Read Yambeta Pigólí 13 Bible Online

Pigólí 13 - Yambeta bible

Pigólí 13

¹A ɛgɔny ɛ́ pəə́liʼtiniʼ yɛ́ a Əntiyóos, páyɛ́ɛ kɔ lɛ́ na palɔɛgɛʼ pɛbán pá Táán, na pɔɔd tɛn pá páagaaʼkananɛ pɔsɔ́g pɛbán pɛ́ Táán. Pa Panábas, na Sɛmɛyɔ́ɔŋ (nyɔ́ pɔ́ɔdɔ́ŋɔn lɛ́: Ufiídidiʼ), na Lúsius (mɔɔd o pálɛ́ɛg ɛ Silɛ́ɛn), na Sóol, na Manayɛ́ɛŋ (nyɔ́ pɛ́ɛ́yámánánɛ na Ɛlóod, nkúm ɛ Kalilə́ə) páyɛ́ɛ kɔ.

²Wɔɔ́s wúmmú wó pííguminin ə́simə́, páanyáadɛ Sə́dúk a pɛɔ́sɔ́gɔ́lɔ́n, Uŋun wó Ufúlúʼtú óyɛ́bodɛánɛ wɔnɔ́ na pɔ́lɛ́: «Púsiəd pa Panábas pɔ́lɛ́ na Sóol, póboyáág a ɛbá, pádɛ́lɛm əgín lɛ́ páagɛnyɛɛlɛnɛ pigólí pɛ́ mbábodɔ́ŋɔn pɔ́lɛ́ a pɛ́lɛ́.»

³Áay anɛ́ɛ́n áa, a ngim yɛ́ páyɛ́ɛ pɔ́ʼkɔɔ́sɔ́gɔlɔn, pə́ʼkubun ə́simə́, páyábɛ́gan pa Panábas pɔ́lɛ́ ná Sóol ɔmbɔg a oʼto, pámáboyábɛ́gɛ́ɛ́ pɔ́nɔ́ na pɔ́lɛ́ pɛ́ɛn kɔŋɛʼ á.

⁴Taa, náan aa Uŋun wó Ufúlúʼtú wɛ́ɛ́dóm pa Panábas pɔ́lɛ́ na Sóol lɛ́ pɛ́ɛn agɛɛlɛ oʼtom wó úyíbuyííyid a wólɛ́. Páyɛ́ɛ́n, pááság kɛɛn alon a pálɛ́ɛg ɛ Sələsíi. Píísiə́d siʼtíməʼ kɔ́gɔ́ɔg a Sələsíi, pááság kɛɛn a oloʼ ó Síiʼpələ.

⁵Ná páyɛ́ɛ́n əgiig a pálɛ́ɛg yimmú kɔ́gɔ́ɔg niiŋ lɛ́ Sələmíin, pɛ́ɛ́lɔɛ́gɛ Tɔsɔm tó Táán kɔ a puog pó pɛɔ́sɔ́gɔ́lɔ́n pó pɔɔ́n pá Yúdɛn. Sɛ́aŋ Máag ayɛ́ɛ kɔ, əə́bugóomon pigólí kɛɛlɛ.

⁶Pɛ́ɛ́yáág oloʼ ungim, pámɛ́ɛn alon a ɛbá yímmú, a pálɛ́ɛg ɛ Páfos. Kɔ́gɔ́ɔg a Páfos, pɛ́ɛ́bóan mɔɔd nyummú, ɔngɛɛlɛʼ pɛnon. Ayɛ́ɛ mɔɔ́n ó Yúdɛn, niiŋ niə́ŋ lɛ́ Paál Yə́sus.[58] Ayɛ́ɛ əgəə́səə lɛ́ nyɔ́lɛ́ alɛ ɔndɔɛgɛʼ pɛbán.

⁷Mɔɔd o pɛnon nyóon yɛɛ́lɛŋanan na mɔɔd nyummú kɔ́gɔ́ɔg niiŋ lɛ́ Sɛ́lɛ́sius Paolóos, mɔɔd wo nsiŋ. Nyɔ́lɛ́ aa ayɛ́ɛ ngɔ́mɛnaʼ yɛ́ nkóʼkóón yɛ Ɔlɔ́ma kɔ a oloʼ wóow. Ayɛ́ɛ na njaan ɛgoob tɔgɛ́ɛ́ tó Táán, aáság kodom pɔɔd lɛ́ pɛ́ɛn amodɔ́ŋɔnɔn pa Panábas pɔ́lɛ́ na Póol.

