Read Yambeta Pigólí 23 Bible Online

Pigólí 23 - Yambeta bible

Pigólí 23

¹Póol yiíbísin palóoyaʼ pá a yoog ɛ pɛyɔm yɛ́ nkóʼkóón əngis, náa ɔnɔ́ na pɔ́lɛ́: «Pomóŋŋí, ndɛ na ɔʼtɛ́m a kaadɛ yəə́b a ɔlaa wó ndɛɛ́ alaa a Ngə́ ɛ Táán kəə́bə́ə́ kɔ́gɔ́ɔg əgiim əgiig nɛ́gɔŋ.»

²Ananɛ́as, Ɔnjaaganɛʼ pɛfɔny nyɔ́ oʼkóʼkóón aáság kodɛ́anɛ na pɔɔd pá páyɛ́ɛ a ɛbá ɛ́ Póol ɔnɔ́: «Ɛ́mogóan a unuʼ wə́ə́ŋ ogo wóow!»

³Náa Póol aámodɛ́anɛ ɔnɔ́ na nyɔ́lɛ́ ə: «Wɛ, waŋ yɛ́ɛnɛ yɛ́ pə́ə́síŋ ɔfɛ́m, wɛ áa Táán aágoogo. Áay ná olɛɛ́ undəndínə́ə́n, kɛ́lɛ lɛ́ wɛ́njɔmɛ wɔnɔ́ ná kɛ́lɛɛ́ əguunə a pɛcɛm oóm, olɛ lɛ́ údi nkə kɛ́ pɛcɛm pɛ́lɛɛ́ əgusəə, wɔʼkɔ́ pɛ́ɛʼko agá ə́!»

⁴Pɔɔd pá páyɛ́ɛ a ɛbá ɛ́ Póol pə́ə́bə́ə́ komosásan, pɔ́nɔ́ na nyɔ́lɛ́: «Áay, mɔɔd o Táán áa olɛɛ́ agodóga náan a! Ɔnjaaganɛʼ pɛfɔny nyɔ́ oʼkóʼkóón á!»

⁵Náa Póol ɔnɔ́ na pɔ́lɛ́: «Ɛɛ́, pomóŋŋí! Ɔnjaaganɛʼ pɛfɔny nyɔ́ oʼkóʼkóón áa alɛɛ́nɔ ɛɛ́! Sɛ́gɔɔ ntɛ́ʼkóolɛŋɛn! Kɛ́lɛ kidiídílə́ a Kálaʼtaʼ ɛ Táán lɛ́: Odɛsɔ́yɔ niiŋ nɛ́ nkúm ɛ nigúu nɛáŋ kɔbɛ́[94]!»

⁶Póol yɛɛ́lɛŋɛn lɛ́ a yoog ɛ pɛyɔm yɛ́ nkóʼkóón yɛ́ɛy, Pasadosɛyɛ́ɛŋ na Pafalɛsɛyɛ́ɛŋ aa pálɛ́ɛ́ kɔ. A Oʼto wóow aa yiísə́ə́ nɛŋo a mɔɛn, ɔnɔ́: «Pomóŋŋí páam, mɛ, ndɛ mɔɔd nyɔ́ a ɛgɔny ɛ́ Pafalɛsɛyɛ́ɛŋ, sɛ waam tɛn nyɔ́ əyímbíən alɛ wo ɛgɔny ɛ́ Pafalɛsɛyɛ́ɛŋ. Oʼto ó kɛbán wó ntɛ́lɛ́mɛ́nɛ́ɛ́ a pɛyɔm a udi wááŋan aa wóonɛ ólɛɛ́ lɛ́ ndɛ agomɛna pɛda lɛ́ pɛlóŋ pɛ́lɛ́ɛ́ koóndɛg.»

⁷Póol əyəʼkəʼtíin áman kusəə, ɔsáŋ wáʼkololɛd lɛ́ na Pafalɛsɛyɛ́ɛŋ na Pasadosɛyɛ́ɛŋ. Kosaalɛg koɔ́bɔn a kóog, pádɛʼkɛ́ɛ kə́mmú unuʼ úmmuʼ.

⁸Kɛ́lɛ lɛ́, Pasadosɛyɛ́ɛŋ pɔ́lɛ́ pálɛ əgusəə pɔ́nɔ́ pɛlóŋ pɛ́dɛ́agoóndɛg. Pɔ́nɔ́ tɛn məŋun má maʼtom mɔ́dɛɔ́gɔ, ɔmbɔ́ əgín tɛn məŋun lɛ́ məŋun. Kɔmɔɛ́d lɛ́ Pafalɛsɛyɛ́ɛŋ pɔ́lɛ́ pálɛ əgəə́liʼtini lɛ́ moom móom muim mólɛ kɔ.

