Read Yambeta Pigólí 15 Bible Online

Pigólí 15 - Yambeta bible

Pigólí 15

¹Pɔɔd pə́mmú pə́yíím pádɛ́ɛmɛn a Siudə́ə pááság kiim alon a Əntiyóos. Páyɛ́ɛ agaaʼkananɛ pəə́liʼtiniʼ, pɔ́nɔ́: «Podɛanyɛnɛ wɔnɔ́ ná pɛcɛm pɛ́ Moyíis pɛ́lɛɛ́ əgusəə, Táán adɛáboyɔ́ɔyɛ[74]»

²Pa Póol pɔ́lɛ́ na Panábas páyɛ́bodɛánɛ lɛ́ nkə kɛ́ɛg kɛ́ pálɛɛ́ əgusəə kɛ́dɛɔ́gɔ fɔ́lɔ́b. Uʼtíiyiʼ wááság kudə́əŋ. Pəə́liʼtiniʼ pááság kaáyóbanan lɛ́ pádom pa Póol, na Panábas, na ngab ɛ pɔɔd yimmú yɛ́ a Əntiyóos agɛɛn adɛ́anɛ uʼtíiyiʼ wóow na pɔɔ́n pá maʼtom, na pasaá pá a yoog ɛ pəə́liʼtiniʼ pá a Yolósalɛm.

³Pəə́liʼtiniʼ pá a Əntiyóos páyɛ́bobóŋɛ́nɛn ongɛn wóow. Agɛɛn koɔ́bɔn, pɛ́ɛ́sán yɛ́ a Fənəsíi na a Səməlíi. Páyɛ́ɛ agɛɛn pə́əgiim pálɔɛgɛ wɔnɔ́ ná pɛnɔɔŋɛʼ pɛáʼkogasɛɛ́ ntɛ́m yɔɔbɔn, pɛáʼkodɛ́lɛmɛɛ́ a ngə́ ɛ Táán. Pəə́liʼtiniʼ piim pɛ́ɛ́nyɔ́ga kɛ́fɔlɛ́ na tɔsɔm tóod.

⁴Ná pa Póol páyɛ́ɛ́n əgiig a Yolósalɛm, pəə́liʼtiniʼ póob káag na pɔɔ́n pá maʼtom na padɛ́lɛm yuudi pə́yíbusiə́d kɔŋɛʼ. Pa Póol pɔ́lɛ́ na Panábas pááság kobodɛ́ananɛ nkə kiim kɛ́ Táán ayɛ́boyɛ́ɛ́lɛ lɛ́ pɛ́ɛlɛ.

⁵Ɔmbɔ́ náan, ɛ́fɔlɛ́ ɛ́ pɔɔd yímmú yɛ́dɛ́ɛ́mɛn agosɔyɔ. Páyɛ́ɛ pɔɔd pá páyɛ́ɛ kalaʼ a ondáŋ ó Pafalɛsɛyɛ́ɛŋ náa páʼkaágasɛɛ́ əguyə́ən ngə́ ɛ Kilíʼtus. Píísə́ə́ pɔ́nɔ́: «Pəə́liʼtiniʼ pá páyɛ́ɛ pɛnɔɔŋɛʼ pógóódi lɛ́ páanyɛ. Pógóódi tɛn lɛ́ pɛ́ngɛg pɛcɛm pɛ́ Moyíis.»

⁶Pɔɔ́n pá maʼtom na padɛ́lɛm yuudi pááság kaágɔnyɛd anɛ́ɛ́n əgiiyə kɛbán kɛ́ɛg.

⁷Wɔnɔ́ ná ɔsáŋ óyɛ́ɛ wándɛ ɔnnasáŋ, Píɛ yiísiə́d tɔgɛ́ɛ́, ɔnɔ́: «Pomóŋŋí, poálɛŋ lɛ́ Táán áa əyínyiiyid a kɛgaágadɛ kɛáŋan əgín kɔ kalaʼ. Əyínyiiyid lɛ́ ná ndɔɛgɛnɛ pɛnɔɔŋɛʼ Tɔsɔm Tólaŋ agɛɛlɛ lɛ́ póob tólɛ́, páág oʼto na Yə́sus.

