Read Yambeta Pigólí 22 Bible Online

Pigólí 22 - Yambeta bible

Pigólí 22

¹«Pəŋi pomóŋŋí páam na pasɛ páam, óʼtánaan nɛ́gɔŋ yɛ́ɛnɛ nkə kɛ́ ndábodɛ́anɛ. Óʼtánaan wɔnɔ́ ná mbándagaánɔnaá.»

²Ná páyóób Póol ɔɔ́sɔyɔ tɔgɛ́ɛ́ toɔ́bɔn, alamɛyɛ́ɛŋ, kɛnɔ kiim sáb kúfuʼ. Náa ɔnɔ́ na pɔ́lɛ́:

³«Mɛ, ndɛ kibíəniʼ kɛ́ Yúdɛn, mbə́biə́níí a pálɛ́ɛg ɛ Táas, a nigúu nɛ́ Silíi. Náa, kɛbán kímuʼ, áanɛ a Yolósalɛm aa mbáyám. Kamalɛyɛ́ɛl aa ayɛ́ɛ kɛlág kɛ́am. Agɛɛlɛ lɛ́ ndɛŋ pɛcɛm pɛ́ pɛmbáa pə́ə́s kɔŋɛʼ kɔŋɛʼ, nyɔ́lɛ́ aa ayɛ́nyaʼkánánɛ pɛ́lɛ́. Wɔnɔ́ ná pəŋi poáyɛ́ʼkɛ́nɛ́nɛ́ɛ́ nɛ́gɔŋ a ngə́ ɛ Táán, náan tɛn aa njáyɛ́ʼkɛnɛn a yɛ́lɛ́.

⁴Nyiílóódi ŋwɛ́g na pɔɔd pá páyɛ́ɛ əguyə́ən Ngə́ ɛ Sə́dúk, súʼtə́ə́ mbábod mbáboyóóna. Njɛ́ɛ́lɛ lɛ́ pə́buúgumən na panɔ́mɛɛd na pagɛ́ɛd kɛ́, páaboyáágan a yoog yɛ njaan.

⁵Na Ɔnjaaganɛʼ pɛfɔny nyɔ́ oʼkóʼkóón na padɛ́lɛm yuudi pá Yúdɛn pálɛ wɛ́sɛnɛg lɛ́ nkə kɛ́ɛg kɛ́ ndɛɛ́ əgusəə kɛ́lɛ fɔ́lɔ́b. Ná njɛ́ɛ agɛɛn a Tamáas agɛɛn əgumən pɔɔd piim pá páyɛ́ɛ əguyə́ən Ngə́ ɛ Sə́dúk, pɔ́lɛ́ aa páyɛ́nyɛɛ́ʼkɛn tufuuʼ tóonɛ lɛ́ mbəʼkiig kɔ, nyɛ́ʼkɛn tólɛ́ na pɔɔ́n pá Yúdɛn pá páyɛ́ɛ kɔ́gɔ́ɔg. Kɛ́yɛ́ɛ lɛ́ nyɛ́ɛn kɔ ná piim pá pálɛɛ́ əguyə́ən Ngə́ ɛ Sə́dúk, mpuúgumin agɛɛn na pɔ́lɛ́ a Yolósalɛm, páboʼpɔ́nɛsɛ.»

⁶Póol ayɛ́ɛ́n na tɔgɛ́ɛ́ yuudi, ɔnɔ́: «Ná njɛ́ɛ mbándɛ a ngə́ ndúmiʼ na Tamáas, áanɛ ná tóɛf yəə́ndəgiim íwísən. Nyiídíin ntála agá kɛnɔ kɛándɛ səə́səə. Kisəə kɛ́go kɛ́ɛg kɛ́yɛ́ɛ əgiim a mɔɛn.

⁷Mbáság kudə́əŋ a nsí kuŋ. Náa ndáagoob nɛŋo nɛɔ́nɔ́ na mɛ: “Sóol, Sóol wɛ! Nkə aa wəə́ginjəʼkəni ə́?”

