Read Yambeta Pigólí 20 Bible Online

Pigólí 20 - Yambeta bible

Pigólí 20

¹Ná inyuunyugiʼ yɛ́ɛy ɛ́yɛ́ɛ yáʼkoman, Póol yɛɛ́gónyɛd paaʼkan pá Sə́dúk, amáboyɛ́ʼkɛ́nan ndə́b lɛ́ pə́disúúli ɔmbɔg, aáság koboyáábɛ́g agɛɛn a Masɛdowáan.

²Yɛɛ́dáŋána kɔ́gɔ́ɔg a moyaa mó əʼkúu muim. Ayɛ́ɛ agɛɛ́ʼkɛnan ndə́b kɛ́fɔlɛ́ na paaʼkan kɔ́gɔ́ɔg, aáboónasɛ nkó. Yɛɛ́dáŋána amɛ́ɛn alon a nigúu nɛ́ Pagɛlɛ́ɛg.

³Ayɛ́ɛ́lɛ kɔ məə́ mádáád. Ayaʼkanyɔ́ŋɛn lɛ́ nyɔ́lɛ́ yɛ́ɛn əsiəd siʼtíməʼ agɛɛn a Silíi, aáság koob lɛ́ Yúdɛn yaáʼkomoyɔ́dɔɔgɛnɛ agomoyóon. Náa ɔnɔ́ nyɔ́lɛ́ əguúlini agá yɛ́ a Masɛdowáan.

⁴Ngab ɛ pɔɔd yimmú ɛyɛ́nánan ondáŋ na nyɔ́lɛ́. Págo pá páyɛ́ɛ́n ondáŋ na nyɔ́lɛ́ páyɛ́ɛ lɛ́: Na Sopaʼtolóos, mɔɔ́n ó Pilúus nyɔ́ a pálɛ́ɛg ɛ Pələ́ə, na pa Alɛstáag pɔ́lɛ́ na Səʼkúndus, pɔɔd pá a Təsaloníig, na Kayúus nyɔ́ a Tələbə́ə, na pa Timoʼtə́ə pɔ́lɛ́ na Tisíig, na Tolofíim, pɔɔd pá a kɛsom kɛ́ nsí kɛ́ Əsíi.

⁵Pɔ́lɛ́ póob piim pɛ́ɛ́yáŋ agɛɛn a udi wə́ə́s agɛɛn abɛɛboŋ a Tolówa.

⁶Náa pəsi tiídíin tisiəd siʼtíməʼ a ngim ɛ wɔɔ́n wó páyɛ́ɛ panɛ́alɛla pɛlɛ́ɛd pɛ́ páánám pádɛág toan tó kunudi umbúb, tɛáság kodɛ́ɛmɛn a pálɛ́ɛg ɛ Filíib agɛɛn aboóboan pɔ́lɛ́ a Tolówa. Tɛyɛ́ɛ́lɛ mədúg máʼtáan agɛɛlɛ lɛ́ tíɛn əgiig kɔ kɛnɔ kɛ́ páyɛ́ɛ. Tɛyɛ́ɛ́lɛ kɔ́gɔ́ɔg tɛn sɔ́ndɛʼ mmuʼ.

⁷Wɔɔ́s wúmmú, tɛyágɔnyɛdɛn na niób agonɛ́ɛnɛ ondáŋ wɔnɔ́ ná Sə́dúk əyíbilóódi. Wɔɔ́s ogo wóow óyɛ́ɛ wɔɔ́s ó na oʼto na oʼto ó sɔ́ndɛʼ[88] Póol yɛɛ́sɔ́yɔ na pəə́liʼtiniʼ wɔɔ́s wóow súʼtə́ə́ a tóɛf yɛ udúg lɛ́ a koany kaáyɛnɛ, yiígóodi lɛ́ yɛ́ɛn.

⁸Kɔ a nɛsom nɛ́ yoog nɛ́ a mɔɛn nɛ́ tɛyágɔnyɛdɛn, pəbiʼtíləʼ páyɛ́ɛ kɔ piíŋ.

