Read Yambeta Pigólí 16 Bible Online

Pigólí 16 - Yambeta bible

Pigólí 16

¹A ngim yɛ́ɛy, Póol ayɛ́ɛ́n alon a Tələbə́ə na a Líistələ. Ungəə́liʼtiniʼ nyummú ayɛ́ɛ kɔ́gɔ́ɔg niiŋ lɛ́ Timoʼtə́ə. Ŋŋí wəəŋ ayɛ́ɛ ntóón ɛ Yúdɛn, sɛ mɔɔ́n o Kɛlɛ́ɛg. Ŋŋí ayɛ́ɛ aándɛ ungəə́liʼtiniʼ.

²Pəə́liʼtiniʼ pá a Líistələ na pá a Iʼkoniyóom páyɛ́ɛ pɔsɔyɛla lɛ́ Timoʼtə́ə alɛ əgəə́siəd kɔŋɛʼ a ɔlaa.

³Póol ayɛ́ɛ anyɔ́ŋɛn lɛ́ ná əmə́musiə́d a ondáŋ wɔ́ɔ́bɔn. Ná əyímusíəd, ayɛ́moyáányɛ a oʼto ó Yúdɛn yɛ́ ɛyɛ́ɛ kɔ áay a pálɛ́ɛg yɛ́ɛy lɛ́ pɔ́lɛ́ piim pɛ́ɛ́lɛŋɛn lɛ́ sɛ o Timoʼtə́ə alɛ mɔɔ́n o Kɛlɛ́ɛg.[79]

⁴A pálɛ́ɛg ngim yɛ́ pa Póol pɔ́lɛ́ na Sɛ́las páyɛ́ɛ agosan kɔ, páyɛ́ɛ agodɛ́ananɛ na pəə́liʼtiniʼ pɛbán pɛ́ pɔɔ́n pá maʼtom na padɛ́lɛm yuudi pá a Yolósalɛm píídə́nígə́ni. Páyɛ́bodɛánɛ lɛ́ pɔ́lɛ́ tɛn pógóódi lɛ́ póóbɛn pɛ́lɛ́.

⁵Pəə́liʼtiniʼ páyɛ́ɛ əgəə́yíis əgín na toɛn a kəə́liʼtiniʼ, ondáŋ wɔ́ɔ́bɔn wáagaásáʼtanan əgín mɔɔ́s miim.

⁶Pa Póol pɔ́lɛ́ na Sɛ́las páyɛ́ɛ anyɔ́ŋɛn kɛɛn alɔɛgɛnɛ pɔɔd pá a Əsíi Tɔsɔm tó Táán, náa Uŋun wó Ufúlúʼtú óyɛ́bosáŋɛ́nɛ́nɛ. Kólɛ́ aa pɛ́ɛ́sán kosánáán na ngə́, páʼtɛ́lɛm a Filisíi na a Kalasíi, [80] pááság koyaag a Filisíi na a pálɛ́ɛg ɛ Kaláad.

⁷A niig nɛɔ́bɔn ndúmiʼ na pálɛ́ɛg ɛ Misíi, páyaʼkanyɔ́ŋɛn kɛɛn a Piʼtiníi. Náa, Uŋun ó Yə́sus ódɛʼkáaboyáʼkɛnɛ lɛ́ pɛ́ɛn kɔ.

⁸Pááság kosan. Pɛ́ɛ́yáág pálɛ́ɛg ɛ Misíi, pə́ə́suu, pámɛ́ɛn alon a Tolówa.

⁹Na udúg wúmmú, Póol yɛɛ́dála mɔɔd oʼtɛ́lɛ́máán a udi wə́ə́ŋ, aámoyɔ́sɔ́gɔlɔn ɔnɔ́: «Sɛ́gɔɔ Póol, mɛ́ɛn a Masɛdowáan, óbɛyɔ́ɔyɛ!» Kɛ́yɛ́moyɛ́ɛ́lɛ wɔnɔ́ a kɛlɛm, kɔmɔɛ́d lɛ́ ayɛ́ɛ əngis ongóm.

