Read Yambeta Pigólí 10 Bible Online

Pigólí 10 - Yambeta bible

Pigólí 10

¹Mɔɔd nyummú ayɛ́ɛ a Səsalə́ə, niiŋ lɛ́ Kɔɔnɛ́ɛy. Ayɛ́ɛ nkúm ɛ kiʼtúú kɛ́ pasɔ́njaa əʼtin áʼtáan kɛ́ Ɔlɔ́ma. Páyɛ́ɛ agodɔ́ŋɔn ondáŋ ó Pasɔ́njaa ogo wóow lɛ́ «ondáŋ ó pasɔ́njaa wó Ɛʼtálɛan.»

²Ayɛ́ɛ mɔɔd o sáád. Na nyɔ́lɛ́ na yoog yəəŋ ɛ pɔɔd páyáyɛ́ʼkɛnɛn na toɛn a pɛbán pɛ́ kəə́liʼtiniʼ, páadammana Táán. Ayɛ́ɛ agɛɛ́banɛ pasɔ́gasɔ́gá pá a ndɛg ɛ Yúdɛn kɛ́fɔlɛ́, ɔɔ́gɔɔ́sɔ́gɔlɔn Táán pɛnɛŋ piim.

³Wɔɔ́s wúmmú, a ngim ɛ tóɛf, ná mangɛn mádáád máyɛ́ɛ mə́ndəgiim əwísən, uŋun ó maʼtom ó Táán óyɛ́molónɛn. Yɛɛ́dála wólɛ́ moááŋ, wə́əgiim ɔsɔd a noádɛʼ nuə́ŋ, ómámodɔ́ŋɔn, wɔnɔ́: «Kɔɔnɛ́ɛy oó!»

⁴Kɔɔnɛ́ɛy əyímubísin əngis na wɛɛ́y, ɔnɔ́: «Oó Sə́dúk, nkə aa kɛ́agaásan ə́?» Náa uŋun ó maʼtom wɔ́nɔ́ na nyɔ́lɛ́: «Táán amóób pɛɔ́sɔ́gɔ́lɔ́n pɛáŋ, aádála tɛn nuboʼ noáŋ na mɔsɔ́gasɔ́gá, ədiguyə́bəlini.

⁵Nɛ́gɔŋ yɛ́ɛnɛ, tóm pɔɔd a Sioʼpə́ə, pɛ́ɛn əsiəd Simɔ́ɔŋ nyɔ́ pɔ́ɔdɔ́ŋɔn tɛn lɛ́ Píɛ.

⁶Alɛ a nó mɔɔd nyummú niiŋ lɛ́ Simɔ́ɔŋ, uʼkud na piob pɛ́ ponyam. Noádɛʼ nó mɔɔd ogo nyóon nólɛ a ɛbá ɛ́ noom nó ɛbá fiɛ́d.»

⁷Əgín tɛn ná uŋun ó maʼtom wóow wíísə́ngílid a əngis yə́ə́ŋ, Kɔɔnɛ́ɛy aáság kodɔ́ŋɔn pəgudin pə́ə́ŋ pábaan, na sɔ́njaa yɛ́ ayɛ́ɛ agoʼkɔmɔn mmuʼ. Sɔ́njaa yɛ́ɛy ɛyáyɛ́ʼkɛnɛn na toɛn a pɛbán pɛ́ kəə́liʼtiniʼ.

⁸Kɔɔnɛ́ɛy Ayɛ́bodɛánánɛ nkə kiim kɛ́ kɛ́yásánɛ́ɛ́, aáság koboodom a Sioʼpə́ə.

⁹Pɔɔd pá Kɔɔnɛ́ɛy yɛɛ́dóm pááság kɛɛn. Pálɛ anɛ́ɛ́n kɔ a ngə́ a koany kaáyɛnɛ, páyɛ́ɛ pándɛ ndúmiʼ na pálɛ́ɛg ɛ Sioʼpə́ə ná tóɛf ɛyɛ́ɛ yəə́ndəgiim əgiig. A kɛnɛŋ tɛn kɛ́go kɛ́ɛg, Píɛ yɛɛ́bág a noádɛʼ a mɔɛn agɛɛn ɔgɔɔ́sɔ́gɔlɔn.

