Read Yambeta Sɛ́aŋ 9 Bible Online

Sɛ́aŋ 9 - Yambeta bible

Sɛ́aŋ 9

¹Yə́sus ayɛ́ɛ agosan aáság koboan mɔɔd nyummú nyɔ́ əyə́biə́níí na woog.

²Paaʼkan pə́ə́ŋ pə́yímuŋíən pɔ́nɔ́ əə: «Kɛlág, ɛ́bɛdɛánɛ áŋ! A igə aa mɔɔd nyóonɛ əyə́biə́níí náan na woog əə́. Kɛ́lɛ lɛ́ nyɔ́lɛ́ aa nyɔ́ ayɛ́ɛ́lɛ kɔbɛ́ óm, pasɛ pə́ə́ŋ áa páyɛ́ɛ́lɛ kɔbɛ́ ə́[38]?»

³Yə́sus əyíbuyúlísíni ɔnɔ́ na pɔ́lɛ́: «Ndóo, kɛ́dɛɔ́gɔ a oʼto wóonɛ lɛ́ nyɔ́lɛ́ aa nyɔ́ ayɛ́ɛ́lɛ kɔbɛ́, oó lɛ́ pasɛ aa páyɛ́ɛ́lɛ kɔbɛ́, ndóo. Woog wə́ə́ŋ ólɛ lɛ́ ná Táán óloodi pigólí piə́ŋ, pɔɔd pádála a nkó yəəŋ.

⁴Taa, kɛnɛŋ kɛ́ wɔɔ́s úligíí náanɛ kwə́ləəŋ áa tɛlɛɛ́ lɛ́ tíɛlɛ pigólí pɛ́ Nyɔ́ əyíím yɛ́ʼtom. Kɛnɛŋ sɔɔŋ ná mbin ídə́əŋ, ngə́ ɛgɛɛlɛ pigólí idiə́giʼkini kɛɛn kɔ.

⁵Kɛnɛŋ kiim kɛ́ nkə́ligíí a nsí yɛ́ɛnɛ, ndɛ kisəə kɛ́ kɛ́anomɛn pɔɔd pá a nsí yɛ́ɛnɛ.»

⁶Ná ayɛ́ɛ aáʼkosɔyɔ náan, aáság kudu pɛda a nsí, ɔɔ́dɔ́b mayaa má nsí na pɛ́lɛ́, aáság kusiəd, əə́wú mɔɔd a əngis,

⁷náa ɔnɔ́ na nyɔ́lɛ́: «Tod agaásog a kisum kɛ́ Silowə́ə[39]» (Niiŋ nɛ́ Silowə́ə nɛ́ɛn nɛ́lɛ lɛ́ «Nyɔ́ pɛ́ɛ́dóm»). Mɔɔd aáság kɛɛn, amásɔ́gɛ́ɛ́. A nimbuúlini niə́ŋ, ayɛ́ɛ aándadɛ́ʼtɛganan kɔŋɛʼ.

⁸Pɔɔd pá páyɛ́ɛ alaa ndúmiʼ na nyɔ́lɛ́, na pɔsɔ́g pá páyɛ́ɛ pamoodɛ́ʼtɛgɛla aálɛ́ba moom, páyɛ́ɛ ɔsɔyɔ pɔ́nɔ́: «Mɔɔd nyóonɛ əə, adɛ́ nyɔ́lɛ́ aa ayɛ́ɛ yiim ələndən áanɛ a pɛlɛ́baʼ a?»

⁹Pɔsɔ́g pə́mmú pɔ́nɔ́: «Ɛɛ́ɛ, nyɔ́lɛ́ ogo aa alɛɛ́nɔ.» Pɔsɔ́g pə́mmú pɔ́nɔ́: «Ndóo, adɛ́njaŋ nyɔ́lɛ́, amámoŋwáŋánan agá.» Náa, mɔɔd nyóon nyɔ́ ayɛ́ɛ na woog əə́səə nyɔ́lɛ́nyɔ́amɔɛ́d ɔnɔ́: «Mɛ áa ndɛɛ́nɔ, mɛ nyɔ́ pomɛ́ndɛŋ.»

¹⁰Náa pɔɔd pɔ́nɔ́ na nyɔ́lɛ́: «Ooʼó! Náa əngis yááŋ anɛ́ɛ́n óo, tuə́ áa kɛ́másánɛ́ɛ́ wɔnɔ́ ná yáʼkaáyásɛnɛɛ́ ə́?»