⁹Ɔnyɔmmɔ́n o moóngaa nyummú, niiŋ lɛ́ Əʼtíig, ayɛ́ɛ undəndínə́ə́n a wúnduʼ a mɔɛn. Wɔnɔ́ ná Póol ayóómɛ tɔgɛ́ɛ́ tuə́ŋ kɛ́fɔlɛ́, ɛnɔ yááság kusiəd moóngaa nyóon. Ɛ́yɛ́moyɛ́gɛ́lɛ́dánɛ nkó a ombod wúmmú, aáság kiim yə́ə́lis kɔ́gɔ́ɔg a moʼtáas módáád a mɔɛn, əə́də́əŋ a nsí. Ná páyɛ́ɛ́n lɛ́ pə́mudə́əmini, pɛ́ɛ́bóan əə́ʼkugu.

¹⁰Póol aáság kiim ə́suu, aádam ábodɛm, aáság kumuúsiəd a ɔmbɔg yə́ə́ŋ, náa ɔnɔ́ na pɔɔd pá páyɛ́ɛ kɔ: «Wiiyíən ntɛ́m yaaŋan a kaadɛ aá! Alɛ ongóm!»

¹¹Póol əyíʼkíni kobag a noádɛʼ, aábɛ́ŋa pɛlɛ́ɛd, páánɛ́. Yɛɛ́sɔ́yɔ kə́mmú na pɔ́lɛ́ súʼtə́ə́ a pɛbáŋɛn pɛ́ koany. Áay anɛ́ɛ́n áa yiísiə́d ngə́ agɛɛn.

¹²A moóngaa ɔnyɔmmɔ́n nyóon, pə́yímusíəd, pə́múúli na nyɔ́lɛ́ ongóm. Kɛbán kɛ́ɛg kɛ́yɛ́ɛ́lɛ lɛ́ ɔʼtɛ́m ó mɔɔd ungim úwiiyi.

¹³Pəsi tiísiə́d siʼtíməʼ yɛ́ ɛyɛ́ɛ agɛɛn a Asóos, tɛáyaŋ agɛɛn əgiig kɔ na nyɔ́lɛ́. Kɛ́lɛ lɛ́ Póol nyɔ́lɛ́ yiísə́ə́ lɛ́ aasan yɛ́ a ngə́ yɛ ambaan ná tɛ́dam tímuúsiəd kɔ́gɔ́ɔg.

¹⁴Náan aa nyɔ́lɛ́ əyíím abɛɛ́boan kɔ́gɔ́ɔg, timə́musíəd a siʼtíməʼ agɛɛn a Mɛʼtɛlɛ́ɛn.

¹⁵Tiɛ́dɛ́ɛ́mɛn tɛn kɔ áay əgín a siʼtíməʼ, tɛmɛ́ɛn alon a koany kaáyɛnɛ a ɛbá ɛ́ məní yɛ́ pálɛ́ɛg ɛ Kío. A koany tɛn kúmmú, tɛmɛ́ɛn alon a Sámos. Wɔɔ́s tɛn wó wíyə́ə́n wóow, tɛyɛ́ɛ́n, tɛádɛ́lɛm a Tologɛlɛyɔ́ɔŋ sɔɔŋ, tɛádɛ́ɛ́mɛn tɛn kɔ tɛáság kɛɛn agaab a ɛbá ɛ́ noom, a pálɛ́ɛg ɛ Milɛ́ɛ.

¹⁶Kɛ́lɛ lɛ́, Póol yiísə́ə́ lɛ́ nyɔ́lɛ́ adɛádɛ́lɛm a Ɛfɛ́ɛs, adɛányɔ́ŋɛn kosánɛ mədúg miíŋ a Əsíi. Ayɛ́ɛ agobɔgɔnɔn lɛ́ yíig a Yolósalɛm wɔɔ́s ó Pantɛʼkóod.[89]

¹⁷Ná tɛyɛ́ɛ́n əgiig a Milɛ́ɛ, Póol yɛɛ́dóm pɔɔd lɛ́ pɛ́ɛn adɛ́anɛ na padɛ́lɛm yuudi pá a ɛgɔny ɛ́ pəə́liʼtiniʼ yɛ́ a Ɛfɛ́ɛs lɛ́ píim.

¹⁸Ná pə́yíím əgiig, yiísə́ə́ ɔnɔ́ na pɔ́lɛ́: «Poálɛŋ kɔŋɛʼ kɔŋɛʼ wɔnɔ́ ná nyɛɛ́láá na pəŋi a kɛnɛŋ kiim kɛ́ nyɛɛ́sánɛ káag, kəə́bə́ə́ a wɔɔ́s wó njíím əgiig a Əsíi, ngɔ́ɔ́?

