Read Yambeta Pigólí 25 Bible Online

Pigólí 25 - Yambeta bible

Pigólí 25

¹Fɛ́stus ayɛ́ɛ́n a Yolósalɛm mədúg mádáád a ngim yɛ́ yiísiə́d nɛlaamɛʼ a Səsalə́ə.

²Kɔ́gɔ́ɔg, puʼkúm pó payaaganɛʼ pɛfɔny na ponnom pó pɔɔd pá Yúdɛn pə́yíím amoóboan agosɔ́mɛn Póol. Páyɛ́moyɔ́sɔ́gɔ́lɔ́nɛ́ɛ́ lɛ́

³ə́bugóomin agɛɛlɛ lɛ́ pɔ́lɛ́ púúlini na Póol a Yolósalɛm. Kɔmɔɛ́d lɛ́ a fɔ́lɔ́b nkə kɛ́ páyɛ́ɛ anyɔ́ŋɛn kɛ́lɛ lɛ́ pɛ́ɛn amoyáádám a ngə́, pámoyóon.

⁴Náa, Fɛ́stus əyíbuyúlísíni ɔnɔ́ na pɔ́lɛ́: «Ndóo, Póol alɛ a yoog yɛ njaan a Səsalə́ə. Kɛnɛŋ sɔɔŋ nyúúlini kɔ.

⁵Palaamɛʼ pááŋan pálɛ pə́giim kɔ́gɔ́ɔg na mɛ. Pámaʼkɛɛn na kɛbán kɛ́ kɛbɛ́ kɛ́ amɛ́ɛ́lɛ, píim kɔ́gɔ́ɔg, pámosɔ́mɛn.»

⁶Fɛ́stus ayɛ́ɛ́lɛ kɔ na pɔ́lɛ́ a Yolósalɛm mədúg máʼtáan na mádáád, oó lɛ́ mówád, aáság kuúlini a Səsalə́ə. A koany kaáyɛnɛ kóog, aáság kɛɛn ələndin a oʼkɔɔ wə́ə́ŋ ó pɛyɔm, náa ɔnɔ́ pə́muyíimin na Póol. Pááság kiim na nyɔ́lɛ́.

⁷Ná Póol əyíím əgiig, pɔɔ́n pá Yúdɛn pá pə́yíím pádɛ́ɛmɛn a Yolósalɛm pááság kiim amoyágoʼkɛnɛn, páamosóman ɛ́fɔlɛ́ ɛ́ pɛnasáŋ pɛ́ pɛbán a nkó. Pɛbán pɛ́ pádɛʼkɛ́lɛɛ́ pə́guloodi lɛ́ ayɛ́ɛ́lɛ pɛ́lɛ́ náan fɔ́lɔ́b.

⁸Póol nyɔ́lɛ́ ayɛ́ɛ agaánɔna əgín ɔnɔ́: «A noá na pɛcɛm pɛ́ Yúdɛn, ntidə́əŋin kɛbán. Ɔmbɔ́ tɛn a noá na Tɛ́mpɛl, ntiɛlɛnɛ yoom yɛ́ ɛbɛ́ kɔ. Ɔmbɔ́ a noá na nkúm yɛ́ nkóʼkóón yɛ́ a Ɔlɔ́ma, ntiɛlɛnɛ kɛbán kɛ́ kɛbɛ́.»

⁹Wɔnɔ́ ná Fɛ́stus tɛn ayɛ́ɛ əguunə lɛ́ Yúdɛn ɛ́nyɔ́ga na nyɔ́lɛ́, yiíŋíən ɔnɔ́ na Póol əə: «Umə́líʼtíníí lɛ́ pɛ́ɛn na wɛ a Yolósalɛm, pɛ́ɛn agoóyɔmɛ kɔ́gɔ́ɔg a udi wáam əə́?»

¹⁰Póol əyímuyúlísíni ɔnɔ́ na nyɔ́lɛ́: «Ndɛ áanɛ a yoog ɛ pɛyɔm yɛ nkúm yɛ́ nkóʼkóón. Kɔ áanɛ tɛn aa kíəguunə lɛ́ pɛ́njɔmɛ. Nkə kɛ́ kɛbɛ́ kɛ́ mbɛ́ɛ́lɛ́nɛ Yúdɛn kɛ́dɛɔ́gɔ. Wɛɛ́nyɔ́amɔɛ́d waálɛŋ náan kɔŋɛʼ kɔŋɛʼ.

