Read Yambeta Pigólí 17 Bible Online

Pigólí 17 - Yambeta bible

Pigólí 17

¹Agɛɛn koɔ́bɔn, pa Póol pɔ́lɛ́ na Panábas pɛ́ɛ́sán yɛ́ a pálɛ́ɛg yɛ Ənfiʼpolíis, na a pálɛ́ɛg yɛ Aʼpoloníi, pááság kɛɛn alon a Təsaloníig. Yúdɛn yiígóodi yoog yɔɔbɔn ɛ pɛɔ́sɔ́gɔ́lɔ́n kɔ áay a Təsaloníig.

²Póol aáság kɛɛn ɔsɔd kɔ əgín wɔnɔ́ ná kɛ́yɛ́ɛ a mandoŋá mə́ə́ŋ pɛnɔ piim. Mɔɔ́s má kisúgiʼ miim mádáád má míyə́ə́nə́nən a kɛnɛŋ kɛ́ ayɛ́ɛ kɔ́gɔ́ɔg, Póol ayɛ́ɛ agɛɛnan aboan pɔɔd pá páyɛ́ɛlanɛ kɔ agobodɛ́ananɛ nkə kɛ́ kíyə́dílə́ə́ a Kálaʼtaʼ ɛ Táán.

³Ayɛ́ɛ agoboyásɛnan, əə́buúloodi wɔnɔ́ ná a Mədilə́ní móom kɛ́lɛɛ́ kɔ lɛ́ Məsíi alɛ́ɛ́ konɛ ntɔ́b, álɛ əgu, ná a ngim yɛ́ɛy yíiʼkini kiim yóndɛg a pɛlóŋ. Ayɛ́bodɛánɛ ɔnɔ́ na pɔ́lɛ́: «Məsíi ogo nyóon aa nyóonɛ alɛɛ́ Yə́sus nyɔ́ ndɛɛ́ agosɔyɔ kɛbán kiə́ŋ.»

⁴Náan aa ngab ɛ Yúdɛn yimmú iyə́líʼtíníí tɔgɛ́ɛ́ tuə́ŋ tóod, pɔ́ɔ́sɔ́d a ondáŋ ó pa Póol pɔ́lɛ́ na Sɛ́las. Náan tɛn aa ɛ́fɔlɛ́ ɛ́ pɔɔ́n pá Kɛlɛ́ɛg pá páyɛ́ɛ agonyáadɛ Táán pɛ́ɛ́sɔ́d tɛn a ondáŋ ó pa Póol. Ɛ́fɔlɛ́ ɛ́ pɛgóʼkóón pɛ́ pagɛ́ɛd yɛ́ɛ́sɔ́d tɛn a ondáŋ wóow.

⁵Náa, pɔɔ́n pá Yúdɛn pə́mmú pá páyɛ́ɛ na yaág yɛ́ əngis, pə́yə́suídíníí pifód pɛ́ pɔɔd pímmú pɛ́ pɛ́ɛ́bóan píəgiim píyə́yəə a pálɛ́ɛg. Páyɛ́boyɛ́ɛ́lɛ lɛ́ pábɛlanɛ pɔɔd ná inyuunyugiʼ ídə́əŋ a pálɛ́ɛg. Páyɛ́ɛ́n a nó Yásɔn lɛ́ pɛ́ɛn əgumin pa Póol pɔ́lɛ́ na Sɛ́las pɛ́ɛn əbudə́nigi a pɛyɔm a udi ó nigúu.

⁶Wɔnɔ́ ná pádɛʼkáaboóboanɛɛ́ kɔ, píígúmin Yásɔn na ngab ɛ pomóŋŋí pə́ə́s pəə́liʼtiniʼ pə́mmú, pááság kubuúdulə agɛɛn na pɔ́lɛ́ a udi ó palaamɛʼ pá a pálɛ́ɛg. Páyɛ́ɛ agɛɛn pə́əgiim pásása, pɔ́nɔ́: «Pɔɔd póonɛ pálɛ pɔɔd pá pálɛɛ́ əgunyunyugəni nsí ngim. Nɛ́gɔŋ yɛ́ɛnɛ pándɛ áanɛ a pəsi.