¹⁰Əgín a ngim tɛn yɛ́ɛy yɛ́ nkə kɛ́ɛg kɛ́ɛ́lónɛn Póol, tiə́bə́ə́ kuunə ngə́ ɛgɛɛn a Masɛdowáan lɛ́ tɛdɛʼkɛ́ɛ na isuŋ lɛ́ Táán áa alɛɛ́ agɛbɛdɔ́ŋɔn lɛ́ tíɛn alɔɛgɛ Tɔsɔm Tólaŋ kɔ.

¹¹Tiísiə́d siʼtíməʼ a Tolówa, tɛáság kɛɛn əgín tə́lə́lə́lə́ tɛmɛ́ɛn alon a oloʼ ó Samoʼtaláas. A koany kaáyɛnɛ, tɛádɛ́ɛ́mɛn áay a Samoʼtaláas, tɛmɛ́ɛn a Niəʼpolíis.

¹²Tɛɛ́dɛ́ɛ́mɛn tɛn kɔ́gɔ́ɔg a Niəʼpolíis tɛáság kɛɛn a Filíib, pálɛ́ɛg yɛ́ nkóʼkóón yɛ́ a nigúu nɛ́ Masɛdowáan. Pɔɔd pá Ɔlɔ́ma aa páyɛ́ɛ alaamɛ a pálɛ́ɛg ɛgo yɛ́ɛy. Tɛyɛ́ɛ́lɛ kɔ ngab ɛ mədúg.

¹³Wɔɔ́s wúmmú ó kisúgiʼ kɛ́ Yúdɛn, tiyíím tɛ́lon pálɛ́ɛg tɛáság kɛɛn a ɛbá ɛ́ noom. Tɛyɛ́ɛ agɛɛn tɛáfɛga lɛ́ tɛaboan kɛnɔ kɛ́ Yúdɛn ɛlɛɛ́ agaágonya kɔ ɔgɔɔ́sɔ́gɔlɔn Táán. Pagɛ́ɛd pə́mmú aa tiɛ́bóan kɔ paágɔ́nyɛ́dáán. Tɛáság kuləndin na pɔ́lɛ́ agosɔyɔ.

¹⁴A ondáŋ o pagɛ́ɛd póob, ɔʼkɛ́ɛd nyummú ayɛ́ɛ kɔ niiŋ lɛ́ Lídɛa, ntóón ɛ Tiəʼtíil, ayɛ́ɛ agoóbɛn Táán. Ayɛ́ɛ agɛɛlɛ nion nɛ́ pasanjaʼ pá mɔɔnɛ́, pasanjaʼ pá pobógógó. Ɔʼkɛ́ɛd nyóon yɛɛ́dám oʼtóɛŋ agoob nkə kɛ́ tiə́səə. Yɛɛ́dám oʼtóɛŋ náan lɛ́ Sə́dúk yiíbúən ɔʼtɛ́m wə́ə́ŋ agɛɛlɛ lɛ́ ə́siəd tɔgɛ́ɛ́ tó Póol kɔŋɛʼ.

¹⁵Páyɛ́moyɛ́ʼkɛn ɔsɔgɛn lɛ́ na nyɔ́lɛ́ na ungim nyɔ́ ayɛ́ɛ a yoog yəəŋ. Aáság kɛbɛyɔ́sɔ́gɔlɔn lɛ́ tíɛn a noádɛʼ nuə́ŋ, ɔnɔ́: «Nga poádála lɛ́ mbáág fɔ́lɔ́b fɔ́lɔ́b oʼto na Sə́dúk, mɛ́naan, púləndin a mɛ noádɛʼ.» Náan aa ayɛ́ɛ́lɛ nkə kiim agɛɛlɛ lɛ́ tiə́liʼtini kɛɛn ələndin a noádɛʼ nuə́ŋ.