⁸Náa ndə́ŋíən nyɔʼkɔ́ əə: “Wɛ ánɛ aa olɛɛ́nɔ ə́, Sə́dúk?” Nɛŋo níyímuyúlísíni nɛɔ́nɔ́: “Mɛ áa ndɛɛ́ Yə́sus, mɔɔ́n o Násalɛd nyɔ́ olɛɛ́ əguyəʼkəni.”

⁹Pɔɔd pá tɛyɛ́ɛ ondáŋ na pɔ́lɛ́ pɛ́ɛ́dála kisəə kɛ́ɛg, náa pádɛʼkɛ́ɛ agoob nɛŋo nɛ́ nɛ́yɛ́ɛ agosɔyɔ na mɛ.

¹⁰Náa ndə́ŋíən anɛ́ɛ́n na nɛŋo nyɔʼkɔ́ əə: “Nkə aa nyɛ́lɛɛ́ anɛ́ɛ́n ə́, Sə́dúk?” Náa Sə́dúk ɔnɔ́ na mɛ: “Tɛ́ɛ́mɛn, wɛ́ɛn a Tamáas. Kɔ́gɔ́ɔg páagomoáŋɛnɛ oʼtom wááŋ.”

¹¹Wɔnɔ́ ná kisəə kɛ́ɛg kɛ́yɛ́nyɛɛlɛ ntiiʼkíni kodɛ́ʼtɛganan, pɔsɔ́g pá tɛyɛ́ɛ ondáŋ na pɔ́lɛ́ aa pə́yíʼkumin a ombɔg agɛɛn na mɛ súʼtə́ə́ a Tamáas.

¹²«Mɔɔd nyummú ayɛ́ɛ kɔ áay a Tamáas niiŋ lɛ́ Ananɛ́as. Ayáyɛ́ʼkɛnɛn kɛ́fɔlɛ́ a pɛbán pɛ́ kəə́liʼtiniʼ, əə́yə́ən pɛcɛm pɛ́ Moyíis kɔŋɛʼ kɔŋɛʼ. Pɔɔ́n pá Yúdɛn piim pá páyɛ́ɛ a Tamáas páyɛ́ɛ agomoógany kɛ́fɔlɛ́.

¹³Mɔɔd nyóon əyíím agɛndɛ́ŋɛn, aádam ádɛ́lɛm a ɛbá yáam, ɔnɔ́ na mɛ: “Móŋŋí waam Sóol, əngis yááŋ yáyáásɛn aá, wíiʼkini kodɛ́ʼtɛganan!” Əgín tɛn aáman kusəə náan, əngis yáam yááság kaáyásɛn, mbə́bə́ə́ kodɛ́ʼtɛganan. Mbáság komoodála.

¹⁴Náa ɔnɔ́ na mɛ: “Sóol, Táán o pɛmbáa pə́ə́s yɛɛ́yáŋ əguyíiyid əgín kɔ kalaʼ lɛ́ ólɛŋ nkə kɛ́ alɛɛ́ anyɔ́ŋɛn, óodála tɛn na əngis yááŋ, nyɔ́ alɛɛ́ nyɔ́lɛ́nyɔ́əsíŋ Sáád ɛ mɔɔd, óyoob tɛn na ntóɛŋ yaaŋ tɔgɛ́ɛ́ tó a unuʼ wə́ə́ŋ ó nyɔ́lɛ́nyɔ́amɔɛ́d.

¹⁵Náan aa kɛ́lɛɛ́ lɛ́, wɛ olɛ́ɛ́ komodɛ́lɛmɛn mbaasɔ́ a udi ó pɔɔd piim agolɔɛgɛ nkə kɛ́ waádála na nkə kɛ́ omóób.

¹⁶Nɛ́gɔŋ anɛ́ɛ́n ə́ə, nkə kímmú aa waáboŋ ə́? Tɛ́ɛ́mɛn, tɔ́ŋɔn niiŋ nɛ́ Yə́sus ná págoyɛ́ʼkɛn ɔsɔgɛn, Táán ə́guufúŋi a mabɛ́ mááŋ.”