¹⁰Njaan ɛyɛ́ɛ yaándamoobany, aándanyɔ́ŋɛn konɛ́ɛnɛ. Pálɛ anɛ́ɛ́n kɔ agomoyɛ́ɛlɛnɛ yoom ɛ́ konɛ a, yoom ɛgo yááság komolónɛn wɔnɔ́ a kɛlɛm.

¹¹Yɛɛ́dála mbálámɔɛn mbuənə́ə́n, yoom yə́əgiim ísuu fɛɛ́ɛɛ, wɔnɔ́ sanjaʼ. Ɛ́yɛ́ɛ igumínə́ə́n a nkoŋ íniʼ.

¹²Kɔ a sanjaʼ yɛ́ɛy, mbod ngim ɛ ponyam pó ambaan ə́niʼ póyɛ́ɛ kɔ, na pó póalandɛn na kaadɛ kɛ́, na pɛsag pɛ́ a mbálámɔɛn kɛ́.

¹³Náa nɛŋo nɛɔ́nɔ́ na nyɔ́lɛ́: «Píɛ oó! Tɛ́ɛ́mɛn o! Tɛ́ɛ́mɛn wóóna ponyam póob, ónɛ!»

¹⁴Píɛ əyímuyúlísíni ɔnɔ́: «Ndóo óo Sə́dúk! Pɛ́am pɛ́go, yiim yɛ́ ɛ́lɛɛ́ kisiə́g, oó lɛ́ yɛ́ ɛlɛɛ́ kifuə́[42]» ntɛ́njag konɛ

¹⁵Náa nɛŋo níəgiiʼkini kosɔyɛd nɛɔ́nɔ́ na nyɔ́lɛ́: «Yɛ́ Táán əə́səə lɛ́ ɛ́dɛɔ́gɔ kifuə́, wɛ odɛɔ́gɔ ugusəə lɛ́ ɛ́lɛ kifuə́!»

¹⁶Kɛ́yáyɛ́lɛ́ɛ́ náan pɛnɛŋ pɛ́dáád, sanjaʼ yaáság kiiʼkini kobag a mɔɛn.

¹⁷Píɛ ayɛ́ɛ əgəə́ŋíənə ɔnɔ́ nkə kɛ́ɛg kɛ́ kɛ́yɛ́molónɛn əə, kɛ́lɛ aa nyóon lɛ́ nkə ə́? Ɛlɛ əŋíənə kɔ náan a, pɔɔd pá Kɔɔnɛ́ɛy əyíím ádom pááság kiim alon. Páyɛ́ɛ pə́ʼkiim pə́ŋíənə noádɛʼ nó Simɔ́ɔŋ kɛnɔ kiim. Náa pə́əgiim adɛ́lɛm a nɛsɔd nɛ́ oʼkág,

¹⁸pə́ə́bə́ə́ kuʼkíŋə pɔ́nɔ́ əə: «A noádɛʼ nóonɛ aa Simɔ́ɔŋ nyɔ́ pɔ́ɔdɔ́ŋɔn lɛ́ Píɛ alɛɛ́ ə́?»

¹⁹Píɛ nyɔ́lɛ́ yiíligəni əgín kɔ́gɔ́ɔg əguunə koob nkə kɛ́ kɛ́yɛ́molónɛn. Náa Uŋun wó Ufúlúʼtú wɔ́nɔ́ na nyɔ́lɛ́: «Taa, nto ɛ pɔɔd ɛ́dáád[43] ɛlɛ kága, pálɛ əguguyúunə.

²⁰Tɛ́ɛ́mɛn úsuu, wɛ́ɛn na pɔ́lɛ́, udiyə́ʼtímíí lɛ́ mɛ áa mbíim mpoodom.»