⁷Yásɔn aa əbusiə́díníí a noádɛʼ nuə́ŋ! Piim póonɛ pálɛ pɔɔd pá niə́siəd nɛɔ́bɔn nɛ́dɛɔ́gɔ wɔnɔ́ ná pɛcɛm pɛ́ Sɛsáal nkúm yɛ́ nkóʼkóón yɛ́ ɛlɛɛ́ a Ɔlɔ́ma pɛ́lɛɛ́ əgusəə. Pɔ́lɛ́ pɔ́nɔ́ nkúm yɛndɛ́ŋ ɛlɛ kɔ niiŋ lɛ́ Yə́sus.»

⁸Tɔgɛ́ɛ́ tóod tuíyə́bi kiʼtúú kɛ́ pɔɔd kɛ́ kɛ́yɛ́ɛ kɔ áay, ɔmbɔ́ tɛn na palaamɛʼ pá a pálɛ́ɛg kɛ́.

⁹Pááság kɛɛlɛ lɛ́ pə́gumin pa Yásɔn na pɔsɔ́g pə́mmú póob, páʼpɛ́ɛ́ macaŋ na palaamɛʼ agɛɛlɛ lɛ́ pə́buúlis.

¹⁰Əgín ná mbin yiídə́əŋ, pəə́liʼtiniʼ pááság kɛɛlɛ lɛ́ pa Póol pɔ́lɛ́ na Sɛ́las pɛ́ɛn a Pələ́ə. Ná páyɛ́ɛ́n əgiig kɔ, páyɛ́ɛ́n a yoog ɛ pɛɔ́sɔ́gɔ́lɔ́n ɛ Yúdɛn.

¹¹Pɔɔ́n pá Yúdɛn pá a Pələ́ə páyɛ́ɛ na ɔʼtɛ́m ólaŋ agaáyɛn pɔsɔ́g pá a Təsaloníig. Pə́yə́bísígíí kəə́liʼtiniʼ Tɔsɔm Tólaŋ. Náan aa mɔɔ́s miim páyɛ́ɛ əgiiyə nkə kɛ́ kɛ́lɛɛ́ a Kálaʼtaʼ ɛ Táán agɛɛlɛ lɛ́ pálɛŋ nga nkə kɛ́ Póol alɛɛ́ əgusəə kɛ́lɛ fɔ́lɔ́b.

¹²Ɛ́fɔlɛ́ a ondáŋ wɔ́ɔ́bɔn ɛ́yáág oʼto na Yə́sus. Ɔmbɔ́ tɛn a ondáŋ ó pɛnɔɔŋɛʼ, ɛ́fɔlɛ́ ɛ́ pɛgóʼkóón pɛ́ pagɛ́ɛd na ɛ́fɔlɛ́ tɛn ɛ́ panɔ́mɛɛd ɛ́yáág tɛn oʼto na Yə́sus.

¹³Náa, ná Yúdɛn yɛ́ a Təsaloníig ɛyóób lɛ́ Póol alɛ alɔɛgɛ tɛn Tɔsɔm tó Táán a Pələ́ə, pə́yíímən kɔ pə́ə́bə́ə́ kolɛ́sa, pámɛ́ɛ́lɛ lɛ́ ilúún ɛ́bany pɔɔd.

¹⁴Pomóŋŋí pəə́liʼtiniʼ pááság kəə́bisig kɛɛlɛ lɛ́ Póol ásan, ə́yə́ən yɛ́ a noom nó nogóón. Pa Sɛ́las pɔ́lɛ́ na Timoʼtə́ə pɔ́lɛ́ pááság kolɔb kɔ áay a Pələ́ə.