¹⁷«A ngim yɛ́ɛy, njúúlíni a Yolósalɛm. Wɔɔ́s wúmmú wó njɛ́ɛ a pɛɔ́sɔ́gɔ́lɔ́n a Tɛ́mpɛl, yoom yááság kɛndónɛn kɔ.

¹⁸Nyɛɛ́dála Sə́dúk. Ayɛ́ɛ agosɔyɔ na mɛ, ɔnɔ́: “Póol, ə́bísígíí kodɛ́ɛmɛn áanɛ a pálɛ́ɛg ɛ Yolósalɛm yɛ́ɛnɛ ósan lɛ́ pɔɔd póonɛ áanɛ pə́diə́gəə́liʼtini mbaasɔ́ yaaŋ yɛ́ waágɛʼtɛ́lɛmɛn.”

¹⁹Njímuyúlísíni nyɔʼkɔ́ na nyɔ́lɛ́ ə: “Sə́dúk, wɔʼkɔ́ nkə áŋ! Adɛ́ páálɛŋ pɔ́lɛ́báamɔɛ́d lɛ́ mɛ áa njɛ́ɛ nyɛɛnan a puog pó pɛɔ́sɔ́gɔ́lɔ́n ndə́əgumən ungim nyɔ́ ayáágɛn oʼto na wɛ áa? Adɛ́ páálɛŋ lɛ́ mɛ áa njɛ́ɛ mpuúgumən agoboyáágan a yoog yɛ njaan, ndáagɛɛlɛ lɛ́ pábobááma na nsuə́ ə́?

²⁰Adɛ́ mɛ tɛn njɛ́ɛ kɔ ná páyɛ́ɛ agoon Ɛ́ʼtiɛn nyɔ́ ayɛ́godɛ́lɛ́mɛn mbaasɔ́ a! Adɛ́ njɛ́ɛ unuʼ úmmuʼ na pɔɔd pá páyɛ́moyóón á! Adɛ́ mɛ áa njɛ́ngɛg pilə́ə́ pɛɔ́bɔn ɔ!”

²¹Náa Sə́dúk ɔnɔ́ na mɛ: “Tod anɛ́ɛ́n. Kɛ́lɛ lɛ́ ndɛ́ɛ́ kogoodom laálá a mɔnɔŋ má pádɛndɛŋɛnɛɛ́ kɔ.” »

²²Kiʼtúú kɛ́ Yúdɛn kɛ́yɛ́ɛ əgín yəə́b agoob nkə kɛ́ Póol ayɛ́ɛ əgusəə súʼtə́ə́ əə́yibə́nən tɔgɛ́ɛ́ tuə́ŋ. Ná páyóób nkə kɛ́ɛg kɛ́ yiísə́ə́ a noá na pɛnɔɔŋɛʼ, pə́ə́bə́ə́ kosása, pɔ́nɔ́: «Ɛlɛ́an lɛ́ mɔɔd nyóonɛ áman a nsí yɛ́ɛnɛ o! Oʼkóodi lɛ́ álaa o!»

²³Páyɛ́ɛ asása náan páagaágása pilə́ə́, páado a nsí. Páagómmɛ ummúndúŋ, pə́əfúlimini a mɔɛn.[93]

²⁴Nkúm ɛ pasɔ́njaa yɛ́ nkóʼkóón yaáság kodɛ́anɛ na pasɔ́njaa pə́ə́ŋ lɛ́ pɛ́ɛn na Póol a oʼkág a kaadɛ, pámobáam na ngwáan agɛɛlɛ lɛ́ ɔ́sɔyɔ, álɛŋ kusəə kɛbán igə aa amɛ́ɛ́lɛ náan aa pɔɔd pálɛɛ́ nyɛ́n nyɛ́n nyɛ́n na nyɔ́lɛ́, páasása.

