Read Yambeta Pigólí 19 Bible Online

Pigólí 19 - Yambeta bible

Pigólí 19

¹Kɛnɛŋ kɛ́ Aʼpolóos ayɛ́ɛ a Kɔlɛ́ɛnt, Póol yɛɛ́sán yɛ́ a nkon yɛ Əsíi aáság kɛɛn alon a Ɛfɛ́ɛs. Yɛɛ́bóan ngab ɛ paaʼkan kɔ,

²aáság kubuŋíən ɔnɔ́ əə: «Ná poyáán pəə́liʼtiniʼ əə, poyɔ́ɔ́ŋ Uŋun wó Ufúlúʼtú ə́?» Pə́yímuyúlísíni pɔ́nɔ́ na nyɔ́lɛ́: «Tɛdɛ́njaŋ koob lɛ́ yoom yímmú ɛ́lɛ kɔ yɛ́ pɔ́ɔdɔ́ŋɔn lɛ́ Uŋun wó Ufúlúʼtú.»

³Náa Póol ɔnɔ́ na pɔ́lɛ́: «Ɔsɔgɛn igə aa poyɔ́ɔ́ŋ anɛ́ɛ́n ə́?» Pááság kumuyúlisini pɔ́nɔ́ na nyɔ́lɛ́: «Ɔsɔgɛn wó Sɛ́aŋ ayɛ́ɛ agɛɛlɛ aa tɛyɔ́ɔ́ŋ óo!»

⁴Póol yiísə́ə́ ɔnɔ́ na pɔ́lɛ́: «Sɛ́aŋ ayɛ́ɛ agosɔgɛna pá pə́ʼkəə́suʼkií mandoŋá mɔ́ɔ́bɔn má mabɛ́. Yɛɛ́dɛánɛ na ndɛg yɛ Ɛ́sɛlayɛl lɛ́ páág oʼto na nyɔ́ əə́giim a ngim yəəŋ. Ogo nyóon aa nyóonɛ alɛɛ́ Yə́sus.»

⁵Ná páyóób náan, píísiə́d ɔsɔgɛn a niiŋ nɛ́ Sə́dúk Yə́sus,

⁶Póol amáboyábɛ́gan ombɔg, Uŋun wó Ufúlúʼtú wááság kubuyíimin, pə́ə́bə́ə́ kosɔyɔ əʼkíí yɛ́ndɛ́ŋ, páalɔɛgɛ pɛbán pɛ́ Táán.

⁷Páyɛ́ɛ pɔɔd yoom náanɛ wɔnɔ́ nto yówád na ɛ́baan.

⁸Póol ayɛ́ɛ́lɛ náan məə́ mádáád aágɛɛnan pɛnɛŋ piim a yoog ɛ pɛɔ́sɔ́gɔ́lɔ́n ɛ Yúdɛn. Ayɛ́ɛ əgusiədilə tɔgɛ́ɛ́ kɔ, ɔɔ́sɔyɔ na pɛsány. Ayɛ́ɛ agosɔyɛla kɛbán kɛ́ Nɛlaamɛʼ nɛ́ Táán, əə́guunə kɛɛlɛ lɛ́ pɔɔd pá páyɛ́ɛ agoob tɔgɛ́ɛ́ tuə́ŋ páág oʼto na Sə́dúk.

⁹Náa, ngab yimmú a ondáŋ wɔ́ɔ́bɔn ɛyɔ́lɔ́gɔ́ɔ́ ntóɛŋ, páásáŋɛ́nɛ kaag oʼto na Sə́dúk. Páyɛ́ɛ agá agosɔyɔ a udi ó pɔɔd kɔbɛ́ a noá na Ngə́ ɛ Sə́dúk. Náan aa Póol yɛɛ́sóm anɛ́ɛ́n ongoo na pɔ́lɛ́, əmə́suídíníí paaʼkan. Ayɛ́ɛ alɔɛgɛ Tɔsɔm mɔɔ́s miim a yoog ɛ sugúluʼ ɛ mɔɔd nyummú niiŋ lɛ́ Tilənúus.

¹⁰Nkə kɛ́ɛg kɛ́yáyɛ́lɛ́ɛ́ náan pɛag pɛ́laŋ pɛ́baan súʼtə́ə́ agɛɛn əgiig wɔnɔ́ ná Yúdɛn na pá pádɛʼkɛ́lɛɛ́ Yúdɛn pá páyɛ́ɛ a Əsíi páyóób Tɔsɔm tó Sə́dúk.

