Read Yambeta Pigólí 24 Bible Online

Pigólí 24 - Yambeta bible

Pigólí 24

¹Mədúg máʼtáan a ngim yɛ́ɛy, Ananɛ́as, Ɔnjaaganɛʼ pɛfɔny nyɔ́ oʼkóʼkóón aáság kiim alon kɔ áay a Səsalə́ə. Əyíím ondáŋ na pasaá pá Yúdɛn pə́mmú, na ɔngaamɛnɛn pɔɔd a pɛbán nyummú, niiŋ lɛ́ Tɛlɛʼtúlus. Pə́yíím ɔsɔ́mɛn Póol a nó Fəlíigsə nyɔ́ ayɛ́ɛ ngɔ́mɛnaʼ yɛ́ nkóʼkóón a Səsalə́ə.

²Fəlíigsə aáság kusəə lɛ́ pámodɔ́ŋɔnɔn Póol, yíim. Ná Póol ayɛ́ɛ aándɛ kɔ, Tɛlɛʼtúlus aáság kəə́bə́ə́ koyɔm wɔnɔ́ ná pɔ́ɔ́sɔ́mɛn Póol. Yiísə́ə́ ɔnɔ́: «Wɛ Fəlíigsə nyɔ́ olɛɛ́ alaamɛ pálɛ́ɛg yɛ́ɛnɛ, wɛ áa wɛɛlɛ́nɛ́ɛ́ wɔnɔ́ ná tɛlɛɛ́ alaa a wiiy. A nsiŋ yaaŋ yɛ́ olɛɛ́ agodáŋananɛ pɛbán áa tɛlɛɛ́ kɔŋɛʼ náanɛ wɔnɔ́ ná tɛlɛɛ́.

³Tɛlɛ əguguúsoyidəni kɛ́fɔlɛ́ a nkə kiim kɛ́ tɛlɛɛ́ ɔɔgɔɔŋ pɛnɛŋ piim, na pɛnɔ piim a oʼto wááŋ.

⁴Náa, agɛɛlɛ lɛ́ ntɛɛ́goosánɛ kɛnɛŋ kɛ́fɔlɛ́, ndaasom tɔgɛ́ɛ́. Ndagoyɔ́sɔ́gɔlɔn agá lɛ́, sɛ́gɔɔ óbɛyɛ́ʼkɛn ɛyaa ɛ́ kɛnɛŋ, ódám ntóɛŋ agoob kɛbán kɛ́ɛnɛ kɔŋɛʼ.

⁵Tɛádála lɛ́ mɔɔd nyóonɛ alɛ ɔmbɛ́ o mɔɔd. Nyɔ́lɛ́ aa alɛɛ́ nkúm yɛ ɛgɔny yɛ́ ɛbɛ́ yɛ́ pɔ́ɔdɔ́ŋɔn lɛ́: Ɛgɔny ɛ́ pɔɔd pá Násalɛd. Náan aa əə́ʼkiim yɛ́ɛlɛɛ́ lɛ́ kɛnɔ kiim kɛ́ pɔɔ́n pá Yúdɛn pálɛɛ́ a nsí ngim, inyuunyugiʼ ídə́əŋ kɔ.

⁶Əyəʼkənyúúnə sɛ́ɛb kɛɛlɛ nkə kɛ́ kíəlumisəni Tɛ́mpɛl, tɛáság kumuúgumin.[97] [

⁸Wɛɛ́nyɔ́amɔɛ́d omaʼkomolóoya, waadála lɛ́ nkə kɛ́ tɛmámosɔ́mɛn a kɛ́lɛ́, kɛ́lɛ fɔ́lɔ́b.»

⁹Yúdɛn yɛ́ ɛyɛ́ɛ kɔ áay ɛyáábɛg unuʼ a pɛsɔ́mɛn pɛ́ɛb, pɔ́nɔ́: «Ɛɛ́ɛ óo, náan aa kɛ́lɛɛ́ fɔ́lɔ́b.»

¹⁰Kofɛlɛnɛ́ɛ yaáság kɛɛ́ʼkɛn tɔgɛ́ɛ́ na Póol lɛ́ ɔ́sɔyɔ. Náa Póol ɔnɔ́: «Ɛɛ́ɛ ɔndaamɛʼ, mbálɛŋ! Ɛ́fɔlɛ́ ɛ́ pɛag aa yɛ́ɛnɛ wɔnɔ́ ná olɛɛ́ agobaasanɛ pɛbán áanɛ a nigúu nɛ́ɛnɛ a sáád. Kólɛ́ aa ndɛɛ́ na ɔʼtɛ́m a kaadɛ yəə́b lɛ́ ntɛ́lɛm a udi wááŋ agaánɔna.

