Read Yambeta Pigólí 18 Bible Online

Pigólí 18 - Yambeta bible

Pigólí 18

¹A ngim yɛ́ɛy, Póol yɛɛ́dɛ́ɛ́mɛn a Aʼtɛ́ɛn aáság kɛɛn a Kɔlɛ́ɛnt[85]

²Yɛɛ́bóan mɔɔ́n ó Yúdɛn nyummú kɔ niiŋ lɛ́ Aʼkɛláas. Əyə́biə́níí a pálɛ́ɛg yɛ́ páyɛ́ɛ ɔdɔ́ŋɔn lɛ́ Pɔ́ɔŋ. Páyɛ́ɛ əgiim a Ɛʼtálɛa pɔ́lɛ́ na oʼkán Pilisíil. Pə́yíím kɔ áay lɛ́ Kolóod, nkúm yɛ́ nkóʼkóón yɛ́ a Ɔlɔ́ma yiísə́ə́ lɛ́ pɔɔ́n pá Yúdɛn piim pá pálɛɛ́ a pálɛ́ɛg yɛ Ɔlɔ́ma pásánan. Póol aáság kɛɛn aboóboan.

³Wɔnɔ́ ná Aʼkɛláas ogo nyóon ayɛ́ɛ agɛɛlɛ pigólí pɛ́go pímuʼ wɔnɔ́ nyɔ́lɛ́ Póol, (kowáaga kó toádɛʼ tó pə́əmúsə agosan na tólɛ́, ) yiílə́ndin na pɔ́lɛ́, pə́ə́bə́ə́ kugud ondáŋ.

⁴A mɔɔ́s má kisúgiʼ kɛ́ Yúdɛn miim, Póol ayɛ́ɛ yɛɛnan a yoog yɔɔbɔn ɛ pɛɔ́sɔ́gɔ́lɔ́n, álɛ əsiəd tɔgɛ́ɛ́ kɔ. Ayɛ́ɛ əguunə kɛɛlɛ lɛ́ Yúdɛn, na pɔɔ́n pá Kɛlɛ́ɛg kɛ́, pə́ə́liʼtini tɔgɛ́ɛ́ tuə́ŋ.

⁵Náa, ná pa Sɛ́las pɔ́lɛ́ na Timoʼtə́ə pá pə́yíím pádɛ́ɛmɛn a Masɛdowáan pə́yíím alon a Kɔlɛ́ɛnt, Póol yiídí nkə kiim kɛ́ ayɛ́ɛ agɛɛlɛ, aáság kaáyɛ́ʼkɛn əgín a Tɔsɔm kolɔɛgɛ. Ayɛ́ɛ oloodi moááŋ na Yúdɛn lɛ́ Yə́sus aa alɛɛ́ Məsíi.

⁶Náa, Yúdɛn ɛyɛ́ɛ agomoónɔɛyɛ, páamoodóga. Póol aáság kəə́gidə ummúndúŋ wó a pilə́ə́ piə́ŋ, ɔnɔ́ na pɔ́lɛ́: «Puməʼkunim ná puə́ním a pəŋibáamɔɛ́d, mɛ ndɛ moááŋ. Əgəə́bə́ə nɛ́gɔŋ yɛ́ɛnɛ ndəbuudi pəŋi agɛɛn alɔɛgɛnɛ pɛnɔɔŋɛʼ Tɔsɔm tó Táán.»

⁷Aáság kodɛ́ɛmɛn áay agosan. Ayɛ́ɛ́n a nó mɔɔd nyummú niiŋ lɛ́ Tisíus Síústus nyɔ́ ayɛ́ɛ agonyáadɛ Táán. Mɔɔd ogo nyóon, noádɛʼ nuə́ŋ nóyɛ́ɛ a ɛbá ɛ́ yoog ɛ pɛɔ́sɔ́gɔ́lɔ́n.

⁸Kilíspus, nkúm ɛ yoog ɛ pɛɔ́sɔ́gɔ́lɔ́n yɛ́ɛy na ungim nyɔ́ a yoog yəəŋ, na ɛ́fɔlɛ́ ɛ́ pɔɔd tɛn pá a Kɔlɛ́ɛnt páyáág oʼto na Sə́dúk ná páyóób nkə kɛ́ Póol ayɛ́ɛ alɔɛgɛ, pə́mə́əsiəd ɔsɔgɛn.

⁹Udúg wúmmú, Sə́dúk yɛɛ́lónɛn Póol wɔnɔ́ a kɛlɛm, ɔnɔ́ na nyɔ́lɛ́: «Odɛʼtámmána Póol, tod əgín na kosɔyɔ yuudi, odɛndɔ́g unuʼ

¹⁰lɛ́ ndɛ na wɛ, mɔɔd adɛágoyáág ombɔg a nkó lɛ́ ɛ́fɔlɛ́ yɛ́ a pálɛ́ɛg yɛ́ɛnɛ ɛlɛ pɔɔd pá páagoob na mɛ.»