²¹Píɛ aáság kusuu agɛɛn aboan pɔɔd póob. Náa ɔnɔ́ na pɔ́lɛ́: «Mɛ ogo nyɔ́ puə́ginjuunə aa nyóonɛ. Nkə aa puə́ginjuunə a kɛ́lɛ́?»

²²Pááság kumuyúlisini pɔ́nɔ́ na nyɔ́lɛ́: «Kɔɔnɛ́ɛy, nkúm ɛ kiʼtúú kɛ́ pasɔ́njaa[44] áa amábɛɛdóm. Alɛ mɔɔd o sáád, alɛ agodammana Táán. Pɔɔ́n pá Yúdɛn piim pálɛ agomoógany. Uŋun ó maʼtom ó Táán óyɛ́modɛánɛ lɛ́ ágoyɛ́ɛlɛ, wíim a noádɛʼ nuə́ŋ ná yóób nkə kɛ́ waámodɛ́anɛ.»

²³Píɛ aáság kusəə lɛ́ pɔ́sɔd a yoog, amáboyɛ́ʼkɛn kɛnɔ lɛ́ pɛ́mmɛŋɛn. A koany kaáyɛnɛ pááság kɛɛnanan ondáŋ. Páyɛ́ɛ́n kɔ na pəə́liʼtiniʼ pə́mmú pá a Sioʼpə́ə.

²⁴A koany kaáyɛnɛ kúmmú, pááság kɛɛn əgiig a Səsalə́ə. Kɔɔnɛ́ɛy nyɔ́ yɛɛ́dóm pɔɔd ayɛ́ɛ agobooboŋ kɔ na yoog yə́ə́ŋ ɛ pɔɔd, na pɔsɔ́sɔ́g pə́ə́ŋ pá ɔʼtɛ́m pá yɛɛ́dɔ́ŋɔ́nɔ.

²⁵Ná Píɛ ayɛ́ɛ́n əgiig, a nɛsɔd nɛ́ɛn nɛ́ ayɛ́ɛ ɔɔ́ndɔɔsɔd, Kɔɔnɛ́ɛy aáság kiim amooboŋ a ngə́, əmə́mudə́ə́ŋə́nən a ambaan na əndu agomonyáadɛ.

²⁶Píɛ aáság kumudə́əmini, ɔnɔ́ na nyɔ́lɛ́: «Ndóo, tɛ́ɛ́mɛn! Mɛ tɛn ndɛ əgín agá mɔɔd!»

²⁷Pə́ə́bə́ə́ kɛɛn pə́əgiim pɔ́sɔyɔ, pááság kɛɛn ɔsɔd a noádɛʼ. Píɛ yɛɛ́bóan ɛ́fɔlɛ́ ɛ́ pɔɔd paágɔ́nyɛ́dáán kɔ.

²⁸Náa ɔnɔ́ na pɔ́lɛ́: «Polɛ palɛŋáán lɛ́ kɛ́lɛ kɛcɛm a kəə́liʼtiniʼ kuə́s lɛ́ mɔɔ́n ó Yúdɛn yɛ́ɛn a nó kɛnɔɔŋɛʼ, ɔ́sɔd a noádɛʼ nuə́ŋ, ngɔ́ɔ́? Náa, Táán əmíndoodi mɛ lɛ́ ntisiə́d mɔɔd nyummú lɛ́ alɛ kifuə́, ɔdɛɔ́gɔ nyóonɛ lɛ́ pə́ləndin na nyɔ́lɛ́.

²⁹Kólɛ́ aa əgín ná pámɛ́ʼtɛánɛ lɛ́ olɛ agɛʼtɔ́ŋɔn, mbáság kiim ntiə́ʼtímíí. Náa nɛ́gɔŋ yɛ́ɛnɛ ndáanyɔ́ŋɛn kolɛŋ nkə kɛ́ pomɛ́ʼtɔ́ŋɔn a kɛ́lɛ́.»