⁸Náa, mɔɔd o pɛnon nyóon, Əlimáas (náan aa páyɛ́ɛ pɔdɔ́ŋɔn niiŋ niə́ŋ a tɔgɛ́ɛ́ tó kɛlɛ́ɛg) adɛʼkɛ́ɛ anyɔ́ŋɛn lɛ́ mɔɔd nyóon, ngɔ́mɛnaʼ yɛ́ nkóʼkóón yɛ oloʼ yáag oʼto na Kilíʼtus. Ayádádɛ́g lɛ́ ná pádɛyɛ́boodɔ́ŋɔn.

⁹Sóol ayɛ́ɛ niiŋ tɛn lɛ́ Póol[59] Uŋun wó Ufúlúʼtú úyímuyə́ə́g a ɔʼtɛ́m aáság kubisin mɔɔd o pɛnon nyóon əngis,

¹⁰ɔnɔ́ na nyɔ́lɛ́: «Wɛ, olɛ mɔɔd o pɛnyaʼ, ongɛn, mɔɔ́n wó Omɔlɛɔ́g! Odɛɔ́gɔ anyɔ́ŋɛn yoom na yoom yɛ́ ɛ́lɛɛ́ ɛŋɛʼ! Udiə́di kuunə kogɔ́dɛganɛ nkə kɛ́ kɛ́lɛɛ́ sáád á, nkə kɛ́ kɛ́lɛɛ́ a ngə́ yɛ́ Sə́dúk alɛɛ́ anyɔ́ŋɛn a?

¹¹Nɛ́gɔŋ yɛ́ɛnɛ, óób: Taa, Sə́dúk aagoyáág ombɔg a nkó, wədə́əŋ woog, waasánɛ mədúg miíŋ oʼtála kisəə kɛ́ wɔɔ́s.» Əgín kɔ áay kɔ áay, əngis yá Əlimáas yááság kudə́əŋ mbin, ədiiʼkíni kodɛ́ʼtɛganan kə́mmú. Əə́bə́ə́ kuduʼtum əguunə mɔɔd nyɔ́ əə́ndəmuúguminií a ombɔg əgumuúloodi ngə́.

¹²Ná mɔɔd nyóon nyɔ́ ayɛ́ɛ alaamɛ oloʼ yɛɛ́dála nkə kɛ́ɛg kɛ́ kɛ́yásánɛ́ɛ́, ayáág oʼto na Sə́dúk Yə́sus lɛ́ nkə kɛ́ páyɛ́moyáʼkánánɛ a kidíídí kiə́ŋ kɛ́yɛ́moosɔ́d.

¹³Póol na pɔsɔ́sɔ́g pə́ə́ŋ pɛ́dɛ́ɛ́mɛn a Páfos, pááság kɛɛn a Pələsə́ə, pálɛ́ɛg yimmú yɛ́ a Pənfilíi. Píísiə́d siʼtíməʼ agɛɛn kɔ. Kɔ́gɔ́ɔg a Pələsə́ə aa páyáádánan na Sɛ́aŋ Máag lɛ́ nyɔ́lɛ́ əə́guúlini a Yolósalɛm,

¹⁴pa Póol pɔ́lɛ́ páagɛɛn na ambaan a Əntiyóos, pálɛ́ɛg yimmú yɛ́ a Pisidíi. Wɔɔ́s ó kisúgiʼ kɛ́ Yúdɛn wúmmú, pááság kɛɛn ɔsɔd a yoog ɛ pɛɔ́sɔ́gɔ́lɔ́n, pə́ə́siə́d oʼkɔɔ.

¹⁵Ná mɔɔd nyóon ayɛ́ɛ aáʼkoman kobana a kálaʼtaʼ ɛ pɛcɛm na a yɛ́ palɔɛgɛʼ pɛbán pá Táán píídílə, puʼkúm pó yoog ɛ pɛɔ́sɔ́gɔ́lɔ́n yɛ́ɛy poáság kodom mɔɔd lɛ́ yɛ́ɛn adɛ́anɛ na pa Póol lɛ́ əə: «Pomóŋŋí, nga polɛ na tɔgɛ́ɛ́ tó kodɛ́anɛ na pɔɔd póonɛ agogónɛ kəə́liʼtiniʼ koɔ́bɔn, púsiəd tɔgɛ́ɛ́, pósɔyɔ.»