¹¹Əyíbuyúlísíni ɔnɔ́ na pɔ́lɛ́: «Mɔɔd nyóon nyɔ́ pɔ́ɔdɔ́ŋɔn lɛ́ Yə́sus, nyɔ́lɛ́ ogo aa ɔɔ́dɔ́b nsí, əmíngwú a əngis, ɔnɔ́ na mɛ nyɛ́ɛn agaásog a kisum kɛ́ Silowə́ə. Náan aa mbɛ́ɛn, mbáság kaásog. Əgín tɛn ná mbáásɔ́gɛ́ɛ aa ndɛɛ́ náanɛ, mbándadɛ́ʼtɛgananɛɛ́.»

¹²Náa pɔ́nɔ́ na nyɔ́lɛ́ əə: «Mɔɔd ogo nyóon əə alɛ ə́lə́ə́ ə́?» Náa ɔnɔ́ na pɔ́lɛ́: «Mɛ, ntɛálɛŋ oo!»

¹³Pááság kusiəd mɔɔd ogo nyóon nyɔ́ ayɛ́ɛ na woog, pámɛ́ɛn na nyɔ́lɛ́ ná Pafalɛsɛyɛ́ɛŋ pálɛɛ́.

¹⁴Kɔmɔɛ́d sɛ́ɛb, wɔɔ́s ogo wóow wó Yə́sus ayɛ́ɛ́lɛ əngis á mɔɔd nyóon yááság kaáyásɛn, óyɛ́ɛ wɔɔ́s ó kisúgiʼ kɛ́ Yúdɛn.

¹⁵Náa Pafalɛsɛyɛ́ɛŋ pɔ́lɛ́ tɛn pə́əmuŋíən lɛ́ ábodɛ́anɛ tuə́ áa kɛ́másánɛ́ɛ́ agɛɛlɛ lɛ́ ádɛ́ʼtɛganan. Ayɛ́bodɛánɛ ɔnɔ́: «Ɔɔ́dɔ́b nsí, amɛ́ndiɛda a əngis, mbáság kɛɛn agaásog, wɔnɔ́ ná mbándadɛ́ʼtɛgananɛɛ́ nɛ́gɔŋ.»

¹⁶Ngab yimmú a ondáŋ ó Pafalɛsɛyɛ́ɛŋ yəə́bə́ə́ kosɔyɔ yɔ́nɔ́: «Mɔɔd nyóon nyɔ́ amɛ́ɛ́lɛ náan ɔdɛɔ́gɔ ogɛɛn mɔɔd nyɔ́ alɛɛ́ əgiim a nó Táán lɛ́, ɔmmɔɛ́d ədiə́gəə́gili kisúgiʼ.» Pɔsɔ́g tɛn pə́mmú pɔ́nɔ́: «Iyó! Ɔngɛɛlɛʼ kɔbɛ́ oyaán áa alɛɛ́ ogɛɛlɛ ombod ó kiə́wúunəniʼ kɛ́ kɛálɛ́ʼkán wɔnɔ́ kɛ́ɛg náan əə́!» Pádɛʼkɛ́ɛ kə́mmú unuʼ úmmuʼ.

¹⁷Náa pə́əgiiʼkini kaágasɛ ná mɔɔd nyɔ́ ayɛ́ɛ na woog nyóon alɛɛ́, pɔ́nɔ́ na nyɔ́lɛ́: «A nɛáŋ ə́ə, wɔʼkɔ́ mɔɔd nyóon nyɔ́ amɛ́ɛ́lɛ lɛ́ ódɛ́ʼtɛganan, alɛ ánɛ ə́?» Ayɛ́bodɛánɛ ɔnɔ́: «Alɛ ɔndɔɛgɛʼ pɛbán ó Táán.»

¹⁸Náa, palaamɛʼ pá Yúdɛn pádɛʼkɛ́ɛ anyɔ́ŋɛn kəə́liʼtini lɛ́ mɔɔd nyóon əyə́biə́níí fɔ́lɔ́b na woog, náa nɛ́gɔŋ yɛ́ɛnɛ aándadɛ́ʼtɛgananɛɛ́. Pááság kusəə lɛ́ pɔ́dɔ́ŋɔn pa sɛ na ŋŋí, píim.

