Read Yambeta Sɛ́aŋ 7 Bible Online

Sɛ́aŋ 7 - Yambeta bible

Sɛ́aŋ 7

¹A ngim yɛ́ɛy, Yə́sus ayɛ́ɛ́n yuudi na ongɛn, aándɛ a Kalilə́ə. Adɛʼkɛ́ɛ anyɔ́ŋɛn kiim ófíoŋ náan a Siudə́ə lɛ́ palaamɛʼ Yúdɛn pá páyɛ́ɛ kɔ páyɛ́ɛ əguunə komoyóon.

²Wɔɔ́n wó Yúdɛn ɛyɛ́ɛ ələndən a piób[27] yisí óyɛ́ɛ wándɛ ndúmiʼ.

³Pomóŋŋí pááság kusəə pɔ́nɔ́ na nyɔ́lɛ́: «Tɛ́ɛ́mɛn, tod áa Siudə́ə, kɛnɔ kɛ́ paaʼkan pááŋ pálɛɛ́. Pɔ́lɛ́ tɛn pádála pɛbán pɛ́ olɛɛ́ agɛɛlɛ.

⁴Mɔɔd nyɔ́ aányɔ́ŋɛn lɛ́ pámoólɛŋ, ɔdɛɔ́gɔɔsɛm na pɛbán pɛ́ alɛɛ́ agɛɛlɛ. Wɔnɔ́ ná olɛɛ́ agɛɛlɛ pɛbán pɛ́ pɛásán pɔɔd oʼto, ólódíí, ungim ágoodála.»

⁵Kɛ́lɛ lɛ́, pɔ́lɛ́báamɔɛ́d pomóŋŋí pə́ə́ŋ pádɛʼkáagaag oʼto na nyɔ́lɛ́.

⁶Yə́sus əyíbuyúlísíni ɔnɔ́: «Kɛnɛŋ kɛ́am Kídínjíig. A pəŋi, kɛnɛŋ kiim kɛ́lɛ kɛŋɛʼ.

⁷Pɔɔd pɔ́dɛɔ́gɔ págoboóbɛnɛn pəŋi. Kɔmɔɛ́d lɛ́ mɛ, páagɛmbɛnɛn lɛ́ ndɛ əgusəə lɛ́ pɛbán pɛɔ́bɔn pɛ́ páagɛɛlanɛ pɛ́lɛ pɛbɛ́.

⁸Pəŋi todáan a wɔɔ́n. A mɛ, ntɛágɛɛn kɔ lɛ́ kɛnɛŋ kɛ́am Kídínjíig.»

⁹Ná ayɛ́ɛ aáʼkobodɛ́anɛ náan, yɛɛ́lɔ́b áay a Kalilə́ə.

¹⁰Ná pomóŋŋí páyɛ́ɛ páʼkɛɛn, nyɔ́lɛ́ tɛn aáság kudíin adɛ́ɛmɛn agɛɛn a nuníb lɛ́ ná pádɛyɛ́moodála.

¹¹Wɔɔ́n ungim, Yúdɛn ɛyɛ́ɛ əguunə əgín Yə́sus, pɔ́nɔ́ əə: «Ə́lə́ə́ áa alɛɛ́ anɛ́ɛ́n ə́?»

¹²Kɔ a kiʼtúú kɛ́ pɔɔd, əgín kɛbán kiə́ŋ áa páyɛ́ɛ agosɔyɔ. Póonɛ pɔ́nɔ́: «Kisig kɛ́ mɔɔd aa kɛ́lɛɛ́nɔ.» Pɔsɔ́g pə́mmú pɔ́nɔ́: «Iyó, alɛ əgulígə pɔɔd.»

¹³Kɛbán kímuʼ, pádɛʼkɛ́ɛ agosɔyɔ kɛbán kiə́ŋ nɛŋo a mɔɛn lɛ́ ungim ayɛ́ɛ agodammana palaamɛʼ pá Yúdɛn.