¹⁶Póol aáság kodɛ́ɛmɛn anɛ́ɛ́n kidə́níʼtən, əə́də́ə́míni ɔmbɔg a mɔɛn, náa ɔnɔ́: «Pəŋi pɔɔ́n pá Ɛ́sɛlayɛl, na pəŋi tɛn pá poándɛɛ́ a ngə́ ɛ Táán, púob!

¹⁷Táán wəəs, Táán wo ndɛg yɛ Ɛ́sɛlayɛl, əyííyid pɛmbáa pə́ə́s. Ayɛ́ɛ́lɛ lɛ́ pásaŋanan kɛ́fɔlɛ́ a Əsíibtə, ɔmbɔ́ wɔnɔ́ ná páyɛ́ɛ kɔ wɔnɔ́ pɛnɔɔŋɛʼ. A ngim yɛ́ɛy, a toɛn tó a ombɔg wə́ə́ŋ, ayɛ́boyɛ́ɛ́lɛ lɛ́ píim pálón kɔ.

¹⁸Ayɛ́bonóʼtan əʼtin á pɛag ábaan a kɛnɔ kɛ́ kifələ́ə́n, aáboomɛ́nɛ[60]

¹⁹A ngim yɛ́ɛy, yɛɛ́mán kuwíiyi pɔɔd pá a əʼkúu áʼtáan na ábaan yɛ́ a Kanaáŋ, amáyɛɛlɛ lɛ́ pusí poɔ́bɔn puób na ndɛg yəəŋ[61]

²⁰Nkə kɛ́ɛg kiim kɛ́yáyɛ́lɛ́ɛ́ súʼtə́ə́ a ɔmban ó pɛag wɔnɔ́ ɔ́ndɛd íniʼ, na pɛag əʼtin ábaan na pɛówád. A ngim yɛ́ɛy aa Táán ayɛ́ɛ́lɛ lɛ́ a kɛgaágadɛ kɛ́ pasɛʼkóón pə́ə́s, pɔyɔm pɛyɔm pálón kɔ súʼtə́ə́ agɛɛn əgiig a kɛnɛŋ kɛ́ Samowɛ́ɛl, ɔndɔɛgɛʼ pɛbán o Táán[62]

²¹Pááság kuŋíən anɛ́ɛ́n na Táán lɛ́ pɔ́lɛ́ pálɛ anyɔ́ŋɛn kɛɛn na nkúm. Táán aáság koboyɛ́ʼkɛn Səwúul, mɔɔ́n ó Kíis, a kibúúm kɛ́ Pɛnsɛamɛ́ɛŋ lɛ́ yɛ́ɛn nkúm yɔɔbɔn. Səwúul ayɛ́ɛ́lɛ a nkúm yəəŋ pɛag əʼtin ábaan.

²²Táán yɛɛ́nɔ́da Səwúul a nɛlaamɛʼ niə́ŋ, aáság kɛɛlɛ lɛ́ Tə́fid ə́siəd oʼkɔɔ wóow. Yiísə́ə́ a kidíídí kɛ́ Tə́fid ɔnɔ́: “Mbádála Tə́fid, mɔɔ́n o Yəsə́ə. Nyɔ́lɛ́ aa ɔʼtɛ́m wáam wə́siəd, alɛ́ɛ́ kɛɛlɛ nkə kiim kɛ́ ndáanyɔ́ŋɛn lɛ́ yɛ́ɛlɛ[63]”

²³A ondáŋ ó pɔɔ́n pá a palaa Tə́fid aa Táán ayɛ́ɛ́lɛ lɛ́ mɔɔd yíim álon kɔ ná yɛ́ɛn Ongɔɔyɛʼ wo ndɛg yɛ Ɛ́sɛlayɛl əgín wɔnɔ́ ná yɛɛ́gág. Mɔɔd ogo nyóon aa nyóonɛ alɛɛ́ Yə́sus.

²⁴A kóonɛ lɛ́ Yə́sus ə́díin yiim, Sɛ́aŋ yɛɛ́yáŋ əgiim álɔɛgɛ a nigúu nɛ́ Ɛ́sɛlayɛl niim ɔnɔ́: “Kasɛ́an mandoŋá, púsiəd ɔsɔgɛn.”