¹⁹Pə́ə́bə́ə́ kobolóoya pɔ́nɔ́: «Mɔɔ́n waaŋan aa nyóonɛ fɔ́lɔ́b á? Poɔʼkɔ́ əyə́biə́níí fɔ́lɔ́b na woog o? Póbɛdɛ́anɛ tuə́ áa kɛ́másánɛ́ɛ́ wɔnɔ́ ná aándadɛ́ʼtɛgananɛɛ́ nɛ́gɔŋ.»

²⁰Náa pa sɛ na ŋŋí pɔ́nɔ́ na pɔ́lɛ́: «Ɛɛ́ɛ, a kɛ́ mɔɔ́n, alɛ fɔ́lɔ́b mɔɔ́n wəəs, əyə́biə́níí tɛn fɔ́lɔ́b na woog.

²¹Náa, a kɛ́ɛnɛ kɛ́ kɛ́lɛɛ́ lɛ́ nkə aa kɛ́másánɛ́ɛ́ agɛɛlɛ lɛ́ ádɛ́ʼtɛganan, pəsi tɛdɛálɛŋ. Tɛdɛálɛŋ ɔmbɔ́ tɛn ánɛ aa əmə́mubúən əngis. Kɛ́ɛg, ímuŋiə́nə́ən kɔ na nyɔ́lɛ́, əndigi moóngaa, ə́səə kɛbán kiə́ŋ nyɔ́lɛ́nyɔ́amɔɛ́d.»

²²Pa sɛ na ŋŋí Píísə́ə́ náan lɛ́ páyɛ́ɛ agodammana palaamɛʼ pá Yúdɛn. Páyɛ́ɛ agoboódammana lɛ́ kɛ́yɛ́ɛ kɛándɛ kɛdɔ́lɛ́gáán lɛ́ mɔɔd nyɔ́ alɛ́ɛ́ kəə́liʼtinií lɛ́ Yə́sus alɛ Məsíi, pə́əmusiə́gi lɛ́ ədiyíʼkíni kaag ongoo a yoog ɛ pɛɔ́sɔ́gɔ́lɔ́n.

²³Taa, kólɛ́ aa pa sɛ na ŋŋí píísə́ə́ pɔ́nɔ́: «Ímuŋiə́nə́ən kɛ́ɛg kɔ na nyɔ́lɛ́nyɔ́amɔɛ́d, əndigi moóngaa.»

²⁴A pɛnɛŋ pɛ́baan, Pafalɛsɛyɛ́ɛŋ pááság kodɔ́ŋɔn kə́mmú moóngaa nyóon nyɔ́ ayɛ́ɛ na woog. Píísə́ə́ pɔ́nɔ́ na nyɔ́lɛ́: «Tammána Táán, úsəə fɔ́lɔ́b. Pəsi tɛálɛŋ lɛ́ mɔɔd nyóon alɛ ɔngɛɛlɛʼ mabɛ́.»

²⁵Əyíbuyúlísíni ɔnɔ́ na pɔ́lɛ́: «Mɛ, ntɛálɛŋ nga alɛ ɔngɛɛlɛʼ mabɛ́, oó lɛ́ ɔdɛɔ́gɔ ɔngɛɛlɛʼ mabɛ́. Yoom ɛ́lɛ ímuʼ yɛ́ mbálɛŋ, njɛ́ɛ na woog náa nɛ́gɔŋ yɛ́ɛnɛ mbándadɛ́ʼtɛgananɛɛ́.»

²⁶Náa pɔ́nɔ́ kə́mmú na nyɔ́lɛ́: «Nkə aa amágoyɛ́ɛ́lɛ lɛ́ ódɛ́ʼtɛganan?»

²⁷Aáság kubuyúlisini ɔnɔ́ na pɔ́lɛ́: «Mbáʼkobodɛ́anɛ nkə áa amɛ́ɛ́lɛ, podɛnjoóbɛn. A igə aa poɔʼkɔ́ nyíiʼkini kobodɛ́anɛ kə́mmú ə́? Pəŋi tɛn poándaanyɔ́ŋɛn lɛ́ póɛn agá a ondáŋ ó paaʼkan pə́ə́ŋ óm?»

²⁸Pafalɛsɛyɛ́ɛŋ pə́ə́bə́ə́ anɛ́ɛ́n komoodóga, pɔ́nɔ́ na nyɔ́lɛ́: «Əə́əy, wɛ áa olɛɛ́ ongaaʼkan wəəŋ óm! Pəsi, tɛlɛ kuə́s paaʼkan pá Moyíis.