¹⁴Wɔɔ́n óyɛ́ɛ wándɛ a kɛgaágadɛ lɛ́ wɛ́ɛn aman. Yə́sus ayɛ́ɛ́n a Tɛ́mpɛl, əə́bə́ə́ kaaʼkananɛ pɔɔd kɔ.

¹⁵Yúdɛn ɛyɛ́ɛ əgəə́wúunəni, pɔ́ɔsɔyɔ pɔ́nɔ́: «Mɔɔd nyóonɛ adɛʼkáagɛɛlɛ sugúluʼ. Náa tuə́ áa aálɛŋ anɛ́ɛ́n pɛbán pɛ́ɛnɛ náan əə́?»

¹⁶Yə́sus aáság kubuyúlisini ɔnɔ́: «Nkə kɛ́ ndɛɛ́ agaaʼkananɛ kɛ́dɛɔ́gɔ əgiim na mɛɛ́nyɔ́amɔɛ́d. Kɛ́lɛ nkə kɛ́ kíəgiim na nyɔ́ əyíím yɛ́ʼtom.

¹⁷Nyɔ́ aányɔ́ŋɛn kɛɛlɛ nɛnyɔ́ŋɛn nɛ́ Táán, agaálɛŋ nga nkə kɛ́ ndɛɛ́ agaaʼkananɛ kɛ́lɛ nkə kɛ́ Táán amɛ́nyɛɛ́ʼkɛn toɛn lɛ́ nyɛ́ɛlɛ, oó lɛ́ mbáyɛ́ɛ́ŋɛ́nɛ́ɛ́ mɛɛ́nyɔ́amɔɛ́d kosɔyɔ náan.

¹⁸Nyɔ́ alɛɛ́ agosɔyɔ kɛbán kiə́ŋ kɛ́ nyɔ́lɛ́nyɔ́amɔɛ́d, nyóon alɛ əguunə nugəm nuə́ŋ nó nyɔ́lɛ́nyɔ́amɔɛ́d. Náa, nyɔ́ alɛɛ́ əguunə nugəm nó nyɔ́ ayɛ́moodóm, nyóon alɛ mɔɔd o fɔ́lɔ́b, kɛcoo kɛ́dɛɔ́gɔ na nyɔ́lɛ́.

¹⁹Moyíis ayɛ́boyɛ́ʼkɛn pɛcɛm, ngɔ́ɔ́? Náa, ɔmbɔ́ úmmuʼ a pəŋi, ɔdɛɔ́gɔ əguyə́ən pɛ́lɛ́. Puəguunə kɛnjoon lɛ́ nkə?»

²⁰Kiʼtúú kɛ́ pɔɔd kɛ́ɛg kíyímuyúlísíni kɛɔ́nɔ́: «Wɛ mɔɔd nyóonɛ, uŋun wó ɔmbɛ́ úgugóódi! Ánɛ aa ɔnɔ́ aagoyóon ə́?»

²¹Yə́sus aáság kiiʼkini kusiəd tɔgɛ́ɛ́, ɔnɔ́ na pɔ́lɛ́: «Yoom ímuʼ súg áa mbɛ́ɛ́lɛ, yɛ́lɛ́ ɛgo aa yɛ́ɛy pəŋi piim polɛɛ́ əgəə́wúunəni!

²²Kɛ́lɛ kidiídílə́ a pɛcɛm pɛ́ Moyíis lɛ́, pugóódi lɛ́ póanyɛ pɔɔ́n pááŋan pá panɔ́mɛɛd. (Moyíis ɔdɛɔ́gɔ kɔmɔɛ́d mɔɔd o na oʼto na oʼto ugusəə kɛbán kɛ́ɛg kɛ́ waany. Kíyə́bə́ə́líí əgín kɔ́gɔ́ɔg a pɛmbáa pə́ə́s[28]) Polɛ əgəə́liʼtini kaanyɛ pɔɔ́n pááŋan ɔmbɔ́ wɔɔ́s ó kisúgiʼ.