⁸Náan aa Táán nyɔ́ aálɛŋ ntɛ́m ɛ pɔɔd ayɛ́boyɛ́ʼkɛn Uŋun wó Ufúlúʼtú wɔnɔ́ ná ayɛ́bɛyɛ́ʼkɛn tɛn pəsi. Ayɛ́ɛ́lɛ náan əgubuúloodi lɛ́ əmə́busiə́d kɔŋɛʼ.

⁹A oʼto wóonɛ lɛ́ páyáág oʼto na nyɔ́lɛ́ aa Táán yiífúŋi ntɛ́m yɔɔbɔn lɛ́ a əngis yə́ə́ŋ, pəsi tɛdɛɔ́gɔ ndɛ́ŋ na pɔ́lɛ́.

¹⁰Áay anɛ́ɛ́n nɛ́gɔŋ əə, polɛ agobɛlanɛ Táán lɛ́ nkə ə́? Polɛ agomoóbɛlanɛ lɛ́ polɛ anyɔ́ŋɛn konyáŋɛnɛ pəə́liʼtiniʼ kɛnó kɛ́ pəŋibáamɔɛ́d poálɛŋ lɛ́ ɔmbɔ́ pasɛ pə́ə́s, ɔmbɔ́ pəsibáamɔɛ́d póonɛ tɛdɛʼkágaáʼkɛɛ́ konyáŋɛn.»

¹¹Tɛlɛ əgiiʼkini kusəə kə́mmú tɛɔʼkɔ́: «Tɛmáág oʼto lɛ́ pá pɔ́dɛɔ́gɔ Yúdɛn pálɛ́ɛ́ kɔɔy a kɔdɛ́ɛ ɔʼtɛ́m kó Sə́dúk Yə́sus wɔnɔ́ ná pəsi tɛn tɛyɔ́ɔ́y a kɔdɛ́ɛ ɔʼtɛ́m kuə́ŋ.»

¹²Ná Póol yɛɛ́sɔ́yɔ náan, ungim nyɔ́ əyíím agaágɔnyɛd kɔ áay yiílə́ndin sáb, páádám ntóɛŋ agoob wɔnɔ́ ná pa Póol pɔ́lɛ́ na Panábas pálɛɛ́ agobodɛ́ananɛ pɛálɛ́ʼkán piim na piə́wúunəniʼ pɛ́ pɛbán piim pɛ́ Táán ayɛ́boyɛ́ɛ́lɛ lɛ́ pɛ́ɛlɛ a kɛgaágadɛ kɛ́ pɛnɔɔŋɛʼ.

¹³Ná páyɛ́ɛ páʼkoman kosɔyɔ náan, Sɛ́ag aáság kusiəd tɔgɛ́ɛ́, ɔnɔ́: «Pomóŋŋí, póɛnyaádámɛgɛ!

¹⁴Sɛmɛyɔ́ɔŋ[75] amábɛdɛánánɛ wɔnɔ́ ná əgín kɔ a niə́bə́ə, Táán yɛɛ́lɛ́ŋ kusiəd pɛnɔɔŋɛʼ əmə́yiiyid a kɛgaágadɛ kɛɔ́bɔn ndɛg yɛ́ yaágoob na nyɔ́lɛ́.

¹⁵Nkə kɛ́ɛg kɛ́lɛ əgín a tɔgɛ́ɛ́ tó palɔɛgɛʼ pɛbán pá Táán pɛ́ɛ́sɔ́yɔ. Kɛ́lɛ kɔ kidiídílə́ a Kálaʼtaʼ lɛ́, Táán ɔnɔ́:

¹⁶“A ngim yɛ́ɛy, ndɛ́ɛ́ kimbuúlini wɔɔ́s, ndɛ nyiʼkini kowáag yoog ɛ Tə́fid yɛ́ yiíbúmbug. Ndəgiiʼkini kudə́əmini pawaŋ pá píídə́əŋ, ndɛ nyiʼkini kudə́nigi kibugə́búgə́ kɛ́ yoog yɛ́ɛy kidə́níʼtən.