²⁵Ná páyɛ́ɛ páʼkogóda Póol agɛɛlɛ lɛ́ pámobáam, yiíŋíən na nkúm ɛ kiʼtúú kɛ́ pasɔ́njaa əʼtin á áʼtáan yɛ́ ɛyɛ́ɛ kɔ áay, ɔnɔ́ ə: «A pɛcɛm piə́s ə́ə, kímuʼ kɛ́lɛ kɔ kɛ́ kɛ́boyɛ́ʼkɛ́nɛ́nɛ́ɛ́ toɛn lɛ́ mɔɔd nyɔ́ poálɛŋ lɛ́ alɛ nyɔ́ aáʼkosɔ́dɛ́ɛ́ a ondáŋ ó pibíəniʼ pɛ́ Ɔlɔ́ma pámobáam na usuə́ ə́, ngɔ́ɔ́? Pámobáam pádɛmoyɔ́mɛ ə́?»

²⁶Ná nkúm ɛ pasɔ́njaa yɛ́ɛy ɛyóób náan, ɛyɛ́ɛ́n adɛ́anɛ na nkúm ɛ pasɔ́njaa yɛ́ nkóʼkóón, yɔ́nɔ́: «Kɛ́ɛg kɛ́ wɔʼkɔ́ wɛ́ɛlɛ ó! Mɔɔd nyóon nyɔ́ alɛɛ́ náan, alɛ nyɔ́ aáʼkosɔ́dɛ́ɛ́ a ondáŋ ó pibíəniʼ!»

²⁷Nkúm ɛ pasɔ́njaa yɛ́ nkóʼkóón yɛ́ɛy yaáság kɛɛn a ɛbá ɛ́ Póol. Əyímuŋíən ɔnɔ́ na nyɔ́lɛ́ ə: «Mayɛ́ʼtɛánɛ áŋ! Fɔ́lɔ́b waáʼkosɔd a ondáŋ ó pibíəniʼ pɛ́ Ɔlɔ́ma a?» Náa Póol ɔnɔ́ na nyɔ́lɛ́: «Ɛɛ́ɛ, kɛ́lɛ fɔ́lɔ́b náan.»

²⁸Náa nkúm yɛ́ɛy yɔ́nɔ́ na nyɔ́lɛ́: «Mɛ, nyɛɛ́ʼpɛ́ɛ́ mɔɔnɛ́ miíŋ na palaamɛʼ agɛɛlɛ lɛ́ nsɔd a ondáŋ ó pibíəniʼ pɛ́ Ɔlɔ́ma.» Póol aáság kumuyúlisini ɔnɔ́ na nyɔ́lɛ́: «Mɛ əgín a niə́bíən nɛ́am aa ndɛɛ́ wo Ɔlɔ́ma.»

²⁹Pasɔ́njaa pá páyɛ́ɛ anyɔ́ŋɛn kobáam Póol agɛɛlɛ lɛ́ álɛŋ kosɔyɔ, pááság koság kəə́súid, pámɛ́ɛn laálá. Ɔmbɔ́ tɛn nkúm ɛ pasɔ́njaa yɛ́ nkóʼkóón yɛ́lɛ́yɛ́amɔɛ́d ɛyɔ́ɔ́ŋ wɛɛ́y ná yɛɛ́lɛ́ŋ lɛ́ Póol nyóon nyɔ́ ayɛ́ɛ́lɛ lɛ́ pámoyáág a pasɛŋ alɛ tɛn wo Ɔlɔ́ma.

³⁰Wɔnɔ́ ná nkúm ɛ pasɔ́njaa yɛ́ nkóʼkóón ɛyɛ́ɛ anyɔ́ŋɛn kolɛŋ a sáád kɛbán igə aa Póol yiídə́əŋ náan aa Yúdɛn ɛlɛɛ́ nyɛ́n nyɛ́n nyɛ́n na nyɔ́lɛ́, yiísə́ə́ a koany kaáyɛnɛ lɛ́ pə́muyóndin pasɛŋ. Aáság kogonyɛd puʼkúm pó payaaganɛʼ pɛfɔny, na palóoyaʼ pá a ɛgɔny yɔ́ɔ́bɔn ɛ́ pɛyɔm yɛ́ ɛgóʼkóón. Áay anɛ́ɛ́n áa yiísə́ə́ lɛ́ pə́muyíimin na Póol. Aáság kumudə́nigi a udi wɔ́ɔ́bɔn lɛ́ ɔ́yɔm.