¹¹Nkə kɛ́ɛnɛ kɛ́ ndə́əsəə, olɛ uguŋíən wɛɛ́nyɔ́amɔɛ́d na pɔɔd, págodɛ́anɛ. Kídínjíig mədúg mówád na mábaan wɔnɔ́ ná nyɛɛ́bág a Yolósalɛm agɛɛn anyáadɛ Táán a Tɛ́mpɛl.

¹²Ná njɛ́ɛ́n əgiig kɔ a Yolósalɛm, ɔmbɔ́ a Tɛ́mpɛl oo, ɔmbɔ́ a puog pó pɛɔ́sɔ́gɔ́lɔ́n pó Yúdɛn oo, ɔmbɔ́ əgín lɛ́ kɛnɔ kɛ́ndɛ́ŋ a pálɛ́ɛg oo, mɔɔd adɛʼkáagɛmboan tɛásásananɛ tɔgɛ́ɛ́ na mɔɔd, oó lɛ́ ndáabaya kiʼtúú kɛ́ pɔɔd lɛ́ pə́də́əmini oʼto na nɛlaamɛʼ.

¹³Póonɛ piim pá pə́míim agɛsɔ́mɛn, ɔmbɔ́ úmmuʼ nyɔ́ alɛ́ɛ́ uguloodi lɛ́ nkə kɛ́ pálɛɛ́ agɛsɔ́mɛn a kɛ́lɛ́ kɛ́lɛ fɔ́lɔ́b, ɔdɛɔ́gɔ.

¹⁴Náa, nkə kɛ́ mbálɛŋ, kɛ́lɛ́ kɛ́go aa ndɛɛ́ ogogodɛ́anɛ. Kɛ́lɛ lɛ́: Mɛ, ndɛ əgugudin Táán a ngə́ yɛ́ ngwa yɛ́ pɔ́lɛ́ pɔ́nɔ́ ɛdɛɔ́gɔ ngə́ ɛ sáád. Táán áa ndɛɛ́ əgugudin, Táán ɛ pɛmbáa pə́ə́s. Mbə́líʼtíníí nkə kiim kɛ́ kɛ́lɛɛ́ kidiídílə́ a pagálaʼtaʼ pá pɛcɛm pɛ́ Moyíis, na a pagálaʼtaʼ pá palɔɛgɛʼ pɛbán pá Táán.

¹⁵Mɛ, wɔnɔ́ pɔ́lɛ́ tɛn, ndɛ agomɛna pɛda na Táán lɛ́ ungim, yɛɛn ɔmbɔ́ olaŋ oo, ɔmbɔ́ nyɔ́ ɔmbɛ́ oo, alɛ́ɛ́ koóndɛg a pɛlóŋ[98]

¹⁶Kólɛ́ aa ndɛɛ́ agaágɔ́nɛgɛ pɛnɛŋ piim lɛ́ ndaa kɔŋɛʼ a udi ó Táán na a udi ó pɔɔd, fiɛ́d na kɛbán kɛ́ ndə́gəə́lə́ʼkəni.

¹⁷Njɛ́ɛ mbáʼkɛɛlɛ pɛag piíŋ ntiim a Yolósalɛm. Náan aa njíímin pɔɔ́npásɛ páam na ɛ́lɛ́ɛb ɛ pá póʼkódií yoom, [99] njɛɛ́ʼkɛn tɛn kɛfɔny kɛ́am na Táán.

¹⁸Taa kɛfɔny kɛ́go kɛ́ɛg aa njɛ́ɛ́n agɛɛlɛ a Tɛ́mpɛl wɔnɔ́ ná páyɛ́mboan kɔ. Njɛ́ɛ mbáʼkoman kuyə́əgi pɛbán piim pɛ́ pálɛɛ́ əguŋíən əgəə́fúŋi nkó. Ntɛʼkɛ́ɛ kɔ na kiʼtúú kɛ́ pɔɔd. Ɔmbɔ́ tɛn ɛdodogo ɛ́dɛʼkɛ́ɛ kɔ.

