Read Yambeta Pigólí 2 Bible Online

Pigólí 2 - Yambeta bible

Pigólí 2

¹Ná wɔɔ́s ó Pantɛʼkóod[6] úyíím əgiig, pəə́liʼtiniʼ piim páyágɔnyɛdɛn kɛnɔ kímuʼ.

²Pálɛ anɛ́ɛ́n kɔ ɔ, pááság koob yoom ɛgo yə́əgiim ísuu a mɔɛn na nɛŋo a unuʼ wɔnɔ́ kigud, piŋ piŋ piŋ. Yoom ɛgo yɛ́ɛy yááság kuyə́əg kɔ a yoog yɛ́ páyɛ́ɛ a yɛ́lɛ́ síɛ́ɛ́d.

³Pɛ́ɛ́dála yə́əgiim ísuu wɔnɔ́ noloo nó yug, nómásááláá, noáság koboláʼtɛman pɔ́lɛ́ piim.

⁴Uŋun wó Ufúlúʼtú úyíbuyə́ə́g pɔ́lɛ́ piim a ntɛ́m síɛ́ɛ́d, pə́ə́bə́ə́ kosɔyɔ əʼkíí yə́mmú. Na wɛ ogo, wɔnɔ́ ná Uŋun wóow ómágoyɛ́ʼkɛn lɛ́ ɔ́sɔyɔ.

⁵Kɔ áay wɔɔ́s ogo wóow a Yolósalɛm, Yúdɛn yɛ́ ɛyáyɛ́ʼkɛnɛn a pɛbán pɛ́ kəə́liʼtini iyíímən ngíŋ. Pə́yíím pádɛ́ɛman a əʼkúu yɛ́ a mɔnɔŋ miim má a nsí.

⁶Ná páyóób nkə kɛ́ɛg kɛ́ kɛ́yásánɛ́ɛ́, pə́yíím əgəə́yii kiʼtúú kilúd, kɛnɔ kɛ́ pɔɔ́n pá maʼtom páyɛ́ɛ. Píígə́g kugə́gə́ə́n lɛ́ pɔ́lɛ́ piim pá páyɛ́ɛ kɔ, ɛ́nɛ́ mɔɔd ayɛ́ɛ agoob pəə́liʼtiniʼ pɔ́ɔsɔyɔ a tɔgɛ́ɛ́ tuə́ŋ tó nyɔ́lɛ́nyɔ́amɔɛ́d.

⁷Nnuʼ yɔɔbɔn yɛɛ́lɔ́b ngás, pə́əgəə́wúunəni, pɔ́nɔ́ əə: «Pɔɔd póob pá pálɛɛ́ agosɔyɔ əə, adɛ́ pɔɔ́n pá Kalilə́ə aa pálɛɛ́ náan pɔ́lɛ́ na pɔ́lɛ́ ə́!

⁸Tuə́ anɛ́ɛ́n áa kɛ́lɛɛ́ lɛ́ pɔ́ɔsɔyɔ ɛ́nɛ́ mɔɔd aáboyóób a nigíí niə́ŋ nɛmɔɛ́d ə́, nigíí nɛ́ pɛmbáa pə́ə́ŋ ə́?

⁹Áanɛ a ondáŋ wə́ə́s, tɛlɛ lɛ́: Na pɔsɔ́g pá pə́míim pádɛ́ɛmɛn a Páadɛ, na pá pálɛɛ́ əgiim a Mədíi, na pá a Ɛláam. Ungim alɛ agoboyóób a nigíí niə́ŋ, na pá pə́yíím pádɛ́ɛman a Məsoʼpoʼtəmíi kɛ́, na pá a Siudə́ə, na pɔsɔ́g pá a Kaʼpadóos, na pá pə́yíím pádɛ́ɛmɛn a Pɔ́ɔŋ, [7] na pá a Əsíi,

¹⁰na pɔsɔ́g pá a Filisíi, na pá a Pənfilíi, na pá pə́míim pádɛ́ɛman a Əsíibtə, na pá pálɛɛ́ əgiim kə́gə́ən a Libíi yɛ́ ɛlɛɛ́ ndúmiʼ na Silɛ́ɛn, na pá pə́míim pádɛ́ɛmɛn a Ɔlɔ́ma, ungim agá alɛ agoboyóób pɔ́ɔsɔyɔ a nigíí niə́ŋ.

