Read Yambeta Pigólí 11 Bible Online

Pigólí 11 - Yambeta bible

Pigólí 11

¹Pɔɔ́n pá maʼtom na pəə́liʼtiniʼ pá páyɛ́ɛ a Siudə́ə páyóób lɛ́ pɛnɔɔŋɛʼ pɛ́ pɛ́dɛɔ́gɔ a kəə́liʼtiniʼ kó Yúdɛn piə́ʼkəə́liʼtini tɛn Tɔsɔm tó Táán.

²Ná Píɛ ayɛ́ɛ́n əgiig a Yolósalɛm, pəə́liʼtiniʼ pá páyɛ́ɛ pɔɔ́n pá Yúdɛn páyɛ́moyɛ́ʼkɛn nsɔ́ɔ́,

³pɔ́nɔ́: «Wɛɛ́sɔ́d a nó pɔɔd pá pisun póob, waánɛ́ɛ́nɛ na pɔ́lɛ́ lɛ́ nkə![48]»

⁴Píɛ aáság koboyásɛnɛn kímuʼ kímuʼ nkə kiim kɛ́ kɛ́yásánɛ́ɛ́, kəə́bə́ə́ a oʼto, kiig a nsun, ɔnɔ́ na pɔ́lɛ́:

⁵«Ná njɛ́ɛ a Sioʼpə́ə, ndɛ kɔ ɔgɔɔ́sɔ́gɔlɔn Táán, yoom yááság kɛndónɛn wɔnɔ́ a kɛlɛm. Yoom yə́əgiim ísuu fɛɛ́ɛɛ, wɔnɔ́ sanjaʼ. Ɛ́yɛ́ɛ igumínə́ə́n a nkoŋ íniʼ, yááság kiim kɛnɔ kɛ́ ndɛɛ́.

⁶Nyiísə́sə́ŋə́ni yoom ɛgo kɔŋɛʼ kɔŋɛʼ agɛɛlɛ lɛ́ ndɛŋ kodála nkə kɛ́ kɛ́yɛ́ɛ kɔ. Nyɛɛ́dála kɔ ponyam pó ambaan ə́niʼ, ponyam pó kidun lɛ́ na pó póalandɛn na kaadɛ, na pɛsag pɛ́ a mbálámɔɛn.

⁷Náa nɛŋo nɛɔ́nɔ́ na mɛ: “Píɛ oó! Tɛ́ɛ́mɛn o! Tɛ́ɛ́mɛn wóóna ponyam póob, ónɛ!”

⁸Njímuyúlísíni nyɔʼkɔ́: “Ndóo óo Sə́dúk! Pɛ́am pɛ́go, yiim yɛ́ ɛ́lɛɛ́ kisiə́g, oó lɛ́ yɛ́ ɛlɛɛ́ kifuə́ ɛ́dɛ́njag kosɔd a unuʼ wáam.”

⁹Náa nɛŋo níəgiiʼkini kosɔyɛd kɔ́gɔ́ɔg a mbálámɔɛn, nɛɔ́nɔ́: “Yɛ́ Táán əə́səə lɛ́ ɛ́dɛɔ́gɔ kifuə́, wɛ odɛɔ́gɔ ugusəə lɛ́ ɛ́lɛ kifuə́!”

¹⁰Kɛ́yáyɛ́lɛ́ɛ́ náan pɛnɛŋ pɛ́dáád. A ngim yɛ́ɛy moom muim moáság kaáwɛs agobag a mɔɛn.

¹¹Əgín tɛn a kɛnɛŋ kɛ́go kɛ́ɛg, nto ɛ pɔɔd ɛ́dáád yaáság kiim alon a noádɛʼ nó tɛyɛ́ɛ kɔ. Páyɛ́ɛ əgiim a Səsalə́ə. Pə́yíím páboodom lɛ́ píim agɛʼtála.