¹⁵Pɔsɔ́g pá páyɛ́ɛ́n na Póol əgumusúid ngə́, páyɛ́ɛ́n na nyɔ́lɛ́ súʼtə́ə́ a Aʼtɛ́ɛn. A nimbuúlini nɛɔ́bɔn, Póol ayɛ́boyɛ́ʼkɛn nufuuʼ lɛ́ pádam pɛ́ʼkɛn na pa Sɛ́las pɔ́lɛ́ na Timoʼtə́ə, pə́ə́bisig kiim amoóboan.

¹⁶Kɛnɛŋ kɛ́ Póol ayɛ́ɛ agobóŋan pa Sɛ́las pɔ́lɛ́ na Timoʼtə́ə a Aʼtɛ́ɛn, ayɛ́ɛ agodɛ́ʼtɛg moom mó ambog[81] mó pɔɔd páyɛ́ɛ anyáadanɛ kɔ. Nkə kɛ́ɛg kɛ́yɛ́moyɛ́ʼkɛn ɔʼtɛ́m kogany wó óyɛ́mosán oʼto.

¹⁷Náan aa a puog pó pɛɔ́sɔ́gɔ́lɔ́n pó Yúdɛn, ayɛ́ɛ ɔsɔyɛla kɔ na pibíəniʼ pɛ́ Yúdɛn, na pɛnɔɔŋɛʼ pɛ́ pɛ́yɛ́ɛ agɔnyáadanɛ Táán. Mɔɔ́s miim tɛn ayɛ́ɛ yɛɛnan a pɛdom agɛɛn ɔsɔyɔ na pɔɔd pá páyɛ́ɛ paágɔnyɛla kɔ.

¹⁸Palɛŋ sugúluʼ pá pagóón pə́mmú, pɔ́ɔdɔ́ŋɔn pɔsɔ́g pə́mmú lɛ́ pa ɛʼpɛʼkolɛyɛ́ɛŋ, pə́mmú lɛ́ pa ɛstoyisiyɛ́ɛŋ pə́ə́bə́ə́ tɛn kosɔyɔ na Póol, pɔ́nɔ́: «Nyóonɛ nyɔ́ alɛɛ́ agodaŋ kodáŋáán wɔnɔ́ inonnón ə́ə, nkə kɛmɔɛ́d áa alɛɛ́ əgusəə əə́?» Náa pɔsɔ́g pə́mmú pɔ́nɔ́: «Pádɛ́aʼtaŋ kɛɛn pɔɔd pá páalɔɛgɛ padáán pá pawa pá pəsi tɛndɛŋɛnɛɛ́.» Páyɛ́ɛ əgusəə náan lɛ́ páyóób Póol aálɔɛgɛ kɛbán kɛ́ Yə́sus na kɛbán kɛ́ koóndɛg kó pɛlóŋ.

¹⁹Píísiə́d Póol pámɛ́ɛn na nyɔ́lɛ́ a udi ó yoog ɛ pɛyɔm yɛ́ nkóʼkóón yɛ́ páyɛ́ɛ agodɔ́ŋɔn lɛ́ Alɛyoʼpáas.[82] Pííŋíən na Póol kɔ a ɛgɔny yɛ́ɛy pɔ́nɔ́ əə: «Tɛlɛ págolɛŋ nkə aa kɛ́lɛɛ́ yoom yɛ́ ɛwa yɛ́ɛy yɛ́ olɛɛ́ agaaʼkananɛ pɔɔd əə?

²⁰Kɛ́lɛ lɛ́ olɛ agɛbɛlɛ́san na pɛbán pɛ́ pɛwa pɛ́ tɛdɛ́njaŋ koóbɛ́ɛ́. Tɛanyɔ́ŋɛn kolɛŋ yisí yɛ́ ɛlɛɛ́ a nkə kɛ́ɛg kɛ́ olɛɛ́ agaaʼkananɛ.»