¹¹Tɛlɛ kɔ áanɛ lɛ́ na pibíəniʼ pɛ́ Yúdɛn kɛ́ na pá páʼkosɔ́dɛ́ɛ́ a kəə́liʼtiniʼ kó Yúdɛn kɛ́, na pɔɔ́n pá Kɛlɛ́ɛʼtɛ kɛ́, na pá Aláab kɛ́. Ungim alɛ agoob a nigíí niə́ŋ wɔnɔ́ ná pálɛɛ́ alɔɛgɛ ndam ɛ kɛbán yɛ́ɛnɛ yɛ́ Táán amɛ́ɛ́lánɛ.»

¹²Nsiŋ iyíbulióŋin pɔ́lɛ́ piim a oʼto. Páyɛ́ɛ əgəə́wúunəni pɔ́nɔ́ əə: «Wóonɛ ombod o! Kióloodi aa nyóon lɛ́ nkə ə́?»

¹³Náa, pə́mmú páyɛ́ɛ agá agonyɛɛŋanɛ pəə́liʼtiniʼ, pɔ́nɔ́: «Əə́əy, pálɛ paŋwáŋáán maloʼ oo!»

¹⁴Píɛ yɛɛ́dɛ́lɛm kidə́níʼtən na pɔsɔ́g pɔɔ́n pá maʼtom póʼkáag pá pówád na úmmuʼ agosɔyɔ. Yɛɛ́dɛánɛ nɛŋo a mɔɛn na kiʼtúú kɛ́ pɔɔd kɛ́ɛg kɛ́ kɛ́yɛ́ɛ kɔ, ɔnɔ́: «Pəŋi Yúdɛn, na pəŋi tɛn piim pá puimíníí ələndin a Yolósalɛm! Támáan ntóɛŋ, pólɛŋ koob nkə kɛ́ ndábodɛ́anɛ.

¹⁵Pɔɔd póonɛ pá pálɛɛ́ náanɛ, pɔ́dɛɔ́gɔ paŋwáŋáán maloʼ wɔnɔ́ ná polɛɛ́ afɛga, ndóo. Koany kúligi agaáyɛnɛ kaáyɛ́nɛán, mangɛn máʼtáan na mə́niʼ aa móonɛ súg.

¹⁶Nkə kɛ́ Táán yiísə́ə́ kɔ́gɔ́ɔg kalaʼ a unuʼ ó Sowɛ́ɛl, ɔndɔɛgɛʼ pɛbán wəəŋ aa kɛ́ɛnɛ kɛ́máás.» Yiísə́ə́ lɛ́:

¹⁷«Táán ɔnɔ́: “Táá nkə kɛ́ ndɛ́ɛ́ kɛɛlɛɛ́ a mədúg má a nɛman aa kɛ́ɛnɛ. Ndɛ́ɛ́ kusuginin pɔɔd piim a nsí Uŋun wáam. Pɔɔ́n pááŋan pá panɔ́mɛɛd na pá pagɛ́ɛd pálɛ́ɛ́ kɛɛn palɔɛgɛʼ pɛbán páam. Ndɛ́ɛ́ kosɔyɔ a pɛlɛm na pɔɔ́n pááŋan pá páʼkogónɛ́ɛ́. Ndɛ́ɛ́ kosɔyɔ tɛn náan na pá pə́ʼkulunií.

¹⁸Ɛɛ́ɛ, a mədúg móom, ndɛ́ɛ́ kusuginin Uŋun wáam na pəgudin páam pá panɔ́mɛɛd na pá pagɛ́ɛd. Pálɛ́ɛ́ kɛɛn palɔɛgɛʼ pɛbán páam.

¹⁹Ndɛ́ɛ́ kɛɛlɛ ndam ɛ pɛbán kɔ a mɔɛn, a mbálámɔɛn, njɛɛlɛ tɛn piə́wúunəniʼ pɛ́ pɛbán áanɛ a nsí. Maŋɔ́ málɛ́ɛ́ kəə́sub, yug ɛ́lɛ́ɛ́ kɛɛn kɔ, na ɛ́fɔlɛ́ ɛ́ moógin.