¹⁹Kɔ a Tɛ́mpɛl, pɔɔ́n pá Yúdɛn pə́mmú, pɔsɔ́g pá a kɛsom kɛ́ nsí kɛ́ Əsíi páyɛ́ɛ kɔ. Pɔ́nɔ́ pɔ́lɛ́ pɛ́ɛ́dálan ndáagɛɛlɛ nkə kɛ́ kɛ́lɛɛ́ a ɔsɛd a mɔɛn, ná pɔ́lɛ́ aa pə́míim agɛsɔ́mɛn na wɛ.

²⁰Pɔsɔ́g póonɛ pá pə́də́níí a udi wááŋ, pálɛŋ anɛ́ɛ́n kogodɛ́anɛ kɔbɛ́ igə aa njɛ́ɛ́lɛ náan aa páyɛ́ɛ́n agɛsɔ́mɛn a yoog ɛ pɛyɔm yɛ́ nkóʼkóón ɛ Yúdɛn,

²¹ná kɛ́diɛnɛn əgín lɛ́ nkə kɛ́ɛnɛ kɛ́ nyɛɛ́dɛ́lɛm agosɔyɔ nɛŋo a mɔɛn a udi wɔ́ɔ́bɔn nyɔʼkɔ́: “Oʼto ó kɛbán wó ntɛ́lɛ́mɛ́nɛ́ɛ́ a pɛyɔm a udi wááŋan naánɛ́ aa wóonɛ ólɛɛ́ lɛ́ ndɛ agomɛna pɛda lɛ́ pɛlóŋ pɛ́lɛ́ɛ́ koóndɛg!” »

²²Fəlíigsə yɛɛ́lɛŋɛn pɛbán ɛ́fɔlɛ́ a Ngə́ ɛ Sə́dúk. Yiídə́nígi pɛyɔm, aádóm a wɔɔ́s wɛ́ndɛ́ŋ, ɔnɔ́ na pɔ́lɛ́: «Əgín Lɛsɛ́yas, nkúm ɛ pasɔ́njaa yɛ́ nkóʼkóón yəə́ʼkiim, áay aa ndáasom kɛbán kɛáŋan.»

²³Aáság kodɛ́anɛ na nkúm ɛ kiʼtúú kɛ́ pasɔ́njaa lɛ́ yúúlini na Póol a yoog yɛ njaan, pándáŋ kaag niis na nyɔ́lɛ́. Ɔmbɔ́ pɔsɔ́sɔ́g pə́ə́ŋ tɛn, pə́buudi filí agomoyɛ́ɛlɛnɛ maʼtóʼtóm.

²⁴Mədúg a ngim yɛ́ɛy, pa Fəlíigsə pááság kiim pɔ́lɛ́ ná oʼkán Tulusíiy[100], ntóón ɛ Yúdɛn. Náa Fəlíigsə ɔnɔ́ pə́muyíimin na Póol. Pááság kiim na nyɔ́lɛ́. Póol əə́bə́ə́ komoyáloaŋanan nkə aa kɛ́lɛɛ́ kaag oʼto na Yə́sus Kilíʼtus, páádám ntóɛŋ agolɛŋ koob.

²⁵Náa, ná Póol ayɛ́ɛ aándabodɛ́ananɛ tuə́ áa mɔɔd ogódíí lɛ́ álaa sáád a əngis á Táán, əə́gəə́siəd a nɛmɔɔd, na wɔnɔ́ ná Táán alɛ́ɛ́ koyɔmɛɛ́ pɔɔd, Fəlíigsə ɔyɔ́ɔ́ŋ wɛɛ́y. Náa ɔnɔ́ na nyɔ́lɛ́: «Nɛ́gɔŋ yɛ́ɛnɛ, yaŋ kuúlini, ná ndɔ́ɔgɔɔŋ kɛnɛŋ kə́mmú, ndagoodɔ́ŋɔn.»

²⁶Ayɛ́ɛ agomɛna pɛda lɛ́ Póol aamoyɛ́ʼkɛn mɔɔnɛ́. Kólɛ́ aa ayɛ́ɛ agomodɔ́ŋɔnɛla lɛ́ pɔ́sɔyɔ.

²⁷Kɛ́yáyɛ́lɛ́ɛ́ náan pɛag pɛ́laŋ pɛ́baan. A ngim ɛ pɛag pɛ́ɛb pɛ́baan, Fəlíigsə aáság kuliog a oʼkɔɔ, Pɔ́lsíus Fɛ́stus[101] əmə́əsiəd oʼkɔɔ wə́ə́ŋ. Fəlíigsə yiídí Póol kɔ a yoog yɛ njaan lɛ́ ayɛ́ɛ anyɔ́ŋɛn lɛ́ Yúdɛn ɛ́moógany.