¹⁶Wɔɔ́s wúmmú wó tɛyɛ́ɛ agɛɛn a kɛnɔ kɛ́ páyɛ́ɛ pɛɛnan ɔgɔɔ́sɔ́gɔlɔn Táán, ɔmbɔ́dɔ́m nyummú, kiombiʼ kɛ́ a yoog ɛ mɔɔd, aáság kiim əgəə́bun na pəsi a ngə́. Ɔmbɔ́dɔ́m ogo nyóon ayɛ́ɛ na uŋun wó ɔmbɛ́ wó óyɛ́ɛ amoyɛ́ɛlɛ lɛ́ ábog. A nɛbog niə́ŋ nɛ́ɛn, pəsə́dúg pə́ə́ŋ páyɛ́ɛ ɔɔgɔɔŋ mɔɔnɛ́ kɛ́fɔlɛ́.

¹⁷Náan aa ayɛ́ɛ lɛ́ pəsi yuudi na Póol, nyɔ́lɛ́ əə́giim ə́biyə́ən ngim, ɔɔ́sɔyɔ nɛŋo a mɔɛn, ɔnɔ́: «Pɔɔd póonɛ pálɛ pəgudin pá Táán nyɔ́ alɛɛ́ a mɔɛmɔɛ́n! Pálɛ agoboólɔɛgɛnɛ pɛbán pɛ́ a ngə́ yɛ́ poɔ́gɔɔy o!»

¹⁸Ayɛ́ɛ́lɛ náan mədúg miíŋ. Əgiim əgiig a mədúg mə́mmú, Póol ayóób ilúún aáság kaágasɛ ná alɛɛ́, ɔnɔ́ na uŋun wóow wó úyímugóodi: «A toɛn tó a niiŋ nɛ́ Yə́sus Kilíʼtus, mbágodɛánɛ: Lón a ɔmbɔ́dɔ́m nyóon!» Əgín kɔ áay kɔ áay, uŋun wó ɔmbɛ́ wóow wááság kolon.

¹⁹Ná pəsə́dúg pá pigólí pɛ́ ɔmbɔ́dɔ́m nyóon ayɛ́ɛ agɛɛlɛ pɛ́ɛ́dála náan lɛ́ ngə́ yɛ́ páyɛ́ɛ agomɛna pɛda a yɛ́lɛ́ lɛ́ pɔ́ɔgɔɔŋ mɔɔnɛ́ yaáʼkɔsɔ́mɛg, píígúmin pa Póol pɔ́lɛ́ na Sɛ́las, pámáboogɔ́g agɛɛn na pɔ́lɛ́ a kɛdom kɛ́ mɔɔd ungim, a udi ó palaamɛʼ.

²⁰Páyɛ́ɛ́n əbudə́nigi lɛ́ pɔ́yɔm a udi ó pɔyɔm pɛyɔm pá Ɔlɔ́ma. Pɛsɔ́mɛn pɛɔ́bɔn aa pɛ́ɛnɛ, pɔ́nɔ́: «Taa, pɔɔd póonɛ pálɛ na inyuunyugiʼ a pálɛ́ɛg. Pamɔɛ́d pálɛ pibíəniʼ pɛ́ Yúdɛn.

²¹Pálɛ əgiim páaʼkananɛ pɔɔd mandoŋá mə́mmú má pəsi pɔɔ́n pá Ɔlɔ́ma tiʼkódií lɛ́ tíyə́ən.»

²²Kiʼtúú kɛ́ pɔɔd kɛ́ kɛ́yɛ́ɛ kɔ áay, kɛáság kaágasɛnɛ pa Póol pɔ́lɛ́ na Sɛ́las, pə́ə́bə́ə́ koob kɔbɛ́ na pɔ́lɛ́. Palóoyaʼ pááság kusəə lɛ́ pə́díŋinə pa Póol pilə́ə́, pábobáam na nsuə́.

