tóagɛɛ́ʼkɛnanan ɔlaa ó pɛnɛŋ piim.

⁶⁹Pəsi timə́líʼtíníí, tɛálɛŋ lɛ́ olɛ Ufúlúʼtú nyɔ́ alɛɛ́ əgiim a nó Táán.»

⁷⁰Yə́sus əyíbuyúlísíni ɔnɔ́ na pɔ́lɛ́: «Adɛ́ mɛ áa njíbuyííyid pəŋi póonɛ pá pówád na pábaan á? Kɛbán kímuʼ, úmmuʼ a ondáŋ wááŋan alɛ oʼtɔ́ɔ́dɔ́!»

⁷¹Kɛbán kɛ́ Siudáa, mɔɔ́n ó Simɔ́ɔŋ Ɛsɛʼkalɛyóod aa ayɛ́ɛ əgusəə náan lɛ́, nyɔ́lɛ́ aa ayɛ́ɛ lɛ́ aamoólɛg, ɔmbɔ́ ná ayɛ́ɛ a ondáŋ ó paaʼkan pá pówád na pábaan.