¹¹Póol ayɛ́ɛ́lɛ waag úmmuʼ na kɛsom kɔ áay a Kɔlɛ́ɛnt, aágaaʼkananɛ pɔɔd Tɔsɔm tó Táán.

¹²A kɛnɛŋ kɛ́ Kalɛyɔ́ɔŋ ayɛ́ɛ ngɔ́mɛnaʼ yɛ́ nkóʼkóón yɛ Ɔlɔ́ma a Aʼkáay, Yúdɛn ɛyáyóóbánánɛ́ɛ́, páágód unuʼ wɔ́ɔ́bɔn úmmuʼ, pááság kugumin Póol, pámɛ́ɛn amosɔ́mɛn a nó ngɔ́mɛnaʼ yɛ́ nkóʼkóón.

¹³Ná páyɛ́ɛ́n əgiig na nyɔ́lɛ́ kɔ a nó ngɔ́mɛnaʼ yɛ́ nkóʼkóón, píísə́ə́ pɔ́nɔ́: «Taa, mɔɔd nyóonɛ alɛ əgudíʼkəni pɔɔd lɛ́ pányáadɛ Táán a pɛɔ́sɔ́gɔ́lɔ́n ndɛ́ŋ na ombod wó pɛcɛm piə́s pɛ́dɛ́abɛyáʼkananɛɛ́.»

¹⁴Əgín ná Póol ayaʼkanyɔ́ŋɛn kusiəd tɔgɛ́ɛ́, Kalɛyɔ́ɔŋ aáság kudə́əmini tɔgɛ́ɛ́, ɔnɔ́: «Pəŋi Yúdɛn pólɛŋ lɛ́ mɔɔd aa Póol ayóónɛn, ɔmbɔ́ lɛ́ kɛbán kɛ́ kɛbɛ́ aa ayɛ́ɛlɛnɛ ná ndaadam ntóɛŋ agoob pɛsɔ́mɛn pɛáŋan.

¹⁵Náa, wɔnɔ́ ná kɛ́lɛɛ́ lɛ́ polɛ agá a ɔsáŋ lɛ́ “nyóonɛ, ɔnɔ́, nyummú, ɔnɔ́!” Na a kɛbán tɛn kɛ́ nɛdɔ́ŋɔn nɛ́ əngiŋ yááŋan yə́mmú, na nkə kɛ́ kɛ́adɛ́ʼtɛg pɛcɛm pɛáŋan pɛ́ pəŋibáamɔɛ́d, mɛ ntɛɔ́gɔ ogobaasɛ pɛbán wɔnɔ́ pɛ́ɛb! Pɛ́lɛ pɛbán pɛ́ pugódíí lɛ́ púsóboni pəŋibáamɔɛ́d.»

¹⁶Aáság kusəə lɛ́ pálon, pɛ́ɛn, pádɛndɔ́b kə́mmú áay a yoog ɛ pɛyɔm.

¹⁷Pááság kugumin Sostɛ́ɛn, nkúm ɛ yoog ɛ pɛɔ́sɔ́gɔ́lɔ́n, pə́ə́bə́ə́ komobáam kɔ áay a udi ó pɔyɔm pɛyɔm. Náa, ɔmbɔ́ náan, niɛlɛ nɛɔ́bɔn nɛ́ɛn nɛ́dɛʼkáayaŋ kogɔmɛd Kalɛyɔ́ɔŋ ɔsab.

¹⁸Póol əyíʼkíni kɛɛlɛ kɔ áay a Kɔlɛ́ɛnt mədúg miíŋ. A ngim yɛ́ɛy anɛ́ɛ́n pááság kaábɛ́ganan lɛ́ na pomóŋŋí pə́ə́ŋ pəə́liʼtiniʼ na nyɔ́lɛ́. Yiísiə́d siʼtíməʼ agɛɛn a Silíi. Páyɛ́ɛ́n pɔ́lɛ́ na Pilisíil, na Aʼkɛláas. A kóonɛ lɛ́ pə́díin pɛ́ɛn náan, Póol əyə́súlíí oʼto a Sənkələ́ə. Əyə́díin tuyə́ən lɛ́ ayácɛ́mɛ́ɛ́ kɛbán a udi ó Táán.[86]

¹⁹Ná páyɛ́ɛ́n, páyɛ́ɛ́n alon a Ɛfɛ́ɛs. Kɔ́gɔ́ɔg aa Póol ayáyáádɛ́nɛ́ɛ́ na pa Pilisíil pɔ́lɛ́ na Aʼkɛláas. Nyɔ́lɛ́ ayɛ́ɛ́n ɔsɔd a yoog ɛ pɛɔ́sɔ́gɔ́lɔ́n ɛ Yúdɛn, əə́ləndin kɔ agosɔyɔ na pɔɔ́n pá Yúdɛn.