¹⁷Áay a kɛnɛŋ kɛ́ɛg, pɔɔd póʼkáanɛ pɛ́ndɛ́ŋ piim pálɛ́ɛ́ kɛɛn na njaan na Sə́dúk. Ɛɛ́ɛ, ungim o kɛnɔɔŋɛʼ nyɔ́ nyɛɛ́dɔ́ŋɔn lɛ́ yɛ́ɛn ndɛg yaam alɛ́ɛ́ kinjuunə.” Táá nkə kɛ́ mɛ Sə́dúk mbə́səə áa kɛ́ɛg, mbɛ́ɛ́lɛ nkə kɛ́ nyiísə́ə́ lɛ́ ndagɛɛlɛ.

¹⁸Mɛ Táán mbábodɛánɛ, mbɛ́ɛ́lɛ nkə kɛ́ njɛ́ɛ́lɛ lɛ́ pɔɔd pálɛŋ əgín kɔ́gɔ́ɔg kalaʼ[76]»

¹⁹Sɛ́ag əyíʼkíni kaábɛg tɔgɛ́ɛ́, ɔnɔ́: «Táá nkə kɛ́ mɛ mbádála aa kɛ́ɛnɛ: Pɛnɔɔŋɛʼ pɛ́maʼkɔnyɔ́ŋɛn kaag oʼto na Táán, tɛdɛʼtádɛ́gan nkón a ngə́ yɔɔbɔn.

²⁰Tíbuúdilən agá agobodɛ́anɛ lɛ́ pə́ə́gili manám má pááfɔnya a ambog, ɔmbɔ́ tɛn umbúlim ó na pagɛ́ɛd oó lɛ́ na panɔ́mɛɛd pá pɔ́dɛɔ́gɔ panom pɔ́ɔ́bɔn, ɔmbɔ́ lɛ́ pagán pɔ́ɔ́bɔn. Pə́ə́gili tɛn ponyam pó pásɛgɛdɛnɛɛ́ kɛnág, ɔmbɔ́ tɛn maŋɔ́ má ponyam[77]

²¹Kɛ́lɛ lɛ́, kəə́bə́ə́ əgín kɔ kalaʼ a kɛnɛŋ kɛ́ pɛmbáa, pɔɔd pálɛ alɔɛgɛ pɛcɛm pɛ́ Moyíis a ɛ́nɛ́ pálɛ́ɛg. Páyɛ́ɛ agobanɛla pɛ́lɛ́ mɔɔ́s má kisúgiʼ kɛ́ Yúdɛn miim a puog pó pɛɔ́sɔ́gɔ́lɔ́n.»

²²Áay anɛ́ɛ́n áa pɔɔ́n pá maʼtom na padɛ́lɛm yuudi, na pəə́liʼtiniʼ piim páyáágánan unuʼ úmmuʼ lɛ́ píiyid ngab ɛ pɔɔd yimmú a kɛgaágadɛ kɛɔ́bɔn, páboodom a Əntiyóos na pa Póol pɔ́lɛ́ na Panábas. Pə́yííyid lɛ́ na Sɛ́las, na Síud nyɔ́ páyɛ́ɛ agodɔ́ŋɔn tɛn lɛ́ Palsábas. Nto yɛ́ɛy ɛ́baan ɛyɛ́ɛ pɔɔd pá pə́yə́siədin a nɛmɔɔd a kɛgaágadɛ kɛ́ pəə́liʼtiniʼ.

