Read Yambeta Pigólí 12 Bible Online

Pigólí 12 - Yambeta bible

Pigólí 12

¹A kɛnɛŋ kɛ́go kɛ́ɛg, nkúm Ɛlóod[51] aáság kəə́bə́ə́ kuyəʼkəni ngab ɛ pəə́liʼtiniʼ yimmú.

²Ayɛ́ɛ́lɛ lɛ́ pɛ́ɛn agoon Sɛ́ag, móŋŋí o Sɛ́aŋ, na ɛyafág ɛ́ pɛdá.

³Ná yɛɛ́dála lɛ́ kiə́gə́mmi Yúdɛn náan, aáság kodom pɔɔd lɛ́ pɛ́ɛn əgumin tɛn Píɛ. Kɛ́yɛ́ɛ a kɛnɛŋ kɛ́ wɔɔ́n wó páyɛ́ɛ panɛ́alɛla pɛlɛ́ɛd pɛ́ páánám, pádɛág toan tó kunudi umbúb[52]

⁴Ná píígúmin Píɛ, Ɛlóod aáság kusəə lɛ́ pámoyáág a yoog yɛ njaan. Ayáág piʼtúú pɛ́ pasɔ́njaa píniʼ lɛ́ pímuúnuŋ. Kiʼtúú kímuʼ kíígóodi pasɔ́njaa pə́niʼ. Ɛ́nɛ́ kiʼtúú kɛ́yɛ́ɛ na kiə́ŋ kɛnɛŋ kɛ́ kumuúnuŋ. Ayɛ́ɛ anyɔ́ŋɛn lɛ́ wɔɔ́n ó Páska wóow ómaʼkosan, áyɛmoóyɔmɛ a udi ó nigúu.

⁵Ayɛ́ɛ pə́ənuŋ Píɛ náan a yoog yɛ njaan, pəə́liʼtiniʼ pɔ́ɔgɔɔ́sɔ́gɔlɔn əgín Táán na toɛn a kidíídí kiə́ŋ, pɔ́ʼtɔm.

⁶Udúg wóow lɛ́ a koany kaáyɛnɛ aa Ɛlóod aámoóyɔmɛ, Píɛ ayɛ́ɛ ənim ɛnɔ a kɛgaágadɛ kɛ́ pasɔ́njaa pábaan. Pə́yímusúŋin pasɛŋ pábaan a ɔmbɔg.[53] Pasɔ́njaa tɛn pə́mmú pábaan padɛ́lɛ́máán a fáa a udíyoog.

⁷Uŋun ó maʼtom ó Sə́dúk foáy, nɛsom nɛ́ yoog yɛ njaan nɛ́ Píɛ ayɛ́ɛ a nɛ́lɛ́ nɛándɛ agá sɛáaan na kisəə. Uŋun ó maʼtom wááság kugidid Píɛ a toɛn əgumuyóndigi, wɔ́nɔ́ na nyɔ́lɛ́: «Ə́bísígíí kodɛ́ɛmɛn!» Pasɛŋ pá píísúŋin Píɛ a ɔmbɔg pááság koóyóndin, pə́də́əŋ a nsí.

⁸Náa uŋun ó maʼtom wɔ́nɔ́ na nyɔ́lɛ́: «Ə́súŋíí kandá, wə́níig palábá!» Píɛ aáság kɛɛlɛ nkə kɛ́ uŋun ó maʼtom óyɛ́modɛánɛ. Náa wɔ́nɔ́ na nyɔ́lɛ́: «Áyáágɛ́ɛ́ kilə́ə́ kɛáŋ kɛ́ niŋiʼ, wíim wínjə́ən!»

⁹Píɛ aáság kodɛ́ɛmɛn əgumuyə́ən, páálón. Náa, adɛʼkɛ́ɛ agaálɛŋ lɛ́ nkə kɛ́ɛg kɛ́ uŋun ó maʼtom ólɛɛ́ agɛɛlɛ na nyɔ́lɛ́ kɛ́lɛ fɔ́lɔ́b, ayɛ́ɛ agofɛg lɛ́ kɛlɛm áa kímə́musíəd.