¹¹Táán ayɛ́ɛ́lɛ lɛ́ a toɛn tuə́ŋ, Póol yɛ́ɛlanɛ pɛa pɛ́ mangán pɛ́ pɛgóón.

¹²Pɔɔd páyɛ́ɛ lɛ́, pə́əsiədə muyə́ngíis, ɔmbɔ́ lɛ́ pɛsom pɛ́ pilə́ə́ pɛ́ pɛɔ́dɔ́bɔ Póol, páság kɛɛn agaábɛgɛn ombámbany a nkó, óyoom, oó lɛ́ uŋun wó ɔmbɛ́ wó óyɛ́ɛ na nyɔ́lɛ́, óolon.

¹³Pɔɔ́n pá Yúdɛn pə́mmú páyɛ́ɛ əgiim pádáŋana pálɛ́ɛg ngim lɛ́ pálɛ a yɛ́ɛnɛ, pálɛ a yɛ́ɛy kága, páaŋɛ́ŋaŋ məŋun má mabɛ́ má máyɛ́ɛlanɛ na pɔɔd. Ɔmbɔ́ tɛn pɔ́lɛ́ páyɛ́ɛ pááfɛg koŋɛŋ məŋun na niiŋ nɛ́ Sə́dúk, pə́əsəə na mɔ́lɛ́, wɛ ogo wɔʼkɔ́: «A niiŋ nɛ́ Yə́sus nyóon nyɔ́ Póol alɛɛ́ alɔɛgɛ, mbábodɛánɛ: Lónáan a nkó ɛ mɔɔd nyóon!»

¹⁴A pɔɔd póob pɔɔ́n pá mɔɔd nyummú niiŋ lɛ́ Sɛ́fa páyɛ́ɛ agɛɛlanɛ tɛn náan. Páyɛ́ɛ nto yɔɔbɔn ɛ́ʼtáan na ɛ́baan. Sɛ wɔɔbɔn ayɛ́ɛ kibíəniʼ kɛ́ Yúdɛn, nkúm ɛ payaaganɛʼ pɛfɔny.

¹⁵Náa, wɔɔ́s wúmmú, uŋun wó ɔmbɛ́ óyɛ́bodɛánɛ wɔnɔ́: «Mɛ mbálɛŋ Yə́sus, mbálɛŋ tɛn ánɛ aa alɛɛ́ Póol. Pəŋi oo, polɛ pa ánɛ ə́?»

¹⁶Mɔɔd nyɔ́ uŋun wó ɔmbɛ́ óyɛ́ɛ na nyɔ́lɛ́ aáság kaádagɛdɛ a nkó yɔɔbɔn pɔ́lɛ́ piim, amábodɔɛ́d a nsí. Ayɛ́ɛ na toɛn aáság koboónyɔŋ pɔ́lɛ́ piim, amábobáám kɔŋɛʼ, pááság kiim pálón a yoog pusun iyó agaásɔɛ́da na ɔʼtɛ́d, nkó ngim na pufə́ŋ.

¹⁷Ungim nyɔ́ a Ɛfɛ́ɛs, pɔɔ́n pá Yúdɛn na pɛnɔɔŋɛʼ pɛ́ pɛ́dɛɔ́gɔ Yúdɛn kɛ́ páyóób nkə kɛ́ɛg kɛ́ kɛ́yásánɛ́ɛ́. Ungim ɔyɔ́ɔ́ŋ wɛɛ́y, páanyáadɛ niiŋ nɛ́ Sə́dúk Yə́sus na toɛn.

¹⁸Ɛ́fɔlɛ́ ɛ́ pɔɔd yɛ́ ɛ́yɛ́ɛ yáʼkosɔd a kəə́liʼtiniʼ ɛ́yɛ́ɛ əgiimən adɛ́lɛm a udi ó mɔɔd ungim agaáwála unuʼ a pɛbán pɛɔ́bɔn pɛ́ pɛbɛ́ pɛ́ páyɛ́ɛ́lánɛ.

