Read Yambeta Pigólí 14 Bible Online

Pigólí 14 - Yambeta bible

Pigólí 14

¹Ná pa Póol pɔ́lɛ́ na Panábas páyɛ́ɛ́n əgiig a Iʼkoniyóom, páyɛ́ɛ́n ɔsɔd tɛn a yoog yɔɔbɔn ɛ pɛɔ́sɔ́gɔ́lɔ́n wɔnɔ́ ná páyɛ́ɛ́lɛ a yɛ́ a Əntiyóos yɛ́ a Pisidíi. Pɛ́ɛ́sɔ́yɔ kɔ kɔŋɛʼ a ombod wó óyɛ́ɛ́lɛ lɛ́ ɛ́fɔlɛ́ ɛ́ Yúdɛn na pɔɔd tɛn piíŋ pá pádɛʼkɛ́lɛɛ́ Yúdɛn, páán pəə́liʼtiniʼ.

²Náa, pɔɔ́n pá Yúdɛn pá pɔ́lɛ́ pɛ́ɛ́sáŋɛ́nɛ kəə́liʼtini páyɛ́ɛ́lɛ lɛ́ ngab ɛ pɛnɔɔŋɛʼ píɛn na mafɛgaʼ má mabɛ́ na pəə́liʼtiniʼ.

³Ɔmbɔ́ kɔ náan, pa Póol pɔ́lɛ́ na Panábas pííbúlim mədúg miíŋ kɔ áay a Iʼkoniyóom. Páyɛ́ɛ agosɔyɔ páʼtammána yoom na yoom, páamɛna pɛda na Sə́dúk. Sə́dúk ayɛ́ɛ agoboyɛ́ʼkɛnan toɛn tó kɛɛlɛ mangán na piə́wúunəniʼ pɛ́ pɛbán. Ayɛ́ɛ əguloodi lɛ́ nkə kɛ́ɛg kɛ́ pálɛɛ́ alɔɛgɛ pɔ́nɔ́ Táán aádɛ́ɛ́ ɔʼtɛ́m, kɛ́lɛ fɔ́lɔ́b.

⁴Pɔɔd pá a pálɛ́ɛg yɛ́ Iʼkoniyóom pɛ́ɛ́sáálɛg. Páyɛ́ɛ pándɛ lɛ́: Pɔsɔ́g póonɛ a ngim ɛ Yúdɛn, pɔsɔ́g pə́mmú a ngim ɛ pɔɔ́n pá maʼtom.

⁵Pá pádɛʼkɛ́lɛɛ́ a ngim ɛ pa Póol páyɛ́ɛ lɛ́ Yúdɛn mmɔɛ́d na puʼkúm poɔ́bɔn, na pɛnɔɔŋɛʼ na puʼkúm poɔ́bɔn tɛn. Pɔ́yɔ́dɔ́ɔ́gɛ́ɛ́ lɛ́ pánɛ́ɛyɛ pa Póol pɔ́lɛ́ na Panábas ntɔ́b, páabodóan na aʼtáán agoboyóóna.

⁶Ná pa Póol páyálɛ́mbɛ́dɛ́ɛ́ náan lɛ́ páʼkoboyɔ́dɔɔgɛnɛ, pɛ́ɛ́dɛ́da agɛɛn ɔgɔɔsɛm a Liʼkawoníi, a pálɛ́ɛg ɛ Líistələ, na ɛ Tələbə́ə na a pɛnɔ pímmú ndúmiʼ kɔ.

⁷Kɔ́gɔ́ɔg tɛn, pɛ́ɛ́lɔɛ́gɛ Tɔsɔm Tólaŋ.

⁸Kɔ a Líistələ, mɔɔd nyummú ayɛ́ɛ kɔ pɛnɛŋ piim undəndínə́ə́n əgín na nsun lɛ́ ayɛ́ɛ kɛgɔd. Əyə́biə́níí náan kɛgɔd, ɔmbɔ́ kaáfɛg adɛʼkáayag kaáfɛg kodáŋana.

⁹Wɔɔ́s wúmmú, ayɛ́ɛ kɔ, aágoob nkə kɛ́ Póol alɛɛ́ agosɔyɔ. Póol aáság kumuúbisin əngis a nkó, aádála lɛ́ mɔɔd nyóon yaágɛn oʼto lɛ́ kobany kóog kó alɛɛ́ abany alɛ ogoom.

¹⁰Náa Póol aásásɛd nɛŋo a mɔɛn, ɔnɔ́ na nyɔ́lɛ́: «Tɛ́ɛ́mɛn! Tɛ́lɛm kidə́níʼtən!» Mɔɔd aáság kucilib, əə́bə́ə́ kodáŋana.