²³Kɛ́maʼkɛɛn anɛ́ɛ́n náan lɛ́ ɔmbɔ́ poanyɛ pɔɔ́n pááŋan wɔɔ́s ó kisúgiʼ kiə́s, puʼtə́əŋin kɛcɛm, a igə anɛ́ɛ́n áa polɛɛ́ agoob ilúún na mɛ lɛ́ mbóómɛ mɔɔd a nkó yəəŋ ngim wɔɔ́s ó kisúgiʼ ə́?

²⁴Náa, tíən koyɔmɛ mɔɔd əgín a nɛmodɛ́ʼtɛg na əngis. Ɛ́moyɔ́mɛ́an a sáád[29]»

²⁵Pɔɔd pá a Yolósalɛm páyɛ́ɛ agosɔyɔ pɔ́nɔ́: «Adɛ́ mɔɔd nyóonɛ aa pálɛɛ́ əguunə koon a?

²⁶Taa nyɔ́ aa nyóonɛ alɛɛ́ agosɔyɔ a udi ó pɔɔd, úmmuʼ ogobɛ́nɛn unuʼ fiɛ́d! Áay lɛ́ palaamɛʼ pə́ə́s páʼkolɛŋ anyóon fɔ́lɔ́b fɔ́lɔ́b lɛ́ alɛ Məsíi ə?

²⁷Náa, mɔɔd nyóonɛ pəsi tɛálɛŋ ə́lə́ə́ áa nyɔ́lɛ́ alɛɛ́ əgiim. Kɔmɔɛ́d lɛ́ ná Məsíi alɛ́ɛ́ kiimií, mɔɔd adɛndɛ́ɛ́ kolɛŋ ə́lə́ə́ áa nyɔ́lɛ́ alɛɛ́ əgiim.»

²⁸Wɔnɔ́ ná Yə́sus ayɛ́ɛ agaaʼkananɛ a Tɛ́mpɛl, yɛɛ́sásɛd, ɔnɔ́: «Poálɛŋ fɔ́lɔ́b ánɛ aa ndɛɛ́ á? Ə́lə́ə́ áa ndɛɛ́ əgiim ə? Mɛ, ntiimin a mɛɛ́nyɔ́amɔɛ́d. Náa, nyɔ́ amɛ́ʼtóm, alɛ mɔɔd o fɔ́lɔ́b, podɛmoólɛŋɛn nyɔ́lɛ́.

²⁹Mɛ mbámoólɛ́ŋ nyɔ́lɛ́ lɛ́ ndɛ əgiim ná alɛɛ́, nyɔ́lɛ́ kɔmɔɛ́d áa amɛ́ʼtóm.»

³⁰Pə́ə́bə́ə́ kuunə anɛ́ɛ́n lɛ́ pə́muúgumin, náa, mɔɔd na mɔɔd adɛʼkáamodɔ́bɛd lɛ́ wɔɔ́s wə́ə́ŋ óyɛ́ɛ údínjíig.

³¹A kiʼtúú kɛ́ pɔɔd kɛ́ɛg kɛ́ kíyə́yiilin, piíŋ páyáág oʼto na nyɔ́lɛ́. Páyɛ́ɛ əgusəə pɔ́nɔ́: «Ná Məsíi alɛ́ɛ́ kiim əə, alɛ́ɛ́ kɛɛlɛ pɛálɛ́ʼkán agaáyɛn ɔmban ó pɛ́ɛnɛ pɛ́ sɔ́g nyóonɛ alɛɛ́ agɛɛlɛ ə́?»

³²Pafalɛsɛyɛ́ɛŋ páyóób nkə kɛ́ pɔɔd páyɛ́ɛ əgəə́lúluu kɔ a kiʼtúú kɛ́ɛg, a kɛbán kɛ́ Yə́sus. Ná pɔ́lɛ́ na puʼkúm pó payaaganɛʼ pɛfɔny pááság kodom anɛ́ɛ́n pəʼpulúus lɛ́ pɛ́ɛn əmuúgumin.