¹⁹Njə́súlíí nkó a nsí əgugudin Sə́dúk. Nyɛɛ́lɛ́ɛ́, mbáyaánɛ tɛn lɛ́ Yúdɛn ɛyɛ́ɛ agɛnyɛɛlɛnɛ modɔɔgɛʼ lɛ́ ná píʼkumin.

²⁰Poálɛŋ tɛn lɛ́ ntɛʼkáaboyɔ́ɔsɛgɛn yoom ímuʼ na ímuʼ yɛ́ ɛ́yɛ́ɛ ɛ́goboɛ́bɛ. Náa, a toádɛʼ toáŋan na a pɛdom kɛ́, njɛ́ɛ agoboólɔɛgɛnɛ, ndáaboyáʼkananɛ nkə kiim kɛ́ kɛ́adɛ́ʼtɛg ɔlaa ó Sə́dúk.

²¹Nyɛɛ́dɔ́ŋɔn pɔɔ́n pá Yúdɛn na pɛnɔɔŋɛʼ pɛ́ pɛ́dɛɔ́gɔ Yúdɛn kɛ́ lɛ́ págasɛ ɔlaa wɔ́ɔ́bɔn, pímbuúlini ná Táán alɛɛ́, páág oʼto na Sə́dúk wəəs Yə́sus.

²²Náa, mɛ mbándagɛɛn nɛ́gɔŋ a Yolósalɛm lɛ́ Uŋun wó Ufúlúʼtú ólɛ əgiʼtíʼkəni lɛ́ nyɛ́ɛn kɔ. Ntɛálɛŋ nkə kɛ́ kɛ́agɛmboŋ kɔ́gɔ́ɔg.

²³Yoom ɛ́lɛ kɔ ímuʼ yɛ́ mbálɛŋ. Ɛ́lɛ lɛ́, Uŋun wó Ufúlúʼtú ólɛ agɛʼtɛ́anɛ lɛ́, pálɛ́ɛg ngim yɛ́ ndágɛɛn kɔ, pə́əgiʼkumin agɛnjaág a yoog yɛ njaan, páyɛnnɛ́ɛyɛ ntɔ́b.

²⁴Náa a mɛ, ɔlaa wáam ódɛɔ́gɔ yoom a əngis yáam. Nkə kɛ́ ndɛɛ́ anyɔ́ŋɛn kɛ́lɛ əgín lɛ́ nyɛ́ɛlɛ oʼtom wó Sə́dúk Yə́sus ayɛ́nyɛɛ́ʼkɛn wɔnɔ́ ná kíəgəə́yúunə lɛ́ nyɛ́ɛlɛ wólɛ́, ndɛ nyɛɛn agaádɛ. Oʼtom ogo wóow ólɛ lɛ́: Ndɔɛgɛnɛ pɔɔd Tɔsɔm Tólaŋ tó túəsəə lɛ́ Táán amɛ́ɛ́lɛ́nɛ pɔɔd kɔŋɛʼ.

²⁵«A noá na pəŋi piim pá njɛ́bolɔɛ́gɛ́nɛ Tɔsɔm Tólaŋ tó a Nɛlaamɛʼ nɛ́ Táán, mbálɛŋ lɛ́ Əgəə́bə́ə nɛ́gɔŋ yɛ́ɛnɛ, pudiə́giʼkini kɛʼtála kə́mmú.

²⁶Kólɛ́ aa ndɛɛ́ agobodɛ́anɛ naánɛ́ yɛ́ɛnɛ nyɔʼkɔ́: Úmmuʼ a ondáŋ wááŋan əməʼkulíoŋ, kɛ́mámodɛ́ʼtɛg nyɔ́lɛ́nyɔ́amɔɛ́d, ntɛɔ́gɔ kɔ na ɛgom.

²⁷Kɛ́lɛ lɛ́, njɛ́bodɛánɛ nkə kiim kɛ́ Táán alɛɛ́ anyɔ́ŋɛn, ntɛʼkáaboyɔ́ɔsɛgɛn yoom na yoom ɔmbɔ́ ímuʼ.

²⁸A oʼto wóow aa kɛ́lɛɛ́ lɛ́ púə́nuŋ pəŋibáamɔɛ́d, póolɛŋ tɛn kunuŋ ubid ó mudúg muim mó Uŋun wó Ufúlúʼtú úyíbudə́nígi lɛ́ púnuŋ. Pólɛŋ kugumin kiʼtúú kɛ́ pəə́liʼtiniʼ Yə́sus pá Táán nyɔ́lɛ́nyɔ́amɔɛ́d ayááŋɛn a kugu kó Mɔɔ́n yiígú.