¹¹Pɔ́nɔ́ njɛ́ɛnɛn na nsɔ́ɔ́ lɛ́ mbɛ́ɛ́lɛ fɔ́lɔ́b kɛbán kɛ́ kíəguunə lɛ́ pɛ́ɛnjoon, ntɛʼkɛ́ɛ ogosáŋɛnɛ lɛ́ pádɛyɛ́njoón. Náa, kɛ́maʼkɛɛn lɛ́ pɛnyaʼ aa pálɛɛ́ a pɛ́lɛ́ a nkə kiim kɛ́ pálɛɛ́ agɛsɔ́mɛn, mɔɔd ɔdɛɔ́gɔ lɛ́ yíiʼti a ɔmbɔg yɔ́ɔ́bɔn. Ndaanyɔ́ŋɛn lɛ́ nkúm yɛ́ nkóʼkóón yɛ́ a Ɔlɔ́ma aa yɛ́njɔmɛɛ́.»

¹²Fɛ́stus yɛɛ́yáŋ agɛɛn əŋíən na pɔɔd pə́ə́ŋ pá ndə́b lɛ́ pə́muuləb tuə́ áa nyɔ́lɛ́ yɛ́ɛlɛɛ́. Áay anɛ́ɛ́n áa yiísə́ə́ ɔnɔ́: «Ooʼó! Adɛ́ wɔʼkɔ́ əgín nkúm yɛ́ nkóʼkóón yɛ́ a Ɔlɔ́ma aa ɛ́goóyɔmɛɛ́ á? Wagɛɛn anɛ́ɛ́n ɔyɔm kɔ́gɔ́ɔg a udi wə́ə́ŋ.»

¹³Ngab ɛ mədúg yimmú a ngim yɛ́ɛy, pa nkúm Agɛlɛ́ʼpa pɔ́lɛ́ na móŋŋí nyɔ́ ɔʼkɛ́ɛd Pələníis pááság kiim kɔ áay a Səsalə́ə əgiim osoyidi Fɛ́stus.

¹⁴Wɔnɔ́ ná pííbúlím kɔ áay ngab ɛ mədúg, Fɛ́stus Ayáloáŋánánɛ́ɛ́ kɛbán kɛ́ Póol na nkúm Agɛlɛ́ʼpa, ɔnɔ́: «Ndɛ na mɔɔd áanɛ nyɔ́ Fəlíigsə yiídí ə́mə́dí a yoog yɛ njaan.

¹⁵Ná njɛ́ɛ́n a Yolósalɛm, puʼkúm pó payaaganɛʼ pɛfɔny na palaamɛʼ pá Yúdɛn pə́yíím amosɔ́mɛn na mɛ. Pə́yíŋíən lɛ́ mbaasɛ kɛbán kiə́ŋ lɛ́ alɛ na nsɔ́ɔ́.

¹⁶Njíbuyúlísíni nyɔʼkɔ́ na pɔ́lɛ́: Ndóo, pɔɔ́n pá Ɔlɔ́ma pálɛ na kɛcɛm lɛ́ pádɛyɛ́ʼkɛn nsɔ́ɔ́ na mɔɔd pádɛmoyɔ́mɛ a udi ó pɔɔd pá pámámosɔ́mɛn, pádɛób tɛn pɛánɔ́ná piə́ŋ.

¹⁷Náan aa tiyíímə́nən áanɛ na pɔ́lɛ́ ondáŋ. Ná tiyíím əgiig tɛn, ntɛʼkáasánɛ kɛnɛŋ. A koany kaáyɛnɛ, mbáság kɛɛn ələndin a oʼkɔɔ ó pɛyɔm, nyɔʼkɔ́ pínyiimin na mɔɔd ogo.

¹⁸Pɔɔd pá pə́yíím amosɔ́mɛn pááság kiim adɛ́lɛm, pə́ə́siə́d tɔgɛ́ɛ́. Náa, pə́diʼkə́əsəə kɛbán na kɛbán kɛ́ kɛbɛ́ ɔmbɔ́ kímuʼ kɛ́ ayɛ́ɛ́lɛ wɔnɔ́ ná mɛ njɛ́ɛ agofɛg.

¹⁹Əgín moyaa mó pɛbán mó móadɛ́ʼtɛg kəə́liʼtiniʼ koɔ́bɔn aa páyɛ́ɛ na mólɛ́, na kɛbán kɛ́ mɔɔd nyummú niiŋ lɛ́ Yə́sus nyɔ́ yiígú, náa Póol nyɔ́lɛ́ alɛɛ́ əgusəə lɛ́ əligi əgín a ɔlaa.