³³Yə́sus yiísə́ə́ ɔnɔ́ na pɔ́lɛ́: «Ndigi na pəŋi kə́mmú ɛyaa ɛ́ kɛnɛŋ, ná a ngim yɛ́ɛy nyúúlini a nó nyɔ́ əyíím yɛ́ʼtom.

³⁴Polɛ́ɛ́ kinjuunə, náa podɛndɛ́ɛ́ kɛnjɔɔŋ lɛ́ kɛnɔ kɛ́ ndɛɛ́ kɛɛnɛɛ́, pəŋi podɛɔ́gɔ pə́giim kɔ.»

³⁵Yúdɛn yəə́bə́ə́ kəə́ŋíənə kɔ pɔ́lɛ́ na pɔ́lɛ́ pɔ́nɔ́ əə: «Ə́lə́ə́ áa aágɛɛn náan aa tɛdɛámoyɔ́ŋɛ́ɛ́ ə́? Aagɛɛn agá ná Yúdɛn yɛ́ ɛlɛɛ́ a ɔsaa áa nigúu nɛ́ Kɛlɛ́ɛg, yɛ́ɛn agaaʼkananɛ pɔɔ́n pá Kɛlɛ́ɛg əə́?

³⁶Nkə kɛ́ɛg kɛ́ əə́səə lɛ́: “Polɛ́ɛ́ kinjuunə, náa podɛndɛ́ɛ́ kɛnjɔɔŋ,” na lɛ́: “Kɛnɔ kɛ́ ndɛɛ́ kɛɛnɛɛ́, pəŋi podɛɔ́gɔ pə́giim kɔ” kɛ́lɛ lɛ́ nkə aa nyóon əə́?»

³⁷Las ɛ wɔɔ́s ó wɔɔ́n ɛlɛ tɛn wɔɔ́s wó oʼkóón ó wɔɔ́n[30] Wɔɔ́s wóow, Yə́sus yɛɛ́dɛ́lɛm a kɛgaágadɛ kɛ́ pɔɔd əə́bə́ə́ kosása, ɔnɔ́: «Nyɔ́ alɛɛ́ na nɛŋɔ́ɛd, yíim ná ndɛɛ́, áŋo.

³⁸Nyɔ́ amáág oʼto na mɛ, “toom tó məní má máagɛɛ́ʼkɛnanan ɔlaa tólɛ́ɛ́ koʼpɛs koʼpɛsáán a ɔʼtɛ́m wə́ə́ŋ” əgín wɔnɔ́ ná kɛ́lɛɛ́ kidiídílə́ tɛn a Kálaʼtaʼ ɛ Táán.»

³⁹Yə́sus ayɛ́ɛ əgusəə náan a oʼto wó Uŋun wó Ufúlúʼtú wó pá pámáág oʼto na nyɔ́lɛ́ pígóodi lɛ́ pɔ́ɔŋ. A kɛnɛŋ kɛ́go kɛ́ɛg, páyɛ́ɛ pádɛ́njɔ́ɔ́ŋ Uŋun lɛ́ Táán ayɛ́ɛ ədísiəd Yə́sus a mɔɛn agomoyɛ́ʼkɛn nugəm.

⁴⁰Ná pɔɔd pə́mmú a kiʼtúú kɛ́ɛg páyóób tɔgɛ́ɛ́ tóod, páyɛ́ɛ agosɔyɔ pɔ́nɔ́: «A fɔ́lɔ́b, táá ɔndɔɛgɛʼ pɛbán o Táán!»

⁴¹Pə́mmú páyɛ́ɛ əgusəə lɛ́: «Məsíi aa yɛ́ɛy nyɔ́lɛ́ nyóonɛ.» Náa, pɔsɔ́g tɛn pə́mmú pə́əsəə pɔ́nɔ́: «Iyó, Məsíi ɛdɛɔ́gɔ igiim ɛ́lon a Kalilə́ə!