¹⁹Ɛ́fɔlɛ́ tɛn yɛ́ ɛ́yɛ́ɛ agɛɛlanɛ pɛnon ɛ́yɛ́ɛ yiimən na pagálaʼtaʼ pɔ́ɔ́bɔn pá pɛnon páság kogɔ́lɔnɛ a udi ó mɔɔd ungim. Pɛ́ɛ́sóngɛ mɔɔnɛ́ másɛ́g áa pagálaʼtaʼ póob páyɛ́ɛ págodɔn, pááság kɔɔŋ lɛ́ páásán pamɛlɛyɔ́ɔŋ kɛ́fɔlɛ́.

²⁰Náan aa a toɛn tó Sə́dúk, Tɔsɔm tuə́ŋ tóyɛ́ɛ əgín agɛɛn yuudi na kaálɔɛgɛ, túoloodi lɛ́ tólɛ na toɛn kɛ́fɔlɛ́.

²¹A ngim ɛ pɛbán pɛ́ɛb piim, Póol, a toɛn tó Uŋun wó Ufúlúʼtú, aáság kusəə lɛ́ nyɔ́lɛ́ aagɛɛn a Yolósalɛm. Ná nyɔ́lɛ́ aágɛɛn, aasan yɛ́ a Masɛdowáan na a Aʼkáay. Yiísə́ə́ lɛ́: «Mbaʼkɛɛn a Yolósalɛm ná a ngim yɛ́ɛy nyɛ́ɛn a Ɔlɔ́ma.»

²²Yɛɛ́dóm pa Timoʼtə́ə pɔ́lɛ́ na Ɛláastɛ a Masɛdowáan. Nto yɛ́ɛy ɛ́baan ɛyɛ́ɛ pɔɔd pá páyɛ́moyábɛ́gɛn ombɔg a pigólí. Nyɔ́lɛ́ aáság kolɔb kə́mmú mayaa má mədúg a Əsíi.

²³A kɛnɛŋ kɛ́go kɛ́ɛg, inyuunyugiʼ ɛ́ fɔ́lɔ́b yíídə́əŋ a Ɛfɛ́ɛs a oʼto wó Ngə́ ɛ Sə́dúk yɛ́ páyɛ́ɛ alɔɛgɛ.

²⁴Mɔɔd nyummú ayɛ́ɛ kɔ áay niiŋ lɛ́ Təmiʼtiliyúus. Ayɛ́ɛ uʼtun moom wɔnɔ́ pasɛŋ, na palanga. Ayɛ́ɛ ədúnilə mólɛ́ na kisúg kɛ́ mɔɔnɛ́. Nyɔ́lɛ́ ayɛ́ɛ ədúnilə moyaa mó puog pó pɛfɔny a kɛŋwáŋánán kɛ́ yoog yɛ́ páyɛ́ɛ pɛɛlɛnɛ táán yɔɔbɔn yɛ́ ɔʼkɛ́ɛd, niiŋ lɛ́ Ələʼtəmíis[87] pɛfɔny. Na nyɔ́lɛ́ na pəgudin pə́ə́ŋ, páyɛ́ɛ pɔɔ́ŋ mɔɔnɛ́ kɛ́fɔlɛ́ a pigólí pɛɔ́bɔn pɛ́ɛb pɛ́ kudun moom móom.

²⁵Wɔɔ́s wúmmú, yɛɛ́dɔ́ŋɔn pəgudin pə́ə́ŋ na pɔsɔ́g tɛn pə́mmú pá páyɛ́ɛ agɛɛlɛ pigólí pɛ́go pɛ́ɛb pímuʼ, aáság kobodɛ́anɛ ɔnɔ́ na pɔ́lɛ́: «Pəŋi pɔɔ́n pá mbáa, adɛ́ poálɛŋ lɛ́ tugúm tuim tóonɛ tó tɛlɛɛ́ na tólɛ́, pigólí piə́s pɛ́ɛnɛ aa pɛ́mábɛyɛ́ʼkɛn a?

²⁶Náa, polɛ agodála nkə kɛ́ kɛ́lɛɛ́ agaásan, ngɔ́ɔ́? Polɛ agoob nkə kɛ́ kɛ́lɛɛ́ ɔgɔɔ́sɔyɔ, ngɔ́ɔ́? Kɛyaa kɛ́ mɔɔd kɛ́ɛg kɛ́ pɔ́ɔdɔ́ŋɔn lɛ́ Póol alɛ əgusəə ɔnɔ́: “Padáán póonɛ pá pɔɔd pálɛɛ́ amaaŋan na ɔmbɔg yɔ́ɔ́bɔn pɔ́dɛɔ́gɔ padáán!” Náan aa əə́ʼkusúidií ɛ́fɔlɛ́ ɛ́ pɔɔd a ngim yəəŋ. Adɛ́njaŋ əgín áanɛ a pálɛ́ɛg yɛ Ɛfɛ́ɛs yɛ́lɛ́ na yɛ́lɛ́ aa amɛ́ɛ́lɛ náan, ndóo, na a nigúu nɛ́ Əsíi niim kɛ́.