¹⁰Náan aa páyɛ́ɛ́n əgiig a kɛnɔ kɛ́ ondáŋ ó pasɔ́njaa pá kinuŋ ó na oʼto na oʼto wídə́ni, páásán. Pámɛ́ɛn əgiig a wó annam ábaan, páásán. Pááság kɛɛn əgiig a udíyoog ó kolon a yoog yɛ njaan agɛɛn a pálɛ́ɛg. Umbuús wó udíyoog wóow óyɛ́ɛ kisúg na kisúg. Úyə́buə́níí wólɛ́wóamɔɛ́d a udi wɔ́ɔ́bɔn, páálón, pə́ə́siə́d ngə́ agɛɛn. Ayɛ́ɛ páaman kusiəd ngə́, uŋun ó maʼtom wááság kusə́ngilid a əngis á Píɛ.

¹¹Áay aa Píɛ ayálɛ́ŋɛ́ɛ́, aáság koob nkə kɛ́ kɛ́másánɛ́ɛ́ na nyɔ́lɛ́, náa ɔnɔ́: «Nɛ́gɔŋ yɛ́ɛnɛ, mbáʼkoob. Kɛ́lɛ fɔ́lɔ́b lɛ́ Sə́dúk aádóm uŋun wə́ə́ŋ ó maʼtom lɛ́ wíim agɛnjaáŋɛn a ɔmbɔg yá Ɛlóod, na a kɔbɛ́ kuim kó Yúdɛn ɛyɛ́ɛ yaándagɛfɛgan.»

¹²Ná ayɛ́ɛ aáʼkaálɛŋ, aáság kɛɛn a nó Malɛ́a, ŋŋí o Sɛ́aŋ nyɔ́ pɔ́ɔdɔ́ŋɔn tɛn lɛ́ Mə́líʼkus. Ɛ́fɔlɛ́ ɛ́ pɔɔd ɛ́yágɔnyɛdɛn kɔ, pɔ́ɔgɔɔ́sɔ́gɔlɔn Táán.

¹³Píɛ aáság kogɔdɛd a udíyoog wó oʼkág. Uʼkudin nyummú, moóngaa ɔʼkɛ́ɛd niiŋ lɛ́ Lóodə aáság kiim lɛ́ ə́buənin mɔɔd nyɔ́ ɔɔ́gɔdɛd umbuús.

¹⁴Ná ayóób nɛŋo nɛ́ Píɛ, aáság kolɛŋ lɛ́ nyɔ́lɛ́ aa alɛɛ́nɔ. Tɔnyɔ́g tóyɛ́mosán oʼto, aáság kudi ədimuúbúən, əmúúlíni agá ngim agɛɛn adɛ́anɛ na pɔsɔ́g lɛ́ Píɛ aa alɛɛ́ a udíyoog.

¹⁵Náa pɔ́nɔ́ na nyɔ́lɛ́: «Liog, waáʼkaán kiyəg!» Náa, adɛʼkáasom unuʼ. Yiíbís əgín lɛ́ fɔ́lɔ́b áa nyɔ́lɛ́ alɛɛ́ əgusəə. Náa pɔ́nɔ́ na nyɔ́lɛ́: «Oo yi! Kɛánɛ[54] kiə́ŋ aa kɛ́lɛɛ́nɔ!»

¹⁶Ayɛ́ɛ pɔ́lɛ́ a isuŋ náan a yoog, Píɛ ɔɔ́gɔʼtɔn əgín umbuús a táán. Ná píídíin piim anɛ́ɛ́n əmuúbuənin, páyɛ́moodála, pááság kolɛŋ lɛ́ nyɔ́lɛ́ fɔ́lɔ́b áa alɛɛ́nɔ. Kɛ́yɛ́bosán oʼto!

¹⁷Píɛ əyíbugídígi na ombɔg lɛ́ pádɛndɛ́sa, aáság kosɔd, amábodɛánánɛ tuə́ áa Sə́dúk amámolónɛ a yoog yɛ njaan. A komananɛ kuə́ŋ kó tɔgɛ́ɛ́, yiísə́ə́ ɔnɔ́ na pɔ́lɛ́: «Todáan adɛ́anɛ náan na Sɛ́ag, [55] na pomóŋŋí pə́ə́s pə́mmú.» Aáság kolon, amɛ́ɛn a kɛnɔ kímmú kɛ́ndɛ́ŋ.