¹¹Ná pɔɔd pá páyɛ́ɛ kɔ áay kiʼtúú kilúd pɛ́ɛ́dála nkə kɛ́ɛg kɛ́ Póol ayɛ́ɛ́lɛ, páyáfɛ́mɛ́ɛ́ a tɔgɛ́ɛ́ tó liʼkaoníi, pɔ́nɔ́: «Táá padáán áa póonɛ pámáyáánɛ́ɛ́ pɔɔd, pááság kiim pə́suu ná pəsi tɛlɛɛ́.»

¹²Páyɛ́ʼkɛn Panábas niiŋ nɛ́ táán yɔɔbɔn yimmú lɛ́ «Sə́əs.» Páálog Póol lɛ́ «Ɛlɛmɛ́ɛs»[71] lɛ́ nyɔ́lɛ́ aa ayɛ́ɛ ɔsɔyɛla.

¹³Ɔnjaaganɛʼ pɛfɔny nyɔ́ a yoog yɛ́ páyɛ́ɛ pɔɔ́sɔ́gɔlɔn táán yɔɔbɔn Sə́əs aáság kiim. Yoog ɛgo ɛ Sə́əs ɛyɛ́ɛ a nɛlon nɛ́ pálɛ́ɛg. Ɔnjaaganɛʼ pɛfɔny nyóon əyíím na panom pá paʼkáwoʼ a nɛsɔd nɛ́ pálɛ́ɛg. Pə́yíím pálɛŋ paʼkáwoʼ págo na pafɛláwaʼ. Əyíím lɛ́ yɛ́ʼkɛn moom móom a kɛfɔny na pa Póol. Na nyɔ́lɛ́ na kiʼtúú kɛ́ pɔɔd kɛ́ɛg kiim páyɛ́ɛ unuʼ úmmuʼ lɛ́ pɛ́ɛlɛ náan.

¹⁴Náa, ná pɔɔ́n pá maʼtom póonɛ lɛ́ na Panábas na Póol páyóób náan, píílíŋ kɛ́fɔlɛ́, pááság kaáwaga pilə́ə́ pɛɔ́bɔn pɛ́ kobag, pámɛ́ɛn na ɔʼtɛ́d kɛnɔ kɛ́ kiʼtúú kɛ́ pɔɔd kɛ́ɛg kɛ́yɛ́ɛ. Páyɛ́ɛ agɛɛn pə́əgiim pásása nɛŋo a mɔɛn, pɔ́nɔ́:

¹⁵«Wóʼkóó, pomóŋŋí! Nkə aa kɛ́ɛg poágɛɛlɛ náan? Pəsi tɛlɛ əgín agá pɔɔd wɔnɔ́ pəŋi! Timə́buyíímin na Tɔsɔm Tólaŋ agɛɛlɛ lɛ́ púdi ambog yɛ́ ɔ́dɛɔ́gɔ yoom na yoom ná poágasɛ agá ná Táán nyɔ́ alɛɛ́ a ɔlaa. Táán nyóon nyɔ́ ayɛ́ɛ́lɛ nsí na mɔɛn, na noom nó ɛbá fiɛ́d, na yoom yiim yɛ́ ɛlɛɛ́ kɔ[72]

¹⁶Əgín kɔ́gɔ́ɔg a kɛnɛŋ kɛ́ pɛmbáa, yiídí mɔnɔŋ miim lɛ́ na wɛ ogo wíiyid ngə́ yɛ́ imə́gugə́mmi.

¹⁷Ɔmbɔ́ náan, ayɛ́ɛ aʼtaŋ koóloodi na pɔ́lɛ́ pɛnɛŋ piim a kɔŋɛʼ kó ayɛ́ɛ agɛɛlɛnɛ pɔɔd. Ayɛ́ɛ lɛ́: Nɔɔ́, əə́giim ə́də́əŋi a mbálámɔɛn, aágɛɛlɛ lɛ́ moom moáŋan mó puə́gud módɛ́ɛ, kɛnɛŋ kɛ́ kubug kíməʼkiim əgiig, púubug[73], aáboyɛ́ʼkɛn moom mó konɛ, aáboyɛ́ɛlɛ lɛ́ póɛn na tɔnyɔ́g.»

¹⁸Ɔmbɔ́ ná pá Póol pɛ́ɛ́sɔ́yɔ náan, pɔ́yɔ́ɔ́ŋ ntɔ́b kɛ́fɔlɛ́ agɛɛlɛ lɛ́ kiʼtúú kɛ́ pɔɔd kɛ́ɛg kiə́liʼtini kudi kɛfɔny kɛ́ páyɛ́ɛ lɛ́ páboyɛ́ɛlɛnɛ.