²⁰Wɔnɔ́ ná páyɛ́ɛ amoyɔ́sɔ́gɔlɔn lɛ́ ɔ́lɔb kə́mmú sɔɔŋ na pɔ́lɛ́, yɛɛ́sáŋɛ́nɛ.

²¹Ná Ayɛ́ɛ aándagɛɛn, yiísə́ə́ ɔnɔ́ na pɔ́lɛ́: «Táán əməʼkəə́liʼtini, ndɛ́ɛ́ kiim kə́mmú a pəŋi wɔɔ́s.» Aáság kobag a siʼtíməʼ, aádɛ́ɛ́mɛn a Ɛfɛ́ɛs, amɛ́ɛn.

²²Siʼtíməʼ ɛyɛ́ɛ́n əmuúsuuli a Səsalə́ə. Póol aáság koyaŋ abag a Yolósalɛm agɛɛn osoyidi pəə́liʼtiniʼ pá páyɛ́ɛ kɔ́gɔ́ɔg. A ngim yɛ́ɛy, aáság kɛɛn a Əntiyóos.

²³Yiílə́ndin ngab ɛ mədúg kɔ Əntiyóos, aádɛ́ɛ́mɛn tɛn kɔ amɛ́ɛn. Yɛɛ́dáŋána nigúu nɛ́ Kaláad niim, na nɛ́ Filisíi niim. Ayɛ́ɛ agɛɛn əə́giim ágónɛ kəə́liʼtiniʼ kó paaʼkan piim.

²⁴Mɔɔ́n ó Yúdɛn nyummú nyɔ́ əyə́biə́níí a Alɛgɛsəndilíi əyíím əgiig a Ɛfɛ́ɛs. Ayɛ́ɛ niiŋ lɛ́ Aʼpolóos. Mɔɔd nyóon yɛɛ́lɛŋɛn tɔgɛ́ɛ́. Yɛɛ́lɛŋɛn tɛn ɛ́fɔlɛ́ ɛ́ pɛbán pɛ́ pɛ́yɛ́ɛ pidiídílə́ a Kálaʼtaʼ ɛ Táán.

²⁵Páyɛ́moyáʼkánánɛ pɛbán pɛ́ a Ngə́ ɛ Sə́dúk. Ayáyɛ́ʼkɛnɛn ɔʼtɛ́m wə́ə́ŋ ungim agolɔɛgɛ pɛbán pɛ́ pɛ́adɛ́ʼtɛg ɔlaa ó Yə́sus, aágaaʼkananɛ pɛ́lɛ́ wɔnɔ́ ná kɛásɛʼtan lɛ́ páaʼkananɛ. Náa kɛbán kímuʼ, əgín ɔsɔgɛn ó Sɛ́aŋ wólɛ́ na wólɛ́ aa yɛɛ́lɛŋɛn.

²⁶Aʼpolóos aáság kəə́bə́ə́ kosɔyɔ a yoog ɛ pɛɔ́sɔ́gɔ́lɔ́n ɛ Yúdɛn na pɛsány piim. Ná pa Pilisíil pɔ́lɛ́ na Aʼkɛláas páyɛ́moyóób ɔɔ́sɔyɔ, pə́yímusíəd əguúli na nyɔ́lɛ́, páálɛŋ komoyásɛnan wɔnɔ́ ná kíəguunə lɛ́ mɔɔd ə́yə́ən Ngə́ ɛ Táán.

²⁷A ngim yɛ́ɛy, Aʼpolóos yiísə́ə́ lɛ́ nyɔ́lɛ́ alɛ anyɔ́ŋɛn kɛɛn a Aʼkáay. Pəə́liʼtiniʼ pááság kɔnyɔ́ga náan lɛ́ yɛ́ɛn. Píídílən paaʼkan póob káag lɛ́ pálɛŋ kumuúsiəd. Ná ayɛ́ɛ́n əgiig kɔ, ayɛ́ɛ́bɛ kɛ́fɔlɛ́ ungim nyɔ́ a mawɔʼ má Táán, ayɛ́ɛ aáʼkaag oʼto na Yə́sus.

²⁸Kɛ́lɛ lɛ́, a nkə kɛ́ kɛ́yɛ́ɛ kidiídílə́ a Kálaʼtaʼ ɛ Táán, ayɛ́ɛ oloodi moááŋ na Yúdɛn lɛ́ Yə́sus alɛ Məsíi. A tɔgɛ́ɛ́ tuə́ŋ tó ayɛ́ɛ agosɔyɔ, ayɛ́boolɔ́g unuʼ a musuŋ mó pígóodi, pə́diə́líʼtíníí.