²⁷Kɛbán kɛ́ɛg kɛ́lɛ kɛ́ kɛɛlɛ lɛ́ pɔɔd pə́ə́bə́ə́ kosɔyɔ kɔbɛ́ a pigólí pɛ́ tɛlɛɛ́ agɛɛlɛ. Adɛ́njaŋ əgín pigólí piə́s pɛ́lɛ́ na pɛ́lɛ́ aa pɔ́ɔsɔyɔ kɔbɛ́, ndóo. Páasɛ́ɛdɛ tɛn ɔmbɔ́ yoog yəəs ɛ pɛfɔny yɛ́ɛnɛ, kɛnɔ kɛ́ tɛlɛɛ́ ɔgɔɔ́sɔ́gɔlɔn táán yəəs yɛ́ ɔʼkɛ́ɛd yɛ́ nkóʼkóón Ələʼtəmíis. Páayósag tɛn niiŋ niə́ŋ, pə́dimusíəd kə́mmú wɔnɔ́ yoom, yɛ́lɛ́ yɛ́ pálɛɛ́ ɔgɔɔ́sɔ́gɔlɔn a nigúu nɛ́ Əsíi niim, na a nsí ngim.»

²⁸Ná pɔɔd pá páyɛ́ɛ kɔ áay páyóób tɔgɛ́ɛ́ tóod, páyóób ilúún kɛ́fɔlɛ́, pə́ə́bə́ə́ kosása, pɔ́nɔ́: «Ələʼtəmíis wo Ɛfɛ́ɛs alɛ oʼkóʼkóón!»

²⁹Kɛnɔ kiim a pálɛ́ɛg kiə́bə́ə́ kəə́nyug. Pɔɔd pááság kugumin pa Kayúus pɔ́lɛ́ na Alɛstáag, pibíəniʼ pɛ́ Masɛdowáan pɛ́ pɛ́yɛ́ɛ ondáŋ na Póol. Páyɛ́ɛ́n na pɔ́lɛ́ a kɛnɔ kɛ́ pɔɔd páyɛ́ɛ pɛɛnan agaágonya. Pɔɔd páyɛ́ɛ súuu a ngim yɔɔbɔn agɛɛn kɔ.

³⁰Póol ayaʼkanyɔ́ŋɛn kubuyə́ən kɔ lɛ́ yɛ́ɛn ɔsɔyɔ na kiʼtúú kɛ́ pɔɔd kɛ́ɛg, pəə́liʼtiniʼ pááság kosáŋɛnɛ lɛ́ adɛnjɛ́ɛ́n.

³¹Pɛgóʼkóón tɛn pímmú pɛ́ a Əsíi pɛ́ pɛ́yɛ́ɛ pɔsɔ́sɔ́g pə́ə́ŋ pááság kiim pámodómɛn tɛn pɔɔd lɛ́ píim amodɛ́anɛ, ədindóódi udi kɔ a kɛnɔ kɛ́ɛg.

³²Kɛnɔ kɛ́yɛ́ɛ kɔ kúʼkuʼkuʼkug. Páyɛ́ɛ asása, póonɛ pə́əsəə kɛɔ́bɔn ndɛ́ŋ, pə́mmú pə́əsəə tɛn kɛɔ́bɔn ndɛ́ŋ. Ɛ́fɔlɛ́ a ondáŋ wɔ́ɔ́bɔn ɛ́dɛʼkɛ́ɛ agolɛŋ kɔmɔɛ́d a igə aa pálɛɛ́ áay paágɔ́nyɛ́dáán.

