Read Yambeta Pigólí 21 Bible Online

Pigólí 21 - Yambeta bible

Pigólí 21

¹A ngim yɛ́ɛy ná tɛyɛ́ɛ tɛáʼkaádanan na pɔ́lɛ́, pəsi tiísiə́d siʼtíməʼ tɛáság kɛɛn əgín tə́lə́lə́lə́, tɛmɛ́ɛn alon a Kóos. A koany kaáyɛnɛ, tɛádɛ́ɛ́mɛn, tɛmɛ́ɛn a Olóodə. Tiɛ́dɛ́ɛ́mɛn tɛn áay a Olóodə, tɛmɛ́ɛn a Paʼtala.

²Kɔ́gɔ́ɔg tɛáság kodála siʼtíməʼ yaágɛɛn a Fənəsíi, tɛáság kusiəd yɛ́lɛ́ agɛɛn.

³Tɛɛ́dáŋána súʼtə́ə́ tɛáság kodála oloʼ o Síiʼpələ, tiídí wólɛ́ a ombɔg wə́ə́s ó kɛmɛs tɛáyaag agɛɛn a Silíi. Tɛyɛ́ɛ́n, tɛáság kɛɛn agaab a ɛbá ɛ́ noom, a Tíil, kɛnɔ kɛ́ pígóodi lɛ́ pádam pə́suuləni moom mó pə́yíím pányáŋɛn a siʼtíməʼ.

⁴Tiɛ́bóan pəə́liʼtiniʼ kɔ áay, tɛmɛ́ɛ́lɛ na pɔ́lɛ́ mədúg máʼtáan na mábaan. Uŋun wó Ufúlúʼtú úyíbulóódi nkə kɛ́ kɛ́yɛ́ɛ lɛ́ kɛásán na Póol kɔ a Yolósalɛm. Pááság komodɛ́anɛ lɛ́ adɛnjɛ́ɛ́n kɔ.

⁵Náa, ná tɛyɛ́ɛ tɛáʼkɛɛlɛ kɔ áay mədúg máʼtáan na mábaan, tɛáság kusiəd ngə́ agɛɛn yuudi na ongɛn wə́ə́s. Pɔ́lɛ́ piim na pagán pɔ́ɔ́bɔn kɛ́, na pɔɔ́n pɔ́ɔ́bɔn kɛ́, pə́yíím əbiidi súʼtə́ə́ a nɛlon nɛ́ pálɛ́ɛg. Kɔ a ɛbá ɛ́ noom, tiídúm əndu a nsí, tɛmɔ́sɔ́gɔ́lɔ́nɛ́ɛ́ Táán.

⁶Tɛáság kaábɛ́ganan, pəsi tɛábág a siʼtíməʼ agɛɛn, pɔ́lɛ́ pə́əguúlini a toádɛʼ toɔ́bɔn.

⁷Kodɛ́ɛmɛn kó tiɛ́dɛ́ɛ́mɛn a Tíil, tɛyɛ́ɛ́n alon a Pəʼtoləməyíis. Kɔ́gɔ́ɔg aa ongɛn wə́ə́s ó na siʼtíməʼ wɛ́ɛ́mán. Tɛyɛ́ɛ́n osoyidi pəə́liʼtiniʼ pá páyɛ́ɛ kɔ áay a pálɛ́ɛg yɛ́ɛy. Tɛyɛ́ɛ́lɛ na pɔ́lɛ́ wɔɔ́s kilúd.

⁸A koany kaáyɛnɛ, tɛáság kodɛ́ɛmɛn áay, tɛmɛ́ɛn a Səsalə́ə. Kɔ a Səsalə́ə, tɛyɛ́ɛ́n a noádɛʼ nó mɔɔd nyummú niiŋ lɛ́ Filíib. Ayɛ́ɛ mɔɔd nyɔ́ ayɛ́ɛ alɔɛgɛ Tɔsɔm Tólaŋ. Ayɛ́ɛ a ondáŋ wó nto ɛ́ʼtáan na ɛ́baan yɛ́ pə́yííyid[90] a Yolósalɛm. A noádɛʼ nuə́ŋ áa tɛyɛ́ɛ əgubúlimən.