²⁰Wɔɔ́s ólɛ́ɛ́ kəə́súʼkin wɔnɔ́ mbin. Wəə́ ólɛ́ɛ́ kowɛ́ɛ wɔnɔ́ maŋɔ́. Pɛbán pɛ́ɛb piim pɛ́lɛ́ɛ́ kaáyɛ́ɛlɛ ná wɔɔ́s ó Sə́dúk kiim údínjíig. Wɔɔ́s wó oʼkóʼkóón! Wɔɔ́s ó nugəm!

²¹Áay anɛ́ɛ́n, ungim nyɔ́ alɛ́ɛ́ kodɔ́ŋɔnɛɛ́ Sə́dúk, alɛ́ɛ́ kɔɔy[8]”

²²«Pəŋi pɔɔ́n pá Ɛ́sɛlayɛl, óʼtánaan nkə kɛ́ɛnɛ kɛ́ ndáabodɛ́anɛ. Yə́sus, mɔɔ́n o Násalɛd ayɛ́ɛ mɔɔd nyɔ́ poálɛŋ lɛ́ Táán alɛ na nyɔ́lɛ́. Táán yiílóódi náan a toɛn tó ayɛ́moyɛ́ʼkɛn toɛn tó kɛɛlɛ mangán, na pɛálɛ́ʼkán, na piə́wúunəniʼ pɛ́ pɛbán a kɛgaágadɛ kɛáŋan. Pəŋibáamɔɛ́d poálɛŋ náan.

²³Páyɛ́bolɛ́gɛn nyɔ́lɛ́, əgín wɔnɔ́ ná Táán yɛɛ́fɛ́g kɔ nyɔ́lɛ́nyɔ́əsíŋ. Pəŋi poyɛ́moyóón, pəŋi pá puyímuudí a ɔmbɔg á pá pɔ́dɛɔ́gɔ Yúdɛn lɛ́ pámoóbaŋan a ɔmbásá.

²⁴Náa, Táán ayɛ́moyóndɛ́gɛ, amáamoyááŋɛn a ntɔ́b ɛ kugu lɛ́ kugu kódɛʼkɛ́ɛ na toɛn tó komoófanya.»

²⁵Kɛ́lɛ lɛ́, kɛbán kiə́ŋ áa Tə́fid yiísə́ə́ ɔnɔ́: «Njɛ́ɛ agodɛ́ʼtɛg Sə́dúk pɛnɛŋ piim a udi wáam lɛ́ alɛ na mɛ a ɛbá, agɛɛlɛ lɛ́ ntɛʼtámmána yoom na yoom.

²⁶Kólɛ́ aa tɔnyɔ́g túinjə́gíníí a ɔʼtɛ́m síɛ́ɛ́d, unuʼ wáam ólɛ əgín pɛlɛ́ɛ́ pɛ́ tɔnyɔ́g kudúmə. Mɛɛ́nyɔ́amɔɛ́d a pumog póam ndɛ́ɛ́ kooyig a wiiy, ndáamɛna pɛda

²⁷lɛ́ wɛ Táán odɛndɛ́ɛ́ kiʼti a nigúu nɛ́ piíd, udiə́líʼtíníí tɛn lɛ́ mɛ uʼkudin waaŋ mbɔnɔ a kəəniʼ, mɛ nyɔ́ ndɛɛ́ agɛɛlɛ nkə kɛ́ kíəgugə́mmi.

²⁸Uyíndoodi ngə́ yɛ́ yəə́gisúid a ɔlaa. Olɛ́ɛ́ kɛɛlɛ lɛ́ nyɛ́ɛn na tɔnyɔ́g síɛ́ɛ́d lɛ́ olɛ́ɛ́ kɛɛn na mɛ[9]»

²⁹«Pomóŋŋí, ndɛ lɛ́ mpomoáŋɛnɛ moááŋ, kɛbán kɛ́ɛg kɛ́ mbáa yəəs Tə́fid: Yiígú, pə́mə́muúní, kəəniʼ kə́ə́ŋ kálɛ kɔ na pa nɛ́gɔŋ yɛ́ɛnɛ kɛ́ áanɛ na pəsi.