²³Páyɛ́boyɛ́ʼkɛn nufuuʼ lɛ́ pɛ́ɛn na nólɛ́. Píídílə a nufuuʼ nóon pɔ́nɔ́: «Pəsi pɔɔ́n pá maʼtom, na padɛ́lɛm yuudi pá ɛgɔny ɛ́ pəə́liʼtiniʼ póonɛ áanɛ, na pəə́liʼtiniʼ piim kɛ́ timə́busóyídi aá! Timə́busóyídi pəŋi pomóŋŋí pə́ə́s pəə́liʼtiniʼ pá polɛɛ́ pɛnɔɔŋɛʼ, pəŋi pá polɛɛ́ a Əntiyóos, pálɛ́ɛg yɛ́ a Silíi, na a moyaa mó əʼkúu múmmú mó a Silíi, na pəŋi tɛn pá polɛɛ́ a Silisíi!

²⁴Tɛyóób lɛ́ pɔɔd pə́mmú pá a ondáŋ wə́ə́s áanɛ, píímim káag əgiim əbuyúnjugəni oʼto, tɔgɛ́ɛ́ toɔ́bɔn tóagɛɛlɛ lɛ́ póɛn na ɛságág a ɔʼtɛ́m. Adɛ́njaŋ pəsi aa tɛɛ́dóm pɔɔd póob lɛ́ píim ɔsɔyɔ tɔgɛ́ɛ́ tóod náan.

²⁵Kólɛ́ aa tɛmáágánan unuʼ úmmuʼ lɛ́ tíiyid pɔɔd a kɛgaágadɛ kiə́s, pɔsɔ́sɔ́g pə́ə́s pá ɔʼtɛ́m lɛ́ Panábas pɔ́lɛ́ na Póol, tíim tɛ́bodómɛn.

²⁶Nto yɛ́ɛy ɛ́baan ɛlɛ pɔɔd pá píífób kugu a oʼto ó pigólí pɛ́ Sə́dúk wəəs Yə́sus Kilíʼtus.

²⁷Náan anɛ́ɛ́n áa tɛmábodómɛn pa Síud pɔ́lɛ́ na Sɛ́las lɛ́ píim, pábodɛ́anɛ pɔ́lɛ́báamɔɛ́d na unuʼ wɔ́ɔ́bɔn nkə kɛ́ tiə́dilə a nufuuʼ nóonɛ.

²⁸Kɛ́lɛ lɛ́, a unuʼ wə́ə́s úmmuʼ na Uŋun wó Ufúlúʼtú, tɛádála lɛ́ kɛ́ʼtɛ́ɛ́lɛn lɛ́ tɛ́boogóda ambaan na pɛcɛm pɛ́ pɛ́dɛ́aboɛ́bɛɛ́. Púgumin əgín pɛ́ɛnɛ pɛ́ pɛ́dɛɔ́gɔ pɛ́ kudi. Pɛ́go aa pɛ́ɛnɛ pɛ́lɛɛ́ lɛ́:

²⁹Puə́gili manám má pááfɔnya a ambog, ponyam pó pásɛgɛdɛnɛɛ́ kɛnág, ɔmbɔ́ tɛn maŋɔ́ má ponyam. Puə́gili umbúlim ó na pagɛ́ɛd oó lɛ́ na panɔ́mɛɛd pá pɔ́dɛɔ́gɔ panom pɔ́ɔ́bɔn, ɔmbɔ́ lɛ́ pagán pɔ́ɔ́bɔn. Puməʼkəə́gili pɛbán pɛ́ɛb náan, kɛ́agɛɛn kɔŋɛʼ. Áʼoó áan áaá!»

³⁰Pááság kaábɛ́ganan lɛ́ na pəə́liʼtiniʼ na pɔsɔ́g pá pə́yííyid agodom. Pɔsɔ́g pá pə́yííyid pááság kusiəd ngə́ yɔɔbɔn agɛɛn a Əntiyóos yɛ́ a Silíi. Ná páyɛ́ɛ́n əgiig kɔ́gɔ́ɔg, pɛ́ɛ́gónyɛd pəə́liʼtiniʼ piim, pááság koboyɛ́ʼkɛn nufuuʼ nó pə́yíím na nólɛ́.