²³Ná páyɛ́ɛ páʼkobobáám kɔŋɛʼ kɔŋɛʼ, pááság kɛɛn na pɔ́lɛ́ agɛɛn aboolɔg a yoog yɛ njaan. Pɛ́ɛ́dɛánɛ na unnuŋ yoog yɛ njaan lɛ́ pə́buúnuŋ kɔŋɛʼ kɔŋɛʼ.

²⁴Əgín ná unnuŋ yoog yɛ njaan ayóób náan, aáság kubuúsiəd agɛɛn aboolɔg a kɛsom kɛ́ yoog kímmú kɔ́gɔ́ɔg a yoog yɛ njaan a kaadɛ, amáboyáág a kɛáŋ.

²⁵Ná ɔʼtɛ́m wó udúg óyɛ́ɛ wə́ndəgiim wáyɛʼtɛnɛ, pa Póol pɔ́lɛ́ na Sɛ́las páyɛ́ɛ a pɛɔ́sɔ́gɔ́lɔ́n, pə́ədúmə pɛlɛ́ɛ́ agonyáadɛ Táán. Pɔsɔ́g tɛn pə́mmú pá páyɛ́ɛ kɔ áay a yoog yɛ njaan páyɛ́ɛ agoob wɔnɔ́ ná páyɛ́ɛ ɔgɔɔ́sɔ́gɔlɔn.

²⁶Pálɛ anɛ́ɛ́n kɔ náan a, nsí yaáság kəə́nyigid na toɛn súʼtə́ə́ yoog yɛ njaan ngim ɛmáfógɛ́dɛ́ɛ́. Əgín tɛn a kɛnɛŋ kɛ́go kɛ́ɛg, mbuús ngim yaáság kəə́buənə, pɛáŋ pɛ́ páyáágan pɔɔd pá yoog yɛ njaan piim a ambaan pɛáság kuliogon.

²⁷Unnuŋ yoog yɛ njaan aáság kondig, aádála lɛ́ mbuús ngim ɛlɛ ngás. Ná yɛɛ́dála náan, aáság kusooyin ɛyafág yə́ə́ŋ ɛ́ pɛdá a kɛbágáá agaáyóon. Ayɛ́ɛ afɛga lɛ́ pɔɔd piim pá páyɛ́ɛ a yoog yɛ njaan páʼkoman kodɛ́da.

²⁸Náa Póol aásásɛd na toɛn tuim, ɔnɔ́: «Ndóo óo! Odɛnyáyɛ́lɛ́ɛ́ kɔbɛ́, tɛlɛ kɔ pəsi piim óo!»

²⁹Náa unnuŋ yoog yɛ njaan nyóon ɔnɔ́ pə́muyíimin na ɛláam. Pááság kumuyíimin na yɛ́lɛ́. Ayɛ́ɛ́n na ɔʼtɛ́d, amɛ́ɛn ɔsɔd əgín kɔ́gɔ́ɔg a nɛsom nɛ́ páyɛ́ɛ a nɛ́lɛ́, aádam ə́də́əŋənən pa Póol pɔ́lɛ́ na Sɛ́las a ambaan. Ayɛ́ɛ əguliminə əgín náanɛ kwag kwag kwag.

³⁰Aáság kiim álon na pɔ́lɛ́. Náa ɔnɔ́: «Pɔɔ́n pá ɛ́ya, nkə aa nyɛ́lɛɛ́ agɛɛlɛ lɛ́ nyɔ́ɔy əə́?»

³¹Pa Póol pááság kumuyúlisini pɔ́nɔ́ na nyɔ́lɛ́: «Áág oʼto na Sə́dúk Yə́sus, wɔgɔɔy lɛ́ na wɛ na ungim nyɔ́ ɛlɛɛ́ a yoog yaaŋ.»