³⁰Náa, ayɛ́ɛ ɔndɔɛgɛʼ pɛbán o Táán. Yɛɛ́lɛŋɛn lɛ́ Táán ayɛ́mogágɛn, amáyaácɛm lɛ́ alɛ́ɛ́ kolónɛ a kibúúm kiə́ŋ, mɔɔ́n nyɔ́ alɛ́ɛ́ kobágɛ́ɛ́ nkúm a oʼkɔɔ wə́ə́ŋ[10]

³¹Tə́fid yɛɛ́yáŋ adála kɔ kalaʼ lɛ́ Məsíi alɛ́ɛ́ koóndɛg. A kidíídí kiə́ŋ áa yiísə́ə́ lɛ́: “Pə́diʼkə́yəmuudi lɛ́ ɔ́lɔb a nigúu nɛ́ piíd. Pə́diʼkə́əmuudi lɛ́ ɔ́bɔnɔ a kəəniʼ.” »

³²Píɛ ayɛ́ɛ́n na tɔgɛ́ɛ́ yuudi, ɔnɔ́: «Yə́sus ogo nyóon, Táán ayɛ́moyóndɛ́gɛ, pəsi piim póonɛ tɛmámoodála na əngis yə́ə́s, alɛ ongóm.

³³Yɛɛ́bág a mɔɛn, amɛ́ɛn ələndin a ombɔg ó nɛnom ó Táán. Uŋun wó Ufúlúʼtú wó Táán Sɛ yɛɛ́gágɛn pɔɔd, ayɛ́mɔyɛ́ʼkɛn wólɛ́, nyɔ́lɛ́ əmə́əbiísuginin wólɛ́ na pəsi. Kɛ́lɛ́ kɛ́go aa polɛɛ́ agodála nɛ́gɔŋ, poágoob.

³⁴Kɛ́lɛ lɛ́, Tə́fid nyɔ́lɛ́nyɔ́amɔɛ́d adɛʼkáabág kɔ́gɔ́ɔg a mɔɛn. Náa, yiísə́ə́ ɔnɔ́: “Sə́dúk Táán aádɛánɛ na Sə́dúk waam ɔnɔ́: Wɛ, ləndin áanɛ a ombɔg wáam ó nɛnom

³⁵agɛɛn əgiig əgín wɔnɔ́ ná ndɛ́ɛ́ kɛɛlɛɛ́ lɛ́ úgíʼtən pabɛnɛn pááŋ na ambaan[11]”

³⁶«Pəŋi pɔɔ́n pá Ɛ́sɛlayɛl, pugóódi lɛ́ pólɛŋ anɛ́ɛ́n kɔŋɛʼ kɔŋɛʼ lɛ́, Yə́sus nyóon nyɔ́ poɛ́báŋan a ɔmbásá, nyɔ́lɛ́ ogo aa Táán ayɛ́ɛ́lɛ lɛ́ yɛ́ɛn Sə́dúk, áyɛɛn Məsíi!»

³⁷Tɔgɛ́ɛ́ tó Píɛ tóod toɛ́sɔ́d pɔɔd pá páyóób tólɛ́ a kúfuʼ, pááság kumuŋíən na nyɔ́lɛ́, na pɔɔ́n pá maʼtom pə́mmú póob pɔ́nɔ́ əə: «Pomóŋŋí, tuə́ áa tíɛlɛɛ́ anɛ́ɛ́n ə́?»

³⁸Píɛ əyíbuyúlísíni ɔnɔ́ na pɔ́lɛ́: «Pógasɛ ɔlaa wááŋan, ɛ́nɛ́ mɔɔd ə́siəd ɔsɔgɛn a niiŋ nɛ́ Yə́sus Kilíʼtus ná Táán ə́buúlisin mabɛ́ mááŋan, áaboyɛ́ʼkɛn Uŋun wó Ufúlúʼtú.