¹⁹Mədúg mə́mmú a ngim yɛ́ɛy a, pɔɔ́n pá Yúdɛn tɛn pə́mmú foáy. Pə́yíím pádɛ́ɛmɛn lɛ́ na a Əntiyóos, na a Iʼkoniyóom, pááság kodam pɛ́ɛlɛ lɛ́ kiʼtúú kɛ́ pɔɔd kíɛn a ngim yɔɔbɔn, páádóan Póol na aʼtáán agomoyóon. Pə́yímudúlə, páálón pálɛ́ɛg na nyɔ́lɛ́, páafɛga lɛ́ əə́ʼkugu.

²⁰Náa, ná pəə́liʼtiniʼ páyɛ́ɛ pə́ʼkiim agaágɔnyɛd a ɛbá yə́ə́ŋ, yɛɛ́dɛ́ɛ́mɛn, aáság kuúlini a pálɛ́ɛg na pɔ́lɛ́. A koany kaáyɛnɛ, pááság kodɛ́ɛmɛn pɔ́lɛ́ na Panábas agɛɛn a Tələbə́ə.

²¹Pa Póol pɔ́lɛ́ na Panábas pɛ́ɛ́lɔɛ́gɛ Tɔsɔm Tólaŋ kɔ áay a pálɛ́ɛg ɛ Tələbə́ə, pámɛ́ɛ́lɛ lɛ́ pɔɔd piíŋ páág oʼto na Yə́sus. A ngim yɛ́ɛy anɛ́ɛ́n, pááság kuúlini a Líistələ na a Iʼkoniyóom na a Əntiyóos yɛ́ a Pisidíi.

²²Páyɛ́ɛ agolɛŋ kogónɛ ntɛ́m ɛ pəə́liʼtiniʼ pá a pɛnɔ pɛ́ɛb, páabodɛ́ananɛ lɛ́ pə́ə́bis əgín a ngə́ yɛ́ɛy. Páyɛ́ɛ agobodɛ́ananɛ pɔ́nɔ́: «Kíəguunə lɛ́ tɛ́nɛ ntɔ́b kɛ́fɔlɛ́ agɛɛlɛ lɛ́ tɛ́sɔd a Nɛlaamɛʼ nɛ́ Táán.»

²³Páyɛ́ɛ agɛɛlanɛ lɛ́ kɛnɔ kiim kɛ́ pəə́liʼtiniʼ páágɔ́nyɛ́dɛ́nɛ́ɛ́, pə́əgiiyid pɔɔd kɔ pá páagɛɛn padɛ́lɛm yuudi. Páyɛ́ɛ pəə́gili moom mó konɛ, pɔ́ɔgɔɔ́sɔ́gɔlɔn Táán a kidíídí kɛɔ́bɔn, pááság kubuúcum a ɔmbɔg á Sə́dúk nyɔ́ páyáágɛn oʼto na nyɔ́lɛ́.

²⁴A ngim yɛ́ɛy, pɛ́ɛ́yáág nigúu nɛ́ Pisidíi fáláb falab agɛɛn a Pənfilíi.

²⁵Pɛ́ɛ́lɔɛ́gɛ Tɔsɔm tó Táán a Pələsə́ə, pááság kusuu a Aʼtálɛa.

²⁶Píísiə́d siʼtíməʼ kɔ́gɔ́ɔg agɛɛn a pálɛ́ɛg yɛ Əntiyóos yɛ́ a Silíi, kɛnɔ kɛ́ pə́yíbuúcúm a ɔmbɔg á Táán nyɔ́ ayɛ́bodɛ́ɛ́lɛn ɔʼtɛ́m agɛɛlɛ lɛ́ pɛ́ɛlɛ pigólí piə́ŋ. Pigólí pɛ́go pɛ́ɛb aa pɛ́ɛnɛ pɛándɛɛ́ nɛ́gɔŋ pɛmanáán.

²⁷Ná páyɛ́ɛ́n əgiig kɔ a Əntiyóos, pɛ́ɛ́gónyɛd pəə́liʼtiniʼ piim, pááság kobodɛ́ananɛ nkə kiim kɛ́ Táán, a toɛn tuə́ŋ, ayɛ́boyɛ́ɛ́lɛ lɛ́ pɔ́lɛ́ pɛ́ɛlɛ, na wɔnɔ́ tɛn ayásɛ́nɛn pɛnɔɔŋɛʼ ngə́ ɛ kaag oʼto na nyɔ́lɛ́.

²⁸Pa Póol pɛ́ɛ́sánɛ ɛ́fɔlɛ́ ɛ́ mədúg kɔ áay na pəə́liʼtiniʼ pá a Əntiyóos.