¹⁸Ná koany kóyááyɛ́nɛ, inyuunyugiʼ yááság kudə́əŋ a kɛgaágadɛ kɛ́ pasɔ́njaa. Páyɛ́ɛ əgəə́ŋíənə pɔ́nɔ́ ə: «Píɛ əə, nkə aa kɛ́másánɛ́ɛ́ na nyɔ́lɛ́ ə́?»

¹⁹Ɛlóod yɛɛ́dóm pɔɔd lɛ́ pɛ́ɛn əmuyúunə, pádɛmoyɔ́ɔ́ŋ. Yiísə́ə́ lɛ́ pálóoya pasɔ́njaa pá páyɛ́ɛ a kinuŋ. Ná pɛ́ɛ́mán kobolóoya, aáság kɛɛ́ʼkɛn toɛn lɛ́ páboyóóna. A ngim yɛ́ɛy, aáság kodɛ́ɛmɛn áay a kɛsom kɛ́ nsí kɛ́ Siudə́ə agɛɛn a Səsalə́ə. Ayɛ́ɛ́lɛ kɔ ngab ɛ mədúg.

²⁰Ɛlóod yiíliŋin kɛ́fɔlɛ́ na əʼkúu á Tíil na Sɛdɔ́ɔŋ. Náa, pɔɔd pá a əʼkúu yɛ́ɛy pádɛʼkɛ́ɛ na moom mó konɛ. Wɔnɔ́ ná agɛɛlɛ lɛ́ pánɛ́ɛnɛ, moom móyɛ́ɛ əgubuyíimin a nó Ɛlóod, páyáyóóbánánɛ́ɛ́ lɛ́ pɛ́ɛn amoóboan, póósóbini na nyɔ́lɛ́. Náa, a kóonɛ lɛ́ pə́díin pɛ́ɛn kɔ, pɛ́ɛ́yáŋ osóbini pɛbán na Pɛlástus, mɔɔd nyummú nyɔ́ ayɛ́ɛ ənuŋ nɛsom nɛ́ yoog nɛ́ umbúlim nɛ́ Ɛlóod agɛɛlɛ lɛ́ áboyábɛgɛn ombɔg. Áay anɛ́ɛ́n áa páyɛ́ɛ́n aboan Ɛlóod agomodɛ́anɛ lɛ́ pɔ́lɛ́ pálɛ anyɔ́ŋɛn kɛɛn a uŋóón na nyɔ́lɛ́.

²¹Ná wɔɔ́s wó Ɛlóod əyə́líʼtíníí kosɔyɔ na pɔ́lɛ́ úyíím əgiig, yiínííg kilə́ə́ kiə́ŋ kɛ́ puʼkúm, əə́ləndin a noʼkóm nuə́ŋ nó nɛlaamɛʼ, kɛnɔ kɛ́ ayɛ́ɛ ɔyɔmɛla pɛbán, aáság kubə́ə́ kosɔyɔ na pɔɔd.

²²Ayɛ́ɛ agosɔyɔ, nigúu nɛ́amoógany, nɛɔ́nɔ́: «Adɛ́njaŋ mɔɔd aa alɛɛ́ agosɔyɔ náan oo! Tóonɛ tólɛ tɔgɛ́ɛ́ tó Táán[56]!»

²³Kɔ áay, kɔ áay, uŋun ó maʼtom ó Sə́dúk wááság kiim, wádɔɛ́d Ɛlóod kobany. Óyɛ́moyɛ́ɛ́lɛ náan lɛ́ ədiʼkə́əguúlisini na Táán, nugəm nóon nó páyɛ́moyɛ́ʼkɛn. Paboam páyɛ́moonɛ́ a kaadɛ aáság kugu[57]

²⁴Tɔsɔm tó Táán tólɛ́ tóyɛ́ɛ əgín agɛɛn yuudi na kosambɛd, ondáŋ ó pəə́liʼtiniʼ wə́əgín áa ayam.

²⁵Ná pa Panábas pɔ́lɛ́ na Sóol páyɛ́ɛ páʼkoman pigólí pɛɔ́bɔn a Yolósalɛm, pə́yúúli a Əntiyóos. Páyɛ́ɛ́n ondáŋ na Sɛ́aŋ nyɔ́ pálɛɛ́ agodɔ́ŋɔn tɛn lɛ́ Mə́líʼkus.