³¹Pəə́liʼtiniʼ pááság kobana nufuuʼ. Ná pɛ́ɛ́bána, pɔ́lɛ́ piim pɛ́ɛ́nyɔ́ga na nólɛ́ lɛ́ nóyɛ́bonásɛ nkó.

³²Pa Síud pɔ́lɛ́ na Sɛ́las páyɛ́ɛ tɛn palɔɛgɛʼ pɛbán pá Táán. Náan aa pɛ́ɛ́sɔ́yɔ na pəə́liʼtiniʼ súʼtə́ə́ agoboónasɛ nkó, pámáyɛɛlɛ lɛ́ págon a kəə́liʼtiniʼ.

³³Píílə́ndin ngab ɛ mədúg kɔ áay na pɔ́lɛ́. A kɛnɛŋ kɛ́ kaábɛ́ganan na pɔ́lɛ́, pəə́liʼtiniʼ páyɛ́bodɛánɛ lɛ́ pádáŋana kɔŋɛʼ, pɛ́ɛn! Pɛ́ɛn aboan pɔsɔ́g pá páyɛ́boodóm. [

³⁴[78]]

³⁵A noá na pa Póol pɔ́lɛ́ na Panábas, pɔ́lɛ́ pɛ́ɛ́lɔ́b a Əntiyóos. Pɔɔd tɛn pə́mmú piíŋ kɔ́gɔ́ɔg pə́yə́búlídíí na pɔ́lɛ́ agaaʼkananɛ pɔɔd, páalɔɛgɛ Tɔsɔm Tólaŋ tó Sə́dúk.

³⁶Ngab ɛ mədúg yimmú a ngim yɛ́ɛy, Póol yɛɛ́dɛánɛ na Panábas ɔnɔ́: «Tiúliniən, tíɛn adála pəə́liʼtiniʼ pá a pálɛ́ɛg ngim yɛ́ tɛɛ́lɔɛ́gɛ tɔsɔm tó Sə́dúk kɔ. Tɛ́lɛŋ tuə́ áa kɛ́lɛɛ́ agodáŋana kɔ na pɔ́lɛ́.»

³⁷Panábas nyɔ́lɛ́ ayɛ́ɛ anyɔ́ŋɛn lɛ́ pɛ́ɛn kɔ́gɔ́ɔg na Sɛ́aŋ nyɔ́ páyɛ́moólogɛn tɛn lɛ́ Mə́líʼkus.

³⁸Náa, Póol nyɔ́lɛ́ aáság kusəə lɛ́ ndóo, pɔ́lɛ́ pɔ́dɛɔ́gɔ págɛɛn na nyɔ́lɛ́ lɛ́ yiídí ə́mə́buudí a Pənfilíi, adɛʼkɛ́ɛ əgud tɛn kə́mmú ondáŋ na pɔ́lɛ́.

³⁹Kɛbán kɛ́ɛg kɛ́yɛ́boyáág a uʼtíiyiʼ ó toɛn, páásaalɛg. Panábas nyɔ́lɛ́ aáság kusiəd Mə́líʼkus, páábág a siʼtíməʼ agɛɛn a Síiʼpələ.

⁴⁰Kɔmɔɛ́d lɛ́ Póol nyɔ́lɛ́ yiísiə́d Sɛ́las agɛɛn na nyɔ́lɛ́. A kóonɛ lɛ́ pɔ́lɛ́ pə́díin pɛ́ɛn, pomóŋŋí pɔ́ɔ́bɔn pəə́liʼtiniʼ pɔ́yɔ́sɔ́gɔ́lɔ́nɛ́ɛ́ Sə́dúk lɛ́ yɛ́ɛlɛ ongɛn wɔ́ɔ́bɔn ódáŋana kɔŋɛʼ.

⁴¹Pa Póol páyɛ́ɛ́n, páádáŋána a nigúu nɛ́ Silíi niim, na a nɛ́ Silisíi kɛ́. Póol ayɛ́ɛ agɛɛn əə́giim yɛ́ɛlɛ lɛ́ ungim nyɔ́ aándɛɛ́ ungəə́liʼtiniʼ ágon a kólɛ́.