²¹(Páyɛ́ɛ ɔsɔyɔ náan lɛ́ pɔɔd pá a Aʼtɛ́ɛn piim, na pəən tɛn piim pá páyɛ́ɛ kɔ áay páyɛ́ɛ asánɛ kɛnɛŋ kɛɔ́bɔn əgín lɛ́ pɔ́sɔyɔ, oó lɛ́ póob tɔsɔm tó tógálónɛ́nɛ́ɛ́ towa towa.)

²²Póol yɛɛ́dɛ́ɛ́mɛn aáság kodɛ́lɛm a kɛgaágadɛ kɛ́ ɛgɔny yɛ́ɛy, ɔnɔ́ na pɔ́lɛ́: «Pəŋi pɔɔd pá a Aʼtɛ́ɛn, mbádála lɛ́ polɛ pɔɔd pá puə́yísíníí kɛ́fɔlɛ́ a pɛbán pɛ́ a kəə́liʼtiniʼ.

²³Ndɛ əgusəə náan lɛ́ ná njɛ́ɛ əgiim ntáŋana a pálɛ́ɛg yaaŋan, njɛ́ɛ agodɛ́ʼtɛg moom mó mólɛɛ́ kɛnon na pəŋi, mó polɛɛ́ agonyáadɛ padáán pə́mmú na mólɛ́. Nyɛɛ́dála tɛn nkə kɛ́ puídílid a kibóŋ kɛáŋan kɛ́ pɛnon kímmú. Puídílə kɔ lɛ́: “Kibóŋ kɛ́ táán yimmú yɛ́ tɛndɛŋɛnɛɛ́.” Taa! Ogo nyóon nyɔ́ polɛɛ́ agonyáadɛ podɛmoólɛ́ŋ, nyɔ́lɛ́ ogo aa mɛ mbíim aboólɔɛgɛnɛ.

²⁴Táán nyɔ́ ayɛ́ɛ́lɛ nsí na nkə kiim kɛ́ kɛ́lɛɛ́ kɔ, nyɔ́lɛ́ aa alɛɛ́ Sə́dúk wo nsí na mɔɛn. Náa, ədiə́ləndin a paʼtɛ́mpɛl pá pɔɔd pááwáág na ɔmbɔg yɔ́ɔ́bɔn.

²⁵Náan tɛn aa ədiə́gunəə́ lɛ́ pɔɔd píim pásósog a oʼto wə́ə́ŋ lɛ́ nyɔ́lɛ́ aa alɛɛ́ nyɔ́ aágɛɛ́ʼkɛn ɔlaa na mɔɔd ungim, aágɛɛlɛ lɛ́ ungim yɛ́ɛsɛma. Nyɔ́lɛ́ aa alɛɛ́ agɛɛ́ʼkɛn yiim na ungim[83]

²⁶«Táán yɛɛ́yáŋ agɛɛlɛ əgín mɔɔd úmmuʼ súg. A mɔɔd nyóon úmmuʼ aa ayɛ́ɛ́lɛ mɔnɔŋ miim má a nsí, ɔnɔ́ míim máágóna pɛnɔ piim, a nsí ngim. A kóonɛ lɛ́ ə́díin yɛɛlɛ pɔɔd, ayɛ́ɛ əə́ʼkudə́nigəni pɛalɛn pɛ́ tɔɔ́ na kɛloo, aásóma əʼkúu yɛ́ pə́ələndin kɔ[84]

²⁷Ayɛ́ɛ́lɛ náan lɛ́ ná pɔɔd pə́muyúunə lɛ́ amaʼkɛɛlɛ əgiim pə́duʼtum kó pə́əgiim pə́duʼtum, páamoyɔ́ɔŋ, nyɔ́lɛ́ nyɔ́ a fɔ́lɔ́b ɔdɛɔ́gɔ laálá na ɛ́nɛ́ mɔɔd

²⁸lɛ́: “Nyɔ́lɛ́ aa alɛɛ́ agɛbɛyɛ́ʼkɛn ɔlaa, aágɛɛlɛ lɛ́ tiə́nyigən, tɛ́ɛlɛŋ lɛ́ tɛlɛ kɔ.” Náan aa pɛɛgaʼ pɛlɛ́ɛ́ pááŋan pə́mmú Píísə́ə́ pɔ́nɔ́: “Pəsi tɛlɛ tɛn ndɛg yəəŋ.”