²⁵Ná kɛnɛŋ kɛ́ Sɛ́aŋ koman a ɔlaa a nsí yɛ́ɛnɛ kɛ́yɛ́ɛ kɛándɛ ndúmiʼ, yiísə́ə́ ɔnɔ́: “Polɛ əgisiəd mɛ wɔnɔ́ ánɛ ə́? Ntɛɔ́gɔ ogo nyɔ́ polɛɛ́ agobóŋan. Náa, púob: Ogo nyɔ́ polɛɛ́ agobóŋan, alɛ əgiim a ngim yaam. A mɛ, ntiigin ɔmbɔ́ nyóonɛ lɛ́ mbodɛm a udi wə́ə́ŋ əgumuyóndin palábá a ambaan.”

²⁶«Pomóŋŋí, pəŋi palaa Ábɛlaam, na pəŋi tɛn pá polɛɛ́ áanɛ lɛ́ poɛ́ʼkɛn nnyáádɛ́ na Táán a pɛɔ́sɔ́gɔ́lɔ́n, pəŋi aa Táán əyíím ábodómɛn Tɔsɔm tó túəbiíloodi tuə́ áa aábɛyɔ́ɔyɛ.

²⁷Kɛ́lɛ lɛ́, pɔɔd pá a Yolósalɛm na puʼkúm poɔ́bɔn kɛ́ pííʼtə́m Yə́sus. Náa, a nɛmoyóon nɛ́ páyɛ́moyóón aa píyə́ə́gi nkə kɛ́ palɔɛgɛʼ pɛbán pá Táán píídílə. Mɔɔ́s má kisúgiʼ kɛ́ Yúdɛn miim, pálɛ agobanɛla tɔsɔm tógo tóod.

²⁸Ɔmbɔ́ ná pádɛʼkɔ́ɔgɔɔ́ŋɛ́ɛ́ ɛgom yɛ́ pámoyɛ́ʼkɛnɛɛ́ nsɔ́ɔ́ a yɛ́lɛ́, pámoyóon, pɔ́yɔ́sɔ́gɔ́lɔ́nɛ́ɛ́ Pɛláad lɛ́ ə́səə pɛ́ɛn amoyóon.

²⁹Ná páyɛ́ɛ páʼkoman kɛɛlɛ nkə kiim kɛ́ kíyə́dílə́ə́ a pagálaʼtaʼ a kidíídí kiə́ŋ, pə́yímusúúli[64] a ɔmbásá, pááság kumuúni.[65]

³⁰Náa, Táán ayɛ́moyóndɛ́gɛ a kɛgaágadɛ kɛ́ pɛlóŋ.

³¹A mədúg ɛ́fɔlɛ́, Yə́sus ayɛ́ɛ ogoóloodoni na pɔɔd pá páyɛ́ɛlanɛ na nyɔ́lɛ́, kəə́bə́ə́ a Kalilə́ə súʼtə́ə́ a Yolósalɛm. Pɔ́lɛ́ págo aa pálɛɛ́ nɛ́gɔŋ yɛ́ɛnɛ pawɛ́sɛnɛg a əngis á pɔɔ́n pá Ɛ́sɛlayɛl.

³²Pəsibáamɔɛ́d tɛn, timə́buyíímin na Tɔsɔm Tólaŋ tóod. Tólɛ lɛ́: Nkə kɛ́ Táán yɛɛ́gágɛn pɛmbáa pə́ə́s lɛ́ kɛ́lɛ́ɛ́ kaáyɛ́ɛlɛ,

³³aáʼkɛɛlɛ kɛ́lɛ nɛ́gɔŋ yɛ́ɛnɛ na pəsi pɛndandaloŋ pɛɔ́bɔn. Amɛ́ɛ́lɛ kɛ́lɛ́ a kúfuʼ wɔnɔ́ ná amóndɛ́gɛ Yə́sus a pɛlóŋ. Kɛ́máyɛ́lɛ́ɛ́ wɔnɔ́ ná kíyə́dílə́ə́ a kɛʼkwáá kɛ́ annam ábaan. Kɛ́lɛ kidiídílə́ kɔ lɛ́: “Wɛ, olɛ mɔɔ́n waam, Əgəə́bə́ə naánɛ́ yɛ́ɛnɛ, mɛ ndɛ Sɛ waaŋ.”