²⁹Pəsi tɛálɛŋ lɛ́ na Moyíis aa Táán yɛɛ́sɔ́yɔ. Kɔmɔɛ́d lɛ́ sɔ́g nyóonɛ, tɛdɛálɛŋ kuə́s ngə́ yɛ́ nyɔ́lɛ́ alɛɛ́ əgiim álon.»

³⁰Náa mɔɔd ɔnɔ́ na pɔ́lɛ́: «Táá nkə kɛ́ ndə́gəə́wúunəni aa kɛ́ɛg. A mɛ, amɛ́nyɛɛlɛ lɛ́ ntɛ́ʼtɛganan, pəŋi poɔʼkɔ́ podɛálɛŋ ə́lə́ə́ áa nyóon əə́giim álon!

³¹Tɛlɛ palɛŋáán lɛ́, Táán adɛágoob pɛɔ́sɔ́gɔ́lɔ́n pɛ́ ɔngɛɛlɛʼ kɔbɛ́, alɛ agoob əgín pɛ́ mɔɔd nyɔ́ alɛɛ́ agomonyáadɛ, aágɛɛlɛ nɛnyɔ́ŋɛn niə́ŋ[40]

³²Pɛ́go pɛ́ nsí ɛyásáŋɛ́ɛ́, tɛdɛ́njag koob lɛ́ mɔɔd əmə́biə́níí na woog, páyɛɛlɛ lɛ́ yíiʼkini kodɛ́ʼtɛganan.

³³Kɛ́yɛ́ɛnɛn lɛ́ alɛ nyɔ́ ɔdɛɔ́gɔ əgimií a nó Táán, ná ɔdɛɔ́gɔ ogɛɛlɛ yoom na yoom.»

³⁴Pə́yímuyúlísíni pɔ́nɔ́ na nyɔ́lɛ́: «Wɛ nyóonɛ nyɔ́ uyə́biə́níí wɛ ɔmmɔɛ́d ungim a kɔbɛ́, wɛ áa waábɛyáaʼkananɛ pəsi nkə kɛ́ kɛ́lɛɛ́ kɔ ɔ?» Pááság kumuúgumin pámámoodó a táán.

³⁵Yə́sus aáság kɛɛn agoob lɛ́ páádó mɔɔd nyóon a táán. Ayɛ́ɛ́n amoóboan, ɔnɔ́ na nyɔ́lɛ́: «Omáág oʼto na Mɔɔ́n o mɔɔd ɔ?»

³⁶Mɔɔd nyóon yiíŋíən ɔnɔ́ na Yə́sus əə: «Kɛlág, Mɔɔ́n o mɔɔd aa nyóon ánɛ ə́, ɛ́ʼtɛánɛ́, nyáág oʼto na nyɔ́lɛ́.»

³⁷Yə́sus əyímuyúlísíni ɔnɔ́: «Nyɔ́lɛ́ ogo aa nyóonɛ a udi wááŋ, ɔɔ́sɔyɔ na wɛ.»

³⁸Mɔɔd aáság kusəə ɔnɔ́ na nyɔ́lɛ́: «Ɛɛ́ɛ, mbáág oʼto na wɛ Sə́dúk.» Aáság kudə́əŋənən Yə́sus na əndu a udi.

³⁹Náa Yə́sus ɔnɔ́: «Mbíim a nsí yɛ́ɛnɛ lɛ́ ná nyáág mbaasɔ́ ɛ pɛyɔm lɛ́ ná pá pálɛɛ́ na woog pádɛ́ʼtɛganan, pá pálɛɛ́ agodɛ́ʼtɛganan, pə́ədə́əŋ woog.»

⁴⁰Ná ngab ɛ Pafalɛsɛyɛ́ɛŋ yɛ́ ɛyɛ́ɛ kɔ áay ɛyóób tɔgɛ́ɛ́ tóod, páyɛ́modɛánɛ pɔ́nɔ́ na nyɔ́lɛ́: «Wɔʼkɔ́ pəsi tɛn tɛlɛ anyóon na woog yi?»

⁴¹Ayɛ́bodɛánɛ ɔnɔ́ na pɔ́lɛ́: «Pəŋi, poyɛ́ɛnɛn na woog ná podɛɔ́gɔ na nsɔ́ɔ́. Náa, wɔnɔ́ ná puə́gəə́gidən a igog poɔʼkɔ́: “Tɛlɛ agodɛ́ʼtɛganan”, nsɔ́ɔ́ yaaŋan ɛlɛ əgín kɔ na pəŋi.»