³⁰Náa Kɔɔnɛ́ɛy ɔnɔ́ na nyɔ́lɛ́: «Mədúg mádáád naánɛ́, njɛ́ɛ a pɛɔ́sɔ́gɔ́lɔ́n a yoog a kaadɛ. Kɛ́yɛ́ɛ əgín a kɛnɛŋ kɛ́ɛnɛ, a ngim ɛ tóɛf, a mangɛn mádáád. Nyiídíin ntála agá mɔɔd ogo aáʼkodɛ́lɛm a udi wáam na pilə́ə́ fúlúʼtúʼtúʼtú,

³¹ɔnɔ́ na mɛ: “Kɔɔnɛ́ɛy, Táán amóób pɛɔ́sɔ́gɔ́lɔ́n pɛáŋ, ədiə́bəlini nuboʼ noáŋ na mɔsɔ́gasɔ́gá.

³²Tóm anɛ́ɛ́n pɔɔd a Sioʼpə́ə, pɛ́ɛn əsiəd Simɔ́ɔŋ nyɔ́ pɔ́ɔdɔ́ŋɔn tɛn lɛ́ Píɛ. Alɛ a nó mɔɔd nyummú niiŋ lɛ́ Simɔ́ɔŋ, uʼkud na piob pɛ́ ponyam. Noádɛʼ nó mɔɔd ogo nyóon nólɛ a ɛbá ɛ́ noom nó ɛbá fiɛ́d.”

³³Əgín tɛn kɔ áay kɔ áay, mbáság kodom pɔɔd lɛ́ píim əguúsiəd. Kɔŋɛʼ wɔnɔ́ ná umíim. Nɛ́gɔŋ yɛ́ɛnɛ, tɛlɛ áanɛ pəsi piim a udi ó Táán lɛ́ tiób nkə kiim kɛ́ Sə́dúk amágoyɛ́ʼkɛn lɛ́ wíim abɛdɛ́anɛ.»

³⁴Píɛ aáság kusiəd anɛ́ɛ́n tɔgɛ́ɛ́, ɔnɔ́: «Pomóŋŋí, mbáʼkoob fɔ́lɔ́b nɛ́gɔŋ lɛ́ Táán ɔdɛɔ́gɔ na ɛsaa[45]

³⁵Ungim nyɔ́ aámoódammana, ungim nyɔ́ aágɛɛlɛ nkə kɛ́ kɛ́lɛɛ́ sáád, yɛɛn ɔmbɔ́ o nigúu igə, Táán əəmuúsiəd kɔŋɛʼ.

³⁶Tɔsɔm tuə́ŋ Tólaŋ, pɔɔ́n pá Ɛ́sɛlayɛl aa yɛɛ́dómɛn. Tólɛ tɔsɔm tó tóagɛɛ́ʼkɛnanan kiwiiyiʼ[46] Kiwiiyiʼ kɛ́ɛg kíyíím na Yə́sus Kilíʼtus nyɔ́ alɛɛ́ Sə́dúk o mɔɔd ungim.

³⁷Adɛ́ poálɛŋ nkə kɛ́ kɛ́yásánɛ́ɛ́ a nigúu nɛ́ Siudə́ə niim ə! Kíyíím kiə́bə́ə́ a Kalilə́ə ná Sɛ́aŋ ayɛ́ɛ əgiim álɔɛgɛ tɔsɔm, aágɛɛ́ʼkɛnan pɔɔd ɔsɔgɛn.

³⁸Adɛ́ poálɛŋ tɛn wɔnɔ́ ná Táán yiísúgínin Yə́sus, mɔɔ́n ó Násalɛd nyóon, Uŋun wó Ufúlúʼtú, amáamoyɛ́ʼkɛn toɛn á! Əyíím ádáŋana a nigúu niim, əə́giim yɛ́ɛlɛ kɔŋɛʼ, ɔɔ́gɔɔyɔnɛ ungim nyɔ́ Omɔlɛɔ́g ayɛ́ɛ aáʼkogóda. Nkə kɛ́ɛg kiim, ayɛ́ɛ agɛɛlɛ lɛ́ Táán ayɛ́ɛ na nyɔ́lɛ́.