³⁹Nkə kɛ́ Táán yɛɛ́gágɛn pɔɔd kɛ́lɛ tɛn kɛáŋan na pɔɔ́n pááŋan na ungim nyɔ́ alɛɛ́ laálá. Ungim nyɔ́ Sə́dúk Táán yəəs alɛ́ɛ́ kodɔ́ŋɔnɛɛ́.»

⁴⁰Píɛ ayɛ́bodɛánánɛ pɛbán pímmú piíŋ agoboónasɛ nkó. Ayɛ́ɛ agobodɛ́ananɛ ɔnɔ́: «Tɛ́dáan ɔsɛg wóow wó ódɛágɛɛlɛɛ́ yoom ɛ́laŋ na ɛ́laŋ, agɛɛlɛ lɛ́ podɛnjɔ́ɔ́ŋ ntɔ́b wɔnɔ́ yɛ́ pɔ́lɛ́ pálɛ́ɛ́ kɔɔ́ŋɛ́ɛ́.»

⁴¹Piíŋ pə́yə́líʼtíníí tɔgɛ́ɛ́ tó Píɛ, pə́ə́siə́d ɔsɔgɛn. Yoom wɔnɔ́ tɔ́ɔ́sɛn ɛ pɔɔd ɛ́dáád ɛyáyáábɛ́gɛ́ɛ́ a ondáŋ ó pəə́liʼtiniʼ wɔɔ́s wóow.

⁴²Pəə́liʼtiniʼ piim pə́yə́yíísin a nkə kɛ́ pɔɔ́n pá maʼtom páyɛ́ɛ agaaʼkananɛ. Páyɛ́ɛ alaa a nnyɔ́ŋánán wɔnɔ́ pɔɔ́n pá niŋŋí, páanɛ́ɛnɛ ondáŋ, pɔ́ɔgɔɔ́sɔ́gɔlɔn Táán ondáŋ.

⁴³Ungim ayɛ́ɛ agodammana Táán lɛ́ pɔɔ́n pá maʼtom páyɛ́ɛ agɛɛlanɛ mangán na piə́wúunəniʼ pɛ́ pɛbán a toɛn tuə́ŋ.

⁴⁴Ungim nyɔ́ ayɛ́ɛ aándɛ ungəə́liʼtiniʼ, ayɛ́ɛ unuʼ úmmuʼ na pɔsɔ́g. Nyɔ́ ogódíí yoom, ɛ́lɛ a mɔɔd ungim.

⁴⁵Páyɛ́ɛ pɛɛlanɛ lɛ́ wɛ nyɔ́ olɛɛ́ na kɛsom kɛ́ nsí, ɔmbɔ́ nkə kiim kɛ́ ugódíí, waalɛg. Mɔɔnɛ́ má wɔɔ́gɔɔŋ kɔ, wíim na mɔ́lɛ́ agɛɛlɛ lɛ́ páaban ungim, na wɛ ogo páagoyɛ́ʼkɛn nkə kɛ́ kɛásɛʼtan na wɛ agɛɛlɛ lɛ́ wɔ́ɔŋ nkə kɛ́ kɛ́mágosógɛn.

⁴⁶Pádɛʼkɛ́ɛ əsug kɛɛn ɔgɔɔ́sɔ́gɔlɔn Táán mɔɔ́s miim a Tɛ́mpɛl, unuʼ wɔ́ɔ́bɔn úmmuʼ. Páyɛ́ɛ panɛ́ɛnɛ a toádɛʼ toɔ́bɔn ondáŋ, na tɔnyɔ́g pɔ́lɛ́ piim. Nyummú ayɛ́ɛ ədiə́gídə́níí a igog.

⁴⁷Páyɛ́ɛ agonyáadɛ Táán, ungim ayɛ́ɛ na tɔnyɔ́g na pɔ́lɛ́. Náan tɛn aa mɔɔ́s miim, Sə́dúk ayɛ́ɛ agɛɛlɛ lɛ́ ondáŋ wɔ́ɔ́bɔn óyam, pɔɔd pá pawa pá ɔmɔ́ɔ́yɛ páagaásáʼtanɛ.