⁹Ayɛ́ɛ na pɔɔ́n pá pagɛ́ɛd pə́niʼ, páyɛ́ɛ pándɛ́ndɛŋ panɔ́mɛɛd. Páyɛ́ɛ pagɛ́ɛd pá páyɛ́ɛ palɔɛgɛʼ pɛbán pá Táán.

¹⁰Ná tɛyɛ́ɛ tɛáʼkɛɛlɛ kɔ mədúg miíŋ, ɔndɔɛgɛʼ pɛbán o Táán nyummú niiŋ lɛ́ Agabúus aáság kiim alon. Ayɛ́ɛ əgiim ádɛ́ɛmɛn a Siudə́ə.

¹¹Ná əyíím əgiig kɛnɔ kɛ́ tɛyɛ́ɛ, yiísiə́d kandá ɛ Póol, amágódɛ́ɛ́ ɔmbɔg yə́ə́ŋ na ambaan yə́ə́ŋ, náa ɔnɔ́: «Óʼtánaan! Óʼtánaan nkə kɛ́ Uŋun wó Ufúlúʼtú ólɛɛ́ əgusəə: Mɔɔd nyɔ́ alɛɛ́ na kandá yɛ́ɛnɛ, náan aa Yúdɛn yaámoogóda a Yolósalɛm, ɛ́ság komoólɛg na pɛnɔɔŋɛʼ.»

¹²Ná tɛyóób tɔgɛ́ɛ́ tóod, na pəsi na pəə́liʼtiniʼ pá a Səsalə́ə, tɛyɔ́sɔ́gɔ́lɔ́nɛ́ɛ́ Póol na pɛlɛɛ a əngis lɛ́ ədiyíʼkíni kɛɛn a Yolósalɛm.

¹³Náa, əyíbiyúlísíni ɔnɔ́ na pəsi: «Nkə aa poálɛɛ? Nkə aa poágɛʼkányanɛ ɔʼtɛ́m? A mɛ, mbə́líʼtíníí lɛ́ kɛ́dɛnjɛ́ɛ́n əgín lɛ́ páagɛʼkóda kɛ́ʼkódáán, ɔmbɔ́ kɛnjoon, pɛ́ɛnyoon kɔ a Yolósalɛm, nku a kidíídí kɛ́ Sə́dúk Yə́sus.»

¹⁴Ná tɛɛ́dála lɛ́ tɛdɛɔ́gɔ págɛɛlɛ yoom na yoom lɛ́ ágasɛ unuʼ, tɛáság kumuudi. Náa tɛɔʼkɔ́ na nyɔ́lɛ́: «Oo yi, kɛáyɛ́ɛlɛ əgín wɔnɔ́ a nɛnyɔ́ŋɛn nɛ́ Sə́dúk!»

¹⁵Ná tɛyɛ́ɛ tɛáʼkosánɛ ngab ɛ mədúg yɛ́ɛy kɔ áay a Səsalə́ə, tɛáság kaáboŋɛn agɛɛn a Yolósalɛm.

¹⁶Ná tɛyɛ́ɛ tɛándagɛɛn, tɛyɛ́nánan ondáŋ na pəə́liʼtiniʼ pá a Səsalə́ə pə́mmú. Kɔ́gɔ́ɔg, pə́yíbisúid a nó mɔɔd nyummú niiŋ lɛ́ Nnasɔ́ɔŋ. Ayɛ́ɛ mɔɔd o Síiʼpələ. Ayɛ́ɛ tɛn mɔɔd nyɔ́ əə́ʼkubúlimií kɛ́fɔlɛ́ a kəə́liʼtiniʼ. A noádɛʼ nuə́ŋ áa tiígóodi lɛ́ tíləndin.

¹⁷Ná tɛyɛ́ɛ́n əgiig a Yolósalɛm, pomóŋŋí pə́ə́s pəə́liʼtiniʼ pə́yíbisiə́d kɔ na tɔnyɔ́g.

¹⁸A koany kaáyɛnɛ, tɛáság kɛɛn ondáŋ na Póol a nó Sɛ́ag. Padɛ́lɛm yuudi pá a ɛgɔny ɛ́ pəə́liʼtiniʼ páyɛ́ɛ kɔ paágɔ́nyɛ́dáán.