³⁹«Pəsi anɛ́ɛ́n, tɛlɛ pawɛ́sɛnɛg a nkə kɛ́ɛg kiim kɛ́ ayɛ́ɛ́lɛ a Yolósalɛm na a əʼkúu á Yúdɛn tɛn yɛ́ndɛ́ŋ. Páyɛ́mobáŋan a ɔmbásá, pámámoyóón.

⁴⁰Náa, a ngim ɛ mɔɔ́s mádáád, Táán ayɛ́moyóndɛ́gɛ, amáyɛɛlɛ lɛ́ yóloodi na pɔɔd.

⁴¹Adɛ́njaŋ na ungim aa oyólódíí, náa oyólódíí əgín na pəsi pá Táán yɛɛ́yáŋ əbiyíiyid lɛ́ tíɛn pawɛ́sɛnɛg, pəsi pá tɛɛ́nɛ́ɛ́nɛ na nyɔ́lɛ́, tɛáŋó na nyɔ́lɛ́ a ngim yɛ́ əyíím yóndɛg a pɛlóŋ.

⁴²A komananɛ, yiísə́ə́ lɛ́ tɛ́lɔɛgɛ kɛ́lɛ́ na pɔɔd, tɛ́bodɛ́anɛ lɛ́ nyɔ́lɛ́ aa alɛɛ́ nyɔ́ Táán əə́də́nígi lɛ́ ɔ́yɔmɛ pɔɔd pá poóm, na pá pə́ʼkugúú.

⁴³Mbaasɔ́ yəəŋ áa palɔɛgɛʼ pɛbán pá Táán piim pálɛɛ́ agɛɛ́ʼkɛn kɛnɛŋ kɛ́ pálɛɛ́ əgusəə pɔ́nɔ́: Ungim nyɔ́ amáág oʼto na Yə́sus, a toɛn tó niiŋ niə́ŋ áa Táán əə́muúlisin mabɛ́[47]»

⁴⁴Píɛ alɛ kɔ náan na tɔgɛ́ɛ́ a unuʼ ə, Uŋun wó Ufúlúʼtú wááság kusuu a ntɛ́m ɛ pɔɔd piim pá páyɛ́ɛ agoob tɔsɔm.

⁴⁵Pɔɔ́n pá Yúdɛn, pəə́liʼtiniʼ pá pə́yíím ondáŋ na Píɛ píígə́g ná pɛ́ɛ́dála wɔnɔ́ ná Táán ayɛ́ʼkɛn Uŋun wó Ufúlúʼtú na pɛnɔɔŋɛʼ.

⁴⁶Kɛ́lɛ lɛ́, páyɛ́ɛ agoob pɔɔd póob pɔ́ɔsɔyɔ a əʼkíí yɛ́ndɛ́ŋ, páanyáadɛ tɛn Táán lɛ́ alɛ oʼkóʼkóón. Píɛ aáság kiiʼkini kusiəd tɔgɛ́ɛ́, ɔnɔ́:

⁴⁷«Pɔɔd póonɛ pá pándɛɛ́ na Uŋun wó Ufúlúʼtú wɔnɔ́ pəsi əə, ánɛ aa aábɛsáŋɛnɛnɛ lɛ́ tɛdɛyɛ́boyɛ́ʼkɛn ɔsɔgɛn ó məní ə́?»

⁴⁸Aáság kusəə lɛ́ páboósɔgɛn a niiŋ nɛ́ Yə́sus Kilíʼtus. Pííŋíən na Píɛ lɛ́ ɔ́lɔb anɛ́ɛ́n kə́mmú ngab ɛ mədúg na pɔ́lɛ́.