¹²Uŋun wó Ufúlúʼtú wááság kɛʼtɛ́anɛ lɛ́ nyɛ́ɛn na pɔ́lɛ́, ntiyə́ʼtímíí.» Tɛyɛ́nánan ondáŋ na pomóŋŋí pə́ə́s pá kəə́liʼtiniʼ póonɛ páʼtáan na úmmuʼ. Agɛɛn əgiig kuə́s kɔ́gɔ́ɔg, tɛɛ́dám tɛ́sɔd a nó mɔɔd ogo nyɔ́ ayɛ́boodóm.

¹³Aáság kɛbɛyáloaŋanan wɔnɔ́ ná yɛɛ́dála uŋun ó maʼtom, wɔ́ɔ́sɔ́d a yoog yəəŋ, wááság komodɛ́anɛ wɔnɔ́: «Kɔɔnɛ́ɛy, tóm pɔɔd a Sioʼpə́ə, pɛ́ɛn əsiəd Simɔ́ɔŋ nyɔ́ pɔ́ɔdɔ́ŋɔn lɛ́ Píɛ.

¹⁴Aagodɛ́anɛ tɔgɛ́ɛ́ tó tóagɛɛlɛ lɛ́ Táán ágoyɔ́ɔyɛ lɛ́ na wɛ na yoog yaaŋ ɛ pɔɔd.»

¹⁵Ayɛ́ɛ əgín ndə́gəə́bə́ə́ kosɔyɔ, Uŋun wó Ufúlúʼtú wááság kusuu a ntɛ́m yɔɔbɔn wɔnɔ́ ná úyíbisúúlin tɛn pəsi a niə́bə́ə.

¹⁶Mbáság kaáyɔ́ɔ́ŋɛ nkə kɛ́ Sə́dúk ayɛ́ʼtɛánɛ, ɔnɔ́: «Na məní má məní aa Sɛ́aŋ ayɛ́ɛ agosɔgɛna pɔɔd. Náa pəŋi, na Uŋun wó Ufúlúʼtú aa Táán alɛ́ɛ́ koboósɔgɛnɛɛ́.»

¹⁷Táán ayɛ́ʼkɛn pɛnɔɔŋɛʼ Uŋun wó Ufúlúʼtú, əgín yoom ímuʼ wɔnɔ́ ná ayɛ́bɛyɛ́ʼkɛn tɛn pəsi ná tɛyáág oʼto na Sə́dúk Yə́sus Kilíʼtus. Mbáság kusəə nyɔʼkɔ́ əə: «Mɛ anyóon ánɛ aa ndásáŋɛnɛ lɛ́ Táán adɛnjɛ́ɛ́lɛ pigólí piə́ŋ ə́?»

¹⁸Ná Píɛ yiísə́ə́ náan, ungim aáság kodɔɔ. Páyɛ́ɛ agonyáadɛ Táán, pɔ́nɔ́: «Táláan Táán amɛ́ʼkɛn pɛnɔɔŋɛʼ pɛ́ pɛ́dɛɔ́gɔ a kəə́liʼtiniʼ toɛn lɛ́ págasɛ ɔlaa wɔ́ɔ́bɔn ná pɛ́ɛn na ɔlaa ó fɔ́lɔ́b ə́!»

¹⁹Njəʼkə́nə́ní yɛ́ pəə́liʼtiniʼ pɔ́yɔ́ɔ́ŋ a kɛnɛŋ kɛ́ páyóón Ɛ́ʼtiɛn ɛyɛ́boyɛ́ɛ́lɛ lɛ́ págólɛgɛd, pɔsɔ́g pə́mmú páagɛɛn a Fənəsíi, [49] pə́mmú a Síiʼpələ, [50] pə́mmú a pálɛ́ɛg yɛ Əntiyóos. Əgín na Yúdɛn yɛ́lɛ́ na yɛ́lɛ́ aa páyɛ́ɛ alaamɛnɛ Tɔsɔm Tólaŋ.

²⁰Kɛbán kímuʼ, ná páyɛ́ɛ́n əgiig a Əntiyóos, pəə́liʼtiniʼ pə́mmú a ondáŋ wɔ́ɔ́bɔn, pibíəniʼ pɛ́ Síiʼpələ na Silɛ́ɛn, páyɛ́ɛ alaamɛnɛ tɛn pá pádɛʼkɛ́lɛɛ́ Yúdɛn, Tɔsɔm Tólaŋ tó Sə́dúk Yə́sus.