²⁹«Mbálɛŋ mɛɛ́nyɔ́amɔɛ́d lɛ́ əgín ná ndáaman kudum ngim agɛɛn, pɔɔd pá pálɛɛ́ wɔnɔ́ pəŋəŋúug pə́əgiim ɔsɔd a kɛgaágadɛ kɛáŋan. Pádɛndɛ́ɛ́ kusig kiʼtúú kɛ́ mudúg.

³⁰Ɔmbɔ́ a ondáŋ wááŋan ó pəŋibáamɔɛ́d, ngab yimmú ɛlɛ́ɛ́ kɛɛn kɔ yɛ́ ɛlɛ́ɛ́ kosɔyɔɔ́ pɛnyaʼ agɛɛlɛ lɛ́ pə́ə́súidin paaʼkan pə́mmú a ngim yɔɔbɔn.

³¹Ondígəən anɛ́ɛ́n ɛnɔ, poáyɔ́ɔ́ŋɛ wɔnɔ́ ná pɛnɛŋ piim, pɛag náan pɛ́dáád, njɛ́ɛ əgulə́bən ɛ́nɛ́ mɔɔd a ondáŋ wááŋan na udúg wɔnɔ́ na wɔɔ́s, ntɛdɔm, pɛlɛɛ na mɛ a əngis.

³²Nɛ́gɔŋ yɛ́ɛnɛ mbáboyɛ́ʼkɛn a ɔmbɔg á Táán na a kɔŋɛʼ kuə́ŋ kó kólɛɛ́ a tɔgɛ́ɛ́ tuə́ŋ. Nyɔ́lɛ́ aa alɛɛ́ na toɛn tó koboyɛ́ɛlɛ lɛ́ pógon a kəə́liʼtiniʼ, áaboyɛ́ʼkɛn tugúm tó yɛɛ́ngɛ́gɛ́nɛ́ɛ́ a ungim nyɔ́ alɛɛ́ wəəŋ.

³³«Ntɛʼkáagaag əngis a mɔɔnɛ́ má mɔɔd wɔɔ́s, ɔmbɔ́ tɛn a kóol yəəŋ, ɔmbɔ́ a kilə́ə́ kiə́ŋ.

³⁴Poálɛŋ pəŋibáamɔɛ́d lɛ́ nyiígúd na ɔmbɔg yáam agɛɛlɛ lɛ́ nyɔ́ɔŋ nkə kɛ́ kɛ́yɛ́ɛ əgibiyúunən lɛ́ na mɛ, na pɔsɔ́sɔ́g páam pá pigólí.

³⁵A yoom yiim, njíbulóódi lɛ́ náan aádɛ́ɛ́ kugud agɛɛlɛ lɛ́ tɛ́ɔŋ nkə kɛ́ tɛágɛɛ́bɛ pɔsɔ́g pá póʼkódií, tɛ́yaáyɔ́ɔ́ŋɛ tɔgɛ́ɛ́ tó Sə́dúk wəəs Yə́sus yɛɛ́sɔ́yɔ nyɔ́lɛ́nyɔ́amɔɛ́d na unuʼ wə́ə́ŋ, ɔnɔ́: “Mɔɔd nyɔ́ alɛɛ́ agɛɛ́ʼkɛn, alɛ na tɔnyɔ́g kɛ́fɔlɛ́ agaáyɛn nyɔ́ pámɛ́ʼkɛn.” »

³⁶Ná Póol yɛɛ́mán kosɔyɔ na pɔɔd póob, aáság kudum əndu a nsí ɔgɔɔ́sɔ́gɔlɔn Táán ondáŋ na pɔ́lɛ́ piim.

³⁷Ungim yiídə́əŋ na ɔndɛɛ, pə́ə́də́ə́ŋə́nən Póol a nkó əgumuyə́súʼkənən, pááság kaábɛ́ganan.

³⁸Yoom yɛ́ ɛ́yɛ́ɛ́lɛ lɛ́ ɔʼtɛ́m wɔ́ɔ́bɔn ólaŋ kogany ɛ́yɛ́ɛ nkə kɛ́ yiísə́ə́ ɔnɔ́: «Pudiə́giʼkini kɛʼtála kə́mmú.» Pááság kodɛ́ɛmɛn anɛ́ɛ́n agɛɛn əmuudi lɛ́ ə́siəd siʼtíməʼ.