⁹Aŋŋo yɛ́ ɔsáŋ áyɛ́ɛ əgín agonas na toɛn. Ngab ɛ palɛŋ pɛcɛm yimmú yɛ́ a ngim ɛ Pafalɛsɛyɛ́ɛŋ yɛɛ́dɛ́lɛm a ɔsáŋ ó toɛn na pɔsɔ́g póob káag, pɔ́nɔ́ na pɔ́lɛ́: «Pəsi tɛdɛɔ́ŋɛn ɛgom a nkó ɛ mɔɔd nyóonɛ. Amaʼkɛɛlɛ uŋun ó maʼtom ó Táán, ɔmbɔ́ lɛ́ uŋun wúmmú wɛ́ndɛ́ŋ áa wɛ́ɛ́sɔ́yɔ na nyɔ́lɛ́!»

¹⁰Ɔsáŋ úyíʼkíni kobag kə́mmú a mɔɛn na toɛn a ombod wóonɛ lɛ́ nkúm ɛ pasɔ́njaa yɛ́ nkóʼkóón yɛɛ́dámmána lɛ́ pálɛ págowaga Póol kowagáán. A oʼto wóow aa yɛɛ́dóm pasɔ́njaa pə́ə́ŋ lɛ́ pɛ́ɛn alónɛ Póol a kɛgaágadɛ kɛ́ pɔɔd póob, pímbuúlini na nyɔ́lɛ́ a oʼkág wó oʼkóʼkóón.

¹¹Udúg ó wɔɔ́s wóow, Sə́dúk ayɛ́ɛ́n alónɛn Póol, ɔnɔ́ na nyɔ́lɛ́: «Ágɔ́nɛ́gɛ́ɛ́ aá! Wɔnɔ́ ná omɛ́ʼtɛ́lɛ́mɛn mbaasɔ́ a Yolósalɛm, wagɛʼtɛ́lɛmɛn tɛn yɛ́lɛ́ náan a Ɔlɔ́ma.»

¹²A koany kaáyɛnɛ, Yúdɛn yaáság kɔɔ́dɔɔgɛnɛ Póol lɛ́ páamoyóon. Pɛ́ɛ́gó ncɛm lɛ́ Əgəə́bə́ə áay, mɔɔd adɛnnɛ́ɛ́nɛ, aŋŋó tɛn yoom. Pə́ədíin paáyáág yoom a unuʼ əgín ná páʼkomoyóon.

¹³Pɔɔd pá pɛ́ɛ́gó ncɛm yɛ́ɛy náan pɛ́ɛ́láŋ əʼtin ábaan.

¹⁴Páyɛ́ɛ́n aboan puʼkúm pó payaaganɛʼ pɛfɔny na palaamɛʼ pá nigúu, náa pɔ́nɔ́ na pɔ́lɛ́: «Tɛágó ncɛm lɛ́ mɔɔd adɛágaáyáág yoom a unuʼ ná tɛdɛ́njóón Póol.

¹⁵Nɛ́gɔŋ yɛ́ɛnɛ anɛ́ɛ́n, pəŋi padɛ́lɛm yuudi, a unuʼ wááŋan úmmuʼ na pɔsɔ́g pá a yoog ɛ pɛyɔm yɛ́ nkóʼkóón, púŋíən na nkúm ɛ pasɔ́njaa yɛ́ nkóʼkóón lɛ́ ə́buyíimin na nyɔ́lɛ́. Púmulígə poɔʼkɔ́ polɛ anyɔ́ŋɛn kaaʼkan kɛbán kɛ́ mɔɔd nyóon kɔŋɛʼ. A noá na Pəsi, tiə́ʼkudə́nigəni pɛbán piim agɛɛlɛ lɛ́ tɛ́moyóon ná ədínjíim əgiig áanɛ.»

¹⁶Náa, umbíən ó Póol wúmmú, mɔɔ́n ó móŋŋí wəəŋ nyɔ́ ɔʼkɛ́ɛd, óyóób ɛdɔɔgɛ yɛ́ɛy, aáság kɛɛn ɔsɔd kɔ a oʼkág wó oʼkóón agɛɛn adɛ́anɛ na sɛ́gán nkə kɛ́ɛg kɛ́ páʼkomoófɛganɛɛ́.