²⁹«Wɔnɔ́ ná tɛlɛɛ́ ndɛg ɛ Táán, yoom yɛ́ mɔɔd amáána a oʼto wə́ə́ŋ aáság kɛɛlɛ na ɔmbɔg yə́ə́ŋ, tiʼkóodi lɛ́ tɛ́nyáadɛ yɛ́lɛ́ wɔnɔ́ Táán wəəs áa nyóon. Ɔmbɔ́ pɛ́ɛlɛ yoom ɛgo na kóol, oó lɛ́ na kisúg kɛ́ mɔɔnɛ́, ɔmbɔ́ lɛ́ na aʼtáán, tidisə́ə́ lɛ́ kɛŋwáŋánán kiə́ŋ áa kɛ́ɛg.

³⁰Táán yiílísin pɔɔd nkə kɛ́ɛg kiim lɛ́ pádɛʼkɛ́ɛ agolɛŋ nkə kɛ́ páyɛ́ɛ agɛɛlɛ. Náa nɛ́gɔŋ yɛ́ɛnɛ, alɛ agodɛ́anɛ na ungim, a pɛnɔ piim lɛ́ yə́suʼki, ágasɛ ɔlaa.

³¹Kɛ́lɛ lɛ́, əə́ʼkudə́nigi wɔɔ́s wó alɛ́ɛ́ koyɔmɛɛ́ mɔɔd ungim nyɔ́ a nsí. Pɛyɔm piə́ŋ pɛ́lɛ́ɛ́ kɛɛn a sáád. Pɛyɔm pɛ́ɛb amɛ́ʼkɛn a ɔmbɔg á sɔ́g nyɔ́ əyííyid. A nɛóndɛgɛ nɛ́ ayóndɛ́gɛ ogo nyóon, yiílóódi moááŋ a əngis á mɔɔd ungim, ánɛ aa alɛɛ́ ogo nyóon nyɔ́ əyííyid.»

³²Ná pɔɔd póob páyóób nkə kɛ́ Póol ayɛ́ɛ əgusəə a kɛbán kɛ́ɛg kɛ́ koóndɛg kó pɛlóŋ, ngab yimmú yəə́bə́ə́ komoóŋɔnɔ. Náa pɔsɔ́g pə́mmú pɔ́nɔ́ na nyɔ́lɛ́: «Tɛlɛ́ɛ́ kodam ntóɛŋ agoob kɛbán kɛ́ɛg wɔɔ́s wɛ́ndɛ́ŋ. A naánɛ́, ndóo!»

³³Póol aáság kubuudi, amɛ́ɛn.

³⁴Ɔmbɔ́ náan, ngab ɛ pɔɔd yimmú yɛɛ́sɔ́d a ondáŋ wə́ə́ŋ, pámáyaág oʼto na Yə́sus. A ondáŋ ó pɔɔd póob, mɔɔd nyummú ayɛ́ɛ kɔ niiŋ lɛ́ Təníis. Ayɛ́ɛ a ondáŋ ó palóoyaʼ pá a yoog ɛ pɛyɔm yɛ́ nkóʼkóón yɛ́ páyɛ́ɛ ɔdɔ́ŋɔn lɛ́ Alɛyoʼpáas. Ɔʼkɛ́ɛd nyummú niiŋ lɛ́ Təməlíis, na pɔɔd tɛn pə́mmú páyɛ́ɛ a ondáŋ ó pɔɔd pá pɛ́ɛ́sɔ́d a ondáŋ wóow.