²⁰Kɛbán wɔnɔ́ kɛ́ɛg náan, ntɛʼkɛ́ɛ agolɛŋ tuə́ áa mbaasɛɛ́ kɛ́lɛ́. Kólɛ́ aa nyiíŋíən na Póol nyɔʼkɔ́ əə, əmə́líʼtíníí lɛ́ pɛ́ɛn na nyɔ́lɛ́ a Yolósalɛm, pɛ́ɛn asom kɛbán kiə́ŋ kɛ́ɛg kɔ́gɔ́ɔg əə́?

²¹Náa, əyínyuúlísíni ɔnɔ́ nyɔ́lɛ́ nyóon əə́ŋíən lɛ́ nkúm yɛ́ nkóʼkóón yɛ́ a Ɔlɔ́ma aa ɛ́moóyɔmɛɛ́. Mbáság kusəə lɛ́ píiʼkini kɛɛn amoolɔg a yoog yɛ njaan agɛɛn əgiig əgín a kɛnɛŋ kɛ́ ndɛ́ɛ́ komodómɛ́ɛ́ kɔ́gɔ́ɔg a nó nkúm yɛ́ nkóʼkóón yɛ́ a Ɔlɔ́ma.»

²²Agɛlɛ́ʼpa aáság kusəə ɔnɔ́ na Fɛ́stus: «Ndaanyɔ́ŋɛn lɛ́ mɔɔd nyóon ɔ́sɔyɔ, mɛɛ́nyɔ́amɔɛ́d ndáagoob.» Náa Fɛ́stus ɔnɔ́ na nyɔ́lɛ́: «Tí anɛ́ɛ́n, na koany waamoyóob.»

²³Ná koany kóyááyɛ́nɛ, pa Agɛlɛ́ʼpa pɔ́lɛ́ na móŋŋí Pələníis pááság kiim alon na ɛ́fɔlɛ́ ɛ́ pɔɔd yɛ́ ɛ́yɛ́ɛ agomogóɛn maság, páagaágan pɛʼkɛ́ʼkɛ́. Páyɛ́ɛ́n ɔsɔd a yoog ɛ pɛyɔm yɛ́ nkóʼkóón na puʼkúm pó pasɔ́njaa, na ponnom pó pɔɔd pá a pálɛ́ɛg. Náa Fɛ́stus ɔnɔ́ píim na Póol. Pááság kiim na nyɔ́lɛ́.

²⁴Fɛ́stus aáság kusiəd tɔgɛ́ɛ́, ɔnɔ́: «Nkúm Agɛlɛ́ʼpa, na pəŋi tɛn piim pá polɛɛ́ áanɛ, táláan mɔɔd nyóonɛ nyɔ́ alɛɛ́ a udi wááŋan. Yúdɛn ngim iyíím amosɔ́mɛn na mɛ a Yolósalɛm, pə́mə́yiim pínjə́ən tɛn na pɛ́lɛ́ áanɛ a Səsalə́ə. Páyɛ́ɛ asása na toɛn pɔ́nɔ́ nyóon ɔdɛɔ́gɔ lɛ́ álaa.

²⁵Náa, mɛ ntɛɔ́ŋɛn yoom na yoom yɛ́ ɛbɛ́ yɛ́ amɛ́ɛ́lɛ yɛ́ ɛ́lɛɛ́ lɛ́ a oʼto wóow pámoyóon. Náa, wɔnɔ́ ná nyɔ́lɛ́nyɔ́amɔɛ́d alɛɛ́ əgusəə lɛ́ əgín nkúm yɛ́ nkóʼkóón yɛ́ a Ɔlɔ́ma aa ɛ́moóyɔmɛɛ́, mɛ mbə́gumin anɛ́ɛ́n lɛ́ ndamoodom kɔ́gɔ́ɔg.

²⁶Ntɛɔ́gɔ anɛ́ɛ́n na ɛgom ɛ́ fɔ́lɔ́b fɔ́lɔ́b yɛ́ ndɛɛ́ ugudilən nkúm yɛ́ nkóʼkóón a yɛ́lɛ́. Kólɛ́ aa mbɛ́ɛ́lɛ lɛ́ yíim áanɛ a udi wááŋan, kɔŋɛʼ kɔŋɛʼ a udi wááŋ ó wɛ nkúm Agɛlɛ́ʼpa lɛ́ ómolóoya. Amaʼkɛɛlɛ ná waámolóoya, mɛ ndɔɔgɔɔŋ nkə aa ntilənií nkúm yɛ́ a Ɔlɔ́ma.

²⁷A nɛ́am, mbádála lɛ́ kɛ́dɛálɛŋ koóbanan náan lɛ́ ntə́əmini mɔɔd o yoog yɛ njaan mmoodom a Ɔlɔ́ma ntɛlɛŋ komoáŋɛ mogom mó páyɛ́mosɔ́mɛn a mólɛ́.»