¹⁷Póol aáság kodɔ́ŋɔn nkúm yimmú ɛ kiʼtúú kɛ́ pasɔ́njaa əʼtin áʼtáan, náa ɔnɔ́ na nyɔ́lɛ́: «Siəd moóngaa ɔnyɔmmɔ́n nyóonɛ wɛ́ɛn na nyɔ́lɛ́ a nó nkúm ɛ pasɔ́njaa yɛ́ nkóʼkóón, ogóódi kɛbán kɛ́ komodɛ́anɛ.»

¹⁸Nkúm ɛ kiʼtúú kɛ́ pasɔ́njaa yɛ́ɛy yaáság kusiəd moóngaa, ɛmɛ́ɛn na nyɔ́lɛ́ a nó nkúm ɛ pasɔ́njaa yɛ́ nkóʼkóón. Yiísə́ə́ na nyɔ́lɛ́ yɔ́nɔ́: «Moóngaa ɔnyɔmmɔ́n nyóonɛ, Póol nyɔ́ alɛɛ́ a yoog yɛ njaan áa amɛ́ʼtɔ́ŋɔn, aáság kusəə lɛ́ nyíim na nyɔ́lɛ́ kɛnɔ kɛ́ olɛɛ́, ogóódi kɛbán kɛ́ alɛɛ́ anyɔ́ŋɛn kogodɛ́anɛ.»

¹⁹Nkúm ɛ pasɔ́njaa yɛ́ nkóʼkóón yɛ́ɛy yaáság kugumin moóngaa a ombɔg, əmə́suídíí na nyɔ́lɛ́ a ɛbá agɛɛlɛ lɛ́ pɔ́sɔyɔ, aáság kumuŋíən ɔnɔ́ əə: «Kɛbán igə aa wɔʼkɔ́ wɛ́ʼtɛ́anɛ?»

²⁰Náa moóngaa ɔnɔ́ na nyɔ́lɛ́: «Yúdɛn ɛmáyóóbánánɛ́ɛ́ lɛ́ pə́əgiim əguŋíən wɛ́ɛlɛ lɛ́ Póol yíim na koany a yoog ɛ pɛyɔm yɛ́ nkóʼkóón pɔ́lɛ́ pálɛŋ kaaʼkan kɛbán kiə́ŋ kɔŋɛʼ.

²¹Náa, udiyə́líʼtíníí, kɛ́lɛ pɛnyaʼ. Pámááyɛn ɔmbɔ́ əʼtin á pɔɔd ábaan pá pámodámɛ́nɛ́ɛ́ lɛ́ ná əə́giim asan, pə́muúgumin. Pɛ́ɛ́gó ncɛm lɛ́ pádɛ́anɛ yoom, páŋŋó yoom ná pádɛ́njóón Póol. Páʼkoman kaáboŋɛn, əgín wɛ áa pálɛɛ́ agoboŋ nɛ́gɔŋ lɛ́ ósɔyɛd.»

²²Nkúm ɛ pasɔ́njaa yɛ́ nkóʼkóón yɛ́ɛy yɛɛ́dɛánɛ na moóngaa ɔnyɔmmɔ́n nyóon ɔnɔ́: «Nkə kɛ́ɛg kɛ́ umíim agɛʼtɛ́anɛ, odɛʼtɛánɛ na wɛndɛ́ŋ áaá!» Náa ɔnɔ́ na nyóon yɛ́ɛn.

²³Nkúm ɛ pasɔ́njaa yɛ́ nkóʼkóón yɛ́ɛy yaáság kodɔ́ŋɔn puʼkúm puə́ŋ pó pasɔ́njaa pó puliʼti póbaan, pɔsɔ́g pá páyɛ́ɛ alaamɛ piʼtúú pɛ́ əʼtin á pasɔ́njaa áʼtáan. Ayɛ́bodɛánɛ ɔnɔ́ na pólɛ́: «Pógonyɛd əʼtin á pasɔ́njaa yówád, na əʼtin tɛn yímmú ádáád na pasɔ́njaa pówád pá a ponyambɛlɛʼ a mɔɛn, na əʼtin tɛn yówád á pɔsɔ́g pá ɔngɔŋ a ombɔg. Poáboŋɛn agɛɛn a Səsalə́ə, poadɛ́ɛmɛn a njə́ŋí ɛ́ʼtáan na íniʼ yɛ udúg.