¹⁹Ná tɛyɛ́ɛ́n əgiig kɔ́gɔ́ɔg, Póol yɛɛ́dám ə́buúsoyidi, aáság kobodɛ́ananɛ nkə kiim kɛ́ Táán ayɛ́moyɛ́ɛ́lɛ lɛ́ nyɔ́lɛ́ yɛ́ɛlɛ a nó pɛnɔɔŋɛʼ.

²⁰Ná páyóób nkə kɛ́ Póol ayɛ́bodɛánɛ, páyɛ́ʼkɛn nugəm na Táán, pááság kodɛ́anɛ na Póol pɔ́nɔ́: «Móŋŋí, tála pɔʼtɔ́ɔ́sɛn pá pɔɔ́n pá Yúdɛn pásɛ́g áa páʼkosɔ́dɛ́ɛ́ a Ngə́ ɛ Kilíʼtus əə́. Pɔ́lɛ́ piim pə́ndəyə́ən pɛcɛm pɛ́ Moyíis na toɛn.

²¹Kɔmɔɛ́d lɛ́ nkə kɛ́ padɛ́lɛm yuudi páyóób, kɛ́ páyɛ́bodɛánɛ kɛ́yɛ́ɛ pɔ́nɔ́: Wɛ nyóon olɛ agaaʼkananɛ pɔɔ́n pá Yúdɛn pá pálɛɛ́ a mɔnɔŋ mɛ́ndɛ́ŋ lɛ́ pə́diyíʼkíni kuyə́ən pɛcɛm pɛ́ Moyíis kə́mmú. Wɔʼkɔ́ póob pádɛnjáányɛ pɔɔ́n pɔ́ɔ́bɔn kə́mmú, pə́dinjə́ən tɛn kə́mmú pisiə́g pɛ́ pɛmbáa pɔ́ɔ́bɔn.

²²Oo, áanɛ nɛ́gɔŋ anɛ́ɛ́n əə, tuə́ áa tíɛlɛ ə́? Kɛ́dɛ́ɔlɔb pádɛób lɛ́ waándɛ áanɛ.

²³Ugóódi lɛ́ wɛ́ɛlɛ anɛ́ɛ́n nkə kɛ́ tɛágodɛ́anɛ. Tɛlɛ na pɔɔd pə́niʼ áanɛ a ondáŋ wə́ə́s pá pɛ́ɛ́bágɛ ombɔg a mɔɛn agaácɛm a udi ó Táán.

²⁴Poagɛɛn ondáŋ na pɔ́lɛ́ agɛɛn agɛɛlɛ kisiə́g kɛ́ kəə́fúŋi nkó. Wɛ́ʼkɛn nkə kɛ́ kíəguunə lɛ́ pɔ́lɛ́ páʼpɛ́ɛ́ kɔ. Náan, páaboómo oʼto. Omaʼkɛɛlɛ náan, ungim aalɛŋ lɛ́ nkə kiim kɛ́ pálɛɛ́ əgusəə a nkó yaaŋ kɛ́lɛ pɛnyaʼ. Páadála lɛ́ wɛɛ́nyɔ́amɔɛ́d tɛn olɛ agɛɛlɛ nkə kɛ́ pɛcɛm pɛ́ Moyíis pɛ́lɛɛ́ əgusəə.

²⁵A pɛnɔɔŋɛʼ pɛ́ pɛándɛɛ́ pəə́liʼtiniʼ, tiyíbudílən pɔ́lɛ́ nufuuʼ agobodɛ́anɛ pɛbán pɛ́ tigumíníníí. Kɛ́lɛ lɛ́: Pə́ə́gili manám má pááfɔnya a ambog, ponyam tɛn pó pásɛgɛdɛnɛɛ́ kɛnág, ɔmbɔ́ tɛn maŋɔ́ má ponyam. Pə́dimbúlímən na pagɛ́ɛd oó lɛ́ na panɔ́mɛɛd pá pɔ́dɛɔ́gɔ panom pɔ́ɔ́bɔn, ɔmbɔ́ lɛ́ pagán pɔ́ɔ́bɔn.»