²¹Táán ayɛ́ɛ agoboyábɛgɛn ombɔg a pigólí pɛɔ́bɔn, pɔɔd piíŋ pámɛ́ɛ páág oʼto na Táán, pɔ́ɔ́sɔ́d a ngə́ ɛ Sə́dúk.

²²Pəə́liʼtiniʼ pá a Yolósalɛm pááság kɛɛn agoob nkə kɛ́ɛg kɛ́ kɛ́yásánɛ́ɛ́. Pə́yííyid Panábas pááság komoodom a Əntiyóos.

²³Ná əyíím əgiig, aádála tuə́ áa Táán ayɛ́ɛ́lɛ́nɛ pəə́liʼtiniʼ póob kɔŋɛʼ, yɛɛ́nyɔ́ga. Ayɛ́ɛ agoboónasanɛ nkó agɛɛlɛ lɛ́ pááyɛ́ʼkɛn na Sə́dúk na ɔʼtɛ́m wɔ́ɔ́bɔn ungim.

²⁴Kɛ́lɛ lɛ́, Panábas ayɛ́ɛ mɔɔd olaŋ, mɔɔd nyɔ́ ayáágɛn oʼto kɛ́fɔlɛ́ na Táán. Uŋun wó Ufúlúʼtú óyɛ́ɛ na nyɔ́lɛ́ síɛ́ɛ́d. Pɔɔd piíŋ pə́ə́bə́ə́ kuyə́ən ngə́ ɛ Sə́dúk.

²⁵A ngim yɛ́ɛy aa Panábas ayɛ́ɛ́n a Táas agɛɛn əguunə Sóol.

²⁶Ná ayɛ́moyɔ́ɔ́ŋ, əyímusiə́d əguúlini na nyɔ́lɛ́ a Əntiyóos. Páyɛ́ɛ́lɛ kɔ na pəə́liʼtiniʼ póʼkáag waag kilúd, pámáʼkánánɛ pɔɔd piíŋ. Áay a Əntiyóos aa pə́yə́ʼtúmíí kodɔ́ŋɔnɔ paaʼkan pá Yə́sus lɛ́ «Pəʼkilíʼtɛn.»

²⁷A kɛnɛŋ kɛ́go kɛ́ɛg, palɔɛgɛʼ pɛbán pá Táán pə́yíím pádɛ́ɛmɛn a Yolósalɛm, pááság kɛɛn a Əntiyóos.

²⁸Sɔ́g nyummú kɔ a ondáŋ wɔ́ɔ́bɔn, niiŋ lɛ́ Agabúus, aáság kodɛ́lɛm agosɔyɔ. Uŋun wó Ufúlúʼtú óyɛ́moyɛ́ɛ́lɛ lɛ́ álɔɛgɛ lɛ́ məyíi málɛ́ɛ́ kudə́əŋ a nsí ngim. (Məyíi mágo móom mídə́əŋ a kɛnɛŋ kɛ́ Kolóod ayɛ́ɛ nkúm yɛ́ nkóʼkóón yɛ́ a Ɔlɔ́ma.)

²⁹Ná yiísə́ə́ náan, paaʼkan pááság kogod unuʼ lɛ́ páamaga moom, ɛ́nɛ́ mɔɔd áyɛɛ́ʼkɛn əgín wɔnɔ́ a nɛɔŋ niə́ŋ agɛɛlɛ lɛ́ pádómɛn pəə́liʼtiniʼ pá a Siudə́ə.

³⁰Náan tɛn aa páyɛ́ɛ́lɛ fɔ́lɔ́b. Pɛ́ɛ́mága, pámɛ́ʼkɛn na pa Panábas pɔ́lɛ́ na Sóol lɛ́ pɛ́ɛn agɛɛ́ʼkɛn na padɛ́lɛm yuudi pá a ɛgɔny ɛ́ pəə́liʼtiniʼ yɛ́ a Siudə́ə.