³²Aáság koság kɛɛn udúg ogo wóow na pɔ́lɛ́ agɛɛlɛ lɛ́ pógóʼton pufə́ŋ poɔ́bɔn. Ayɛ́boolónɛ a yoog yɛ njaan, amɛ́ɛn na pɔ́lɛ́ a noádɛʼ nuə́ŋ, amáboyɛ́ʼkɛn moom mó konɛ. Kɔ́gɔ́ɔg, pa Póol pááság koboólɔɛgɛnɛ Tɔsɔm tó Sə́dúk lɛ́ na nyɔ́lɛ́ na ungim nyɔ́ ayɛ́ɛ a noádɛʼ nuə́ŋ. Páyáág oʼto na Yə́sus, pə́ə́siə́d ɔsɔgɛn pɔ́lɛ́ piim lɛ́ na nyɔ́lɛ́ na ungim nyɔ́ ayɛ́ɛ a noádɛʼ nuə́ŋ. Pɔ́lɛ́ piim páyɛ́ɛ na tɔnyɔ́g lɛ́ páyáág oʼto na Táán.

³⁵Ná koany kóyááyɛ́nɛ, palóoyaʼ pááság kiim pádom pasɔ́njaa lɛ́ píim adɛ́anɛ na unnuŋ yoog yɛ njaan, ə́lis pɔɔd póob.

³⁶Unnuŋ aáság kiim adɛ́anɛ na Póol, ɔnɔ́: «Palóoyaʼ pə́míim pɛ́ʼtómɛn pɔɔd lɛ́ píim agɛʼtɛ́anɛ mpuúlis. Poándɛ págɛɛn nɛ́gɔŋ a wiiy!»

³⁷Náa, Póol yɛɛ́dɛánɛ na pasɔ́njaa póob pá pə́yíím pádom, ɔnɔ́: «Palóoyaʼ páyɛ́ɛ́lɛ lɛ́ pábɛbáam a udi ó mɔɔd ungim pádɛbɛyɔ́mɛ wɔnɔ́ ná kíəguunə lɛ́ pɔ́yɔmɛ pɔɔd pá páʼkosɔ́dɛ́ɛ́ a ondáŋ ó pibíəniʼ pɛ́ Ɔlɔ́ma, kɔmɔɛ́d lɛ́ palaamɛʼ pá Ɔlɔ́ma páálɛŋ lɛ́ náan aa tɛlɛɛ́! Pə́yíbisiə́d, pámábɛɛlɔ́g a yoog yɛ njaan. Nɛ́gɔŋ yɛ́ɛnɛ pálɛ anyɔ́ŋɛn kɛbɛɛlónɛ a pɛɔsɛ́g, pɔɔd pándɛŋ, ndóo! Píim abɛɛlónɛ pɔ́lɛ́báamɔɛ́d!»

³⁸Pasɔ́njaa pááság kuúlini agɛɛn adɛ́anɛ na palóoyaʼ náan. Wɛɛ́y úyíbugúmin ná páyóób lɛ́ pa Póol pɔ́lɛ́ na Sɛ́las pálɛ pɔɔd pá páʼkosɔ́dɛ́ɛ́ a ondáŋ ó pibíəniʼ pɛ́ Ɔlɔ́ma.

³⁹Pə́yíím əbuuŋíən kulisin, pááság koboolónɛ a yoog yɛ njaan. Páyɛ́boyɔ́sɔ́gɔ́lɔ́nɛ́ɛ́ lɛ́ pɛ́ɛn, pásan pə́didə́ndin áay a pálɛ́ɛg.

⁴⁰Ná pa Póol pə́yíím pálón yoog yɛ njaan, páyɛ́ɛ́n a nó Lídɛa. Pə́yə́búníí kɔ́gɔ́ɔg na pomóŋŋí pɔ́ɔ́bɔn pəə́liʼtiniʼ, pámábonásɛ nkó, pááság kusiəd ngə́ yɔɔbɔn, pámɛ́ɛn.