³³Yúdɛn yaáság kudə́nigi mɔɔd nyummú kɔ lɛ́ ádɛ́lɛm a udi wɔ́ɔ́bɔn. Mɔɔd nyóon ayɛ́ɛ niiŋ lɛ́ Alɛsándɛlɛ. Ngab ɛ pɔɔd yimmú kɔ a kiʼtúú kɛ́ɛg yaáság kodɛ́ananɛ na Alɛsándɛlɛ wɔnɔ́ ná kɛbán kɛ́másánɛ́ɛ́. Alɛsándɛlɛ yiídə́ə́míni ombɔg agɛɛlɛ lɛ́ kiʼtúú kɛ́ pɔɔd kɛ́ɛg kɛ́moyádámɛgɛ, nyɔ́lɛ́ ɔ́sɔyɔ.

³⁴Náa, ná pɛ́ɛ́dála lɛ́ alɛ mɔɔ́n ó Yúdɛn, pə́ə́bə́ə́ kosása pɔ́lɛ́ piim kɛnɛŋ kímuʼ, pə́əsəə tɛn əgín yoom ɛgo ímuʼ. Pɛ́ɛ́sása náan, áwaʼ ɛlaŋ ɛ́baan. Páyɛ́ɛ əgusəə pɔ́nɔ́: «Ələʼtəmíis wo Ɛfɛ́ɛs alɛ oʼkóʼkóón!»

³⁵Əgiim əgiig a kɛnɛŋ kímmú, ɔndaamɛʼ nyummú, uʼtiləʼ o pálɛ́ɛg aáság kɛɛlɛ lɛ́ kɛnɔ kíwiiyi, pɔɔd pə́ləndin yəə́b. Aáság kusiəd tɔgɛ́ɛ́, ɔnɔ́: «Pəŋi pɔɔd pá a Ɛfɛ́ɛs, ánɛ úmmuʼ aa andɛŋɛnɛɛ́ lɛ́ a Ɛfɛ́ɛs aa yoog ɛ pɛfɔny yɛ Ələʼtəmíis, táán yəəs yɛ́ ɔʼkɛ́ɛd yɛ́ nkóʼkóón ɛlɛɛ́ ə́? Ánɛ aa andɛŋɛnɛɛ́ lɛ́ áanɛ a Ɛfɛ́ɛs aa kílíngə́lingə kiə́ŋ kɛ́ kíyíím kídə́əŋ a mbálámɔɛn kɛ́lɛɛ́ ə́?

³⁶Mɔɔd ɔdɛɔ́gɔ ogaag isuŋ a kɛ́lɛ́. Wiiyíən anɛ́ɛ́n ntɛ́m yaaŋan a kaadɛ. Podɛnjɛ́ɛ́lɛ kɛbán na kɛbán kɛ́ ponjaŋɛnɛɛ́ asóngɛ.

³⁷Puə́gumin pɔɔd póonɛ əgiim na pɔ́lɛ́ kɔmɔɛ́d lɛ́ pə́diíbən a yoog yəəs ɛ pɛfɔny yɛ́ tɛlɛɛ́ ɔgɔɔ́sɔ́gɔlɔn a yɛ́lɛ́, ɔmbɔ́ tɛn niiŋ nɛ́ táán yəəs yɛ́ ɔʼkɛ́ɛd, pɔ́sɔyɔn kɔbɛ́.

³⁸Pa Təmiʼtiliyúus na pɔsɔ́g pɔ́ɔ́bɔn pá uʼtun pámaʼkɛɛn na kɛbán na mɔɔd, palóoyaʼ pálɛ kɔ, mɔɔ́s tɛn má koboóyɔmɛ málɛ kɔ. Pɛ́ɛn amosɔ́mɛn kɔ!

³⁹Ɔmbɔ́ pəŋi tɛn pomaʼkɛɛn na kɛbán, póɛn kɔ, póɛn əsəə. Kɛ́ɔgɔɔ́yɔm kɔ moááŋ a udi ó pɔɔd pá pógódíí lɛ́ pɔ́yɔmɛ pɛbán.

⁴⁰Kɛ́lɛ lɛ́, a nɛágɔnyɛd niə́s nɛ́ɛnɛ nɛ́ tɛágɔ́nyɛ́dɛ́nɛ́ɛ́ naánɛ́, palaamɛʼ pálɛ pə́gusəə lɛ́ tiə́də́ə́míni oʼto na pɔ́lɛ́. Tɛdɛɔ́gɔɔŋ unuʼ úgusəə kɛbán na kɛbán agaánɔna.» Əgín tɛn ná yiísə́ə́ náan, aáság kɛɛlɛ lɛ́ pɔɔd págólɛgɛd.