⁴²Adɛ́ Kálaʼtaʼ ɛ Táán ɛlɛ əgusəə lɛ́ Məsíi alɛ́ɛ́ kɛɛn mɔɔ́n nyɔ́ a yoog ɛ pɔɔd ɛ Tə́fid ə? Adɛ́ ɛlɛ əgusəə tɛn lɛ́ a Pɛ́ʼtɛlɛɛm, pálɛ́ɛg yɛ́ Tə́fid əyə́biə́níí kɔ aa alɛ́ɛ́ kolónɛ á[31]?»

⁴³Taa, náan aa pɔɔd a kiʼtúú kɛ́ɛg páyásááláá a kidíídí kɛ́ Yə́sus.

⁴⁴Ngab yimmú a ondáŋ wɔ́ɔ́bɔn ɛyɛ́ɛ anyɔ́ŋɛn lɛ́ ná pə́mə́mugúmin. Náa, ɔmbɔ́ úmmuʼ adɛʼkáyɛmoyáág ombɔg a nkó.

⁴⁵Pəʼpulúus pá a Tɛ́mpɛl pə́yúlíni ná puʼkúm pó payaaganɛʼ pɛfɔny na Pafalɛsɛyɛ́ɛŋ pálɛɛ́. Pííŋíən na pəʼpulúus póob pɔ́nɔ́ əə: «Tuə́ áa pudiiminií púgumin Yə́sus əə́?»

⁴⁶Pə́yíbuyúlísíni pɔ́nɔ́: «Tɛdɛ́njaŋ koob mɔɔd ɔɔ́sɔyɔ náan wɔnɔ́ ná nyɔ́lɛ́ alɛɛ́ agosɔyɔ.»

⁴⁷Pafalɛsɛyɛ́ɛŋ pə́yíbuŋíən pɔ́nɔ́ na pɔ́lɛ́ əə: «Pəŋi tɛn, tɔgɛ́ɛ́ tuə́ŋ túmə́budə́ə́ŋi ə́?

⁴⁸Ánɛ wəəs úmmuʼ aa poáʼkodálaá lɛ́ amáág oʼto na nyɔ́lɛ́ ə́? Ɔndaamɛʼ wəəs úmmuʼ óm, mɔɔd o Pafalɛsɛyɛ́ɛŋ úmmuʼ ə́?

⁴⁹Náa, kɛ́lɛ əgín lɛ́ pɔɔd póob pádɛʼkóolɛŋɛn pɛcɛm pɛ́ Moyíis. Pɔ́lɛ́ págo aa pámáág oʼto na nyɔ́lɛ́. Pálɛ pɔɔd pá pálɛɛ́ na pulumisi.»

⁵⁰Mɔɔd nyummú nyɔ́ a ondáŋ ó Pafalɛsɛyɛ́ɛŋ, niiŋ lɛ́ Nɛʼkodɛ́ɛm, ayɛ́ɛ kɔ. Nyɔ́lɛ́ aa ayɛ́ɛ́n wɔɔ́s a nó Yə́sus. Yiíŋíən ɔnɔ́ əə:

⁵¹«Pɛcɛm piə́s pɛ́lɛ əgusəə lɛ́, tɛdɛɔ́gɔ págosom kɛbán kɛ́ mɔɔd ɔsɔyɛd, tɛndɛŋ kɔbɛ́ kó amɛ́ɛ́lɛ[32]»

⁵²Pə́yímuyúlísíni pɔ́nɔ́ na nyɔ́lɛ́: «Wɛ tɛn, olɛ mɔɔ́n ó Kalilə́ə oóm? Lɛŋ kɛɛn əguunə a Kálaʼtaʼ ɛ Táán, waadála kɔ lɛ́, ɔndɔɛgɛʼ pɛbán o Táán ɔmbɔ́ úmmuʼ ɔdɛɔ́gɔ ogolon a Kalilə́ə.» [

⁵³Pááság kodɛ́ɛman agɛɛnan. Ɛ́nɛ́ mɔɔd yiíyə́ən ngə́ ɛ noádɛʼ nuə́ŋ.[33]