²⁶A koany kaáyɛnɛ anɛ́ɛ́n, na Póol na pɔɔd póob pə́niʼ pááság kɛɛn agɛɛlɛ kɛfɔny kɛ́ kəə́fúŋi. Póol yɛɛ́sɔ́d a Tɛ́mpɛl agɛɛn adɛ́anɛ na payaaganɛʼ pɛfɔny naanɛ́g áa kɛfɔny kɛɔ́bɔn kɛ́aman, áyɛɛ́ʼkɛn mɔɔnɛ́ má pálɛɛ́ əguŋíən kɔ a ɛ́nɛ́ mɔɔd.

²⁷Ná mədúg máʼtáan na mábaan má kɛfɔny máyɛ́ɛ mándaaman, pɔɔ́n pá Yúdɛn pá pə́yíím pádɛ́ɛmɛn a Əsíi pááság kodála Póol kɔ a Tɛ́mpɛl a kaadɛ. Pɛ́ɛ́báya pɔɔd, kiʼtúú kilúd lɛ́ pə́muúgumin.

²⁸Pɔɔd póob páyɛ́ɛ asása na toɛn, pɔ́nɔ́: «Pɔɔ́n pá Ɛ́sɛlayɛl mɛ́naan óo! Taa mɔɔd ogo aa nyóonɛ o! Mɔɔd ogo nyɔ́ alɛɛ́ əgiim ɔ́sɔyɔn nigúu niə́s kɔbɛ́ kɛnɔ kiim, ɔmbɔ́ tɛn na pɛcɛm pɛ́ Moyíis kɛ́, na Tɛ́mpɛl yəəs yɛ́ɛnɛ kɛ́. Táláan nɛ́gɔŋ əə! Aáʼkobod aáʼkɛɛlɛ, pɛnɔɔŋɛʼ pɛ́ pɛ́dɛɔ́gɔ Yúdɛn, pɛ́sɔd a pulúʼkə́n puə́s pó Tɛ́mpɛl pə́lumisəni yɛ́lɛ́.»

²⁹Píísə́ə́ náan lɛ́ wɔnɔ́ ná pɛ́ɛ́dála Póol a pálɛ́ɛg, ondáŋ na Tolofíim, mɔɔd nyummú wo Ɛfɛ́ɛs. Kólɛ́ aa páyɛ́ɛ agofɛg lɛ́ yɛɛ́sɔ́d kɔ a Tɛ́mpɛl na nyɔ́lɛ́[91]

³⁰Pálɛ́ɛg ngim iyə́nyígídíí. Pɔɔd pááság kiim pádɛ́ɛman pɛnɔ piim, kiʼtúú kilúd, əgiimən kɔ áay. Pááság kugumin Póol kɔ a Tɛ́mpɛl, pámámolónɛ a táán, pááság koság kubuəg Tɛ́mpɛl.

³¹Ná páyɛ́ɛ pə́ndəguunə komoyóon, nkúm yɛ́ nkóʼkóón ɛ pasɔ́njaa pá Ɔlɔ́ma yaáság koob lɛ́ inyuunyugiʼ ɛ́lɛ a pálɛ́ɛg ɛ Yolósalɛm ngim.

³²Yɛɛ́gónyɛd puʼkúm pó pasɔ́njaa pó puliʼti[92] na pasɔ́njaa pɔ́ɔ́bɔn, aáság kəə́bisig kɛɛn na pɔ́lɛ́ kɛnɔ kɛ́ inyuunyugiʼ ɛ́yɛ́ɛ. Ná pɔɔd pɛ́ɛ́dála pasɔ́njaa pə́ndəgiim na nkúm yɔɔbɔn ondáŋ, pááság kudi Póol, pádɛmobáám kə́mmú.

³³Náan aa nkúm ɛ pasɔ́njaa yɛ́ nkóʼkóón yɛ́ɛy ɛyɛ́ɛ́n a ɛbá ɛ́ Póol, yaáság kɛɛ́ʼkɛn toɛn lɛ́ pə́muúgumin, pálɛŋ komoogóda na pasɛŋ. A ngim yɛ́ɛy anɛ́ɛ́n aáság kuŋíən ɔnɔ́ əə: «Nyóonɛ mɔɔd əə, alɛ ánɛ ə́? Nkə aa amɛ́ɛ́lɛ ə́?»