³⁴«Táán yɛɛ́gág əgín kɔ kalaʼ lɛ́ nyɔ́lɛ́ alɛ́ɛ́ komoyóndɛgɛ, agɛɛlɛ lɛ́ adɛmbɔ́nɔ.» Yɛɛ́gág náan ná yiísə́ə́ lɛ́: Ndɛ́ɛ́ koboyɛ́ɛlɛnɛ kɔŋɛʼ kó kólɛɛ́ fiɛ́d na kibuu, kódiɛn tɛn na isuŋ, əgín wɔnɔ́ ná nyɛɛ́gág lɛ́ ndɛ́ɛ́ kɛɛlɛnɛ Tə́fid.

³⁵«Kólɛ́ aa Tə́fid yiísə́ə́ tɛn a kɛnɔ kímmú a pagálaʼtaʼ ɔnɔ́ na Táán: Táán! Nyɔ́ alɛɛ́ agoob na wɛ, odɛndɛ́ɛ́ kəə́liʼtini lɛ́ ɔ́bɔnɔ a kəəniʼ[66]

³⁶«Ná a kɛnɛŋ kiə́ŋ, Tə́fid ayɛ́ɛ aáʼkoman kɛɛlɛ nkə kiim kɛ́ Táán ayɛ́ɛ anyɔ́ŋɛn lɛ́ yɛ́ɛlɛ, yiígú. Pə́yímuúní a ɛbá ɛ́ pasɛʼkóón pə́ə́ŋ, ɔɔ́bɔnɔ[67]

³⁷Náa, kɛlóŋ kɛ́ nyɔ́ Táán ayóndɛ́gɛ, kɛ́dɛʼkɔ́ɔbɔnɔ.

³⁸Táá nkə kɛ́ pugódíí lɛ́ pólɛŋ aa kɛ́ɛnɛ, pomóŋŋí: A kidíídí kɛ́ Yə́sus aa pálɛɛ́ agoboólɔɛgɛnɛ nɛ́gɔŋ yɛ́ɛnɛ lɛ́ Táán əəbuúlisin mabɛ́. Nkə kɛ́ɛg kɛ́lɛ nkə kɛ́ pɛcɛm pɛ́ Moyíis pɛ́dɛʼkágaáʼkɛɛ́ kɛɛlɛ agoboyááŋɛn a mabɛ́ mááŋan.

³⁹Nyɔ́ alɛ́ɛ́ kaágɛ́ɛ́ oʼto na Yə́sus, nyóon aa Táán alɛ́ɛ́ kulisinií mabɛ́ mə́ə́ŋ a kidíídí kɛ́ Yə́sus nyóon nyɔ́ amáág oʼto na nyɔ́lɛ́.

⁴⁰«Lóʼkɔ́dɔɔn anɛ́ɛ́n agɛɛlɛ lɛ́ nkə kɛ́ɛnɛ kɛ́ palɔɛgɛʼ pɛbán pá Táán píísə́ə́, kɛ́dɛɛ́bobóan. Píísə́ə́ pɔ́nɔ́:

⁴¹“Táláan taa, pəŋi pá podɛɔ́gɔ agɔnyɔ́ŋɛnɛɛ́ kɔɔ́sɔ́dɛ nkə kɛ́ Táán alɛɛ́ əgusəə. Poáyáág ɔmbɔg a oʼto, póman a ɔlaa! Kɛ́lɛ lɛ́, ndɛ́ɛ́ kɛɛlɛ kɛbán əgín a mədúg móonɛ má puligíí a ɔlaa. Kɛ́lɛ kɛ́ɛnɛ lɛ́, pɔ́nɔ́ mɔɔd aa ayɛ́bodɛ́anɛnɛ, podɛʼkɛ́ɛ əgəə́liʼtini[68]” »

⁴²Ná pa Póol pɔ́lɛ́ na Panábas páyɛ́ɛ pándaalon a yoog ɛ pɛɔ́sɔ́gɔ́lɔ́n agɛɛn, pɔɔd páyɛ́boyɔ́sɔ́gɔ́lɔ́nɛ́ɛ́ na toɛn, pɔ́nɔ́: «Sɛ́gɔɔ, ímbuúlíníən a wɔɔ́s wə́ə́s ó kisúgiʼ wúmmú wó wə́ndəgimií, púim abɛɛ́lɔɛgɛnɛ Tɔsɔm tóod kə́mmú.»

⁴³Ná ɛgɔny yɛ́ɛ́gólɛ́gɛd, Yúdɛn ngíŋ, na pɔɔd tɛn pə́mmú pá páyɛ́ɛ pándɛ a kəə́liʼtiniʼ kó Yúdɛn, pííyə́ən pa Póol pɔ́lɛ́ na Panábas. Pa Póol páyɛ́ɛ agosɔyɔ na pɔ́lɛ́, páaboónasɛ nkó agɛɛlɛ lɛ́ pə́dindiógi ongoo a mawɔʼ má Táán.

⁴⁴A wɔɔ́s ó kisúgiʼ wúmmú wó wíyə́ə́n wóow, pɔɔd piim pá a pálɛ́ɛg páyágɔnyɛdɛn agoob Tɔsɔm tó Sə́dúk.

⁴⁵Ná Yúdɛn yɛɛ́dála kiʼtúú kɛ́ pɔɔd kɛ́ɛg náan, nifúb nɛáság kubuúgumin. Ayɛ́ɛ Póol ɔɔ́sɔyɔ, pɔ́lɛ́ páagasanɛ tɔgɛ́ɛ́ tuə́ŋ, páamoodóga.

⁴⁶Pa Póol pɔ́lɛ́ na Panábas pááság kusiəd tɔgɛ́ɛ́ na pɛsány piim, pɔ́nɔ́ na pɔ́lɛ́: «Pəŋi aa puígóodi lɛ́ póyaŋ agoob Tɔsɔm tó Táán. Náa, wɔnɔ́ ná pəŋi poásáŋɛ́nɛ tólɛ́, poɔʼkɔ́ pudiigin póonɛ lɛ́ póɛn na ɔlaa ó pɛnɛŋ piim, pəsi kuə́s kaágasɛ anɛ́ɛ́n ná pɛnɔɔŋɛʼ pɛ́lɛɛ́.

⁴⁷Taa nkə kɛ́ Sə́dúk ayɛ́bɛdɛánɛ aa kɛ́ɛnɛ, ɔnɔ́: Njígudə́nígi lɛ́ wɛ́ɛn kisəə kɛ́ pá pádɛndɛŋɛnɛɛ́, agɛɛlɛ lɛ́ wɛ́ɛn alɔɛgɛnɛ pɔɔd a nsí ngim wɔnɔ́ ná ndáaboyɔ́ɔyɛ[69]

⁴⁸«Ná pɛnɔɔŋɛʼ pɛ́yóób tɔgɛ́ɛ́ tóod, pɛ́ɛ́nyɔ́ga kɛ́fɔlɛ́. Pə́ə́bə́ə́ konyáadɛ Tɔsɔm tó Sə́dúk. Piim pá Táán əyííyid lɛ́ pálɛ́ɛ́ kɛɛn na ɔlaa ó pɛnɛŋ piim, páyáán pəə́liʼtiniʼ.»

⁴⁹Tɔsɔm tó Sə́dúk tóyɛ́ɛ əgiim tósambɛd nigúu niim.

⁵⁰Náa, Yúdɛn yaáság kudíʼkəni pɛgóʼkóón pɛ́ a pálɛ́ɛg yɛ́ɛy, na pagɛ́ɛd tɛn pá pagóón pá a kəə́liʼtiniʼ koɔ́bɔn lɛ́ pánɔɛyɛ pa Póol pɔ́lɛ́ na Panábas, pábooŋɛŋ, pɛ́ɛlɛ lɛ́ pádɛndɔ́b a nigúu nɛɔ́bɔn.

⁵¹Pa Póol pɔ́lɛ́ na Panábas pááság kəə́gidə ummúndúŋ[70] wó a ambaan yɔ́ɔ́bɔn, pámɛ́ɛn a Iʼkoniyóom.

⁵²A noá na paaʼkan pá a Əntiyóos, pɔ́lɛ́ páyɛ́ɛ na tɔnyɔ́g kɛ́fɔlɛ́. Uŋun wó Ufúlúʼtú óyɛ́ɛ na pɔ́lɛ́ síɛ́ɛ́d.