²⁴Póboŋɛnɛn tɛn Póol ponyambɛlɛʼ agɛɛlɛ lɛ́ póɛn əgiig na nyɔ́lɛ́ a udi ó Fəlíigsə[95], ngɔ́mɛnaʼ yɛ́ nkóʼkóón, yoom ɛ́dɛmoyɛ́ɛ́lɛ a ngə́.»

²⁵Yiídílən Fəlíigsə nufuuʼ, ɔnɔ́:

²⁶«Oʼkóʼkóón ngɔ́mɛnaʼ yɛ́ nkóʼkóón Fəlíigsə! Mbə́gusóyídi aá! Mɛ Kolóod Lɛsɛ́yas aa mbə́gudílən nufuuʼ nóonɛ.

²⁷Mɔɔd nyóonɛ nyɔ́ mbíim nkodómɛn, Yúdɛn aa iyímugúmin, pɔ́nɔ́ pándamoyóon. Ná njóób lɛ́ alɛ mɔɔd nyɔ́ aáʼkosɔ́dɛ́ɛ́ a ondáŋ ó pibíəniʼ pɛ́ Ɔlɔ́ma, njɛ́ɛ́n na pasɔ́njaa páam, mbáság kaádádɛg, mbámolónɛ a ɔmbɔg yɔ́ɔ́bɔn.

²⁸Wɔnɔ́ ná njɛ́ɛ anyɔ́ŋɛn kolɛŋ kɛbán igə aa yiídə́əŋ náan aa Yúdɛn imə́mugúmin, njɛ́ɛ́n na nyɔ́lɛ́ a yoog yɔɔbɔn ɛ pɛyɔm yɛ́ nkóʼkóón.

²⁹Mbáság kolɛŋ lɛ́ pə́yímugúmin a oʼto ó pɛbán pɛ́ pɛ́adɛ́ʼtɛg pɛcɛm pɛɔ́bɔn. Náa, ntɛdálan kɔbɛ́ igə aa amɛ́ɛ́lɛ kó pálɛɛ́ págomoyóon a kólɛ́, ɔmbɔ́ lɛ́ pámoyáág a yoog yɛ njaan.

³⁰A ngim yɛ́ɛy, mbáság koob lɛ́ Yúdɛn yaáʼkomoyɔ́dɔɔgɛnɛ agomoyóon. Kólɛ́ aa mbádála lɛ́ nyíim mmoodom káag ná olɛɛ́. Mbádɛánɛ na pɔɔ́n pá Yúdɛn pá páyɛ́mosɔ́mɛn lɛ́, píim na pɛsɔ́mɛn pɛɔ́bɔn káag a udi wááŋ.»

³¹Pasɔ́njaa pááság kɛɛlɛ pɛbán piim əgín wɔnɔ́ ná páyɛ́bodɛánɛ. Píísiə́d Póol na udúg, pámɛ́ɛn na nyɔ́lɛ́ a Əntiʼpəʼtilíis.

³²A koany kaáyɛnɛ, pasɔ́njaa pá páyɛ́ɛ na ambaan pááság kudi pɔsɔ́g pá páyɛ́ɛ a ponyambɛlɛʼ a mɔɛn lɛ́ pɛ́ɛn na Póol yuudi, pɔ́lɛ́ pááság kimbuúlini ngim a oʼkág wɔ́ɔ́bɔn wó oʼkóʼkóón.

³³Ná pɔsɔ́g póob páyɛ́ɛ́n əgiig a Səsalə́ə, pɛ́ɛ́dám pɛ́ʼkɛn nufuuʼ na ngɔ́mɛnaʼ yɛ́ nkóʼkóón, pə́mə́musúúlíni Póol.

³⁴Kofɛlɛnɛ́ɛ yaáság kobana nufuuʼ, náa ɔnɔ́ na Póol: «Wɛ, olɛ mɔɔd nyɔ́ a kɛsom kɛ́ nsí kɛ́yaán áŋ?» Náa Póol ɔnɔ́ nyɔ́lɛ́ alɛ o kɛsom kɛ́ nsí kɛ́ Silisíi. Ná Kofɛlɛnɛ́ɛ ɛyóób náan,

³⁵yiísə́ə́ ɔnɔ́ na nyɔ́lɛ́: «Ooʼó! Ndagaaʼkan kɛbán kɛáŋ ná pɔɔd pá páyɛ́gosɔ́mɛn pə́əgiim alon.» Aáság kusəə lɛ́ pɛ́ɛn na nyɔ́lɛ́, pɛ́ɛn amoyɛ́ngɛg a noádɛʼ nó nogóón nó Ɛlóod ayɛ́ɛ́lɛ lɛ́ páwáag.[96]