³⁴Pɔɔd pá páyɛ́ɛ kɔ áay kiʼtúú kilúd. Páyɛ́ɛ asása pɔ́lɛ́ piim, ngə́ ɛgoob kɛbán fiɛ́d lɛ́ páyɛ́ɛ lɛ́ póonɛ pə́əsəə kɛɔ́bɔn ndɛ́ŋ, pə́mmú pə́əsəə tɛn kɛɔ́bɔn ndɛ́ŋ. Ná yɛɛ́dála náan lɛ́ nyɔ́lɛ́ ədiə́giim agoob kɛbán a kɛgaágadɛ kɛ́ inyuunyugiʼ yɛ́ɛy yiim, aáság kusəə lɛ́ pɛ́ɛn ɔlɔ́g Póol a oʼkág wó oʼkóón ó pasɔ́njaa.

³⁵Pasɔ́njaa pááság kusiəd Póol agɛɛn na nyɔ́lɛ́. Ná pə́yííg a pasɛʼtɛ́ɛb, pasɔ́njaa pɛ́ɛ́nyáŋɛn Póol konyáŋɛ́náán agobag na nyɔ́lɛ́ lɛ́ kiʼtúú kɛ́ pɔɔd kɛ́ɛg kɛ́yɛ́ɛ wɔnɔ́ kɛ́moówaga komoowágáán.

³⁶Pɔɔd páyɛ́ɛ a ngim yəəŋ súuu, páasása pɔ́nɔ́: «Tɛ́moyóon, tɛ́moyóon oo!»

³⁷Ná páyɛ́ɛ pándanyɔ́ŋɛn kosɔ́dɛ Póol a oʼkág a kaadɛ, yiíŋíən na nkúm ɛ pasɔ́njaa yɛ́ nkóʼkóón ɔnɔ́ ə: «Nkúm, ndɛ ogosɔyɛd na wɛ ə́?» Náa nkúm yɔ́nɔ́ na nyɔ́lɛ́: «Osɔyɛ́d tuə́! Kɔmɔɛ́d ə́ə, waálɛŋ kosɔyɔ kɛlɛ́ɛg a?

³⁸Kɛ́lɛ aa nyóon lɛ́ mədúg mə́dímbúlim kɔmɔɛ́d wɔnɔ́ ná mɔɔ́n wo Əsíibtə nyummú yiídíʼkə́ni pɔɔd lɛ́ pə́də́əmini oʼto na pəsi, adɛ́njaŋ wɛ áa? Mɔɔd ogo ayɛ́ɛ́n ɔgɔɔsɛm a kɛnɔ kɛ́ kifələ́ə́n na tɔ́ɔ́sɛn ɛ pɔɔd íniʼ a ngim yəəŋ, pacocóo.»

³⁹Póol əyímuyúlísíni ɔnɔ́ na nyɔ́lɛ́: «Ndóo óo. Mɛ ndɛ kibíəniʼ kɛ́ Yúdɛn. Pə́mímbíən a pálɛ́ɛg ɛ Táas, a Silisíi. Ndɛ mɔɔ́n nyɔ́ a pálɛ́ɛg ɛ niiŋ, pálɛ́ɛg yɛ́ ungim aálɛŋ. Sɛ́gɔɔ, ɛ́nyɛɛ́ʼkɛn toɛn nsɔyɛd na nigúu.»

⁴⁰Náan aa nkúm ɛ pasɔ́njaa yɛ́ nkóʼkóón iyə́líʼtíníí lɛ́ ɔ́sɔyɛd. Póol aáság kodɛ́lɛm kidə́níʼtən a pasɛʼtɛ́ɛb. Yiídə́ə́míni ombɔg agobabɛ pɔɔd. Ná kɛnɔ kɛ́yɛ́ɛ kɛándɛ yəə́b, əə́bə́ə́ kosɔyɔ na pɔ́lɛ́ a tɔgɛ́ɛ́ tó alamɛyɛ́ɛŋ, tɔgɛ́ɛ́ tó Yúdɛn. Yiísə́ə́ ɔnɔ́: